jandine's Profile

主打生煎包既食店，都算對得住個招牌但其他嘢食一律免問‼️我冇試過食嘢，啲嘢食難食到吐出來🤮呢到既服務不錯，感覺到以食客為本等位期間不時聽到店員講：「最緊要食得開心」星期六晏晝都滿座，等位亦唔係等咗好耐可能就係因為滿座，令我既反差感更大牆上貼咗一個保證，而又真係每粒生煎包都好多湯水小籠包都有湯既，但個皮唔夠薄牆上亦有寫消費滿$60就有豆漿任飲，喺夏天嚟講，簡直係恩物，點知一飲，唔凍既！仲有帶有點「沙粉感」🤔重點就係呢個「糖醋炸排骨拉麵」，難食到嘔🤢佢個麵質似食擦膠，仲有啖啖既苦澀味湯底又冇味，落辣椒油都食唔到落去都係嗰句，好少食到食唔落第二啖，更要吐出嚟個排骨成舊都係肥肉，完全唔知食緊乜總括來說，呢間只係用宣傳同服務包裝既難食食店。…Read More

呢間係呢個星期極想推薦既餐廳，冇之一，餐廳勁靚，野食勁堅料！之前我係網上外賣平台 app見到呢間新加盟已經好想試，但我驚外賣壽司會肚痛，所以決定搵日堂食試試佢果然冇令我失望，有外在又有內在！佢位置都唔難去，近TimeSquare地鐵站，係百樂中心隔離；但如果未去過嗰頭/冇見過舖面都好難spot到，因為佢都真係幾細間舖頭係好細，多個位都冇，被人坐咗惟一兩個位既話，另外既人都只可以外賣拎走或者企係到食......所以話佢都係主打外賣佢地製作既食物唔算多，但貴在有特色。除咗有飽肚既便當飯之外，仲有特別系列既腐皮壽司同飯團，唔好以為佢地係小食咁簡單，食呢間野包你捧住個肚走，因為佢所有野食都比想像中大份！抵食！一去到店員就放低咗兩隻紙杯（題外話：紙杯既質素都幾高，耐熱又硬正），呢兩杯係麵豉湯。講真，都幾高質幾好飲。首先佢大杯又唔太鹹，例牌有既海帶同豆腐都好足料，蔥很香，唔中意蔥既吃貨記得事前叫走喇~飲完都有幾分飽我地嗌咗三件腐皮系列、一件飯團系列同一個便當飯，真係滿足到傻，真係好好味！「為食腐皮系列」係必食一來佢啲主餸唔屬於重口味食物，例如三文魚牛油果、蕃茄玉米碎蛋，有腐皮提升味道層次係好聰明既做法！吃貨若果覺得唔夠鹹可以自己選擇沾日式豉油~但呢啲都係其次，我覺得食店最出色既位係啲料好豐富同新鮮！特別係蔥吞拿拖羅蓉口感真係一流，因為食店使用既唔單單係吞拿魚粒，墊於飯面的還有一層拖羅蓉，真係不得了，必食之一！另一個想講一講既就係蕃茄玉米碎蛋，事關我食嗰陣都疑惑啲蕃茄係邊，原來佢係以「蕃茄飯」既形式作蕃茄既元素，實在令我意想不到，創意至於三文魚牛油果已經係我食過最不平凡之中既最平凡，又係冇諗過腐皮同三文魚+牛油果無論係口感上同味道上都咁夾，都好正！呢個飯糰系列我只係嗌咗一款，因為想嗌啲同魚生夾既款，其餘選擇（例如超級溏心蛋、川味麻辣雞）都偏重口味同埋係啲較創新既嘗試，所有諗住試啲平凡啲既先。我最後揀咗蒲燒鰻魚 GOOD啊！啲飯唔淋，有丁點既醋味，飯比餸多既情況下，都唔會唔夠味，飯糰整得好好，唔會好容易就散晒，鰻魚都大件，好味！呢間食店雖然主打外賣，但若過你經過見到有位，都不妨可以試試堂食想食，因為佢都不失為一個打卡好地方佢啲擺設都好靚呢個係「懶人系列」既爆汁肥牛薑蔥雞扒雙拼，青蔥洋蔥香不在話下，佢既肉都好味喎。肥牛又唔算真係好肥，肉都多既，味道就做得好似某牛肉飯專門店，反而呢間仲做得冇咁油，滿意~然而，對比之下我覺得雞扒做得更出色！雞扒皮脆肉嫩，整得好味，加上個燒汁係大眾口味，再加上薑蔥調多一重味道，應該都會受普羅大眾歡迎，雙拼黎講份量都算大了最後，呢間食店都盡自己企業責任 推廣啲啲環保，不使用膠餐具同膠容器，都值得欣賞既。佢不論係筷子、匙羹、都係木做既，質地相對上食得冇咁舒服就真既，不過為咗環保少少，都可以啦…Read More

服務態度好，食物種類多，味道還不錯我一去到的確係無咩人，心諗都唔知係咪入咗間伏野，誰不知......過咗一個幾鐘，竟然多人到座無虛席！呢間餐廳sell溫情，個人認為無論係姊妹兩三個、朋友一大堆定家庭聚會都可以選擇試一試，因為呢到環境多位置，仲有一個小房for大班啲既聚首一堂，坐耐少少都唔會趕你走餐廳有個主題既飯，叫「一舊Seoulmate飯」，聽名你或者會覺得冇興趣、睇樣都有機會會覺得個飯可能得個樣，但我想講佢唔單止打得卡、睇得、可愛，食落都仲好ok！呢個飯等得比較耐，可能因為食店每次都係收order即焗，一上到枱真係會熱親手！千祈唔好掂佢隻碟！我中咗招！「一舊雲」裡面有隻蛋，一督爆就流晒出黎，可完全唔膩，由於飯係焗既關係，所以有機會乾，加上蛋黃就啱啱好；加上佢既泡菜炒飯焗完好香，一𠝹開個雲朵就散發一陣蒸氣同香味，啲泡菜入晒味，成個飯熱辣辣又好食飯既雲朵部分應該係蛋白，食落去唔會甜，冇咩味，卻為每啖飯多加一層口感，好可愛！不過無可否認，呢個飯係偏貴咗少少。呢個小食（豆腐）又係睇得兼食得，色水幾好，豆腐裝滿晒成隻碟，好大份，豆腐亦唔會好水 唔會好易爛，再配合好重發酵味既拉絲芝，推介！最後呢個年糕就相對地膩，每一件年糕都沾滿卡邦尼醬汁；醬汁中有加入蛋黃少許肉粒同香草，年糕都熟得啱啱好，唔會硬，味道好，口感都好，事關我都好中意Q彈食品！不過呢個小食/主食就偏濟，個肚仔應該要預留一點空間裝呢碟澱粉質，因為兩個人食埋上面提及過既一個飯同小食後，呢個年糕都食唔晒另外，論到呢到環境、裝潢同間隔，都係唔差既。以韓國為主題，放住好多男團既相同精品，係SHINEE既fans就萬勿錯過~最後小分享：見到天花上有棧吊燈同個「主題飯」一樣，覺得好可愛…Read More

