Josey Eddy's Profile

好少喺McCafe飲嘢，因為如果要同人傾嘢嘅話，一般都會選擇SB, CH同PC。以品質黎講，呢杯Hot Chocolate真係唔差得過佢哋，大大杯，朱古力味濃郁，上面更有一層厚厚的朱古力奶泡，泡沫打得幼細，入口香滑。更吸引的是，價錢就只係佢哋嘅一半，所以好抵飲。不過d位就冇咁舒服同豪華，但勝在地點方便，大熱天時，涼涼冷氣坐一坐，再繼續上路工作去。…Read More

剛剛在隔離參加完活動，已經晚上 9 點幾，友人推薦呢間餐廳，話佢好懷舊好有特色。我點咗一份特餐，可能因為個餐同澳牛太似，所以難免我會將佢哋作出比較。多士夠厚，牛油味香，外脆內軟，好味!炒蛋一般，吾夠滑。叉燒湯意粉味道一般，無驚喜。J 大人點咗呢度嘅懷舊茶餐，有雞批浮台同香蕉班戟，值得推介。雞批浮台其實即係雞批＋青豆蓉湯。雞批牛油味香濃，淨食都好好味，而青豆蓉湯淨飲好豆味，可能J 大人飲唔慣，唔係太鍾意，但係估唔到一齊食幾夾，幾好味。班戟加上焦糖糖漿、香蕉、合桃，味道好夾，連一向唔鍾意食熟水果嘅 J 大人都讚好。…Read More

太興個餐蛋麵真係百吃不厭，午餐肉內有肉絲，好實在，唔會太多粉，個炒蛋好滑，好味道。豬手一上檯好香黑椒味，豬皮煮得夠淋，豬手多肉，送飯至啱，只係賣幾十蚊其實好抵食。但係由於d豬手皮比較膩，所以最後我哋食唔晒d豬皮。…Read More

是日合共9位朋友響附近開會後一齊嚟食飯，由於有位朋友係港大校友，所以我哋可以嚟食飯。呢度價錢合理，所以好彩該校友早幾日已經book定檯，否則肯定無位。杏汁白肺湯 : 非常足料，杏仁味濃郁，白肺乾淨，份量足，一窩可以分成9碗。蝦多士 : 而家得番好少地方做呢度菜，蝦膠新鮮彈牙，即炸熱辣辣，火喉剛剛好，食一嚿真係唔夠喉。粉絲雜菜煲 : 一般般，下次可以改點其他菜。南乳齋煲 : 腐皮超多，南乳味不太濃，一般水準。古法鹽焗雞 : 用上新鮮雞，附上好耐都未食過嘅新鮮雞內臟，諗唔到雞內臟最受歡迎，好快就俾大家食晒。鹽焗雞雞味香濃，鹽焗時間剛好，雞肉剛熟而不會韌。子蘿咕嚕肉 : 通常外面食到的都是菠蘿咕嚕肉，但係呢度就有子薑菠蘿咕嚕肉，而家子薑當做，所以很嫩而無渣，咕嚕肉皮脆肉鬆，可以説是我食過最好食的，強烈建議大家必叫。果皮蒸肉餅 : 果皮香味帶出豬肉鮮味，與坊間行貨之作有所不同，送飯佳品。蝦子柚皮 : 蝦子味淡，未能使柚皮上味，所以味道不夠。子薑雞球 : 由於之前的子蘿咕嚕肉好食，所以我哋再叫一道子薑菜式，但是此菜式只可以説是不過不失，沒有驚喜，所以沒法和子蘿咕嚕肉相比。…Read More

晚上10點，經過紅磡冰室，見裝修不俗，便入內試試。沙爹肥牛公仔麵 $36 : 湯底同麵都冇乜味，只有肥牛有淡淡的沙爹味。乾炒牛河 $36 : 一上碟已經覺得吾夠色水，食落果然係好淡味，直頭可以話係冇鹹味，而且冇鑊氣。雪糕紅豆冰 : 尚算正常可能啱一D鍾意淡味或食物原味嘅朋友，但我應該下次會去其他餐廳啦。…Read More

嗰晚買咗7點場睇戲，見5點幾冇嘢做搵個地方hea下，經過呢間cafe，見佢環境舒服，仲有無敵海景，飲品價錢合理，所以都幾爆場。但呢度d職員態度懶散，掛住自己傾計唔執檯。我哋叫佢執檯，佢哋就扮聽吾到，叫咗幾次先肯嚟仲咀扁扁。Fresh Lemonade : 廿幾蚊，味道對板，西式，飲得出真係新鮮檸檬汁，甜度啱啱好，令我回想起以前係 Florida Disney World 飲嘅 Lemonade。Turkey and Cheese Sandwich : 好似係約$60，order 後店員立刻由雪櫃攞出嚟再加熱，但係我覺得個店員求求其其，加熱時間不足，所以內裡仲係凍冰冰嘅;Turkey and cheese 味道好夾，用嘅係火雞火腿而唔係火雞肉，如果個包可以熱d令到D芝士溶溶地，肯定仲正。…Read More

