CYCheung9397's Profile

帶住一個三個月同一個一歲三個月嘅小朋友去食。排隊嘅時候問一個短頭髮嘅女職員有冇BB櫈可以俾一歲三個月嘅小朋友坐。獲得嘅回覆係BB櫈有人用緊，用完之後係會比另一位已入座嘅小朋友用。咁OK, 因為人哋入座先過我哋。到入座嘅時候，我都再問多次有冇BB櫈，得到嘅回覆都係有人用緊。到入座冇耐，食物都未到，發覺有張BB櫈岩岩用完，但喺呢個時候就有新入座嘅小朋友坐咗。我哋問個侍應，點解張BB櫈會俾咗另一個後入座過我哋嘅小朋友。佢竟然答我哋「因為嗰個小朋友細過我哋」。What?! 如果講細，咁我有個三個月嘅仲細啦，你唔比張櫈我？然後個侍應問返個同一個短頭髮應該較高級嘅女職員點處理。返嚟比我地嘅回覆係，我哋冇講過要BB櫈。就算呢間舖啲嘢食幾好食都好，侍應服務態度差，同事之間溝通不足，但係賴落個客度，淨係呢兩點已經唔值得去！…Read More

咁啱要去佐敦附近做嘢，行過見到呢一間食花膠產品嘅餐廳，咁就坐低食咗個lunch先。呢度嘅lunch set每一款都有花膠喺入面，而且lunch係會送埋一碗花膠湯。今日我就揀咗花膠咖喱牛腩飯，而朋友就揀咗花膠肉燥雞扒飯。花膠湯係標榜冇味精，雖然送嘅呢一碗你見唔到有花膠喺入面，但係你都飲得出碗湯係用花膠嚟煲，飲完唔口渴。個花膠咖喱牛腩飯嘅牛腩分量好多，咖喱係普通嘅中式咖喱，唔太辣。而且一碟飯入面有兩舊花膠，雖然食落唔係好厚身，但係識落都感覺到佢啲膠質同埋有少少漿口。花膠肉燥雞扒飯啲花膠就係碎上，朋友話整體都唔錯。而且塊雞扒都真係幾大塊。…Read More

因為海港城有coupon嘅關係，所以差唔多間間可以用coupon嘅餐廳都好多人。今次就排左成差唔多個半鐘先可以食到。之前聽過有朋友話佢嘅美人鍋好食，但係因為今次係食lunch，唔想太heavy，所以就揀咗個定食就算。鹿兒島天然豚里肌肉御膳（$218）豚肉唔錯！ 好食！美人框飯御膳（$198+$20）要咗牛肉飯同鰻魚飯同埋加左$20要咗豚里肌肉但覺得兩個飯都麻麻，唔係好啱口味，有啲濕。美人甜卷（$58），時令水果，紅豆，白玉我諗佢嘅當時既時令水果應該係紫薯，中間加咗舊忌廉芝士，感覺幾特別。餐廳嘅環境冇得輸，服務亦都好好。我諗下次有機會嘅話應該會試返佢個美人鍋，因為聽講好好食…Read More

為咗要用晒海港城嘅coupon，所以就周圍去食。今次就揀咗呢一間嚟自京都嘅「京都一の傳」食lunch。佢嘅餐大概$200至到$400左右。當日嗌左兩個餐，分別係「和牛丼」同「鹿兒島吉列和牛定食」。和牛丼（$298）生熟程度冇得揀，話係五成熟。定食包含沙律，玉子，刺身，魚，同甜品。一碗好似有大概四至五塊和牛，雖然未係入口即溶，但係味道唔錯。吉列鹿兒島和牛定食（$338），白飯可以添多一碗，啱晒男士食。但係相對於和牛丼，呢個吉列和牛就有啲失色，可能我本身幻想佢層吉列係好似丼吉咁脆。當中亦都加咗個甜品—蕨餅，呢個就唔記得影啦，但係味道就冇乜特別。個人覺得如果冇coupon的話其實都幾貴，有coupon嘅話就可以一試無妨。又或者下次可以試下佢出名既西京燒會好啲…Read More

朋友知道我鍾意食燒賣，就話俾我聽喺大埔嘅呢一間粉果佬嘅燒賣係好好食，所以有日我經過就二話不說咁買咗$20燒賣自己獨食。但係，食完之後我覺得只係不過不失。我覺得個燒賣太過粉。而且，食燒賣個豉油同埋辣油係靈魂，睇落去咁辣又好似好夠味好正咁，但其實唔辣，好似整體上都爭左啲咁。…Read More

