shae082099's Profile

今日晚黑book左8:30去食，野食正常冇咩特別，偏貴，跟住！明明11點閂門，但9:15我地食完甜品傾緊計，個waiter走黎催我地埋單，仲要係直接打斷我地嘅conversation，撓曬頭，前面果d人嘅comment講咩浪漫啊，似茶餐廳wor。跟住我地卑完錢，個waiter就消失左去後廚，跟住就聞到勁濃嘅煙味，呼吸唔到，隔離個懷疑老闆嘅人喺度外放聲睇影片，真係完全冇理過我同我男朋友咩感受，600蚊食茶餐廳，最後d煙味太濃，計都冇傾幾句就走左。同浪漫氣氛、約會聖地0關係。唔推薦。啱啱走，太嬲，所以打呢篇負評。…Read More

調景嶺分店買嘅，諗住佢d古早蛋糕幾好食就試下，點知係大伏⋯⋯芋泥太甜，麻糬更甜，甜到漏。芋蓉食落似加左好多糖霜嘅豆沙，冇芋頭嘅口感同味道。好失望，個蛋糕68蚊細細盒，都幾貴下，而買佢係因為有芋泥麻糬，但如果呢兩樣嘢都唔好食就冇必要買。食到最後甜到我要將d芋泥麻糬撥開，淨食蛋糕。🙃如果鍾意芋頭嘅朋友，可以買佢嘅金沙芋泥古早蛋糕，好味過呢個好多。雖然芋泥都唔係話好多，但起碼冇咁甜漏，仲有鹹蛋黃中和返甜味。…Read More

湯易入口，清甜。米線，幼細煙韌。但！但！但！沙姜雞真係好鬼鹹，鹹到我不斷捫心自問點解要揀沙姜雞！點解要揀呢間餐廳！啊啊啊啊啊啊啊啊！😭有comment話沙姜雞非常多沙姜，冇錯，佢將d雞浸左落d沙姜醬度，如果d沙姜好食就應該好好食，但d沙姜好似落左成桶鹽落去咁，食完我塊面即刻浮腫，真係超級無敵鹹。我有諗過同佢講，不過算啦，快快食完算啦，當快餐。炸雞翼都好多人話好食，但應該冇醃過，食到入面冇味，雞味都冇，得層炸皮有味。雲吞係大粒，但味道都係想像到嘅味道，肉加蝦，冇咩特別，唔洗特登試，但想要大件夾飽可以叫黎試下，不過裡面有少少骨碎，食嘅時候慢慢食，唔好咬到牙崩。服務因為我早黎所以正常，但後來見佢開始多人都係一張細檯中間放隔板分兩個人坐，d隨身物品要擺喺自己坐嘅位，比較逼擠。後來走嘅時候見到佢其實有多間店，入面都未坐滿，照叫人搭檯。想食嘅考慮下再黎啦，尤其如果需要排隊就冇咩必要。🙂…Read More

d阿姐態度極差，叫極都冇人黎寫單。唔理你想唔想搭檯，叫你同陌生人坐埋一齊面對面食飯🙂，叫佢攞塊隔板，一臉唔情願，好大力放個隔板落黎，得返勁少檯食飯，個人走左，我攞開塊隔板諗住多少少位食。個阿姐串我（原話）：「宜家又唔要塊隔板啦？」我話：「個人走左啦ma。」之後阿姐大嗌：「咁我仲有其他人（同你面對面食飯）啊ma！」我嬲到即刻走左，其實紅茶又唔係話特別平，你話38蚊一個餐我就算啦，一個餐你都賣68，d餐具又有污跡，野食又只係普通。仲要一張細檯劏開一半兩個人用，隔板都唔卑，對面個陌生人噴口水又避唔到，撩完牙d殘渣又睇到。飲食做到咁折墮，對d客好似對豬咁，都係第一次見，連街邊d茶餐廳都知道要擺隔板或者錯開坐。祝呢間🐷店早日倒閉❌大家要好好對待自己，唔好食豬食啊啊啊啊啊！…Read More