WynneKwan's Profile

近排呢間TERA好heat, 今日lunch黎到就同朋友點左2個lunch set再加個pancake。點左好多人叫既明太子蟹肉意粉同埋比目魚墨魚汁意大利飯，今日餐湯係忌廉薯仔湯，忌廉湯唔係平時好濃稠既口感，比較稀，但味道都可以。明太子蟹肉意粉份量好多，蟹子同蟹肉都唔少，只嫌明太子味道唔出，整體都好食。比目魚墨魚汁意大利飯，比目魚皮煎得好香脆，魚都有鮮味，意大利飯個汁非常入味，唔錯。成餐最好食既係榛子焙茶梳乎厘pancake, 空氣感同口感balance得非常好，蛋味濃，上面淋左焙茶醬同榛子醬；一上枱就聞到好香榛子味，但食落第一啖係濃濃既茶味，榛子同焙茶醬配合得好好，唔會只有好濃既茶苦味，又有榛子香甜，好好既配搭。呢間餐廳既pancake暫時係我心目中第一位我地加錢點左紅豆咖啡，之前係其他餐廳飲過紅豆奶茶，原來紅豆咖啡味道仲出色，只係細杯左d, 如果正常高身杯就perfect啦。…Read More

今日食左個early lunch, 11點半就到左，仲有好多位選擇, 呢度有落地大玻璃對住出面廣場的小花園環境都唔錯，但亦因為近門口，冷氣有d唔夠。點左煙鴨胸菠菜扁意粉同雜菌豬頸肉burger配芥末籽醬同朋友share；黎cafe就一定要點咖啡試下，因為覺得有d熱就點左ice mocha同ice cappuccino。先講下咖啡，咖啡味比較淡，而且偏酸，我同朋友都唔太喜歡酸的, 所以覺得一般。食物方面，煙鴨胸意粉個汁好淡，而且係闊既扁意粉汁唔夠味淨食意粉就會完全無味，要配埋煙鴨胸一齊食先好d。豬頸肉buger份量真係超大，而且勁厚係無可能夾住一啖咬的，雜菌主要係鮮冬菇同白本菇，菇味唔夠香，如果用磨菇味道會出d，於是件事就變得好分開，唔夾個burger。初初以為係平時食泰式細細片的豬頸肉，點知係非常厚切的豬頸肉扒，都好好味的非常爽口同重油脂，但burger個醬食唔太出芥末味就覺得只好普通既沙律醬。無比較無傷害，呢度食物都可以既，但當食過更好的就唔會再選擇呢度了。…Read More

呢度係間白色小屋style cafe，menu 雖然比較簡單，但都有all day breakfast, 多士，pasta, 主菜同burger選擇。點左2款都係比較另類配搭既雞扒烤菠蘿漢堡，同埋慢煮法式油封鴨脾配牛角窩夫。初初都有d怕雞扒＋菠蘿唔夾，但食落又出奇地配，包係烤過的，雞扒夠嫩，配上菠蘿同甜甜地既汁又好好味啵，墨西哥脆片就正常無咩特別。慢煮鴨脾十分之嫩，皮簿唔肥，味道都好好配上酸椰菜同甜醋汁非常美味，窩夫係牛角包既酥皮，配埋楓糖漿非常邪惡。飲品點左黑咖啡同cappuccino, 係我鍾意既帶nutty既咖啡味，非常出色。之前食過好多間cafe,咖啡都係正常，唔會特別好飲，唯一挑剔就係枱腳一大舊頂住隻腳坐得無咁舒服，但呢度既食物絕對推介。…Read More

