vincentdelight的個人專頁

近排食得多熱氣野上火，久唔久真係要黎返日Green day detox 一下。茹素、食齋對牛高馬大嘅男人來講一直好卻步，但另一半食開健康野，所以一直都bookmark左呢間人氣店，今日見冇人排隊終於有機會試吓🤗選擇困難症就聽店員介紹，嗌左個咖喱素豬扒定食配麵豉湯。「炸豬扒」咬落去真係同食緊日式炸豚無好大分別，只係肉質取而代之係淡淡嘅豆皮腐竹味。配埋炒蛋同埋芝麻汁椰菜，老實說價錢上、味道上對第一次食齋嘅我都非常宜人，亦都好有驚喜，食肉獸都完全唔抗拒😜牛油果羽衣甘藍沙律，要讚下店家知道另一半堅果過敏，好細心咁檢視左我哋嗌嘅菜式，再幫我哋走果仁👍🏻👍🏻。牛油果軟冧，配埋爽口嘅羽衣甘藍，醬汁酸甜醒胃，係另一個必嗌之選！話明detox, 都真係唔敢叫太多食物，睇到佢有pizza仲係最愛嘅薄批，唯有忍口下回再戰。飲品都揀咗比較清淡嘅選擇，凍桂花烏龍拿鐵+熱無糖熱烏龍。前者係口味調校上非常到位，唔會過甜，桂花同烏龍茶嘅組合，一濃一淡異常合拍。熱飲雖然聽落冇乜特別，但一杯上乘嘅茶絕對係會令人留下印象，一杯烏龍雖然一定冇阿里山嘅茶感，但已經兩年冇出遊嘅我哋，絕對收貨🤗整體來講呢間fusion 素食餐廳絕對值得encore，每個月keep住素一下，話唔定身體都會健康啲咩病毒都走晒啦😎…查看更多

今日去咗灣仔嘅福川，食OMAKASE。之前喺唔同嘅地方都有食過，但係就以鐵板燒為主，今次嚟到呢間就試一試佢壽司版嘅OMAKASE。前菜有三小碟，味道以清新開胃為主。有胡麻豆腐、南瓜凍湯同漬物。胡麻豆腐帶點煙銀嘅口感豆味香濃。雪場蟹腳拆好肉，再配以少許麵豉醬、蟹膏同海膽醬，更能夠帶出蟹肉嘅鮮味。本身對於三文魚、吞拿魚刺身以外嘅魚刺身都冇乜特別喜好，但呢度嘅池魚刺身比到好大嘅驚喜我哋。池魚配上酸汁，令池魚提鮮不少，又唔會蓋過刺身嘅鮮味，恰到好處。帶子係濃濃嘅白煙底下隆重登場！以山桃木煙薰再配上蕃茄沙沙醬，味道微酸，帶子表面仲有金箔片，絕對係視覺同味覺嘅至高享受。黎到食壽司嘅部份當然由油分較輕的白身魚食起。 金目鯛用火槍微燒，將魚油迫出，更為美味。 花魚通常會用黎做一夜干，但師傅將佢黎做刺身壽司，有驚喜！深海池魚王，魚鮮重油份而不膩，好想食多件！松子仁加芝士焗膠魚，脆口既松子為膠魚加添口感！牡丹蝦壽司配蟹膏麵豉醬。甘甜嘅蟹膏同牡丹蝦嘅鮮甜，互相輝映，絕對唔會奪左對方嘅鮮味。以關西江户前造法特製既胡麻油甘魚，先用胡麻醬浸泡5分鐘， 魚鮮之餘滲出胡麻香味，十分之有特色。壓軸登場有招牌醬油拖羅， 以熟成豉油侵魚，再配以黃芥辣突顯鮮味，又再一次刺激我哋嘅味蕾！迷你海膽飯用上北海道赤膽，味鮮甘甜，雖然已經好飽，但又好想叫佢比多碗我食。呢一餐廚師發板十分之有驚喜，每一味菜嘅味道都帶你去到另一個層次，同女朋友約定之後要再嚟食過！…查看更多

