caketionary's Profile

蛋糕編號：0217@sweetfashionhouse #caketionary_sweetfashionhouse———————————————————————— 可能適合對象：#西柚蛋糕 #粉紅葡萄柚蛋糕🍴：餐刀 ✖️/ 蠟燭 ✔️/ 冰包 ✖️/ 紙盒 ✔️ 🏷：✔️（免費加生日牌） 💬：近日好開心有機會試到兩間高檔次嘅蛋糕，上一次個間就係連卡佛之內，而今次就係中環 Landmark，好高尚呀Caketionary突然間。🛒 ： 中環站 #cakeup_荃灣線 #cakeup_港島線 #cakeup_中環站 🔘：個裝 12cm，14cm， 16cm， 18cm （前一日3點前預訂） 💰：12cm $230，14cm $330， 16cm $430， 18cm $530 （圖為 12cm）———————————————————————— 今日同大家介紹一下𠵱個幾有名氣嘅蛋糕，繼之前佢係尖沙咀 #ICC 同埋係 @leegardenshk 利園開過後，今次佢座落咗係中環 @landmarkhk ，曾經喺三個極具知名亦高檔次嘅地方賣蛋糕，唔知大家對佢又會唔會立即有一個極高嘅期望？又或者會唔會覺得無500蚊都唔落得樓呢？等我嚟娓娓道來。今次要介紹嘅餅店係叫 Sweet Fashion House，講真，一開初，連Caketinary都噏唔出餅店個名，就係一味講佢好矚目嘅一樣嘢，就係佢個裝修。佢每次間舖頭都一定會有一朵牛咁大朵嘅白花係舖頭嘅當眼位置，全靠佢，當我哋一講起，就記得係 Lee Garden 有見過呀；殊不知，原來已經係早前 「休息」 咗啦。原來宜家轉戰咗去中環嘅 Landmark，其實呢個位置都不錯，直頭係地鐵站上面咁，方便。至於個蛋糕，今次試到嘅口味都叫有啲啲特別，係我哋未試過嘅味道，西柚味蛋糕。據網站內顯示，並用到Google Translater 去釋，佢係一個 “粉紅葡萄柚肯定會成為粉絲的最愛！這是蜂蜜瑪德琳和柚慕斯蛋糕，配以芒果和木瓜醬。” 釋返做一個大家都會明嘅 version，應該意思係 「佢係一個西柚味蛋糕，有層幾厚嘅西柚Mousses 包住個以蜂蜜做嘅madeleine作為蛋糕層，而當中仲有芒果同木瓜醬。」 好！先講講好唔好味先，係有點中庸嘅。但係點解今次 Caketionary 要咁樣去搵資料呢，因為食完後，層次味道講唔上好清晰易認（講過㗎啦，我又唔係金舌頭，真係素人一條，我手寫我口咁解）。我就真係只食到甜甜酸酸，食完一啖，成個頭都係問號（但我有講過 「都OK」），個腦同條脷嘗試聯手合作之時，情況有啲複雜，成件事好混亂，就係食到酸酸地，又有甜甜地，偶然有啲澀味，有咬口食到果肉，食到有芒果味＆西柚味。而面頭個一片嘢，亦有成員講到話似罐頭蜜桃。我都食到好混亂，但係幾Surprise嘅係佢用到madeleine，蜂蜜唔可以話好食到，但係絕對一個濕潤度高嘅糕體。Mousses 亦都做得叫滑，輕。而外圍就用到朱古力片包住。整體，食完個蛋糕後，「留印度」 唔算好高，亦算不上食完會好讚嘆。但個蛋糕食落開頭都覺得幾清新，Fresh Fresh 地。但由於內裡算多果肉，惟一係個甜味有點兒 「人工化」，甜度瞬間飆升後，食完整件蛋糕後，令到原本覺得個蛋糕都唔差，變為有少少覺得 「哇，都有D甜」，想飲啖水清清。外圍係唔錯嘅，而若然內裡果肉個一部分冇咁甜，就更好啦。總結，若然你係一個（或者要買俾一個）幾睇名氣，要有牌子，唔太在乎個味道，要打卡話俾人知個蛋糕係有牌子嘅人，呢個蛋糕係個幾好選擇！個蛋糕有牌子，座落極高檔次嘅商場之內，12cm個個蛋糕，都可以分到俾6個人食。買嚟意思意思，影影相，都係個唔錯選擇（大嫂，$230咋）。仲有呀，一日之前都仲可以預訂，啱晒一啲大頭蝦去買啦。重申，佢唔難食㗎，叫合格之作囉（都係個句，＄230咋！好過去買啲地鐵站連鎖個啲啦）。＊＊今次個蛋糕寫成咁，唔知會唔會又要花時間覆comment啦 ＊＊———————————————————————— #cake #birthday #蛋糕 #生日 #生日蛋糕 #birthdaycake #hongkong #hkig #香港 #香港限定 #hkbakery #caketionary #caketionaryhongkong #呃like #相機食先 #香港必食 #朋友 #友情 #生日飯局 #中環美食 #中環蛋糕 #蛋糕關注組 #mousses蛋糕…Read More

蛋糕編號：0214————————————————————————可能適合對象：#芝士蛋糕🍴：餐刀 ❓/ 蠟燭 ❓ / 冰包 ❓ / 膠盒 ❓🏷：❓（堂食一件）💬：同到另一 Vegan “KOL” 一齊去試，店主好好，將到不可行變可行。Unicon 咖啡都做成 Vegan版，好好！🛒：西營盤 🔘：件裝💰：原味 $45；Matcha味 $48————————————————————————不得不承認，今次食𠵱件蛋糕，開初係醉翁之意不在蛋糕嘅，係因為留意到有一杯暴級 Signature 嘅雪糕筒咖啡係市面上廣傳 (其實杯飲品係叫Unicorn，而係凍飲上加一球迷你Gelato），咁為求跟得上個潮流，又行開去西營盤個頭，就去試吓，點知原來佢哋係有芝士蛋糕，咁又試吓啦。第一口食，好味！食落，好似食緊#tiramisu 咁，口感好棉，芝士味好夠，再食第二啖，再食第三啖，經已好漏（真係好快已經感覺好漏）。我嘅感受係佢係芝士蛋糕當中，好有才華嘅芝士蛋糕（即係似一個人，佢內裡好有智慧，好有內涵咁款），芝士味好足。而研究過吓，原來𠵱件蛋糕係佢哋自家烘焙出嚟，做到介乎係美式芝士同日式輕芝士蛋糕之間的口感。儘管一件都好，我覺得2－3個人食一件都可以，剛剛好就係最好，印象就Perfect啦。而杯Unicon如何呢？$62杯，個Gelato我揀咗開心果味，hahaha，幾甜。而杯咖啡就OK啦。叫做留個紀念，懶係個捉住個潮流咁囉，打卡完成。（正正自我感覺良好一刻，以為自己摱車邊上到潮流尾班車。睇返個實情，人哋2018年5月就經已開業，而Unicon 仲要係2018年9月開始賣緊。架車走到冇晒影，我哋先發現，___。）————————————————————————…Read More

