蝴蝶結姐姐's Profile

話說去朋友屋企探完BB，順道去了啟德新開的商場AIRSIDE食個午餐。老公話想試吓呢間Chatterbox Cafe，好啦，反正又未食過就不妨試吓。雖然知道係食新加坡菜式，但餐廳的裝修卻十分時尚，仲有獨立房間，我們用手機落單之後，食物都好快送上。文華海南雞飯，落單時我專登揀了雞髀，可以見到雞皮晶瑩剔透，口感嫩滑，配上薑蓉、醬油，送白飯一流，我覺得係必食的。招牌椰子沙冰配涼粉及日本紅豆，第一啖椰子味十足，入面有涼粉同紅豆，令口感非常豐富。芝麻鮮蝦多士，多士配上蝦滑，香脆可口，配上煉奶一齊食，有少少似炸饅頭的感覺。特色鹹蛋魚皮，據說這個魚皮是餐廳招牌，我們就好奇心試吓，果然甘香鬆脆，坐對面都聽到嗰種脆的聲音，加上香濃鹹蛋醬，邪惡萬分。另外我留意到餐廳正推廣一個優惠，叫Cuisine Rewards 全新會員計劃，是免費登記的，有不少迎新優惠，都慳番幾多㗎！…Read More

話說Happy Hour同朋友約去中環呢間串燒酒場飲嘢食串燒，聽住輕快的音樂都幾有feel吓。落單是用手機scan QR code，串燒款式有差不多過百款，我們order咗兩個串燒set，加一些串燒以及飲品。先來兩個set，包括有雞皮手打蝦滑、無骨白鱔串、芝士魚糕、燒魚肉燒賣。焦香嘅雞皮包住蝦滑，口感幾彈牙；如果食鱔的話，燒白鱔的肉感都幾豐厚，無骨放心食。另一個set有雞皮墨魚滑、芝士雞肉串、雞軟骨，同埋蜜糖雞翼。我自己幾喜歡個芝士雞肉串，燒烤的雞肉特別香，淋上一層芝士醬，十分creamy。再來用蒜蓉去燒嘅招牌茄子燒、燒韭菜、入口有即融口感嘅炭燒牛板腱、煙燻和牛牛舌，這個如果不是燒太耐會好少少，羊西冷、脆卜卜嘅燒乳豬，肉嫩多汁。海鮮亦order咗少少，彈牙的香蒜燒鮑魚、燒魚卜第一次食，口感有少少特別，煙煙韌韌咁。配番杯Chi Bubble，果味豐富，我自己覺得配串燒幾適合。朋友果杯Sake Highball 則比較清爽，解辣會是不錯的選擇。…Read More

德福商場shopping完之後在food court碰見呢間花甲粉，原來剛剛在6月1日新開張，款式選擇都幾多，可以揀米線、粉絲或者菜底，又或者加$8轉稻庭烏冬/加底，最後二人選擇了伊比利亞橡果豬花甲粉以及無骨魚片花甲粉，套餐包飲品。伊比利亞橡果豬花甲粉，花甲粉用錫紙裝住，與普通的肉片比較，橡果豬肉片嘅肉味比較濃，花甲幾大隻，鮮甜，至緊要食落去無沙。粉絲吸收咗辣湯，醒胃又十分惹味。至於個無骨魚片花甲粉，係幾夾個花甲，大家都係海鮮，令到個湯多了一層鮮味，另外有些豆卜，幾吸味。藤椒辣魚皮都幾過癮，魚皮爽口，麻辣帶椒香，食完一塊又會想夾下一塊。…Read More

數日前同朋友去咗呢間韓式餐廳吃飯，食物都唔錯，Lunch時間order咗之後，很快就上菜，我地笑說效率十足香港人，但望入去廚房，看見是一位韓國姨姨去炮製。我地三個人，點咗雜菜牛肉炒粉絲、海鮮辣豆腐湯、海鮮煎餅，大家share食。配料十足嘅雜菜牛肉炒粉絲，牛肉粒份量頗多的，加入咗黑椒碎，香味更突出。海鮮辣豆腐湯，橙紅色湯底看似甚為辛辣，但食落去又可以接受，配上鮮蝦、大蜆等，每啖湯配埋白飯甚為惹味。海鮮煎餅，口感似中式薄餅，裡面是香蔥、蝦米粒。如果要找一個詞形容，住家菜當之無愧。…Read More

