Beyond4's Profile

餐廳位於尖沙咀漆咸道，門面雖然唔算大，但入面裝修以至牆上的掛畫及燈籠都充滿濃厚日本風，感覺仿如置身日本。 店舖的拉麵主打特色濃清湯，選用新鮮豚肉骨配以日本蔬菜秘制香料熬足最少12小時而成，試一試就知得唔得❇️特濃蝦湯拉麵 $128▶️每次食日本拉麵，我必定會先試個湯底，因為湯底就係一碗拉麵的重點及精華所在，無論太鹹抑或唔夠味，已經可以斷定碗拉麵唔合格。而呢款拉麵，一上枱見到湯底色澤深而且濃稠已經覺得不錯，飲一啖口腔充滿濃濃的蝦鮮味🤩但又唔會過鹹，飲完唔會覺得好口渴，試得出的確落足心機，果然有水準！👍🏻配料亦好足料，有4隻鮮蝦，蝦肉隻隻爽口彈牙，仲有一片慢煮叉燒，厚薄適中咬落軟腍，其他配料有半隻糖心蛋、香筍及炸日本牛膀條，炸過的牛膀條香香脆脆，同平時食開的牛膀口感唔同，估唔到又幾好食！😋❇️北海道豚足鹽味濃清湯拉麵 $ 108 ▶️除咗叉燒，又想試下佢地的豬手，所以就叫咗呢碗。湯底揀咗特製味噌，入口濃郁得嚟帶點點清甜感覺，唔會有死鹹的味噌味道。入面有3大片叉燒，好足料！😍另一重點係北海道豚足，好大隻，肉質腍得嚟又有少少咬口，麵條軟硬適中，爽口彈牙！😋❇️自家製魷魚豚肉餃子 $ 48 ▶️餃子底部有香脆炸皮，餃子皮唔會好厚，最欣賞係餡料入面除咗一貫都會有的豚肉之外，加咗魷魚粒，彈牙又有咬口，比起平時食開的餃子口感更為豐富，令整體味道提升，實在有驚喜！❇️鮮蟹肉忌廉薯餅 $38▶️最頂舖上蟹籽，下面有蟹肉蓉，入口有淡淡蟹鮮味，薯餅唔會好油，加埋蛋黃醬味道不錯！❇️飲品方面揀咗平時較少見的靜岡綠茶可樂 $28 及 富士柚子汽水 $28，味道清清地唔會太甜除咗拉麵，仲新推出兩款飯類，下次有機會再試下❇️據講拉麵每日只賣100碗，賣哂就收舖，所以要食就最好早D去啦！…Read More

荃灣區食店林立，西餐廳都好多，呢間西餐廳位於楊屋道荃灣西站附近，旺中帶靜。餐廳裝潢充滿懷舊歐陸風，有好多高背梳化卡座，座位寬敞舒適而且唔嘈雜，適合情侶及朋友慢慢邊食邊傾計❇️酥炸魷魚圈 (檸檬胡椒調味配塔塔醬) $108▶️先來一款前菜，魷魚圈炸得香脆，同時保留到本身鮮味，配合檸檬汁及塔塔醬，酸酸甜甜增添惹味❇️肉食主義Pizza $158▶️呢度的Pizza全部自家製，份量十足，足夠4個人食。配料有雜錦肉類、燒烤醬及馬蘇里拉芝士。餅皮厚度中等鬆軟，咬落去醬汁甜甜地，加埋意大利腸、肉及輕微拉絲的芝士，整體味道好夾❇️肉醬意粉 $139▶️肉醬意粉係好多餐廳都有的菜式，但能夠整得好食就唔係好多間都做到。呢度的肉醬意粉同樣係自家製，主要用免治牛肉、牛肉湯及巴馬臣芝士製成。意粉爽口，可能用上牛肉湯關係，意粉本身都好夠味。而另一主角免治牛肉，比起出面好多地方食到的較有香濃肉味，不錯！❇️朱古力布朗尼(配朱古力雪糕) $69▶️最後來個甜品。兩舊Brownie朱古力味濃，口感較為厚實但不失香滑，配埋朱古力雪糕球，份量唔細，食完超飽，以呢個價錢絕對抵食！✴️總括，環境舒適有情調，整體食物質素不錯，價錢唔貴，值得推薦！(餐廳做緊生蠔+葡萄酒 SET 優惠，下次有機會試下先！)…Read More

