alicesinlaw's Profile

情人節吃午餐，當然要找一間有格調和食物質素好的餐廳。鮨葵位於上水舊墟，內裡裝潢偏暗及殘舊，但仍可以接受，我們二人都安排四人座，算是坐得比較寬敞。午市定食也有很多選擇，我們很快就決定點了三段魚生飯($84)及燒三文魚魚生飯($74)，另外再加點了芝士年糕($42)及富士蘋果和牛春卷($45)。店員很快就送上茶、沙津、味噌湯及茶碗蒸蛋，除了味噌湯看上去比較稀之外，其他賣相不錯。沙律比較多沙津醬，建議減肥人士要預先和店員說聲少醬。茶碗蒸蛋也挺不錯，不會淡到無味。芝士年糕及富士蘋果和牛春卷有驚喜，兩款都好吃，但春卷吃不到蘋果的味道，反而青椒味比較突出。兩個魚生飯賣相不錯，刺生也可以接受，但我就對飯底一般，可能太黏又有青瓜絲，感覺一般。…Read More

年廿八約朋友食飯，朋友推介德美壽司，話曾經中午食過值得推介，今次試試晚餐。早幾日已經BOOK位，7點半去到發現食客比想像中少。掃QR Code落單，晚市主要係散叫，叫了野菜牛肉鍋、魚子蔥吞拿魚腩茸丼、雞軟骨、三文魚沙律及牛油果軟殼蟹卷。朋友推介必食的是魚子蔥吞拿魚腩茸丼，我覺得口感真係唔錯，吞拿魚腩茸份量多，可惜飯量比較少。我個人比較欣賞牛油果軟殼蟹卷，食落口不會有油膩感覺，而且大大舊，食完有滿足感。野菜牛肉鍋及雞軟骨都係不過不失，沒有特別之處，勝在份量足，比較之下，刺身壽司會比較優勝。唯一失望的是三文魚沙律，三文魚份量少，變左以蕃茄為主，以$80黎講唔抵食。侍應服務比想像中好，由於2人枱比較細，食物又上得快，枱好快就唔夠位，佢地都好快手幫我地擺好野食，換細碟等等，就連加水都好主動。［埋單$494］…Read More

Cafe: Boundless By Reaction帶住仔仔去完萬像館玩，消耗左咁多精力，梗係要搵野食😁。向大埔方向走沿路周圍望，見到呢間咖啡店頗有格調，望落環境幾舒服，就決定入去。呢間咖啡店裝潢偏簡約風，店員好有禮貌，我地一行人4大1小，叫左4款食物+2款飲品+2個甜品。大啡菇黑松露忌廉扭紋通粉 配荷蘭鬆餅 ($95)🤩餐點送到時有D意外，冇預計係由有柄鐵盤盛載著，而個荷蘭鬆餅係放底，餅面就係扭紋通粉。食落覺得唔錯，大啡菇軟身多汁，細細盤但份量係充足，荷蘭鬆餅都好鬆軟，唯一最差就係我完全食唔出黑松露味道🙈。和牛漢堡 配薯條 ($123)仔仔喜歡食薯條，所以專登叫了呢個漢堡SET。5成熟漢堡大大個，但可惜食落略嫌普通左少少，薯條都係一般，仔仔食左兩三條就停手了。煙三文魚忌廉扭紋通粉配荷蘭鬆餅 ($108)外表色彩繽紛，鋪面係牛蒡，好特別之餘，食起黎感覺健康。同大啡菇個餐一樣，忌廉汁都偏濃味。墨西哥辣肉醬和牛漢堡配薯條 ($118)呢款朋友都係要度5成熟，見佢切開一半D辣肉醬都出晒黎，份量都唔少，辣肉醬唔算好辣，整體黎講都OK。［原來唔記得影相］Dirty Tiramisu ($58)真係必食之選👍👍👍👍我地叫左2個。一開始落單就叫埋，可以選擇後上。入口好軟好滑，芝士味濃，食完又唔會太heavy最後走時，見到有顧客帶埋狗狗用餐中，先知呢間café原來係歡迎寵物入內。❤️❤️［💳埋單連加一$749］…Read More

