emmajapjapjap's Profile

作為將軍澳居民，想近近地食個西式午餐，Owens經常成為我會選擇嘅餐廳。第一，食物同飲品款式多第二，食物出品保持水準第三，店員有禮當日叫咗牛扒意粉，可揀生熟程度，三成、五成、七成、全熟。塊牛扒以呢個價錢嚟講，份量都好夠，亦都如我揀嘅五成熟度上枱。意粉無特別調味，但有個蘑菇汁可以撈下意粉，食落就唔會好寡。除咗咖啡之外，平日都叫開呢杯香茅生薑蜜，雖然係薑味飲品，但絕對唔會太辣，同香茅味道亦都好夾，凍熱皆宜。午餐仲跟是日餐湯，不定期會更換湯款～…Read More

原先想去對面的Burgermate，不過趕時間之下又見到排緊隊，於是即刻轉場。當日7點幾，店內完全無人，本來都不抱期待。事關又唔算太餓，於是就揀咗飯卷，但又想試下薯條，所以又加咗套餐。揀咗一款叫熱情赤富士嘅飯卷，入面有牛油果、金菇、泡菜，面頭仲有一啲醬汁。初頭幻想飯卷係凍嘅，但一入口係暖暖地，係第一個驚喜。食落完全唔覺得係素食嘅感覺，係第二個驚喜。整體嘅食材同醬汁配搭都令人覺得好滿足。本身都諗泡菜會唔會太濃太辣，但就算食完都唔會覺得太重口味。另外想講講薯條，係脆而內餡軟嘅優質薯條，而最優質係佢唔會油淋淋，跟埋梳打水真係好爽。絕對係有下次嘅餐廳！希望佢地堂食都多啲人支持~…Read More

早上未夠12點到達，已經有不少客人，睇見隔離枱啲燒鵝都好唔錯。今日重點要試咖喱，叫咗一個咖喱牛肉飯（$58）。由於食物係預先已經準備好，落單好快就上餐。初初見到兜咖喱細細碗，以為唔夠食，但食落絕對夠餸飯。牛肉大舊細舊加加埋都有十件，牛肉亦軟淋。咖喱牛飯嘅重點當然係咖喱，欣賞呢度用嘅係咖喱汁，而唔係咖喱醬，唔會愈食愈膩。香味辣味都剛好，但唔食得辣嘅朋友就唔建議了。未夠12點半已經開始要等位了，所以15分鐘就走了，下次要試埋燒鵝飯先得🤤…Read More

將軍澳泰Cool幫襯過好幾次，由係將軍澳海濱店到而家搬咗去Popwalk 2都食過，水準中上兩個人叫咗兩杯飲品三款食物，每人平均200幾蚊，價錢合理。今次叫咗咖青口釀焗包、馬拉盞粉絲雜菜、椰子雞湯，三樣都好啱口味。咖喱青口釀焗包上枱大碟，細食人士要叫多幾個朋友先食得哂。成份有8隻青口，剛剛好夠一件麵包配一隻青口，唔會唔夠分。青口都夠鮮味，唔係急凍太耐搞到無哂海鮮味，值得一讚。咖喱係屬於椰奶味濃嘅款式，辣味唔算重，就算唔太食到辣嘅朋友都唔洗擔心。咖喱入面仲有大大塊紅椒、青椒、洋蔥，咬落好爽口。夾埋麵包同青口食，口感豐富。馬拉盞粉絲雜菜馬拉盞屬於微辣，粉絲入哂味，如果餸飯都係一流。至於雜菜嘅款式真係非常多，包括芥蘭、粟米仔、西蘭花、椰菜花、秀珍菇、甘筍、椰菜，補充營養都係一流。但炒菜嚟講都會比較多油，所以少油開嘅朋友，可能會覺得油。地道椰子雞湯點解叫地道椰子雞湯？因為佢就係泰國風味嘅雞湯，並唔係中式好清嘅口味。就好似走辣版本嘅冬蔭功湯。湯入面仲有頗多雞肉，而雞肉都係嫩滑，不過建議一開始可以撈起啲雞肉，等飲湯個陣再放落湯淥一淥就避免咗鍋湯一直熱住令雞肉過老。雞湯係用平時一人邊爐嘅鍋上台，下低有火一直熱住個湯，包你由頭飲到尾都係熱辣辣。熱精果沙冰 & 泰式奶茶去到泰國餐廳，叫返杯特飲就少不免。對上一次印象中嘅飲品都落重糖，所以唔太啱我口味。不過今次就試下其他飲品，了解一下係咪飲品普遍偏甜。熱情果沙冰坐係出面都聽到打沙冰嘅聲份量十足，亦都係真材實料，見到啲黑色嘅籽碎。泰式奶茶一般都好甜，但呢杯沖得剛剛好，飲落唔會鞋口。當日正直晚餐時間，不過客人數目只有幾枱，所以出餐都比較快。外賣單亦都唔多。整體不錯嘅泰菜，希望多啲區內居民可以支持一下！…Read More

