Furnace's Profile

星期五，天色十分好。筆者請了一天假，與太座過大海輕鬆一吓。當然輕鬆嘅方法並非過過手癮，而是口癮。今次嘅主角係今年澳門米芝蓮三星食肆，位於葡京嘅盧貝松。是兩星期前作出的安排，有Gaddi's的珠玉在前，背負Robuchon嘅大名，令人期待。預約了十二時半午飯時段，準時到達。位於集酒色財氣於一身、但顯得老態龍鍾嘅葡京，一間講求優雅的法國餐廳，有點格格不入。餐廳主調色是藍色，是高貴典雅嘅象徵。論環境，沒有Gaddi's的華麗，空間感亦因樓底嘅限制，有所欠缺。細看之下，餐具是Christofle，可是滿臉風霜，在這種級數的餐廳，是有點出人意表。麵包籃新鮮出爐，有五、六款提供，熱辣辣，差不到那裡去。不過有點烘得過了火，表層不夠鬆脆，比Gaddi's是起碼遜一籌；牛油在餐車上呈柱狀，由服務員於客人前用刀片刮在牛油碟上。香味十分淡，入口亦沒有預期之牛奶酥香，整體來說，是有一些失望。未上頭盤，先來一客醒胃的青蘋果mousse，雪得冰凍一點，令青蘋果的清新更加突出。除了青蘋果蓉之外，原來還將西芹切成細細粒，可口非常，亦為之後的大餐作了最好嘅準備。筆者的前菜是釀菌(L'œuf de poule japonais)，在菌上主要釀了慢煮日本蛋，口感是出奇的creamy，味濃而不溜，嫌味太濃的，呷一口伴碟的火箭菜，平衡得恰到好處。溫度是微微凍了一點，可能是三、兩度，可以好一點。筆者一如之前在Gaddi's嘅選擇，點了羊鞍肉(L'agneau)。論羊鞍嘅質素，是幾乎沒有可以挑剔之處；火喉剛好，肉色呈嫩粉紅，肉質幼滑。嗜羊嘅筆者，嫌羊鞍肉嫩滑之餘，羶味不足。相比起Gaddi's(詳情見另文)，不可說遜色，但是少了一份驚喜。飽嚐美食後，又是最令女士們神魂顛倒的甜品時間。dessert trolley一出，琳瑯滿目，相信沒有一位正常嘅雌性物體可以抗拒的。款款甜品皆做得十分美侖美奐，種種皆想試一口，可惜每個午餐只可選三款而已。萬個不願，也要做痛苦嘅決定。側聞鄰桌點了拿破崙蛋糕，服務員手起刀落。裂帛般的聲音，光是此也可知此甜品是必食之選。另外是選了苞芙及朱古力撻，也是可口非常，是女士們嘅天堂。只是服務員大意了，事後才知有雪糕可供選擇，太座氣惱不已，「敦促」筆者一定要反映。除了在顧客意見卡反映之外，「服務」一欄也扣了一分。午市嘅3-course set是十分抵食的($398 + 10% service charge)。因為飲了香檳，每人再加多二百蚊，這種級數，都唔算貴。在此謝過多年來贊助不少嘅賭客。更多資料可於以下網址瀏覽：http://kenluihy.blogspot.com/2010/12/robuchon-galera.html…Read More

