MediatFindrel's Profile

開心果雪燕西米露，$52，真材實料，將開心果磨咗糊之後，再喺面糝一啲開心果碎，雙重口感。黑芝麻豆乳大滿貫，$50，芝麻味好香，豆漿嘅豆味亦都濃，感覺就係用豆漿開稀咗嘅芝麻糊。四喜仙草同埋五福仙草都係以仙草做主打，價錢同樣係$40，芋圓同地瓜丸係好食嘅，煙靭之餘真係食得到番薯同埋芋頭嘅味，啲桃膠都幾多。佢呢度每個甜品都會有一張卡仔，介紹吓個甜品之外亦都有啲gimmick嘢，款款甜品嘅賣相都好掂，而且個味道都真係唔錯。…Read More

呢一間舊式老派粵菜，果然名不虛傳。小炒王一大碟，上菜嘅時候有啲震撼，炒得夠乾身，而且冇乜油，盡顯師傅功架，蝦乾芋頭絲韭菜花等等，都配合得好好。蝦子柚皮做得好好，呢啲功夫粵菜基本上喺市面上好難搵得到，之前食過一兩間其他都冇呢間做得咁正宗，佢個柚皮配上蝦子做得好和味。呢個一字骨都做得好好食，連住骨嘅肉做得好腍好入味，個黑醋汁都做得幾好。焗魚腸都OK，不過略嫌魚腸嘅份量比較少，入面如果多番啲魚腸應該焗味仲好。送嘅甜品竟然喺薑汁撞奶，有驚喜。…Read More

喺OpenRice search到呢一間油麻地嘅餐廳好似好正，所以今晚決定食呢間，小食就揀咗尼泊爾餃子，因為怕熱氣所以就揀蒸嘅，其實食落我覺得同我哋中式嘅餃子好似，味道唔錯。跟住我見OpenRice好多人推介佢個咖喱羊，因為我好鍾意食羊，所以都嗌嚟試咗，佢係成個羊小腿上枱，因為個size唔係好大，所以估計隻羊本身都唔係好大隻，可能因為咁嘅原因，所以啲肉特別嫩滑。除咗羊之外仲叫咗個雞，咁食呢類型嘅餸菜梗係要食印度薄餅啦。羊同埋雞都唔係好辣，而且個汁都幾多香料，好和味。飲品就叫咗印度芒果乳酪同埋德國麥啤，兩樣都好好飲，尤其是個德國麥啤。…Read More

騸牯牛漢堡果然係正野，個size都幾大，真係要㩒偏少少先咬得到。佢嘅肉都幾juicy，牛肉味都夠香，咬落去有粗有幼嘅肉質感，應該係人手打而唔係用攪拌機打先做得到呢個效果。加$45跟餐揀咗特色薯條，幾款之中要咗火炙明太子，超正，搵火槍燒過嘅明太子特別香。呢個係魚仲炸魚薯條，老闆用新鮮魚整嘅，所以魚仲嘅肉質係同嗰啲雪藏魚柳有好大分別，呢樣野真係無得呃。最後仲叫咗碗鮮魚湯，魚味超香濃，打咗泡所以飲嘅時候好豐盈同creamy，入面仲有昆布，好掂。…Read More

屋企收到呢間西餐廳嘅coupon，每$200可以減$40 ，仲可以一次過累積用4張，於是就嚟幫襯一下。本身諗住食豬手，因為見OpenRice好多人都讚佢個脆皮豬手好好食，不過我哋見到隔籬枱嗰個西班牙海鮮飯好似好正，所以我哋就叫咗西班牙海鮮飯，佢有分二人份量同四人份量嘅，我哋叫咗二人份量，食到好飽，好彩冇叫到其他嘢食，佢個海鮮飯入面有蜆、青口、蝦同埋魚柳，個飯吸晒啲海鮮味好正。啤酒就揀咗德國修道院黑麥啤，麥味好香濃。…Read More