尖沙咀金巴利街出名韓國食店林立，今次想試比較有特色的韓國菜式，所以選擇呢間由來自釜山擔任主廚的韓國餐廳 。店舖裝修帶點工業風，座位闊落舒適。❇️秘製章魚蛋漿熔岩炒飯 $198▶️餐廳招牌特色菜式之一，有多款口味選擇。上枱時侍應先響飯周加入蛋漿及芝士碎，然後用火槍不斷熱熔芝士，直到見到芝士及蛋漿都熔哂，同時會見到飯面有少少焦黃色，再全部撈勻一齊。眼前見住店員成個即製過程感覺都幾新鮮。食的時候，蛋漿已經熔入飯粒當中，加埋拉絲的芝士，香滑得嚟又唔會好油膩，加埋章魚粒彈牙有咬口，口感層次豐富，不錯！❇️泡菜五花腩 $ 198 ▶️五花腩有成10幾塊，全部切成四四方方，又有有一定厚度，肥瘦分明，肉的四邊有微微焦香，咬落去有少少彈牙，連埋泡菜及韓國料理常見的紫蘇葉一切食，有少少薄荷及微辣味，香口得嚟又可以減輕肥膩感，不經不覺就食哂！❇️韓國甜米水 $ 25 ▶️呢度的飲品主要係酒類及罐裝飲品，第一次飲呢款甜米水，有少少似薏米水，甜甜地，飲到罐底會飲到有少少米粒…Read More

餐廳位於油麻地一間小型酒店上，第一次嚟到，響門口已經見到好多好別緻的擺設，餐廳入面裝修同佈置充滿森林原素，仲有好多得意的動物同食物公仔，可以chill住用餐，打咭一流！入座後侍應先送上蝶豆花檸檬水而唔係普通清水，比好多餐廳都多一份貼心感覺，誠意加分！❇️牆城豪華早餐 $168▶️呢set All-day breakfast份量十足，材料豐富：有焗吞拿魚大啡菇、煙肉、三文魚、炒蛋、德國豬肉腸、薯餅、丹麥多士、蕃茄、茄汁豆及沙律菜。大啡菇焗得又香又夠juicy，豬肉 腸有烤過， 而且好粗，咬落外皮焦脆。兩片多士同樣烤過，表面酥脆入面香軟，整體味道都不錯❇️牛油果忌廉蟹肉意大利飯（淺綠)  $198▶️擺盤好吸引，最頂係一個圓圓的蟹肉球，下面係一片片擺到好似花花狀的牛油果，食落發現原來蟹肉同牛油果的味道好夾，意大利飯保留有少少咬口，忌廉汁均勻地滲入飯粒，味道香濃但唔會好膩，份量都足夠❇️蜜蜂啟程之旅 $168▶️呢款係侍應推薦每日限量供應甜品，造型非常可愛，圓圓的蜜蜂巢造型係脆脆的蛋白霜脆餅，入面包住海棉蛋糕，最頂有少少金箔，旁邊有一粒粒啫喱，加埋蜜蜂及花花造型的朱古力，加埋一齊成個甜品無論口味同味道感覺好豐富！❇️凍香蕉咖啡 $54▶️入口有淡淡的香蕉味但又唔會蓋過咖啡本身香味，奶味亦唔會好重，成個味道都幾balance，夏天飲好適合！整體食物質素唔錯，餐廳無論環境裝修佈置，以致杯碟都感受到用心有誠意，價錢雖然略貴，但見Openrice訂座有折，所以都係性價比高之選！…Read More

