VKGor's Profile

未到12點就岀到新城市廣場，一個人食午餐嘅選擇有好多，但見時間尚早，就選擇去晏咗就有排等位嘅美登利啦 😆餐廳平日開12點，我準時去到已經有好多人一齊等開門 😂 我被安排入坐吧枱位，無聊時可以望吓師傅整壽司，呢個安排都幾好！睇嚟睇去都係午市定食最抵食，我點咗特盛手握壽司盛合，每份定食都附送茶碗蒸 & 味噌湯，個人覺得兩款嘅味道都頗普通，只能話係不過不失。壽司盛合一共有12件，都算份量十足！不過我唔認得哂所有食材，餐牌亦冇介紹，所以我淨係講吓幾款值得介紹嘅算喇！魷魚加咗紫蘇葉絲，好香 & 吊起咗鮮味香蔥吞拿魚蓉軍艦本身好鮮味，但係軍艦嘅紫菜淋咗，一啲都唔脆就扣晒分。。。已經一開門就嚟，講真都真係幾失望吞拿魚，三文魚赤身都好鮮甜，而且係長長一塊，口感十足蛋壽司好厚，甜度適中好好味蟹腳好鮮甜，食落仲有汁，唔係溝咗麵粉嘅合成蟹柳之前食過美登利嘅蟹肉蟹膏細卷好香濃好好味，今次得一個人嚟驚食唔哂，所以都點咗一件蟹肉蟹膏軍艦嚟吊吓癮 😂 點知塊紫菜都係淋今次嘅水準真係只算不過不失，冇咗以前 WOW 一聲嘅感覺。。。希望佢哋會keep返高個水準啦 🥹…Read More

一向被譽為美食沙漠嘅馬鞍山，最近開咗好多新餐廳，其中最值得推介嘅就係呢間 “鮨樂” 喇！我哋一行三人嚟食晏慶祝生日，先點咗三個壽司盛 - 御膳炙燒壽司盛x2 & 御膳豐洲壽司盛x1。每個餐都有跟沙律，麵豉湯 & 烏冬，百零蚊一個餐，性價比其實都幾高 👍🏼但因為壽司嘅份量偏細，我哋三個又比較大食，所以我哋就嗌多咗其他美食試吓 😋時令鮮魚薄切好新鮮，一放低我哋就秒清原隻活赤貝都新鮮，造型靚，味道不過不失鹽燒牛舌超正，又厚又juicy，直頭係幸福感滿滿野菜天婦羅炸得香脆又唔油，都幾好味味醂魚乾燒得都幾香，味道不錯沖繩苦瓜沙律好好味，苦瓜唔苦又脆，仲要有好多煎香咗嘅三文魚肉碎，好驚喜蔥粒碎拖羅卷味道一般塩燒白鱔串又係另一驚喜，皮脆肉嫩又唔鯹跟餐嘅冷烏冬麵，因為唔係手打烏冬，所以有少少失望總括嚟講我哋三個都食得好開心，食到好飽捧住個肚走！ …Read More

我本身係一個食肉獸，所以好少食齋，因為以往嘅經驗話我知，食齋係食我唔飽嘅。朋友話帶我食好齋，仲要包我食得飽，咁大食嘅我就梗係要試吓啦！餐廳環境走簡潔路線，地方唔算大，但感覺舒適。餐廳好細心，見我哋5大3小喺限聚令下要分開兩張枱坐，就特意安排我哋一行人入房坐，咁就算分咗枱傾起偈上嚟會大聲啲，都唔怕嘈到其他客人 因為我係第一次嚟，所以全程都係由朋友話事發板點菜！等咗一陣，驚喜就陸續送到，直頭係一浪接一浪 我估唔到”齋”都可以煮到咁岀神入化，多姿多彩 最緊要係食得飽，飽得嚟又唔會滯！！！同德真係打破咗我對素食嘅印象！我一定要帶多啲朋友嚟食，等大家都一齊驚喜吓 …Read More