好耐冇食過沙嗲王，屋企同公司附近都冇分店，咁啱今日同老公有事出銅鑼灣，就第一次試黃金廣場呢個分店。下午茶時間唔駛等位，直入坐卡位，記得以前樣樣都要侍應俾，紙巾、水、餐具等等，而家全部都擺晒係枱度，方便左好多。而餐牌都同以前唔同，野食款式同以前有分別。老公選擇番佢以前嘅至愛白咖哩啡豬扒飯，而我就點左沙嗲肩胛肥牛粉絲，再加個雞軟骨小食，share 食。白咖哩豬扒飯水準keep到，味道同以前冇分別，但就擺得靚左，用紅色細碗盛住，d白咖哩仲要唔少，甜甜地好開胃，豬扒軟軟，易咬鬆軟。沙嗲肩胛肥牛粉絲都ok，但粉絲牌子就唔同左，以前果款好似好食d，沙嗲味仍然好香濃，但湯就比以前稀少少，但仍然係好味，仲有唔少雜菜，食落唔單調。雞軟骨份量比想像中多，而且大粒，食落好有咬感，又唔算油，好快就ko晒成碗。仲有兩杯青蘋果紅茶，算係成餐比較失望，首先遲左好多先黎，要我地催，味道都比較淡，冇以前咁好飲。…Read More

老公話同事提及有間新餐廳好得意，就想係我生之前帶我去試下，本身都冇特別期望，去到就有D大吃一驚，真係成個裝潢都係似捉古代客棧(除左廚房之外)。升降機門一開，就大大個牌面入眼，都有少少震撼感嘅。店員(身穿店小二服裝)雖然好忙，但見到我地都即刻衝過黎帶位。見到餐牌雖然好多選擇，但大肚婆選擇其實唔多，太凍或太甜都唔太適合，加上dinner時間，就叫左少少點心，加呢度招牌特色甜品。當日客棧差唔多坐滿晒，野食都冇咁快上枱，就利用呢段時間周圍行下。老公對d武林秘笈好感興趣，覺得都好新意，我覺得收銀台嘅酒壺櫃都比較有趣，之後仲睇埋有咩古裝衫可以試，可惜客人好多，冇咩選擇，而且d衫同配件都亂晒，有d仲跌左落地，呢方面衛生可能差少少，我求其搵左件皇帝衫試就算。叫點心有茶配，個茶壺好傳統，d杯細細隻，好有格調。不過食野時就覺得個杯太細，keep住要斟茶，有少少麻煩，再加上客人多，要加水都要叫幾次先有，要俾d耐性。$22 香滑奶皇包︰同酒樓點心好似，大小適中，仲要熱辣辣上枱，食落好香奶皇味，不過少少可惜嘅就係唔係流心，如果係流心應該會更好味。$22 手拉白布腸︰腸粉係偏硬身，唔易散開，亦好易挾，呢點我比較欣賞，因為我最驚d腸粉易散，會冇左質感。$20 金菇肥牛卷︰2條4件，份量少左d，不過都好夠味，不過不失，但如果人多一齊去就會唔夠分。$88 象棋牛奶凍︰食呢個要俾d耐性，幸好上枱有d驚喜，真係模擬棋盤。而家我大肚唔食得太甜，呢個牛奶凍唔會太甜，細細個都易入口，老公就覺得唔夠甜，可以再甜d，同埋棋顏色調轉左，不過我覺得已經好有心思，起碼係其他餐廳從來未見過，值得試下。…Read More