星期六，國慶翌日，秋風漸起，悶熱天中帶有一絲爽意。也就是這一天，為太座預備了一頓盛宴。預約於兩星期前已進行，雖然歷史超過五十年，但一點也不落伍。只消在網上按幾下鍵盤，預約手續便成，簡單方便。晚宴前一晚，餐廳給了一個溫馨提示，亦詢問客人有冇特別要求，十分貼心。沒有色彩班斑斕嘅霓虹燈，也沒有浮誇的擺設，餐廳嘅招牌是含蓄地掛在一旁。不過，招牌的藍色地毯，獨立的古老升降機，隱隱然散發出貴族般的優雅。踏入升降機，雖只是一層之遙，但時間像溜得特別慢，以為咁唔好彩，碰上升降機故障，升降機門徐徐打開。享受一頓法式晚宴，兩、三個鐘少不了，慢速的升降機，好像又變得理所當然。在門前店員稍為核對一下資料後，便被引領進這個華麗的大廳。高高嘅樓底，配上大吊燈，如一的藍地毯，桌子之間合適嘅距離，喁喁私語，不失私隱。每張桌子都擺放一套洋燭台，浪漫滿溢，果然繼承了法國人嘅浪漫。吹毛求疵的，是洋燭台有點變了形，左右不對稱，一雙洋燭不是筆直的聳立著。這個級數嘅餐廳，比分自然要嚴謹，0.5分就此扣了。是晚滴酒不沾，只點了清水，但這水卻殊不簡單，後文再交代。服務員先端上兩款牛油，分別是有鹽及無鹽的。味道呈淡乳香，入口滑溜，絕對不能錯過。配合無限量供應之包點，具畫龍點晴之效。可供任點的餐前麵包有四款，款款精緻，筆者貪心，四款也試過，麵包不僅密度高，而且鬆軟非常。想吃多一點，但恐防眼闊肚窄，也就放棄了。點菜是頗令人費神之事，尤其是Gaddi's嘅餐牌，林林總總，款款都想試，幸得服務員為每款菜作詳細介紹，兼且會予拿不定主意的客人加入一點適當的個人意見。這些表現，不是對每款菜色了然於胸是不能做到的。筆者嘅頭盤是水煮帶子配魚子 (lightly-poached scallops with Oscietra caviar in a bouillabaisse dressing)。水煮帶子，火喉拿揑得恰到好處，用餐刀切開，感覺到「黏」刀嘅感覺，原來除了鮑魚可以溏心外，帶子也可以。旁邊加了幾片薄塊，是龍蝦湯之精華，中間的帶子，釀滿了矜貴的鱘魚子，有淡而長久嘅鹹香。主菜方面，筆者是乳飼烤羊 (roasted milk fed Aveyron lamb with gratinated potatoes and Provencale vegetables)。烤羊是筆者最愛的菜色，在家中、在外頭都吃過不少。可以說，這烤羊是令筆者最難忘之烤羊。首先，選料上乘，阿維朗之羊肉，脂肪分佈十分平均，故入口是啖啖甘香豐腴；肉質幼細非常，彷彿在每條肌理中都洋溢著羊肉之酥香。大廚嘅烤羊功夫一流，表面是煎得甘香，但只是一層之隔，已經是medium rare，像是將兩種唔同生熟羊肉貼在一起，不愧是煮羊高手，也是Gaddi’s的signature dish。Side dish係gratinated potatoes，無論賣相、氣味一流，但真的已擠不進肚裡了。吃得有點過了火，筆者以生果配雪笆 (citrus fruit salad with mint, pink grapefruit-vanilla sherbet)中和。果肉包括橙、柚子、西柚等，上面放上雪芭，用乾冰保持冰凍，最後淋上薄荷汁，令感覺更加冰涼。果肉粒粒結實多汁，味道鮮甜；雪芭甜而不膩，減輕胃部壓力。還有精緻的petit four作結，每件也做得一絲不苟，打從生理到心理都十分滿足。食物質素、烹調技巧皆無懈可擊，「味道」一欄那有不滿分之理。服務十分妥貼。每一位服務員對餐牌瞭如指掌，是基本要求，難得的是每一位都有足夠的知識，能蠻有信心地為客人提供合適的建議，是專業的表現。離開餐廳、在升降機等待時，華藉領班從老遠趕到店前送行，「服務」一項也「只能」給予滿分。這頓晚餐消費不菲。不過，連太座也同意，這裡是值得一來再來的。(更多內容可於下列網址瀏覽：http://kenluihy.blogspot.com/2010/10/2010-gaddis.html）…Read More