之前同女朋友已經嚟過呢間殿大喜屋，難得女朋友鍾意食呢間嘅日本放題，於是乎再帶佢嚟食。刺身拼盤-食得日式放題，一坐低梗係要嗌刺身食先啦。先點左三文魚、赤貝、北寄貝、帶子等等刺身，食落新鮮又夠凍，所以忍唔住又嗌咗第二round。海膽手卷-呢一個係必食項目，雖然要自己出去排隊攞，so call叫限時限量食物，但其實我都攞咗三四轉都仲有。佢啲海膽份量大大份，一舊手卷有兩三大片嘅海膽，微微海水味，份外鮮甜，而且紫菜新鮮脆口，叫人忍唔住拎完又拎。三文魚腩壽司-三文魚腩油脂豐富， 配合微酸嘅壽司醋飯，真係配合得天衣無縫，微酸嘅醋中和三文魚嘅魚油，分外美味。蒲燒鰻魚-厚厚嘅鰻魚，肉質細嫩，配合醬燒汁，真係好食到停唔到口，叫完一碟又一碟。燒羊架-剛燒起嘅羊架即刻上枱，新鮮熱辣，羊架帶少少騷味就最好食，而且肉質林滑，諗返起都想再食。呢度除咗大量嘅甜品之外，仲提供多款嘅雪糕，有Movenpick, Häagen-Dazs仲有Milk Top畀你揀，我就唔識揀，唯有全部都食晒。…查看更多

開平道Cubus呢棟大廈一向俾我嘅印象都係集多國菜、新派而且有格調嘅餐廳於一身☺今次專程揀咗28樓嘅Cubus 28黎慶祝相識第1700天😂(搵名目食好西嘅理由越來越廣泛)第一次食，server就推薦我地食佢個tasting menu. 有5道菜由前菜食到甜品🤤 細望之下，原來比openrice個粵菜呃咗，餐廳係比較fusion, 中西合璧，tasting menu就正好可以想點就點，選擇眼花撩亂🙊海膽牛油果藜麥沙律🥗，的式賣相令人晤捨得破壞佢。前菜絕對係健康寶寶之選，牛油果同藜麥都係大熱超級食物，所以對呢個配搭晤陌生，加埋高貴嘅海膽原來係提升左去第二個層次，三樣野各具其獨有嘅口感，你除左晤夠喉都無下句嚕🤣花膠螺頭片波士頓龍蝦湯，一道濃郁嘅bisque，用料足，加入適量淡忌廉，瞬間變成一個creamy又濃香嘅龍蝦湯。西湯加上高級嘅中式海味，冇違和感之餘更顯格調👍🏻竹笙如意海皇羹我女朋友就好鍾意。個芡晤會過濃，不但顏色鮮艷而且鮮味可口，滑嫰豆腐搭配海鮮，清爽不油膩，令人一啖接一啖👻秘製XO醬蘆筍炒北海道帶子，帶子鮮美，加上惹味XO醬更能把帶子增添辣，香，鮮等味覺享受。食材食得岀係上等貨，零雪味😈香煎西班牙伊比利亞黑毛豬鞍，肉質柔軟，而且散發出陣陣油香，並沒有絲毫膻味，火喉控制very good🧡三文魚籽鳳眼餃相比平時酒樓食嘅....下次飲茶我應該叫唔番普通蝦餃了。嗰種鮮味到今日依然係我口腔盤旋☺最後侍應為我地送上甜品-> 係鋪頭特製嘅桂花香檳青檸糕。感覺有啲似細個阿媽整嘅羅拔臣啫喱，加上淡淡的酒香，酸酸甜甜瞬間非常消滯👊🏻 總括來講，呢餐雖然唔平，但係睇見有人生日餐廳會特別為佢哋放煙火效果，就係呢種特別嘅體驗，加上一望無際成個銅鑼灣在我腳下嗰種澎湃之感，已經值回票價啦！…查看更多

近日周圍都籠罩着好多負能量，少咗出街食飯，今日媽媽罷煮所以就去地鐵站附近搵食。估唔到星期三嘅夜晚8:30，門口依然企滿等位嘅人🧐坐低先知原來有唔少食物已經賣晒。果然人人都好似我咁諗，食下好西，心情自然會開懷啲😂想話叫半隻去骨海南雞，點知份量只係夠¼隻，所以我哋再叫咗半打串燒、炸蝦餅、蒜蓉炒椰菜苗。兩個人食絕對夠飽！因為每一碟份量都好夠性價比幾高👐🏻當中隻無骨海南雞係今晚嘅冠軍👍🏻去骨已經好花功夫，配埋三款醬料: 葱茸、辣汁、豉油一齊食，令人有衝動想叫碗油飯撈撈佢😂外皮爽口晤會好肥膩，肉質入口嫩滑🧡泰式串燒夠地道，豬、牛、雞每人一串，份量剛好，食之前係肉串面淋上沙嗲醬，肉質嫩滑，配埋特製醬，天作之合的一對，充滿兒時街邊串燒嘅味道😸講到地道泰國菜又點可以唔提炸蝦餅🦐！啖啖蝦肉炸好脆卜卜，配一個泰式辣醬，美味程度大增。今晚，我地食咗呢個又魔鬼又邪惡嘅晚餐，所以叫多碟蒜蓉炒椰菜苗清下腸胃，份量頗多，調味適中，込人又飽又滿足！Le viet咁近地鐵站，而且食物水準高，食物選擇泰越俱備，喺旺角區黎講絕對係無得彈👍🏻👍🏻…查看更多