我知道呢間飲品店係香港既分店唔多，佢並唔係好出名；我認識呢間既事源係我行市集見到佢好醒目咁擺檔於炎炎夏日之下，賣著劃一價$35的不同飲料，就決定要去門市到飲，不出所料，門市係平少少既佢賣既飲品都同市面上既大同小異，size都好合理，價錢大都合理，係某一兩杯價錢有啲over但我覺得加珍珠只係$3，好抵（因為佢量極多，多到唔會食得晒）嗌咗一中一大既飲品，兩杯都十分好飲！！！！！左邊係碧螺春綠茶加珍珠（半糖少冰），右邊係檸檬蜜烏龍（半糖少冰）店員會於落單時候主動建議不同飲料既甜度，覺得好好！碧螺春綠茶加珍珠（半糖少冰），呢杯既茶十分十分濃郁，稱得上係我飲過台式飲品中最澀既茶，我好中意！如果唔中意茶香既就唔好試了。佢既珍珠係standard咗既細珍珠，雖然唔夠天仁既珍珠甜，但也是有咬口的，有啲味會更優秀！至於檸檬蜜烏龍（半糖少冰）係我無意想過既咁好飲！檸檬唔會太酸，酸咗第一啖會隨即有烏龍既澀中和，味道好夾！但飲到後面因為有冰溶，就無咁濃味，檸檬味隨後都無咁出，我會建議走冰我拎完飲品之後都越黎越多人黎排隊，呢到都有一個小小休憩空間。總括而言，我真係好中意佢既茶，佢茶既來源似乎好高質，茶真係好濃郁好香，會再飲的！…Read More

諗住放工食呢間餐廳，一心諗住食晚飯，都冇諗過食嗰啲all day breakfast，點知事後先知道原來呢間餐廳嘅all day breakfast都好受歡迎，唯有下次先食啦先講呢間餐廳嘅第一印象 佢既裝修就好似一間白色小屋咁，再加上佢加入好多遊樂園既元素 - 旋轉木馬，啲色襯托得好靚餐店外放咗餐牌同廚師推介，長期關上門，因為餐廳面向馬路，因此無侍應企門口歡迎也是合理。呢間餐廳嘅地方不太大 出入都有點勉強，同隔離枱都有啲近我地少少地兩個人 都只係嗌咗一個飯一個麵同一個小食， 本身都有諗唔知兩個人會唔會唔夠食，但原來佢嘅份量都夠兩個女仔食架噃（男仔就未必啦~）其實呢個意粉都真係幾推薦，因為先來係佢個忌廉好香好creamy，然後有啲蟹子喺上面，增加多一個層次既口感，最重要係佢嘅意粉！！有厚度、有咬口！韌度剛剛好，加上有兩條大大既蟹棒，啖啖肉，超級好食！再嚟係呢個黑松露risotto，佢既米係煮得熟透既，冇硬米！黑松露一上枱就已經好香，配搭有好多不同種類既野菌類，碟邊仲有啲香草點綴，成個色水都好靚，味道都做得好好~壓軸出場就係呢個水牛城雞翼！！影咗張相，雞翼係枱面已經有五分鐘，點知一食落去，食到佢既皮都仲好香好脆，裏面既肉質好嫩滑，溫度好夠熱，咬一啖已經出曬煙。個汁酸酸地又辣辣地，開胃又惹味，如果下次再黎呢間餐廳，一定一定一定會再點呢個小食，好值得好值得好值得encore！清楚貼住opening hours，費時要客人白等，也是值得欣賞的舉動…Read More

