胃食珊珊's Profile

附近有一間食開嘅越南餐廳，係好好味。平時見哩間都多人排，所以就諗住試吓，點知中伏了。第一碗係生牛肉湯河，聲稱係無味精，但一飲啖湯就知道呃人。個湯勁咸，好多味精，而且完全無牛河平時嘅鮮甜味，食完要狂飲水。湯係一碗麵嘅靈魂，所以哩碗真係好差。另一款係咖喱牛腩煲配法包。個咖喱又係令人失望，係港式咖喱嘅味道，而且咖喱香味欠奉，又係得個咸字。牛腩炆得唔夠淋。蒜蓉包好彩係正常。最後一道係豬頸肉木瓜沙律，全晚最正常嘅一碟。豬頸肉燒得幾好，好香脆，調味啱啱好。木瓜味道就普通，始終唔係當造季節，唔可以要求太多。哩間一定無下次。…Read More

元朗嘅美食係接近泛濫，好似試極都仲有好多餐廳未試過！今晚揀左哩間平價西餐。一入到無咩客,有d擔心，但好快就坐滿人。Dinner set 包餐湯 ，蒜蓉包同飲品，仲要免加一，好實惠。 湯可選南瓜湯或蘑菇湯，兩款都足料，飲到一粒粒南瓜同蘑菇。蒜蓉包熱辣辣，都幾香。Menu 推介焗意大利芝士肉醬千層麵。即叫即整，所以要等一陣。哩個一嚟要即刻食，薯蓉芝士混合埋肉醬係完美嘅組合，襯熱食仲有拉絲嘅效果。鐵板保持到食物嘅温度，所以食到最後仲暖，芝士又唔會一舊舊。另一款係BBQ醬烤原條豬肋骨。好似大家所講，真係好大份，抵食。切開仲係冒煙嘅，好惹味！另外薯條都好吸引，長條幼身，好脆。主角豬肋骨肉質幾軟，所以好易切開。不過略嫌腌得唔夠入味。好喜歡個沙律，並唔係普通咁用麻醬，仲有加入蜜糖芥茉醬，加上蔬菜都新鮮，食落好fresh，又可以減低豬肋骨嘅油膩感。哩間係當你想食平價有質素嘅西餐，第一間會諗起嘅地方。…Read More

元朗很多小店，這間小小的日本餐廳，一家人經營，很有家的感覺。媽媽做侍應，兒子做廚房收銀，一家同心合力經營，先不計較味道，這個氛圍已經令人很窩心。午市有套餐，選擇幾多，價錢實惠，不用加一。冬天飲返杯青檸柑桔蜜，柑桔味好夠，飲完喉嚨舒服哂。雖然店舖有好幾款推介，但因為本人對豬軟骨係無法抗拒嘅，所以二話不說就叫了份秘製豬軟骨定食，定價$48非常親民。定食已包沙律，湯同熱飲。湯係麵豉油，有豆腐蘿蔔同日本魚片，無咩特別。麻醬沙律除左椰菜絲，仲有酸白蘿蔔，好開胃。豬軟骨好大份，味道唔會太鹹，不錯。但相信再炆多陣，軟骨部份做到更軟綿綿會更正。店舖嘅食物唔會做到浮誇吸睛，款式又唔會好特別，但就係簡簡單單，有種親切嘅味道。…Read More

牛蓋飯總係有種魔力，淨係見到一片片牛肉已經流哂口水，立刻影完相就要食！坊間嘅牛蓋飯唔算平，難得屯門哩間小店價錢合理，絕對要嚟試吓。店舖好細，大概十幾個位，座位較逼，晚飯時間嚟都要等一陣。哩到係自助形式，落單，拎餐具同食物都係自己嚟。牛係目標，所以叫左牛扒蓋飯同極上牛蓋飯，仲要埋220g添！牛扒蓋飯係入門版，價格完全可以接受。大碗份量足，大食嘅一定會飽。牛肉一片片好薄，配上燒汁味道係不錯嘅！不過，略嫌有d韌。飯就較為失望，唔係用珍珠米，但價格平，唔可以要求太多。而米飯整得過濕，欠缺口感。極上蓋飯嘅牛脂肪較多，一入口，雖然未及和牛咁入口即溶，但肉質好嫩滑，而且滿囗充分牛肉油脂，質素比牛扒蓋飯更高一級。加上一隻滑蛋，令蓋飯昇華。蛋汁滑滑地，配牛肉同飯都好夾。相反，牛扒蓋飯就較為單調。如果特登嚟食，會推介細碗嘅極上牛蓋飯，價錢合理，牛肉高質。…Read More