記得上年生日嘅lunch去過佢地嘅何文田分店食burger. 印象深刻，因為餐廳同事話有機會一定要夜晚再黎食，除咗有任食薯條，平鐵牛扒都係佢哋嘅招牌菜！闊別一年，終於喺今晚首度回訪，不過今次就去咗佢哋銅鑼灣分店。全餐飯我嘅最最最愛就一定係美國390日谷飼Prime級平鐵牛扒。聽職員講呢個部位係要用人手慢慢起筋，工序繁複，真係第一次食，入口有啲炭燒香味，略加海鹽調味，令牛扒本身濃郁的肉味更突出，入口又腍又滑🤤牛魔王表示非常滿足。另一邪惡亮點，就一定係可以無限任食嘅薯條呀🍟，連皮手切，雖然係幼身薯條，但依然香脆，薯仔味香，令人食晤停口😺同女朋友一牛一豬配，餐廳招牌菜係牛，但原來豬都有水準！呢道西班牙粟飼豬鞍架，口感味道遠勝一般豬扒，西班牙黑毛豬嘅肉質比較鬆化，肉味較濃，佢嘅脂肪比例平均，油潤甘香，肉嫩多汁，可能以為呢到只係牛排岀色，所以食落寧舍有驚喜🤫另外我地各自加咗$48要藜麥沙律，足料醒胃，值得加點！有任食薯條，忍晤住啤啤佢，經職員介紹就飲咗支英國手工啤。英國手工啤嘅特色係麥味較濃，味道帶甘香，after taste 清而不澀，為近來嘅鬱悶一掃而空。女朋友就嗌咗冷壓蘋果伯爵茶，原來係bliss冷壓果汁黎，信心保證🤲🏻銅鑼灣有晤少餐廳，但論性價比，Top blade steak lab都係頭幾位，最平$150已經有交易。menu選擇比較統一，但專注做番廚師最拿手嘅戲碼，why not?…查看更多

海港城LCX近年開咗好多新嘅食肆，之前食過一間意大利餐廳佢嘅Pizza十分出色，係佢附近亦都有一間想食咗好耐嘅片皮鴨，今日終於都有機會一試。好耐冇食過海蜇，於是乎就點左一個麻辣海蜇頭做前菜。麻香海蜇爽，作為開胃前菜十分醒胃。松露蠔仔煎蛋-估唔到松露加蠔仔會咁夾，蠔仔大小適中，煎到剛熟，松露帶出蠔仔嘅鮮味，而且蛋亦都煎得夠乾身，有d驚喜！終於嚟到主菜-片皮鴨。經理好好心機咁同我哋介紹片皮鴨唔同部位同食法。最先食嘅係鴨胸皮，配以師傅秘製嘅梅醬，再加埋爆炸糖，絕對係一個創新嘅食法。鴨胸肉就建議連包皮同傳統京蔥青瓜連醬一齊食。鴨髀肉除左以包皮配以傳統食法外，仲可用西式紫洋蔥、山楂片夾包皮食，試過就知道有驚喜。金沙海王扒白玉-滑滑豆腐配以鹹蛋黃、元貝粒、日式蟹籽，冇想像中咁濃味，清淡可口。芥末沙律蝦球-香脆嘅外皮再加上芥末醬，賣相一流。餐廳地方寬敞，枱同枱之間有適當嘅距離，好適合一班人傾計食飯，下次去約埋三五知己再去呢度。…查看更多