話說都好幾年冇嚟宜家嘅餐廳食飯！ 今日路過見唔多人，就忍唔住貢入去食個快飯😆 因為餐廳本身都係半自助形式，所以都好適合一個人食孤獨飯 😂本身嚟到而家嘅餐廳，就梗係諗住食佢嘅招牌肉丸啦！但排隊揀嘢食嗰陣，見佢有炸豬手，仲要係超抵價$66，唔係唔食呀 🤤 Sorry 呀肉丸，我都係下次先食你喇！呢隻炸豬手真係可以用抵食夾大件嚟形容！一個人食，細食啲嘅都未必食得哂 😂 同埋以快餐嚟計，呢隻豬手嘅賣相真係好吸引！我一坐低就急不及待要食，但落刀嗰下覺得好韌，諗住實伏咗啦。。。點知原來係刀嘅問題 (因為餐廳只提供最普通嘅餐刀，但喺其他餐廳食豬手，係會俾把大据齒嘅切肉刀你) 食落塊皮係真係脆嘅，味道唔錯，冇豬臭味！雖然跟蒜茸汁，有啲搞笑，但又岀奇哋夾，再加埋頗酸吓嘅酸菜，真係好惹味 😋除咗炸豬手，我仲點咗個脆朱古力杏仁餅！但呢個杏仁餅唔太推介，太甜，同埋個餅底好沙好乾。。。雖然都有少量脆杏仁粉，但整體而言真係甜到爆，基本上食唔岀朱古力或杏仁味 🤦🏻‍♀️我係一個大食嘅人，所以我一個女人仔都KO到隻豬手 😎 但食完豬手 + 塊餅，連我都覺得頗膩。。。我諗我下次都係揾人share隻豬手，然後再加肉丸會好啲 😝 …Read More

我一向都係一芳嘅粉絲，就算新城市廣場有其他台式茶飲選擇，我都會專誠去幫襯一芳！今日行街行到珍珠奶茶癮起，就梗係要買番杯嘆吓啦！點知就中咗伏。。。珍珠奶茶加仙草 - 叫咗少甜少冰，但嚟到係一啲甜味都冇。。。我以為自己叫錯走甜，但睇返張單，我係冇叫錯嘅！奶茶冇奶味亦冇茶味，好似飲緊凍水加珍珠同仙草咁。。。勁失望！好彩珍珠仍舊煙煙韌韌，仙草都帶少少甜味，算係冇味中嘅少少甜啦！！但同我原先預計嘅完全唔同。。。今次可算是我飲一芳以嚟，最差嘅一次！！！…Read More

兩母女去Homesquare睇傢俬，又點少得去Beans食lunch呢！星期六十二點鐘左右到，疫情 + 二人限聚令下，都要等成45分鐘先可以入座。。。好彩商場嘅室外空間有啲位坐，同行嘅媽媽可以坐下休息，唔使一齊罰企。因為媽媽唔好all day breakfast, 我就點咗黄金蟹肉意粉 & 德國燒豬手兩母女share！點餐時講明燒豬手要等30分鐘，所以我就跟餐加多碟黑松露薯條，以便邊食邊等。首先嚟嘅就梗係黑松露薯條啦~ 一定要讚吓個黑松露醬，真係超惹味！薯條又炸到唔油兼脆卜卜，點住醬食真係好正，連媽媽都大讚！跟手黄金蟹肉意粉都嚟喇~ 連埋個蟹蓋一齊上，賣相一流！意粉好creamy，但唔係好食得出鹹蛋黄嘅味。。。大大條蟹柳睇落好吸引，但食落好一般。雖然”黄金”唔突岀，但整體係好食嘅！食住等時間好快過，隻德國燒豬手都到喇~ 餐廳好細心，點餐時有問碎上定自己切？我哋懶就梗係碎上啦！雖然話係德國燒豬手，但一啲都唔傳統，不論豬手上面個汁，伴碟酸菜，定係豬手本身都同德國完全拉唔上關係。。。如果唔追求傳統德國feel，咁整體嚟講都係好食嘅！隻豬手其實就好似炸脆咗個皮嘅本地鹹豬手，可惜個皮唔夠脆，不過肉就好夠味！酸菜亦好似切咗絲嘅中式酸菜。而豬手上嘅汁，就好似係以黑醋汁為主調嘅自調醬汁，不過都算夾味。總括嚟講，我哋兩母女對呢三樣食物都好滿意，亦都食得好開心！下次嚟都會再叫！！…Read More

珍珠奶茶加仙草堪稱係我最愛嘅茶飲！不過就唔係間間台飲都有提供，試過好搞笑地唔俾溝埋 😅因為天仁茗茶係一定有珍珠奶茶加仙草嘅，所以癮起就飲佢啦！先講奶茶，叫咗少甜都係頗甜，但都仲飲到茶味嘅，我諗下次叫微甜可能會好啲！珍珠好實淨, 太好咬口，𡁻得耐有啲攰，同埋好飽。仙草口感本身唔錯，但珍珠實在太實，變相令仙草冇乜存在感。。。整體嚟講都叫做不過不失，但飲完好飽囉 😂…Read More

