Katinatsoi的個人專頁

以前覺得出街食好嘢一定要有人陪，但係之後發現其實自己一個都可以去食好西，而且食完之後真係返唔到轉頭🥹今次咁啱身邊嘅朋友都唔得閒，就對自己好啲，一個人走去食個semi buffet brunch😋平時行美麗華都已經好想試吓呢間餐廳，外觀簡約有格調，而且入面空間感都唔錯👍🏻有set lunch menu或者weekend brunch menu，而今次嘅目的係希望好好同自己食餐好嘅，所以我就揀咗一個比較豐富，而且有滿足感嘅brunch ($328)😝餐廳做緊泰國菜Menu，全部放題嘅小食都係我平時會單點叫嘅餸🤩前菜有三款，全部都非常特別👍🏻首先有傳統嘅無骨酸辣鳳爪，食泰國嘢必叫🙌🏻做得啱啱好，酸辣程度唔會太過分，唔太食辣嘅人都可以接受👌🏻另外魚子醬紅磚豆腐同埋泰式青醬鮑魚都好特別，平時食泰國菜未必會食到，但係呢度做得好出色，而且唔會感覺突兀，口感同味道都夾得好好🫨可惜呢三樣前菜都唔係任食，如果唔係我一定會再叫多幾碟豆腐，真係好正🤭個湯我揀咗蟹肉海鮮羹🦐🦑🦀本身以為應該都係得啲海鮮味或者海鮮蓉，但係嚟到竟然係大大嚿蝦，勁多魷魚，仲有啲蜆肉，三份一嘅羹都係海鮮😂真係太過分，未食其他小菜淨飲個羹都飽😆終於嚟到小食放題🤓第一轉佢一次過上晒所有款式，成張二人枱都充滿着食物個視覺效果都幾震撼同埋好滿足😆但係一個人食，所以淨係食咗一轉都已經好飽，不過每一樣都真係好值得試👍🏻特別推介泰式青醬生蝦同埋泰式蝦多士，完全冇諗過放題會食到呢兩樣咁高難度嘅小食🤯一上枱就食咗個生蝦先，一碟有大概12隻，完全無腥味，而且好新鮮，唔係霉爛，連埋啲青醬同生蒜片一齊食，真係食到泰國嘅味道🤤我一個人食晒成碟都完全冇肚痛，證明啲蝦係乾淨嘅💯蝦多士真係比預期中好食，平時食泰國嘢有陣時都會叫，但係好多時一係個包太硬完全冇味，一係隻蝦好細好似食緊齋炸多士咁🫥今次個蝦多士大細適中，個包同隻蝦都非常入味，而且炸得啱啱好，唔會太油膩，我一個人食兩件都唔會覺得太飽太滯🫢其他小食都好正，例如食泰國嘢必叫嘅生菜包我都好推薦🥰佢嘅肉碎同生菜比例係啱啱好，令你可以食每一啖都啖啖肉，同時有啲生菜中和一下個口感😋幾清新又香口，強烈推薦大家可以encore嘅小食✌🏻除咗小食放題之外，仲可以叫一個主菜，今次就試咗餐廳嘅招牌海南雞，果然名不虛傳😦呢度嘅海南雞比傳統泰式海南雞或者出面餐廳整嘅海南雞好唔同，有濃厚香滑嘅奶油口感，配埋啲滑嫩雞肉一齊食落口會有一陣奶香味同埋鮮雞肉味🤌🏻大家有興趣又有肚嘅都不妨叫海南雞試一試🫶🏻最後仲有一個黑糖椰子雪糕做結尾🥥雖然之前已經食到好飽，但係食甜品永遠有另一個胃，黑糖味唔會太甜，椰子雪糕仲有啲真椰子肉，側邊仲有啲桃膠，好有咬口，口感豐富，作為成個semi buffet brunch嚟講係一個好好嘅wrap up🥹如果大家有興趣都都可以叫埋呢一杯芒果椰子沙冰($68)🍧因為食到咁上下個口入邊太多唔同嘅味道，飲一飲即刻成個感覺清新晒，又可以再食過，推薦推薦😜…查看更多