食好西其實使咪理由，想食就去馬😏日喜樓係我地其中一間最喜愛的中餐菜館之中，就腳又好味，食過番尋味😋杞子花彫醉雞 - 酒香皮爽，加上雞肉沾上的花彫酒香，連個汁我都試飲埋，真係無得彈！砂鍋雲吞雞- 雖然食咗個花雕醉雞前菜,但我的兩口子咁鍾意食雞又點會夠喉，於是乎再叫左砂鍋雲吞雞 。娃娃菜雲吞再加上清雞湯就係呢味餸的主要材料。娃娃菜煲得軟林清甜，我地2個爭住搶食而個湯又夠清，啱哂我地口味。鐵板煎封鱈魚扒 - 煎得皮脆肉又夠厚，對於唔鍾意吐魚骨的我地黎講的確係好方便，而且味道剛好不太濃，可以一試。爆汁生煎包 - 每食去親日喜樓都必食永無失手。生煎包皮薄底脆，湯汁唔會太肥膩，但就真係要小心個爆汁，因為新鮮整起d熱汁真係爆射出黎！四喜臨門小籠包 - 特色的4色小籠包，賣相一流，味道不俗，小籠包愛好者可以試下。…查看更多

成日聽朋友講工廈尋寶覓食有驚喜🎈但認真有時都幾怕係觀塘搵食，人又多，質素都比較參差🤔 今日去開apm逛，就決定行遠少少專程遠征牛頭角嘅Non kitchen😎見openrice評價不俗，原來星期六夜晚仲會有西冷扒任食添🥩，啱晒無肉不歡嘅我啦🤫晤係誇張，真係唔食過都估唔到咁高質🤣沙律吧正好減低瘋狂食肉嘅油膩感，呢個看似簡單嘅沙律吧🥗，但味道配搭出奇地有驚喜🙊南瓜🎃香濃，配埋蕃茄仔酸甜多汁，自然無咁邪惡，口感清新😽，沙律吧多選擇嘅程度有啲似細個喺某連鎖比薩店嗰種興奮🥰雖然係任食，但餐廳絕對冇將價就貨，肉質晤係一般無味雪藏貨，值得一讚👍🏻 肥腴的口感真係好食到令人密密encore! (我地兩個就一共叫咗六塊🤭)。西冷牛味十足，肥瘦均勻，炭香味令整體味道更加分🐄。薯條亦都有驚喜，係我哋最愛嘅粗身薯條🍟，薯味香濃軟滑，原來所有野都可以無限追加！餐廳性價比十分高👻 唔單止冇令我失望，完全食得岀大廚用心烹調，對每道菜一絲不苟嘅認真態度🥰 ，雖然一個價錢任食，但當然食得晒先好嗌唔好浪費食物啦！離開時再細睇門口嘅剪報先發現原來老闆曾經係五星級酒店餐廳嘅主廚黎，難怪食物質素可以咁超卓啦😯 希望可以保持水準，我哋應該好快又會有下次😏…查看更多

今日專程去左荔枝角D2搵好嘢食，就係鐵板燒。同女朋友一致裁定要食特上活伊勢海老鐵板燒。因為今日想大大啖肉咁食龍蝦， 所以別無他選。前菜係野菜沙律，當中有海葡萄，另外仲有一個叫水雲菜，第一次食，醋酸的香味，十分醒胃。跟住上碟嘅就係日本響螺，牛油炒香，爽口清甜。北海道帆立貝就頗有驚喜。師傅將帶子殼放係鐵板上，加上新鮮紫菜、醬油同水，簡單嘅烹調，更加食得出材料嘅鮮味。帆立貝配上新鮮紫菜嘅湯底，鮮味與眾不同。白甘鯛嘅煮法令人大開眼界。先將白甘鯛放係滾油中炸魚皮，然後再放上煲蓋焗熟魚肉。魚皮連魚鱗炸至脆而不膩，鮮嫩的魚肉配上醬汁，令一向唔好魚嘅我地亦都忍唔住大大啖咁食。輪到今日嘅主菜要正式上場見我地啦。師傅原隻放喺鐵板上燒，再慢慢去殼切肉，功架一流。然後師傅加牛油連龍蝦肉一齊炒香，未食嗅覺已經先飽享一頓，令人口水直流。師傅煎咗個香脆嘅多士，仲笑講話係呢度嘅招牌菜。間場黎個青檸啫喱清清之前的味道再品嚐之後嘅美食。另一道主菜就係A5鹿兒島野崎和牛薄切。薄燒和牛以香葱同炒香的薄蒜片快炒，牛油浸透落蒜片中，份外惹味。和牛之後係一碗乳白色嘅魚湯。濃濃嘅魚鮮味，鮮味十足。最後師傅炒左個烏冬，為呢餐畫上完美嘅句號。呢一餐雖然唔平，但食完呢個之後令人蠢蠢欲動再食鐵板燒！…查看更多