約附近做野嘅朋友食lunch時間，上次同朋友食完lunch經過呢間餐廳，見門口有個牌寫住5月中剛開張，所以今次就約實試下呢間。約莫12點半黎到，當時都唔算好多人，都仲有唔少吉位，拿拿臨霸左張卡位，睇定餐牌等朋友黎會合。本身以為係餐廳，原來都算係快餐店。因為同大家樂、大快活果d分別唔太大，都係排隊點餐，再搵位咁。2個人以上會好d，一人去點餐，另一個霸位，不過坐耐左就發現，滿場飛d姐姐好主動，除左送餐，仲會幫人搵埋位。不過有好有唔好，我地食到一半，就俾D姐姐叫坐埋一邊，因為飯市多人，而D4人卡位其實都逼逼地，我而家咁肥，有少少擠啦，加上張枱其實偏細，D野食會唔夠位放，所以後半段食得辛苦D。餐牌選擇好多……西式、台式、越式、港式常餐全部都有，真係估佢唔到。朋友快快手諗定食咩，就順便出去買埋。買完就囉個牌等d姐姐幫手送餐，唔駛再排隊去囉餐呢點好欣賞。皇牌焗豬扒飯 $59影相好似好大碟，其實同大家樂果d差唔多size，朋友話叫周圍好多人叫，就八卦試下。我都試左，食落好香蓄茄味，豬扒都幾鬆化，d汁好多，但又冇想像中咁好食喎，似係不過不失，普通左d，呢個價錢我就覺得貴左少少。沙嗲牛肉麵+蔥花火腿炒蛋+脆豬 $49  + 肉燥生菜 $10我就試左常餐，脆豬好好食，焗到剛剛好，同朋友share一半，大家都食唔停，奶油份量適中，唔會感覺成口都係醬，脆豬外脆內軟，唔會焗到似石頭咁硬。蔥花火腿炒蛋都係普通野，少少蔥花有d質感，蛋唔會太熟，火腿絲都尚算多。沙嗲牛肉麵就一般，因為我食牛肉時有少少凍，要浸浸d湯先好d，所以觀感就麻麻地，但整體都叫OK。肉燥生菜，好多肉燥&好少生菜，下次未必再叫。…Read More

聽日就連放三日，今晚處處都好多人等位，黎到得寶商場連food court都冇位，都苦惱緊食咩好，點知係2樓發現好野，呢個泰國菜都好多人食緊，但冇人等位喎，即刻走入去，剛好仲有張卡位坐，舒舒服服，正！原來內籠都幾大，好多張枱，設計仲好特別，真係配合佢個名，係火車車窗。望餐牌好多選擇，樣樣都想試。小食︰炸春卷——$38有5條，感覺好多，平時去飲茶廿幾蚊都係得2-3條，春卷炸得好好，外脆內軟，配埋泰式酸甜醬，真係停唔到口，好快就俾我地清光。主菜︰蒜蓉炒翡翠苗——唔會乾身，係比較濕既炒法，又係好香，份量都好多，連$60都唔駛，抵！蝦炒金邊粉——本身味道酸酸甜甜勝在開胃，附上一小塊青檸，先加入青檸汁再拌勻，食落口仲有少少青檸香，真係好正，美中不足係花生少左d。個人喜好︰薄餅——我最喜歡食薄餅，冇咖喱都要食，$28有3塊算正常價，但好好食，一咬落口，好鬆化，唔乾身，整到剛剛好，餅身脆，但入面係軟軟地，就咁食都好好味，我一口氣食左2塊。飲品︰青檸梳打——dinne飲品係散叫，青檸梳打係成枝青檸咁俾你，倒完一杯，枝青檸都仲有半枝可以繼續添飲，2個人share都足夠。…Read More

