delish_hk 's Profile

嚟咗尖沙咀呢間海洋火鍋店打邊爐，佢哋有魚缸養住d海鮮，每日都有唔同嘅新鮮海鮮應市。我哋兩個人見佢個雙人火鍋套餐價錢都幾合理，有齊海鮮、肉類同蔬菜配料，$698兩位已經包埋茶位同醬料。湯底有好多款式選擇，仲可以揀鴛鴦鍋。我哋就加咗$168升級咗做龍蝦鍋。龍蝦鍋用原隻龍蝦配埋粟米、洋蔥等新鮮蔬菜由店員即場落鑊炒香，加埋白蘭地點火爆炒，營造出吸睛嘅火焰效果。最後再倒入蝦湯一齊煮，湯頭飲落鮮甜，充滿龍蝦嘅鮮香。龍蝦肉爽彈鮮甜。套餐嘅海鮮可以喺4款入面揀1款，我哋就揀咗元貝，都幾大隻，口感彈牙水嫩。除咗元貝仲可以揀鮑魚、海蝦或者花甲皇。肉類方面豬牛羊雞都有，可以揀兩款，我哋作為牛魔王就揀咗食匙仁同吊籠。匙仁係牛肩胛骨上方嘅部位，因為平時比較少郁動，肉質軟嫩，充滿牛肉嘅鮮甜。吊籠就係牛脊背上嘅肉，肉味濃d，油份亦都比較重。火鍋配料揀咗手打牛丸，一整盤份量都唔少，牛丸食落幾彈牙，係真係有手打嘅感覺。蔬菜就要咗油麥菜，新鮮爽脆。最後嘅主食揀咗稻庭烏冬，幼滑嘅烏冬掛到龍蝦湯汁，鮮味十足。。。禾璽牛肉海鮮火鍋 (尖沙咀)尖沙咀赫德道17號海信大廈地舖及1樓。。…Read More

IFC有唔少精緻餐廳，呢間4口主打新派福建菜，嚟到秋天更加有時令鰻魚menu。午市套餐價錢親民，啱晒一種打工仔放飯。鐵鍋照燒鰻魚飯套餐 $168套餐配一款自選小菜同燉湯，中環嚟講算係性價比高。鰻魚飯用熱燙鐵鍋上枱，熱辣辣香噴噴。鰻魚以中式手法處理，味道食落有d似鱔糊。鰻魚肉質厚實爽彈，照燒醬汁甜鹹適中。鹹香酥炸黃花魚小菜嘅酥炸黃花魚份量雖然唔多，但炸到連骨頭都非常酥脆香口，啱晒送飯。青醬焗鰻魚 $88中西fusion嘅做法去炮製鰻魚，鰻魚焗完再炸，外脆內嫩，喺底嘅羅勒青醬味道非常清新，覆蓋喺鰻魚上面一齊食就可以減低油膩感。黑松露蘆筍炒帶子 $178帶子水嫩彈牙，味道鮮甜，火候掌握得啱啱好。黑松露醬味道香濃，蘆筍清脆無渣。黑椒鳳梨牛仔骨 $148用咗帶骨牛小排，肉質腍嫩。黑椒醬汁味道十分濃郁，加埋酸酸甜甜嘅鳳梨同大量洋蔥爆炒，夠晒惹味。蟲草花淮山燉雞湯/黑蒜粒竹笙燉雞湯 $58套餐本身包咗盅燉湯，不過因為我哋兩個人就再叫多咗盅。燉湯顏色清澈，味道清甜醇厚，而且非常足料，有飲緊住家湯嘅感覺。椰奶銀耳燉桃膠 $58我哋最後仲叫咗碗燉桃膠作為甜品收尾，椰香奶滑，加埋銀耳、桃膠增添口感，甜度適中。。。4口 (中環)中環金融街8號國際金融中心商場2樓2012號舖。。…Read More

