Wong Doris WC的個人專頁

由於疫情嘅關係，宜家越嚟越少外出用膳，就連寫食評嘅意慾都冷卻了！不過，今次想透過呢個平台介绍一間做得相當出色嘅鐵板燒俾大家。本身食店座落於長沙灣盤營街，條街比較靜，人流也不算很多。而呢間食店嘅門面唔太起眼，大家好容易直行直過。我都係朋友介绍先有機會大快朵頤！店内的裝修雅潔、整齊，可能係開業不久的關係，佢哋嘅抽油煙系统設備非常完善，完全沒有油煙味。雖然我偏好食鐵板燒、燒肉、串燒……等食物，但食完成身油煙味卻非常討厭及令人尷尬。入去前參考過open rice嘅食評，係無呢份菜單。坐底睇到呢份午市菜單真係覺得價錢合理，相信唔係疫情嘅關係，平日應該座無虛席，一位難求！一人套餐分别有精選、特盛及至尊，價錢分别係$98、$138及$178。三個餐都包咗沙律、炒菜、炒飯及麵豉湯，三個餐主菜分别係雞扒、日本豚肉薄燒及美國厚燒牛肉。而後者則有帆立貝及虎蝦。咁難得先有機會出嚟食lunch，我揀咗特盛及至尊兩個餐試吓！沙律的蔬菜非常新鲜，加上沙律醋十分醒胃，無論色、香、味都俱備，令人胃口大增，的確係一款不錯的前菜。麵豉湯不是死咸的那種味道，有種啖啖的麵豉香味，湯中還混入昆布，那股海草味既清爽又有咬口。湯底有细碎的豆腐粒，仍咀嚼到那股醇香的豆味，的確是绝佳點缀。師傅替食客將虎蝦開邊上，這樣比較方便食用。師傅只是簡單地用鹽燒已經十分出色，鲜嫩無比，另外再加上少許黑胡椒作點缀，大大提升食味！帆立貝屬於大size，也是簡單的用上鹽燒，不需要特别的調味。因為食材本身已經很新鲜，所以用不上濃味的醬汁。帆立貝的口感很爽脆，鲜嫩無比。主菜美國厚燒牛肉，雖然牛肉的質素不能與極高質嘅和牛相提並論，但套餐所包的牛肉質素並不差。師傅用上鹽燒帶出肉食的鲜味，燒得恰到好處，不會燒得過熟，也不會過生，還有一股焦香的味道。肉質嫩滑沒有渣，完全沒有“鞋”的口感，令人想一吃再吃，非常惹味！師傅在燒牛肉時配上蒜片，我比較喜歡大大片的蒜片，因為比較有咬口，而且蒜片炸至乾身脆口與牛肉非常夾配。反而用上蒜粒或蒜碎更會影響牛肉的食味。如果食客喜歡牛肉的原味，則可以乾脆將蒜片撥開。另一款主菜日本豚肉薄燒，這款主食相對較受女士們歡迎，因為肉身比較薄，而且肉片還包着新鮮的蔬菜，口感很清爽鲜嫩，少了一份油膩的感覺。好適合食得健康及清淡的食客。炒野菜份量很足，蔬菜很新鮮，而且蔬菜的種類也很豐富，绝不欺客。吃罷各款的肉食後，上一道清新的時蔬，彷彿遇上沙漠中的綠洲，令人精神一振，心滿意足。食到尾聲炒飯出場，除咗賣相不錯外，食味也绝不馬虎。炒飯很乾身，每一粒飯都分明及均匀地沾上蛋液，而且加入大量櫻花蝦，每啖飯入口都好咸香。無論色、香、味呢碗炒飯都滿分，美味可口。其實我一向都好欣賞呢類日式鐵板燒料理，佢哋除咗對烹調講究，對食材執着外，師傅還會替食物配上合適的配菜作點缀。而使用的碗碟器皿也十分精緻。試問這不是一門巧奪天工嘅藝術嗎？以呢間食店嘅食物水準及環境質素，的確物超所值。如果唔係疫情的關係，我相信會座無虚席，所以要把握呢段時間光顧，真係值得一試！…查看更多

