暉哥's Profile

見咁耐冇嚟蘭芳園，有哟掛住呢度嘅燒味，今日一於再同同事嚟食先！入到嚟，我都唔洗點諗食啲咩，一定係食佢出名嘅燒腩仔。上次就試咗燒腩仔瀨粉， 今次一於試下佢嘅撈麵先。食物：叫左碗肥叉燒腩仔撈麵，嚟到見撈麵份量比想像中細，但係燒味嘅份量又出奇地多，不過其實食到最後都夠哂飽。入返正題，呢度啲燒腩睇過賣相就知正，啱哂我，外皮夠脆 ，而且肉質又夠肥，食落啲油香正到呢！ 不過除咗燒腩仔，呢度嘅肥叉亦都唔錯，首先真係夠曬肥，但肥得嚟肉質又鮮嫩，茶記嚟講真係超曬班！…Read More

聽朋友介紹，話呢一間位於中環，新開嘅火鍋店無論裝修，服務態度，同埋食物質素都好高質，就決定收工後去呢度一試，食朋友餐升職飯。環境：呢度地方唔大，講真，做火鍋店略嫌細左啲，比較似普通茶餐廳冰室格局。的確冇錯，呢度中午會做埋午市，有撈麵、茶記野，價錢都幾大眾化架。入返正題，呢度裝修以八九十年代為主題，幾有特色。除咗裝修，夜晚仲會播八九十年代嘅經典金曲，仿佛一直睇緊流行經典五十年咁，正呀！食物：呢度主要係食海鮮同埋牛肉，如果食海鮮最好早一日留定，當日叫唔一定有架。講返海鮮，味道有鮮味，好新鮮，而且貝殼類舖頭好細心，會事先開幾刀，令到海鮮容易熟啲，就咁擺落去烚，熟佢就會甩出嚟， 唔會好似出面咁啲肉黐住曬個殼，真心要讚！湯底方面，出面好多火鍋店其實都係味精湯底，入面唔會有特別多配料，但係呢度可以話畀你聽咩叫 - 真·材·實·料！鍋底本身已經有啲海鮮，我諗起碼有十粒大沙伯，一路食老闆仲一路幫我哋添加，食埋食埋每人都起碼食咗七八粒，都咪話唔抵，仲要粒粒冇沙又有鮮味，一個字，正！牛肉方面，呢度有好多特別嘅部位可以食到，鍾意食牛嘅真係唔可以錯過，不過講到最欣賞嘅都係老闆會親自拎一盤牛肉，每個部位向客人逐一介紹，睇得出啲牛肉真係幾靚，肉質油脂分明。不過最重要係睇得出老闆嘅誠意，真心，我相信香港地冇乜邊間火鍋店老闆會咁得閒拎啲食材同客人介紹，咁嘅服務質素，點可以唔支持呀。💪🔥💪🔥唔講咁多，睇相就知道啲食材有幾靚，下次去開中環，唔使次次食西餐嘅，一於同朋友仔試下呢間用心之作！附上餐牌供參考：…Read More

今日一個人食飯，諗住求其搵間冰室食個快飯就算，行行下見到呢度有間，而且侍應阿姐好好笑口咁叫客入去，就一於一試！食物：入左去冇乜點再諗，見到是日午餐牌有梅菜扣肉，諗住茶記野一定冇死啦，估唔到奶左野，真係搞唔掂。首先飯唔夠熱；第二扣肉唔夠肥，太多骨；第三，個汁真係唔識形容，總之就係難食。💪💪雖然食物質素有代改善，但係都睇得出夥記好有心，不停向客人介紹有咩食，希望再次返黎嘅時候可以味道可以有進步啦！…Read More

又到一日嘅 Lunch Time ，同事話想試下食拉麵，就去左附近幾多人食嘅熊拉麵！環境：地方唔大，坐滿最多二三十人，唔算話坐得好舒服。食物：呢度都有成七八款拉麵選擇，不過講真，入面都係唔同餸菜嘅配搭而已。本身打算食三號辛口拉麵，不過最後竟然叫錯左超級版，所以最後見到價錢都嚇左一跳，哈哈！個人認為佢嘅落單紙可以擺埋價錢，唔洗好似小學生做功課咁不停日文對照。不過講返正題，呢度拉麵味道都可以，但係又唔算太特別，辛口味小小辣，麵嘅口感唔太彈牙。但係整體都唔差，大家都可以一試！餐牌：…Read More

