johnkissrube's Profile

荃灣食肆越開越多, 尤其荃灣西一帶, 對於鍾意飲飲食食既朋友, 真係一大樂事。係荃灣提起泰菜, 自自然然諗起福來邨。但今次試左呢間新開張米泰後, 覺得大有機會成為荃灣泰菜新勢力。裝修無得輸, 價錢適中, 而且最重要係味道都好好。值得一試再試之選!…Read More

台式火鍋一向都好喜歡，葵芳選擇唔多。近年大熱山見台式火鍋係唔同地區分店都試過，無論環境、野食、服務都幾好，新都會分店今日一開張，就急不及待去試。叫左Lv. 4，椰子雞湯底。湯飲得出係天然椰子水，清甜可口，雞有雞味，唔霉亦唔韌，出色。用來烚火肉，好岩味。呢度d牛整體都幾出色。自助吧選擇多，而且睇得出質素頗高。牛丸單睇顏色就知唔係出邊香精牛丸可比。鮮蠔丸真係第一次見，食落唔腥，鮮味十足。熱食同樣出色，尤其鍾意古早缺鴨，夠入味！調料區驚喜發現傳統紅蔥頭油，一啖台灣味盡顯，好鍾意！飲品區選揀都好多，有甜唔甜，有汽無汽一應俱全。用餐環境闊落，樓面服務唔錯，主動換碟。見到除左幾個靚女侍應，仲有一個顏值好高既靚仔主管。新都會分店比起其他原有山見，應該係有優化，整體好滿意，值得專程去試下。…Read More

荃灣地道美食如雲，拿筷子食的餐種（如麵、米線等)選擇亦非常多，但要數高質素日本燒肉店，真的想不起有邊間。地膽朋友介紹，大鴻輝商場新開左一間，佢去試過話好正！一聽到大鴻輝，即係要打蛇餅排長龍等lift上樓啦，唔好搞！朋友話係1/F, 即係一程扶手梯就到。正！咁就要去試下。估唔到平日星期二的晚上，大鴻輝條遠近馳名既等lift人龍仍然無令我失望!排到環繞地下大堂大個圈......好在我只需要一程扶手梯就可以上到餐廳。第一印象：估唔到，個場裝修真的好有誠意！環境好寬落，而且壁畫好吸引呀！一大排飲品櫃，正！成晚無論食物、服務或用餐環境，都非常一流！壺漬封門柳，先用大火燒至兩邊焦香鎖住肉汁，再轉中慢火烤至八成熟，內嫩外香，無得彈！大虎蝦、豬腩都非常有誠意值得一提，蒜泥醬配燒豬腩肉食，極好味。熟食水準都好高，尤其鍾意炸雞、榴槤炸彈重頭戲，係呢條天梯，由下而上食，真係一大享受！店員真係非常細心，主動幫忙調節火力，換燒烤網......仲提示我like 社交平台就可以有Movenpick雪糕食，激讚！如果keep得住，我相信將來大鴻輝會再多條人龍。…Read More

日頭咁猛烈，一個人到灣仔辦事，避過繁忙的午市時間，行入利東街呢間樂拉麵。之前有幫襯過，感覺無論氣氛、野食都非常唔錯。今次叫左碗樂豚骨拉麵再額外叫一碟原味炸雞拉麵已經非常唔錯，估唔到炸雞先更令人一試愛上！色澤岩岩好，外脆內嫩又富有鮮味肉汁！推介！…Read More