星期六，小女第一次正式去街街，為嘅係添置BB車。作為太座其中一位吊兒郎當嘅好友，升格為叔父輩嘅大叔對小女愛護有加，想也不想便淘腰包送小女嘅第一部車。幾個大唔透，一邊睇說明書，一邊即席安裝及練習操作，一番功夫之後，已經是八時多。晚飯地點，想空間大一點，好讓有位置給BB車，便想起了這裡。嚟這裡打波就試得多，食飯都係第一次。樓底甚高，就算小女喊得聲嘶力竭，也不很應聲，不是太騷擾其他人。食物水準沒有什麼驚喜，但是考慮到價錢，又確算不俗。最有印象的是雪菜肉崧豆腐(正確名字已記不起)，豆腐是十分滑溜，而且味道不太濃烈，伴著白飯一起吃最好；排骨醃得入味且夠晒耐，骨肉輕易分離。選用了肉排，一層肥一層瘦的，既甘香且肉質有彈性；霸王雞上放滿了椒絲、韮黃等，這般做法，味道是不能傳到雞肉上的。幸好雞肉尚算嫩滑，入口出奇的有一點雞味。土魷蒸肉餅瘦肉比較多，缺少咗豬肉嘅甘香味，此空白被魷魚及香菇填補了。由於少了肥肉，吃起來也冇咁滑；印象中梅菜蒸鯇魚是上了年紀嘅男士恩物，感覺老積。其實好吃的不比梅菜扣肉差。火喉上是差了一點，梅菜嘅甜香味沒有完全迫入鯇魚肉裡；金銀蛋浸莧菜正常水準，沒有什麼特別。平均消費是一百蚊一個人，有這樣大嘅場所，減少對其他人嘅影響，是有BB嘅家庭嘅選擇之一。…Read More

於「權發」飽頓一餐後，madam自動自覺提出一項唔會有人反對嘅建議：食甜品。「甜品工房」可說是七姊妹道附近最好嘅甜品店，甜品款式十分多，而且間中有啲變化，所以熟客都有不少。是晚，縱然比正常食量食多咗一點，也難忍食布甸嘅衝動。北海道牛乳布甸是筆者之選。用嘅材料是北海道3.6牛乳，雖然肥，但奶香充盈是肯定的。白雪雪嘅外表，用鐵匙督開，裂紋是順滑筆直的，切面像剝了殼嘅雞蛋一樣。入口感覺是滑得可以，有如蛋撻般滑溜；奶味一點不霸道，一點一滴的，如細水長流，在口腔內逗留良久。十六蚊一個，十分便宜，值得一試。…Read More

星期六，小女出世已兩星期了，甚受一眾朋友歡迎，較熟絡的還爭相希望與小女上契。是晚，兩位剛榮升為auntie級嘅朋友探一探小女，順道與筆者討論小女嘅取名。時間已是晚上差不多九時了，大家都唔想去其他地方食嘢，再加上madam對「權發」呢個品牌念念不忘，於是從筆者家行了兩個街口，來到了這兒。雖然到達時已經九點鐘過外，但顧客依然是人山人海。三個人嘅座位，也要等一會兒才能夠安排。望見鄰桌嘅炸物俱造得金黃香脆，甚是吸引。可惜，大家經過一輪湊B考驗後，俱疲憊不已，只好點了幾碟小炒了事。先是豉汁煮聖子，本是不帶什麼期望嘅菜色，效果卻喜出望外。聖子雖小，但肉質十分爽口，豉汁不濃不烈，能吃出本身鮮味，而且一點腥味也沒有。只是間中食到有一點沙，是小瑕疵；香蔥雞蔥香不甚激烈，雞肉也算彈牙可口。唯獨是雞皮上嘅脂肪積聚比正常的多，雞皮還是少食比較好；鹹魚炒芥蘭火喉剛好，而且炒得相當均勻，每條莖是如一的剛熟，咬落還保留新鮮蔬菜嘅爽脆；最後一味餸是翠玉瓜炒豬面青，也是鑊氣十足，每塊翠玉瓜入口有爽勁，豬肉亦嫩滑非常。這麼令人意外嘅小炒，三扒兩撥，清掉了桌上幾碗白飯。地方雖然緊迫，地下也是黏黏的，有些令人不安，但小炒有如大排檔的，夠快而且夠鑊氣，是食得過癮的一餐。好嘅烹調技巧，不論外在環境如何惡劣(當然要有最基本嘅衛生)，也能造出好菜色，是謂「大巧不工」。…Read More