呢碟慢煮豬鞍做得非常好，好大件，件豬鞍都厚身，不過食嘅時候又唔會好鞋好韌，而且比想像之中juicy，外層用類似Parma Ham嗰D火腿，再加豐富芝士包住黎焗，Parma Ham帶出既嗰種鹹香味，再加上豬鞍爽彈嘅質感，係一道味道唔錯嘅菜式。呢道菜都要一段比較長嘅時間，叫嘅時候個waiter已經問咗我地，要等20-30分鐘是否OK，因為呢道菜嘅烹調工序比較複雜，所以要長D時間，不過食過之後就覺得美食係值得等待嘅，配埋紅酒都係一大享受。至於呢個Baby Blue藍青口又係好正，除咗Baby Blue本身嘅鮮嫩之外，佢個汁亦都係好和味，用Toast黎點D汁真係要一滴汁都唔好浪費。…Read More

經濟差，晚市去酒樓食，真係好平，不過都係無乜人，好似呢一間，推出各式各樣的優惠，但係都係無乜人，D野食同服務都OK嘅，希望佢地頂得住啦。乳鴿$16.8一隻，於是每人一隻啦，然後叫個炒通菜同西蘭花蝦球，埋單每人百幾蚊，係貴過茶餐廳，不過呢個價可以喺酒樓食真係好抵食。…Read More

呢間弼店不得了，不得了在於佢個炸兩，入面條油炸鬼竟然係脆嘅，我都估唔到呢件事仲可以喺香港嘅粥品店發生到，一般黎講，炸兩入面條油炸鬼唔un已經當你贏，唔怪得呢間野成日都要排隊啦。不過呢間野係得個炸兩掂，佢碗粥應該有落味精嘅，因為食完碗粥之後要係咁飲水先搞得掂。…Read More

估唔到呢間餃子店越開越多，一直未有機會食到，不過今日終於有機會幫襯了。叫了一碗白菜豬肉餃子麵，然後再加多4隻韭菜餃，要煎嘅，兩個煮法一次過試晒佢，再加一支豆漿。雖然煎餃的確係香口D，不過我自己就比較鍾意放湯嘅煮法。餃子D餡都幾新鮮，味道真係唔錯，難怪成日都有人排隊。…Read More

餐廳細細不過有充滿熱情的侍應和店長招待，真係有一種賓至如歸嘅感覺。我地坐低喺度睇Menu嘅時候，侍應送上呢個印度脆餅，好香胡椒味，一人一塊。我地主要叫咗3樣野食，第一樣係呢個尼泊爾momo餃子，其實同我地D中式餃子好似，不過佢D餃子皮就厚身D，有D似鍋貼嗰種皮，比平時嘅鍋貼皮再厚少少，入面D餡料係雞肉，不過再加入了印度尼泊爾嗰D香料，食落味道唔錯，佢仲有幾隻醬比你點。第二樣係印度BBQ，係免治羊肉條黎嘅，鐵板上，所以可以Keep到個溫度耐D，呢個味道都OK，不過比唔上之後的咖哩羊膝，因為佢個羊膝真係好好食。呢個就係咖哩羊膝，煮得好淋好入味，羊膝嘅肉質好嫩，拎住支骨黎食超正。仲有佢個咖哩汁入面有好多香料，非常有層次感。有咁正嘅汁又點可以唔叫Naan Bread來點點佢呢？呢度個Naan都好食，好新鮮，似係即叫即做。…Read More

好開心呢間Coffee Shop又可以黎食Dinner，因為深水埗區無乜呢種咁認真的西式晚餐。因為朋友係熟客，所以book位時仲要預訂左招牌菜牛小排真係超好食😋。店長姐姐話牛小排係無餐牌到既，要食就真係睇彩數，唔一定有，好彩我個friend預訂咗。牛小排仲有少少Pink肉，所以食落會嫩一D，佢D拌碟配菜我都好欣賞，好睇又好食，一路食一路感受到大廚的悉心製作。我地仲食左呢碟叫蝦蝦霸霸嘅餸，蝦汁濃郁，而且好新鮮，紅蝦刺身鮮甜，仲加埋魚子醬，一上枱忍唔住哇左一聲，因為擺盤真係好靚。就係鍾意幫襯呢D小店，用心製作，時有驚喜，唔怪得我朋友成日都話要去食。…Read More