女朋友本身唔係咁鍾意食放題，但有朋友介紹呢間殿大喜屋話有驚喜，於是女朋友半推半就咁就陪我一齊食。一入到去見到地方比起一般嘅放題寬躺，而且座位空間都好大，我哋兩個人安排左坐一張四人枱，唔似一般放題咁擺多兩碟嘢食就冇晒位。呢度嘅放題係自己掃描QR code，然後落單，咁就唔使下下都要叫侍應幫手，既簡單又快捷。原隻鮑魚花膠黃金魚翅-其實依家食放題除咗日式野，仲有好多中式燉湯之類嘅美食。呢度嘅鮑魚花膠亦做得十分出色，我同女朋友都忍唔住各食咗一碗。夾起花膠上嚟大大塊，食落充滿膠質，仲有隻鮑魚仔， 十分滿足。刺身拼盤-刺身來講都幾新鮮，難得嘅係呢度仲有拖羅食，唔怪之得朋友咁推介呢間啦。海膽手卷-雖然話係限時供應，但係我自己都拎左三轉，每件都有大大份海膽，新鮮甜美，食過你就明白點解我會拎左幾次。😋海鹽燒左口魚邊壽司-出面食都唔平架，所以嚟到放題點都要食。左口魚邊最好就係要炙燒，因為豐富既魚油燒左之後滲透落飯到，分外惹味。蒲燒鰻魚-唔好以為放題佢就會細細舊，呢度嘅鰻魚不單止肉厚大件，火候控制出色，嫩滑好味。和牛薄燒-沒有太多嘅調味料，反而食得出肉本身嘅味道，剛好五成熟左右，鮮嫩多汁。鹽燒牛舌-薄身彈牙，加少少檸檬汁就更加突顯出佢嘅鮮味。另一個不可不提嘅就係雪糕，佢有多款唔同牌子，梗一款啱你口味。女朋友話如果要食放題，下次都一定要食返呢間先肯去！…查看更多

辛苦搵嚟志在食，呢排做嘢咁辛苦，梗係要搵返間好嘅餐廳同女朋友享受一下啦。於是乎就揀咗呢間位處元朗嘅鐵板燒去慰勞一下自己。黎到食鐵板燒最好梗係要食廚師發板啦。黑松露三文魚子蒸蛋 - 以上湯1:1.5分量而製，蛋滑鮮甜，配合三文魚子嘅鹹鮮味，再加上香濃嘅黑松露，以前菜來講真係一百分。甘鯛魚配南瓜海膽忌廉醬 - 甘鯛魚連魚鱗放入滾油炸至魚皮同鱗都香脆，再用油嘅熱力將魚肉焗熟，份外鮮嫩！醬汁以外仲加咗青海草，令到成味菜更加清新。烏魚子象拔蚌 - 香脆嘅烏魚子起左提鮮作用，令象拔蚌嘅鮮味更上一層樓。粒貝 - 以黑椒快炒，爽口之餘亦保持左粒貝原有嘅鮮味。北寄貝 - 以新鮮海草製作湯底，清新得黎更能襯托北寄貝嘅鮮味。北海道蝦夷鮑魚 -鮑魚元朗隱世Omakase啱啱喺魚缸拎出嚟， 新鮮到係咁郁。廚師熟練地將鮑魚切成粒狀更易入口。佢嘅醬汁更為特別，用上鮑魚嘅肝煮成，味道有啲似海膽嘅香，略帶甘味。做法特別出面絕對食唔到。孟家拉虎蝦 - 以蝦羔煎香令到蝦肉更加香濃鮮味。鵝肝蘋果醋多士 - 鵝肝煎得皮脆內嫩，鵝肝油份完美地浸透落多士度，再加上蘋果醋醬中和返鵝肝嘅油膩感，絕對覺得食多幾件係唔夠喉。瀨戶蠔加秘製的醬汁 - 煎香後再用火槍輕燒，生蠔外脆裡邊仲有蠔汁，一d都唔會過火。香煎和牛 - 廚師將一塊牛扒煎好後，切開粒狀，再分以唔同嘅部份去分俾我哋食，每一個部份都有着唔同嘅口感同肉味嘅變化，更能顯示廚師嘅功架。食咗咁多款好味嘅鐵板燒，我同女朋友兩個都好滿足咁離開元朗。…查看更多