老友係K11 MUSEA開左間舖頭, 星期日朝早一早去探佢新場。行經2樓多賀野門口, 見未開門做生意, 八卦影左幾張相。個半開放式廚房吧台好靚, 流線形!一入門口呢兩棵樹, 亦都好特別, 玩味十足。問個靚仔經理開門時間, 同朋友提早15分鐘來排隊試下佢。好貼心, 見到有人排隊, 就算未到開門時間, 都放人入內坐住先。話哂自認麵精, 咩係好, 咩係壞, 一定逃唔過我法眼。朋友一向鍾意鹽味拉麵, 叫左碗粟國鹽拉麵; 我就見個靚仔製麵師咁岩製緊沾麵用既麵條, 叫左碗豚鴨沾麵。 賣相好, 份量足, 朋友話品質好好! 鹽味唔死鹹, 湯底清徹無咩油份, 獨有一股鮮甜味, 佢飲哂所有湯, 仲意猶未盡。豚鴨沾麵, 麵條明顯比拉麵粗, 份量亦夠。試左啖沾汁, 完全無坊間一鹹獨大既問題。反而覺得可以再鹹DD。獨有豚、鴨、魚、雞混雜, 鮮味無法擋!! 麵條掛湯好, 唔點任何汁, 試左兩條, 有淡淡麥香。麵條彈牙, 或者有人會話偏硬, 但我覺得咁先係沾麵! 令我諗起上次去清遠食雞, 同行某位友人話:「哇! 咁硬既?!」哈哈..... 半隻流心蛋, 叉燒, 醃笋, 紫菜及蔥花, 加埋食, 美味, 但我想佢俾多份我囉~~見佢麵類的確做得好出色, 所以叫多份小食, 炸雞juicy! 香脆好味! 個醬都好出色 (唔知係咩醬, 估計係自家調配)見隔離枱黑椒炸雞都好似好香, 下次會試下。整體而言, 呢間真係靠得住! 無論餐廳環璄, 出品都非常出色! 唔怪得我食完行出去時, 見到條人龍, 已經越過左隔離間咖啡店。…Read More

鍾意食辣，所以周圍留意有無高質素湖南菜。但香港，真係唔太多，於是不時北上解喝。呢個情況隨住食過湘薈後，會改變！朋友住tko, 見有新湖南菜開張，就第一時間約齊人腳去試下。位處天晉滙，出左港鐵右轉上扶手電梯，右轉穿過條天橋，再左轉落扶手電梯就到，非常方便快捷，全程2分鐘。門口有張好大既剁椒魚頭相，好搶眼。入到去，環境舒適，有vip房。吊燈及一面裝飾牆好吸睛。來到湖南菜餐廳，點可以唔叫剁椒魚頭？！呢間餐餐叫：蒸氣剁椒魚頭。真係有煙出架，好得份量十足！目測淨係個魚頭，都有2-3斤！加埋兩條魚腩，唔使擔心唔夠食。紅黃椒的經典演繹。味美、鮮甜、嫩滑。我地再叫左碗「魚麵」- 其實係淨麵，撈埋剁椒魚頭既汁一齊食！正！雜菌羊肚菌乾鍋都好出色。係台度明火收埋d汁，熱騰騰，送飯一流！而且又健康有益，多食唔肥。席間仲叫左幾道經典湖南菜，如長沙臭豆腐、辣椒皮蛋、石門肥腸、臘豬面等等，都相當有水準。甜品係糖油粑粑。滿足！呢間餐廳如能keep住呢個出品、服務，會好快爆紅！拭目以待。…Read More

緣份是屁，話來就來。係KCC返工既老友，近來好有神心lunch多次「山長水遠」過來葵芳新都會食呢間稻成京川滬。食極唔厭，竟中午食完，約我食飯晚。佢要癲，個屁要放，作為老友，當然二話不說。平日既夜晚。預先打來訂枱，故此好快獲安排入座。一行四人，幸運地坐係入口左邊個排半封閉式「卡房」。呢個真係要讚！好有誠意既裝修安排。冷盤唔講啦，早前幫襯過，已知佢水準一流。今次講三道主菜，首先係水煮牛肉好明顯，師傅係有功架！Ｄ香辛料亦真係有係滾油爆香，而唔係純粹有形無實。食得水煮，當然期望佢有水煮應有既麻、辣、香、鮮。呢度水準係坊間平均水準之上，但食得辣既我，希望佢可以做得辣Ｄ，食落先夠過癮！水煮，食配菜先係識食。蓮藕片，芽菜，萵筍固然好，我更愛粉條。煙煙韌韌，入哂味，非常美味。乾爆蝦球，你咪以為乾曾曾，獻汁豐富架！而且蝦球並非平價白蝦，而係肉質鮮甜既虎蝦，啖啖爽口彈牙，非常美味，送白飯一流！作為京川滬餐廳，上海菜代表賽螃蟹當然唔少得。蛋白潔白滑嫩，加上瑤柱絲，更鮮甜可口。雖身處「房」內，但枱邊有各類標示清晰呼叫店員既按鈕，一按唔使幾耐就有人來服務，加分！其實，稻成京川滬位處新都會，於下層就係通往葵芳港鐵站和葵涌廣場既天橋，位置非常優越。加上店內裝修優雅寬敞，假如能繼續堅持：1. 門口接待處時常笑面迎人，發自內心的熱誠招呼2. 店員各人多走一步，貼心服務人客，係人客未提要求前，就主動介入幫忙解決3. 京、川、滬菜式口味要鮮明，唔好上海回鍋肉做左川式回鍋肉；川式炒菜變左酸甜4. 水煮該麻辣，就麻辣。咁先可以令人客加深印象。始終區內比較少高檔精品式川菜。幫襯機會仲有好多，我一定會再來！…Read More

