Rates test's Profile

其實差不多一年前左右經 Open rice 食評先留意到依間放題，初初試都覺得好抵食又好食，仲介紹埋啲屋企人同朋友嚟食，點之去到第四、五次之後，除左心太軟好食之外，其他食物水準下降，長腳蟹咸到食唔落口，啲龍蝦"梅"嘅！所以之後一直停左再冇去！事隔幾個月，心血來潮，見佢湯底又多左好多選擇，又多左鐵板，諗住比多次機會佢！但見到十二月都有好幾個食評都話食物差，服務差，但自己又諗可能佢哋唔好彩啫！於是就book 左枱再去，當日上到去只一枱人，帶位安排坐位，眼見佢哋坐位裝修有點改動左！唔講由自可，一坐低，我同女朋友都頂住對腳完全郁唔到！之後我同服務員講我哋坐唔落！服務員萬搬不願意話要問一下可不可以換，於是我自己走去另一枱坐是沒這問題的，佢哋又唔願意比我調，結果調我哋去另一張，其實嗰張枱我以前坐個兩次都冇頂，佢肯定係改左裝修加左位先會咁，大佬成兩個鐘我坐都坐得唔舒服我仲點食？我唔明白全場得一枱客，我又有book 位，你都可以咁樣安排，我題出問題你唔去解決，仲叫我一係兩個人坐埋一邊，大佬，我一個要比四百幾，兩個八百幾九百去食一餐坐到咁嘅！你送比我我都食唔落，唔駛再叫啲 youtuber 幫你介紹！我永遠都張你列入黑名單！ …Read More

醉翁亭之前睇其他食評大部分都有讚冇彈，已經想試好耐，唯獨唔就腳所以未去試，見佢啱啱銅鑼灣開左新分店又話佔地二萬尺又話唯港 View ，所有即刻打去book 嚟試下！誰不知祈望愈大失望愈大！上到去見裝修都唔錯 ，地方非常大，兩人可坐沙發位，坐位非常闊落！坐抵後點左個雞煲要 BB 辣，之後就去自助區睇下有乜嘢可以拿！飲品方便選擇非常少，只有可樂、七喜、竹庶水等等，而竹庶水係黃色，就算響雪櫃拿都係唔夠凍同好似溝出嚟唔係自己煲！失敗！其他自取區種類非常多，例如有炸支竹、鮮支竹、四五款菜、丸、豬潤、粉腸、午餐肉、多款餃子等等... 我諗我試左七八成嘢食，但真係冇一樣係好食，炸魚皮淋，我最 like 嘅響令都唔好食！佢個雞煲叫佢BB辣，點知嚟到辣到個咀都變潤腸咁！個經理好好，幫我換個湯底比我，依樣嘢值得讚下，佢哋啲服務唔錯，換碟同加湯都自動自覺！到佢所謂送嗰啲嘢食，刺身都夠凍但賣相一般同冇味、鮑魚佢係一早整好曬放左出去，你要佢去拿比你，味道又係好一般！到嗰個海鮮盤，係個蝦雖然細隻但都新鮮、聖子都可以，但其他真係冇印象！唯一佢送嗰個牛肉係幾大碟，個味道都可以！最後有西瓜味道唔錯、糖水冇味、牛奶公司雪糕最好味！所以真係食評都唔好盡信，唔係個個寫食評同you tuber 都識食！去到自己試係完全另一回事…Read More