西餐價錢，普通質素！今日放 Lunch 搵食途中，行下行下經過上環呢頭，見到呢度有間西餐有 Lunch Set 幾平，就打算去試下，不過上到去二樓竟然已經 Full 哂，冇辦法之下就上左去三樓，見冇人大把位，就知應該有啲奶野了......環境：地方唔算好大，不過都算坐得舒服，而且侍應服務都算唔錯！食物：呢度午市同樣有做 Lunch Set ，不過坦白講唔平，最平都要一百蚊一位，但係都勝在齊料，有餐湯、蒜蓉包、主菜同埋甜品。不過重點來了，呢度嘅意粉質素真係一般。首先，意粉過於多水，收得唔夠乾，而且賣相亦唔討好，配料方面都令人失望，只有啲香菇同埋好細粒嘅帶子，整體味道亦過鹹，呢個價錢實屬名過於實了！珍珠帶子雜菌欖油意粉：其他配菜：…Read More

呢排疫情開始緩和，打工仔門都開始要返返公司，亦都係再出嚟搵食嘅機會了。今次， 近近哋，就喺公司附近食呢一間懷舊嘅香港冰室！環境：呢一間冰室認真歷史悠久，已經屹立香港六十年，入面可以見到擺放咗唔少歷史照片，從而見到冰室由電車路對出就係海皮慢慢演變到而家填咗海嘅信德碼頭，一路食仿佛一路回味緊香港呢六十年嘅變化。食物：入到嚟呢間老牌冰室，食嘅當然係香港特色，今次我就試左冰室其中一個招牌，鍋仔公仔麵。呢個麵果真吸睛，一個麵竟然有六個餸， 分別係腸仔、餐肉、五香肉丁、叉燒、鮮牛肉同埋剪蛋，一次過滿足你六個願望。不過老老豆豆，食落味道普通，唔算話太特別， 不過我估係香港普遍都冇乜地方可以有咁嘅選擇，來食下情懷都冇壞！…Read More

去開觀塘呢頭，諗唔到有咩食，喺openrice搵下搵下，就見到有間食點心好似唔錯，就決定一試！環境/等候：呢間餐廳位於工廈，地點都真係幾隱蔽，終於，行咗一段樓梯上到一樓，估唔到現場有咁多人等緊位，可能呢排疫情大家都真係太耐冇出嚟食飯了。不過好彩啲位都算郁得快，本身前面有七至八張枱，但係等下等下15分鐘內都入到去。入到去裏面，以一間點心舖嚟講地方都算大，而且仲要係坐滿曬人，真係估唔到呢度咁出名，吸引左咁多人嚟食。不過坦白講，因為實在太多人，我哋被安排坐喺門口位，就一定冇咁舒服㗎喇，不過都尚可接受嘅！食物：整體食物質素尚可接受，但係唔算太特別， 不過食物勝在足料，夠大份！鵝肝醬鹹水角：其實老實講就係一個普通嘅鹹水角，完全食唔到有鵝肝醬嘅味道，但係卻足以令一個鹹水角由小點提升到去中點價錢...蒜蓉芝士長春捲:呢個嘅份量都幾多，每一條都有成條筷子咁長，而且入面好足料，有蝦有芝士仲有蒜蓉，正！奶黃包：奶皇包方面就冇乜特別， 正正常常普普通通！蝦餃燒賣：雖然得兩粒，但係大大粒！味道仲要唔錯，絕對係必叫品！蜜汁叉燒腸粉呢個叉燒腸好足料，好多叉燒餡係入面。但係你問我算唔算好食，佢又唔算話好好食，只可以講如果佢個腸粉皮再做得晶瑩禿透啲就一流喇！(腸粉最後先到，食完先發現原來唔記得影相，哈哈！)…Read More

之前疫情比較嚴重，都大大減少咗出街食飯嘅意欲，見呢排疫情開始緩和， 一於試下想食咗好耐嘅渝味曉宇重慶火鍋！環境：餐廳位於商業中心較高嘅樓層， 一出𨋢就係店舖，地方唔算話太大，但係裝修都算精緻，感覺上都會坐得幾舒服，佢仲要有地方畀你擺袋，咁就唔怕整污糟同埋整到有味道啦！食物：食物選擇唔算特別多，但係我都唔打算逐樣評論，哈哈！整體嚟講食物質素都算中上， 而且湯底方面選擇亦都唔多，分別有重慶最出名嘅九宮格同埋鴛鴦鍋選擇，而辣度方面就有重慶辣同普通，我哋當日選擇咗重慶辣，食落感覺的確比香港其他重慶火鍋館辣度較大，但係都尚可接受。 其他廢話唔多講喇，咁耐冇出嚟食飯，特別係重慶火鍋，今次一試，只有一個字，正！…Read More