難得可以外出午膳，當然要揾番D好野嚟食吓。點知去到旺角落大雨，唯有走入商場逛逛順便揾食啦！最後，竟然去咗MOKO新世纪廣場嘅食代館，其實我好少幫襯food court，不過見到呢間鐵板燒咁多人排隊，咪跟風排隊試吓啦！店舖的裝修簡潔，以L字bar枱圍住鐵板坐，很有台灣士林夜市鐵板燒的風味。最欣賞它的抽油煙設備非常完善，食飽離開也不會周身油煙味。雖然筆者極愛吃燒肉、鐵板燒……等美食，但卻很厭惡吃後周身油煙味的感覺，令人尷尬。所以呢點值得一讚！當我睇到廚師推介的午市套餐時，我终於明白為何此店會經常座無虛席，而且閒閒哋要等廿分鐘才可以入席。一份午市套餐包主菜、甜酸元貝拼蝦仁、時菜、白飯、餐湯及汽水。（選擇特飲加$10-$12不等）價錢才是$68起，認真超值。值得一提，呢間分店會包埋甜酸元貝拼蝦仁在套餐内，其他的分店則將它列為其中一款主菜 。所以呢度就更加抵食嘞！今次我哋二人同行，所以揀咗牛肩扒拼雞扒套餐，一次過試哂兩款肉食，反正價錢相當大眾化，又可以大快朵頤了！第一道出嘅係清炒時菜，師傅簡單地用蒜蓉炒油麥菜，簡直色、香、味俱全，菜蔬鲜嫩，食落爽口，不會有股苦澀味，令人胃口大開，比起任何的前菜更勝一籌。其實一般的鐵板燒炒時菜通常用雜菌及椰菜，呢度用油麥菜作時菜的確特别，驚喜萬分。主菜之一嘅牛肩扒，當然不能與和牛，相提並論，但論食味和肉質卻沒有因此被比下去。師傅只是簡單地灑上鹽花煎熟，食嘅完全係牛本身的肉味，煎得微微的焦香，恰到好處，不會過生，也不會熟到“鞋”口。而且牛肩扒的肉質很鲜嫩，入口即溶，的確令人越吃越想吃。在上碟時，師傅灑上少許的黑胡椒，有股椒香及微微的辣味，令食味更多一份層次，非常夾配。另一款主菜係塔香雞扒，呢款屬於濃味的菜式，師傅用上九層塔去炒，喺醬汁方面用上台式嘅三杯酒，惹味非常。筆者特别喜歡雞肉及酒的配搭，師傅將雞肉醃得非常入味，啖啖的雞肉透出微微的酒香，全無違和，非常夾配。重點係師傅加入大量的洋葱，洋葱這類食材炒腍後，既入味也吸收了醬汁的精華，也正是整碟餸的亮點。雖然如此，雞扒食落仍然很嫩滑，不會像吃“老”肉的感覺。之前講過呢款甜酸元貝拼蝦仁喺别的分店，未必包埋喺套餐，所以幸福也並非必然呢！師傅用上泰式的甜酸醬炒元貝及蝦仁，這樣比較開胃及不會令人覺得油膩，口感較清爽。元貝及蝦仁都相當大隻，煮熟無乜缩水，非常有咬口。而且肉質很新鮮，不會有“霉”的感覺，更加沒有那股“腥”的味道，鲜嫩無比。喺主食以外，仲可以用優惠的價錢追加小食，例如：葱花炒蛋、菜甫煎蛋、椒鹽豆腐及香煎鵝肝等，價錢由十數元至數十元不等。筆者追加了香煎鵝肝$46，這個價錢很合理，一般的鐵板燒未必可以用呢個價錢食到。整體鵝肝的份量不少，算是物有所值。可能係鵝肝新鮮的關係，唔會有股“腥”的味道，師傅煎封得整件鵝肝恰到好處，不會過火，否則會有苦澀的味道。由於火喉控制得好，食落唔會有種“散”嘅口感。值得一試！套餐內包埋昆布麵豉湯，呢個湯並非只係死咸的味道，係有股淡淡的麵豉香味散發出嚟，配上清爽的昆布更加可以中和麵豉的咸悶感覺，非常夾配。湯底還有些魚乾碎，雖然係細碎，但飲湯時卻增添了不少口感，的確係好有心思的安排！除咗麵豉湯，仲有汽水提供，但我選擇咗咸檸七。（加$12）由於咸檸檬經過特别醃製，更令人消除油膩，幫助消化。其實我好鍾意鐵板燒、串燒及燒肉呢類香口惹味的食法。當中有貴到上千的日式料理，也有平民到百多元的台式鐵板燒，當然豐儉由人，也沒有必要作深入的比較。但最重要係個人嘅心態，認為自己食得開心，覺得滿足便可以了！雖然我唔係成日喺呢區出入，但係都知道呢區食市林立，有唔少老饕聚集揾好野食！途經眼見呢間食店價錢合理又座無虛席，所以吸引咗我入去幫襯。個人認為的確係一間性價比很高的食店，價錢合理而食物的質素很高，非常值得一試！…查看更多