因為疫情嘅關係，好多酒店都做緊唔同嘅promotion。較早前去咗cordis既The place 食dinner buffet。一開始有啲期待，但係食完之後就有啲失望，以下係整體嘅comments:1)食物款式較少，熱食為多，刺身亦無乜選擇，唔夠吸引2）當日冷盤淨係食咗蟹腳，唔算太鮮味3） 甜品選擇都多，味道唔錯4）refill速度快最後埋單因為有折既關係，每人四百幾蚊，如果要話比正價嘅話，我唔會嚟食。…Read More

之前網上見到有優惠，三位女士或以上有半價優惠。所以就約埋朋友一齊去食。舖頭好大，但同時你一入去就會覺得好大油煙味，可能佢哋嘅抽風系統唔係太夠勁。呢度嘅賣點係可以比你一邊打邊爐，一邊鐵板燒，嚟個雙重享受。一就座，就會先送你一人一盤海鮮先。其實都係扇貝，蟹柳同埋魚。如果食完覺得滿意就可以比錢再encore。但我地食完之後，覺得十分普通，無乜鮮味，所以就無再嗌了。呢度落單係電子化，以自己電話去掃描佢嘅QR code去落單。食物種類好少，比平時一般嘅打邊爐舖為少。而呢度亦提供咗整大阪燒嘅材料比每一枱，去大長廚藝。同埋食肆入面亦有啲自助吧，有手拍青瓜，腸仔同飲品等比人自己拎。總括而言，好普通，如果唔係有折，應該都唔會試。…Read More

今日約咗朋友去葵廣掃街，行經一間專賣雞蛋仔的鋪頭，入面有好多味道比你揀。最後我揀咗最普通嘅原味雞蛋仔，大概等咗5至10分鐘左右，就有得食。 攞上手係好熱辣辣，之但係佢比起其他出面某幾間出名嘅雞蛋仔嚟講，佢應該係少咗吹風嘅呢一個步驟，而呢度嘅雞蛋仔應該係即整即入紙袋度，所以少左份外脆內軟嘅口感。同埋，因為雞蛋仔熱辣辣，佢又困喺個無窿窿嘅紙袋度，啲水氣就困住哂，而令到雞蛋仔較為軟身。而且，個人亦覺得原味雞蛋仔味道偏甜，可能其他口味嘅雞蛋仔或者梳乎厘會較為出色啦。…Read More

嚟呢度打邊爐已經不下十次，雖然環境麻麻，但食物質素👍🏻椰子雞煲（半隻雞$188） 之前食過佢嘅辣雞煲，但都係覺得無椰子雞煲咁好食，所以今次都係嗌返椰子雞煲。 椰子雞煲湯底好鮮甜，好足料！有紅棗，龍眼肉，雪耳，杞子，椰子肉同蜆肉。呢度食雞會教你，水滾時先放雞，等水再滾起時就熄火焗佢7分鐘，咁啲雞就會啱啱好，唔會過熟過嚡。我地每次都跟佢嘅方法，次次啲雞都好嫩好滑！另外，好欣賞佢地會比半粒青檸比你加落啲豉油度，令到個醬汁咸咸酸酸咁，再加啲辣椒，其實好正！打邊爐配料方面，都係一般嘅選擇，比起佢地嘅雞煲，相對地就無咁突出。但呢份椒鹽雞軟骨（$68）就有啲驚喜！份量好多！上菜時係好熱，啱啱炸起！椒鹽味好惹味！用嚟送酒簡直一絕！…Read More

一早聽聞過元朗有一間幾出名嘅流心燉蛋專門店，所以今次特登入嚟試吓。間鋪頭嘅位置其實唔算隱蔽，但就係如果你要食就要特登入去。鋪頭睇落面積唔大嘅，直情可以望入廚房入面。你可以好清楚咁見到廚房入面擺住幾盒3.7牛奶。一坐低就梗係嗌返個留心燉蛋，有凍同熱。對於燉品，我就偏向食熱，貪佢更滑溜。等左一陣就有得食。表面幾光滑，用匙羹畢起，你就會見到裡面係流心嘅。個燉蛋奶味係幾重，但係個人覺得有啲偏甜。雖然一碗燉蛋要$33 ，價錢唔算平，但可以當係支持一下街坊小店。…Read More

入咗元朗試吓呢一間喺元朗幾出名嘅飲品舖。由落單到拎嘢飲大概10零分鐘左右就得。嗌咗杯芝士牛油果沙冰。芝士好濃厚，感覺好足料，但略嫌過鹹。牛油果味道好清，砂冰幼細，幾啱夏天飲。…Read More