'Mamaday' 絕對係我呢兩個月暫時食過最好食既餐廳，所有野都好好食，睇餐牌啲食物同飲品名都可以令人笑一餐，令到我同朋友成餐飯都食得好開心，真心好想認真打一篇食評推介呢間'Mamaday'！佢既飲品選擇比食物多，餐廳仲有酒牌，有cocktail飲，選擇既可能性更多；加上食物有飯有麵有pizza有小食，所有基本野都有，花多眼亂，全部都好想試（ 由於upload相片有限，我見其他食評都有唔少餐牌嘅相，所以我po一張就算喇~簡單比吃貨們睇下餐牌嘅設計，真係又靚又有創意架）我地一入到餐廳已經見到滿座之餘，起碼仲有兩張枱等緊位。咁啱我地入去既時候係8:30，可能上一輪食客都食得7788，我地等咗一陣就有啲人走，店員雖然要我地等，但真係好熱心想幫我地咁，服務態度好令人滿意啊！ 餐廳既裝修都十分討人喜歡，如果唔係四周都咁多人，我都好想四周影下相，都係食前同食完後勉強影到少少，好想分享比大家睇下裡面係點，餐廳好有特色我地四個人入座，嗌咗一個意粉一個pizza兩個小食四杯飲品；個人認為食物價錢都好合理，但飲品就偏貴，竟然一杯飲品既價錢可能同小食媲美本身都有猶豫叫唔叫 但一場嚟到，俾餐牌上既名吸引咗，最後都係每人一杯嘢飲1.呢個主食係我超級超級推介先係佢一上到枱~啲木魚已經郁下郁下好吸睛，點知食咗第一啖，佢既吸引力更大大提高，我地四個人都已經讚口不絕！木魚既裡面仲隱藏咗一隻溫泉蛋，將碟意粉一撈就已經好香，裏面嘅扁意粉 硬度適中，有好濃厚既明太子香，味道又夾，口感又好，配合小小既配料 - 蟹棒同少少菇，已經十分香口，好快就清晒2.呢個pizza有別於平時用麵粉團整既pizza，呢個主要係薄薄一層香脆嘅餅，而佢嘅餡 食落先知 原來係薯蓉嚟嘅好特別！佢嘅千島醬同pizza上嘅菠蘿襯托住個主角，pizza上面嘅軟殼蟹絕不簡單！我第一次食咁啖啖肉嘅軟殼蟹！炸得好香好脆3.呢碟薯條...我地最後係食唔晒...因為份量實在太大，西餐嚟講都已經好抵食！呢個$58係大size，（有三隻味道揀：原味、明太子、芝士粉）我地揀咗芝士味。餐廳並唔姑寒，幾乎每條薯條都有被灑，撈得好均勻；至於佢既香味，令有都不太有罪惡感，因為佢無油膩既感覺。除咗有一陣陣芝士香味之餘，食落口又唔會好膩，反之，芝士既不膩，味道甜甜的，好好味，薯條都係新鮮炸出嚟，又夠熱又夠夠味，好適合配主食同飲品一齊食3.同樣地呢個小食都有三個味道揀：微辣原味、蜜糖芥末、芝士粉 我哋就揀咗個稍為特別少少嘅蜜糖芥末味，佢嘅份量不多不少，有六隻雞翼。佢嘅芥末味道比蜜糖味更突出，所以我哋食到攻鼻嘅感覺比甜嘅味道多，整體味道都好食，但有少少挑剔就係：雞翼嘅肉唔夠嫩滑，肉未夠啖啖肉最後，四杯飲品可以話各有特色 我先講前面紅色呢一杯。佢嘅味道分明，話明係洛神花柚子茶，佢嘅洛神花同埋柚子既味道分別都好出眾，味道偏酸，同正常洛神花茶可算是無異，特別既係飲既每啖都會有陣陣嘅柚子香，飲到差不多底 仲發現有啲柚子肉可以食，令人開胃係同一張相，後面淺橙色嗰杯沙冰主要味道係來自檸檬皮同烏龍茶。對於我嚟講味道偏淡，可能因為我飲咗落神花嘅關係，但係我嘗試飲啖水清清個口，都飲到有輕輕嘅烏龍味，都可以有解渴嘅功效值得一提既係沙冰打磨得好，唔會飲晒啲水份最後淨返一堆冇味嘅冰，味道清新~呢杯三比七比例嘅芒果蜜桃梳打~比例~我朋友就飲唔出喇 但係根據朋友嘅描述，佢嘅味道都係好清新，飲落去係梳打，都好爽好gur架最後係呢一杯咖啡沙冰！佢應該係咁多杯嘢飲裏面最特別同最重量級嘅一杯朋友話呢杯嘅咖啡味超級濃郁，佢放喺上面嘅焦糖脆脆，係有啲太甜既，唔鍾意食甜嘅朋友 應該覺得超級~頂級甜，但係唔緊要，個重點係個沙冰，啲冰碎同咖啡融合得好好，好香好香十分香濃，，值得，推介！！…Read More

呢間其實係一間地鋪，店舖設計都頗開揚的，而且還面向馬路，但佢廚房都唔係向住馬路，都可以放心食店一定係睇中香港人中意打卡而有呢個「即食雞翼」既概念，個人認為食店既market雖然窄，但我欣賞佢好有創意，睇準社會趨勢同各吃貨既喜好（覺得普遍人都會中意食雞翼），加上裝修都唔錯，有一個打卡位，寫住「不要儀態，只想吃雞翼」，都幾有gimmick，啱晒中意打卡一族，尤其女士；裝修、餐牌、包裝主要都是粉紅色，真係好少女風啊呢個backdrop我都無特別影，相信其他食評都唔少我同朋友都係第一次咁豪爽咁食雞翼，話就話佢係一間小食店，但我地兩個女仔都可以話直頭當埋做晚餐，都好夠飽有九款選擇，有港式有泰式有西式有「花式」，款式都好有創意同都幾吸引，因為市面上餐廳都好少有咁多特別味！另一方面就係佢有幾個「點餐方案」，都好睇吃貨想食幾多款味道既雞翼記得做個精明消費者半開放式廚房 － 八卦既我好似記者咁偷影咗入面，見到裡面得兩個人默默耕耘，即叫即整，真係收單即整，環境都尚好、整潔由於佢地太多客，太多單，就連外面工作既職員都間唔中入去幫下手，合作做好每一單生意講番食物方面，我同朋友每人嗌咗兩款味道，每款四隻，人均消費＄70多佢地啲包裝都好靚，每人會有一包手套，一包有兩隻，用完都無成手油，品質保證；加上每碟雞翼都有一支旗仔，應該都係打卡既道具事後仲可以撩牙添！先講文青風玫瑰 － 有濃濃既玫瑰香，一拎上手熱辣辣，係熱到拎唔到好耐！新鮮出爐，好~好~味，最中意呢隻味，每啖都有甜味，似係炸完後再有塗上一層蜜糖再煎，最後灑上玫瑰既花瓣，食得架，每啖都食落好香口再之後係港式避風塘蒜香 － 又一最愛，完全無後悔叫咗呢兩款，第一個評價係：好重料！一睇就知餐廳唔吝嗇食品質素，灑係雞翼面既蒜香粒絕對係𣎴可少，係精髓！每啖都有蒜粒辣椒，真係不得了，好火辣，冇野飲實在搞唔掂，但真係食到停唔到口，太惹味，好似我咁中意食辣既吃貨切勿放過再之後就係黑松露蒜香勇士 － 一拎上手，陣味已經攻咗入鼻腔，相對地，呢款雞翼既蒜香就唔算好出，因為都比黑松露既味完美地蓋過晒；再加入少少紫菜絲作點綴，口感都變得冇咁單調~最後就係濃味三重芝士流 － 呢個選擇確實係令人又愛又恨一來佢絕對係愛芝士之人既必點之選，事關目測之下，認為雞翼中有最少有兩種芝士，第一種撒喺面既係芝士粉，第二種再淋面既係熱熔既流質芝士，足料得黎好邪惡！酵味好濃！但溫馨提示：如果你有叫其他雞翼，建議你最後先食其他，如果唔係搞到成手都係芝士，食其他就唔方便了點知，去到最後一刻我地戰敗，食唔晒要打包店員雖然好忙，但好盡力做到令個個客人順心，好有心機咁幫我地裝外賣包番去，好好啊！仲十分符合衞生，用適當廚具滿載而歸，新既一樣，包裝好user-friendly同好靚啊，有齊晒所有需用物品送上一張大合照各位吃貨食完後記得利用你眼前既鏡，並善用啲旗仔撩乾淨啲牙先好走啊~…Read More