星期日，由這天起，筆者嘅角色除了是別人嘅丈夫之外，也是女兒嘅父親。身份角色不同了，責任也大了。是日要先往銅鑼灣辦一點事，再到醫院探望正在休養中嘅太座及小女。太耐冇食「何洪記」了，難得一個人在周日上午，找一個位子也比較易。戒吃牛，冇得食俾公仔箱唱到街知巷聞、成五十幾蚊一碟嘅干炒牛河，只好點了一份雲吞撈麵。湯是清徹見底，入口甘香，是大地魚及蝦(連殼)餚出來嘅鮮味，不是人工味道可取替。而且加了一些韮黃及黑椒，無怪乎喝起來特別暖胃；麵條方面，是彈牙得有點出奇。初時細啖食唔多覺，都後來大啖咀嚼時，竟然發現了丁點苦澀味！雲吞亦是令人失望的包得求其，雲吞尾擺短之餘，部份亦支離破碎。餡料蝦肉與豬肉嘅比例是一比一，既得蝦肉嘅爽口，也有豬肉嘅甘香，合格過關。四十二蚊嘅雲吞撈麵，對比以上所說，一定物非所值。要不是其湯底救了一點分數，換來的已經是一張「喊」面。…Read More

一頓只可充饑、不甚回味嘅越南菜之後，madam提議再食一頓甜品。在東大街吃甜品，「老媽」是最出名的了，顧客數量可知一二。是晚每人各選一款甜品。首先是木糠凍餅，其實與木糠布甸無疑。同樣是雪得非常之堅硬，不是咁輕易用匙「撬開」；入口無疑是充滿奶香的，不過吃起來很費勁，筆者對之不甚矣矣。拿破崙蛋糕高高的，酥皮極之鬆化，問題是怎樣才能吃得企理。答案是除非閣下天生異稟，一啖可以吞下，否則是「滿目瘡痍」了；就算真的可以一啖吞掉，又可來樂趣呢！好的拿破崙蛋糕，講求的是酥皮嘅層數，而不是高度。以層數多、結構緊密，富有牛油香為上品。以前嘅Grand Hyatt，又或者近期熱爆嘅九龍城黃生嘅舖頭，是一個好示範。最後是蛋白杏仁茶，水了了的，入口杏仁味稀薄，吃了一口，沒有再吃嘅興趣了。是老媽年紀大了，造詣退步了嗎？再仔細研究牆上嘅留言卡，當中有不少是出自同一小朋友嘅手筆。再看網上嘅食評，雪花冰最受歡迎。看來，是筆者選擇錯誤了。…Read More

星期五，太座入院了，亦預示了小女於母體內，經過差不多十個月嘅發育之後，已經按奈不住要走出來望一望呢個世界。一班太座嘅摰友於晚上嚟到醫院，希望以第一身與太座一起經歷呢個重要一刻。可是，對第一胎嘅孕婦嚟講，整個生育嘅過程是漫長的。過了探訪時間，太座未有進一步嘅動靜，筆者與友人只好離開醫院，往東大街祭五臟廟。Madam好像是第一次嚟到東大街食嘢，顯得格外興奮。至於筆者及另一友人J，已留下不少腳毛，所以選擇權落在Madam身上。這次中選的是位於「安利」舊舖位嘅一間越南菜館。時值差不多九點鐘，大家已餓得剩下半條人命。約略看來餐牌之後，便飛快地點了幾款比較容易烹調嘅菜色。香茅豬扒檬粉外表似模似樣，豬扒味道可口，肉質鬆軟。其實要令豬肉鬆軟，一點也不難，不需要用梳打粉，只要用生粉及生抽去醃，肉質便自自然鬆軟之餘，又不失彈性。至於檬粉質素普通而已；香茅雞翼與豬扒同樣地可口，也不錯。肉燥紅米飯雖然做法簡單，但不知為何弄得水汪汪的，而且肉燥一點也不香，只有肥膩嘅份兒。原意是畫龍點睛的一塊煎蛋，做得馬馬虎虎，既不熱，也神秘地濕漉漉的，是一大敗筆；越式春卷同樣是乏善可陳，春卷皮十分韌，也不可口，就算餡料豐富也是枉然，欠佳嘅春卷皮，已失去其神髓；最後是蒸粉皮，該是如薄膜般、呈半透明嘅粉皮，變得厚墊墊的。望上去，心已涼了半截。筆者與J有密契地相視一刻，再埋頭苦吃，心想如不是餓得瘋了，決不會在這裡浪費quota。埋單每人五十二蚊，價錢雖相宜，但叫筆者回頭，難矣。以上內容亦轉載於下列網誌：http://kenluihy.blogspot.com/2010/02/blog-post.html…Read More