下午茶時段經過呢間餐廳，覺得裝修得幾靚幾特別，所以同 J 大人入去試下。我哋叫咗 牛乳炒蛋厚切餐肉米綫 $40 及 特色小色拼盤 $48，跟老火湯，再加杯凍咖啡 (+$3) 及 自家製洛神花茶 (+$5)。老火湯:可能因為佢叫老火湯所以我期望太高，其實佢係一碗例湯，大家應該明啦。牛乳炒蛋厚切餐肉米綫:炒蛋唔滑亦無乜牛奶味，餐肉唔可以叫厚切，湯底直情無味。特色小色拼盤粉皮:一般煙鴨胸:好鹹，好似交貨嚟嗰種質數炸蝦多士:一般瑞水鷄翼:好乾身，而且裡面唔入味凍咖啡:見到顔色好淡，飲落過然好淡好稀。自家製洛神花茶:淡而無味總結係以咁抵嘅價錢喺尖沙咀有咁嘅環境食下午茶餐，唯有降低對食物質素的要求  。…Read More

屈指一算，小弟已經幫襯咗劉森記十多年，由老店幫襯到新店，口味依然，價錢亦非常合理。佢地最出名嘅係自家製竹昇麵，麵質彈牙，無梘水味，而家好少地方有得食。第一次同 J 大人一齊嚟，梗係推介無乜人識得叫嘅「四拼麵」。由於餐牌上只有三拼麵嘅關係，所以無乜人知道有四拼麵。話説小弟點樣會發現有四拼麵呢?事源因為小弟昔日太為食嘅關係，樣樣餸都想叫，所以多口問問阿姐可唔可以叫四拼，所以先發現有得叫。單拼麵 $33 +每個餸 $5 ，如此類推，四拼麵就係$48。今次我叫咗蝦子牛根豬手雲吞撈麵$48，而 J 大人就叫咗蝦子牛根豬手水餃撈麵$48。大家等d麵煮緊嘅時候，記得要試下檯面嘅酸蘿蔔，味道啱啱好，少少酸，好爽脆，見到d辣椒唔駛驚，因為唔辣嘅。登登登登，碗麵終於嚟啦。蝦子勁多，好似唔駛錢咁，就黎見唔到d麵，好香;牛根好腍好入味，仲有四條添;豬手好腍，有兩大嚿;雲吞三粒跟湯另上，用料足，蝦非常之彈牙。你話嘞，咁足料，邊度搵呢？美中不足係當日有d小蚊滋間中騷擾下我哋，但係情況都可以接受嘅。…Read More

聽聞中環有間好味燒鵝餐廳，於是專登嚟試下。下午3點到達，原來有抵食下午茶燒味粉麵，可惜只可單拼及不能選燒鵝，所以無緣。我點咗燒鵝燒肉飯 $53，而 J 大人點咗燒鵝叉燒飯 $53。侍應姐姐好心提醒燒鵝雙拼飯係正價，而且唔係餐，所以無得跟嘢飲。好啦，鬼叫我哋專登嚟試燒鵝咩，正價照殺，可能因為我哋下午茶叫正價嘢，所以最終我哋兩碟飯都係燒鵝脾，正！呢度d燒鵝真係好味道，皮脆肉嫩；叉燒入味帶有豉味，更有一點烤焦味，是我喜歡的味道，但比較瘦有點乾，J大人喜歡半肥瘦，下次再黎要記住特別要求；燒肉一般，不算太特別。例湯是冬瓜例湯，味道一般，給人一種行貨的感覺，可以不試。總結這餐廳，好味，抵食，但座位環境逼。…Read More

我早排成日去食拉麵，但係可能因為市面開咗太多不同拉麵店嘅關係，所以去咗試其他新店而好耐無嚟麵屋一平安。今日去到美麗華，又再次燃點起我嚟食拉麵嘅衝動。回想起呢度以前成日都要排長龍，但是似乎善忙的香港人已把它續漸忘記，所以有幸今次不用等位便可以直接入座。我每次嚟到都係食叉燒拉麵，我欣賞呢度嘅叉燒好入味、紫菜香脆、湯底濃郁，食得出係用心之作。好高興拉麵嘅水準係同以前一樣，好食 。…Read More