嚟咗位於尖沙咀嘅嵐山，就算係平日晚市都座無虛席，我哋叫咗佢個二人套餐$899/2位，套餐由前菜、小食、壽司、刺身、主食到甜品都展現出對食材嘅講究，非常豐富。🥗前菜「漬物三點」有3款時令嘅漬物，味道醃製得啱啱好，唔會太酸；另外仲有「時令沙律」，用新鮮生菜、粟米、蕃茄等撈埋酸方醋汁，食落清爽開胃。🐟刺身四點刺身非常新鮮，大拖羅油脂甘香，入口即化；甜蝦鮮甜爽嫩，另外仲有厚切油甘魚同三文魚，夠晒肥美鮮甜。🍣壽司拼盤壽司款式豐富，有爽脆鮮甜深海池魚、淡雅細嫩嘅真鯛、厚肉水嫩嘅帆立貝、幼滑回甘嘅海膽，仲有赤身同綿密拖羅蓉小卷。而佢哋嘅醋飯係用赤醋，食落更加有風味。🍗小食小食有兩款，「山賊汁燒安格斯牛柳串」肉質腍嫩，牛味香濃。「唐揚薩摩雞翼」外皮炸到酥脆，肉質juicy。🍲主食「廣島蠔味噌鍋」入面有大大隻嘅蠔肉，飽滿肥美，味噌湯頭香濃，鍋入面仲有菇菌、蔬菜豆腐等配料，非常豐富。除咗鍋物，仲有「黑咖喱湯豬軟骨稻庭烏冬」，黑咖喱湯辛香濃郁，夠晒惹味，豬軟骨腍嫩，烏冬彈牙。最後仲有雪米糍做甜品。。。嵐山日本料理 (尖沙咀)尖沙咀棉登徑11號地舖。。…Read More

呢間樓上日式Cafe主打和洋fusion菜式，店鋪雖少，但係就有一種悠閒嘅氣氛。叫主菜可以加$66升級做套餐，有得自選飲品同甜品，係一個同朋友聚會嘅好地方。蒜香辣椒蜆肉意大利粉配軟殼蟹 $138金黃酥脆的軟殼蟹係亮點，意粉彈牙，入口香辣惹味，味道有少少似冬蔭功，蜆肉鮮嫩，整體調味恰到好處。蟹膏甲羅燒醬油漬角切三文魚丼 $148夕陽富士山嘅造型非常有特色，山形嘅飯上面係蛋白泡同醬油漬蛋黃。配埋濃郁甘香嘅甲羅燒蟹膏、醬油漬角切三文魚、蟹籽蟹柳同其他配料撈勻一齊食，每一啖都係鹹鮮嘅海之風味。秋名山藤原豆腐咖啡/靜岡抹茶豆乳我哋兩個都加咗套餐，豆腐咖啡就非常特別，香濃咖啡入面加咗幼滑嘅豆腐花，飲落除咗增添口感，更加有淡淡豆香。靜岡抹茶豆乳唔單止茶味醇厚，豆乳味都好香。柚子芝士蛋糕/Tiramisu柚子芝士蛋糕清新唔膩，口感綿密，食落有啖啖柚子嘅清香。Tiramisu口感偏向似蛋糕，咖啡酒味唔會太濃。。。汐 (銅鑼灣)銅鑼灣耀華街3號百樂中心13樓1303號舖。。…Read More