好耐無去銅鑼灣行街，都唔知有咩餐廳好食，剛好係翡翠明珠附近就去睇下有咩好食，見丼丼亭6點左右餐廳入面已經坐滿晒，估計應該都唔錯；仲有d門口比較戶外部份既位，咁就試下啦。定食有天婦羅配丼飯，一個set可以食到多d唔同既野又幾好啵。點左個親子丼配天婦羅，四式火灸丼配天婦羅，再加個明太子雞翼。定食都係包左個前菜沙律同麵豉湯。首先天婦羅都係新鮮炸出黎，超好食，粉漿適中，唔太厚。火灸的魚生好新鮮，親子丼味道好好，蛋同雞肉都嫩滑。明太子雞翼釀的明太子都唔少，真係食得好滿足，一定食得飽。定食都係百零蚊到2百幾不等，唔係d又貴又食唔飽既日本餐廳，絕對絕對係值得再黎幫襯。…Read More

係沙田呢間新開cafe, 門面有d似英國舊式cafe感覺，但menu又似日式西餐，有鬆厚pancake同奶式，有d似 JS Foodies。我同朋友點左2個lunch set 安格斯牛漢堡配薯條，同埋奇尊蝦仁忌廉意粉再加個earl grey既pancake share食。唔知係咪冷氣太大，我地其實影完相已經即刻食，但咖啡，湯，漢堡都唔太夠熱，漢堡其實好食的，麵包係焗左外脆內軟，有洋蔥同磨菇，個汁甜甜地非常好食。意粉軟硬適中，忌廉汁好掛麵，蝦好爽甜。到個pancake, 茶味好夠，亦唔算太甜，以為係空氣感好強烈的pancake, 其實又唔係，2個人share會啱啱好。正常發揮既一間cafe, 可以一試。…Read More

已經係一個月前去食，但最近先得閒更新下，同朋友一行4人聚舊，打邊爐無限時係最佳選擇（平日先無限時）。首先餐廳送的welcome drink, 杯入面條魚仔非常可愛，未完，然後特飲實在太靚，我地每人點左杯唔一樣的黎睇下。飲品味道其實無咩特別，主要係打卡用。雖然牛乳鍋好多人推薦，但我地意見一致點左個花膠雞鍋湯底話要美容下。未打邊爐前先飲左碗湯，真係好足料的花膠湯，好好飲，d雞肉仲好嫩，好好食。香江拼的牛肉拼盤有唔同牛的部位，一個大圈咁圍住個爐一上菜真係要嘩嘩聲 , 亦點左七彩餃子同七色丸，就係睇上佢個好有特色中國風架。仲有響鈴，篙筍，珊瑚蚌，全部擺盤都非常精緻。食物質素也非常高，食材新鮮，除左餃子個皮比較厚同硬，其他都好高質。其實仲有好多可愛的火鍋點心未試，但已經超級飽。當然最後唔少得去餐廳入面既打卡位影相，雖然人均要5百幾比較貴，但食物高質，又食左差不多6個鐘，又有得打卡。真係好唔錯的選擇。…Read More

收藏左呢間餐廳一段時間，一直無去係怕要排隊，最近路經剛好唔洗排隊就試一下。點左2個lunch set 一個鳕魚意大利米型麵，另一個安格斯牛里式脊配飯，頭盤點左一個忌廉薯仔湯同蜜瓜巴馬火腿沙律。湯味道好好，唔會只有忌廉味，份量也多，share一半剛好。沙律份量比較少但擺盤精緻，蜜瓜超甜，但巴馬火腿就一般，唔特別濃香，沙律汁係傳統醋汁，幾開胃。主菜方面，魚係Cod fish無咩魚味而且無特別調味就覺得完全無味，比較一般，意大利米形飯有d蕃茄，磨菇，正常意粉調味。牛里脊飯，有一塊牛扒份量，牛質素非常好，唔會過熟，中間仲有少少紅，唔硬，有牛味。飯唔係白飯，有d似海南雞既油飯，呢個餐先128蚊（未加一）真係好超值。始終呢度係街市，周圍環境唔及得大商場，而且坐位會比較迫，服務正常，唔可以用大酒店／餐廳的去比。但以食物質素，呢個價錢絕對對得起有餘。…Read More