已經有一段時間冇寫食評，係依一間八幡屋令我唔寫唔得！依個係我九十幾個食評唯一一個結果冇食但要寫嘅食評！說話我依段睇冇好多食評同you tube介紹依間八幡屋涮涮鍋，各評論好評都好多，又話服務好，又細心，主要試下佢個蒸氣鍋！所以就決定就響今晚星期五去試試，因為我未食過，其實早三日之前打去問左一輪價錢之後就決定再打第二個電話去訂定位，好快就到今日星期五，佢中午再打多次比我確定，我滿心歡喜等到夜晚諗住試新嘢，誰不知就發生以下嘅事！我當晚訂六點半，六點左右已經去到，外面望入去全間店有一枱客食緊，去到見到一個服務員，首先態度已經唔係好，尤其個面口，我話我訂左枱，講左電話號碼同人名比佢對，我見佢睇本簿，一睇就睇到，因為連我得兩個名係訂位，之後佢就繼續用佢極不願意嘅態度叫我揀牛同湯底，其實我只係估佢叫我做乜，因為佢講嘢嘅速度同咬字，我諗冇乜人可以聴得到，於是我就揀牛揀湯底，之後店員問我要唔要海鮮，我話要呀，我又想加海鮮又要升級刺身仲想要埋蒸氣鍋！誰不知帶位小姐話，唔得喎你冇訂冇蒸氣鍋喎！蒸氣鍋要加錢喎，我話下，我第一嚟食，早三日已經打嚟問，前後來回三次電話，冇人提過我依様嘢喎！佢之後就繼續用佢極不好的態度回答我: " 咁我幫你唔到喎，你問我都冇用㗎! "之後我二話不說就轉頭走，哇！大佬，其實兩個人去食，我諗住加錢食海鮮，又加錢食蒸氣鍋加埋一都要七百幾落樓，我都訂曬位入埋嚟到門口，唔駛用啲咁嘅態度對過客掛，如果你公司有啲咁嘅規定，係咪應該我訂位時都同個客講聲呀？同埋其實你嗰個所謂蒸氣鍋，兩個人只係得兩粒蠔仔，兩隻蝦仔幾隻垷、豆腐和瓜兩塊，其實有啲乜咁利害要早一日訂呀？唔知我以為我去食鴨血食啲乜高級食材！我六點到，得一檯客，我前後三次電話都冇人提你仲覺得你哋冇任何唔好意思都唔緊要，佢要用啲咁嘅態度對啲客人！其實唔食我唔想死，但星期五晚一個假期嘅開始其實都幾掃興！多謝曬！ bye bye ! …Read More

星期日 PP 睇完戲三點幾最啱就係行返落灣仔嚟食佢哋嘅下午茶 set , 四十元一個下午茶set , 有一碗細拉麵同一個凍飲送！一個字抵! 雖然店仔細細但裝修都有日本小拉麵店嘅風味，再加上女廚師係日本人，仲要係一個好有禮貌嘅日本人所以更加加分啦！今次試左佢啲嘅味噌拉麵同醬油拉麵，兩款都各有各精彩，味噌拉麵湯底比較厚身，好濃嘅味道，最啱我依啲重口味嘅人！而醬油拉麵你不只會食到醬油味，仲會做到佢有獲氣嘅味道，因為廚師會用猛火炒啲配料再放上去，令到個湯多左啲層次感！再加上佢啲麵嘅質感非常好，叉燒更係入囗即化，隨下午茶 set 更可加$12 要餃子兩件或炸雞兩件！餃子可以做到皮薄而用水半煎蒸的做法令餃子底側煎到燶燶脆脆嘅感覺！正！炸雞更食到熱辣辣新鮮炸嘅感覺！更加埋冰凍嘅氣水！幾十元可以食到佢嘅功架同美味！真係冇得輸！…Read More

中秋假期買左飛去旺角睇戲，順便揾左依間試下佢個 lunch , 見到其他食評 有讚亦有彈，其實好多食評都信唔過，就算啲神級食評介紹都係假，自己去食就最真，當日打去book左，店員都幾有禮貌，佢係屬於最高一層，裝修都唔錯，個view幾好，夠高夠開掦，服務員帶位時都有提我哋如果坐太近窗的位可能會太曬，都算幾細心！今次我點左和牛漢堡同三文魚沙律lunch set ,佢湯同沙律都要每様再加＄18！等左一陣，佢比人大受批評嘅包同湯就到左，個包仲暖暖哋，其實個包味道真係多突出，但當我叫個店員比牛油我加埋一齊食之後，好食好多！再配埋佢個南瓜湯，又夠熱又夠濃，唔錯唔錯！到個沙律，其實個份量真係少啲，但又幾好食喎，所有嘢都好新鮮！和牛漢堡，我最鐘意佢個包裡面煎到少少燶，脆脆哋，外面又鬆軟，而個和牛漢堡又好多肉汁足料，旁邊啲薯條都炸得唔錯！到個三文魚沙律，都中規中舉，佢個薯仔沙律係我鐘意嘅style !可能因為係最高又係正正中午太陽最勁嘅時候，越食越熱，最後我點左一個熱一個凍咖啡，都好細心比個凍糖水我！而熱咖啡味道都唔錯，所以唔駛加三十要即磨都得！總括嚟講，依個價錢嘅lunch 有依啲質素依個地方同view完全ok!我會返嚟再食佢個和牛漢堡的！…Read More