台式飲品店好似越開越多，而且各有特色。一杯三十蚊都走唔甩，雖然唔係平，但都一定吸引唔少人幫襯。春風三月又係因為被傳媒報導而被人認識。店舖位於千色地下，因為係較少人路過嘅一邊，都要揾吓！店舖主打手工珍珠，人手做，新鮮，天然，味道獨特。每日都有限定嘅珍珠款式。冬天就買了一杯熱嘅Baileys 復刻紅茶。因為唔想煩，但其實珍珠同茶嘅口味都可以自由配搭，幾好。作為熱飲，溫度略嫌未夠熱，只係暖。珍珠確係做得不錯，咬落會有一絲絲甜酒味，而且好有咬口，個人幾鐘意。紅茶係以獨立茶包沖嘅，飲到紅茶味外，仲有一陣烘焙嘅味道。茶味唔會太濃，同珍珠好夾。甜度揀半糖，已經好夠，清清地，又飲到茶香。…Read More

哩間又係被媒體介紹過嘅小店，一心嚟想試吓出名嘅叉燒，但七點幾已賣哂，睇嚟要午市嚟食。依間真係小店，大概坐到十二人，晚市門口都會開幾枱嘅。晚市有套餐揀，大概七十蚊有交易，包湯/飲品，及飯/麵。價錢算合理，因為餸菜都幾大份。今日係菜乾豬骨湯，份量好大，係平常見到嘅一點五倍。一飲就好似媽媽煲嘅老火湯一樣，無味精，好好飲。一埸嚟到好想試多幾款，所以叫左個雞絲粉皮。以前菜嚟講都算大碟，雞絲份量適中，但就無咩味，不過醬汁俾得夠，都唔太差。粉皮都爽口。套餐叫左秘汁鹵家鴨，送上鴨脾，大大隻，好驚喜。鴨肉較韌，有咬口，韌嘅程度可以接收。點嘅白醋汁多蒜蓉，好喜歡。鴨肉下面有芽菜，索哂滷水汁，正呀！另一個套餐係香蔥煲仔豉油雞，原煲上枱，仲係滾嘅，賣相已經好贏哂。雖然係冰鮮雞，但肉質估唔到好幼滑。如果係重口味嘅朋友可能會嫌唔夠味，但我就幾鍾意佢唔太鹹，豉油汁帶有少甜。另外，配料薑蔥莞茜落得夠，所以成煲雞好香。天氣凍凍地，食完成身都暖哂。最緊要係食完唔會口渴，而且味道唔太重，啱哂成日出街食，但又想食住家飯嘅朋友！…Read More

論食雞粥，對面嗰間出名d,但食過味道麻麻。今次試新記實在係無得彈。款式多，味道好，又夠哂抵食！貴妃雞粥每枱都叫，一煲大概有五大件。類似鹽焗雞，配粥不錯。不過雞我覺得鹹左少少，下次會試海鮮類。粥最緊要係夠哂滾，所以特別正。另外，哩到小菜都有好多款，嚟多幾次都唔會悶。涼伴揀左海蜇生腸，雖然細細碟，但食落份量又唔算少。佢個汁做得不錯，應該加左麻油特別香，少少辣同好香蒜味，宵夜食就一流。粥店少不了腸粉。蔥花蝦米腸大大份，夠抵食。腸粉較幼，而且唔會過鞋，一啖一條。蝦米唔會太乾身夠香，蔥花又新鮮又夠多，算係做得不錯。最後唔少得招牌脆皮乳鴿，嚟新記係必食嘅。真係熱辣辣，做得比某些酒樓更要出色。外皮脆，肉質嫩，肉汁香，唔點任何調味料都夠哂味。…Read More