晚上9點去到黃埔，見到太興、茶木、Kitchen J都大排長龍，唸住轉場去第二度食飯，點知經開詠藜園嘅時候多口去問下阿姐，剛好有一張二人檯，即時二話不説入去幫襯。一坐低先自動上兩碟餐前小食，本來唸住都係 hea 下嘅小食，都唔慌好食，點知一食之下有驚喜，花生外皮香脆，酸菜甜酸度剛好，所以最後全部俾我哋食晒。點咗份醉豬手 $68 做冷盤，肉質爽脆份量足，廚師細心的切成一口size，使人食得舒服，個人認為酒味可以再濃d。主食原湯水餃(8粒) $43，水餃好味，難得水餃湯內有香菜及肉碎，提升鮮味，抵讚。改良擔擔麵(不辣) $35，點之前問侍應姐姐改良擔擔麵及擔擔麵的分別，原來改良版就多咗肉碎，所以我叫咗改良版。擔擔麵果然係招牌菜，麵條彈牙，湯有香濃花生及肉碎味，一齊食口感極佳，不可不試。楊家小湯包(4個) $32，皮薄而夾起時不會穿，可惜小弟食咗兩個湯包之中，第一個並沒有湯，而第二個只有極少湯，因而有點失望。…Read More

今日一行5人聚餐，搵餐廳嘅責任又落在我身上，第一時間去 openrice 搵下有乜好嘢，就搵到呢間傳統潮州菜館。睇食評知道呢間餐廳好難搵位，所以一早就打左電話訂定位，點知去到都仲係要再等十五分鐘，證明呢度嘅生意真係唔憂做。睇到呢度好多種唔同嘅凍魚，聽店員介紹叫咗條烏頭魚$218，聽到個價錢都覺得有d貴，結果仲係麻麻地好食，所以不推介。金牌三寶$138，就係滷水鵝肝、鵝腸同鵝肉，滷水味道非常好，值得推介。潮式蠔仔烙$58，不過不失，如果唔怕食煎炸野都應該叫番份嚟食。糖醋伊麵 $68，非常香脆，師傅功力深厚，不可不試。食完個潮州三寶，因為個滷水太好食，所以叫多份滷水鵝片$98。排骨春菜煲$65，味道普普通通。淮杞螺頭雞腳湯$98，味道一般，價錢合理，可以一試。…Read More

是晚去咗觀塘搵朋友，問佢附近有乜嘢好食，佢推介咗呢間餐廳，所以我哋去試下。大約7點半左右去到，本來唸住要等位，點知原來間餐廳只有一半人入座。入門口之後，就見到一排排鵝吊咗喺度風乾，跟住見到個燒鵝爐同埋個燒豬爐，即時對呢度嘅燒味信心大增。打開個餐牌，發覺選擇很少，但是由於只有 J 同 E 兩個人食飯，所以盡量叫少d。我好鐘意飲湯，所以叫咗個是日例湯：椰子雞湯(小)$98，本來以為係例牌行貨嘢，點知有驚喜，椰子味道香濃，睇得出廚師落足料。欣賞餐廳將湯渣同湯分開上，所以一小煲湯也可以分成5碗。本來想叫半隻燒鵝，但係喺 J 大人阻止下只叫咗份燒鵝(例牌)$138，一如所料，由於不是叫全隻嘅關係，d燒鵝係已經凍咗，所以打咗折扣，但係我可以估到如果隻燒鵝係熱辣辣嘅話一定好好食。侍應姐姐推介特價上湯加拿大龍蝦，任叫任食只係$68一隻，所以我哋叫咗2隻，龍蝦肉質彈牙，食得出係好新鮮，不過個人還是比較喜歡芝士焗口味。仲有細心嘅 J 大人發現嗰 4 份半隻開邊龍蝦並非出自兩隻龍蝦，除咗大小不一之外，仲有3份係左邊而1份係右邊，所以話呢，女仔真係細心d，唔到你唔服。呢度服務一流，侍應姐姐有禮之外亦很勤力換骨碟、加茶水，值得一贊。飯後贈送了紅豆沙甜品，雖然係免費，但係食得出係足料之作。可以改善之處為所有餸菜不應一次過送到嚟，令我們食得燒鵝嚟又食唔切龍蝦，白白睇住d美食攤凍浪費。…Read More

灣仔繁忙嘅莊士敦道，搵到呢間舒服嘅法式咖啡店，入面有一個長長的凍櫃，裝滿琳琅滿目嘅糕點，側面還放滿多款麵包。在這裏不難看到小店的誠意，凍櫃後面便是一個開放式的廚房，店內的麵包酥餅均全部在店內新鮮焗製，外表精緻之餘更加了一份內在美味。太漂亮了!栗子蛋糕不太甜，𥚃面有一塊蛋糕底，吃下似mousse cake我喜歡酸酸甜甜的甜品，所以點了檸檬批，好味道即磨的Caffe Mocha…Read More