係open rice見到有下午茶預付優惠，又係一直好好奇點解呢間cafe咁受歡迎，畢竟佢既地點唔係平時行街會去既地方，真係為左食特登去到長沙灣？終於一探究竟...下午茶2點半開始，原價328既tea, 而家2百零蚊就食到，包左earl grey茶，改其他飲品係半價，因為我地無食lunch, 驚唔夠飽就再加個黑松露薯條。薯條本身已經有黑松露粉，再埋個有黑松露既cream松露味更加濃，非常好食。tea set有3件咸點，5件甜點，初初覺得其中一件係曲奇，咁hea既，食完覺得絕對唔hea, 係超好食牛油味濃既手工曲奇。同埋平時唔太喜歡馬卡龍，因為好多都超甜，但呢件唔算太甜，而且加左杏仁，好香，好好食。咸點最喜歡巴馬火腿芝士竹碳多士，多士放耐左都仲脆，而且加左少少蛋黃醬同火腿芝士非常夾。總括呢講，每件都好好食，但對比其他超水準既點心；炸蝦同提拉米蘇比較普通，但都好好食。雖然地方唔大，但打卡影相都勁靚。下次要再試下主餐牌既其他菜式。…Read More

每次經過都大排長龍，而且網上評分也很高。見到佢古風既日式cafe裝修，就抱住好大期望去食。唔知係咪無叫佢既招牌蛋包飯，而係叫左日式牛舌蓋飯，同北海道五花角煮丼飯，所以同預期有出入。牛舌飯係配左個只有酸味的蕃茄汁，我覺得茶餐廳港式茄汁重好食，牛舌有少許臊味，成碗飯最好食既係佢既珍珠米。五花腩唔係平時食到既入口即溶，係好硬同有彈性，唔明點解肥豬肉都可以煮到咁。配餐飲點左黑咖啡同榛子Latte, 咖啡味好淡，榛子Latte偏甜。炸雞係炸完再加個燒汁，似韓式做法，炸得都唔錯肉唔會乾但個汁太甜，只有甜味。因為太失望個雞翼已經唔想影。打擊太大，應該唔會再試😓…Read More

之前食過幾次燒肉或者火鍋放題，就算揀既係比較貴既套餐, 但肉既質素都係一般，今次黎到一朗見佢有2個lunch燒肉放題，貴果款主要係多d野食, 都係限時90分鐘，於是就選左個平餐，唔洗2百蚊一位(未加一)。全自助形式，用2維碼落單，然後由旁邊高速列車送黎。牛既質素以放題黎講已經係超值，當然唔可以用和牛去比，但有肉味，個別一碟入面有1，2片會比較韌。但可以接受。最有驚喜既係厚切牛舌，爽滑有咬口，加少少盬已經超食。同朋友叫左5碟😋。豚肉也可以，雞就無試。小吃炸物炸粉太厚，比較一般。甜品都幾有特色都係出面比較少見，肉桂蘋果木糠布丁，石板街都好好味。仲有好少見既白桃烏龍雪條味道都唔錯。真係非常滿足既一餐，如果時間長多少少就prefect啦！…Read More

比較少見既日式半自助餐，連加一平均3百零蚊一set，初初覺得唔算特別平，但食完之後就完全覺得好值。我同朋友點左西京燒銀雪魚同火炙A4鹿兒島和牛丼呢2個主菜。然後前菜甜品都係自助的，另外佢仲送左每人一份關東煮同一件炸雞。前菜同甜品雖然選擇唔多但都整得好精緻，而且每個既味道都唔差，我地差不多全部試左一份。女士食量唔多，咁樣細細份就可以試好多野，真係好滿足。我食既和牛丼，牛肉入口即溶，本來想唔食晒d飯，但拌左燒汁同生雞蛋既飯真係好吸引，一口接住一口就食晒。最後甜品有日式芝蛋糕，牛奶布丁，抹茶tart, 都唔太甜，好好食。但已經好飽，所以食一round都已經夠了。除左食物用餐環境也非常好，位置寬敞，非常舒適。所以我同朋友都覺得非常推介。…Read More