漸層飲品，台式，紅磚牆。為了打卡，又不介意等(假日起碼要15分鐘以上)，可以嚟。但，我係想飲一杯好味嘅台式飲品，嚟錯左。叫左杯鹿丸鮮奶，索價$28,size只係普通杯，一d都唔平。下層係熱嘅黑糖醬，黑糖珍珠，上層係明治純牛奶。黑糖甜度其實可以接受，珍珠味道正常，都彈牙有咬口, 但同係台灣食過嘅黑糖珍珠味道仲有距離。見咁多好評，都幾大期望，點知無預期中咁驚喜。要$28一杯，而且味道只係正常，一定無下次。比佢好味嘅，而且無咁貴嘅台式飲品店大把，無下次。…Read More

每次行經都見到長長嘅人龍，今次早少少去，七點前都已經滿座，啱啱好有二人位，唔洗等。泰式酸辣鳳爪好大碟，質感不會過軟，保持到咬口。酸甜味較重，少少辣，作為開胃前碟不過不失。泰式香芒蝦球感覺上好似咕嚕肉嘅味道。酸酸甜甜好啱小朋友食。蝦嘅size 中等，一般急凍蝦貨式，大概有八隻到。芒果份量就幾多，大大粒，好甜。亞萊嘜嘜特式蒜香包個個都話好正，所以叫左個黄咖哩豬($89)配佢。用左厚切麵包，切成一條條，金黄色勁脆口。牛油味適中，而且都幾香，但蒜蓉味就差d，如果再濃d會更好。另外個黄咖哩都好香，都係一d都唔辣，而且幾大份，豬肉片亦幾多。雖然唔係食過最好味嘅泰菜，但份量足，價錢合理。味道唔會太辣太濃，幾適合一家大細又或者一班人嚟食。…Read More

嚟到銅鑼灣除左係商場開飯外，登龍街哩邊都好熱鬧嫁。幾間拉麵都經常有人龍。今次就試吓哩間越南菜。唔洗加一，性價比高。主打粉麵同小食。越式手撕雞清雞湯河粉好大碗，男士都夠飽肚。如果以為佢清清地，你就俾佢呃左lu。無錯，個湯底係清，但個手撕雞勁重胡椒味，撈完後，好似胡椒豬肚湯咁惹味。另一碗沙嗲烤鴛鴦肉撈檬個沙嗲味就唔太出，但餸同粉嘅份量都幾多，抵食。鴛鴦肉包括烤豬肉粒，幾可口，有食燒肉嘅感覺。另一款係牛肉片，食落唔覺有烤過，而且鬆肉粉落多左，失去牛味。值得一讚嘅係調味料放哂係枱面自己加，十分方便。全晚最驚喜嘅係三色雞翼拼盤。有三款，包括辣味，牛油同金蒜。辣味不太辣。牛油同金蒜味道分別不大，只係金蒜有炸蒜係面。不過雞翼真係勁香脆，粉又薄，好香口。哩間真係銅鑼灣平價之選。…Read More

以前在舊店時都光顧子好幾次，的確，那塊大豬扒係多麼的吸引。新店開張後都未曾食過，一嚟到銅鑼灣就諗起佢。週末午飯時段嚟到，啱啱有位，正，唔洗等！菜單貴精不貴多，照舊，照牌肉燥汁豬扒撈粗。因為人流多，豬扒都係密密炸，唔洗等太耐就有得開餐。豬扒一如以往，大得誇張，外層十分酥脆。豬扒比出面食嘅更厚切，口感滿分。賣相，份量同口感都無變。味道，有一點失望，豬扒醃得不夠入味。肉燥大多都是肥肉，是正宗的。味道是港式那款，不是台灣甜味重的那款。撈粗係無得輸嘅，偷佢掛汁強，又不失咬口。肉燥汁係油的，食嘅時候要忘記咩係卡路里。夥伴叫嘅係咖哩汁豬扒飯加炒滑蛋。咖哩汁另上，唔會食都一半就索哂d汁。味道係港式茶記味道，撈飯又係無得輸。炒滑蛋可以唔洗試。蛋炒得不夠滑，熟左d, 而且無蛋香。雖然今次食返有少少失望，但會俾多次機會佢，希望塊豬扒味道會更好。限定嘅蔥油豬扒，其實係豬扒上加左平時食白切雞嘅蔥油，對佢興趣不大。哩間食店都係銅鑼灣推介嘅飯堂之一。份量，味道同價錢都係中上水平。裝潢都好時尚，吧枱，open kitchen, 食物係港式風味，fusion就係溝埋一齊又好夾嘅意思！見到牆上寫住我'我們都是吃豬長大的'，食完，想加多句，'我們都是撈汁大的'！…Read More