呢間西餐廳位於中環商廈地庫，沿樓梯而下，昏暗嘅燈光、皮質座椅加埋bar枱營造出獨特嘅格調。點菜後店員先為我哋呈上自家製麵包配海鹽牛油，麵包香脆鬆軟。另外仲有八爪魚蔬菜湯，味道清新鮮甜。Beef Tartare, sesame and nori cracker $208前菜嘅牛肉他他，手切生牛肉維持恰到好處嘅肉粒感，肉味濃郁。最畫龍點睛嘅莫過於自製芝麻海苔脆片，輕薄如紙的脆片，帶有淡淡芝麻香氣，同生牛肉的柔潤口感，創造出質感同風味嘅完美二重奏。Caesar Salad, baby gem, anchovy, parmesan $128Caesar Salad用上新鮮嘅羅馬生菜，每塊葉片都係口感清脆，配上鹹鮮鯷魚碎同大量現刨帕瑪森起司如雪花飄落，啱晒我哋呢d芝士控。Tiger Prawn & Mushroom Vol-Au-Vent, mushroom bisque, tarragon $318呢道虎蝦野菌酥盒非常有特色，鬆化嘅酥皮千層入面裝住香濃嘅菇菌濃湯。虎蝦肉爽口彈牙，野菌燴煮得宜。酥皮夾埋野菌湯汁一齊食，味道層次豐富。O’Connor M5 Black Angus Ribeye $898M5黑安格斯肉眼非常大份，有成550g，絕對要足夠兩個人share。肉眼外面燒到帶焦香，中心維持誘人的胭脂紅，鎖住肉汁，簡單用海鹽調味肉味已經非常香濃。牛扒肉質腍嫩，食落仲帶油脂香。Apple Tarte Fine, vanilla ice cream $248甜品就叫咗個反轉蘋果塔兩份share。焦糖化蘋果薄片鋪成玫瑰綻放咁樣，酥底薄身香脆，搭配埋雲尼拿雪糕，一冷一熱，香甜滿足。最後店員再為我哋送上petit four，栗子蓉做嘅一口小甜點，精美可口。。。REX Wine & Grill (中環)中環德輔道中22號One Chinachem地庫。。…Read More

呢間位於諾士佛台嘅居酒屋，以日式木系風格加上各式各樣嘅酒樽酒桶做擺設，就好似置身日本一樣。除咗供應每日唔同嘅海鮮魚生刺身，亦有選擇豐富嘅串燒、天婦羅等日式料理。吉列蠔配海膽醬 $78大大隻嘅蠔肉炸到金黃酥脆，入面嘅蠔肉依然肥美多汁。配上特別調製嘅海膽醬，帶濃郁鮮味，滋味十足。燒鰻魚鹽燒串 $48以海鹽調味後再拎去以炭火直燒，凸顯咗鰻魚豐腴嘅油脂同炭烤嘅焦香，鰻魚肉口感爽彈。牛舌海鹽燒 $72牛舌切得厚度適中，中心仲帶少少粉紅色，食落爽嫩，簡單嘅海鹽將牛舌獨有的香氣散發出嚟。赤羽太刺身 $280餐廳每日都會供應時令鮮魚，可以鹽燒或者做刺身。我哋叫咗條赤羽太做刺身，師傅巧妙咁將魚肉一分為二，呈現兩種截然不同嘅口感。薄切嘅部分晶瑩剔透，配搭蔥花、薑泥同酸汁食，入口爽嫩；而厚切魚肉就飽滿爽彈，鮮味回甘。原條池魚刺身 $198我哋另外都叫咗池魚刺身，都係原條上，擺盤精美，魚肉片得非常薄身，食落鮮甜味美，點酸汁食，令人胃口大開。山葵餃子虎蝦味噌鍋 $98天氣凍叫咗個味噌鍋，湯底係濃郁的赤味噌，飲落暖笠笠，鹹香中帶出深邃的風味。鍋入面有大大隻嘅虎蝦、蔬菜同山葵餃子。咬落去餃子嘅肉餡、肉汁同山葵嘅微辛感瞬間湧出，意外地好夾。龍蝦天婦羅 $198原條龍蝦尾拎去炸，天婦羅粉漿唔會太厚，炸到外脆內嫩，酥脆無比。龍蝦肉處理得啱啱好，唔會炸得過熟，口感彈牙，鮮味十足。鰻魚炒飯 $118炒飯鑊氣十足，米飯上色均勻、粒粒分明，切塊嘅烤鰻魚融入其中，帶嚟油香同燒烤嘅風味。。。五勺 (尖沙咀)尖沙咀諾士佛臺1號6樓。。…Read More

