ajjmw's Profile

冬夜裡，屹立於冷清街道上嘅橙紅色建築物份外耀眼。店內燈光柔和，雖然唔算寛敞，而且已坐滿人，卻毫無逼狹感，甚至覺得幾溫馨。點完菜後，職員先送來一客麵包，微暖，蘸上橄欖油好好味。BELLA VITA 及 CRIMSON DESERT 兩款Mocktail各有特色，味道清新透心涼。前菜係PROSCIUTTO E MELONE，鹹香意大利火腿與清甜哈蜜瓜結合，簡直係絕配。PIZZA 208， 必食推介。 職員將水牛芝士切開，均勻塗抺於酥軟餅底上，混合茄醬及大量意大利芝麻菜，加上餅皮邊厚而脆，咬落層次分明，係我食過最美味嘅PIZZA。HALF CHICKEN"CACCIATORA" ，濃濃醬汁加埋番茄彩椒磨菇欖橄等材料，雞肉入味得嚟仍能保持嫩滑。而跟餐嘅玉米蓉，單食好香芝士牛油味，與醬汁同食則錦上添花。MILANESE RISOTTO，職員用小匙將牛骨髓刮到意大利飯上，加以攪拌混合，令原已香氣撲鼻嘅焗飯再加添牛髓油香，可惜飯量少咗啲，唔係幾夠喉。SQUID INK TAGLIOLINI 墨魚汁意大利扁麵，海鮮醬汁濃郁，當中蟹肉好鮮甜。嚟到尾聲，就算已飽到上心口，都不能錯過TIRAMISU。 賣相與一般食開嘅杯裝唔同，而且仲有薄薄朱古力片點綴，入口軟滑帶點脆脆，好有心思。本來想叫埋火焰雪糕，可惜只限於聖誕至新年期間供應。 職員介紹另一款CANNOLO，圓碌碌類似薄脆質地嘅小波波放喺圓筒似雪糕質地之上，造型可愛實在唔捨得將之分開。拎開小波波，用匙羹切開柱體，居然係流心，內裡仲有好多碎小粒粒，口感豐富，唔只雪糕咁簡單。 再輕輕搗開小波波，配埋雪糕一齊放入口，一羹接一羹欲罷不能。好耐未試過肚滿腸肥離開食店，每道食物實在太好味，有多個胃就好喇。服務亦冇得彈，每當食完前菜，主菜，甜品，職員都會殷勤地換上新餐具，極有效率。喺進食期間，唔知幾時跌咗餐巾喺地下，係職員攞咗條新嘅嚟到面前至知道。 諗住都差不多食完，唔想增加佢哋工作，就將地下嗰條執起繼續鋪上身，但職員堅持更換，怕跌過落地會唔乾淨，非常體貼細心。…Read More

第一次光顧米芝蓮食肆，順理成章首次寫食評就獻畀船記。一行三人慕名而至，入到內已見座無虛席，好彩之前有訂位。       打開餐牌，好多款都想食，對於有選擇困難症嘅我哋，只好勞煩店長推介。第一道 ：淮山杞子三寶燉螺頭湯 4-6位用 ($588），已預先為我哋盛起四碗湯，跟住再𢳂起湯渣送上。先呷一口湯，好鮮甜；用筷子翻看湯渣有啲乜料，除咗淮山杞子螺肉，仲有雞腿雞腳鴨腳瘦肉豬腳等等，咁多材料，難怪啖湯清甜回甘。第二道 ：船記叉燒皇六件 ($98），肥瘦適中賣相吸引，雖然只得六件，但因為厚切，所以仍算有睇頭。 連平時只肯食全瘦叉燒嘅我，都忍唔住挾一塊，肉質軟腍入口即融，不愧米芝蓮級數。第三道 ：雞油花雕蒸中蝦配稻庭烏冬($688），隻碟好大，啲汁好多，又有烏冬，好驚食唔晒。由於蝦已被剖開對半，所以唔駛落手剝，只需用筷子輔助就去殼。 蝦肉醮上黃澄澄雞油汁放入口有一股酒香味，烏冬口感Q彈，配埋汁一齊食，好味！啲蝦切對半後，又要將之排列整齊，應該要花唔少時間，所以餐牌寫明要一日前預訂，不過我哋冇預訂都有得食，可能係店長視乎當時情況而定。最後係上湯蒜子浸豆苗胚 ($168），呢款較為普通，而且有少貴，不過豆苗加上湯一齊煨都幾鮮嫩。甜品係蛋白杏仁茶 ($45），唔太甜嘅香濃杏仁茶內有滑滑蛋白碎，我的最愛，無得輸，為呢餐劃上完美句號。總結 ：食材新鮮，連小食嘅花生都好好味，雖然有啲菜式收費唔便宜，不過話晒係工夫菜，製作需時，值唔值就見仁見智。職員上菜同收碟嘅效率都好高，整體都滿意。 不過地方就稍為狹窄咗啲，多人時甚至會椅背貼椅背。…Read More