由於疫情的關係，最近都好少外出用膳。今日係難得嘅日子，所以就出去食番餐好嘅。今日揀咗荔枝角工廠區，呢度食店林立，唔好以為工廠區就無好野，幾貴幾好嘅食店都應有盡有，可謂豐儉由人。今次嚟到座落喺荔枝角D2 place二期嘅“繼”開餐，其實唔係疫情嘅關係，呢間食店又唔知要訂枱訂到幾時。如果唔係疫情的關係，根本無可能有咁寧靜嘅環境。尤其是午膳的時間，以往只會見到座無虛席同埋爐邊一定放滿各式各樣的新鮮食材，厨師只會在爐的一端忙得不可開交。諗深一層係咪應該趁疫情時，多些出外用膳呢……一人前套餐分别有“梅”、“竹”、“松”三個，價錢分别是$278、$288及$298。套餐基本有沙律前菜、煎銀鳕魚、牛柳（厚或薄燒）、炒飯、炒野菜、麵豉湯及甜品（是日甜品為红豆牛乳奶凍）或茶。以上三個餐唔同嘅主食分别係北海道帆立貝、大蝦及法國鵝肝。呢款沙律前菜單憑眼看與其他食店無乜分别，原來最特别係用上蘆薈，想像吓大熱天時，身水身汗去到，前菜第一啖食到冰涼清爽嘅蘆薈，真的令人暑氣全消，並且胃口大開。而新鮮的蔬菜混入的芝麻醬也不是太膩，非常夾配。煎銀鳕魚很講厨師嘅功力，將雪白的魚肉煎到金黃，有股焦香的味道，但不會過熟而令魚肉變“鞋”。睇吓魚肉隔離塊魚皮，師傅特登分開煎魚皮，保留住佢最香、最爽、最脆嘅口感，真係非常精彩。不得不提整個製作過程只是簡單用上鹽作調味，非常簡潔。由於今次我叫咗“梅”及“松”兩款一人前套餐，所以可以同時嚐到北海道帆立貝及法國鵝肝。北海道帆立貝非常大隻，肉質鲜嫩，食材新鮮，師傅將帆立貝煎熟，非常香口，口感爽脆得嚟，也不失嫩滑。不過重點係帆立貝下的湯頭，厨師用上乘的紫菜煲湯再伴帆立貝一起上菜。湯頭清甜，有股紫菜味，但唔會令人有“腥” 的感覺，喝了感覺很清新，這種食法很特别，完全將帆立貝的食味提升。坦白説鵝肝一向不是我的所愛，但係眼見厨師之前製作的每款食物都花盡心思，我當然要细心品嚐呢款食材啦！雖然筆者不喜歡肝、膶呢類食物的口感，但係呢度嘅鵝肝可能新鮮嘅關係，完全無嗰種“腥”的味道，而且食落唔會有種好“散”嘅口感。加上師傅將鵝肝煎封得恰到好處，不會過火，否則會有種苦澀的味道。總算沒有白白付出我的第一次……呢款食物喺成個餐牌內都無提及，其實係用嚟間場之用，用作中和之前濃味的食物，情況好似食壽司的酸薑。我都想講，其實只係師傅倒了一堆砂糖在一塊白麵上，然後將它燒烘至焦黃，製法和食材也非常簡單。登時卻令食客回味無窮，驚喜萬分。心想：人其實不用太複雜，可以很簡單已經覺得滿足！而我最欣賞的反而係設計呢個餐單的人，用不上很名貴的食材，卻可以為食客帶來驚喜，同時可以中和濃味食物的油膩感。讚！重中之重的主菜厚燒牛柳，套餐所包嘅牛柳質素並不差，但食客可以因應自己的喜好提升至A5鹿兒島野崎和牛（另加$300）師傅燒牛柳時只是簡單地灑上一點點鹽花，而且他將火候控制得恰到好處，肉質不會過熟，但也不會太生，吃的時候有股焦香的味道，而内裡的肉仍有肉汁及嫩滑，不會令人有“鞋”的口感。而且整啖肉食落無渣，很有咬口，令人有種想一吃再吃的感覺。另外，師傅用上大大塊的蒜片伴牛柳，我個人的確較喜歡大塊的蒜片，因為比較有口感。師傅將蒜片炸至脆口，好像吃薯片的感覺。蒜片比較乾身，假如用上蒜粒或蒜碎，會黏在肉上，影響肉的質感和食味。甚至有食客連蒜片也不用，直接吃出牛柳本身的質感和味道。一般日式料理套餐都包埋炒飯，雖然個餐都食到尾聲，但眼見師傅將兩隻橙黃色嘅日本雞蛋倒入白飯中，混入炒香咗嘅煙肉，再加入大量的葱花。登時睇到人垂涎欲滴，胃口又再大開。炒飯除咗賣相了得外，食味也相當不錯。呢度個炒飯非常乾身，每粒飯都分明，飯粒均匀地沾上蛋汁，蛋味很香濃。而每啖飯都有炒香的煙肉粒，令食味多點層次，加上大量的葱花，中和了炒飯的油膩感，夾住飯來吃口感更佳。另外，葱花的色澤很清新，除視覺享受外，也是一款健康有益的食材。吃炒飯時，再配上熱辣辣的麵豉湯，這碗麵豉湯的味道不是那種死咸的味道，有淡淡的麵豉味之餘，還隱若的有股昆布味，海草的香味很清新，湯底還有細碎的豆腐粒。雖然很細碎，但仍咀嚼到有股豆香，的確是不錯的點缀。另外，那小碟的青瓜及黃蘿蔔也很清爽、很脆口，令人有一種很清爽的感覺。筆者一向也很喜歡及欣賞日式料理，因為他們除了對食法的講究、食材的執着外，日本料理其實也是一門藝術。因為每一碟的菜式師傅都花上不少心思，用上各式各樣的配菜，並配上不同形狀及顏色的器皿或碗碟才端上客人的面前，試問這是否一件巧奪天工的藝術品呢？呢餐生日飯的確有做足資料搜集，老實講呢間日式料理的價錢，喺中環/金鐘區一定揾唔到，銅鑼灣區就無咗一款主菜。以呢間料理所提供嘅食物水準及環境質素，的確物超所值。如果唔係疫情的關係，根本無咁容易可以訂位，所以很值得一試！…查看更多