蛋糕編號：0211@onetenth.coffee #caketionary_oneteethcoffee————————————————————————可能適合對象：#鐵觀音蛋糕🍴：餐具 ❓/ 蠟燭 ❓/ 冰包 ❓/ 膠盒 ❓ （唔知）🏷：❓（唔知）💬：當問完可摸以影成個蛋糕後，得到堅決被拒後，都太尷尬啦，乜都唔敢再問啦🛒：荔枝角 #cakeup_荔枝角站 🔘：件裝；個裝💰：件裝 （好似＄55）；個裝❓（價錢唔是太記得）————————————————————————近嚟好多工廠Cafe，小型Cafe湧出，各個都好有自己Style（暫時最鍾意都係 @lifeisaquestionmark ，真係好舒服；有埋餐蛋麵食仲正）。係IG隨意search吓，都可以搵到起碼10間，而今次Caketionary就搵到嘅依一間位於荔枝角某一工廠大廈內開嘅Cafe，主要有咖啡、茶、Scone同蛋糕供應。今次就試到佢嘅鐵觀音蛋糕（其他「吳尊」，就唔多comment啦）。單刀直入，蛋糕質感軟身，Cream食落微油身，Cream分量足夠，有微微茶澀味，食落仲有丁丁茶葉碎。而主要甜味可以話係嚟自個蛋糕糕身，而支持住個Cream嘅就係茶味同奶味。算唔算好好味呢？普通，茶味不算濃。未到會話想回頭再食，又未到叫咗唔想食。（但個芝士scone吸引啲，辣辣地，又有芝士香）個人覺得，依度可以話係食「打卡」，因為大家都好易影到一張靚相，但係分析吓，如果你想食蛋糕，未必係佢，正如上述所講，唔算食過會返轉頭再嚟食。如果你想搵個朋友陪你席地而坐咁傾計，查實依度都唔算講得係好適合（因為太靜，講得大聲又怕影響到人；同埋好似講完人人都聽到咁）；而座位安排上，係日式咁坐地下，咁頂唔頂得耐就睇人；但如果有人係外面排隊，佢亦都會計你入座時間，咁在商言商，都唔好阻佢做生意。今次叫見識過，一次就夠啦。P.S. 其實依家Cafe都有原個蛋糕賣，影相佬見到有個原個蛋糕，都立即去問可摸以成個影，不過得到回覆表示：「 唔得！因為係人哋嘅蛋糕，有寫名，人哋俾咗錢，唔可以俾你影。」 均真，亦都好有衛生意識，所以，未能成功爭取影到張相，不能俾大家睇到佢哋原個蛋糕樣啦。而因為被拒時，都實在太尷尬啦，「冷面貼向熱屁股」 嘅情況下，乜都冇問啦，收工。呀‼️仲有，入去要除鞋㗎！唔好著穿窿襪，同埋臭腳人士要注意，以免尷～————————————————————————#cake #birthday #蛋糕 #生日 #生日蛋糕 #birthdaycake #hongkong #hkig #香港 #香港限定 #hkbakery #caketionary #caketionaryhongkong #呃like #相機食先 #香港必食 #朋友 #友情 #生日飯局 #疫情下的生活 …Read More

蛋糕編號：0210@mr.w.bakery #caketionary_mrwbakery————————————————————————可能適合對象：#雞蛋糕 #無花果蛋糕 #棗蓉蛋糕 🍴：餐具 ✖️/ 蠟燭 ✖️ / 冰包 ✖️ / 紙盒 ✔️🏷：✖️（無跟生日牌；可以跟Caketionary訂）💬：家庭性經營，好有愛！🛒：天后 #cakeup_天后🔘：條裝💰：原味 $60；其他兩款＄75————————————————————————正當有一日去開天后影蛋糕之時，一出天后站，聞到好香好香嘅蛋糕味。四圍一望，相信味道就應該係嚟自依一間新開唔夠3個月嘅蛋糕店。第一下望，相信唔只我，10個有9個都會以為佢又係古早味蛋糕店。點知，一問之下，原來佢係港式蛋糕店，而唔係台灣古早蛋糕店。咁查實今次介紹嘅依間港式蛋糕店當中嘅特色係乜呢？佢哋講到，在制作蛋糕之時，佢哋會用少啲糖，同埋蛋糕都選用健康食材，包括鮮奶，無花果，紅棗（而無花果同紅棗本身有甜味，所以糖又可以再放少啲）。但係蛋糕既做法係佢哋自己鑽研出嚟，香港獨創，就唔方便透露。而我想講3款蛋糕都好味喎，好軟熟，甜味亦控制得好好。原味鮮奶雞蛋糕好軟熟，濕潤度高；不論食同聞起上嚟，都好香，好有小學媽媽買嘅紙包蛋糕攞返學校食咁。而棗蓉（其實即係紅棗味）個款嘅甜味令到個蛋糕更好味，食落好似潤一潤咁；至於無花果個款入面就真係有無花果肉，仲有無花果籽食到。兩款有餡料嘅，如果能夠再多啲餡就更好啦（因為咁大條蛋糕入面，未必每一片都會食到餡料）～ 但係真係幾好味嘅，佢比古早味個款更moist，絕對無鞋口感！當日係真係聞到味先，繼而食完之後，我係有唸法下次行過可以再買嚟放係屋企早餐切片嚟送咖啡食嘅，因為佢又唔油，亦都真係好軟熟，好香。以親身認証，因為個晚攞到返屋企試完一片又食唔晒，就放入密實盒，以室溫放到第二朝。再食，都仲係好軟熟，好濕潤，味道仲係好香，Keep得到。所以，係可以一試嘅。排位的話，我哋會排棗蓉，原味，再到無花果。但當然啦，想食新鮮出爐蛋糕有咩方法呢？佢哋每日出爐時間都唔同，不過佢哋有 whatsapp 同電話預訂服務，咁就可以預留最新出爐嘅蛋糕俾客人。順帶一提，宜家佢哋都做緊宣傳，由即日起，買任何蛋糕滿＄60，就有印花一個，只要集齊5個，就可以用半價買第6個蛋糕。或者有8個印花，就直程送一個蛋糕。最後，如果真係港式蛋糕，如果佢可以出埋港式味道就正啦，例如港式奶式味？燉蛋味？仲有啲咩港式味呢？————————————————————————#cake #birthday #蛋糕 #生日 #生日蛋糕 #birthdaycake #hongkong #hkig #香港 #香港限定 #hkbakery #caketionary #caketionaryhongkong #呃like #相機食先 #香港必食 #朋友 #友情 #生日飯局 #疫情下的生活 #必試美食 #高品質 #原味蛋糕 #港式蛋糕 …Read More