肉燥係台灣必食之一，香港都有間連鎖肉燥專門店幾成功。不過都係鐘意食小店。今日嚟到長沙灣哩間一碗肉燥試下。講真如果唔係經開，特登過嚟食都幾唔方便。店舖唔近地鐵，做街坊生意多。裝修設計好年輕，黃色好sharp, 唔講以為去左漢堡店。晚市包飲品，四，五十蚊一份，價錢都算過得去。回魂黑醋豬軟骨飯味道沒有台灣風味，反而似上海個款味道。豬軟骨有四件，雖然味道ok, 但炆得再淋d會更好。主打叫肉燥，講真有點失望。唔係難食，但食唔到台灣風味，有點港式肉燥嘅感覺。好吃鹽酥雞排撈麵賣相份量都好吸引。雞排好大件，外皮酥脆而薄。味道中規中矩，不過有少少油味，扣少少分。另外，店員會送上三款調味粉，方便客人自己調味，不錯。…Read More

這是意外到訪嘅一間餐廳，但意想不到的好味。如果要來，建議book位，因為都幾多人等，而且有機會安排到outdoor。雖然30幾度，但好彩多風扇，所以outdoor 食都未算太辛苦，但有得揀都係坐室內好d。生菜包肉有雞同豬肉揀，當然穩穩陣陣咁揀左豬肉。首先份量幾多，生菜起碼有十塊，豬肉碎食到最後仲有淨。餐牌上有兩隻辣椒果然係無呃你，真係好辣。見到隔離枱都辣到放棄左。肉碎好惹味，見到好多洋蔥粒,莞茜同香草，所以又香又辣，好滋味。東蔭公海鮮炒飯有一隻辣椒標誌，但唔辣嘅。 東蔭公味就唔係太重，不過味道幾香，炒得乾身。海鮮有青口,魷魚,虾，仲加左唔少香草同蘑菇。哩到嘅炒飯不俗，下次可以試埋其他。最後係鹽焗盲曹，條魚做得好出色。焗嘅時間好準，肉質仲好嫩，意想唔到焗魚都食到咁嘅肉質。點埋個辣汁好夾。另外叫左杯綠豆沙冰，好解渴又唔太甜，不錯。哩到位置優越，而且枱好大張，見到有枱係十幾人，可以約齊好多人gathering都得。另外，店員會為客人頻頻加水，值得一讚。…Read More

看到報導介紹哩間牛肉麵，咁啱嚟到深水埗，終於有機會試到。差唔多兩點，都幾多人等，叫了一碗牛魔王試下，有齊各款牛，第一次嚟，必試。等左都大概超過15分鐘，估唔到，真係等。首先試左個湯，湯頭真係唔錯，好清甜，而且唔油。有牛腩牛筋牛肚牛脷等，當中最出色嘅係牛脷。牛脷厚切，加左胡椒，煎得好香，好有衝動叫一碗淨牛脷麵食。麵條就普普通通，始終都係牛出名，如果 麵條更彈牙，就滋味滿分了！係food court食要揾位，少少麻煩，如果有間舖位更好。…Read More

今日到訪灣仔哩間越南小店。唔似平時嘅餐廳，只供應幾款主菜同小食。越南法包係心頭好，二話不說就揀左香茅豬扒法包。即叫即整，所以要等。法包又脆又熱，餡料爆滿。首先香茅豬扒炸得酥脆，味道剛好。除左豬扒，仲有扎肉，蘿蔔絲，莞茜。係香港食過至正嘅法包。一定要親熱食呀！另外試左好多人推介嘅越南海南雞飯。份量偏細，女孩子都係剛剛好。雞件幾滑，已經無骨，方便食。而油飯幾香，但唔會似平時食開嘅咁油，light d。小食嘅牛油雞翼亦十分脆口，木瓜沙律係唔辣嘅，酸酸地，幾開胃。餐廳細細間，食物精而不濫，推介俾喜歡越南小吃嘅各位！…Read More