平時去銅鑼灣都係食壽司朗🍣次次見到隔離間餐廳好靚，但係門口好隱蔽，以為係啲私房菜只招待會員嘅餐廳🤨但係！今次終於比我揾到原來係隱藏喺銅鑼灣廣場3樓入面嘅西餐廳🍴仲要有香港人至愛嘅semi-buffet🥹今次book咗食weekend semi-buffet lunch🫶🏻餐廳空間感十足，自助食物bar嘅款式都算多，沙律、炸物、甜品，連通心粉沙律都有🤩沙律可以任揀生菜同埋配料之後自己撈埋👍🏻通心粉沙律味道唔錯，而且唔會太過多醬，清新開胃👌🏻炸物就有兩款選擇，炸雞同埋薯條都不過不失，有quota嘅朋友可以try try🙌🏻甜品有唔同嘅小蛋糕，大家有興趣都可以試一試，唔會好甜細細件啱啱好😝呢個set個餐湯每日都唔同，今次係my favourite羅宋湯🤭蔬菜料都幾多，而且湯唔會好鹹，份量適中，飲完都仲有好多quota唔會已經飲飽晒😋主菜我哋叫咗法式紅酒燴牛面肉配薯蓉($98+$98)🥩同香煎三文魚柳伴菠菜苗枝豆配檸檬牛油汁($98+$148)🐟牛面肉煮得非常腍，入口即溶，配埋紅酒少少嘅苦澀味，再加啲薯蓉一齊食好夾，超滿足🤰🏻三文魚柳就完全食唔到腥味只有鮮味🤓魚皮煎得香脆，入面嘅魚肉仲keep到好多汁唔會一切就散開晒乾柴柴咁，加埋少少檸檬汁感覺就更加清新😌Semi-buffet lunch個menu本身包一個飲品，如果想飲咖啡或者特別茶款嘅朋友就要+$18，又或者晏晝就好有興致想飲酒嘅朋友都可以+$38😇我哋叫咗一壺洋甘菊同一杯凍檸茶，兩杯都幾足料，唔係普通茶包或者檸檬汁🤭兩個人埋單$500之內，可以喺銅鑼灣食到一個咁豐富嘅semi-buffet lunch我覺得非常之抵🥳大家有興趣或者鍾意食自助餐，但係又食唔到咁多嘅朋友記得一定要嚟🤓…查看更多

今次嚟旺角食越南菜🇻🇳叫咗兩個3 course dinner加一份小食，超級飽同埋好enjoy🤰🏻我哋一個叫咗招牌去骨海南雞配黃薑飯另送兩款starter牙車快沙律(柚子+雞絲)🥗+椒鹽脆蛋魚柳 ($92)，仲有一個係牛+豬Pho(生牛肉+烤牛肉+豬頸肉+豬扒)再另送兩款starter無骨黑糖鳳爪沙律+手撕雞檸檬紙卷($109)😋最後見到有一個好吸引嘅小食，所以就叫埋呢個法式芝心蝦多士($55) 海南雞好嫩滑，而且啲肉都好厚實，唔使加錢都有雞髀嘅位置簡直超值💯黃薑飯比平時出面食嘅雞油飯多咗一層香料味，冇咁油膩之餘同海南雞都好夾👍🏻牙車快沙律好清新，建議食到有少少飽嘅時候就可以食一啖沙律開一開胃之後再食🤭個炸魚柳超入味，外面炸得好鬆脆但係入面仲保留到魚肉嘅汁，同埋上枱嘅時候都仲係好熱，唔係炸定擺咗好耐💯食越南嘢一定要叫Pho，而且一定要有生牛肉😛呢一碗簡直係一次過滿足咗你4個願望，牛肉同豬肉都可以一次過食晒😋全部肉都煮得好淋，同埋本身都有調味唔會好乾👍🏻個湯底係蕃茄湯超級濃郁，好似用咗三四個新鮮蕃茄去煲🥹食完成碗粉之後一定要飲埋所有湯先叫完滿🙂‍↕️無骨黑糖鳳爪沙律好特別，本身以為黑糖鳳爪會有啲奇怪，但係食落又幾正，配埋沙律菜一齊食就fit晒💯手撕雞檸檬紙卷冇諗過竟然係免費唔使洗加錢嘅小食，總共有三舊全部都好足料好大嚿，粉絲超級多加埋on top嘅雞肉碎一啖食，口感非常之豐富，鹹味之後有啲甜味之後又有啲酸味，要慢慢咀嚼享受😎最後法式芝心蝦多士真係唔會介紹錯🫶🏻炸得剛剛好，唔會太過油膩，出面仲食到麵包嘅脆，但係咬到入去就有濃濃嘅蝦肉味，再食多一層就有芝士留心嘅效果，成件事好夾💯睇真啲原來係幾年前已經攞過啤酒節獎嘅一款小食，果然攞過獎係唔同啲😋建議大家嚟到必叫！最後仲有一碗雞湯附送🥣本身諗住都係普通平時食海南雞飯會配嘅湯，但係點知原來佢哋係真材實料，好熱好正，入邊仲有一隻雞腳show俾你睇佢哋係真真正正嘅雞湯唔係罐頭湯🤩👍🏻…查看更多