兩個月前預约终於有幸可以品嚐近期人氣的壽司店~壽司郎。其實我喺日本已經食過呢間壽司店，當時覺得無乜特别，但的確以便宜取勝。估唔到喺香港開舖，旋即瘋魔萬千食客，每當想品嚐都需要等上一至兩個月，真的不容小覷其受歡迎程度。人頭湧湧，座無虛席，如不是預先訂位，想找個“吉”位的確很難。雖然係人多，但人潮的管理做得相當好，只要你有預訂座位，最多等十分鐘左右，職員便可以替你安排合適的座位，服務一流！兩人座非常舒適，而且乾淨雅潔，既方便又不失私人空間，迴轉軌一直運送新鮮的壽司，食客可以自由拿取。如果想食迴轉軌沒有的食物，則可以喺枱面嘅電腦版點菜，既方便又有效率。今期推介貝VS蝦，貝三貫（有赤貝、北寄貝及海螺）也只售$17，白鳥貝$12，海螺$22。唔好以為平野無好，雖然價錢吸引，食物的質素都有返咁上下。睇吓貝三貫（由下至上，分别係北寄貝、海螺、赤貝）份量唔细，最少上面的魚生能夠蓋過整件壽司飯。加上魚生的厚薄適中，绝對不是薄到透光的那種壽司。三文魚腩壽司$17，魚肉非常肥厚，從側面看可以清楚看到其厚度和三文魚油的分佈。雖然價錢大眾化，但食物的份量、新鮮度及質素卻沒有因此而下降。鰈魚鰭邊壽司是我的至愛，一放入口充滿魚油，鲜味可口，而且魚生厚薄適中，很有咬口，口感非常爽脆。魚生本身好新鮮，否則會有腥的感覺。厨師推介的海螺壽司$22，螺肉结實，咬落去非常爽脆，很有咬勁，使人一吃再吃，停不了口。加上螺肉無乜海水味，唔會令人覺得有腥的感覺。以平民價可以食到上等的食材，唔怪得要嚐味閒閒哋要等上兩個月啦！最令人意外非甜品莫屬，甜品的質素分分鐘高過一般的甜品店。呢款士多啤梨奶味卡達拉娜，在其他食店甚至甜品店也很少遇上。口感有點似芝士蛋糕，加上士多啤梨的酸甜味道，少咗肥膩的感覺，而且雪凍食用，令人登時暑氣全消，有種一吃再吃的感覺，非常出色！千層蛋糕$22，不要小覷這件蛋糕，雖然街頭巷尾的蛋糕店、甜品店，甚至連鎖壽司店都有出售這款蛋糕。這裡的千層蛋糕卻異常出色，職員完全掌握這款蛋糕的温度和軟硬才端上枱给客人食用。此外，每層蛋糕之間的奶油，既不會太油也不會太甜，味道恰到好處。蛋皮厚薄適中，令整個蛋糕的食味大大提升！在收銀處提供了多款纪念品讓食客以積分換取留作纪念，目的係想吸引食客多加惠顧，這種市場策略的確一舉兩得，達到雙赢的效果。壽司郎不愧為近期的人氣壽司店，除咗以貼地的價錢作招徠，食物的質素和材料也绝不馬虎，唔怪得要預訂閒閒哋等上一、兩個月。香港嘅老饕绝對識貨呢！…查看更多

喺長沙灣工廠區附近嘅小巷發現呢間食新鮮魚生丼的小店，經過門口已經俾佢個門面吸引嘞，忽然令人有出遊日本的感覺。門外的裝修很日式，彷如置身日本旅遊，讓一眾未能外出旅遊的食客多一份親切感。店内的座位、擺設均是日本風，看出店主對小店的裝修花上不少心思和時間。雖然店内的面積不算大，但座位擺放得很整齊，地方也打掃得雅潔。此外，座位之間的距離亦足夠，不會令食客感覺很擠逼。店内主要提供新鮮的魚生丼，價錢約由$70至$200不等，豐儉由人，任君選擇。而一般的壽司、手卷及刺身都有提供。呢款三文魚龍蝦沙律丼$69，成個飯面均被魚生覆蓋，四大件嘅三文魚非常肥厚，師傅應該係用腩位附近的位置，油份適中，唔會過瘦。而龍蝦沙律較為特别，配合魚生丼食用，非常夾配。另外，龍蝦的份量也很足，真材實料，物超所值。由於疫情的關係，自今年三月起小店提供優惠給食客，只要惠顧任何魚生丼，小店會送一客自家製新鮮三文魚麵豉湯。筆者認為此湯很值得一試，因為麵豉湯沒有死咸的感覺。而且湯內的三文魚很新鮮，應該係加入魚頭及魚骨餚湯，使湯頭入味後，再加入新鮮的三文魚肉食用，所以湯内的魚肉仍很有咬口和肉味，並不是湯渣般的溶爛。此外，湯内附的昆布也很爽口，非常美味。根據店員説：三文魚湯可以舒缓人的緊張情緒，使人心情放鬆，所以店主在疫情下，特别精製呢款湯品送給食客，藉此為大家打打氣。另外，可以為大家補充所需要的營養，可見店主既有心亦非常細心。呢款海膽三文魚丼$89，超值抵食，魚生佈滿飯上面，毫無虛位。四大片三文魚，師傅同樣用上魚腩附近的位置，異常肥美。而海膽的份量很足，絶不欺客。此外，海膽的味道非常鮮甜，色澤很新鮮，正所謂齒頰留香，值得一試。小店座落的位置較為隱敝，但附近有唔少的工廠及商業大厦，一般中午食飯時間的確係一位難求，最近因為疫情的影響下，到店内用膳的食客比以往少，所以大家可以趁住呢段時間去試吓呢間小店各款新鮮嘅魚生丼。…查看更多