紅葉茶屋有幾間分店，呢日趁放假入去黃金海岸chill下，見到呢間比市區幾間分店都大，入面座位及空間都闊落，我地入座時係下午茶時段所以客人唔多，更加可以舒舒服服咁嘆下 ❇️藍鰭吞拿魚赤身刺身 $68▶️肉厚新鮮，肉質柔軟帶有油脂香，呢個價錢有4片都算抵食❇️和牛肉壽喜燒定食 $168▶️份量十足，包括兩款前菜小食、麵豉湯及白飯。和牛肉味好香濃而且肉質嫩滑，壽喜燒醬汁湯底香甜濃郁，連埋半熟蛋撈飯食一流！❇️火炙刺身三文魚及鰻魚茶漬飯 $168▶️可以一次過試哂兩款魚類，厚薄適中，兩款都好有魚油香。茶漬湯有鰹魚昆布湯及香濃蝦湯選擇，我就揀咗蝦湯，蝦味唔算濃，唔會蓋過魚本身的鮮味，成set份量都唔少❇️紅葉甘之三味(抹茶提拉米蘇) $88▶️今餐的重頭戲！入到餐廳見到牆上的poster已經覺得好吸引，一set入面已包括3款甜品：抹茶Tiramisu、春色牛奶布甸、北海道蜜瓜軟雪糕用四方小木盒裝住的Tiramisu賣相已經好靚，頂層舖滿香濃抹茶粉，成個Tiramisu入口香軟，而且成個份量都唔少。牛奶布甸有好香濃牛奶味，估唔到個軟雪糕都好重蜜瓜香，可以一次過試3款甜品，而且3款味道都出色，呢個價錢有呢個質素絕對唔貴，鍾意甜品的人真心要試！❇️雜莓椰青抹茶 (主食+$28)▶️見到有椰青又有抹茶覺得幾特別所以叫嚟試試。入面有幾粒紅莓同藍莓，入口有好香抹茶味但反而唔太覺有椰青味，可能因為只係用罐裝椰青水所以椰青味被抹茶蓋過咗，但味道都算幾清新整體食物質素唔錯，份量十足，環境舒服，個人特別推薦甜品。服務質素再提升一點會更加好！…Read More

元朗有好多間日本菜餐廳，今次嚟到呢間天澗居酒屋餐廳位置方便，門面裝修好靚，走高格調日本風。入面卡位私隱度高，仲有幾間榻榻米房，方便一班朋友自成一房舒舒服服咁用餐餐廳做緊唔同嘅優惠，先係壽喜燒鍋，晚市每枱消費滿$80就可以加$1有個二選一鍋物，超級抵！因為想試兩款肉，所以叫咗❇️美國豚肩肉鍋，再加$1試埋美國牛五花壽喜燒▶️首先個湯底清甜，入面舖滿豆腐、菇類及菜，好足料。兩款肉的份量都唔少，牛五花肉味比較濃，兩款肉的肉質都算嫩滑，另外配咗個讚歧烏冬，食落唔太彈牙，但勝在夠大碗❇️鐵板海膽汁燒蠔 $78▶️蠔肉大大隻，每隻沾滿海膽汁，食到蠔肉本身的香味亦增添咗海膽汁的惹味，都幾特別❇️火灸壽司6點(廚師發板) $78▶️嚟到居酒屋當然要試下壽司啦！有皇帝蟹棒、拖羅、赤蝦、帶子、平目魚邊三文魚，全部灸燒過，加埋每款特配醬汁，微微焦香中增添了味道層次❇️吞拿魚5點(優惠價) $78▶️一次過有齊唔同部位的吞拿魚，全部都新鮮，入口魚油甘香而且好嫩滑❇️迷你石鍋鰻魚飯 $58▶️雖然話迷你，其實飯量都唔算少。鰻魚都幾厚肉，中間舖咗蛋絲，個底仲食到香脆飯焦❇️巨峰乳酸梳打(買一送一) $38▶️大大杯，買一送一價錢好抵！整體食物質素唔錯，份量夠、裝修靚，最重要價錢非常親民，值得推薦！…Read More