平時都唔係成日嚟圓方，今次過嚟做完嘢就諗住食埋dinner先走🧐行行吓先發現原來個商場仲有3樓🤣上到去見到個環境都幾chill，有幾間bar，但係今次想食個proper dinner，所以就揀咗間食英式印度菜嘅restaurant bar😋環境好輕鬆，好闊落有足夠空間比每一枱客人feel free傾偈😌staff都好nice同埋唔會hard sell👍🏻入到去先發現原來係有兩層，而今次我哋就被安排坐喺下面，因為2樓有人租咗個場嚟做gathering🤭Menu其實得一頁，但係菜嘅款式都算多。我哋今次兩個人比較肚餓，所以就諗住食一個full dinner，叫咗Masala Garden Salad ($108)做前菜，Prawns Pakora Basket ($118)同Chicken Tikka Skewers ($128)做小食，Lamb Shank Rogan Josh ($238)配Basmati Rice ($48) & Garlic Coriander Naan ($30)做主食，最後叫咗個Pistachio Burnt Basque Cheesecake ($128) 做甜品🤪🫶🏻 首先個沙律整得非常清新，而且用嘅材料都好新鮮👍🏻香脆嘅蔬菜配埋小小辛辣嘅印度香料油醋汁，作為第一道菜非常開胃🤤Prawn pakora🍤係用薑、大蒜、辣椒同檸檬汁醃製嘅甜大蝦，再用熱油煎炸。睇落好似好簡單，但係沾埋餐廳特別自家製嘅印度酸辣醬，成件事就唔同晒🥹大蝦好爽口，仲有啲炸洋蔥薯仔圈做side dish，非常適合同朋友分享一齊食😌雞肉烤串亦都係另一道有豐富多層次嘅開胃菜🙂‍↕️雞肉食到有酸橙汁同埋香料味，再加埋獨特嘅煙熏味，配小小清新嘅醬一啖食，所有口感融合一齊，真係好難抗拒🫡傳統Rogan Josh係印度餐廳嘅重量級必叫菜式之一😎 用咗好多唔同嘅香料同羊肉一齊慢煮，配上奶油番茄咖哩醬嘅味道，口感非常濃郁多元化👍🏻羊肉非常軟嫩，用叉就已經可以切開🙀印度風味嘅羊肉配埋印度香料米同經典印度薄餅真係全晚嘅highlight!! 💯開心果巴斯克芝士蛋糕🍰結合咗經典巴斯克芝士蛋糕嘅奶油魅力同開心果嘅堅果風味😌蛋糕嘅頂烤到焦糖色，有小小烤焦甜味，中間配上光滑奶油狀嘅軟熟芝士蛋糕，加埋開心果，超級獨特，非常適合開心果愛好者😜…查看更多

今次同幾個朋友一齊慶祝生日，所以就諗住訂個蛋糕同大家一齊慶祝🪅每次揀蛋糕都好煩惱，因為網上面嘅ig shop真係有太多選擇，而實體餅店來來去去都係嗰幾間開始食到悶🥱平時多啲人share就可以食到好多唔同口味嘅蛋糕仔🍰但係今次得幾個人，所以就想揀一個有多重口味又配合到所有人嘅蛋糕🎂😹本身都覺得太高要求，但係搵搵吓竟然比我見到一間喺觀塘嘅Kiuki Sweet Bakery竟然有4”嘅斑斕戚風蛋糕加自家製手工芋泥爆漿流心🥹不過最終決定買嘅原因係，個蛋糕仲有牛乳麻糬!!!! 成個蛋糕無加人造色素，又低糖又健康，真係唔買唔得🙂‍↕️幫襯過其他ig shop或者一啲餅店有時都係伏，但係今次係非常驚喜🤩蛋糕有濃郁嘅斑斕 X 芋頭味，而且外面層cream唔會太heavy，入面嘅流心仲要係低糖，食多幾啖都唔怕滯，只會越食越多😹另外最期待嘅QQ麻糬真係好正，好煙韌有咬口，令成個蛋糕增添咗第三層好特別嘅口感🫶🏻如果大家想試吓一啲特別口味嘅蛋糕，強烈推薦大家支持呢間本地小店👏🏻…查看更多