作為一個超級串燒控，真心想推介呢間良心串燒店俾各位老饕。門口大大個招牌已經導出老闆的心意“燒出心機*烤出味美”。小店的裝修非常簡單，只可以説是乾淨企理，沒有甚麽花巧的佈置，賣的只是新鮮的食材和老闆的真誠。一向喜歡支持黃店的朋友，也不妨多“懲罰”吧！店舖的面積不大，但食物的款式及種類也不少，任君選擇。今晚有幸坐近燒烤爐旁邊可以近距離與厨師（即老闆）聊天，细問之下原來上述的點菜纸並未能盡錄所有食物。例如：鮑魚、日本皇帝蟹及久違了老闆親手醃製的海南雞（一般都是熟客預訂）所以要有食神眷顧才有幸品嚐以上的美食。生燒豬頸肉飯$50，這是一碟令人驚喜的碟頭飯，唔怪得老闆用佢嚟打頭陣，豬頸肉醃得夠入味，肉質新鮮爽口彈牙，即燒即食，美味可口。值得一讚係淋喺飯面的汁，味道似一般泰式燒烤咸得嚟帶酸的汁，但經老闆不斷親自改良，加入青檸檬汁，令汁料唔再死咸，同時可以中和燒烤肉類的油膩感，十分夾配。肥美的廣島蠔六隻$100，蠔的醃料唔多，可能新鮮的關係，蠔肉本身已經很鮮甜，隻隻都很大，食的時候有種很滿足的感覺，吃後很飽肚呢！這款墨魚春卷比較特别，喺其他串燒店都好少見，其實係用腐皮包住墨魚滑燒，薄薄的一片片，入口有種咸香的感覺，很有咬口，佐酒一流！燒雞中翼並唔係咩名菜，但我係必食嘅，因為燒雞翼係好講技巧架。成隻雞翼唔洗特别醃味，只係燒起時灑上鹽花，食嘅時候已經夠哂味。老闆燒雞翼的功夫一流，燒到皮脆肉軟，外皮金黃色，脆卜卜熱辣辣，而且一點也沒有將肉質燒燶，仍然保持肉質應有的質感，極之出色！串燒雞軟骨兩串$30串燒雞皮兩串$30燒雞皮及雞軟骨都係一般串燒店常見的燒物，但老闆很用心燒熟呢類易乾及易焦的食物，眼見他在燒烤爐上將食物不斷翻來翻去，務求令食物的水份盡快鎖上，不致燒乾及燒燶，十分專業。燒雞皮的口感比較脆口，油份已經喺燒嘅過程消除，完全沒有油膩的感覺。燒雞軟骨很有咬口，咀嚼軟骨時夾集肉碎很有層次，口感非常特别，越吃越想吃，又唔覺飽肚，佐酒一流！飽餐一頓後，與老闆閒聊才知道小店可以以私房菜的形式替客人特别製訂燒烤食材。例如：客人喜歡燒海鲜，老闆可以提早到街市搜購當日最新鮮的食材。此外，也可以包場作私人聚會或派對，由老闆發板替食客選製燒烤美食。最重要是收費很大眾化，食物的質素也不錯。希望香港的疫情退去後，可以约埋三、五知己一起再去把酒談歡！…查看更多

最近香港受到SARS 2.0的肆虐，很少市民願意外出消費及食飯，連平日一位難求的食店，都不用排隊及訂座了！當然筆者會好好利用呢段時間，四出尋找美食。今日去到荃灣華都中心商場，無意間發現咗一間好特别嘅小店，店舖的間格及座位唔算寬敞。平時可能係一位難求，所以要好好珍惜宜家嘅機會入去試吓！雖然店舖不大，但食物的款式及種類也不少，麵底除一般食店的粉麵外，小店有提供較特别的上海麵及手打爽脆米粉。湯底有皇牌的滷水湯，還有麻辣及蕃茄湯，任君選擇。根據目測其他食客的湯粉麵，大部份均選擇滷水湯底，其湯頭的色澤深如墨汁。心想: 從好的方面諗味道一定很濃、很入味；另一方面，一旦失手與喝豉汁也沒有分别，加上過咸及濃的味道反而令人反胃。最终筆者都係跟大隊，反正都是第一次嚟試新野。蘿蔔、豬大腸粗麵（滷水湯底）我覺得味道很獨特，濃濃的湯頭令麵條更入味。此外，蘿蔔炆得很稔，加上佢係一款吸湯的食物，所以非常夾配。小店嘅豬大腸也異常出色，既稔之餘仍有咬口，入味得嚟又唔會死咸。而且腸內則洗得很乾淨，绝對沒有那股豬“壓”味。牛丸、豬大腸上海麵（滷水湯底）其實食味跟之前那碗沒有太大分别，不過上海麵不是一般的麵店會提供，所以我便點選它一試。牛丸不過不失，可以一試！温馨提示：餐飲的凍奶茶绝不遜色予某大茶餐廳的冰鎮奶茶，茶香有味，濃滑適中，甜味恰到好處，同樣是冰鎮而且不需要加錢。绝對物超所值，值得一試！成碗滿滿的陳皮魚蛋$16，我數過有16粒，一蚊一粒，仲平過企喺街邊篤一串魚蛋。食味一流，辣味適中，魚蛋的肉質很彈牙及有咬口，還有陣陣的陳皮味，绝不欺客。值得一試！下午茶時段十分抵食，大大碗麵加杯飲品才$38，的確超值，加上食物的質素绝不馬虎。不妨一試！…查看更多