之前聽過朋友讚呢間餐廳，聞名不如見面，今日經開呢頭就去會一會佢。餐廳坐落九龍灣，地鐵站沿路過去都係有蓋地方，好似「極端情況」一日後嘅陰天，都唔怕過去會變落湯雞。言歸正傳，今日7點半後嘅晚市時間到達餐廳，好彩唔洗排隊。餐廳係用QR Code落單，想試嘅朋友要準備掃到QR Code嘅電話。餐廳叫得蕃茄仔，當然係食蕃茄湯啦。今次第一次食，一於叫得豪啲，叫個套餐試一試。套餐包括一個主食，一份小食，一杯餐飲，仲有甜品。睇睇餐牌，主食不但有豬有牛，連比較少見嘅鴨都有得選擇。小食都有好幾款可以揀，又有雞翼又有忌廉蟹肉餅。餐飲就除咗一般嘅汽水，都有啲其他特式茶飲，唔飲汽水嘅朋友都唔怕無嘢飲。甜品就比較神秘，餐牌無寫名係咩甜品。今次揀咗慢煮澳洲和牛𦟌上海麵、雞翼、可樂。本身以為可樂就係罐裝可樂，無咩特別。誰不知可樂一上到枱，原來配埋一個放咗一半冰嘅玻璃杯，唔洗加錢就升級咗冰底可樂就係飲落夠凍先爽。之後麵、小食同甜品係一次過一個日式餐盤咁上，想食邊一樣先，任君選擇。首先講一講小食，雞翼外皮脆，帶微微辣味，咬落有肉汁，溫度剛剛好，配埋可樂非常滿足。個麵上枱見到濃濃嘅蕃茄湯已經十分期待，飲落亦都無令人失望。蕃茄湯飲落有蕃茄蓉，唔係現成湯。味道亦都係帶酸，成個感覺係清新。配埋啲蔥蒜，味道就更豐富。飲湯之餘，食濃湯，一定要揀掛汁嘅麵，就一定非上海麵莫屬。不出所料，上海麵掛湯，又無煮得過熟，保持到少少煙韌。不過食量大嘅朋友可能要加底先夠飽。澳洲和牛𦟌有四件，份量充足，厚度都係十足，唔會覺得唔夠喉。肉質亦都係好軟身，唔會硬柴柴甜品原來係兩小件嘅Brownie，朱古力味濃，甜度反而唔高，唔會食完好想飲水。加上Brownie入面有少少合桃碎，令個甜品有啲咬口。整體而言，食物質素好，環境亦企理。不過餐廳只收現金，如果去食嘅朋友就記得準備現金喇…Read More

遲咗收工，想搵啲食物慰勞下自己，醒起附近唔係間間餐廳晚上9點幾都仲有營業，於是過嚟呢間碰碰運氣。嚟到門口見到十點截單，十點半收舖，諗都無諗就直入餐廳。之前試過呢間餐廳其他食物，咁啱又好想食台灣小香腸，於是就叫咗一個夜市小香腸滷肉飯，再嗌左杯芋見珍珠鮮牛乳。餐廳可以人手落單，唔洗用QR Code，非常方便。飲品先到，雖然堂食都係用即棄膠杯同飲管，但都有放咗鐵匙羹係杯比客人可以舀杯邊嘅芋泥同底嘅珍珠，唔洗怕嘥咗啲芋泥，又唔洗怕吸唔到珍珠。今次點嘅飲品係正常糖量同冰量。台式飲品最忌唔夠凍，但呢杯飲品冰量好足。加上芋泥夠滑夠甜，唔會一粒粒。珍珠嘅份量亦都剛好，唔會飲哂杯飲品仲成個底都係珍珠。主食夜市香腸滷肉飯都係不得不讚。賣相好好之餘，味道更好。夜市小香腸嘅份量非常慷慨，有成4-5條，就算食量比較大嘅朋友食完都應該唔會覺得肚仔空虛。小香腸上面更加灑咗一啲胡椒粉，令小香腸嘅味道豐富啲。食滷肉飯有時都會怕肥肉太多，好快就食到又飽又膩。但呢個滷肉肥瘦比例適中，醬汁唔會過多，所以食嘅過程好輕鬆三爬兩撥已經食哂。飯粒分明，唔會黏埋一堆堆。平常配菜可能都會被忽略，但呢個便當嘅配菜亦都令人留下好印象。雲耳同豆都整得好爽身，一啖滷肉飯一啖配菜正好解膩。開頭擔心未必食得哂，最後都清哂碟。餐廳環境衛生，冷氣亦都足夠。整體而言，係值得推介嘅台式餐廳！…Read More