見到呢間野原來除咗雞煲之外，仲有燒烤食，所以就去咗試吓。燒茄子一向都係我的最愛，所以必點，呢度個燒茄子幾好食，好惹味，少少辣又唔會好咸，條茄子都幾大條，夠晒2個人食。燒韭菜都正，D韭菜無渣，仲竟然有鮮嫩嘅口感，真係燒得唔錯。燒雞中翼唔好睇佢個樣咁燶，其實都燒得幾入味，而且外皮又唔會燒得太乾。燒粟米甜甜地幾好味，佢D甜係粟米本身嘅甜，而唔係後加的。我地仲叫咗兩串羊肉同兩串牛肉，邊位燒到少少燶，所以幾香口，D牛同羊都juicy，有肉汁。…Read More

難得老細請食飯一於去盡D食豪D，黎咗呢間酒樓，開頭以為佢得一間，寫食評時才發現原來佢有幾間分店，呢間D野都幾好食，不過人手真係唔夠，可能因為新開未請夠人啦。先來兩個小食，海哲同陳醋雲耳，兩個小食都比想像中大碟，起碼8個人都夠食，唔會太細碟搞到有人無得食。重點出撃第一度餸就係呢碟芝士焗龍蝦加伊麵底，呢個比起出面好多酒樓食到嘅好食好多，首先係D芝士真係芝士，而唔係求其落D白汁加少少芝士喺面就當係芝士。隻龍蝦D殼比較薄，好易咬得開，而且都幾多肉，連D伊麵都整得好食。重點出撃第二度餸就係呢碟魚翅撈飯，個芡汁做得幾好，有香味而且唔會一味得個杰字，個飯亦唔會好濕，魚翅就唔係食到好多，整體味道係唔錯嘅。要返碟菜清清地，魚湯浸，D菜好新鮮，呢個好食。最後梗係要食甜品啦，呢個荔枝造型嘅甜品入面係類似奶皇流心，都幾好食。…Read More

小籠包一客有5粒，Size比例大，皮很薄但同時亦易穿，入面的餡料幾新鮮。砂鍋雲吞雞都幾大份，味道一般，雲吞係上海菜肉雲吞，都有5至6粒，半隻雞無切碎嘅，所以食嘅時候會比較難撕開，始終都只係得筷子同湯匙。松子黃魚好抵食，小店就係平平平，個汁就酸咗少少，魚嘅肉質都唔錯，同埋真係好大條魚。蒸素餃個餡料又估唔到幾好食，係塊餃皮厚咗少少，食落有健康嘅感覺。擔擔麵嘅花生醬好香，入面有肉碎花生碎，D麵條味道OK。炸銀絲卷又點可以唔點煉奶呢，呢個都幾好食。呢度嘅豆漿味道都幾好，有豆味。檑沙湯圓即叫即做，真係幾好食，我覺得比高力豆沙同豆沙窩餅好味。…Read More

食完dinner時間尚早，於是乎就嚟咗朗豪坊呢間cafe飲杯嘢食少少甜品再傾下偈。我哋叫咗栗子蛋糕雪糕、桂花荔枝雪糕同埋牛油果無花果奶昔三樣嘢。桂花荔枝雪糕一如想像般清新啲荔枝味都幾香。栗子蛋糕雪糕都幾過癮，當然有栗子味啦，但係原來食到底係有真嘅栗子蛋糕粒喺裏面，另外值得一讚嘅係佢呢個雪糕曲奇餅杯味道唔錯，都算鬆化。呢杯牛油果無花果奶昔就真係麻麻地，飲落去有少少苦味，因為miss開個杯所以只可以喺個窿仔度影幅相畀大家睇。…Read More