星期六，搬家後父母首次家訪。新居比舊居更大，而且有多一個洗手間，番工時間唔駛爭著用。家父亦要熟習附近環境，好使孫女出世之後幫手照顧。到晚飯時間，見父母少嚟港島區，所以點都要試一試區內名店「東寶」。「東寶」嘅魅力非同小可，雖然水準差了，但什麼時候仍然高朋滿座。「東寶」嘅橫流所及，連帶隔離嘅店舖都旺起來，「財記」便是一例。簡單的幾碟小菜，先是太座要求嘅沙拉骨。說實話，賣相並不討好。沙拉醬帶微橙色，碟旁陪襯嘅蕃茄片，寒酸地放上幾片，一點陪襯作用也沒有。可是食落肉質酥軟，肉汁豐富，味道甘香可口；霸王雞用了一些香蔥、辣椒爆香。雞肉醃得入味，而且肉質沒有失去彈性。在沒有真正天然走地雞嘅今天，帶點蔥油辣味嘅雞肉無疑是新鮮雞味以外嘅次佳選擇；魚香油麥菜及雲耳炒翠肉瓜，鑊氣是足夠的，稍嫌油膩了一點。一邊吃，一邊聽家父想當年。這是家父那一輩與子女嘅溝通方法；隔離枱一大班廿幾三十嵗嘅壯漢，一邊圍著枱玩三公，粗言穢語少不了；一邊教枱中幾名細路點樣砌牌。這是呢一代嘅溝通方法。時代不同了，筆者可能是舊式人，對這一代是十萬個不理解。埋單只是二百多一點，平均每人五十四蚊，已經有雞、有肉又有菜，在一般茶餐廳，好一點的，也要這般消費。…Read More

星期五晚，回暖了。看著太座嘅肚子位置一天比一天落，預示了新成員好快就會同大家見面了。「你老婆生咗未？」成為近日最常見嘅開場白。是晚，太座想起「民聲」嘅蒸肉餅。可惜，當我們來到嘅時候，已經有大批人等候中。以太座現在嘅狀態，那能乾等呢？於是便走往隔離舖一試其煲仔飯。這裡嘅煲仔飯共有十一款，而且可以cross-over，當然雙拼要加錢啦。不是用傳統炭爐煮出來嘅煲仔飯，出爐時是少了一股炭香味，不過火喉掌握更加得心應手。燒得火紅嘅瓦煲，打開煲蓋，加點自家製嘅豉油汁，再蓋上焗一分鐘，動作一氣呵成。先試臘腸排骨飯，排骨裡嘅豬骨被熱力迫出，摻到每一粒米中。入口有豬油甘香，而且飯是粒粒軟糯，如不是飯不夠米氣嘅話，相信已屬極品；臘腸嘅質素較為普通，食落不太香，而且是瘦咗啲。最好嘅地方就係鍋巴，由於焗嘅時間剛好，鍋巴不燶之餘，還可以整塊起嚟食，卜卜脆，帶有豉油汁嘅甜味，滿足。食煲仔飯，時間嘅掌握至關重要。只是遲咗五分鐘打開煲蓋攪動，北菇滑雞飯嘅飯焦已經相去十萬八千里，有些還燒焦了。雞比較多骨少肉，但雞肉亦算嫩滑。至於雞味，除非是冇激素兼且是走地雞，否則如石頭鑽出血。煲仔飯三十五蚊，送一碟油菜。雖然只得幾兩菜，這價錢也是抵食夾大件的。…Read More