聽朋友講旺角呢一間紅茶冰室質素唔錯，所以咁啱係旺角就嚟呢度試一試。星期日嘅下午茶時間，呢一間冰室都叫多人。好彩鋪頭較大，有兩層。所以都唔使點等位。行去座位既時候，見到其他食嗌咗呢個焗芝士肉醬長通粉（$47包熱飲）食，望落賣相唔差，所以嗌個食。個意粉上面放左塊好足料嘅芝士，而啲肉醬多得滿滿。可惜嘅係，入面嘅長通粉太過硬，好似唔係好熟咁，雖然我好肚餓，但係我食咗一半就放棄左。下次我應該唔會再嗌。而朋友就嗌咗份芝士留心西多士（$34包熱飲），睇落平平無奇，但驚喜喺入面。一切開，入面嘅芝士溶出嚟，好邪惡但好食！我諗下次都係嗌份西多士好過食焗長通粉。…Read More

約咗朋友入大埔食飯，朋友建議去大尾篤食忠誠，所以就由大埔墟火車站坐20c小巴入去，車程大概15至20分鐘。可能係因為閒日加天雨嘅關係，我哋8:00左右入去係唔需要等位，但係餐廳望落去都有8成門。所以如果要禮拜五、六，日嚟食飯的話可能要先訂位會比較好。餐廳食物種類唔少我哋三個女仔就嗌左以下呢啲食物：泰式炒金邊粉。一個好普通嘅金邊粉柚子沙律。味道唔錯酸酸甜甜，上面耍左啲攦過嘅椰子絲，柚子份量唔少。咖喱軟殼蟹加蒜蓉包。軟殼蟹同咖喱係分開上，所以軟殼蟹唔會浸到淋哂，咖喱口感唔錯。蒜蓉包要另外帶，略嫌唔係太夠蒜蓉味。泰式燒牛柳。呢碟有啲驚喜，我哋嗌咗七成熟，牛汁嫩滑，有牛味。牛肉串燒。串燒每款肉要嗌四串。牛肉串燒相比起燒牛柳就有點失色，普普通通。甜品拼盤。有好多木薯，個人比較欣賞個椰汁西米糕。呢間泰國菜水準ok, 但係又未至於好食到要特登入嚟食嘅。…Read More

今日一收工覺得好肚餓，正諗緊食咩好嘅時候，就諗起之前去冬蔭公公飲嗰杯龍眼冰。為咗杯足料龍眼冰，我就喺沙田站落一落車去咗冬蔭公公度回味一番。四點左右去到，咁啱係下午茶時段，人唔算多可以即時入座。今次我就揀咗冬蔭公湯底嘅湯河，而呢度有個好處就係冬蔭公湯底可以隨你個人喜好選擇唔同嘅辣道。$42佢會包你一款嘅配料，但如果你要另加配料就每款$8。我今次嗌咗幼薯粉，雖然係下午茶，但份量唔少。幼薯粉嘅粗度比普通薯粉又幼大概三份二左右。個人覺得幼薯粉比正常粗度薯粉易夾，而且唔會容易因為難夾穩而將啲湯汁彈到自己。雖然比較幼身，但係都同樣彈牙。冬蔭公湯底酸酸甜甜再配合彈牙嘅薯粉，👍🏻。豬扒我就覺得稍為失色，唔熱同較乾身。下午茶餐本身唔包飲品，但係可以以優惠價去加配。我就加咗$9要咗個龍眼冰。呢杯龍眼冰嘅size有平時啲珍珠奶茶咁大杯，雖然啲龍眼肉並無我第一次飲嘅咁多，但係都比平時我喺其他地方飲嘅龍眼冰多果肉，而且杯嘢飲唔太甜，👍🏻👍🏻。用$51可以新城市附近食到個水準唔錯又飽肚嘅泰式湯粉，值得有下次。…Read More

平時行過都見到舖頭內坐滿人，今次就同屋企人去試下究竟好冇食。前一晚訂左7點鐘枱，一入去無乜人，得一兩枱客，但到7點半至8點左右，就開始多人，8點就坐滿哂。嘢食選擇唔少，嘢飲有特色。服務周到，侍應不時加水。雖然價錢唔算平，但係食物有水準👍🏻- 串燒牛肉唔會燒過龍，juicy菠蘿炒飯外型一流，連兩隻虎蝦。飯有咖哩粉香味兼夠乾身較幼粉嘅河粉，食落有口感，而且河粉炒得入味芒果特飲，入面有糯米滋，布甸同爆谷。好大杯，味道不錯，抵飲！黃咖哩牛腩配薄餅。咖啡微辣有甜，配上熱辣辣薄餅👍🏻    牛腩入味，薯仔夠淋！泰式粉絲沙律。個sauce味道酸酸辣辣夠開胃！入面有芹菜，甘筍，紫洋蔥。另外仲有海鮮包括：蝦，墨魚仔同青口，口感豐富。 可惜個人對芹菜同紫洋蔥麻麻本身以為份量一定好少，點知上菜黎發覺原來份量都幾多！通菜炒得岩岩好，唔會好似有啲地方炒得過左火喉！👍🏻真材實料，外脆入juice。不錯！飲落有少少椰味同菠蘿味，酸酸地，但個人覺得唔太夾…Read More