第一印象係：自己有如身在台灣論燈光、論裝潢、論服務態度，呢到又welcoming又warm，就連溫度都暖過人溫馨提示：觀塘原來有兩間「哈豆」，check清楚食邊間 唔好去錯啊佢係工廠區內營業，人流比我想像中多，一入到去都唔多空位淨，有group gathering、有情侶、有姊妹等等，因此我諗呢到都幾適合唔同類型既聚會，係一個好地方餐廳牆身佈滿台灣唔同既地方既地標地方，好靚講返食物方面，我同朋友分別嗌咗一個主食、每人一杯飲品同一個小食先講我既主食啦我呢，就揀咗呢個飯。呢個飯並唔dry，皆因佢既肉燥夠晒汁，有味濃既豬肉味，夾雜住一點點肥脂粒，因此並唔會乾曾曾得來 仲好夠味；至於佢既牛肉，啖啖肉，似係牛𦟌咁，厚身 有咬口，亦唔辣；配送兩隻juicy既雞翼，翼面有一層厚厚既汁，雖然我唔係好肯定係咩汁，但佢甘甘地又甜甜地，似燒汁。仲有多籮籮既配菜，有滷蛋、西生菜、青瓜、菜脯菜脯十分調味，好爽口，夾埋一齊食好好食 十足冷盤咁而我朋友就叫咗呢個麵食抄我朋友講句：食台灣嘢點可以唔食牛肉麵又啱喎，所以我都唔執輸，試咗佢啖最精髓既湯底。一枱，佢好香，聞到好濃郁既藥味，點知試真啲，個湯一啲都唔苦，然後望真啲個餐牌寫既字，發現我個鼻都幾準湯底果然有使用藥材，聲明咗有加入牛腱、牛骨煲超過八小時而成，唔怪得咁香啦佢既牛肉同我碟飯既牛肉係一樣既，所以我都冇多試（吃貨可試試既，雖則佢價錢係above average）尾二我要講既就係呢個拼盤。款式望落唔特別，份量亦唔多，但少年你太年輕，佢勝在款多，味道特別，尤其是甘梅薯角。但衰在個量唔係雙數，吃貨可能就要同朋友share了，有夠sweet的拼盤當中有四款食物，有香腸、鹽酥雞、蝦捲、丸子同甘梅薯角。而佢既丸子我諗係隨機既，而當時我食既就係牛丸，唔知有冇食錯呢；佢既雞粒稍微唔夠香脆，但勝在唔厚粉最最最中意就係佢既飲料朋友飲「黑白珍珠豆漿紅茶」，換言之係將平時既珍珠奶茶加啲轉變，加入白珍珠，並將奶轉為用豆漿。整體感覺好健康，味道偏淡，淡淡清清既豆漿味，好新穎有趣，而黑白珍珠係無分別既，係影相都靚啲；至於右邊既哈豆鮮果茶，我諗......係招牌飲品？好好飲啊！茶味濃又澀，配合淡淡鮮果香，好多新鮮生果，有蘋果、雪梨、橙、提子、桃，真係好fresh，好中意！其實餐廳仲有好多唔同類型既食品，最為特別既係火鍋同關廟麵，下次可以試下；見火鍋都有林林總總既湯底，有啲仲有藥膳既添！…Read More

一如既往，我喜歡吃辣，無辣不歡有火鍋、燒烤（串燒）、粉麵飯、涼拌、水煮、烤魚、小炒、鐵板、精品菜類，花多眼亂尤其食到窮窮地既小吃貨就要好好選擇喇先係我一去到歐美廣場，有一個店員做帶客的角色，問我地搭定行樓梯，如果唔係佢帶我地，正常人都好難知道其實係有上~唔洗行幾層樓梯咁辛苦七點一入到去，得幾張卡位有人坐緊 食緊，當時既我心裡只係諗：唔通係伏既....！之後食食下到咗八點幾九點，差不多滿座咁濟啊份量黎講，我同朋友都想食多啲款，所以啲餸都只係叫咗例牌咋，而例牌既份量兩個人都真係啱啱好架喇酸辣粉（點解圖上載極都係倒轉(๑•̀ㅁ•́ฅ)）食川菜必備就係呢味！薯粉好有韌度，不薄不黏，吸取湯底味道既程度好高，啖啖實在入味，覺得好味；面層既油睇落好過份，但食落都唔會好過份，而份量都不多不少啱啱好。至於我係好中意簡單既麵食既：有麵有湯/汁 配菜也是可有可無，所以我冇加到餸，但都好滿足了，呢碗有既係花生同炸菜，正路飄香辣子雞呢個餸大概係一個驚喜。其實呢味餸有兩個選擇，一個有骨一個無骨，而兩者只係相差＄6，懶惰一派放棄咗食有骨的（雖則估有骨應該會啖啖肉同滋味啲）。上菜看得到佢雖然係滿缸紅，但肉粒也是不少的，食極都有；有一種尋寶的感覺，也是令人食得滿足的！調味方面，餐廳偏向重口味，肉粒經過油炸的過程後，食得出加入調味粉，我猜主要有孜然粉~樟茶鴨皆因一份好奇心，就臥薪嘗膽試一樣未聽過既菜式（或許係我孤陋寡聞）。我唔知道佢係點烹調出來，但我可以形容既係口感有啲似燻蹄，味道有濃烈既煙燻味道，好特別，我特別中意佢煙燻既香濃，惟一可惜既係佢肉質有啲乾，但應該係烹調既結果吧，都值得吃貨們試試架！紅糖糍粑我其實就未食過既，而我朋友就食過一間好好食的，呢一個甜點好唔好食就唔係好懂評論，個人就覺得頗特別，外脆內軟，黏黏的，更有點黏牙，冇沾醬及粉是冇味道的！不可缺少它！醬的味道有啲似川貝枇杷蜜新穎川式回鍋肉（另外呢一味餸因為技術問題無相，抱歉！）佢既味道好夠辣，送飯一流，加上佢有蔥及韭菜調味，令味道更豐富，中意食肥豬肉既一定要試試！再讚讚一提選擇確實也是蠻多的，可再來試試其他，而店員亦有推介菜式，好客有禮…Read More

