Iconbb's Profile

諗唔到食咩，經過見到新開，聽個名好似日本嘢，一於試試佢。入去都算好迫下，坐低睇個menu先知係中餐。叫咗碗檸檬酸辣肥牛湯麵。湯底酸酸辣辣好開胃，牛就普通，面質都唔錯，有咬口。另一碗係燒椒板腱伴麵，面質煙韌，幾好食，牛腱都夠腍，有肉味，唔錯，撈埋啲青椒醬將味道昇華。整體都算唔錯，不過試過一次就夠了。…Read More

一向重口味嘅我，對於呢間客家菜好滿意。菜膽雲吞雞湯麵，湯底濃郁，雲吞爽口彈牙，好有家嘅味道，份量亦都十足。招牌頭抽醬油雞配客家黃酒雞湯，加咗個蝦頭油櫻花蝦撈麵。呢個真係不得了，啲雞好滑，加上甜豉油，好好味，個撈麵都係甜甜地，份量好大份，覺得漏的話可以加上佢自製嘅辣菜甫，令到成個味道都昇華。美中不足就係個黃酒雞湯，因為本人好鍾意飲黃酒雞，就覺得佢呢個雞湯唔夠甜唔夠濃，可能對其他人嚟講就啱啱好。另外再嗌咗個麻油海蜇，海蜇都好爽脆，淨係落咗麻油，覺得單調咗少少，如果加少少辣同埋醋會更加惹味。整體嚟講嘢食味道很不錯，份量十足，會再返嚟。…Read More

無意中發現呢間隱世小店，見到裝修好靚好特別，就入去試吓。入到嚟好懷舊，以紅色為主，好chill好寫意嘅小店。店員超級nice！Menu好簡單，只有一款湯底：醬油蝦濃湯，可以揀拉麵或刀削麵底，我哋就揀咗各一。第一啖一定係試湯底先，好濃郁嘅蝦味，因為湯底係由蝦頭每日新鮮熬成嘅，真材實料，好有驚喜！本人覺得配拉麵感覺完美啲，因為比較掛湯。我哋連成碗湯都飲埋。Menu另外就係signature 嘅醬油海鮮。除咗menu上嘅蝦，鮑魚同海螺，佢哋仲有每日精選嘅海鮮，我哋就揀咗鮑魚、蟶子、生蠔同埋北寄貝。一食真係不得了，鮑魚勁爽口，蟶子同北寄貝勁鮮甜又爽口，生蠔好大隻又creamy，醬油咸度啱啱好又唔會搶咗啲鮮味，好味到我哋要encore！好耐冇食過咁驚喜嘅小店，可以無限次番嚟！…Read More

見風頭咁勁，又咁啱經過，唔洗排隊，一於去試吓。 入到去環境舒服，座位寬敞，都算乾淨。叫咗啲刺身拼盤，都算新鮮，鮮甜彈口。可樂餅就普通，外皮都算脆，正常發揮，冇驚艷。呢個壽司拼盤就爭啲，啲魚有骨，爭啲啃死，都幾大舊骨，好失望。就算啲嘢幾新鮮，都已經冇晒信心。蕨餅中規中矩，煙煙韌韌，都幾好食。呢間我唔會再嚟，未嚟過嘅都唔洗試。…Read More

呢間老字號相信大部分人都識，成日經過都想試，今日終於試到。識食一定係食粢飯！熱辣辣，啲糯米好煙靭，油炸鬼仲有少少脆，加埋啲肉鬆同榨菜好好食！如果唔係太飽，我會再encore多一個！仲飲咗酸辣湯，我食得酸，所以覺得唔夠酸，要另外加醋，個辣度就ok！正常發揮。一定會因為個粢飯再番嚟…Read More

喺Hysan food court見到呢間以魚為主嘅食店，幾得意，於是就試下。黑白鴛鴦春卷魚湯魚麵個湯幾鮮甜，唔腥，魚麵都彈牙，春卷香口，整體好食。魚肉燒賣雙拼正常魚肉燒賣，都食到芫荽味，整體ok，冇乜太大驚喜。炸魚狗腸（惹味山椒）其實係長條形嘅魚蛋，爽口彈牙，配上甜辣嘅山椒醬，好食，個醬幾特別！魚皮餃子配柚子汁最好食係呢樣，魚皮餃煙韌有口感，魚味好濃，配上柚子汁中和油膩，好好食！有米芝蓮銜頭嘅佢，都值得一試嘅！…Read More