阿大少行行吓街話又攰又口渴，所以我就帶咗佢嚟春水堂坐下回下氣！媽媽我仲可以順便嘆杯珍珠奶茶 😝之前淨係試過外賣，都係第一次喺香港堂食。疫情下，都要等10分鐘先可以入座。大少話佢唔肚餓，所以我哋淨係叫咗一杯珍珠奶茶，一碟黃金地瓜條，一份奶酥吐司做下午茶。因為阿大少只得四歲，侍應見佢細路仔唔飲得珍珠奶茶，都好樂意俾杯水佢解渴。先講珍珠奶茶，茶味香濃，唔太甜。面頭有少少奶泡又幾好飲，不過頗多冰，好快飲完。珍珠煙煙韌韌好咬口，細細粒食得多都唔會滯。黃金地瓜條 - 蕃薯條炸得好香脆，梅子粉酸酸甜甜，開頭食有啲怪，但食食吓又幾惹味。阿少爺好鍾意，食到就嚟想舔埋個碟！奶酥吐司 - 厚多士外脆内軟，面皮甜甜脆卜卜，好似菠蘿包個皮，但比之再幼滑啲。不過呢個吐司食落有啲膩，最好多啲人一齊分享 (因為阿少爺唔鍾意食，最後我自己一個食晒)叫咗三樣嘢，三樣我哋都好滿意！下次路過一定會再食 😋…Read More

今日決定養身啲 😂 唔飲珍珠奶茶，改為試吓薑汁粉圓鮮奶 😜呢個薑汁粉圓鮮奶嘅薑味濃得嚟唔會辣，少少甜好好飲！珍珠照舊好咬口，個人認為熱飲嘅珍珠，仲好食過凍飲嘅添 😂會再飲 👍🏼…Read More

珍珠奶茶癮起，路過一芳就梗係要飯返杯啦！原本係想飲珍珠仙草奶茶，但收錢個姐姐仔話冇得咁叫。。。但明明我之前都叫過，仲要都係呢間店，只係落單時要叫仙草奶茶加粉圓，而唔係珍珠奶茶加仙草 (次序是很重要的嗎？) 好啦，咁我好似上次咁落單啦，點知阿姐姐仔都係話唔得，兩樣唔可以溝埋。。。唉~算喇，費事拗！唯有就咁飲珍珠奶茶吧啦！！講返杯珍珠奶茶，今次奶味重咗啲，茶味要吞咗先感覺到。但珍珠依然好味，甜甜地有咬口，彌補返茶味唔夠濃嘅不足 😋…Read More

身為珍珠控嘅我，奶茶可以唔飲，但珍珠一定唔可以唔食！所以今日決定唔飲奶茶飲黑糖粉圓鮮奶 😋 呢個黑糖粉圓鮮奶嘅奶夠滑，珍珠煙煙韌韌好咬口，黑糖充分搖勻後啱啱好唔會太甜，整體感覺良好，飲完勁有滿足感 🥰…Read More

疫情反覆，我同老公主力都係外賣自煮，好少岀街食飯。但壽司癮起，就一定要堂食先食到最新鮮嘅食材！餐廳開12點，我哋12點半到都仲喺唔使等枱，正！因為太耐冇食壽司，我哋就算得兩個人都嗌咗好多嘢食，食到超飽！好彩所有壽司都好好味又新鮮，我哋飽都全部食晒，冇浪費！！好好食，一定會再光顧 👍🏼👍🏼👍🏼…Read More