係AMP行街行到肚餓，梗係想搵好野食，點知下午茶時間周圍都好多人等位，排得黎都餓暈，就轉場去附近東廣場。本身對呢個商場唔熟悉，不過有朋友介紹話呢個廣場開左好多餐廳，就抱著到此一遊心態。呢個廣場內嘅餐廳都比較細間，細細一個鋪位只係夠廚房，食客就坐係商場通道，木谷料理係其中一間。兩三張枱凳就放係餐廳門口，食物選擇都唔算少，下午茶都有8款，主要配飯、拉麵及烏冬。我太肚餓，飯係我唯一選擇，就叫左照燒豚肉飯+熱大麥茶($42)，而老公就見menu註明「本店湯底，不含味精」，就叫左照燒雞扒拉麵+凍羅漢果水($42)，見有小食加，我地就加左4隻煎餃($20)。飲品先到，用細紙杯盛載，呢個可能都係商場特色，見好多細鋪都係用外賣食具器具。我係第一次飲大麥茶，味道淡淡地，飲落都有少少香味，算係一般。不過凍羅漢果水就完全唔得，我同老公都喜歡飲羅漢果，真心覺得太稀，淡而冇味，一d羅漢果味都唔出，比較失望。照燒豚肉飯︰用外賣盤分開上，個膠兜係比一般外賣盒細，豚肉份量少，切到細細舊都易入口，照燒汁係好味，都好香，配飯係一流，但未食完碗飯已經食晒d豚肉。照燒雞扒拉麵︰見到豚肉之後，都預左雞扒唔會多，果然不出所料，雞扒都係一般水準，不過不失，而拉麵就有少少驚喜，個湯底比較之下算唔錯，麵量就少d咁，可能因為下午茶掛。拉麵碗亦係唯一冇用外賣碗嘅食物，睇黎應該係呢個鋪頭主打。4隻煎餃︰等左一陣先到，即煎所以熱辣辣，望落就油左少少，食食下都幾好食，我配飯都OK。老公最鐘意食餃子，對佢評價唔差。我地一致覺得成餐最good係佢。食完野之後，見到menu有糖水加，我就心郁lu，加左凍紅棗杞子圓肉桃膠($10)。D糖水一直放雪櫃，但食落口一d都唔凍，有少少失望，因為食野食到好熱，諗住俾自己涼快下。味道方面，好稀好淡味，雖然碗糖水配料都ok，但就係食唔出味，真心麻麻地，絕對唔再試。食物可以，飲品麻麻，而附近環境真係一般，因食食下對面鋪頭開始裝修，又嘈又多塵，呢個價錢食左咁多野，但2個都唔飽，應該有其他更好選擇。…Read More

搵朋友食lunch，唔熟悉附近環境當然跟著朋友指示走，點知佢叫我去宏利大廈1樓，當時都驚驚地，無啦啦走去人地office大樓做咩，不過估唔到呢到原來1樓係開放，仲有兩三間餐廳喎。可能因為落雨關係，上到去間間好多人等位，好彩朋友一早到左囉飛，但都要等齊人先可以入座。同普通茶餐廳一樣，呢度有寫晒星期一至星期五有d咩lunch set，一次過睇晒成個星期好方便，再仔細d望，都會發現好少重覆，仲要中西式都有。就好似我地食野果日係星期二，有沙律、肉餅、天使麵、牛仔骨等等set，真係適合唔同喜好人士。我叫左黑松露海鮮意粉。意料之外嘅大大碟，三色椒令到成碟天使麵色彩好鮮豔，仲有好多蜆肉、蟹柳&魷魚。有一點令我好欣賞，廚師將d黑松露主力放係一邊，即係要自己撈，對於唔喜好黑松露嘅人黎講，真係好貼心。相片中被天使麵擋住唔夠清楚，其實黑松露份量係唔少嫁！朋友話唔太肚餓，就叫左個常餐︰香煎雞扒公仔麵+火腿奄烈+牛角包。上枱時牛角包變左普通蒜蓉包，但冇人通知，朋友切左一半俾我試，塊蒜蓉包係超硬身，係差d咬唔開個款，而且係凍晒，擺明放左好耐咁。火腿奄烈好少火腿，得中間位置有幾條咁，都唔似奄烈。香煎雞扒公仔麵就有d誠意，雞扒面都有少少菜絲。朋友係附近員工，呢餐有9折，唔駛$100就搞掂2個人lunch，都算抵食la。…Read More

