matthew919's Profile

今日約咗朋友去食韓燒，我覺得呢間韓燒比較正宗，所以介紹朋友一齊再去食，今日好彩唔使等位，好快就入得。食韓燒唔少得緊係有幾碟泡菜啦，我鍾意佢呢度嘅辣泡菜，佢真係好辣，又夠爽口，我地食完再encore多一碟。我地點咗喜來烤肉、牛肋骨肉、拌冷麵、海鮮泡菜煎餅同紫菜飯團。喜來烤肉係呢度嘅必點菜，佢醃得好入味，薄薄嘅牛肉醃滿秘制醬汁，燒幾秒已經啱啱好熟，肉質一d都唔韌。而牛肋骨肉嘅肉質係有趙口，但又唔係韌，咬落去有肉汁爆出黎，都幾好食。拌冷麵個湯底係血紅色，以為好辣，但又唔係，飲落都幾清新，配埋蛋同番茄，食完可以減吓食完燒肉嘅肥膩感。海鮮泡菜煎餅，入面勁多泡菜，不過又唔係好辣，個餅底煎到好脆，似足喺韓國食嘅味道。最後叫咗紫菜飯團做結尾，雖然30蚊，但份量都唔少，有8個小飯團，d紫菜好脆口，飯團都幾結實，幾好食。…Read More

今日行街行過尖沙咀厚福街，經過呢間小黑糖台式飲品店，比佢嘅海報吸引住，見到佢嘅黑糖珍珠鮮厚奶 係用4.3牛乳，睇到都非常吸引，仲要加埋奶霜，緊係要試吓啦，佢嘅鮮奶真係非常多，而且個味道好有奶香味同濃郁，黑糖珍珠都好好食，係用黑糖煮過，所以粒粒都好重黑糖味，煙煙韌韌，同鮮奶係勁match。芋見了你珍珠，個名已經非常吸引，係用芋泥將佢打成沙冰，個芋頭味勁香，飲落個質地仲芋泥，感覺好足料，加埋黑糖珍珠，都係非常好飲。古早味珍珠奶茶，好有茶香味，加上d奶都好滑，match埋珍珠，係完美配搭。…Read More

原來展貿都好多餐廳，見到有間以紅色主題嘅餐廳，原來係蕃茄湯專門店，呢度午餐都幾抵食，我叫咗蕃茄湯螺絲粉，香酥雞排併蔗蝦，個蕃茄湯底飲落去勁濃郁嘅蕃茄味，螺絲粉吸收晒蕃茄湯嘅味，好正，個粉上面仲有半熟炒蛋，好滑好好食。而香酥雞排炸得好脆，雞肉都好嫩滑，蔗蝦嘅蝦膠好彈牙，再配埋佢地嘅鮮檸茶，一個完美嘅午餐。…Read More

記得之前呢間餐廳喺瓊華，原來而家已經搬咗去好景果邊，太耐冇食過，於是再黎試吓，入去環境同舊鋪差好遠，呢度好似好殘舊，點知質素仲下降咗好多，牛排叫5成點知黎到係7成，叫埋同一個餐，牛排size大細不一，下次唔會再黎。…Read More

今日突然想食北京菜，諗起之前有朋友話呢間都幾好食，所以黎試吓。我地點咗上海炒年糕，年糕好煙韌，佢地d醬汁好濃郁，非常惹味。雞絲粉皮-d粉皮好滑，吸收晒d麻醬好好食，上面鋪滿雞絲同青瓜撈埋一齊食，好好食。蕃茄蛋麵-d麵好煙韌，吸收晒d湯，好好食，個湯底好重蕃茄味，呢個麵勁多蕃茄同蛋，好足料。…Read More

去到翠華睇睇餐牌，原來翠華皇牌馬來咖喱出名，所以叫黎試試。我就叫咗個馬來咖喱魚試吓，上枱果時d咖喱香氣撲鼻，上面有幾滴辣油喺面，以為好辣，不過我覺得ok,唔係好辣，反而咖喱味好香，好正宗嘅馬來style嘅香味，撈飯一流，而d炸魚，炸得好香脆，d魚肉好滑，撈埋d咖喱汁一食，好match。下次一定試埋佢嘅咖喱牛腩。…Read More