李時珍是中國明朝也是中國歷史最著名的醫、藥學家，其著作《本草綱目》無人不曉，更對後世在醫、藥學方面的研究影響深遠。筆者一向都是熱底之人，經常熱氣生痱滋（口腔發炎），而且良久不癒，當然是痛苦難挨。幾經尋找和嘗試，很難得才遇上夾配的華佗“八草堂”。小店面積细小，堂食的位置有限，顧客一般也是“立飲”涼茶便離開。裝修比較普通，但乾淨整齊，一目了然！面對大街，舖面開揚，交通方便，相信地點並不難找。經常替我解熱氣，消除痱滋嘅就係呢款痱滋茶，外觀與一般涼茶無分别，味道不太苦，可能加咗鹽的關係及有一種回甘的感覺。功效不錯，基本上飲一碗已經開始見效，連飲兩日痱滋就開始 “謝” 嘞！涼茶的價錢一般都由廿蚊起，唔算便宜，但一分錢一分貨，真材實料，藥到病除，當然有佢嘅價值呢！斟藥係非常講究的環節，我試過呢個商號嘅多間分店，以呢間分店嘅呢位職員最正宗同標準。由於痱滋茶係需要落鹽，用途係下火。試過有些職員根本唔記得落鹽，又或者在斟完藥落碗後，才匆忙灑上鹽花在表面。真正的斟法係先將一定分量嘅鹽灑在“吉”碗内。然後，要注入3/4熱的痱滋茶入碗内，使碗底的鹽溶解，才再注入1/4凍的痱滋茶，目的是使客人飲用時不會被燙口。有些人接受熱的程度較高，這也可以適當地調較。職員的手法纯熟，工作認真，態度良好，非常專業。由於筆者試過别的分店，只要稍為將以上程序調亂，整碗涼茶的功效，味道和感覺已經完全改變，所以“斟藥”其實係好重要嘅環節！除咗以上的痱滋茶外，小店都有提供其他的涼茶、龜苓膏……等。如果大家有興趣，不妨可以試試其他的產品，説不定你也遇上同自己夾配嘅再世華佗呢！…查看更多

最近多咗嚟長沙灣、深水埗呢邊，當然要支持一些用心經營嘅小店。今晚唔係太肚餓，喺門口睇咗一輪食物嘅相及菜牌，终於揀咗呢間以輕食為主嘅小店。店舖很寬敞，座位舒適，卡位及長枱任君選擇，令食客不會有擠逼的感覺。整間食店很光猛，整齊雅潔，裝修簡约。卡位與卡位之間有可愛的圖畫間格，既有私人空間又增添不少色彩及新氣。插圖有其他國家的文字翻譯，使遊客覺得更有親切感。雖然係以輕食為主，但飯餐的選擇也不少。當晚筆者卻試了幾款小食，有生炸雞翼、手打生菜魚肉湯及生煎自家製韮菜餃子。而較為飽肚的則有懷舊豬油渣上海麵。生炸雞翼四隻$25，雞翼外皮炸得金黃，皮脆肉嫩，即叫即炸，非常新鲜。雞翼的皮灑上點點的鹽花，炸法與兒時街頭的炸釀三寶一樣，將炸起的雞翼灑上淮鹽，吃時更加咸香，增添不少鲜味。由於即叫即炸，進食時要小心燙傷口腔！手打生菜魚肉湯（大）$22，魚肉的份量很足，非常飽肚，魚肉混入大量的葱花，令賣相及食味也加倍提升。湯頭鲜甜，並非一般的味精水，看得出小店在湯頭方面花了不少心思。此外，值得一讚是小店使用出前一丁的麻油，獨立包裝，清潔衞生。筆者素來對這款麻油情有獨鍾，而店主也毫不吝嗇地讓食客隨便食用，此舉的確是其他食店少見的！生煎自家製韮菜餃子（四隻）$20，餃子並非由工場交來，質素有保證，餃子的餡料非常豐富。尤其是筆者特别喜歡菜比肉多的餃子，也符合近年大行其道的健康素食。餃子是即叫即煎的，餃子皮很香口，皮邊脆卜卜，而餡料又飽滿。一碟四件賣廿蚊绝對超值，恐怕很難找到如此超值又有質素的食物！懷舊豬油渣上海麵$37，呢度嘅豬油渣係用軟渣，比較有咬口，唔係脆卜卜嗰種，所以無咁熱氣。上海麵係用偏麵，比較特别，由於麵質薄身所以較易吸收湯汁，較其他食店嘅上海麵（似粗的米線）入味。喺出面比較少有呢種配搭嘅豬油渣上海麵，不妨一試！喺呢個老饕聚集的地區，能夠站得住腳，食物質素固然重要，但價錢也要大眾化。呢D基本嘅訴求，真係缺一不可！…查看更多

沿大南街行，眼見呢間小店雖然無乜客人，但係喺燒烤爐前嘅厨師仍然好有心機將食物燒熟，登時把我呢個串燒控吸引入内。厨師好有心機將食物翻來翻去燒熟，然後用熟練的手勢灑上調味料，再將食物排得整整齊齊地上枱，途人只是隔着玻璃已有垂涎欲滴的感覺。店舖细细，但裝修簡潔乾淨，绝對沒有陣陣嘅油煙味。筆者認為燒烤店最重要係抽煙設備完善，店舖要夠通風；否則食完後，油頭垢面的離開，實在令人尷尬。店舖雖然细细，但食物的種類都唔算少，應有盡有，绝對可以滿足不同口味的食客。此外，價錢合理，很大眾化。燒雞皮$10，係店内最便宜的食物，卻令筆者很有驚喜。不知多久未吃過如此爽脆嘅雞皮，既有咬口又唔油膩。呢度串燒雞皮嘅質素簡直超水準，好多大酒店都被比下去。在雞皮上灑上鹽花，食嘅時候有種咸香的感覺，肚餓時更加食唔停口。雞中翼$18（三隻），價錢合理，基本上這是串燒必食，因為燒雞翼係穩陣之選，加上很適合大部份人的口味。小店嘅雞翼微辣，灑上芝麻及孜然香料，很有新疆的風味。雞翼皮脆肉滑，外表金黃色，绝不過火，恰到好處。燒雞腎$16，雞腎燒起很爽口，加上雞腎有一定厚度，食起嚟更加有咬口。這款串燒如果燒得過火，食嘅時候雞腎會變得苦澀，好像吃炭一樣，所以很講求厨師嘅燒烤技術。肉食得太多，也需要一點蔬菜中和油膩感，燒青椒及韮菜是必食之選，每串十蚊，非常抵食！青椒的籽清除得很乾淨，食客不會覺得太辣，而椒皮很爽脆，口感很清新，有種似食壽司時用酸薑嚟間場嘅效果。韮菜很有咬口，越食越想食，每咬一下，菜汁及鹽都在口腔内翻騰般，非常美味，係一款需要追加的串燒。整體而言，小店的串燒非常有水準，價錢也很合理，可能店舖的位置較隱閉，令一眾的食客不太方便及忽略。希望藉住呢個平台讓更多食客知道有好多用心經營的小店仍然在默默耕耘！等住大家嘅支持！…查看更多