星期日既Megabox到處都好多人，由10樓掃落去搵野食，發現下午茶唔係好多選擇，掃到地下果層，都預左要求其食d野，就俾我發現係好偏偏的一邊，有一間韓式餐廳。地方都好寬敞，主力for俾人韓式bbq。睇menu都好吸引，主打有$48下午茶 (包主茶、小食、前茶、湯&飲品)，仲有一種食貴少少，唔同set唔同價錢，由$42-$90不等，不過就唔包飲品，小食亦要加錢。我同老公都選擇叫$48 tea set。首先送上前茶，泡茶+芽菜，可以冇限添加。老公唔食呢d，我每樣試左少少，芽菜係普通野，泡菜都唔錯，對我而言就辣左d咁。迷你烤牛肉流心蛋飯真係好迷你，唔好預大碗，飯係少d，但牛肉對比之下係算多，而且唔係薄切，食落好入味，亦唔會好乾身，有質感。不過擺隻蛋就求其左少少，如果放係中間會更加美觀。韓式炒粉絲都係細細碗，好多配料，粉絲反而唔多，呢點有d失望，味道都偏淡，過口癮就可以。甜辣炸雞+薯條呢個小食可以encore，炸雞細細舊，但都唔少，個醬料都好惹味，我個人食唔到有辣，可能之前d泡菜太辣掩蓋左la。薯條係放炸雞下面，已經軟身，冇左脆口感覺，不過都應該係即整，因為最遲上枱。韓式炸餃子望到個樣係好吸引，食落亦都係脆卜卜，唔會好乾身，餡料係多肉少菜，趁熱食就會好d，我地有兩隻放涼左先食，就feel到好油lu。柚子冰茶全個tea set最失望！因為只有凍飲跟，我大住肚唔想飲咁凍，冇得走冰，就要求少冰，個員工好似好趕時間咁，求其答應就行開。兩杯冰茶黎到，係完全冇少冰！因為送餐員工個盤上面有6-7杯，我地問係咪少冰，佢話係，但我地望到同其他係完全冇分別。後來，我們唯有自己囉2個杯整少D冰，最後用左3個杯，而仲有好多冰，放棄lu，飲左兩啖就算。…Read More

太晏先食下午茶，到晚餐時間仲未肚餓，行左好耐都諗唔到食咩，淨係想飲野，就諗起土司工坊的南洋咖啡，雖然唔可以成杯飲，但飲一兩啖已經好滿足。$40 套餐︰點左咖啡+煉奶，咖啡好香，煉奶夠甜又有奶味，入口香滑，水準仲keep到；餐蛋麵，麻麻地，個麵係冇味，只係普通公仔麵，要轉出前一丁竟然要再加錢，呢個價錢係唔抵。$16 煉奶花生醬厚多士︰煉奶&花生醬的份量都多，每一小塊都平均塗滿，麵包邊脆脆，都算香口，而且預先切開，share食都好方便$12 炸雞翼︰跟餐小食，3隻炸雞翼，香脆好味，熱辣辣即炸，$4一隻都可以接受…Read More

平日難得唔駛返工，產檢之後就要食得豐富D，可以放肆一下。茶木食過lunch & dinner，下午茶就第一次食。TEA選擇都唔少，分台式刈包、小食、主食及甜品。茶本真係諗起甜品，不過俾老公禁止左，就選左食台式雞蛋肉崧起司捲餅，感覺比較特色d，而老公就要食飽d，叫左芝心雞翅肉燥飯。本身套餐有飲品，不過加$5可以任選特飲(除果汁外)，呢個夠晒吸引，我升級要左熱帶水果茶，而老公就叫左巧克力火山。芝心雞翅肉燥飯最快上枱，我望就唔覺得有咩特別，不過除雞翼之外，都有半隻蛋&雪菜伴碟，都幾豐富，老公食落係讚，個雞翼起左骨，啖啖咁食夠晒爽，食到尖尖先有骨，好入味，仲嫌2隻唔夠，而肉燥就基本野，我試左一般。雞蛋肉崧起司捲餅係美觀，整得好靚，好清楚見到餡料層次，仲有少少沙律菜件碟。餅底係薄，都易入口，肉崧&起司都係好胃，不過食落就好少，兩啖就食完，係唔夠飽，如果唔肚餓，係唔錯的選擇。熱帶水果茶加$5就好抵！入面好多生果，西瓜、火龍果、青檸……個水果茶用橙汁沖，所以會偏甜少少，見到隔離枱有ee打開個蓋加熱水再沖&食入面d生果，我就覺得一壺已經夠晒飽。巧克力火山會偏甜，巧克力味好重，但老公就覺得普通左d，但只加$5就值得飲。…Read More