最近劉興記開咗好多分店，之前去過旺角分店，對佢地的生煎包有點念念不忘，今次再嚟元朗分店試下招牌生煎包(2隻) $20上次試過蟹粉生煎包，今次試返原味招牌生煎包。雖然少咗蟹粉鮮味，但原味生煎包一樣爆汁，肉味及湯味香濃，同樣好食！😋蟹粉小籠包(4隻) $80小籠包頂端及肉入面都有蟹粉，入口有淡淡蟹粉鮮香，咬落去同樣爆汁，一口一啖大小剛剛好葱油雞扒拌麵 $42雞扒外皮炸得酥脆，入面肉質保留到嫩滑。麵的質地爽口，成set份量都唔少，幾抵食爆汁鮮肉湯丸(2粒) $20見到餐牌有呢款新食物，所以叫來試試大大的肉丸，外皮原來係湯丸的皮，咬落去煙煙韌韌，入面包住鮮肉餡，又係會爆汁，其實即係食緊咸湯丸，不過係大粒版，都幾特別！依家凡叫任何套餐或滿$60都會送豆漿，豆漿甜度適中唔會好淡幫襯過兩間分店，都覺得尤其佢地的生煎包都保持到水準，除咗蟹粉蟹皇類食物較為貴，整體來講其他食物都幾抵食。…Read More

呢間台式小店餐廳面積不大，裝修以簡約風為主❇️芝士火腿肉鬆蛋餅▶️份量都幾大件，而且足料，滿滿的肉鬆，食落有咬口❇️手工滷肉蝦捲便當▶️同樣好足料，除咗蝦捲，仲有好多滷肉、粟米粒、粉絲、酸菜、椰菜同半隻滷蛋，蝦捲有少許彈牙，最欣賞滷肉半肥瘦，帶點油香，撈飯一齊食夠惹味❇️慢烤雞腿蛋吐司▶️吐司上枱時已切開兩半，吐司包有烘過，有少許脆邊。慢烤雞腿肉厚切得嚟，肉質嫩滑亦保持到肉汁！入面夾上流心荷包蛋，食落蛋味好香濃，必點推介！❇️花枝丸配淮鹽(5粒) ▶️每粒都大大粒，咬落彈牙，而且淮鹽味香濃，咸度適中，食落亦唔會好油膩❇️桂花雪梨羅漢果茶（凍）▶️飲品可以跟餐加配叫，呢款清清地夠健康❇️冬瓜茶（凍）（健康少甜）佢呢個冬瓜茶比平日飲開的冇咁甜，不過成間店的飲品選擇偏少整體價錢唔貴，而且份量足，性價比高…Read More