今日一個人食飯，咁啱行過呢間日本餐廳，睇睇餐牌，都有定食套餐，最啱自己一個食飯嘅我。我一向都鍾意食燒鯖魚，所以一定會叫鯖魚定食試吓，鯖魚個皮燒得好香，魚皮有少少焦焦地感覺，而魚肉一d都唔腥，非常好食。呢個定食仲有芝麻醬豆腐，豆腐好滑，配埋芝麻醬一齊食，好夾好好食。…Read More

今日帶住小朋友見唔使排隊，所以入去食晚飯。小朋友最愛甜蛋，即整熱辣辣，唔會過甜，好食。三文魚醬油漬，d魚皮燒過，好香口，食落都算肥美，勁好食，呢款唔係間間壽司店有得食，所以必點。炸雞軟骨，炸得好香脆，唔油膩，脆卜卜，大人小朋友都鍾意。天婦羅烏東，烏東好滑，天婦羅炸得好香脆，湯底都唔錯。…Read More

麥當勞又推出新一款特飲，芝士奶蓋葡萄，三十幾蚊同其他台式飲品價錢差唔多，芝士奶蓋都算足料，有三分一厚度，芝士味都算濃厚，都幾滑，而下面d提子味沙冰味道淡咗d,下面仲有提子肉，都算鮮甜，整體都算唔錯。…Read More

今日約朋友聚會，最好不過就係打邊爐，可以坐得耐d,又可一邊食一邊傾計。呢間火鍋店都幾好，有埋刺身食，三文魚都算肥美，都唔錯。湯底叫咗雙拼，一邊皮蛋芫荽一邊麻辣，個湯底都幾足料。響玲都好脆，應該係即炸蠔都幾肥美飽滿，唔腥炸芋頭，即炸，外脆內軟三寶丸，新鮮手打，好新鮮彈牙…Read More

原來稻坊都有任食邊爐，價錢唔係好貴，8點半後仲要有特價，所以專登黎試吓。呢度可以食完雞煲再打邊爐，雞煲仲要無限refill,不過雞煲黎得都幾慢，出面仲有幾十款火鍋配料同飲品可以任攞。雞煲食落有少少辣，都幾惹味，而想食其他肉類嘅火鍋配料可以喺apps果度叫，喺廚房直接攞出黎，保持新鮮，全部配料都好新鮮，所以真係好抵食。…Read More

大快活同電競crossover都幾有創意，邊打機邊食大快活，呢間大快活環境非常大，好多坐位，可以喺度一邊食一邊睇人打機。黎到緊係要食佢嘅招牌焗豬排飯啦，上面鋪滿大量番茄同芝士，仲有幾粒新鮮菠蘿，豬排係厚切，而飯係炒飯底，非常好食。…Read More

呢間九龍灣工廠大廈入面嘅食堂，lunch時間都幾多人食，因為冇位，所以叫外賣。呢度嘅麵食，好似車仔麵咁，選擇餸同麵，呢度都幾抵食，2餸1麵都係36蚊，我叫咗豬腸、雞尖、米線、胡椒豬肚湯，豬腸同雞尖炆得都幾淋好入味，而最出色都係個湯底，個湯辣辣地，勁重胡椒味，每次都全部飲晒。…Read More

呢間晚市有幾款特價排餐，今日叫咗個黑椒牛排餐，首先黎咗個紅湯，紅湯辣辣地，有大量蔬菜，酸酸地幾好味，而牛排可以選擇碟上或鐵板上，牛排煎得好香口，唔太肥，肉質都唔錯。雖然係特價餐，但份量又唔太少。最後叫埋杯涷檸茶做結尾，完滿的一餐。…Read More

去麥當勞食早餐緊係要食早晨全餐啦，由細細個食到大，而家麥當勞仲有珍寶早晨全餐，大食嘅我，當然選擇呢個餐啦。有多塊熱香餅就豐富好多，熱香餅點糖醬加牛油，絕配，炒蛋都算滑，加埋黑椒粉更加惹味。…Read More