呢間譚仔，以往一到午餐時間，必定人頭湧湧。所以比較鍾意係繁忙時段前或後光顧，避開人潮。以往一個人可以優先獲得安排坐位。以往門口有個非常醒目既姐姐負責安排入座。以往廳面每個店員都好似活力十足，快手快腳......以往近幾次再去，已經無需避開「繁忙時段」，因為睇來，亦唔太繁忙。一個人攞左飛，見到場內單丁位大把，而店外等候者亦只係三三兩兩，但就係要等。好不容易同個Ｄ兩人飛、３人飛、四人飛一齊叫號，終於叫到，可以入座，咪又係被安排坐係近門口個Ｄ單丁位。叫左確重慶酸辣豬雞米線 。自從某次同友人來食，佢叫左呢款酸辣試食之後，清湯已被排在第二位。又酸又辣，的確過癮！雞肉豬肉水準亦與從前相若。廳面服務，真係一大問題。唔知係咪被收購後架構上有咩重大改動影響到前線員工士氣，好明顯店內侍應數目比以住少好多，亦無咁積極。一間餐廳要成功，環境差可以係出品及顧客服務方面補救。出品未能做到鶴立雞群，亦可以通過定價吸引食客。但若然顧客服務方面變差，衰落既喪鐘就敲響了！畢竟係附件，食肆林立，貼錢買難受之事，唔係太多人願意做。…Read More

次次幫襯呢間貴香園，都不期然諗起幾年前開張不久，我岩岩幫襯佢時，佢事頭婆一句：「唯一有咩咁巴閉呀？只不過係係荃灣咁多年，儲埋一大班長情客而已！我旺角間舖，夠排埋長龍啦！假以時日，呢間夠可以做到啦！」的確，幾年過去，呢間貴香園真係人氣不絕。我諗，除左有事頭婆既魄力（雖然好耐唔見佢出現係舖頭），仲有兩位好做得野既店員。成日做到爆，又逼，座位又凹陷，但勝在店員夠親和力。呢樣野，唔係間間做到！腩肉唔少得，今次加埋豬潤我覺得佢係四坡坊唯一與路德圍既中庸之道。入味，但不至於如前者油膩。湯底出色！但其實我鍾意大腸多過豬潤，只不過試左幾次後，每次唔係凍凍地，就係太稔，所以就將之剔除在外。有時經過，見到佢生意好到開埋橋邊枱櫈，真係替佢開心。我諗只要堅持出品質素，加埋店員咁既服務水平/方式，生意只會越做越好。…Read More