突然想食上海菜，就走去德福的翡翠拉麵小籠包，原本以為6點幾尚算早，點知去到門口已經超級多人在等位，都等左廿幾分鐘先有枱，真係估唔到咁受歡迎。一坐低，侍應就問要茶定水，大肚冇得試茶，就要水，不過聽到隔離枱問有咩茶選擇，知道得一款茶冇得選擇款就有D不滿。肚餓就快手點食，點左必食小籠包。呢度小籠包真係keep到水準，真心覺得起碼佢皮簿而且肉吸收湯味，大小剛剛好，可能之前食過其他唔好食的小籠包，皮太厚或是肉太乾，冇湯等等，有比較下，就覺得係唔錯，又唔算貴。上海排骨拉麵，拉麵清清地，配濃味少少排骨都適合，麵量對我黎講少左d，唔太夠喉，但排骨係整得唔錯，大大舊都好鬆化。韭王炒鱔糊，有d失望，配料太多，望落差唔多全部都係蔥，鱔係非常少，一d都唔抵食，味道係惹味，配飯麵都好好，但以呢個份量黎講，就以後都唔會再點，應該有其他更好選擇。上海炒粗麵，餸多麵多，味道係好，但唔好期望太大，覺得會有咩特別，只係中規中矩咁，就好似普通炒烏冬，但係夠晒飽肚。…Read More

喜喜冰室位置較接近牛頭角，門外的裝潢屬於比較古舊一點設計，好像70,80年代，平時都只是經過，今次才是第一次到喜喜冰室食野。比起其他餐廳，11點半前仍有早餐是吸引，再加上沒人在餐廳外待位，當下吸引了我。餐廳內都尚算大，呈L型，可能外面下大雨，都頗多人進食，要等了一會才有位，雖然有張大圓枱，但店員都有禮貌請我稍等，並說明若坐大枱，好大機會之後需要轉座位。等了不夠5分鐘就有位，趕緊望望餐牌。餐牌好風趣，有型男索女餐，很搞笑。早餐是正常大路的選擇，我點了一碗漢堡扒米粉、熱檸水。2塊漢堡扒，湯內有少少栗米，感覺不會太清，但看著就覺得不會夠飽及不豐富，上枱時覺得$29好像不太划算的樣子。之後再加了$9，要火腿奄列+牛油多士。火腿奄列不過不失，火腿絲略少，但蛋煎得不錯。牛油多士大推介！超好食，並不是多士爐整出來，似是煎出來，除了牛油，感覺似芝士味，外脆內軟，非常香口，在整個早餐中非常搶鏡！若只單點一碗米粉是絕對不飽，建議加配會比較飽肚。…Read More

唔係第一次食上海姥姥，不過見好耐冇食，而且轉左餐牌，就再試下。呢間餐廳唔大，所以座位都比較逼，今次俾人安排左係吧台，其實大住個肚要坐上張高椅都有D麻煩，雖然個人唔介意，最多慢慢黎，但帶位女侍應望住我個肚，都唔問我一句要唔要再等下一張枱，我覺得佢D服務態度係差，反而餐廳入面佢D同事見佢安排吧台俾我，即刻好緊張過黎幫我，感覺先好d。個人建議真係唔好坐吧台，吧台望住佢地一邊包小籠包同拉長d拉麵一邊不停講野，但完全唔帶口罩(做樣都冇)，d豆漿同酸梅湯就咁入擺，衛生真係一般，望住其實都有d影響食慾。我叫左$78 姥姥手製排骨拉麵+雞絲粉皮(輕盈)+豆漿，老公叫左糖醋魚塊+白飯+宋嫂魚羮+雪碧。宋嫂魚羮真係好好食，又多料，又大碗，味道係屬於清清地。雞絲粉皮就一般野，不過不失。個手製排骨幾大塊，我覺得油左少少，老公就覺得肉質肥肥地幾好食，我比較欣賞個拉麵，食落都幾彈牙，份量唔算多。糖醋魚塊，我食左好多，酸甜好開胃，又唔會太多粉。…Read More