得知呢度嘅下午茶餐轉咗新 menu, 就着媽子陪我嚟湊吓熱鬧 ^^ 今日老豆放假, 我哋就決定開開心心嚟試餐~ 我哋點咗三個 tea set (≧∇≦)Tea Set 1c:Tea Set 1d:And Tea Set 1e:下午茶餐 2 加咗新選擇, 我決定試吓新加嘅温泉玉子, 但媽子, 老豆就決定點返佢哋嘅喜好:因為下午茶餐 3 冇新嘢揀, 我哋三個照舊揀咗 Tea Set 3a:我哋用特價額外追加咗一個吞拿魚手卷 & 兩個軟殼蟹手卷:我同老豆都係大食之人, 正常一個下午茶餐又邊夠我哋食吖 (≧∇≦) 我哋用正價追加咗六件三文魚腩壽司, 兩件飛魚子軍艦壽司, 四件特大帆立貝壽司 & 兩件蒲燒鰻魚壽司~上菜嘅速度依舊超快, 冇幾耐所有美食經已到齊 ＼(^o^)／ 所有壽司用料都好新鮮甜美, 蒸蛋軟殼蟹手卷炸雞亦一樣出色! 今次最驚喜, 除咗新配撘好啱我胃口之外, 莫過於新推出嘅温泉玉子 ^^ 上枱時見佢平平無奇成隻烚蛋咁樣, 都有啲失望... 點知一打開隻蛋, 加埋啲特製醬油一齊食~ 嘩! 真係超水準呀!!! 蛋白滑到好似豆腐一樣, 配埋醬油一齊食, 超惹味; 拮穿個蛋黃, 啲溏心就有如泉湧咁流出嚟, 食到停唔到口~ 媽子老豆見我一副享受非常嘅食相, 齊聲話下次都要試 ^O^呢度嘅水準穩定, 價錢大眾化得嚟分店又多, 可算是我最愛嘅連鎖店!!…Read More

之前嚟過兩次買芝士方包都踫壁, 搞到我更加懷念佢嘅滋味… 今日又路經此處, 當然要嚟個三顧草廬, 睇吓買唔買到啦!哈哈, 啲芝士方包好似知道我真係好有誠意食佢哋, 今日終於俾我買到喇 (≧3≦)表面嘅芝士焗到好香脆, 方包本身亦好軟熟, 外脆內軟, 口感一流~ 切開一片片, 清晰可見內裡有好多芝士粒 (^o^) 融化喺包身不同位置, 真係芝味十足, 令人回味無窮!! 不消一刻, 我就一個人食哂成條方包, 唔記得留返啲俾男友試吓添 (￣∇￣) 哈哈, 佢等下一次啦~…Read More

前幾日嚟完國際交易中心呢度 Happy Hour & 晚膳之後, 男友便愛上咗呢個地方! 今日星期六, 佢又話要嚟呢度食晏, 貪其唔使點等位之餘又有好多餐廳都未試過~ 視察咗一輪, 我哋決定嚟呢間日本餐廳開飯, 因為佢哋喺週末有好多優惠 (≧∇≦)餐廳嘅環境簡潔, 中間有個頗大嘅料理檯, 可算係店內嘅特色~我哋好快就點好餐 ^^ 但因為刺身, 壽司喺星期六, 日及公眾假期都有半價, 我哋就點多咗兩件生和牛壽司 & 兩件三文魚壽司~ 和牛同三文魚嘅油脂分佈都好平均, 食落油香甚重, 滋味無窮!午市定食方面, 男友點咗個朝鮮柚子風燒雞親子丼 ^^ 定食好豐富, 除咗雞肉丼之外, 仲有日式蒸蛋, 沙律, 清湯烏冬 & 醃南瓜~ 先講個雞肉丼, 雞惹味, 蛋汁香, 醬汁又多, 真係食到停唔到口! 蒸蛋就滑到似豆腐, 而且有鮮菇片, 菜葉, 蓮子同蝦肉, 口感豐富; 沙律最特別係加咗西瓜粒, 配埋生菜同醋一齊食, 酸酸甜甜好過癮; 清湯烏冬嘅湯底不錯, 但略嫌烏冬太焾; 醃南瓜就不過不失, 甜甜哋冇乜特別~我就點咗個燒雞扒胡麻醬冷稻庭烏冬 ^^ 呢個定食都一樣好豐富, 有冷稻庭烏冬, 日式蒸蛋, 沙律, 三色壽司 & 醃南瓜~ 日式蒸蛋, 沙律 & 醃南瓜嘅味道同上, 但個燒雞扒冷稻庭烏冬就真係抵讚 (≧∇≦) 燒雞皮脆肉嫩零脂肪; 烏冬較扁身, 但好滑好有嚼口; 胡麻醬麻香味重不特止, 仲有芝麻碎~ 越食越惹味, 令人食指大動 ＼(^o^)／呢度嘅美食都好合我哋胃口, 但平日嘅價錢都唔平... 我哋都係留待週末先再嚟幫襯好喇~…Read More