平時喺寶琳嘅車路經過都見到呢一間食店 心諗：咦，個樣好似幾好食，覺得佢排面都幾冠冕堂皇！於是前幾日就去一試大約夜晚八點鐘去到餐廳，發現都有幾批人排隊 真係估唔到，咁普通既一個地段都有咁多人去，唔知係咪都係附近住既呢係門口見到裡面係......滿座！我已經抱有好大期望去食佢既嘢食了等咗都唔算好耐，就有位入。入到去，見到隔離枱嗌咗勁多嘢食又勁多款咁，有串燒、壽司、手卷、飯等等，多數都嗌大量串燒；但我當日喉嚨痛，就諗住下次再試！裡面裝修都以金黃色做主題，壽司 魚生部為開放式廚房，一目了然餐牌選擇多不勝數，食物種類繁多。因為相片上載有限，我都不能show到所有類別，用文字讓吃貨們體驗有何等多既選擇！有魚生丼、飯類、定食、天婦羅、串燒、燒物、沙律、前菜、卷物、手捲、小卷、丼物、鍋物、麵類、御飯....真係不得了，餐廳仲有二人餐供給選擇係云云既選擇中，我最後揀咗魚生飯！真係必食！零後悔！我特別欣賞當中既醋飯，酸中帶點甜，十分特別，與店外一般既壽司、魚生飯都不同，處理應該有點特別技巧，十分喜歡；加上魚生數量也多，有三文魚、吞拿魚、帶子、鰹魚，它們圴有鮮味、新鮮，不用醬油也足夠佢附上亦有沙律及味噌湯，前者為薯仔沙律，好夠凍，好正，食晒！後者既料豐富，又唔會好鹹，裡面有香滑豆腐粒、大大隻蜆、海帶等，都好好味朋友就食咗一個安格斯牛定食~presentation幾靚，幫你切埋，加一碗白珍珠飯，包你捧住個肚走。牛肉雖薄，但牛肉汁同牛肉香係口腔中揮之不去，好好食又勁香，此亦是一個好選擇！小食方面，就嗌咗一碟魷魚，大碟夾抵食，切片 份量也大，送飯都正。汁偏甜，燒烤既程度剛好，唔乾，啖啖肉，又唔會「咬唔完」Last but not least食店在安排入座前已為客人斟了水，不時也及時加添，服務不俗桌邊也放置適用調味品及牙籤，預備點到即止餐具亦有主題，美美的同時，店員也後窩心為論盡既我及時提供一個籃子放袋及外套，觀察客人需要入微，好值得欣賞…Read More

好幾個月前去完泰國，當時瘋狂日日食辣 食泰菜，真係食到嘴都歪，因而返回香港後都甚少食泰菜；加上去完泰國食泰國既嘢食，當時已經覺得香港煮既泰國菜不及當地質素，所以都很少再試。日子過後，想念泰國了，就係九龍區中間啲既位置找間似樣少少既泰國餐廳重拾味道通常啲人都會去九龍城 但我那天嫌遠了餐廳既裝修都符合住主題－「車站」，有特色！門前放咗一個stand放餐牌，唔hard sell，任由客人選擇進唔進入餐廳，感覺好和諧隔離仲有一塊黑板列明餐廳聘用既係「全」泰國廚師優惠期間仲免加一添啊，吃貨快啲把握機會去食啦！餐廳大部分客人都被安排坐係旁邊既卡位（影唔晒），餐廳面積都好~大，位置好多，加上當日閒日，相中好似好空曠，但閒日黎講都算ok人多了呢度預備都幾充足佢有一壺熱水畀客人自己斟水啦 另外仲有餐廳上菜速度好快，所以好肚餓既我都影到全部菜我同朋友一共嗌咗5樣嘢食，真心既 每一道菜都似正宗味道，好好味！「泰」好味！最先上枱既係蝦炒金邊粉。佢既份量都唔細，一如正宗泰館 有花生碎同青檸俾我地自己按喜好調味，裡面有蝦、蛋、扎肉、蔥條、芽菜，十分豐富！麵既韌度適中，炒得幾好 唔會好乾身，所以唔會放一陣就一份餅咁至於冬陰公，佢好好好好濃味，完全體現泰菜精髓！！酸到一個點又辣到一個點，要用其他野食balance返個味蕾，令人覺得自己身在泰國，必點！事關呢個菜唔單單足料，佢presentation都好好；並非係廚房煮完就上碗上碟，而係小鍋煲住上，保持溫度且越煲越濃味，如果吃貨食得落既話，加埋白飯一齊食就啱晒！勁足料，裡面有好多香料 eg香茅、辣椒，每樣都煲出味來，仲有大大隻蝦🦐但放心！餐廳已經窩心到去咗殼，唔洗咁麻煩 大讚通菜同串燒係喺泰國必點之菜，又點可以唔食下香港餐廳煮成點呢？坦白講，通菜既話，係香港呢邊出色啲！至少我覺得菜既質素高啲，加入調味（有醬油 辣椒等）後整條菜都爽口入味，十分推介！食啲咁濃味既嘢食，冇菜又點得呢~串燒方面，由於我地得兩個人，又已經order咗咁多嘢食，只係嗌咗半打，兩豬兩牛兩雞配有地道沙嗲醬肉質黎講，雞係最好食既，另外既牛同豬相對地較乾身；而個沙嗲就好惹味！唔太辣，仲甜甜地，，可以比小朋友小試牛刀。加上佢既竹籤都好乾淨，唔會整污糟手最後就係生菜包！最愛！去泰國都唔會咁放心食，始終覺得泰國唔係好乾淨，乾淨呢方面始終都係香港勝一籌！生菜包肉碎既肉香比香料強，可以清楚地食得出味道，肉碎夾雜點脂肪，增加口感，加上佢味道真係冇得彈，既正宗又夠辣，辣得黎又不失辣香，唔會得個辣字；而且佢既生菜都幾新鮮，仲洗得幾乾淨添總括來說，餐廳選擇種類十分多、整潔、煮食正宗、員工好客、上菜快落單後發現原來枱面上有放著點菜紙，但員工都冇怪責我地做法不當，反而有禮又好客地照幫我地落單，有良好服務態度…Read More