上次試過一次大角咀嗰間覺得幾抵幾好食之後，今次就嚟銅鑼灣依間試，嗰日我六點三就到，未開始有得食，地方好似比大角咀大，多啲位，我兩個人都可以坐四人檯唔錯，一陣之後開始食得，人越來越多，唔知係我唔好彩，我發覺啲食客數質比大角咀差，又爭又唔識排隊，知道自己唔啱唔好意思都冇句，佢個魚生櫃又迫埋一二角，又難排隊又阻住人拿其他食物，佢有少少好似冇諗過安排過咁，啲魚生又切得醜樣又好一般，每次比得兩塊仔，生蠔又比大角咀細，不過佢啲蟹都keep到水準，但我拿左兩次就冇曬又唔refill 了！熱食個芝士意粉睇佢整好幾得意，佢味道就正常，燒牛肉唔掂都預左，磨菇湯都ok,炸蝦壽司大大隻但凍嘅，反而佢有個荷葉雞飯幾好食，甜品方面好食嘅冇乜，雪榚又比大角咀少一個味，同埋嗰兩個味都好一般，我食到八點幾都走人！我諗我唔會再嚟銅鑼灣店！…Read More

收工晚上十一點幾，約埋朋友嚟依間老字號嘅新光食潮州菜做宵夜，雖然已經十一點幾，但人流亦唔少，見到佢哋個個都係老伙記老顧客，個個都好似朋友關係咁有講有笑，因為非常餓嘅關係，我即係叫左個滷水拼盤，有墨魚、紅腸、鵝片，滷水汁果然係一間潮州菜嘅靈魂，非常入味好快就比我K.O曬沙菜牛肉炒河，賣相非常好，我最鐘意係潮州炒牛河個汁係好杰好濃味，而個炒河之前和雞蛋一齊炒之後先再加個汁響上面，賣相同味道係我非常喜歡的！蠔仔餅，佢蠔、蛋、蔥、粉嘅份量做得剛好，加埋魚露無得輸！蠔仔粥，完全潮州style ,蠔仔新鮮，作為宵夜嘅結尾真係最啱！食完曬諗住叫甜品，點知有一個應該係老板嘅人，請我哋食蛋糕，原來佢今日生日，生日仲要開工仲要請客人食佢個蛋糕，真係好有人情味嘅一間店，但我都要食個綠豆爽清心丸同佢個水晶包為依餐宵夜劃上一個完美嘅句號！…Read More

星期日去大埔，原本一路都係食開"一樂"，去open rice 見到依間嘢就決定嚟試下，去到街市揾左一陣就揾到，星期日 lunch time,好多街坊一家大細嚟食，所以都等左一陣先有位，見到好多嘢都想叫，今次我叫左吉烈豬扒茶餐，有雖然味道可以但只有兩粒的吉烈豬扒，而個麵正正常常，個湯冇乜味！個餐仲有兩塊英式鬆餅"唔好食",午餐肉同炒蛋，依兩樣正常啲！最好就係我加$7轉朱古力咖啡，賣相已經好，味道仲好濃又香又滑，估唔到有咁嘅水準！炸蝦多士配薯條，依樣又係喜出望外地唔好食，多士太大，而料太少，根本唔係太食得出有咩料響裡面，我唔明點解有人話好食，而啲薯條水平係最差，又幼又冇味！炸雞肶，炸得幾香脆如果可以大隻啲就更好！因為太飽我試唔到佢嘅名物一口多士，但就係因為佢個凍朱古力咖啡，縱使其他嘢唔太好食我都會再返嚟！…Read More