想食高質素Omakase但又唔想太貴，元朗壽司之神相信會係一個幾好選擇餐廳座位唔算多，勝在裝修簡約整潔Lunch set: $880/位先來前菜❇️水雲藻及黑松露茶碗蒸▶️水雲係沖繩的健康食品，配以師傅自家調配的酸汁，入口酸酸地又有梅子的香味，夠醒胃▶️黑松露茶碗蒸：黑松露味道香濃突出，蛋亦夠滑漬物❇️醬油漬牛蒡、味噌蒜頭漬、薑片▶️讚一讚蒜頭，用味噌方法做漬物，冇咗蒜頭的辛辣味，入口有濃濃味噌但仍保留到蒜香❇️兵庫縣生蠔▶️蠔肉夠大隻而且好有鮮味，配自製酸啫喱，味道比平時單食生蠔豐富但又唔會搶過生蠔本身鮮味刺身❇️鰤魚刺身▶️即成年油甘魚，但魚鮮味較油甘魚重，入口亦有油潤感❇️薑蔥鯖魚▶️一般日本餐廳食到的鯖魚都係燒或烤，師傳指佢地選用咗較高級別的鯖魚，新鮮的鯖魚見到中間帶點粉紅色，食落口果然鮮魚味好濃，配合少許薑蔥更令味道提鮮壽司❇️拖羅窩巴▶️呢款壽司好特別，面層吞拿魚蓉，底層飯粒係炸過的窩巴，配合特製醬油，先軟後脆，口感豐富又有鮮味❇️北海道銀鱈魚配紫蘇花▶️第一次食銀鱈魚係刺身食法，同樣新鮮又有魚油香，師傅教可以夾少少紫蘇花芯一齊食，有微微花香，好特別的一款壽司！❇️天使蝦壽司▶️蝦肉新鮮爽口❇️炙燒墨魚▶️見師傅即燒，墨魚聞落及食落帶點焦香❇️醬油漬赤身▶️魚味濃又帶油潤口感❇️醃漬三文魚籽▶️我本身好鍾意食三文魚籽，今次食到呢款三文魚籽覺得同平時的有分別，味道清得嚟又有咸鮮，師傅話三文魚籽本身都分幾個級別，平時一般食到級別較低的咬落去係有點點死咸味道，而佢地餐廳係選取高級別的三文魚籽，咬口亦卜卜脆，唔怪得真係唔同D❇️霜降拖羅▶️霜降拖羅入面加咗一D京蔥碎，可以減輕魚肉的油膩感❇️甜蝦▶️甜蝦度度都食到，但師傅話用咗蝦頭蝦殼去熬製蝦精華並掃上甜蝦面，入口的確食到蝦味更提升的鮮味❇️炙燒右口魚▶️左口魚聽得多，右口魚都係第一次食。師傅話右口魚如果做刺身的話，口感會比較韌，但用炙燒方法，竟然變得入口即溶，加埋又係自家調配的醬汁，特別又惹味！❇️馬糞海膽▶️有兩款馬糞海膽，一款顏色偏黃，另一款顏色偏橙。偏黃一款入口即溶似棉花，偏橙一款入口鮮味餘香比較久，個人比較喜歡後者最後送上麵豉湯及甜品❇️麵豉湯正常發揮❇️甜品係紅豆焙茶布甸▶️面層舖咗銀箔，店員提醒食時要用匙羹篤到最底先食到底層的焙茶。焙茶味香濃，布甸有奶香，加埋紅豆又唔會太甜，作為成餐Omakase的結尾好滿足。感受到師傅對食材選擇認真，亦好用心去調配醬汁及製法，用餐過程同師傅傾計亦學習到好多傳統日本食Omakase及壽司的文化，以呢個價錢香港食到的Omakase實在物有所值！*順帶一提，注意訂座需要先付訂金…Read More

荃灣呢間門面裝修比較低調的小店，但原來提供高質西餐❇️先來餐包及餐湯▶️麵包鬆軟而且上枱時熱辣辣，牛油上面有黑松露加埋一齊食好香▶️餐湯係南瓜湯，口感creamy亦有濃濃南瓜香❇️鮮蝦芒果他他沙律配蜂蜜蛋黃醬 $148▶️鮮蝦肉新鮮爽口，芒果粒好清甜，但個甜度又唔會蓋過鮮蝦味道，加埋沙律菜，口感豐富得嚟亦清新❇️煙三文魚配千島醬Pizza $158▶️薄餅自家即時焗製，正宗意大利薄底，餅底及餅邊都焗得好香脆，上面煙三文魚咸香鮮味，再加火箭菜，整體味道不錯！❇️清蒸菠菜龍脷魚卷配甜椒汁 $218▶️呢款菜式都幾特別，龍脷魚柳卷入面釀菠菜，魚肉口感香軟亦有魚味，配菜有薯餅、甘荀、椰菜仔，加埋甜椒汁都幾豐富整體來講，食物質素、環境及服務都唔錯，食物款式特別亦有心思！…Read More