蛋糕編號：0201————————————————————————可能適合對象：#下午茶 #榴槤下午茶 🍴：餐具 ✖️/ 蠟燭 ✔️/ 冰包 ✔️/ 紙盒 ✔️🏷：✔️（免費寫生日牌，祝福語可以係網上訂時，係備註度寫埋）💬：係酒店買嘢就係有好好嘅保障，點解就睇下文啦。🛒 ：尖沙咀 #cakeup_尖沙咀站 🔘：套裝（2日前網上預訂，每日200份）💰： $438（唔洗+10%)————————————————————————天荒地老榴槤在唯港薈 (Hotel ICON)，依個 「飄香榴槤下午茶」 外賣套餐係大大小小嘅飲食平台都有提及到，係咁大力嘅宣傳情況下，我相信鍾意食榴槤嘅人應該一早就已經知，或者俾人Tag過。而唔鍾意食榴槤嘅人都唔多唔少聽聞過。同時間，唔知點解叫酒店Set Tea返屋企食好似變成咗潮流咁；在疫情間，好似必要一試以留紀念咁，今次就襯Caketionary之母生日，試試佢。的確係，係疫情期間，生活變得不一樣，你又點會唸到一個星期會叫5次 @網上外賣平台_hongkong , @ubereats ；又點會Call IG 店叫人送海鮮上屋企，係屋企個大廳度食鐵板燒肉同鹽板上燒牛肉。今次都真係第1次叫到成個酒店Tea Set連埋個座咁係屋企慢慢食，好特別嘅體驗。先講吓個Tea Set先啦。睇相都見，一個Set當中，每款都有兩件。榴槤Set當中當然一定包括以榴槤所造嘅九款甜品，各有各特色。佢地包括有：抹茶荔枝D24榴槤卷，D197榴槤芝士泡芙，金榜榴槤芝士蛋糕，榴槤班蘭千層蛋糕，Forbidden D24 榴槤蛋卷，D24 榴槤椰子糯米糍，貓山王榴槤布甸，馬來西亞直送貓山王榴槤果肉， 同可以即場攞走嘅榴槤單球雪糕或者唔想食住都可以以禮券代替，之後返去換。除此之外，仲有兩款冇榴槤成分嘅烏龍茶啫喱同英式傳統鬆餅。老實講，件件甜品都充斥住好濃，好香嘅榴槤味。非常難咁逐件逐件講，因為情況只係唔同口感，但味道幾乎一模一樣。即係好似徐睿知係 「雖然是精神病但沒關係 」 入面咁，同一個人，但係著唔同衫，件件靚，但佢就用唔同形式出場，配埋個人都係靚咁解。咁相比下，當然有一兩件係無咁突出，但係都好味。係九款入面，我講講邊款最有印象啦。其實最有印象一定係原粒榴槤，真係好香，好滑，果肉棉中帶有咬口，真係好好味。而唔太 「啦間」 嘅烏龍茶啫喱同英式傳統鬆餅，我係有少少覺得佢係度做咩？明明生日Party都冇請佢，佢嚟做咩嘅感覺，可有可冇。反而，我覺得Tea Set點解冇Tea嘅。所以如果個Tea Set係包埋杯嘢飲，我會覺得好似更好。同埋，係上面都有mentioned, 係酒店食嘢，或者好似今次咁訂外賣，真係有保障。點解咁講呢，事原攞個Tea Set返屋企時，可能坐車時唔小心，個生日牌同一件芝士蛋糕爛咗落下層。咁不竟都係用嚟慶祝生日，唔完美咁送俾人，真係唔係太好。一心打返去問下可唔可以加錢配返，佢地竟然聽到情況後都肯送返俾我。多謝你哋。但當然啦，請大家誠實，唔好因為人哋肯，就去呃人呀。同情好，同理心，真係會因為經歷而唔再有，要好好 「保育」。最後啦，如果真係想試嘅人，可以點做呢？因為期間限定㗎。個 $438蚊Tea Set只限外賣，會做到今個月尾 8月31。所以你可以上到佢哋個網當中，兩日前預留，因為每日只有200份。成功後，你就會收到一個QR Code，到時去到油酒店門口攞。攞嘅時候，佢哋會跟埋個雪袋俾你，咁就可以保凍咁攞返屋企。(不過都要提一提，由於原粒榴槤水份較重，返到屋企時，張底紙係會滲到爛，所以都suggest盡快食）。之但係如果，你都真係想足不出戶，其實都仲可以叫酒店幫你送去屋企，但係就要加 $400，佢哋就會叫架 Tesla 送到你度。又或者你可以Call 車，佢哋都可以送俾個外賣人員。此外，若然你又唔怕堂食，其實都仲可以，不過價錢就唔同，會係＄678� + 10%，會多埋咸點同無限添食榴槤雪糕，都係最好打去預訂。————————————————————————…Read More