之前行中環街市見到條美食街仲有好多舖頭未入伙，但係今次去發現原來已經豐富咗好多👏🏻最後行到攰揀咗間可以食啲比較飽肚食物嘅小檔，買咗一個set，包一碗龍蝦湯🦞，一份自選三文治🥪同一盒日式炸雞🍗 ($75)本身諗住個龍蝦湯應該都係煮定放咗喺度普通嘅罐頭湯，但係我外賣攞到返屋企個湯都仲係熱嘅🙀而且飲落比較清爽，係一碗有大餐廳質素嘅龍蝦湯👍🏻自選三文治揀咗和牛薯仔可樂餅，薯餅入面啲牛肉餡唔會話太少，而且食落都唔會太過油膩，厚薄適中👌🏻如果唔係咁肚餓嘅朋友都推薦可以淨叫一個包試一試😋日式炸雞就不過不失，勝在一盒有好多粒，每粒都炸得又大又鬆脆，$30呢個價錢其實抵到爛🤫有興趣嘅朋友，不妨嚟到中環街市試吓我哋啲本地小店，好多舖頭都平靚正，完全值得大家嘅支持！💪🏻…查看更多

平時冇乜北上玩，但係成日聽啲人話每次北上就係食好嘢，有好多唔同嘅菜揀，例如川菜、上海菜、粵菜等等。可能好多人都唔知或者冇去發掘，香港其實都有啲好好食嘅陝西菜😚唔洗上深圳，唔洗過關，今次就帶大家去一間喺佐敦，有好多人專程過嚟食嘅陝西菜餐廳👍🏻今晚好彩早啲到，如果唔係一到食飯時間就有好多人排隊🫨我哋叫咗最出名嘅金沙骨biang biang麵 ($45)，麻辣大盤雞 (一份$198)，酸辣土豆絲 ($42)同埋一份白灼生菜配秘製肉汁 ($24)🫶🏻首先嚟嘅係酸辣土豆絲🤩我本身好鍾意食薯仔，再加埋酸辣切絲嘅煮法，又易食，又唔會過辣完全食唔落，超級開胃👌🏻作為第一道菜係超級合適🙂‍↕️之後大盤雞一上枱嘅時候就非常壯觀，用一個大鐵盤裝住所有雞同埋配料，而且仲出晒煙，熱辣辣大大口咁食超爽🤤啲雞都非常入味，而且斬件之後好易入口，唔會好難咬或者啲肉好韌👍🏻除咗一份雞之外仲有好多其他配料，例如薯仔就軟硬適中，大小朋友都一定鍾意❤️最後就到我哋最期待嘅biang biang麵🤩本身見人哋啲圖以為都係類似長壽麵，將啲好多又長嘅麵整埋一碗😂點知嚟到先發現原來係一大條又長又冇斷開嘅闊條麵而整成嘅一碗麵🫨本身已經好欣賞呢個手工，而且食落都非常有咬口，再撈埋啲秘製汁同埋金沙骨啖啖肉咁食，非常之特別✌🏻果然係嚟到必叫👍🏻今餐樣樣都係肉肉同埋肉，所以我哋都叫咗個生菜諗住當清一清個口😛但係個菜都煮得幾唔錯，係用秘製嘅肉汁去煮，所以食落唔會好dry 但係又幾清新🤓如果大家冇乜機會北上嘅話，但係又想食吓唔同嘅中國菜，我非常建議嚟呢度試一試好出名嘅陝西菜，因為味道真係非常之地道同埋全部菜式都好足料😎…查看更多

星期六日最鍾意去荔枝角行市集😝不過多數都無特別喺附近食嘢🤨近排見到間好出名嘅茶餐廳，設計裝修都好有香港特色，所以專登行咗過去食個下午茶先😝本身以為星期日會少啲人，但係原來好多人都專登過嚟朝聖😳三點幾去到已經有好多人等緊，餐廳入邊都full晒🤯今次就叫咗佢哋最出名嘅餐肉炒蛋熱香餅漢堡($36)，滑蛋叉燒飯($76)，芝士鹹牛肉巨型奄列餐($46)同埋老荔特餐($55)😋今次嘅主角一定係餐肉炒蛋熱香餅🥳近期好多人都講緊食McGriddles，不過就嫌佢太甜🤔所以今次我都好期待食呢一個包🤣果然不負眾望，佢嘅糖漿係自己隨意落，唔會fix死咗個甜度，鍾意甜嘅落晒佢又得唔鍾意嘅直接唔落都得👍🏻仲有個餡可以自己揀，而佢哋嘅餐肉同炒蛋就好厚炒得又滑💗熱香餅有蛋味，仲要即叫即做😍總括而言，比McGriddles好食好多🤣👍🏻另外滑蛋叉燒飯都做到傳統香港茶餐廳嘅嗰種特色🥸滑蛋+半肥瘦叉燒真係不敗組合！叉燒食落好有口感勁，半熟蛋好滑，加埋甜豉油就更加好食😍絕對係超有水準發揮，完美組合！我相信唔會有人可以抗拒到茶記「滑蛋叉燒飯」嘅魔力🤣芝士鹹牛肉巨型奄列又係另一代表作🤩牛肉味濃，鹹香滋味，配埋芝士拉絲嘅效果，真係必叫之一！👍🏻即使今餐飯叫咗咁多蛋類食物，但呢一個奄列係只會越食越上癮同開胃😝最後「老荔特餐」聽個名都知係間餐廳推薦啦🤓基本上就係一個常餐，不過有得揀火腿奄列做個粉麵嘅其中一款配料！大大份，超低食🤩不過如果大家想試多啲新產品，我建議大家可以留返個肚叫其他特別啲嘅食物😝最後！大家記得走之前打埋卡先！餐廳嘅裝修好特別，門口有戲棚元素，店入面又有龍鳳牆，甚至每隻杯碟上面都有啲金句/ 迷語，超靚超打卡able！今次雖然有啲可惜試唔到佢哋嘅嗲牛肉同埋西多士😢但係其他食物都好正，同埋環境氣氛都好好👍🏻下次一定要早啲過嚟試埋佢其他經典餐！🤪…查看更多