叫得曼谷泰菜，如果做得唔「泰」好，就唔止關乎一間餐廳面子問題。午市早段，見難得門口無人等位，入內。被安排係最入邊２人位，大大塊落地玻璃，出邊就係新都會露天playground, 孩子天真的笑臉，未食都覺得心情舒暢。同行友人叫左紅咖喱牛腩飯牛腩炆得夠入味，咖喱亦香濃，淋上白飯面，一同進食，好味。唯略嫌選用之白米煮出來既白飯唔夠香。但同咖喱撈埋食，又無咩問題。只係如果可以轉過一款好Ｄ既米，總會好Ｄ。我就叫左泰式炒金邊的的適適，乾濕度適中。再乾一分就太乾，可見出品有一定保證。蝦亦唔係無味道既白蝦，而係肉質鮮甜既無頭鳯尾，加分位。跟餐沙律所用既container亦唔錯，環保得來同泰菜好匹配。沙律本身亦唔錯。可能係所坐位置屬場內最唔顯眼角落，比較難搵店員幫手。除此之外，整體都可以。…Read More

荃灣可以話係麵食天堂。無論你鍾意上海麵、山西刀削麵亦或雲南米線，總會搵到非常高水準既餐廳。而其中雲南米線，一向係四坡坊與路德圍之爭。若將之比喻為紅酒，前者就如個性鮮明既mouton, 後者更似入世既lafite兩者誰最好？為何總要分最好？我兩者都鍾意。論味道，四坡坊令人印象深刻Ｄ。但若論經營之道，路德圍贏九條街唔止！君不見佢唔做「唯一」，好多區都有分店？！旺角砵蘭街呢間分店，係繼路德圍以外，我最經常幫襯的分店。同樣一碗腩肉貢丸米線。由中學求學時代食到依家，每次再遇，都諗起佢精明既老闆娘同舖內幫手既嬸嬸。一眨眼，十幾廿年......講真，呢十多年間，佢口味都轉左幾次。明既，以往小店一間，發展成連鎖式，仲有咩自己車隊行中央供應鏈，口味一定要配合實際運作。可幸廳面服務水準，keep到。呢樣看似容易，但我深明做起上來，非常困難。畢竟改變食物口味易，改善服務水準，涉及眾人之事，就難度唔少。作為佢長期捧場客，就如何在競爭極大既市場上長期成功經營，我覺得當務之急，係要搵到同其他人既「差異化」。四坡坊唯一以唯一，以出品做招來。雲桂香呢？老闆娘，呢個問題不可不諗諗。…Read More

葵芳真係食肆林立，無論係社區會堂一帶、葵涌廣場或者新都會，選擇之多，菜式之廣，令人側目。但最愛，都係新都會廣場。一分錢一分貨。以往，只要過開來呢頭，芽莊總會成為我午餐首選。對於佢隔離呢間Parkview，除了經常坐唔滿外，再無其它印象。今次再次經過，見到Parkview個名，改左！不再是Parkview by A-1 Bakery，而係就咁一個字：Parkview，細問下問口個靚仔，才知原來去年１１月已經換了經營者。見場內幾乎全院滿座，我相信群眾既眼光係雪亮既。故此入來一試。一坐低，就有侍應行前招呼，叫左個推介，石板牛扒餐pink！！！你無睇錯！的確係粉紅色！上次見到pink pink已係大半年前係大角咀一家地舖小店，真係難得一見架。鍾意半生熟既我，憑藉底下塊超高溫既石板，兩面煎香，好容易就做到咁既效果。肉汁充份被鎖住，而且外脆內嫩，近期少見既高質素「扒」！再沾上兩個house dressing, 正！旁邊Ｄ配菜，今次就真係只可以做配菜啦！我食肉食到幾乎忘記佢地存在！估唔到餐湯同餐包，都唔係普通貨色你無睇錯！的確係大大塊牛角包，仲暖粒粒。一啖香酥牛角包，呷一口超濃松露雜菌湯，咁既價錢，咁既用餐環境，無得輸！係葵芳要搵間坐得舒服，就腳，出品好，服務貼心既西餐廳，真係唔多。呢間Parkview已被列入一定會再光顧既選擇之一。我係度諗，如果唔係入口唔多覺眼，行快兩步都會miss，憑咁既出品，服務與及環境，繁忙既午市時段，理應門口排長龍先係。…Read More