蛋糕編號：0199@twinklebaker #caketionary_twinklebaker————————————————————————可能適合對象：#菠蘿椰子慕絲斑蘭蛋糕 #蛋黃哥 🍴：餐具 ✔️/ 蠟燭 ✔️/ 冰包 ✖️/ 紙盒 ✔️🏷：✔️（原個蛋糕會跟一個朱古力生日牌，最多10個中文字、12個中文字及英文字母混合 或 20個英文字母）💬：Twinkle同Sanrio合作嘅蛋黃哥蛋糕，黃蛋哥Fans注意啦！🛒：全港 #cakeup_全港🔘：個裝 4“ （係網上，三日前預訂）💰： $348————————————————————————Caketionary終於介紹Twinkle依間餅店嘅蛋糕啦，一直俾人問究竟佢哋啲蛋糕係點，今次終於一試，仲要係試到佢哋最新出品，由 Twinkle同Sanrio合作嘅蛋黃哥蛋糕。首先係疫情期間，小編都有啲似黃蛋哥，宜家真係差不多每日都 「蛋黃哥」 咁款，大部分時間都冇得出街，一直都灘，企或坐係個蛋白度（即係屋企啦）。唉，都真係唔知依種生活要維持幾耐；不過，唯一同佢唔同嘅就係佢可以被 “包“，仲要係被菠蘿包，我就真係冇依個本事啦。今次嘅蛋糕，以菠蘿包造形嘅蛋糕夾住實心朱古力造成嘅蛋黃哥（就係因為依位阿哥以實心朱古力制造，所以造形上絕無土炮山寨感，而且阿哥仲好硬淨吓添，未必食到，但你絕對可以捉佢出嚟同你影張相。）。而驟眼所見，成個菠蘿包像真度極高，而菠蘿包塊菠蘿皮（絕對唔可以打少幾隻字，有啲小學雞會笑）係脆嘅，係甜嘅，佢係真係平時我地食開菠蘿包個隻菠蘿皮。而隨下兩層包就係以菠蘿椰子慕絲包住斑蘭味海綿蛋糕去做成。食緊時，食到有菠蘿味嘅，偶有仲會食到吓少少咸味嘅朱古力脆脆珠！而蛋黃哥瞓住塊蛋白下個片仿牛油，係菠蘿味吉士；而見到綠色嘅部分就係斑蘭味海綿蛋糕。當咁多層不同嘅食材同個口講 「我要進來了」 嘅時候，菠蘿味成為主角。重點來了，咁依個蛋糕會較為適合咩人去買呢？就梗係鍾意黃蛋哥嘅人啦。今次你都走唔甩雞要買啦，影張相攞個紀念都要啦。除此之外，其實同系列仲有蛋黃哥蛋撻仔，據知係一個以菠蘿椰子慕絲模仿蛋撻曲奇酥皮，內裡都係斑蘭味海綿蛋糕同海鹽焦糖脆珠，面頭亦都有蛋黃哥，唯一不同嘅就相信係多咗塊白朱古力係面。疫情就真係未知幾時可以完，飯亦係繼續6點後冇得出街食，乜都冇得做時，但記住要繼續有一個好嘅心理質素去面對。大家 「蛋一蛋」 啦，希望好快就可以破蛋而出，過返一個正常嘅生活啦。————————————————————————#cake #birthday #蛋糕 #生日 #生日蛋糕 #birthdaycake #hongkong #hkig #香港 #香港限定 #hkbakery #caketionary #caketionaryhongkong #呃like #相機食先 #香港必食 #朋友 #生日飯局 #疫情下的生活 #卡通蛋糕 #期間限定 #菠蘿包蛋糕 #菠蘿油 #香港茶餐廳 #造型蛋糕 #雖然是食造型但沒關係…Read More

蛋糕編號：0195可能適合對象：#綠茶紅豆純素蛋糕 #純素蛋糕🍴：餐具 ✖️/ 蠟燭 ✔️/ 冰包 ✖️/ 紙盒 ✔️🏷：✖️（暫時未有寫名服務，但有生日牌送）💬：好開心佢哋一聽到話我哋係介紹蛋糕就已經聯想到係Caketionary啦，好振奮人心！🛒： 尖沙咀 #cakeup_ 尖沙咀站🔘：件裝/ 個裝6”（可切成6件）及 8.5” （可切成8件）（3-7日前預訂）💰：$45/ $380/ $450————————————————————————其實宜家，每每需要同人去食飯，為求大家福祉，Caketionary都會盡量去一啲有蛋糕食嘅餐廳食飯，起碼都可以話發掘到多啲有蛋糕食嘅地方俾大家知，又可以俾我出到post。早前聯同 “素”人 （真係素人，因為係專介紹素食嘅人） 一齊去食飯，當然就梗係要去一間純素餐廳食飯。依間餐廳唔錯，以我一個 Meat lover嚟講，我都幾OK依間餐廳，塊素肉幾好味（哈哈，始終都係講塊肉）。食物詳情，係度唔多講啦，想知，就去某社交平台度睇啦。但係Caketionary就當然主力講講佢個純素蛋糕。今次食到嘅依個蛋糕係一個綠茶紅豆蓉純素蛋糕。綠茶味道廿分濃郁，絕對唔甜。如果你係綠茶控，個種濃味，仲要濃而帶有茶澀味，食完你會「呀～」晒（即係好滿足嘅expression）。佢個種味道係一開始食落去，口水化緊個啖蛋糕時，已經滲出好勁嘅綠茶味。當你再咬咬咬同未吞的一刻，卡住中間個位時，個種茶澀味就會越“妹“越勁。口腔回甘，依個表現絕對是種生理回應。而個質地，可以話分為三種感受：“脆“，“粉“，“濕”！“脆“嘅來源係嚟自個蛋糕面同蛋糕邊。相信係焗出嚟而造成嘅效果，個種脆身就好似食muffin時個面個款，食落咬落有啲脆口，微硬身。至於，“粉“，查實係個蛋糕本身由於唔係全方位，多角度都high到啲cream，而冇掂到cream個啲部分食落就未能夠好似傳統蛋糕咁有粘性，會變得較為乾乾粉粉。至於 “濕“ 個一Part，亦係我最鍾意個一part，係做得幾好。因為佢個cream令到原本乾身個一part嘅蛋糕同茶澀味味道得以中和。仲有分量適中嘅紅豆粒粒，中間個部分唔錯，所以若然可以將中間個一part，放到有咁大得咁大，佔據蛋糕比例大啲，整體會更唔錯。至於蛋糕口味上除咗今次介紹嘅綠茶，其實佢仲有榴槤，檸檬，香蕉或者無花果揀。啱嘅話，就記得預3-7日前預訂啦。 ————————————————————————…Read More