天氣轉涼最啱就係去食燒肉，嚟咗呢間日式居酒屋食和牛，佢哋嘅拼盤可以一次過食到幾款唔同嘅部位，人少少都可以食多幾款。和牛極致6點拼盤 $588叫咗個6點拼盤，拼盤有齊上等肋肉、鞍下、羽下、上後腿脊肉、芯芯、笹身等六個部位。和牛油脂分布平均，每一個部位嘅肉質同風味都唔同，而且都係非常高質嘅和牛，羽下同笹身油花較豐富，豐腴嘅油脂帶嚟入口即化嘅口感。後腿脊肉同芯芯肉質腍嫩、肉味較濃郁。夢之大地豚三昧 $188一次過可以食到豚肋肉、豚里肌同豚肩胛。肋肉脂香豐富，里肌柔嫩，肩胛則帶有獨特香氣，展現了豚肉唔同方面嘅美味。石鍋和牛牛肉拌飯 $128石鍋熱力十足，將和牛片、溫泉蛋、蔬菜同米飯撈勻，瞬間香氣四溢。米飯吸收咗肉汁同蛋汁，加埋鍋底嘅飯焦，滋味十足。。。銀座炎蔵燒肉 (荔枝角)荔枝角長義街9號D2 Place ONE 3樓302號舖。。…Read More

同朋友嚟咗尖沙咀呢間居酒屋，只係上咗一樓環境就同樓下熙來攘往嘅街道唔同晒，裝修帶有和風情調，氣氛輕鬆舒適。八焱卷 ($128)叫咗鋪頭嘅招牌卷物，加州卷入面係蝦同青瓜嘅爽脆組合，面頭仲有海膽同鵝肝嘅邪惡組合，超級豪華。海膽鮮甜creamy，鵝肝超香入口即化，一啖有齊唔同味道同口感。土佐豆腐 ($68)外脆內嫩嘅炸豆腐，面頭舖滿炸過嘅木魚片，醬汁加埋蘿蔔蓉甜鹹適中，味道突出。豆腐口感滑溜，炸粉薄身唔油膩。黃金焗蠔 ($68)蠔肉飽滿多汁，味道鮮甜。表面焗到金黃色嘅煙肉白汁芝士醬濃郁惹味，食完蠔個醬汁都唔好晒可以撈埋椰菜絲一齊食。日本雞頸肉 ($38)叫咗串雞頸肉串燒，雞肉口感爽彈有嚼勁，燒得啱啱好，表面微脆，肉汁鎖住喺裡面。簡單用鹽調味已經帶出雞肉嘅鮮味。紫蘇雞皮蝦 ($58)創意十足嘅串燒，大蝦外面包住紫蘇葉同雞皮去燒，雞皮香脆，蝦肉彈牙，紫蘇葉增添清新香氣，配搭新奇又好味。甲羅燒 ($88)蟹蓋裡面裝滿蟹膏、蟹肉同蟹籽，撈勻後用脆餅夾住食，蟹膏味道濃郁甘香，鹹鮮味突出。牛肉稻庭烏冬 ($108)稻庭烏冬口感滑溜煙韌，湯底清甜。牛肉脂肪分布均勻，且仲係半生熟，略帶粉紅色，口感腍嫩，唔會過熟。磯燒海鮮拼盤 ($98)餐廳而家仲做緊特別優惠，$98就食到個磯燒海鮮拼盤，有齊鮑魚、扇貝、生蠔、虎蝦同沙白呢幾款貴價海鮮。海鮮新鮮，肉質水嫩多汁、鮮味十足，呢個價錢真係性價比極高。。八焱居酒屋 (尖沙咀)尖沙咀寶勒巷3-7A號萬事昌廣場1樓102號舖。。…Read More