平時甚少去深井，提起深井通常只會聯想到燒鵝，適逢呢日老公生日，專登入嚟食下嘢嚟到呢間cafe，門面同裝修帶有田園風，戶外位置有白色枱椅，感覺舒服亦可以帶寵物用餐。❇️櫻花蝦喇沙海鮮扁意粉 $108✅海鮮包括青口同埋帶子粒，海鮮份量都唔少，扁意粉煮得恰到好處，喇沙汁醬辣辣地夠惹味，但青口略嫌唔夠入味❇️開心果窩夫牛角包 $48✅外型賣相已經相當吸引，面層舖滿開心果粒，中間有開心果醬同一層層好似雲朵的cream，每一口都充滿開心果香味但又唔會死甜。窩夫牛角包外層少許脆口入口鬆軟，成個包特別之餘亦好食！❇️自家烘焙巴斯克半熟芝士蛋糕 $42✅呢款甜品係店員推薦的，口感軟熟，而且芝士味道香濃，亦唔會覺得好膩，唔錯！飲品：❇️凍比利時朱古力 $42✅朱古力味道濃郁，雖然係凍飲加咗冰，但都唔會溝淡朱古力香味，甜度剛剛好❇️凍Dirty $40✅入口順滑，咖啡味都幾香店員同我地講今日剛剛改咗菜單，而佢地亦會不時改菜式，希望了解食客意見令佢地可以持續改進，感覺佢地用心經營。…Read More

最近社交媒體談論度好高，屬於齊柏林旗下新開業之日式丼飯店牛丼家，今日專登過嚟試下地點位處於旺角花園街市政大廈隔離的盛世酒店上，鄰近T.O.P商場，非常方便。店舖有兩層，採用自助形式。❇️雙重芝士牛魔王飯［M］套餐 (配公魚仔及味噌湯)▶️牛魔王系列係餐廳主打，當然要試試上枱時見到個碗滿滿的芝士條舖滿飯面，芝士味香濃下面的和牛漢堡扒都幾厚身，表面帶有焦香，牛肉味濃個飯跟咗個秘製牛魔王汁，跟返餐廳教的食法去食，唔會蓋過漢堡扒的肉香，而醬汁配有柚子醋的關係，可以中和牛肉同芝士的油膩感跟餐小食公魚仔炸得香口又唔會好油❇️泡菜豚肉飯［M］套餐(配炸雞及冰紅茶)▶️豚肉份量都唔少，而且帶有油香夠juicy。配上酸辣開胃的泡菜增添惹味跟餐小食炸雞有3件，外皮有少少脆，入面肉質嫩滑每款飯類都可以選擇細、中或大size，可以方便唔同食量的人都幾好另外，試業期間依家做緊$100/5碗套票價惠，即平均只須$20已經可以有一碗中size的當家牛丼，超級抵食！…Read More

間中經過屯門呢邊，都無為意呢間主打海南雞的小店，估唔到有驚喜！望望餐牌原來都好多套餐同食物選擇，樣樣都想試下❇️C3招牌海南雞飯配細肉骨茶餐$94 (另加一杯菠蘿梳打(少甜)$15)▶️既然舖頭名叫去骨海南雞，當然要試試招牌海南雞啦！落單時可以指定要定唔要某D部位，亦可以揀白飯/油飯/多飯/少飯。今次揀咗走雞翼、油飯少飯雞肉好嫩滑，份量亦唔少，油飯唔會好油亦夠香▶️細碗肉骨茶其實份量一D都唔細，而且都幾足料，入面肉骨大大舊，加埋豆卜同油條，味道香濃，再配輕盈魚湯浸時菜，成個餐非常飽肚！❇️B1一人餐$72▶️有3款主食可以揀，今次揀咗炭燒豬頸肉飯配白飯。豬頸肉表皮帶點酥脆，肉質估唔到都幾軟腍亦有肉香，配上醬汁增添惹味口感，而且肉的份量好多。成個餐仲包埋無味精住家湯一碗、輕盈魚湯浸時菜同飲品，呢個份量的價錢真心抵食！跟餐加$22可以有小食，分別叫咗醬爆芝士薯波(3粒)同馬六甲炸魚餅(4件)❇️醬爆芝士薯波▶️每粒唔算好大粒，好重薯仔味但芝士味就好少，不過不失❇️馬六甲炸魚餅▶️每件只係細細件，味道普普通通唔太特別整體食物有質素而且價錢實惠抵食，唔怪得之晚市幾乎座無虛席啦！…Read More