作為麻糬控嘅我，知道呢間刨冰配麻糬，梗係要過嚟試吓啦！四季春麻糬凍奶茶有淡淡嘅茶味，唔太甜，水麻糬好重奶味，少少甜，同杯茶唔係好夾，有啲奇怪。楊枝甘露麻糬呢個反而有啲驚喜，好多椰奶cream，芒果嘅甜，西柚嘅酸，中和番，加埋鮮奶麻糬，個人覺得好夾，略嫌啲冰太粗，唔夠綿，同埋真係淨係冰，冇味，爭咁少少。個味道幾好。會再嚟試下個榴槤冰。…Read More

朋友生日飯，嚟咗呢間聽咗好耐Tiramisu 好出名嘅意大利餐廳。裝修華麗，水晶吊燈，精緻擺設，以木色為主，感覺舒適寬敞。牛肉湯，好有牛味，食到蕃茄酸味，好好飲。野莓沙律。清新鮮甜，生果同菜都好新鮮，雞肉唔鞋，好嫩口，琥珀合桃好香，個紅莓油醋汁好點睛，好食。海鮮墨魚汁意粉。醬汁好Creamy，意粉彈牙，ok ！唔難食。美國封門牛柳。叫咗medium，火喉啱啱好，好嫩，有牛味，唔錯。烤波士頓龍蝦尾，都算鮮甜爽口，好食。Tiramisu，好甜，唔係好食到酒味，麻麻哋。整體用餐體驗係開心嘅，不過有少少插曲，就係米奇喺迪士尼過咗嚟，雖然冇親眼見到，但都嚇到驚惶失色，店員好快幫我哋轉咗枱，仲主動問我哋需要啲咩，Service recovery 做得快恨準。其實發生呢啲情況有好多因素嘅！我相信間間餐廳都會有，係你知唔知㗎姐！嘢食真係唔差，係Tiramisu差少少。可以俾次機會佢試下。…Read More

去完荔園，附近行吓搵嘢食，見到呢間菜館幾多嘢食，又好耐冇食中菜就入嚟試吓。餐廳好乾淨企理，座位寬敞舒服，係舒適高級版嘅大排檔感覺！地道得嚟又有時尚感。3D芥蘭Signature dish一定要叫啦！果然係signature，啲芥蘭葉真係炸到好3D，加埋啲肉碎，用生菜包住嚟食，比平時普通嘅肉碎生菜多咗一種3D感，口感豐富不少！胡麻醬牛柳粒牛柳好嫩滑，每粒都好均勻地裹住胡麻醬，就咁食就甜甜地；你亦可以再沾埋伴碟嘅七味粉，甜辣甜辣，多一番惹味；或者加上伴碟嘅洋蔥，爽脆甜，口感更加豐富！砵酒火焰焗蠔呢碟賣相不得了！未嚟已經聞到好香嘅酒味，上到枱時啲蠔仲喺個火焰中翻滾，好澎湃！啲蠔炸過嚟，好香好肥美，加上墊底嘅洋蔥，食起嚟甜甜地又好creamy，好味！蒜蓉粉絲蒸扇貝扇貝好新鮮好巨大，差唔多有我半個手掌咁大，粉絲朔晒啲甜豉油，加上香口嘅蒜蓉，真係非常之正！食小菜真係要嚟呢啲地道嘅老字號先食到嗰種鑊氣，同埋佢仲有打邊爐同雞煲，下次要試吓先。大家經過不防入嚟試吓！…Read More

奶奶生日想食韓國嘢，就揀咗呢間嚟試吓。諗住private啲，就book咗間房，Minimum charge 好似$2000。嚟到點知「間房」係open area，只係用䈴拉住，然後只可以拉一半，咁樣要收我$2000？！韓式生牛肉，食到麻油味，塊炸紫菜幾脆，牛味唔太濃，不過口感幾好。煎餅拼盤，普通泡菜同海鮮煎餅，冇特別，唔難食。八爪魚牛肋骨，味道唔錯，不過份量好少，牛肋骨炆得夠腍，蘿蔔好甜。燒1++韓牛，signature dish嚟講算唔錯，有牛味，油脂適中，可以夾蘑菇，帶子，津白嚟食，幾特別，好食。海膽紫菜包飯，都唔錯，海膽幾甜。布拉塔，水牛芝士配泡菜，冇特別。烤豬皮，幾煙靭，味道甜辣，幾好食。辣雞腳，好難食，唔入味，得個辣字，唔夠rich。整體嚟講我唔會再嚟，咁嘅價錢出面好多選擇，而呢間「房」令我大開眼界。…Read More