嚟咗灣仔呢間扒房鋸扒，佢哋嘅晚市套餐每位$388，包含餐湯、餐包、沙律、主菜同餐，定價合理，有多款牛扒可以揀，亦有羊柳、豬肋骨同三文魚等其他肉類，選擇豐富。餐湯嘅蘑菇湯質感細膩濃郁，每一啖都係香濃蘑菇味，口感綿密順口。自家製嘅百里香蒜蓉牛油餐包，外脆內軟，百里香同蒜蓉嘅香氣加埋牛油，令人回味。凱撒沙律生菜新鮮爽脆，醬汁比例調味啱啱好。230g安格斯封門柳封門柳肉質較為軟嫩多汁，牛肉風味濃郁突出。烹調火候精準，切開呈誘人嘅粉紅色。簡單落少少海鹽就完全展現到牛肉嘅原汁原味。230g美國平鐵牛扒平鐵牛扒肉理分明，嚼感十足，牛肉肉味濃厚，肉汁豐富，配埋自選嘅醬汁味道層次進一步提升。兩款牛扒火候控制得唔錯，配菜嘅薯條調味啱啱好，食落夠脆身。。。The Prime House (灣仔)灣仔軒尼詩道239號18樓。。…Read More

同朋友嚟咗銅鑼灣呢間樓上cafe，估唔名附其實真係有一個超開揚嘅無敵維港海海景，因為位處高層，所以一望無際見到晒IFC同ICC，我哋一開門就嚟到，坐喺窗邊望住個景非常舒服，心情都放鬆d。UMI全日早餐 $138我哋叫咗份All Day Breakfast，份量幾大，樣樣有d都幾豐富。櫻花蝦炒蛋好滑，食落有d蝦仔嘅鹹香。煙燻黑豚肉腸同平時食開嘅腸仔唔同，肉質實在d，重帶有煙熏嘅香味。日式芝士年糕同串串章魚燒都幾有特色，尤其係年糕，外脆內煙韌，仲有芝士香。燒大啡菇好juicy，炸紫薯餅甜甜哋外脆內粉嫩。加埋新鮮沙律菜同乳酪杯，清新解膩。整體嚟講，呢個全日早餐味道唔錯，款式多，抵食。北海道帶子明太子意大利粉 $148另外點咗個帶子意粉，帶子煎得幾香，口感唔錯。意粉嘅明太子醬濃郁，每條意粉都掛滿醬汁，食落鹹鹹香香。佢哋呢到叫主食可以加錢轉套餐，有飲品同甜品。加$28會有檸檬茶特飲同乳酪杯，而加$48就可以自選飲品同有精選甜品。檸檬茶特飲清涼解渴，至於我哋自選嘅芒芒甘露，芒果味好香濃，裡面仲有啲柚子肉，酸酸甜甜，唔錯。。。UMI (銅鑼灣)銅鑼灣告士打道229-230號宇宙商業大廈13樓。。…Read More

又到秋天最啱就係去打邊爐暖吓個胃，揀咗嚟呢間鳳園食佢地嘅招牌椰子雞鍋湯底。餐廳老闆裝潢走田園風格，同椰子雞鍋一樣清新脫俗。原味椰子雞（半隻雞）$208湯底用上原個泰國進口椰青，店員會即席打開椰青將清甜冰涼的椰青水倒入鍋中，椰青水簡直係成個湯嘅靈魂所在，加埋嫩滑嘅雞件齊煮，湯頭椰香自然、清甜無比，建議可以先飲一碗湯再打邊爐。雞採用文昌雞，食落鮮嫩有雞味。優選肥牛 $128火鍋料當然唔少得肥牛，我哋叫咗碟優選肥牛，牛肉嘅油脂分布均勻，在椰湯中輕涮幾秒就食得，入口腍嫩精品牛舌 $78肉類方面我哋仲叫咗碟牛舌，肉質爽彈有嚼勁，牛味濃郁。空中花園 $138呢個叫「空中花園」嘅拼盤極為豐富，絕對係一大亮點。除了有生菜、娃娃菜、冬瓜等嘅蔬菜，更加有平時少見嘅牛奶水果玉米、板栗南瓜同黑皮姬松茸。拼盤仲有肥牛、響鈴、蟹柳同四寶丸，一次過可以食到晒多種配料，啱晒人少少又想食多幾款嘢。。。鳳園椰子雞 (旺角)旺角豉油街36-42號榮高大廈地下至2樓。。…Read More