好難得同好耐冇見嘅朋友聚舊，所以就帶佢嚟以前我哋成日蒲開嘅尖沙咀restaurant bar一齊又食又傾！朋友好鍾意食泰國菜同時又好鍾意飲酒🍻今次呢間酒吧餐廳就fit晒😎雖然地方唔係好大，但係都好cozy好有feel，好適合情侶、三四個人嘅gathering甚或者成班friend嚟happy hour💯本身酒吧餐廳都無expect會有好多選擇，但係呢度嘅泰國菜係由泰式刺身到冬蔭功湯，炒飯，甜品芒果糯米飯都有！要酒有酒，要無酒精飲品亦都有！真係將酒吧餐廳做到極致👍🏻我哋兩個人叫咗咖哩軟殼蟹(2隻)($148)，炒芥蘭($88)，花膠冬蔭功湯($78)同埋食泰國菜必點嘅雞肉生菜包($98)❤️‍🔥食辣嘢當然要叫返幾杯飲品清一清個口😝所以我同朋友每人都叫咗兩杯梳打($48-58)同原隻椰青($58)解渴😌花膠冬蔭功湯同咖哩軟殼蟹辣度適中，係會越食越上隱，停唔到口😂驚辣嘅朋友都可以大膽嘗試👍🏻個湯除咗有小小酸辣味之外，仲落咗好多唔同香料調味同埋冬菇大蝦嘅材料整🍤而咖哩軟殼蟹就炸得酥軟，好重咖哩味，混雜多種風味，真係泰好食😋我哋最愛嘅生菜包真係無得彈！泰式肉碎酸辣又開胃😋清爽可口嘅生菜🥬包住連埋肉碎一齊食，口感層次豐富🤩又係令人越食越開胃，一個人都就嚟清晒成碟😂鍾意食泰國菜嘅你強烈建議一定要點🍽️😆炒芥蘭就不過不失，再加咗啲菇一齊炒，啱重口味嘅朋友👍🏻椰青同梳打就好解渴，一定係食酸辣鹹菜式必叫嘅良伴😎大家如果想飲酒都可以等到happy hour (8pm)叫就可以有半價優惠！🤩最新優惠要到時留意返餐廳嘅安排😁…查看更多

以前去過一次北京道1號樓上一間西餐廳覺得個view好正🔥所以今次就搵咗一間同樣位於北京道1號食日本菜嘅餐廳慶祝朋友生日🎂順便再回味一下個無敵大海景🌃今次嚟到”花楽日本料理🇯🇵”，一入去已經俾佢哋個景吸引住🤤Scan個QR code睇吓個menu，發現好多都係用新鮮食材配合日式嘅烹調方式 ，再用「花」做主題甚至擺盤，未食就已經比眼前嘅視覺衝擊咗個味覺，成碟食物都昇華咗👍🏻為咗朋友有一個難忘嘅生日，今次就叫咗兩款比較特別嘅料理😜分別係中華風燒賣壽司(4件) ($118)同埋雲丹仲買人魚生卷(2卷) ($198)💯除此之外，都叫咗幾款飽肚嘅食物 - 海老野菜天婦羅盛合 ($158)，黑豚肉稻庭烏冬 ($128)同日本燒牛肉石鍋飯 ($148) 🤓唔係講笑‼️個中華風燒賣壽司真係好靚之餘又好食😋本身諗緊點樣可以中日合璧，完來係外面一層軟糯嘅外皮包住吞拿魚茸同埋蟹肉再on top加啲三文魚子嘅壽司飯，食落好fresh又唔會有呑拿魚筋，入口即溶，好開胃😋另外差唔多$100一粒嘅魚生卷入面原來係包住幾款唔同嘅魚生角切同埋黃瓜，上面就淋咗一層滿滿嘅海膽加三文魚子🤤成個口感都好豐富，一次過食到甜酸苦辣嘅味👍🏻有budget嘅朋友，難得嚟到都不妨可以叫嚟試一試😋炸天婦羅拼盤都炸得好酥脆，唔會over fried🥸入面件南瓜或者海蝦都keep到好新鮮唔會一次過炸到熟得滯梅咗👏🏻最鍾意就係佢有炸秋葵，出面鬆脆入面滑滑哋嘅感覺好得意😜最後就係個豚肉烏冬同埋燒牛肉石鍋飯😆兩款主食都不過不失，豚肉都算多塊而燒牛肉就好入味，連埋隻半生熟蛋撈飯，食完真係好飽🤰🏻所以建議大家可以叫一款主食之後留返個肚叫多啲串燒或者串揚同埋其他魚生海鮮類嘅食物😜重點介紹！呢度係有駐場歌手！如果夾啱時間日子嚟到就可以免費任聽同點歌！嚟食餐飯竟然有視覺，味覺同聽覺嘅三重享受😎💯…查看更多