星期四，氣溫非常涼快。日前接到某雜誌嘅電話，獲邀出席是晚嘅宴會，一嚐新科二星總廚嘅手藝。有食神當然是一件美事，不過離小女預產期非常接近，一頓免費嘅美宴，隨時會因為小女提前幾天出世而泡湯。筆者當然想小女能夠早一點與父母見面；另一方面又十分期待是次香宮宴，弄得心情十分矛盾。筆者家在港島區，平日甚少往九龍區用膳，「香宮」更是筆者之前未幫襯過。取名「香宮」，氣派果然不凡，如宮廷般華麗。樓底十分高，裝修富有中式格調。牆上嘅字畫、餐牌，以至桌布及食具，不論真膺，均是漂亮嘅藝術品。筆者最愛便是餐牌上嘅鴛鴦圖。宴會開始之前，「香宮」嘅總廚葉志祥師傅特地抽時間為各食客講解鮑魚這食材及幾種簡單的，在家中也能做到的煮鮑魚嘅方法，還即席示範是晚第一道菜色牛油果涼伴南非鮑。據葉師傅所講，這道菜嘅設計是經過多次反覆嘅嘗試才完成。是將南非罐頭鮑切片，再梅花間竹的放進牛油果肉。這個配搭看來十分奇怪，不過食落嘅效果卻是出奇地好。牛油果香濃嘅果肉味，將鮑魚嘅鮮味帶了出來。由於是涼伴嘅關係，如果將之當作日式刺身來吃，加一點新鮮芥辣，味道嘅層次便會更加豐富。第二道菜色是蟹皇燴生翅，單看其金黃色的外表，以及濃稠嘅湯底，加上陣陣蟹黃香，可知蟹皇嘅份量絕非敷衍了事。出於鯊魚是瀕危動物，加上對魚翅這種冇本身味道嘅東西，筆者從來都不太好，故已戒吃了。記憶中食過嘅蟹皇翅，這裡算是數一數二了。不過，用上了粒粒蟹黃嘅「龍景軒」，其驚喜程度尤甚。第一道主菜是頭抽煎青衣球，青衣肉質本細軟黏膠，並非筆者那杯茶，幸好以頭抽泡製嘅薄茨汁，特別香純濃郁，配合煎得小小脆嘅魚肉表面，味道不俗。相比之下，筆者還是屬意肉質爽脆嘅海斑類。之後便是竹笙露筍卷。每枝露筍均以竹笙包裹著，而且十分嫩滑無渣，鮮嫩碧綠，是一等嘅貨色。加上南瓜汁嘅香甜，雖然清淡，但依然可以維持味蕾嘅活躍程度。緊接的是生菜包蠔豉崧，是一道頗費功夫嘅菜色。是將蠔豉及馬蹄切成細粒再爆香，用生菜葉包起來，加一點醬汁來吃。蠔豉本身已經濃縮了蠔嘅鮮香味，再切成細粒。由於與空氣接觸嘅面積大咗，所以更加「蠔」氣干雲，未上枱，陣陣蠔香已撲鼻而來。加入馬蹄，令口感添上爽脆。新年飯，一碟生炒臘味糯米飯是少不了。臘味種類繁多，而且有蝦干、冬菇粒、芝麻、香蔥等，吃起來幾種香氣共冶一爐，那有不香之理；糯米炒得粒粒分明，色澤如一，入口軟糯，也是沒有可批評嘅地方。唯一可挑剔之處，只是吃到最後味道太濃重，開始吃不消，還感覺鹹了一點。最後嘅甜品環節。煎堆外貌看似普通不過，但當一口咬下，便知此非凡品。其一是非常香口之餘，完全沒有油膩感；此外口感軟糯，但不會黏著牙齒間，影響咀嚼及口腔衛生。吃飽以後，大家暢談一番對來年香港嘅展望、對雜誌嘅感想及建議。唔少得的是對身為準媽媽嘅太座，傳授一些教子心得。既滿足了食慾，又增進了不少為人父母嘅知識，是令人難忘嘅一個晚上。後記：宴會翌日晚，太座開始感覺陣痛，隨即進了醫院，於星期六下午誕下小女。筆者嘅小女真識食，要食完好嘢先出世。筆者一定會更加努力工作，給家人更多美食體驗。更多資料可於以下網址瀏覽：http://kenluihy.blogspot.com/2010/01/blog-post_26.html…Read More