自問都幾得閒既吃貨 即係我，就係要成日做遷就食飯既地點，而前幾日我就搵朋友食晚飯，去咗佢工作地點附近既工廈，食佢所推介既餐廳喇之前都有聽講過同睇過某啲告示係話工廈既餐廳不准對外開放，所以如果唔係喺附近工作同居住，又冇朋友帶我黎，都好難知道呢到有一間咁平、靚、正既餐廳好餐廳真係要多推介，尤其呢啲非對外公開餐廳，真係要好好支持先可以繼續有抵嘢食！係街道上 地鐵站斜方向望去餐廳位置，本身已經好易搵到 事關佢紅色既外框都頗搶眼，但會見到向街既正門封住咗，相信如果唔係朋友帶路推介，見到呢個局面 大部分吃貨都有機會選擇食其他不過！同時餐廳有提供清晰方向指引，事實並唔難去相信餐廳係sell溫情，佢唔單止係入口印住四個大字「等您開飯」，連餐廳裡面既招待、餐牌上既選擇都令人感到賓至如歸！好講得太多食物以外嘅嘢 係時候言歸正傳！其實今次同朋友嘅晚飯都係輕食居多，因為朋友好鍾意食雞翼，所以我哋都嗌咗一個飯share同食咗兩款雞翼 再加兩杯嘢飲一齊飲。就係咁簡單就一個晚餐啦先講返上圖個蛋包飯 － 「富士山蛋包王」，佢嘅份量都幾大， 屬於特盛二人分量，但啱啱夠晒我地三個女仔分！ 呢個飯本身default有兩隻吉烈蝦，再要我哋從肉類四揀二，而我哋就揀咗巨人漢堡扒同板煎雞扒，另外冇揀既係紅酒燴牛尾同厚切一吋豬扒~下次有機會都好想試埋！佢嘅吉列蝦炸得好鬆脆，外脆內熱，蝦既水份在皮內保持得適量，唔會影響到外層； 雞扒嘅size都大，也很容易處理，雞肉嫩滑，皮脆肉暖，配上蒜蓉汁係一個好好嘅配搭；至於巨人漢堡扒係我覺得最值得推介既選擇，又厚切又大塊，真係啖啖肉，加上佢既肉質好juicy，再配合埋黑椒汁 帶出佢嘅肉味，每一啖都有濃郁既漢堡味道，冇雪藏味，實在令人食過返尋味，份量真係同某快餐店嘅漢堡扒比較差距大了！ 雖然佢同傳統嘅蛋包飯有少少唔同，佢嘅蛋並冇包曬所有飯，而只係鋪喺面，但係佢嘅蛋既烹飪技巧十分好，半生熟 恰到好處上圖係「水牛城辣汁雞翼」。呢個價錢一碟6隻，佢嘅雞翼炸到好香脆 經過炸嘅過程，但並冇碗碟油裏面嘅肉都好嫩滑，皮肉分明。而佢嘅重點就係個水牛城汁既酸又辣，符合返水牛城雞翼嘅正常標準，十分推介！畢竟而家亂整水牛城雞翼醬嘅餐廳太多了，正常質素已達中上水平喇~而另一款雞翼就係上圖嘅「芝士蘑菇釀無骨雞翼」！ 佢嘅雞中翼部分拆咗骨，保留原隻雞翼尖，釀咗芝士同埋磨菇係雞中翼嘅裡面。雖然冇拉芝，但濃濃嘅芝士香融入咗蘑菇既面層，陣陣既菇菌味從後勁湧出，好滋味雖然每隻價錢略為偏高，但手工值回票價，呢個雞翼亦有店員親口推介，值得一試！吃貨們或許會疑惑點解三個人只嗌兩款嘢飲 而我哋嗌嘅係「夏日水蜜桃草莓綜合水果茶」同「青蘋果綠茶」，因為前者係屬於二人份量，所以我哋只係叫咗兩款飲品三個人share！ 水果茶嘅質料真係好驚人，佢唔單止成jar上，佢裡面嘅料都好豐富。唔只有水果香味，佢係直頭有水果係裡面，再加上奇亞籽，飲入口真係透心涼，好清新㗎！至於青蘋果綠茶 係我最鍾意嘅飲料 話晒佢都超人氣no.1，我不得不試啦~青蘋果同綠茶配合得非常之好，青蘋果同綠茶嘅味道做到相輔相成，既解渴又新鮮，食濃味食物過後為口腔帶來了fresh既味道呢到既環境寬敞，遺晚市有點不尋常既冷清，可能因為佢不能開正門，好少人會留意到呢間好餐廳，希望睇到呢篇食譜既吃貨去開荔枝角就支持下啦少少溫馨系列：餐廳仲溫馨到有包紙巾可以拎走仲係特別設計添 睇下後面張圖…Read More