irina————————————————————————蛋糕：#卷蛋蛋糕甜度（5星最甜）：⭐️⭐️濃度（5星最濃）：⭐️⭐️⭐️🍴：餐具 ✖️/ 蠟燭 ✔️/ 冰袋 ✖️/ 紙袋✔️🏷：✔️（免費，仲可以即時整）💬：日本餅店，感覺差極有個譜。個日去到，由於第一次訂，唔太熟行情，店員都好用心咁介紹。🛒：#cakeup_太古城站 #cakeup_尖沙咀站 #cakeup_銅鑼灣站🔘：個裝 (3層12件；4層25件作選擇)💰：$388；$788————————————————————————性價比：中下唔知大家有冇被𠵱個蛋糕嘅相吸引咗入嚟睇Review，我第一次行過𠵱間蛋糕舖，就一定有。但遲遲都未買過嚟手食嘅原因就係因為價錢太貴！老實講，12件卷蛋，每件真係一啖就食晒，都收成$388，即係平均$32.2一啖，真係俾著你都會卻步啦，真係好細件。但買俾屋企人生日，唔緊要啦，就用𠵱個機會嚟試試佢！首先如果齊款，佢係有23款味俾你揀，特別啲嘅有白桃、甜豉油、冧酒、豆腐；正路嘅當然有白朱古力、綠茶、檸檬、咖啡、開心果、焦糖，粟子...而12件入面，當然我未能夠食晒，同時件嘢細成咁都好難話每件咬一啖嚟試試，而我就食咗布甸同Tiramisu。味道口感無話好難忘，咁當然又未話食唔出咩味啦，咁正正常常嘅卷蛋，唔難食，卷蛋唔鞋，Cream叫足夠，（已經寫到好盡，都唸唔到有咩仲可以寫嚟形容），所以總結四個字可以形容：平平無奇。但影相嚟講，Surprise！因為每款味道都唔同顏色，拼湊起上嚟，加埋蝴蝶結，影相幾靚。除此之外，分蛋糕真係好方便。碟？唔洗。刀？唔洗。餐具？唔洗。真係就咁隨手攞起一件，就食得，方便。不過，提提大家，揀完味，最好影影相，否則未必記得邊件打邊件。仲有，就係可以即時幫你砌蛋糕，即時寫名，啱晒大懵唔記得買蛋糕，或者臨時臨急食生日飯嘅朋友！𠵱個蛋糕個樣同氣質都幾上到大檯㗎... 至於性價比....講真，我都仲係覺得幾貴。而係坊間我係知有間餅店係有做同款嘅...有機會食完，再Compare吓啦。————————————————————————…Read More

@thecakeryhk ————————————————————————蛋糕：#Flamingo蛋糕甜度（5星最甜）：⭐️⭐️⭐️濃度（5星最濃）：⭐️⭐️🍴：餐具 ✖️ / 蠟燭 ✔️ / 冰袋 ✖️/ 紙袋✔️🏷：✔️（免費，3日前預訂）💬：好好！IG反應對答都好快手，差唔多即問即答。店員亦都好helpful，不愧係「上流社會嘅餅店」，除咗 @sevva，我唸佢會係另一選擇！🛒：#中環 #IFC #置地廣場 #銅鑼灣 #cakeup_中環站 #cakeup_銅鑼灣站🔘：個裝 4”💰：$688————————————————————————性價比：中下買蛋糕其實真係一門學問，霎時間要搵一個適合嘅蛋糕絕對唔易。有人會More concern on 味道品質，有人會貪圖地理位置方便快手攞蛋糕，當然亦都有人係喜好睇個蛋糕嘅搶眼度，或者睇吓係唔係出名餅店！要有返咁上下嘅留認度，先可以揀到啱心水嘅蛋糕。今次相信𠵱個蛋糕，搶眼度同「社會地位」上都有啲分量，而佢係一隻我見過最擺得上大檯，可以上大雅之堂嘅Flamingo蛋糕！本身蛋糕default 咗係一個4” 香檳味嘅 Gluten Free蛋糕。睇相你都會見到，最初佢會係用一個盒裝住個蛋糕，以無糖白朱古力去做嘅羽毛就經已固定咗係蛋糕旁邊。其實齋咁樣一個蛋糕，已經幾靚。隨蛋糕以外，會跟埋一盒裝住用 Ruby Chocolate 去做嘅Flamingo頭，到真係食時先，就可以嫲似插蠟燭咁，將個Flamingo頭插落個蛋糕度。賣相真係造得幾精緻嘅，粉紅色做主調，靚得嚟，擺上檯都甚有氣勢。由於今次Caketionary之母生日（所以作為Caketionary，點可以唔搵個好嘢呢），但之母又唔太鍾意酒味，所以我哋就特別為佢揀咗一個較為特別嘅味道 — 牛油果青檸味，特別呀。味道如何呢？先講蛋糕外面先，出奇地朱古力唔甜，而不竟佢係用Ruby朱嚟做，食落絕對食得出酸酸莓味。而蛋糕白色嘅部分就係Swiss buttercream 嘅一層(即係平時Cup Cake上面個督Cream)。佢𠵱隻奶油霜，雪凍咗嚟食，口感真係好似食緊菠蘿油塊油 (咁英文都有寫係butter..cream)，真係似咬落舊牛油咁㗎，亦都係幾油身，所以我亦建議大家要連埋個蛋糕去食，可以中和番吓個油膩感。至於蛋糕啦，個口感係較為紮實一啲，Moist嘅程度唔弱，但就似椰撻中間個層咁，實但又唔乾個種。但可惜嘅係牛油果味並唔突出，都可以話食唔出。之不過另一味道青檸呢，就非常明顯，佢係霸佔咗蛋糕嘅一小部分，因為零舍有一層青色嘅Cream係中間，就係青檸Cream。老實講，佢係真係幾靚嘅，但靚同味道去比較，靚就贏得明顯好多。所以若然以味道作評分，性價比方面，我哋只會俾得中下，因為我哋好多人都𠝹走咗層厚厚嘅Buttercream，蛋糕亦都冇話爭崩頭，食唔晒，仲你推我讓。但影相呃Like呢？就勁啦，因為自Post咗相係Personal Account，真係幾多人問嘅。其實佢仲有好多靚蛋糕㗎，特別有動作系列，所以我覺得我都仲會想試多一次，睇吓其他嘅又點。————————————————————————#cake #birthday #蛋糕 #生日 #生日蛋糕 #birthdaycake #hongkong #hkig #香港 #香港限定 #hkbakery #caketionary #caketionaryhongkong #呃like #相機食先 #必試 #高貴 #生活品味 #香港品牌 #高級蛋糕 #高質 #中環 #glutenfree #開心果蛋糕…Read More