之前試過銅鑼灣店覺得不錯，今次試下尖沙咀呢間分店的lunch餐廳環境同樣走比較高格調路線，而呢間較為光猛，座位舒適。Set lunch包括餐湯、沙律、主菜、甜品及餐飲❇️是日廚師餐湯：蕃茄濃湯▶️入口番茄味好濃郁，飲得出冇加味精或加好多茄膏，飲落有蕃茄的天然香味❇️凱撒羅文生菜沙律▶️大大塊新鮮生菜，咬落好爽脆，上面舖滿芝士碎，亦有麵包粒同脆煙肉，芝士碎及煙肉的咸香提升生菜的味道層次❇️美國頂級牛板腱配磨菇燒汁▶️叫咗5成熟，每件都幾厚切，牛肉味香濃，入口軟腍又有肉汁❇️香脆三黃半雞配炒雜菌▶️另一個set揀咗雞，呢個估唔到好有驚喜！🤩一切開，入面肉汁同油份滲哂出嚟，外皮咬落脆脆地，但入面雞肉好嫩滑，而且即使唔點醬汁食，隻雞已經入哂味但又唔會過咸，味道恰到好處，而附上的炒雜菌菇味又香又濃，配合埋一齊食好好食！😍如果隻雞大隻返少少會更好，因為真係好食到唔多夠喉！😋❇️是日廚師甜品：Chocolate Mousse Cake▶️呢款甜品同樣有驚喜👍🏻，口感鬆軟，面層檸檬醬酸酸地，配合下層朱古力mousse，加埋伴碟嘅紅莓醬一齊食，甜度剛剛好，食完又唔會覺得膩！飲品方面，餐廳都做緊cocktail或mocktail 買一送一，其實都幾抵，不過家人唔飲酒，所以只係叫咗檸茶同咖啡。餐廳整體食物有質素，而且其中有位女侍應服務態度十分殷勤親切，用餐過程舒服，值得推薦！…Read More

呢間主打生煎包的上海菜餐廳，據聞最近都幾hit，而且多區都開咗分店。今日就嚟旺角店試下地點位於女人街近家樂坊，好容易搵。店舖面積唔算大，呢日係星期日下午，都幾多人嚟食，亦見有好多人專程嚟買生煎包外賣❇️招牌生煎包 ($20/2隻)▶️嚟到當然要試下招牌菜生煎包啦！新鮮熱辣每日即包即煎，食的時候已經好小心，但都依然爆汁！外皮唔會太厚，煎得脆脆地，一咬開入面湯汁真係好多，而且好夠鮮味，食完真係會想再食！❇️秘製上海炸排骨($22)▶️即叫即炸，外皮酥脆但又唔會好多油，入面肉質粉嫩亦有肉香❇️麻醬手撕雞絲粉皮($35)▶️粉皮非常爽口彈牙，頂層舖上厚厚的麻醬及芝麻，味道香濃，中間有好多青瓜絲，減輕油膩感❇️蟹黃拌麵($78)▶️蟹黃醬舖得滿滿，入口食到蟹的鮮味，麵條較乾身，但撈勻蟹黃同埋青瓜絲一齊食就會剛剛好，成碗份量都幾多❇️酥炸小雲吞12粒($25)▶️同樣即叫即炸，外皮炸得香脆，一口一粒，配埋酸甜醬味道惹味❇️手工豆沙窩餅($28)▶️一碟切開8小件，皮同餡的份量及厚薄均等，唔會太甜總括來講，價錢非常親民，而且整體食物都有質素，尤其生煎包的確是必點推介，而且服務態度殷勤有禮，值得再來幫襯！（唯一建議堂食最好用返一般餐具代替即棄餐具，唔環保之餘尤其紙羹食嘢真係唔太OK)…Read More