沙嗲牛關注組推介既好好運茶餐廳，係工廠大厦停車場入口，非常隱蔽，第一次去要問打掃姐姐先搵到。第一次食左米通感想係沙嗲牛肉味道係正常ok既但個人覺得偏甜，可能因為加左洋蔥，米通也偏淋比較鍾意長洲陳通記，佢有dd辣味，惹味好多。而且最大問題係唔夠熱，食湯粉麵最怕就係咁😓。第二次再食多次麵，湯既口味保持水準(對我黎講係偏甜)，我知佢個麵係現煮，但唔知係咪沙嗲牛肉係keep住保溫，煮好麵再加左沙嗲牛肉上去點都會凍左。可能唔啱自己口味，就覺得只係正常沙嗲牛肉麵。…Read More

朋友突然約食lunch, 又因為之後有事，只局限係形點搵食，商場裡面大多數都係連鎖餐飲，比較之下呢間食多國菜既餐廳評價都唔錯就去試下。佢既lunch set 都係由一百蚊起到百零蚊，包括頭盤，主菜同咖啡或奶茶，仲可以加錢加甜品。頭盤我地就點左越式雞肉沙律(張相係分左一半比朋友之後先記得影)，佢既汁就有d似平時食撈檬既汁，酸酸辣辣幾開胃又惹味，另外既薯仔沙律係炸左既薯餅加上生菜絲，汁係印度tandoori既口味都幾特別。主菜份量幾大，最後點左泰國鮮蝦炒米粉，好夠鑊氣，甜甜酸酸再加上花生碎同辣椒粉，真係好正。另一個主菜係雞肉咖哩黃飯配簿餅，黃飯係我鍾意既印度飯，咖喱味略嫌有d淡，雞肉可能係雞胸位有d乾，本來食完半份米粉已經有d飽，諗住只食一塊簿餅，點知一食不得了點咖哩食超級美味，結果食晒😂最後加左個香蕉簿餅甜品，其實就係同泰國既一樣，又係好味道。全部菜式都水準好高，除左飲品凍咖啡就太淡了，唔推薦之外，其他都可以一試，係一間CP值高既餐廳。…Read More

又再發掘大角咀既美食，突然米線癮起，本身對酸辣湯底唔太啱口味，呢間小店竟然有胡椒麻辣湯底，以前從未見過，一定要試下，叫左佢地最招牌既豬頸肉米線。已經係點左微辣，但可能加上胡椒，辣感倍增。係呢d凍凍地天氣，飲啖胡椒湯，即刻暖晒。湯底係我喜歡味道，夠濃，對我唔算咸；食晒成碗都唔覺口喝。豬頸肉似係包左d粉炸既，神奇地沉左湯一段時間炸粉都仲脆；豬頸肉係ok既，但唔覺得超級好食。好多其他評分好高，排晒隊既米線舖，可能因為係酸辣湯底，我都係覺得一般。碰到啱自己口味既，一定會再幫襯。…Read More

有粢飯食既地方唔多，仲要係好食既好難，突然想食粢飯，諗起有人推薦過豆乳狂人，就咁聽個名以為佢只賣豆乳相關產品，原來佢既粢飯都好出名，排隊時候差不多一半既人都會點粢飯。佢既糯米唔算厚，同餡比例剛好，油炸鬼係炸得比較乾，不過可能因為咁樣，我拎到返屋企，已經過左半小時，仍然仲好脆。可能因為佢地做外賣店關係，只有咁樣先可以keep到佢脆。整體黎講唔錯。另外點左三色芋圓豆花，芋圓好Q彈，唔會好甜，豆花係好綿密，佢都滑但仍然有質感，唔似平常好滑的豆花咁，一陣風就無左，而且豆味都出。一杯份量唔少都夠2個女仔食。…Read More