星期三，太座好友P到新居拜訪，分享懷孕嘅經驗。正考慮如何安頓兩名大肚婆，加一名大肚公嘅吃飯問題，忽然想起舅仔日前提起電氣道街市嘅泰國菜館，在沒有反對嘅情況下，三人行便朝街市進發。三個人，嗌四樣嘢。大肚婆需要葉酸，一碟綠色嘅餸必不可少，便先來一碟馬拉盞炒芥蘭。馬拉盞不是呈蝦糕狀，而是像蝦干般有大有細的。吃落鹹香味足夠，菜亦是爽脆多汁。之後是筆者到泰國菜館必點嘅柚子蝦沙律，這裡嘅柚子肉不是搣成一粒粒嘅果肉，而是一「楷楷」的，感覺是做得比較匆忙。柚子味道過於酸澀，幸好椰絲下得頗慷慨，吃落是啖啖嘅椰香，算是一點補償。蝦肉也算爽脆，但當然是食唔出什麼鮮味了。大家原以為菠蘿炒飯是用菠蘿盛載著的，結果與一般炒飯無異。論香氣雖仍聞得到淡淡嘅菠蘿香，但總比用菠蘿裝載的遜色一點。炒飯本身濕了一點，不過炒得十分均勻，有洋蔥粒及肉鬆吊味，味道不太濃，十分易入口。最後是泰式燒雞，外皮是燒得有點微焦，可是吃落非但沒有苦澀味，還有一點椰子嘅甜味，原來是經過椰奶醃浸過的，而且有一種沙爹嘅香味。這種烹調手法實在出色。打開雞肉至骨，是剛好的熟，所以肉質嫩滑 ；亦可能浸過椰奶，效果有如敷過 mask般，只是說笑，作不得準。這一道菜，是筆者嘅推介菜。大家吃得飽飽的，但代價只是二百一十蚊，友人P初時還以為聽錯了。待回過神之後，友人P決定萬歲，筆者與太座不需付出分毫。後來翻查網上其他評論，可堪一試嘅菜色還真不少，值得找一個時間再嚟一次。更多資料可於下列網址瀏覽：http://kenluihy.blogspot.com/2010/01/blog-post_24.html…Read More

星期天，天晴。需要到中環一帶換領禮物，最方便就是先於擺花街一帶祭五臟廟，之後轉一個街口便到禮品換領處。在擺花街嘅食店，筆者幾乎每一間都幫襯過。是日到此，望見大大個「沾仔記」嘅招牌，想睇下有冇退步。餐牌是十年如一日嘅簡單，只有雲吞、鯪魚球及鮮牛肉嘅配搭。叫了一碗雲吞麵，不一會便奉上了。一大撮麵放在面，三粒大碼雲吞放在底。湯底微甜而不涸喉，太座難得的冇反對，筆者於是飲多一、兩匙；麵條十分彈牙，一點鹼水味也沒有，十分滿意；雲吞雖云大碼，但事實上比以前的細粒了。不過，雲吞饀料依舊堅持多蝦、多肉，既有豬肉嘅甘香，亦兼得蝦肉嘅爽脆。由於雲吞屬大碼，所以冇傳統的雲吞皮裙腳。一碗只收十六蚊，與「貴」字扯不上任何關係。雖然新舖嘅面積比以前大了，不過人流是十分多，長時間都係全院滿座的。幸好，店員手腳快，熟客亦識趣地食完即走，故就算要等位都唔駛好耐。只以單調嘅餐牌，便可屹立中區多年，與其說老闆固執不曉變通，不如說是對自家製品質素嘅堅持。但見林林總總食肆以豐富餐牌作招徠，周身刀，冇把利。「沾仔記」以獨沽一味嘅一招半式獲取歡心，實屬難能可貴。…Read More