@lifetastic.official ————————————————————————蛋糕：#西瓜蛋糕甜度（5星最甜）：⭐️⭐️⭐️⭐️（絕非人造糖個種甜味，係西瓜本身嘅清甜！！）濃度（5星最濃）：⭐️⭐️⭐️⭐️（士多啤梨同西瓜都好新鮮，個口好易認得出佢哋）🍴：餐具 ✔️ / 蠟燭 ✔️ / 冰袋 ✖️/ 紙袋✔️🏷：✔️（免費，1日前預訂）💬：好值得表揚，如果老闆你睇到，真係表揚吓你嘅同事。🛒：香港大學/ 尖沙咀/ 荃灣/ 銅鑼灣 #cakeup_尖沙咀站 #cakeup_香港大學站 #cakeup_荃灣站 #cakeup_銅鑼灣站🔘：有1人分量，或者 4/6/8/12/15/20/24嘅Portion選擇💰：$65; $340; $500; $610; $830; $940; $1180; $1380————————————————————————性價比：高如果有跟隨Caketionary嘅Follower，你哋應該會對𠵱個蛋糕有啲印象，我哋「江郎才盡」啦，我哋番食蛋糕呀.....點解呢？errrrrrrrrrr...errrrrrrrrr.. errrrr 因為我鍾意食囉！其實先唔講個蛋糕有咩唔同，單講單件價錢，已經由2018年4月時賣緊$58，距離宜家，差不多一年多後，就加價至$65啦。仲有咩唔同呢？就係佢多咗好多分店，由以前得西營盤有舖，就冇啦！但宜家多咗咁多間，除咗 #西營盤 總店，仲分別係 #尖沙咀 #The One，#荃灣 #順豐工業中心，#銅鑼灣 #名店坊，所以家下攞蛋糕真係方便咗好多！雖則有兩大不同，但蛋糕方面有冇退步呢？唔洗唸，即刻答，冇呀，仲係好好味！蛋糕仍然清新無比，食完後個口一啲都唔會覺得漏。蛋糕以士多啤梨，開心果粒粒同玫瑰花乾造面，但味道互相尊重，我不撇下你，你不撇下我咁。夾心間就繼續有忌廉同厚厚嘅清甜西瓜，忌廉同西瓜一齊食，真係Fresh得好緊要。西瓜好多汁，但又無影響到其他部分，又冇濕立立。最後就有用杏仁做嘅夾心層同餅底，同第一次嘅介紹一樣，整個蛋糕嘅材料層次同味道都非常分明，好清甜。食完Full Dinner又或者夏日炎炎正好就係食𠵱個蛋糕。口裡說甚麼都不重要，身體最誠實，我哋真係食到要刮碟，好味到要刮碟。你見到開完一間到一間，就知真係佢生意應該唔錯！講到𠵱到，覺得我收咗錢？我冇！但好嘢就要講，衰，我都會講。真係由訂到食，都搵唔到位話佢唔好。我特別有兩樣嘢想講。第1，啲員工好窩心。由於攞蛋糕個日知道銅鑼灣會有大型活動，佢哋都特別提我，仲問我會唔會揀第二間舖攞，以免攞唔到蛋糕，真係要讚讚。第2，你哋有冇留意佢哋個蛋糕盒呀？係正正個蛋糕個橫切面嚟㗎，好心思細密呀！我真係幾鍾意𠵱間舖同蛋糕，Signature 嘅西瓜蛋糕就試得多，下次試試佢其他款（因為佢仲有芒果，火龍果，雜果，蘋果，菠蘿，荔枝等等嘅款），睇下會唔會都係咁出色，加油呀， @lifetastic.official ！————————————————————————#cake #birthday #蛋糕 #生日 #生日蛋糕 #birthdaycake #hongkong #hkig #香港 #香港限定 #hkbakery #caketionary #caketionaryhongkong #呃like #相機食先 #生果蛋糕 #必食 #必試…Read More

sainthonorehk ————————————————————————蛋糕：榴槤蛋糕甜度（5星最甜）：⭐️⭐️濃度（5星最濃）：⭐️⭐️⭐️⭐️🍴：餐刀 ✔️/ 蠟燭 ✔️ / 冰袋 ✖️/ 紙盒✔️🏷：✔️（免費寫生日牌）💬：聖安娜啲店員真係好好，同其他品牌嘅店員真係與眾不同。在臨俾錢之時，店員提一提我「有冇Join會員呀？有現金劵可以用喎！」咁問一問，又慳咗$50，真係好好。🛒：全港 cakeup_全港🔘：個裝（半磅/ 1磅）💰：$178；$298（會員價 $169.1；$253.3）————————————————————————性價比：中又係榴槤季節啦，當然就要試下當造嘅榴槤蛋糕啦。係好早好早之前，Caketionary曾經介紹過一個$1500嘅榴槤蛋糕，相信係我哋食過最貴嘅蛋糕。印象中係麻麻，性價比係低嘅。証實到貴唔係一定好，咁平嘢又有冇好嘢呢？今次試嘅係聖安娜嘅D24榴槤蛋糕。外形上明顯絕對睇得出佢係一個榴槤，但老實講，相比$1500個個，係真係唔夠揮嘅，手工係冇做得咁仔細嘅。但味道又如何呢？先講講結構，外圍係以忌廉包埋榴槤肉同清蛋糕。忌廉較為多同油，一啖食落去，一泡Cream會係個First Taste，隔一陣，就會食到開始飄出榴槤味，再咬多兩嘢就會食到蛋糕。榴槤味唔香，但絕對食得出榴槤味，但真係唔夠香濃。而蛋糕當中仲有一層朱古力薄脆作為嘉賓，口感多少少層次。算唔算好好味？唔算！$298買個蛋糕，值唔值？過得去啦，真係好想食榴槤蛋糕，就買啦。但唔係的話，我會建議用$298去買另一啲蛋糕。不過真係想講一講聖安娜嘅心思，我記得我哋都講過，佢個盒係可以撕開佢嚟做紙碟！同埋今次佢哋擔心榴槤蛋糕會傳出一大股「臭味」，佢哋有一個類似太空館外形嘅罩嚟Cup住個蛋糕，咁運送途用，或是放入雪櫃都唔會傳出「異味」，都幾有心思。————————————————————————…Read More