曾幾何時，講起食拉麵、小籠包，一定諗起翡翠。但呢種情況真係不復存在。原因係，不經不覺間，佢由一間以出品及服務取勝既優質餐廳，變成無服務，出品極普通既一般餐廳。一間餐廳若要長期成功經營，不外乎係營造用餐環境、顧客服務與及出品上下功夫。以往的翡翠可以話三樣兼備。然而，近年多次光顧（都係荃灣廣場店），只有裝修依舊，出品、廳面服務，一一欠奉！首先，午市後半去到，場內食家零零落落，但就係門口呆等２分鐘先獲安排入座。明明無咩人，兩個人又被安排坐係欄杆邊２人位。本來有心叫多Ｄ野食，但因為張枱太細，無謂搞到無位置擺放，所以只係叫麵食。因為本來唔諗住寫食評，所以無影相。但越食越覺得唔寫唔得，所以影成咁，請見諒。講句公道說話，佢原本賣相ＯＫ但味道就真係不敢恭維。成碗麵，被一個「酸」字掩蓋哂！ＯＫ，或者佢話佢係華東風格，酸Ｄ無問題，但為何又加咁多辣油？呢Ｄ辣油又似真係一般街邊叫貨既辣椒油，無個性或深度可言。當然，我亦唔會純真到認為佢會為一碗擔擔麵而即場烹調一碗自家製辣油。講完出品，廳面服務真係不敢苟同！一個永遠黑面既男經理，帶領住一班對人客視若無睹既侍應！舉得手，你就預要舉多幾次，或「長舉」先會有人理！仲要經理大大聲：「放低啦，唔得閒招呼住！」最後竟然係負責上菜既姐姐幫我解決問題．．．．．．無言我諗，一個品牌正在沒落！…Read More

依舊，推開那塊厚而不透明的透明膠門擋。仍然係圓膠櫈，圓摺枱。兩邊牆依然貼滿餐牌。佢老闆，依然頸戴八両金，健壯如昔。一切無變！係囉，好既野，變來做咩呢？！今時今日係香港地做餐飲，叫「唯一」既唔止呢家。但呢家真係做到合乎其名，全港只此一家。歸根究底，只有兩種可能性：１. 只懂堅持出品而不懂經營之道２. 資金問題我諗，佢屬前者。講錢，佢蝸居四坡坊，即紅遍港九近二十年，為不少人心目中雲南米線之首選。點會無金！知道老闆堅持每碗米線上枱前，均用小鍋煮過，力求熱烘烘，香味遍達。呢種近乎「戇居」的堅持，為佢開了發達之門，卻同時關了可能大肆擴張的機會。雖知道坊間做米線者十之有九點九九九九都係車仔麵檔咁運作，幾樣做好的食材執成一碗，加上熱湯上枱。好似佢咁做，搵鬼同佢打工～哈哈～～～呢碗「腩肉豬大腸米線」，由細食到大。由好早前一粒粒肥脂浮係面，到依家「清」左好多，但依舊係油立立！無錯，佢就係咁有個性。從來都無話sell健康少油。但個味道，真係令人回味。辣得來酸，酸得來一啖嫩滑、爽脆、軟稔．．．．．．忍唔住連湯都想飲埋。但我通常叫多支豆漿飲，明知你會搞到我再肥Ｄ，可避，則避ＤＤ啦！歲月如輪轉，小店，轉眼熬成經典，真心希望再過二十年，都唔好變！好的東西，變來做咩？！…Read More

帶小朋友食lunch，揀適合佢地 ，而佢地又鍾意既（至少唔反對）係難題。小雨天唔錯。今次已經係Ｎ次來。叫一碗「金菇雲吞米線」已係指定動作。鍾意佢湯底清清地，唔似出邊大都數同類餐廳咁油立立。成碗配搭亦以一字「清」可概括！慷慨的金菇，淥熟而外皮無穿無爛的雲吞，再加上軟硬適中得來，不失滑溜口感的米線，的確係少肉之選。原諒我影得太遲，只係影到豐盛過後遺留之殘影。放心，靚女未變靚姐前，係靚女！除左經常幫襯的葵涌廣場分店，荃灣華都中心亦開了間，希望佢平民化得來，繼續保持應有的服務水準。…Read More