星期六，新一年嘅第二天，一個矇矓下雨夜。新居還是一片混亂，那裡有心情留在家中食飯呢？參考網上嘅資料，位於銅鑼灣威菲路道嘅Jacky's Kitchen受到不少好評。沒有事先籌劃，沒有位子是意料中事。就在隔壁，開了一間日本料理，是否與多年前結業的「利休」屬同一個舖位，筆者記不得。天氣無疑是凍了一點，但筆者並無排除冷盤。打頭陣嘅係蕎麥麵什菜沙律 ($50)。蔬果算是新鮮選料，不過可能放得耐咗一啲，流失了部份水份，食落沒有預期般爽脆。最奇怪的是，沙律上殘留了一些冰塊，一遇上室溫便逐漸溶掉，沖淡了食材本身嘅新鮮味，而且食落變得水汪汪般，大打折扣。吃過失望嘅冷盤之後，便是軟殼蟹牛油果卷 ($120)。先不論味道，單憑外表，心裡暗自涼了半截。包在壽司卷上嘅牛油果肉一夾起便散開，望落是將切得不公整嘅牛油果肉東拼西湊的鋪在壽司卷上。豬扒蛋飯 ($70)係太座嘅選擇。不知何故，飯只是微暖而已，溫度未如陳奕迅那首「沙龍」般留得住。縱是豬扒炸得不差，肉汁豐富，蛋亦香甜嫩滑；不熱嘅食物，味道及感覺已經不是那回事了。最後是燒池魚 ($130)，是廚師推介之一。魚身上灑滿了鹽，沒有半分油膩，不過一點也不入味。魚肉嫩滑，但味道是非常之清淡，只有近魚肚位才有魚鮮夾雜一點魚腥味。若非筆者好魚，相信大早已經放棄了。池魚還是比較適合做刺身；燒魚的話，還是魚脂豐富如鰻魚或鯖魚比較好。可能是晚客人不多，或者是見太座粗身大細，服務是預期以外的殷勤。當筆者拍照時，店員也主動幫手將杯碟擺好，方便拍照。「服務」一欄，是值得加分的。洗手間十分整潔，沒有一堆堆用過嘅廁紙；洗手間地下也合理地保持乾爽，衛生也值得加分的。埋單共銀四百零七蚊，平均每人二百多一點，收費合理。不過其食物既然留不住溫度，所以也留不住筆者。更多資料可於下列網址瀏覽：http://kenluihy.blogspot.com/2010/01/blog-post_20.html…Read More

星期一，距離BB出世嘅日子越來越近。筆者與太座嘅心情不但沒有半點緊張，等了十個月，等到有點不耐煩，希望BB快一點出世。這夜，準舅父從銅鑼灣一間叫「Crumbs」嘅新店買來幾件士干。雖然剛吃飽了飯，筆者還是忍唔住拎咗一件芝士味士干嚟食。講起士干，就不能不提「文華」了。此新店嘅士干，充滿了濃郁嘅牛油芳香，論程度不比「文華」的遜色，而且質感是更加鬆軟的，是青出於藍勝於藍嘅出品。不過，以此便否定「文華」尚早。如果加了獨家製嘅果醬，「文華」又稍勝一籌。如果此店嘅某女星老闆可以動一動腦筋，研究加入果醬，與「文華」一決高下，勝負未可料。以「Crumbs」為名，字本身解作餅碎，有心思，是好吃得連餅碎都唔放過 (當然令一個意思係灑在乳酪上嘅餅碎啦)。十八蚊一件士干，「文華」嘅餅店負責人，小心了，後來者是來勢洶洶的。…Read More