響open rice 見到依間小店，好多人話好食，咁啱我又去附近工作，所以就去試下依間常回味！下午兩點幾三點，人客不多，坐低睇餐牌見到好多嘢都想叫，又豬手米、又喇沙、又燒烤、又西多...，結果我叫左最吸引我嘅"招牌喇沙米線"$45,響等緊個喇沙嚟嗰時我正忙緊工作上的事，所以店員上個喇沙時是放左我附近而不是在面前，但我已經聞到非常之香嘅椰香味，而望一望碗喇沙，賣相都唔錯，湯嘅顏色一睇就知冇叫錯，味道非常濃郁惹味椰汁同辣醬，而餸方面有兩隻中蝦、兩粉魚蛋同豆卜等等，尤其米線份量相當多，我掛一住飲佢個湯都差啲搞到得返啲米同餸，所以我即刻又博命食啲餸同米線，佢個米線上面放左啲類似豆瓣醬，當撈埋一齊仲更惹味，所以我好快成碗K.O.曬！我見咁好食，又見佢寫兩點半後有燒烤叫，所以諗住叫一串試下啦，點知店員話今日燒烤師傅冇返所以未有得叫，唔得，我下次一定再嚟試佢啲燒烤同其他招牌菜！…Read More

星期一晚上，女朋友想食爐端燒，上open rice 揾左一陣，結果決定試下依間心燒食堂，去到見到裝修都唔錯，叫做有啲心機，牆上貼左啲"深夜食堂"嘅劇照，其中一樣最令我驚喜的係佢嘅餐牌同點餐紙，不論紙質印刷同設計都非常有心思同有自己風格，我真係想keep返一張自己收藏，因為好肚餓原因我即刻點左海膽胡麻豆腐沙律$88，賣相非常好，海膽比得都幾重手，新鮮但如果可以再濃味啲更好，胡麻醬落左好多，係一個好好嘅開謂菜！燒豚肉廣島蠔$52，豚肉質感有啲似肥牛肉，而蠔味道都幾好幾特別，有少少似煙紛嘅味道！燒美國牛利芯$58，依個水準非常高，厚切牛舌，燒到六七成熟，咬落去有好彈牙嘅感覺，燒得好味道又好！心燒雞翼$32，依個相比其他未見太突出，但都係唔錯的！燒墨魚腸$24，黑色嘅腸幾得意，再點沙律醬同生蒜，辣辣甜甜，唔錯！南蠻炸雞$58，啖啖肉，炸得外脆內軟，加埋沙律醬一齊食！正！溫泉蛋香蔥拌飯$36，比起我響日本食嗰個，更有心機，但人哋只係生蛋同豉油反而比佢好食，如果佢個豉油可以咸啲更好！燒菠蘿$26，大份多汁，燒得幾好！Pineapple cooler $60 , 有少少薄荷沙冰的感覺，幾清新！總括嚟講所有都幾好，只係最尾，唔知係店員定老板啲朋友聚埋越傾越大聲，好嘈，所以我急急食完就走人！…Read More

星期日，帶小朋友嚟油塘玩，食lunch時間搵地方食嘢，行到嚟依間食台灣嘢，本來以為外面好多人肯定有排等，點知原來係排隔離三哥米缐，我真係唔明有乜咁好食，之後一入去就有半圓卡位可以坐，裝修都幾光猛舒服，餐牌啲相都影得幾好，之後我就點左香酥雞扒肉燥飯，炸雞扒用煲仔上份量非常之多，炸得好鬆脆入味，肉燥醬亦唔會太乾，好惹味送飯！牛肉麵,湯底好濃郁好味，肯定好過小王，牛肉又煮得夠淋，我另外加左個唔記得係雲吞定餃子也不錯！珍珠奶茶，食台灣嘢肯定要飲珍珠奶茶，估佢唔到，大杯得嚟有茶味，而珍珠亦好彈性和有甜味！讚！有機會我一定再嚟食！…Read More