旺角一向係火鍋集中地，最後揀咗嚟食呢間一鍋堂，呢度平日晚市正價時段$338@就可以任食日本A4+黑毛和牛，仲包咗唔同種類嘅海鮮，都真係幾抵。我哋加$50要咗鴛鴦湯底，揀咗酸辣排骨湯拼藥膳滋潤湯。酸辣排骨湯酸香開胃，加埋辣辣哋好過癮，非常有泰式風味。藥膳滋潤湯就清香醇和，藥材味唔會太濃，清清哋唔會搶晒食材嘅鮮味。🐂日本黑毛和牛A4+主角嘅黑毛和牛油花分布均勻，好似大理石紋咁靚，輕輕淥幾秒就食得，入口即化充滿油脂香。其他牛仲有肉質軟腍嘅極上安格斯牛小排、肉質爽彈牛味香濃嘅南非和牛三花腱等等。🐟海鮮類海鮮種類同樣豐富，有大大隻肥美飽滿嘅鮮甜桶蠔，蠔味鮮濃，一d都唔腥。仲有原隻帆立貝同原隻鮑魚，都非常新鮮，彈牙爽口，鮮味十足。另外亦有時令貝類海產，當日就有蜆同沙白，乾淨冇沙，鮮甜味美。其他仲有好似一咬爆汁大埔振興瀨尿牛丸同滑溜膠質豐富嘅真係美顏花膠等等多款火鍋料可以叫。自助吧嘅蔬菜選擇多，新鮮乾淨；飲料吧有各式汽水、茶類同酒類飲品；熟食小食區有炸物、涼菜、凍海鮮等，款式都不少；最後當然唔少得食埋雪糕做完美總結！火鍋店有會員優惠，除咗每月都會有定期回贈，仲有現金卷，折扣卷，食物卷，延長時間券等等嘅優惠，亦有迎新着數同積分升級。而且見佢哋仲推出咗全新嘅晚市一人小鍋半自助套餐，下次可以自己一個人嚟打吓邊爐都唔錯。。。一鍋堂 (旺角)旺角彌敦道628號瓊華中心6樓。。…Read More

夏天最啱食辣嘢，同朋友嚟咗食泰國菜，呢度由泰廚主理，味道夠晒正宗。叫咗幾款唔同菜式開心share。特別推薦燒牛柳同期間限定嘅海鮮媽媽麵。🦑海鮮媽媽麵 $178湯底有兩種選擇，我哋揀咗經典嘅Thai Suki口味，甜酸辣味融合喺一齊，酸酸辣辣好開胃。海鮮有蝦、青墨魚仔、魚片，加埋泰式燒腩肉，配料非常豐富，媽媽麵吸收晒食材同湯底嘅味道，好有泰式風味。🥩泰式燒牛柳 $98牛柳好腍嫩，燒得啱啱好，唔好乾，表面帶少少焦香，蘸埋醬汁食甜甜哋味道更加有層次。🦐粉絲焗大頭蝦 $268大頭蝦開邊後加埋粉絲同蒜蓉炒焗，蝦肉結實彈牙。粉絲吸收晒蝦膏同蒜蓉嘅精華，味道香濃惹味。🥬蒜蓉炒椰菜苗 $98椰菜苗翠綠幼嫩，口感爽脆，蒜香味夠，炒得鑊氣十足。🥭芒果糯米飯 $88我哋仲叫咗芒果糯米飯做甜品，芒果香甜唔酸，糯米飯煙靭暖糯，淋埋椰汁一齊食超滿足。 龍眼冰 $36朋友叫咗杯龍眼冰解辣，唔會太甜，亦都有好多龍眼肉，冰涼清甜。。。Milu Thai มิลู่ไทย (銅鑼灣)銅鑼灣耀華街3號百樂中心2樓。。…Read More