蛋糕：#榛子忌廉蛋糕 甜度（5星最甜）：⭐️⭐️⭐️濃度（5星最濃）：⭐️⭐️⭐️🍴：餐刀 ✔️/ 蠟燭 ✔️ / 冰袋 ✖️/ 紙盒✔️🏷：✔️（免費寫生日牌）💬：不論店員或是經營IG嘅同事，各方面都有好足夠嘅Product Knowledge，細心，Helpful，老實！🛒：九龍城/ 中環/ 灣仔/ 銅鑼灣/ 鰂魚涌 #cakeup_銅鑼灣站 #cakeup_中環站 #cakeup_灣仔站 #cakeup_鰂魚涌站🔘：件裝/ 個裝（5”, 7”, 10”, 12”）💰：$43/ $480; $780; $1580; $2280.————————————————————————性價比：高近日感受好深，係風雨飄搖嘅日子，仲有心情慶祝生日，仲有心情開開心心講無聊嘢，係一種福氣！希望香港快啲開心返，好返，大家嘅生日願望不如一齊大愛一啲，將香港好返成為你哋嘅願望之一。而係𠵱個時間，我哋都唸緊，出個咩蛋糕Post俾大家睇，俾返一啲開心元素俾大家？我哋搵到𠵱個！蛋糕係嚟自Zoë（英文名係Zoë，中文音都係叫蘇兒），而𠵱款蛋糕已經屹立糕壇17年。除咗蛋糕上有個笑哈哈Macaron，帶有歡樂開心意思之外；查一查，原來𠵱個名係源自希臘語，意思指生命，仲帶有輕柔同溫和嘅感覺！無錯，我哋生命就理應要有喜樂同溫暖！𠵱個蛋糕除咗餅店名改得好之餘，個蛋糕真係好好食！先講粒Macaron，好脆，朱古力味好濃（單買$25粒)。而蛋糕主要係榛子Cream，榛子味唔算叫好濃，未去到金莎個種濃，不竟佢唔係用榛子醬去做，但食得到微微榛子味，同時絕對唔甜。其實佢唔係個樽噴出嚟個種Cream，係好綿身個種，類似Mousses個種。我哋了解過，典解可以做到咁綿，入口即融呢？原來因為蛋糕當中並冇加入魚膠粉去凝固個蛋糕，所以溫度成為非常重要嘅要素。當真係攞咗出嚟慶祝影相之時，記得咪放太耐，因為當你切時，會較為難分得整齊，絕對做唔到齊刀嘅效果。而蛋糕除Cream之外，其實佢仲夾住一海棉蛋糕，眼見比例上去睇，看似佔據咗好大部分，但食落唔太食得出，由此可見，蛋糕層好軟熟，食咗都唔覺。至於我覺得最畫龍點睛嘅一Part係佢外圍同個蛋糕底層，係朱古力Crunchy，好好味。食落似早餐朱古力麥片，搓厚佢，做個底！由於蛋糕面層係好軟綿綿嘅Cream，齋食會單調，所以有目的地以底部嘅朱古力麥片板做底，口感即時大增，仲要有重重嘅朱古力味，齋食會略甜，但加埋面層嘅Cream，中和得好完美。而旁邊嘅碎碎都令到口感多啲「玩意」，𠵱個蛋糕真係唔錯，不愧係Signature Cake，鎮店之寶。其實𠵱款蛋糕Zoë係造型方面仲可以再出變化多端嘅形狀，包括西餅款（可以做散水餅），圓形，花形，方形，心形，甚至兩層都可以！而佢最令我印象深刻係佢哋有一款係「萬壽字譜」嘅設計，靚，型，唔老土，難得！最後講件秘聞大家知，由於個蛋糕真係幾吸引，當我影完晒相，切蛋糕，分完，食埋！先發覺唔記得影個蛋糕橫切面做紀錄。所以，係後期我專登再去Zoë度買件西餅Size去影！不過我一啲都冇覺得唔值，因為真係好味，再食多次，我都OK！————————————————————————…Read More

\—————————————————————蛋糕：#椰子芒果蛋糕甜度（5星最甜）：⭐️⭐️濃度（5星最濃）：⭐️⭐️⭐️🍴：餐刀 ✔️/ 蠟燭 ✔️ / 冰袋 ✖️/ 紙盒✔️🏷：✔️（免費自訂生日牌）💬：尖沙咀站嘅店員都幾好喎，快手又Friendly。不過我覺得有少少嘢注意就係間舖係站入面，如果出咗閘，就在要呼叫班職員，麻煩少少。🛒：尖沙咀 #cakeup_尖沙咀站🔘：個裝（約4-5人份）💰：$149————————————————————————性價比：中上急單急單急單，突發生日飯局，真係訂唔切IG Shop嘅餅店。要腦筋急轉彎，係在云云連鎖餅店嘅選擇，要揀得Smart，當然就難唔到Caketionary啦。選擇當中包括 #聖安娜餅店 嘅 #榴連蛋糕，#美心餅店 嘅 #大富翁蛋糕，又或者 #東海堂 嘅 #波子汽水蛋糕。但發現以上選擇都出現一個問題就係Size太大，但係！我哋發現到有一個好好嘅選擇，就係𠵱自東海堂嘅𠵱款椰子流心芒果蛋糕，4人食，啱啱好，價錢只係$149！既唔會食唔晒，唔會嘥錢，唔會浪費，真係一個好好嘅選擇。蛋糕賣相可愛，似一個破開咗嘅椰子，外面舖滿朱古力椰絲，講真，我一向麻麻地椰絲，但佢數量唔算多，你見膠紙所貼住嘅部分已經係Cream，所以都容易接受。先解構吓佢個結構，佢最頂個層係一塊椰青水寒天（即係似啫喱嘅食材），視覺效果能夠讓人覺得係水面，都唔錯，味道足夠。而外圍，即係朱古力椰絲所依附住嘅，又即係白色部分，就係椰子Mousses。有食得出嘅椰子味，口感不堅挺，軟硬度合宜。夾心方面當然唔少得有海棉蛋糕同底部有一層脆口實在嘅白朱古力杏仁層，好味，我鍾意成個蛋糕有軟棉層之餘，仲有咬口嘅層次！最為驚喜嘅係有一層芒果汁嘅流心，流心外，仲有芒果粒。雖則椰子同芒果冇話互相輝映，但各有各精彩，做到和而不同，你不犯我，我不犯你嘅合作精神，都OK。而我真係好OK佢個Size同價錢，細細個，但賣相不求其，精美可愛，味道亦不俗，真係係一個好選擇！而同期仲有其餘兩款口味，包括菠蘿或柚子。但個人就覺得三款入面，椰子個個造型最吸引。————————————————————————…Read More