有時夜晚想約朋友但係又唔係特別肚餓，就會睇吓附近嘅居酒屋😛今次揾咗間喺尖沙咀嘅高質居酒屋睇吓係咪真係咁正🏮餐廳位於尖沙咀漆咸圍，外面裝修簡約但係一眼就spot到佢👍🏻入到去仲有好多裝飾同埋佈置，夠晒多元化，好chill好relax🤓見到有啲poster講餐廳應該定期會有音樂表演🤨如果大家有興趣都可以夾啱時間過嚟又食又聽😇本身諗住居酒屋都應該唔會有好多飽肚嘅食物揀，但係竟然都有幾款特色飯同麵😲如果肚餓嘅朋友都唔洗驚😎不過今次我哋叫咗幾樣小食🤙🏻其中一樣係餐廳嘅新推出円相限定 - 梅漬啫喱蕃茄仔($48) 🍅仲有人氣明太子玉子燒($72)同埋嚟到必點嘅自選燒鳥串(任選3款)($108)🥰重點！就係個是日一夜干烤魚($168)🤩但係有選擇恐懼症嘅朋友都唔洗驚，因為唔想自己諗嘅可以直接叫佢哋個set menu咁就最hit嘅食物都試到晒啦😜梅漬啫喱蕃茄仔非常特別😲食落完全唔似食緊蕃茄，好似食緊一粒無核嘅話梅，酸酸甜甜好開胃🤓旁邊嘅啫喱比較似水狀，如果好鍾意食話梅嘅朋友建議可以飲埋佢😛明太子玉子燒果然係人氣招牌💯卷蛋煎得非常鬆厚，但係切落去又唔會即刻散晒👍🏻配埋明太子一齊食簡直係味覺嘅雙重享受😌自選燒鳥串我哋揀咗兩條人氣月見汁免治雞肉棒串+一條日本三角雞胸軟骨串😋本身都好鍾意食雞軟骨，真係超級推介免治雞肉棒💯啖啖肉但係每啖又夾雜着一啲碎骨，口感一流💓如果鍾意食完整嘅燒雞肉但係又想食到軟骨，咁三角雞胸軟骨就係你嘅不二之選😌👍🏻點埋啲蛋汁一齊食，成條串燒就會冇咁油膩🤓等咗最耐，全晚嘅焦點一定係烤魚😍餐廳同事推介我哋揀燒鯖魚，果然冇介紹錯😲成條魚煎得好香脆，而且差唔多除咗骨之外成條都食得🤨魚肉同埋魚骨好容易分開，成條鯖魚好快就俾我哋清空咗😛如果大家鍾意食魚嘅一定要叫一條！手快有手慢冇！🙈…查看更多