一心諗住食某某冰室，點知睇睇下menu覺得唔抵，最後就留意到對面有另一間冰室叫「初心冰室」，個名好似幾warm，所以最後就食呢間講番先，其實呢間餐廳都幾就腳，幾易搵係旺角地鐵站B3出口一出，直行上天橋之後，係最近既一條樓梯落去，行多30米就到！正正就係著名某某冰室的對面，好似搵到架咋！一開頭從對面街口望過對面，會見到一度趟門係關上的（感覺都唔差，因為我都比較concern灰塵既問題；餐廳對外就係馬路，如果開住門感覺就不太衞生），而玻璃門內就企咗一個侍應，感覺好welcoming一步近門口，侍應就已經好好客咁開門比我同朋友！至於內在環境，我係比滿分。先係環境清潔，佢張枱有啲磚，頗有特色，而店內四周都有不同復古 懷舊感覺既裝飾、英文鐵牌、相框，好有心機經營然後係佢既燈光，食店內感覺暗淡浪漫，但佢每張枱既上方都有一棧唔刺眼既靚靚燈，光亮度適中，足夠吃貨們睇menu又添點舒適既感覺menu方面，由於我食既係晚餐，我見到有dinner set餐牌及主餐牌（即係散嗌）兩款（吃貨們可以碌到最底，我會upload到食評的最後）。而最後我同朋友就order咗一個小食 + 一人嗌一個dinner set，包主食、餐湯、餐包、飲品、甜品，正正係一個完整既dinner，所以我地都好滿足賣個關子我叫咗當日D1餐：香草芥末籽燒紐西蘭羊架配燒汁飯（七成熟） + 熱檸茶而朋友就揀咗D2餐：烤美國穀飼西冷扒配黑松露野菌汁意粉（七成熟） + 熱檸水先講主菜前既食物（而家打食評都想再食）。朋友加咗$10加個酥皮，而湯係一樣既，都係忌廉湯先客觀地說，佢個湯去到差唔多飲完都仲出緊煙 尤其係朋友個酥皮湯，好夠熱 勁正；我覺得個忌廉湯既texture幾creamy，並唔水 亦無水浮面，即係佢既份量比例教得啱；個味道都唔會太鹹，裡面仲有不少蜆肉，無味精味而朋友湯上既蘇皮好香又好鬆軟，感覺有多重層次，我亦痴咗少少試下，佢個口感外脆，同時都有濃濃既烘烤香，$10絕對加得過，十分有驚喜！其實本身我地無預到有餐包，佢上餐湯既時候已經surprised。至於佢個包並非平時既餐包，佢只係輕微烘過既多士，個湯飲得7788先食包，本身已經有啲濟，樣子不討好，本身試住放棄佢，為免浪費就食下 點知食食下又幾特別，而特別既位係包裡面佢有香草同類似黑椒既籽，自己好少食到香香地，沾下個湯食又幾夾主食部分，先講羊架佢份量都幾大！有三件羊架，配有另上既燒汁，飯有一大碗 有香草作點綴。我嗌既羊有七成熟，啱啱好，肉質唔乾，十分juicy 有香濃既羊膻味，正到.....好食過平時放題既羊架十倍，啖啖肉！根係有既，痴咗係骨架到，每件羊架都好易處理唔沾汁都無問題，夠晒味，最後我用咗啲汁撈淨番既白飯食~因為佢個汁都幾惹味呢個西冷牛真係不得了，大塊已經不在話下，易處理 易切不突止，啲肉質既又軟又充滿肉汁，整塊都係肉，呢塊扒高質到不得了，食咗兩啖仔都意猶未盡見到朋友既意粉雖然睇落比飯細兜，但實質真係唔需要咁多意粉，食塊西冷牛扒已經滿足到不得了！佢既意粉應該係即煮即上，一路食一路冒煙，意粉並唔乾身，唔似普通茶餐廳啲烚意，很好~佢話就話係炸雞翼，但唔止有炸咁膚淺，貴係有原因架，佢雖然menu無講，但實質上佢係釀雞翼（絕對係睇食評先知既資訊）除咗雞翼尖之外，佢其餘部分係無骨架！雞翼本身就好有味，唔會overcooked，裡面仲釀咗磨菇，好香口，不過不失；雞翼尖並無皮包骨，有肉，值得再食！到最後又有多一個bonus：雲呢拿味雪米滋真係滿戴而歸，大滿足，希望食店可以繼續提供優質食物俾吃貨日子過多一排都真係做得到不忘初心啦…Read More

話說當日我同朋友book咗位食夜晚7點，但搵路都已經搵到遲到；我地跟住openrice個地址去搵相應既工業大廈，係觀塘站出 沿住近消防局既行人路直行，見到一期但個閘鎖咗，於是我地就等一陣，等到有人出黎。我地一入到閘已經覺得有啲怪，心諗點解咁冷清，行樓梯上到二樓就覺得格局有啲奇怪，見到餐廳牌名 硬住頭皮入去之際，原來我地去咗後門入一入到去我地都一臉迷惘，隨即就有個店員行近，帶我地去正門睇番訂座名單，佢地店員多 態度都好友善我同朋友一坐低，都一致評論 覺得呢到好多位，唔洗book位都得，但點知就越夜越多人，吃貨貨如果8點後食最好就book位喇我地嗌咗兩個dinner set + salad bar，其實我本身就對salad冇咩興趣，但因為朋友崇尚健康人生，最後都係加咗$38跟salad bar！佢既沙津Bar都係一啲大路野，羅馬生菜、火箭菜、三色椒、切件蕃茄，亦包括一啲調味，例如沙律醋。而另一邊則有冷盤，有螺肉、中華沙律、帶子邊等生冷食物。也有車厘茄及啫喱糖等伴碟小食，大部分都很夠凍，因為都皆放在冰上冷凍著呢間餐廳食物選擇多，有沙律、有飯、有意粉、有扒類，花多眼亂，最後就揀咗一個魚同一個飯，諗住後加嘢食，但最後發現原來都夠飽！佢附有餐包同餐湯，而當日就有週打海鮮湯和雜菜湯兩個選擇，我同朋友都揀咗前者。先講佢既餐包，餐包上枱唔會凍冰冰，而係暖的，加上外皮帶點硬度，相信係有烘過先送上枱，我個人是十分滿意的！而湯就好creamy，有好重既忌廉質感，十分足料，有大量的蜆，而蜆也很彈牙，並不老香煎三文魚柳配藜麥沙律佢份量好似好少，但食落都幾頂胃，因為話晒菜都係纖維，再先前仲食咗沙律吧，雖然係duplicate咗，但其實兩種沙律都係有啲唔同既。呢個set既主要味道係來自水果，桃味重，整個有桃香的調味佈滿整個菜式，味道清新、新鮮，配合藜麥，感覺十分健康！至於主角，三文魚柳，佢所用既烹調方式係香煎，而結果的確能夠做到外脆內暖，肉質唔會粗糙，三文魚的香味突出，無骨，十分方便食客個人十分推介呢個香煎帶子黑松露意大利飯首先佢既樣貌已經好吸引，亦有香草作裝飾，整個set好有美感；加上佢甫上枱，好重既黑松露香氣已經湧入鼻腔，真係令人垂涎三尺再細味一啖risotto，粒粒分明，附上好香濃既黑松露香，充滿整個口腔！佢既帶子都好新鮮彈牙，令人食完想食。而佢最特別既莫過於珊瑚狀既裝飾，一開頭都有懷疑可唔可以食，仔細看看原來佢係炸咗一層粉既金菇，呢個創意絕對能為賣相加加分！而佢既飲品都並不遜色，我同朋友一杯凍飲一杯熱飲。我飲既係藍柑檸檬梳打，而朋友飲既係玫瑰咖啡雖然呢杯飲品係藍色，內裡亦有一粒柑子，但絕對唔係「藍柑」呢個名既來源，根據店員解述，其實藍柑係一種植物，我飲落去講真就飲唔到味道既獨特性，可能藍柑既味都被檸檬蓋過了，但講真呢杯野真係好好味，唔太甜朋友呢杯玫瑰咖啡我只係品嚐咗一口，佢既玫瑰香一邊在嗅覺上發揮作用，同時飲落口既咖啡味都好香口，果真咖啡如其名，一個成份都無少，建議唔落糖都okay到最後，係正門走，原來佢正門好靚架，好有童話既感覺，門口亦貼咗好多明星的面孔，估唔到呢間餐廳原來都幾出名…Read More