嚟咗Odelice! 食晚餐，佢哋嘅晚市套餐，人均唔洗$2xx起就食到，2-5位都叫得，啱晒朋友聚會，除咗有餐包、餐湯同主菜，仲可以揀一款頭盤或者甜品。今次我哋兩個人嚟食$558起@2，由餐湯到主菜，每一道都充滿驚喜，性價比高。平日晚上3-7點餐廳仲有happy hour優惠，酒類買一送一，我哋就叫咗兩杯氣泡酒($80)，飲落偏dry唔會好甜，有淡淡嘅果香同帶酸，氣泡非常清爽。🦀蟹肉牛油果他他牛油果蓉口感細膩幼滑，入面仲有一絲絲鮮甜嘅蟹肉，加埋個清新嘅莎莎醬，非常清爽開胃。🥧法式點心拼盤 (+$35)拼盤非常豐富，有外脆內軟嘅炸白汁三文魚球、鹹香煙三文魚、香濃迷你蛋批同吞拿魚撻。最畫龍點睛係個青瓜刁草蘸醬，清新嘅青瓜加埋芝士醬嘅配搭同炸物或者多士都非常夾，提升咗整體嘅風味。🦞龍蝦馬賽魚鍋 (+$135)海鮮非常豐富，有半隻龍蝦，肉質結實彈牙，個白酒海鮮忌廉醬汁濃而不膩。除咗龍蝦，仲有藍青口、盲鰽魚同茴香酒燒大蝦，配搭蕃茄醬汁，更加帶出海鮮嘅鮮味。🥩澳洲和牛牛脊肉 (+$85)和牛牛脊肉我哋叫咗五成熟，火候控制得啱啱好，切開呈粉嫩嘅玫瑰色，肉質極為軟嫩，搭埋鵝肝白蘭地醬汁，令牛肉嘅味道層次更加提升。配菜有好似燒薯粒、西班牙紅椒同西蘭花苗等嘅蔬菜，平衡返肉類嘅豐腴感。。。Odelice! (荃灣)荃灣大河道100號海之戀商場1樓1002號舖。。…Read More

夜晚同朋友嚟咗山見打邊爐，揀咗LV.4嘅特選澳洲和牛海鮮吃到飽套餐($388@)，包兩個鐘任食一共104款嘢飲嘢食，當中梗係唔少得有澳洲和牛同唔同種類嘅海鮮。依家火鍋店做緊港式主題，我哋就揀咗芫荽皮蛋豬骨鍋拼上品蟲草木耳鍋嘅鴛鴦湯底。芫荽皮蛋豬骨鍋一上桌就香氣撲鼻，豬骨湯底呈奶白色。至於上品蟲草木耳鍋就夠晒養生，湯頭清澈，帶有菌類的天然鮮香。除咗有港式火鍋湯底，仲有多款港式主題食物。好似黃金蒜茸烤扇貝，鮮味扇貝吸收晒蒜蓉嘅香味；仲有爆漿咖喱魚蛋，彈牙得嚟入面仲有濃郁咖喱漿；另外又有街頭格仔餅，外脆內軟加上蛋香濃郁嘅格仔餅配埋煉奶同花生醬，超邪惡；唔少得仲有情懷紅豆冰，奶香順滑，甜度適中。🥩肉類方面當然有必食嘅澳洲和牛肩胛肉眼，油花分布均勻，只需輕涮幾秒就食得，肉質細膩軟腍，充滿和牛嘅脂香。月見封門柳亦都非常高質，牛橫隔膜肌肉肉質緊緻肉味濃郁。另外仲有口感爽脆彈牙嘅薄切牛舌芯同其他唔同部位嘅牛肉同豬肉。🐟海鮮嘅種類亦都有好多，好似新鮮彈牙嘅原隻鮑魚、爽脆鮮甜嘅白鱔片、飽滿水嫩嘅福隆沙白。另外仲有響鈴魚籽蝦滑卷同竹笙抱蝦滑呢d特色嘅創意火鍋配料。火鍋料上菜速度快，加上仲有自助嘅蔬菜、小食、飲品同甜品吧，兩個鐘食得非常飽。。。山見台式火鍋 (葵芳)葵芳興芳路223號新都會廣場4樓484-487號舖。。…Read More