係尖沙咀呢頭，一直都唔知道厚福街有間泰式船麵，經 openrice 一搵先知，見到好似唔錯，就決定一試！環境：係門口睇仲以為只得兩三張枱，原來行到入去仲有好大地方，整體嚟講我估都錯到二三十人。食物：入得嚟梗係食佢嘅船麵，其實佢嘅選擇唔多，簡單直接，有四個餸選擇，分別係豬雞同埋牛，仲有一個大雜燴，其次選擇湯麵或者撈麵。我哋當日就叫咗船皇湯麵， 同埋一個雞嘅撈麵，整體味道唔錯，特別係湯麵湯底味道香濃，一個字，正！雞翼雞絲撈麵：船皇湯麵：…Read More

平時小來將軍澳呢頭，今次一於一試位於將軍澳中心嘅呢間 Say Cheese ，睇下係咪真係可以笑住 Say Cheese ！環境：位於商場入面，冇乜景觀可言，但勝在坐得舒服，環境寬敞，唔錯！食物：中午時間去到，佢都有做午市套餐，平均六七十蚊都可以接受。不過今次我哋就冇叫到，因為想試佢嘅鵝肝意大利飯同埋照牌嘅火焰卡邦尼意粉，整體味道幾好，特別推薦佢嘅鵝肝意大利飯，各位師兄師姐可以一嘗。鵝肝意大利飯：鵝肝十分香口，油香味濃，入口即溶，而意大利飯味道同口感都唔錯，一個字，正！火焰卡邦尼意粉：呢個見係餐廳嘅推薦，就叫左一試。賣相唔錯，忌廉同芝士好濃郁，食落都好香濃，不過成也蕭何，敗也蕭何，正正就係佢嘅忌廉汁太過濃，有點兒過咗火位，不過整體嚟講味道都算唔錯，但係老老實實，真係冇想像中咁好食。…Read More

終於又到了週末，有時間可以到外面享受下人生。今次搵到呢間 Cafe 對我而言都算幾隱世，雖然位於紅磡黃埔附近，但鄰近唔算係行人經常會經過嘅地方，當然除左住係呢度嘅居民同埋理大宿生啦~環境：呢度地方算大，而且裝修有啲格調，幾時尚。枱嘅擺法亦幾新鮮，唔會比到人一般沉悶嘅感覺。試想像，如果係度叫杯咖啡，睇下書，相信呢個下午一定會係一個好嘅下午！食物：老老豆豆，選擇唔係十分多同吸引，當日就叫左一個 All Day Breakfast 同埋一份 Pancake 同兩杯飲品，就係咁多。整體食物質素一般，咖啡同樣，不過勝在份量夠多，足夠比你返成個下晝！All Day Breakfast ：普通 All Day Breakfast ，冇乜特別之處。本身應該係跟牛角包，不過賣哂只可以轉牛油多士。Chocolate Banana Pancake ：呢個真心一般，唔建議大家叫。我哋叫左五分鐘都冇就同 All Day Breakfast 一齊上，就知中伏，點知食落真係果啲係超級市場買嘅即食 Pancake ，食落太厚身，完全唔夠鬆化，但係重點係呢個竟然賣緊七十幾蚊，真心唔抵。…Read More

難得週末揸左車嚟港島呢邊搵食，諗起朋友之前介紹過係鰂魚涌有一問日本野，食魚湯烏冬幾正，門口仲可以泊車，一於試下！環境：地方唔大，但都算坐得舒服。要讚嘅係呢度防疫功夫做到足，一入門口探熱同比客人用消毒酒精就當然唔少得，枱與枱仲有膠片隔開，令食客食都食得放心！食物：去到己經係下午茶時間，原來有下午茶餐，都食抵食，平均都係五十蚊左右，仲包野飲，而且份量真係唔講得笑，睇賣相完全唔似係下午茶份量！當日，我哋叫左一份吉列豬扒同泡菜豚肉便當，一個加左五蚊轉地獄湯底，另一個加十八蚊轉鯛魚湯底，話哂呢度出名就係鯛魚湯，無理由唔試嘅！吉列豬扒便當：豬扒好大塊，而且即炸，所以好鬆脆，而肉質都唔會太韌，配埋毫不吝嗇嘅沙律醬簡直正！湯底方面地獄湯幾正，辣度唔算話好辣，而且仲有泡菜做配菜，鍾意食辣嘅可以試下！泡菜豚肉便當：豚肉嘅份量都好多，而且味道濃沃。而湯底方面鯛魚湯底魚味好香濃，食落好清新，剩係飲都知道落足料！…Read More