𣎴嬲都知觀塘啲工廠大廈有好多隱世食堂，今次放咗工就揾咗間樓上雞煲打邊爐嘅餐廳同朋友食個痛快🤣上到大廈一樓直行到尾就見到大大間”巧得鍋”啦🥸一坐低餐廳就會上一盤九宮格嘅醬料俾我哋自由搭配😙再睇menu發現有個期間限定新登場嘅雞鍋好似好正咁 - 新鮮椰青雞鍋(半隻) ($238)，呢啲天氣梗係即刻叫嚟試吓夠唔夠清爽先🤩佢哋係用皮薄雞味濃郁嘅鬍鬚雞，仲有味道香甜又養顏帶有淡淡芋頭香嘅泰國椰青一齊煲，食落非常清甜同埋解渴😋除咗椰青水做湯底之外，仲有一片片嘅椰青肉，塊塊都煮到出晒味，連埋啖啖肥美嘅雞肉，淨食個雞煲都夠晒飽🤪叫完個雞鍋湯底，就試咗個小食青藤椒涼拌花膠，又香辣又爽口，打邊爐之前食非常開胃，不過真係要叫返個椰青($48)解辣先繼續食到落去😛椰青超大個勁多汁，入面仲有有勁多椰肉可以自己刮嚟食👍🏻又飲又食又大個，真係好忙🤣本身諗緊要叫啲咩打邊爐料，跟住就見到有個$1頂級本地手切牛頸脊快閃優惠🤯原價$238，只限星期一至六午市同星期一至四晚市，好彩啱啱好星期四晚去食所以秒叫😋除咗雞煲同打邊爐，我哋都想試吓啲小食，所以叫咗個椒鹽九肚魚($98)🤓咁就一餐食晒雞牛魚啦🐓🐂🐟手切牛頸脊雖然係$1，但係都幾大碟，唔會偷工減料得好少肉👍🏻平時都係食開啲普通牛肉，今次食牛頸脊都係第一次🤨肉質彈牙，比起平時打邊爐嘅牛肉更有咬口，我哋兩個人食一碟都夠晒飽💯鍾意食牛嘅朋友唔用$1優惠都一定要叫啊！最後九肚魚嘅肉質非常細嫩，啲骨炸到好酥脆可以直接食埋😋雖然佢哋唔係主打小食，但係九肚魚嘅炸香撈埋椒鹽食都真係拍得住酒樓整出嚟嘅效果👍🏻值得一試👏🏻…查看更多

中環普遍嘅餐廳都唔平😢而家天氣咁熱，有時想喺附近一帶揾一間好食，有冷氣涼但係又賣平民價錢嘅車仔麵都幾難😫不過！今次俾我發現咗一間喺大排檔隔離嘅”車水堂車仔麵”完全符合我嘅要求💯嚟到緊係要叫佢哋必食嘅招牌麵($88)，同埋試吓自己隨意配搭嘅一麵五餸($90，視乎你嘅餸)，仲有叫咗兩碟小食，麻辣涼拌牛柏葉($35)🐂同秘製辣魷魚($38)🦑食餐飽😎招牌面係包括秘製辣魷魚、滷煮豬腸、爽脆豬皮、牛腩同埋蘿蔔🍜 湯底就叫咗豬骨白湯配米粉加濃香沙嗲醬😋最鍾意就係個豬腸，全部都清得好乾淨，冇奇怪味👍🏻豬皮同魷魚都好爽脆同埋入味，唔會咬唔斷或者有好油膩嘅感覺💯不過最有驚喜嘅係蘿蔔竟然可以煮到同牛腩一樣咁淋，完全冇好礙口嘅蘿蔔筋，超滑💓不過如果大家食得辣嘅話建議大家叫秘製辣醬會有更加多層次🤓自選五餸我哋揀咗烏冬拌麵，韭菜餃、豬手、菜心、滷煮豬腸、麵筋加配秘製辣醬(小辣)🥢果然無論湯麵定拌麵總之係麵都做得好出色😂如果要比較，我建議大家揀拌麵，因為拌麵先食得出佢哋最特別嘅秘製醬料，辣得嚟但係又會令你keep住食🤩另外如果鍾意重口味嘅朋友，都不妨叫麵筋😚因為佢索晒啲汁，咬落去每一啖啲汁都係爆出嚟🤤正💯不過怕肥嘅朋友就要諗諗啦🤣其他配菜都不過不失，大家可以揀返自己平時鍾意嘅小食，包保唔會失望🤓最後兩碟小食都非常唔錯👍🏻不過麻辣嘅程度比較勁🥵如果唔食得辣嘅朋友最好就叫多杯嘢飲傍吓身😂而辣魷魚就好飽肚，大人小朋友都鍾意食👨‍👩‍👧‍👦有魷魚鬚亦都有魷魚片，啱晒鍾意食兩款口感嘅朋友😋…查看更多