下午兩點幾下午茶時間，揾到方食lunch , 行到嚟間村爺爺泡飯、車仔麵店試下，入到去人不多，牆壁上貼左好多名星相，之後睇下餐牌有乜好食，佢車仔麵同泡飯都有龍蝦湯同豬骨湯分，價＄都差成二十元，但我睇睇下，比依個吉列咖喱黑豚飯吸引住，仲要只係$28連熱飯，認真抵！不一會成隻好似龍船咁大嘅碗送上我檯面，個碗真係大得有點誇張，而賣相亦唔差，份量都幾大份，豬扒好大塊切開都有五六塊左右，完全唔似下午茶份量，你亦食得出豬扒即叫即炸的，咖喱除左薯仔外仲有紅籮白，個汁辣辣甜甜幾開胃！估唔到今日食到一個有質素的下午茶餐！…Read More

和女朋友周年紀念，嚟左依間 watermark 試下，依間位於天星碼頭上層的餐廳，如果你由IFC 行去過條天橋其實都唔短路程，餐廳入口條黑長廊好似有條時光隧道帶你去到另一個又靜又有氣氛的餐廳，六點幾去到啱啱好日落，境色非常好，行到身水身汗即刻叫杯 Mango Delight $62 嚟飲下，非常新鮮嘅果水味道，香蕉味較重，唔錯好解渴！睇左一陣，我哋就叫左Cepes Velouté $108 , 其實即係磨菇湯，佢特別安排我哋share , 佢係先比兩個湯碟比你，之後再倒湯比你，磨菇味道非常濃郁好飲，如果可以再熱啲更好！Seafood Platter $748 , 依個係其中一個響依個餐廳十個有八個都會叫嘅嘢，上枱時真係十分大堆頭，裡面有生蠔、青口、蝦、帶子、煙三文魚、龍蝦、蟹等等九種海鮮，每一樣都新鮮好食，佢有三個醬比你點唔同嘅海鮮！good ! 其實食依個海鮮盤慢慢食都食成大半個鐘，都飽左一半！Ribeye 10oz $398 ,  幫我哋分開左兩份，我哋今次要左"芝士"汁，牛扒五成熟啱啱好，外皮燶燶哋，裡面生生哋，外脆內軟，再加埋佢個藍芝士汁非常好味，配菜露筍、蕃茄粒和薯仔亦好有水準！Chocolate Textures $118 , 賣相討好，朱古力味超級濃郁，朱古力迷一定like , 有軟有硬幾種唔同口感，再加埋個雪糕一流！Mocha $55 , 朱古力味重左少少，如果佢咖啡味多少少同再熱少少會更好！但飲一個熱咖啡係一個好嘅西餐必要的結尾！滿足！…Read More

星期六晚睇完戲十點左右，去搵晚飯食但又唔想食太多，行行下行到名提下面，見到阿姐介紹佢哋個消夜餐牌，於是就走左上嚟，由於佢地方大，所以唔駛等位！今次兩個人點左生牛肉湯河$45,非常大碗，湯亦濃郁，牛肉質素唔錯，河粉亦夠滑！香茅豬扒炒烏冬$55，上枱時非常大碟，食落去味道好夠，豬扒肉質好淋亦好重香茅味道，我真係第一次見到有碟豬扒烏冬係豬扒仲多過烏冬，切開左有成八至十塊！仲有佢嘅熱咖啡，好香味道亦好！幾十元有如此美味確實不錯！…Read More

一年一度，又有生日coupon,所以就嚟用左佢，知道皇室堡開左新店，就book左位，點知去到打開個餐牌冇和民沙律先知道依間係概念店同平常和民有啲唔同，但個logo係一樣，所以之後就叫店員介紹一下有乜熱滿菜式，佢都好耐心介紹，炸章魚餅$38 ,個賣相好一般又細塊，一般般牛油香烤帆立貝$68,三粒中size嘅帆立貝，但我食其中一粒係凍凍哋，叧外啲菇同蒜都幾惹味！雞肉串燒盛合$73，其中雞粒最好食，外皮燒到少少燶燶哋好香口，雞翼亦ok,但如果味道再濃一點更好，另外免治雞肉比較鞋，而軟骨亦一般！牛肉壽喜燒烤$98,叫左個大有兩隻雞蛋比你，牛肉當然唔係靚貨色，但比我想像中ok,有粉絲、豆腐和菜，都對板！巨蜂提子梳打$19，夠氣味道ok,抵飲！總括嚟講去和民冇和民沙律真係差啲嘢！…Read More