又到食飯時間，可憐我哋仲未有在家辦工計劃，唯有出外食餐飯都搵間相對地少人嘅餐廳啦！結果，比我哋發現左呢間隱世懷舊小店。環境：位於摩羅街，附近都比大大小小嘅古董店包圍，真係估唔到原來呢度旁邊有間冰室！佢地方唔大，但好有以前冰室嘅風味，因為疫情關係，冇乜人堂食，多數都係外賣，所以都算食得放心！食物：其實講真，只係普通野，火腿湯意，奶醬多，凍咖啡！但係呢啲正正係我哋香港嘅特色，亦係由細食到大都百吃不厭嘅美食。坦白講，由上年開始社會事件到而家疫情，愈來愈多小店已經頂唔住，趁佢哋而家仲喺度，好快啲食多幾次，唔係唔知仲有冇機會再回味...…Read More

十幾年前住何文田，勝利道梭椏道呢幾條街都係必經之地，近呢幾年開始慢慢睇到開始有變化，由以前平平無奇變到越開越多特色小店，而位於梭椏道嘅半路咖啡就係其中一間。環境：先講門面，條街好闊，所以就算多人等位都唔會好迫，而且門口仲有櫈可以畀人坐， 無論等外賣定係堂食都等得舒服！個人嚟講我幾鍾意佢舖頭入面呢種設計風格，主要以工業風作設計理念。未經打磨嘅牆身、外露嘅鐵喉管，都畀人一種好raw嘅感覺！整體嚟講空間感都算充足，坐得幾舒服！食物：入得嚟冇理由唔飲下咖啡嘅，今次叫咗一杯Matcha Latte 同埋 Flat white ，一個意粉同埋甜品 Brownie ，整體質素都算ok， 各位朋友可以參考下：Prawn Pasta wi Homemade Tomato Sause：呢個 Pasta 講真唔算話好特別好食，而且份量唔算多。不過賣相都唔錯，意粉都有啲口感，唔會太淋，而蝦嘅份量算多，整體都OK ，可一試！Brownie：除咗 Brownie ，仲有蘋果、芝麻雪糕、一片香橙，配搭起上嚟都幾特別，水果嘅鮮甜配搭埋朱古力可以中和左佢嘅膩，幾Fresh 。結論：係呢度飲返杯咖啡，食件甜品，chill 返個下晝，相信都會係一個幾正嘅週末！哈哈，去洗手間嘅時候見到，幾得意：…Read More

雖然而家疫情嚴重，但無奈地我哋仲未有得在家辦公，唯有繼續我嘅中午搵食之旅！ 喺openrice search下search下， 搵到一間從未食過嘅台灣小店，一於一試！環境：普普通通，但都叫做坐得舒服，而且順帶一提，呢度嘅防疫措施做得幾足， 佢真係有跟規矩每一台都隔得幾開，又有做曬探熱等措施，總算食得安心。食物：嚟到見到午市有個套餐都算平，而且選擇都算多，頭盤主菜同埋飲品都係成為66蚊，港島區嚟講呢個價錢算唔錯啦。頭盤方面我就叫咗沙律，主菜香炸醋肉，仲配埋一碗新竹米粉，夠曬飽呀！最有驚喜嘅位係估唔到新竹米粉仲有餸配埋，而且都唔少，兩粒墨魚丸兩粒貢丸，同埋兩片豬肉，老老豆豆，有可能淨係食呢碗米粉都已經夠飽，哈哈！ 沙律方面其實比較普通唔算話太好味， 但係頭盤嚟講算係咁啦。主菜香炸醋肉肉質就比較鞋同埋酸咗少少，真心覺得一般，如果下次再嚟我會試第二樣餸。結論：整體而言，喺呢度食午市都算唔錯，夠平夠多嘢食，而且仲要多選擇，但係味道方面就唔好抱太高嘅期望喇！…Read More