冬天之後好似好耐都冇打過邊爐咁，於是乎同女朋友兩個就出咗尖沙咀食返個麻辣火鍋先。搵左呢間叫重慶洪鼎火鍋，一坐低就先叫咗個麻辣鍋拼野菌湯，咁就又可以食辣之餘又可以清清地食菜。盛肉拼盤A-呢個拼盤有四款肉，分別係美國安格斯牛小排同埋牛板腱，西班牙黑毛豬梅肉，紐西蘭羊肉片。牛板腱就一啲都唔肥，啱晒我哋兩個食。牛小排就肥瘦適中，一啲都唔鞋口。黑毛豬擺到好似朵花咁靚，真係有啲唔捨得食佢。羊肉一啲都唔騷，成個拼盤來講真係不俗，可以一次過滿足你食唔同肉嘅慾望。桂花蚌-少許嘅海水味道加上桂花蚌自身嘅鮮甜味，放喺清湯嗰邊淥，就最能夠保持到原有嘅鮮味。蜂巢冰豆腐-基本上食麻辣火鍋呢一個都係必點，貪佢可以索晒啲麻辣湯底味道，每次辣到飛起都一定要食佢。鴨血-眾所周知鴨血係台灣火鍋必點系列，可以俾我哋懷緬一下台灣嘅火鍋味道。金錢肚-抵食夾大碟，擺落麻辣火鍋嗰邊，麻辣牛肚就係咁煉成，味道一流。青菜拼盤-女朋友近期鍾意食清啲，點左呢個青彩拼盤有娃娃菜、油麥菜、皇帝菜。啲菜都好新鮮，我食過都忍唔住同女朋友爭食菜。…查看更多

好耐都冇食西餐，今日就同女朋友揀咗一間西餐係中環食。其實有少少近上環，上咗樓之後發現呢度環境10分優雅，好適合拍拖甚至係朋友傾計聚會。先叫咗個主菜，煙肉碎蟹肉牛油果椰菜沙律。睇個名就知道佢有幾多料啦，煙肉粒夠脆，蟹肉有海水味，再加埋椰菜沙律有少少酸，係開胃嘅前菜。跟住叫左另一個前菜就係千島沙律醬生牛肉他他薯仔。估唔到千島醬配生牛肉會咁夾，㕑師仲加左少少芫荽，雖然唔係人人鍾意，但的確為呢味菜增添一份獨特嘅香味。主菜就叫咗烤Seabass，廚師將鱸魚燒得啱啱好，滑溜有汁，再加檸檬汁落魚肉度就更加清新美味。令一個主菜係慢煮牛肉扁意粉，意粉係手造嘅，香濃嘅蛋味，牛肉亦都煮得好淋滑，有種入口即溶嘅感覺而不失肉味，完全係今晚嘅主打。最後點左個甜品係Chocolate Dome。廚師係我地面前將熱辣辣嘅莓汁淋上完頂型嘅朱古力度，睇住朱古力慢慢溶化露出蛋糕，好有視覺嘅享受。…查看更多

放完四日復活節假今日第一日返工，就算唔係Blue Monday都想早d收工。咁放咗工梗係要食餐好啦。但係又唔想食太多肉類負荷太重，於是乎就揀咗K11呢間野玩田店去食啲新鮮嘅蔬菜。雖然話就話係新鮮蔬菜，但其實呢間鋪頭有好多Superfood，亦有唔少海鮮同肉類揀。香煎日本頂級帶子伴青瓜莎莎 - 帶子輕輕煎香，兩面微脆，中間呈糖心狀，一上枱已經聞到佢嘅香味。而帶子底配上粒狀嘅青瓜同蕃茄，微酸醒胃。雲耳新鮮無花果牛油果沙律 - 大大片嘅雲耳，微微沾上黑醋，再配上新鮮嘅無花果，食完之後即刻覺得成個人都健康左。本地大啡菇紅菜頭配牛油果薄餅 - 熱辣辣嘅長形Pizza，鮮紅色粒狀紅菜頭，再配以大量嘅芝士同大啡菇片，出奇地配合。蟹肉美國蘆筍闊條手做意大利麵 - 嚟到今晚嘅主角，就係呢個蟹肉蘆筍闊條麵。蟹肉鮮味，蘆筍新鮮爽甜，而最令人驚喜嘅就係佢嘅手造闊條麵，厚薄適中，沾上濃濃嘅白汁，令到你每一口都刺激着味蕾。總括來講係一餐令人滿意嘅晚餐，想食新鮮嘅蔬菜絕對可以再嚟呢度。…查看更多