今晚天氣好凍，喺長沙灣食完晚飯，跟住周圍揾飯後甜品滋潤吓。沿元州街行，發現呢間舊式嘅糖水店，賣的中式糖水相當正氣。小店裝修簡潔，店舖的面積唔算大，但座位寬敞。甜品的款式相當齊全，應有盡有。宜家嘅天氣，當然熱食的糖水較為吸引，筆者目測當晚八成食客都揀熱食嘅中式糖水。芝麻糊+合桃糊$24，芝麻糊有濃香芝麻的味道，合桃糊也相當足料，兩糊均是自家磨製，而且不會太甜。喺寒冷乾燥的天氣下，最啱食呢類糖水滋潤一吓。椰香紫米露$20，整體不過不失，但略嫌椰奶唔夠香濃，所以較失色。紫米煮得稔之餘，仍不失咬口，口感不俗，食味也不錯。擂沙湯圓（五粒）$19，粉團很有咬口，軟硬度恰到好處，湯圓中炒香的黑芝麻份量很足，不會過甜。附上的花生、椰絲及芝麻碎，甜度適中，當中的花生碎炒得很香口，使食味大大提升，令人驚喜。筆者認為小店嘅糖水有一定的水準，假如樓面/收銀（相信係老闆娘）嘅服務態度及待客之道與其甜品的質素相若。相信客似雲來將指日可待，否則……。…查看更多

今晚天氣非常寒冷，其實好適合食火鍋，但係路過呢間街頭嘅串燒店，登時被那股撲鼻嘅肉香吸引。其實店舖的環境並不吸引，只有舖面，座位也是擺街開枱的，喜歡的人會覺得很有地道風味，相反唔習慣的人就不太享受。筆者卻是掃街一族，好吃才是最重要呢！雖然舖仔細細，但食物的種類也不算少，海鮮種類應有盡有。價錢很大眾化，非常貼地。筆者今次也揀咗唔少海鲜，鹽燒大眼雞魚$48，呢個價錢出面唔易揾到，加上用料上乘。老闆用大量的鹽先醃好魚身，令魚肉入味，食嘅時候有股咸香的味道，似漁民食咸鮮嘅感覺。老闆講明係即開，日本廣島生蠔（2隻）$52，蠔都唔细，燒得恰到好處，唔會過熟，食嘅時候仍充滿肉汁，加上葱花、蒜蓉，十分惹味！黃金燒蜆一份$28（约10隻），味道很鲜甜，蜆肉大粒，有咬口，绝對是佐酒恩物。價錢合理，值得一試。脆口嘅燒雞皮兩串$18，别以為很肥膩，其實油份已經在燒的過程逼走，剩下只是像薄脆般的雞皮，绝對唔油膩。燒野食點離得開雞中翼，一串三隻$17，隻隻雞翼都脹卜卜，燒至金黃色又唔會過燶，外脆内軟，恰到好處。筆者認為是必吃佳品。煙肉腸仔串$16，呢款串燒比起其他燒物的確唔算抵食。但筆者卻對它情有獨鍾，可能個人較偏好煙肉卦，配上腸仔又很夾配。煙肉用燒嘅方法烹制，令其咸香味道更加突出，非常出色。燒五花腩串$17，雖然筆者試過唔少串燒店，但整塊五花腩串住燒的確少見，呢個食法的確有些少唔同，因為成塊食係較有口感，親自感受到肉本身的質感、味道及肉的層次，非常獨特。魷魚鬚$18，相對其他燒物的確唔化算，味道不算獨特，也沒有特别的賣點。整體不過不失，不吃也沒有損失！今次誤撞下遇上呢間小店，總算為筆者帶來唔少驚喜，而且價錢也很合理，令人再三回味。筆者定會再嚟試其他燒物架！…查看更多