蛋糕：#芋泥卷蛋甜度（5星最甜）：⭐️⭐️濃度（5星最濃）：⭐️⭐️🍴：餐刀 ✖️/ 蠟燭 ✖️ / 冰袋 ✖️/ 紙盒✔️🏷：✖️💬：好好呀，由於我哋8點先去到，但係原來佢哋8點休息。遲咗少少，但佢哋都好好，仲叫我哋唔洗擔心。🛒：荔枝角 #cakeup_荔枝角站🔘：條裝（切到6-8件㗎都）💰：$70————————————————————————性價比：中下大頭芋，大頭芋！若然講到香港嘅芋泥出品，你哋唔多唔少聽過吓𠵱間網紅店。睇個名，顧名思義都好清晰俾你知道係賣芋頭製品，今次我哋要介紹嘅係佢嘅卷蛋，搭單試埋佢哋嘅芋頭酥。先講卷蛋Size，$70，可以分到6-8件；而唔講味道之先，齋睇外表，睇得出餡料係幾足嘅，其實$70都算係咁。卷蛋外層係屬軟身嘅蛋糕層，包埋直達75%嘅芋泥，一眼睇埋去，其實幾似一碌上海粢飯。芋泥唔算甜，當中有芋頭粒粒，有硬粒，有軟粒嘅口感，奶味亦都搶到Focus。而今次起碼有8個人食完後，有6個認為芋泥唔夠香，比起係台灣食，咁係有啲出入嘅。但食得出係屬於健康Type個種，店主亦都有表示芋泥當中無加入芋頭香料，所以味道會較為天然啲。整體，普普通通。而餅店店員都有吩咐我哋個卷蛋要需要冷藏，以保持食物質素。但個人認為，一攞到就盡快食晒佢。因為我哋係的確有食淨，而放咗入雪櫃一晚後，第二日食，卷蛋嘅蛋糕層就經已變硬。所以卷蛋一到手，我會建議嗱嗱聲食晒佢。至於今次搭單食到佢嘅芋泥酥，酥皮唔算油，酥度可以加強，而整體口感就硬咗少少。芋泥同卷蛋個款，芋泥味道差不多，但卷蛋當中嘅芋泥就軟身啲，𠵱款就實啲。咁加因佢唔係蛋糕，就唔係度多作介紹啦。————————————————————————…Read More

@meltlyplace ————————————————————————蛋糕：#粟米蛋糕甜度（5星最甜）：⭐️⭐️⭐️濃度（5星最濃）：⭐️⭐️⭐️⭐️🍴：餐刀 ✔️ / 蠟燭 ✔️ / 冰包 ✖️/ 紙盒✔️🏷：✔️（免費）💬：不論打電話或上FB訂，都好快有人接單。店員好有禮貌。攞蛋糕時，由香港站上去較遠，但店員會好似日本買完嘢咁，送個蛋糕出門口俾你，好Nice。🔘：件裝/ 個裝（1磅）💰：$48/ $380————————————————————————性價比：中下久仰大名，由前帝苑酒店行政糕餅總廚所開嘅餅店Meltly Place係中環開咗。上網睇先知，原來總廚鍾意食粟米，所以就創造出幾有Gimmick嘅Meltly Corn。外貌協會主席嘅我認為，上官網睇，個蛋糕幾簡潔俐落，有時唔需要花巧，都做高質，我係幾喜歡𠵱種設計概念。就咁睇，蛋糕面放咗一個以粟米粒造成嘅圓圈。除咗我參加咗外貌協會，查實我都有參加OCD學會。我見到佢唔係放正正中，跣到偏離航道，我唔係太心安。雖然面嘅粒粒粟米唔係真粟米，但粟米粒粒做得好靚，好似。但OCD好擾人，當刻最想係，快啲影咗佢，就分咗佢。而蛋糕外層係粟米奶凍包住粟米Mousses。層奶凍甜，而粟米Mousses，咸嘅喂！味覺好迷濛，好迷惑，奶迷幻呀。放個蛋糕落口一刻，感覺就好似食緊未煲嘅粟米罐頭湯咁。而入而仲有一層鮮粟米粒粒層，食落，仲似未煲而啫喱狀嘅粟米湯。而最底嘅餅底，仲加入咗大粟米脆粒，其實就好似炸乾咗嘅粟米粒。有冇令個蛋糕好味啲同吸引咗呢？Not Much，仲好「un牙」。 由於今次生日嘅成員好鍾意飲粟米湯，佢話「粟米湯係最好味，神聖不可侵犯」。所以今次評分標準可能會Set高咗。今次個蛋糕雖則好有粟米味，唔難食，但唔好食。而成員之一，原來係正正一年前都Order過嚟食，佢一見到，打個突。因為佢話「我冇唸過我一年後仲見到佢，因為上一年講過唔會再食𠵱個蛋糕」；但亦都有一成員話「吓，我上次食過，OK呀，唔難食。你哋覺得難食咩？俾多少少我呀」所以，真係好似上面講到，佢唔係難食，但唔好食。————————————————————————#cake #birthday #蛋糕 #生日 #生日蛋糕 #birthdaycake #hongkong #hkig #香港 #香港限定 #hkbakery #caketionary #caketionaryhongkong #呃like #相機食先 #帝苑酒店 #粟米 #中環甜品 #半山區 #蔬菜蛋糕…Read More