經過門口出面見都多人食又唔洗排隊，就試試佢。坐隔離張枱係咁讚個豬扒好好食，好鬆軟，好啦，就試下佢啦！叫咗個厚切豬扒。食落係幾鬆軟嘅，不過略嫌有少少肥，有啲油。海鮮大燴叻沙，揀咗板麵，唔係好夾，都係油麵會啱啲。味道唔錯，湯底都夠濃。滿堂椰漿飯，有燒雞扒，咖喱牛腩，豬頸肉。啲豬頸肉爽到有啲驚，雞扒唔配飯有啲鹹，配飯就啱啱好，咖喱牛腩好腍，好好食，個飯就冇乜椰漿味，不過不失。鴛鴦桔仔話梅水，幾好飲，酸酸甜甜幾清新。白咖啡就正正常常。整體嚟講發揮到應有嘅味道，未到非常出色，可以試一次。…Read More

今次生日飯揀咗呢間日本嘢，第一次嚟，間嘢唔算好大，大路日式裝修風，都坐得舒服。估唔到有好幾樣嘢食都俾到驚喜我！前菜係日出(蕃茄)。以為只係個名改得特別，味道都係普通酸酸甜甜嘅凍蕃茄，點知入面係有啫喱，蕃茄嘅爽加上啫喱嘅彈，口感非常豐富，味道酸甜，好食！前菜已經有小驚喜。再嚟係特上刺身四點盛。件件都厚切，好新鮮，好鮮甜，大拖嘅油脂好均勻，好香！做到佢應有嘅質素！呢個磯煮鮑魚好爽口彈牙，唔錯！螢光魷魚沖漬，用嚟送酒一流，齋食就偏咸。大驚喜就係呢個吞雲吐霧，唔單止好睇，仲要好食！店員仲好貼心咁等我哋相機ready先開蓋。一開，煙霧瀰漫，陣陣蘋果木煙熏味湧出嚟，芝士入口即溶，咸香加上木香，令你味蕾大爆發，再加上炸完超脆口嘅紫菜，條脷簡直可以係口腔入面跳番part舞。呢個係必叫嘅！味醂魚乾都好好食，甜甜地，腍得嚟又有口感，唔洗沾醬已經好好食。串燒牛舌同雞軟骨，正常，冇特別出色。呢個係魷魚塩辛芝士，都幾特別，芝士好香好creamy, 加上魷魚嘅彈口，送酒一流。最後係醉忘蟹肉味噌炒飯，炒得好乾身，蟹肉都算多，幾香，唔錯。餐飯食得好開心，好食服務又好，菜式好特別，有驚喜，會再幫襯。…Read More

每當想食蠔，一定會番嚟Open Oyster。 各式各樣嘅蠔，一定有啱心水。如果揀wine lover，開一枝酒，蠔仲會有discount，大約$4x 一隻。鍾意飲酒食蠔嘅朋友，呢度真係不二之選。我唔係打手啊！真係每次嚟都feel到餐廳職員好有heart，好詳細咁解釋每種蠔嘅特色，今次仲介紹咗一枝好好飲嘅酒俾我哋，好啱女仔飲，夠甜！我哋每人menu上每種蠔都要咗一隻，有十幾廿隻，埋單都係2千幾，好抵，下次再番嚟！！…Read More

嚟到深水埗，順便去呢間好多人都話tiramisu 好食嘅迷你毛試吓。鋪面唔算大，坐位有啲密，座無虛席，整間餐廳以白色為主，感覺乾淨利落。咁出名嘅Tiramisu 梗係要叫啦！Mascarpone cheese好厚, 加上表面少少苦嘅朱古力粉，balance番，底係有啲朱古力脆脆，比起普通嘅tiramisu 係有少少特別，味道好食，但未去到好驚艷，$80呢個價錢有少少overpriced。另外有叫到一杯熱cappuccino同火龍果汁，正常發揮！整體嚟講都可一試！…Read More

再訪餐廳係因為屋企人生日，裝修充滿美式懷舊風格，以紅色和金色為主，座位寬敞，好適合大班人聚會。呢個Atlantic Lobster Tail出奇地好鮮甜，又彈牙，真係估佢唔到。呢個Lawry’s Cut真係好厚，要咗medium rare，好juicy好嫩，有牛味，好有口感，唔錯！呢個California Cut就薄啲，一樣都係medium rare，肉質同Lawry’s Cut一樣，只係口感上冇咁rich，因為薄咗，胃口細嘅就啱啲。我哋仲叫咗個芝士蛋糕，之後餐廳職員就拎咗蛋糕仔，因為訂枱有講慶祝生日，仲同我哋影咗張即影即有嘅相，好開心。不過有樣嘢可以改善下，唔知係咪每日都要講幾百次，介紹介到爛晒，啲script 快到聽唔到，如果可以慢少少就perfect🤣…Read More