眼見呢間食店座無虛席，而且仍不斷有食客等位，好奇心驅使下即刻等埋一份。論食店的環境及座位，绝對不能以舒適寬敞形容，每位食客只能佔一張木櫈，腰板當然要伸直，多一點的空間看來也很奢侈。眼見小店提供的飯類及食物款式有限，但飲品則較為特别。目測其他食客所揀的食物，蘿蔔牛腩飯和蕃茄洋葱豬扒飯較多人選擇，所以我也跟大隊。再附加熱杏仁露及華田咖啡呢！呢個蕃茄洋葱豬扒飯論賣相及食味都超水準，飯同餸分開上，已經抵讚！整個蕃茄汁非常出色，用新鲜的蕃茄煮出嚟，並非一般食店用茄汁、茄膏製造出來。很有住家的風味，喺街度都可以品嚐到屋企嘅飯餸，令一眾打工仔特别覺得窩心。豬扒煎香後再切细件混入蕃茄煮，令肉質更加入味，而食的時候也非常方便。呢種家庭式的煮法，餸汁並不油膩，不像一般的食店以芡汁上碟，所以呢種食法較健康，令人較開胃。呢款蘿蔔牛腩飯可算係男人的浪漫，通常都係男士點呢個飯。餸的份量很足，牛筋及牛腩的比例好平均。牛筋、牛腩夠稔及非常入味，最精彩當然是沉底嘅蘿蔔，吸收咗餸汁的精華，香軟入味，入口即溶，簡直是人間美味。同樣用家庭式的炆煮法，少油健康，將食材本身的鲜味突出，令食味提升。熱杏仁露不過不失，值得一讚係老闆绝不吝嗇杏仁露沖劑，因此味道非常香濃，不會稀淡。真正的驚喜係華田咖啡，估唔到兩種飲品混合起嚟可以咁夾。本身咖啡有種苦澀味，而華田被人有甜的感覺。兩者混合，將彼此的缺點收藏，使優點突出。簡直相得益彰，異常夾配。雖然我對呢區並唔熟悉，但係呢度有唔少老饕聚集就眾所周知。憑經驗一間座位唔舒適、價錢唔算便宜的小店都吸引咁多食客排隊，而且座無虛席，咁你話係咪要試吓先？！…查看更多

經過多月的自我“宵禁”，终於按捺不住要外出消費了！今晚“以生命作賭注”去到TG放題嘅熱點用膳，飯後經過呢間小店，眼見空無一人，於是就入去試吓。店子不算很寬敞，感覺乾淨整齊，裝修尚算清雅，符合一般甜品店的格局。坐下不久，老闆娘介绍咗蛋白燉椰皇$48，價錢合理，蛋白熱辣辣，奶味香濃。好適合秋冬季節食用，很滋潤養顏，而且食味不錯，的確係女士的恩物！賣相不錯，相當吸引！跟住再試埋個生磨杏仁糊$23，中式糊類甜品可以試出甜品店嘅真功夫同水準。呢間小店個杏仁糊真係無得頂，杏仁味香濃，杏仁磨得夠幼滑，绝對無粒狀杏仁在内，非常足料。老闆娘非常貼心加送小丸子，令杏仁糊食落更添咬口，使食味及口感加倍提升。雖然無心插柳咁入咗呢間甜品店，但估唔到佢嘅水準真係相當之高。的確係好值得推介俾親朋戚友，加上價錢大眾化，食完都唔覺肉赤。以後嚟開呢區，飯後甜品又有着落嘞！…查看更多

呢排成日示威遊行，市民經常自我“戒嚴”，所以街上唔多見到有人出嚟食好野。呢日我去到慈雲山睇吓有乜好野食。去到呢間泰菜嘅舊舖拆緊，仲以為佢做唔住執咗添。跟住過對面毓華里嘅横巷，先知道佢细舖搬大舖，不知做得幾咁有聲有色呀！就係俾佢吸引到先知原來搬咗舖，估唔到一間小小嘅泰菜都可以做到咁出色。環境當然比以前好好多，起碼有冷氣先，而且座位多咗唔少，可以做多好多生意。整體裝修簡潔，以乾淨舒服為主，可見老闆娘相當落本及有心繼續將小店發揚光大。雖然座位多咗，但仍然座無虛席，可見街坊相當支持呢間小店！開放式嘅厨房可以見到老闆娘親自做泰式沙律，全部人手做，很有自家式的感覺。所有的工具都很傳统，非常有泰國風味。除了味覺，視覺也同樣享受呢！一般的泰國菜都有售，價錢很大眾化，相比喺旺區食同樣菜式，可以算得上便宜呢！食具有其特色，令食客感受到一股淡淡的泰風。泰式海南雞飯包紫菜湯，都係五十幾蚊，非常抵食。雞很滑而且唔油膩，坦白講，平時我唔食油飯，但呢度D油飯绝不油膩，只是淡淡的雞油香，令我很驚喜。紫菜湯與一般的例湯有很大分别，好有住家菜的感覺，湯頭清甜，紫菜好新鲜，咬落仲爽口彈牙，唔會有一種霉稔嘅口感。加上仲識用潮州人滾湯最鍾意嘅唐芹，簡直將湯頭嘅食味發揮到淋漓盡致。炸蝦餅比起一般泰菜館厚身，炸漿很薄，令蝦膠更顯突出，食起來更有咬口。蝦肉很新鲜，所以很彈牙。一碟四大件的蝦餅才賣五十幾蚊，實在好抵食，其他連鎖的泰菜館，動軌要接近一百蚊了！泰式牛肉黃咖喱份量很足，但略嫌椰汁太多，令整體咖喱嘅辣度大降。食落反而有種甜而不辣的感覺，所以比較適合不嗜辣的食客及小朋友。另外，牛肉煮得過熟，可能用砂鍋上菜的關係，牛肉食落唔夠滑。雖然黃咖喱相對失色，但用嚟配咖喱食嘅薄餅卻相當出色。薄餅用好多層疊起，質感很薄，中間很有咬口，餅邊薄脆。即叫即做，熱辣辣，绝不油膩，令人一吃再吃，停不了口。椰汁冰落咗唔少椰汁，非常足料，绝不欺客，廿幾蚊杯非常抵飲。享受美味佳餚的時候，再配上特製的椰汁冰，既消暑又解渴，都咪話唔寫意，簡直快活過神仙！講咗咁耐，食到抱住個肚走都係二百幾蚊賣單，你都咪話唔抵。喺慈雲山呢個老饕聚集地，食店一定要又抵又好食，缺一不可！…查看更多