今日一放工就諗住過去中環happy hour🔥但係見未夠鐘又有啲肚餓，就喺蘭桂坊附近揾到間拉麵店醫咗肚先😋位置非常方便易揾，喺行緊上去酒吧街嘅嗰條斜路，細細間但係都坐到幾多人🙈嚟到一定要必試佢哋個慢煮秘製雞叉燒拉麵！我哋驚辣，所以叫咗雞叉燒雞白湯拉麵+海苔($90+$12)，再試埋佢哋嘅石鍋鰻魚飯($88)同沙拉唐揚炸雞(5件)($38)，睇吓飯同麵係咪一樣咁得😏雞叉燒雞白湯拉麵個湯底真係超濃郁，夠熱，成碗拉麵都好清爽，唔會太鹹膩口！麵嘅軟硬度我哋揀咗適中，啱啱好唔會太硬好難吞或者煮到溶溶爛爛咁🍜主角兩嚿雞叉燒係勁大件，一嚿都要分幾啖先食完😂要將雞腿肉去骨，卷起定型，煎完再慢煮，真係好巧功夫💯霸嗎係一定做到101分🤣奶白色嘅雞湯底配埋出色嘅麵條同雞叉燒卷，食一啖就好似食咗成隻雞嘅營養落肚咁🤤你以為佢哋淨係做拉麵出色？NO！佢哋嘅石鍋鰻魚飯都好好食！飯係炒飯底，加埋少少黐住喺鍋邊嘅飯焦，無嘢好挑剔😅鰻魚燒得剛剛好，唔會太黑太燶，無大條魚刺食落口好滑！👍🏻如果肚餓又想食飯嘅朋友就多一個選擇可以try try👌🏻沙拉唐揚炸雞估唔到咁大粒🍗比喺出面，呢到5件都係巨大size，但係唔會炸過頭，鎖住咗啲肉汁之餘仲保持到豐富彈牙嘅口感🤤配埋沙律醬一齊食好好味💓最後叫咗支綠茶可樂($25)+一杯白米雪糕($35)😯從來都未試過，但係一試就入坑😂兩樣都特別！尤其係個白米雪糕，食落去非常清淡，綿密嘅雲尼拿味，入面仲有一粒粒日本白米嘅質感，意外地夾🤩…查看更多

又到一個星期一次嘅韓國dinner🇰🇷今次揀咗間喺尖沙咀最旺，諾士佛台上邊一間超級受後生仔歡迎嘅韓國包車蒲吓先🤣一上到去已經比出邊嘅裝飾同埋霓虹燈吸引😧佢哋連餐廳出面等位嘅走廊都做咗好多唔同韓國街頭嘅特色裝飾，俾大家打卡影相，等位嘅時候就唔會悶😍🤙🏻未入去已經聽到餐廳入邊好興奮同埋好熱鬧嘅聲音，大家都好似寓食於娛樂🤣非常適合一大班人嚟gathering👍🏻今次叫咗佢哋排行榜上面最受歡迎嘅幾款招牌，分別係蕃茄韓式辣海鮮湯配中華麵($198)🍜，大發！芝士鐵板泡菜炒五花肉($158)🥓，開心share拼盤(small) ($88)🍟，辣炒小章魚($128)🐙同埋一杯必點嘅菠蘿梳打($42)🍍本身都驚我哋得兩個人會唔會叫多咗😅但係嚟到之後每一款都好開胃，所以基本上食下食下已經食完，甚至覺得要再encore😂蕃茄韓式辣海鮮湯配中華麵係連埋一個爐上枱可以keep住一直煲🍲個湯底非常濃郁，辣辣哋但係又有好多粒小蕃茄喺入面一齊滾，所以辣得嚟又飲到海鮮同埋蕃茄嘅鮮味😯啲海鮮唔止有小章魚仲有青口、蜆仔、大蝦，配埋中華麵一齊食好滿足又暖胃，係一款好好嘅下酒菜，唔錯唔錯👏🏻芝士鐵板泡菜炒五花肉同辣炒小章魚果然係嚟到必點😋因為你基本上係食完一碟已經即刻想再叫😂其實佢哋本身都已經有唔少五花肉同小章魚，但係泡菜嘅辣味連埋新鮮嘅食材一齊炒，又係另外兩款好開胃嘅菜😎鐵板加熱嘅時候，芝士同肥瘦參半嘅五花肉完美融合，散發住誘人嘅香味🤤再加上泡菜嘅調味， 令整道菜品味更加豐富💯而小章魚聽個名應該係細細粒，但現實每隻都係好完整有頭連身8隻腳，食落其實都幾大隻😈叫多幾碟都唔過份🤭不過估唔到拼盤反而係最有驚喜嘅😵本身無咩期待，諗住都係叫嚟填飽個肚🤡但係薯條、炸魷魚圈、餃子、芝士條同埋炸紫菜粉絲卷都好正好脆😝特別係個炸紫菜粉絲卷完全可以淨叫一碟食極唔會厭😂外面好脆但係入邊嘅粉絲又軟淋淋咁，好有反差口感👍🏻最後食到個口五味雜陳😂所以叫咗杯菠蘿梳打清一清個口😙真係每次食韓國嘢都一定要叫一杯，完美ending！🥺…查看更多