呢排唔知點解成日係IG都見到有人食616既牛肉火鍋，睇個樣都幾吸引但又唔知貴唔貴，於是就上Openrice search下「616」。誰不知原來係咁多分店，心諗 無理由唔搵間試下掛！於是夜晚就就朋友返工地點，選擇去西環分店，放工就去食餐好既！地理位置都頗方便，有叮叮站會到，落車後就行入住宅區同市政大樓方向附近都比較寧靜，店舖位落於街道既中間，吃貨可能要俾啲眼力先搵到，但一入到去真係眼前一亮，佢既裝潢真係好impressive，十分港式！十分有兒時感覺！佢有好多裝飾品都係舊時既遊戲機、玩具、糖果、甚至用字（洗手間外印有「 茅廁」一詞），令人感覺好親切，好有特色，來打卡都不錯好特別啊真係！！我一入到去見到唔係好多人，位置寬敞，坐坐下就越黎越多人。果然打邊爐係一家親既最佳活動項目，周圍既枱起碼4位或以上，仲見到有韓國人係到暢飲添啊言歸正傳，都係講番食物方面。呢到係電子點菜，清楚列明各類別的食材，清晰可見！我一開頭見到勁多牛肉既名，已經一頭霧水，完全唔識分咩名打咩部位，幸好order嘢食既時候，部機附有啲描述，有啲有雪花紋、有啲肉質「林」啲、有啲有咬口啲、有啲來自不同國家等等等，林林總總，有好多選擇，最緊要揀啱自己想食的揀完嘢食，等食之際，就當然係時候去拎調味料啦由於佢材料區太完備，又整齊妥善又乾淨，我忍唔住記低有啲咩選擇：辣椒油、秘製牛肉汁、蔥、指天椒、蒜蓉、芫荽、炸蒜、沙茶醬、陳醋，而最特別既應該就係秘製牛肉汁，果然係食牛之店！不忘調味都加入牛肉既元素先講講個湯底。我同朋友都中意食辣，但又怕太辣，於是做咗一個懦弱既行為，就係order鴛鴦麻辣牛骨湯底！之不過，都唔好睇少佢，佢對我地黎講都真係恩物來，因為個麻辣真係好足料，好辣！我地無特別要求麻辣湯底既辣度，但佢都真係辣得好過癮，我地覺得辣既同時又幾中意，食食下又可以食下牛骨湯嗰邊，呢個湯底既選擇真係無敵佢既牛骨湯底配合咗粟米同白蘿蔔，非常清甜，同時帶點牛既肉香，味道豐富唔頸渴，相信並唔係味精湯，而係真材實料滾出來的湯底！至於佢既麻辣湯底真係又麻又辣，當食物吸取其辣油之際，真係好惹味！我同朋友叫咗三款牛肉，分別係吊龍伴、安格斯橫隔肌同牛駝峰真係各有千秋。首先係吊龍伴，佢有肥有瘦，脂肪分佈平均。根據佢印喺墊枱紙描述，呢款牛肉係只需要落鍋6秒便可，但就我而言我就覺得6秒既效果有啲太生，我會建議吃貨多滾佢兩秒呢款牛肉既時間掌握真係要好小心，不能太耐因為一不留神就會變得太熟 好「鞋」，到時就嘥咗一塊靚牛肉！吊龍伴既肉汁好豐富，滾熟佢既同時佢不但能夠吸到湯的香辣味，亦能夠鎖得住本身牛肉既肉汁，味道十分香口，如果你兩舊牛肉一齊食，真係會食到個口滿咗一半肉汁，好有滿足既感覺第二款就係安格斯橫隔肌，呢款係我次愛佢既肥肉唔多，好適合女吃貨，而個重點係，佢既肉味既突出！有最香口既牛肉味，佢切片狀，所呈既表面面積都大，可以食到啖啖肉，好正最後呢款亦係我最愛，佢份量唔算多，所以對我同朋友來說都好珍貴，因為佢係我倆的最推介！我地跟據食店於墊枱紙上既推介食法更係不能自拔！佢不單擁有上兩款牛肉既優點 - 有肉汁、有肉味，佢更係夠鬆軟。佢既鬆軟唔會太over到好似入口即溶冇晒口感，而係有咬口之餘你係唔會食到有根，繼而再配合秘製牛肉汁加入甘橘汁，甘橘既酸味刺激味蕾，令舌頭更能夠品嚐到肉既鮮味，真係好好食，肉同醬汁配合得好好，係一個又新穎又成功既調味至於配角方面，我地叫咗紫菜卷、牛肉餃、野茵雙拼同唐生菜。紫菜卷其實佢係響鈴，但呢個就用腐皮再包裹多一層住紫菜！本身響鈴已經係打邊爐不二之選，原來響鈴加紫菜仲好味！佢倆樣嘢食自身既味道經過兩三秒湯底既洗禮就更突出，又脆又香口，味道配合亦無主次之分，好正至於野菌雙拼則有兩款，應該係秀珍菇同柳松菇（我不太肯定），菇類都好有野菌香，尤其係柳松菇，佢擁有好濃既菇菌味，吸味能力都好高！而秀珍菇同唐生菜都洗得好乾淨，我地都食得好放心比個近鏡牛肉餃各位吃貨看看，佢內裡既肉既質感有啲似平時酒樓飲茶既牛肉球，但佢就更香口一點，加上佢無得輸既餃子皮，皮薄又煙韌，百吃不厭！不得不提係佢既飲品，食店主張自家製飲品，最有特色既就係菊花桂圓露同洛神玫瑰茶我可以講既係，我好欣賞佢真係飲品如其名，真材實料。前者有菊花既滋潤 清新既味道配合著有餘韻既龍眼香，會在口中彌漫一陣陣fresh既感覺；後者則味道分明，有洛神花飲品既開胃功效，亦有玫瑰香在後湧入口腔，好滿意呢到既服務都不俗，員工好客又工作認真。呢到有上菜速度保證，我地一order完無耐，就有一個漏斗放咗係我地上菜架上，開頭都無為意，後尾發現佢印有一啲好搞笑既文字，就係「首柯打 信心保證二十分鐘送齊」，我諗食店都重視客人對餐廳既第一印象，令我覺得佢地好好客。另外每到一個餸，店員都親自逐樣幫我地核對，免得我地有漏單，令我地覺得被重視，同認為佢地工作認真食都食得暢快啲食店仲大曬人情味，會派西瓜比每一枱客人，來的並唔係飯後水果，而係佢地喺見大家未有嘢食既時候比我地醫住肚先既行為真係好窩心…Read More