燒味一向是香港人的摯愛，每逢節慶或者平常屋企斬料都鍾意買燒鵝、燒肉，而我自己買燒鵝的話，就幾鍾意中環呢間燒味店—一樂。買咗半邊燒鵝，斬料外賣帶到返屋企，一打開個盒，鵝肉的香味四散周圍，妹妹即刻跑過來聞大家都即刻想夾一舊來食，燒鵝皮薄肉嫩，色澤非常之均勻亮麗，睇見都即時流口水。再配上餐廳自家製的酸梅醬，酸酸甜甜，更突出鵝肉的肉香，同鵝肉真係好夾。難怪幾年來餐廳都榮獲米芝蓮推介，相信已經在燒鵝界備受肯定。…Read More

疫情以來，少了外出食飯，媽媽即興想食陳儀興，晚上即撲去買，必叫媽媽至愛鵝肉。鵝肉，是媽媽至愛，話做得好入味，嫩滑得冇牙都食到😂 我就鐘意沾些醋食吊出鮮味。豆醬煮海魚，原條海魚用了豆醬去煮，帶點咸香，又不掩蓋魚的鮮味，肉質十分嫩滑。蝦棗拼粿肉，是潮州人新年時必食的菜式，蝦棗用蝦膠搓成球炸到金黃，外層香脆，內裡彈牙。至於粿肉就是薯粉摻入肉餡，用腐皮裹著去炸，鬆脆煙韌，口感好特別。反沙芋頭，好有心機的一款潮州甜品，炸好的芋頭仔，反覆用沙糖熱炒，結成糖霜，脆卜卜的外層，包著香糯的芋頭，超正！另外叫了兩杯老藥桔，似咸柑桔，好滋潤喉嚨，依家燥熱天氣飲就最適合不過啦。…Read More

新蒲崗的陳儀興潮州飯店開業至今已經半個世紀，對老街坊絕對不會陌生，早排在將軍澳都開新分店，剛搬去將軍澳不久，我就有口福啦，而且外賣自取有九折，抵。必食的滷水鵝，雖然是例牌但好夠份量，滷水鵝肉質嫩滑，鵝肉的香甜配上秘製滷水汁，送飯一流。糯米釀大腸，這是一個心機菜式，將大腸洗乾淨之後釀入糯米、花生，再煎香，外皮香脆，餡料軟糯。脆盞生炒骨，外賣返到屋企，生炒骨依家外層鬆脆，肉質爽口彈牙，酸酸甜甜，配上三色椒十分爽脆。…Read More

銅鑼灣閙市又新開一間日本餐廳，有Omakase 食，急不及待約埋朋友去試試。餐廳面積不算太大，但環境簡約舒適，自然光線充足，可以邊食，邊看看師傅烹調料理。先來個餐前小食，日本富山灣瑩光魷魚仔，醬汁香濃；日本南瓜明蝦沙律，南瓜軟腍香甜，配明蝦沙律味道好夾；牛油芝士柿餅，柿餅夾著牛油芝士，口感軟糯。北海道赤牡丹蝦，牡丹蝦晶瑩剔透，配上粒粒魚籽，帶點咸香味。松葉蟹鉗天婦羅，粉漿很薄，咬一口鬆化得聽到「卡卡」聲，蟹肉鮮味，還有冬菇天婦羅、蘆筍天婦羅。吞拿魚腩，魚腩脂肪平均，色澤好靚，有入口即融的口感，魚油豐富且魚味很濃郁。酢鯖魚，師傅用了醬腌，撒上日本蔥粒，質感彈牙且多了些蔥香。冰見寒鰤，來自日本冰見港，肉質非常鮮滑，配上芥末、黑白芝麻，帶點點微辛。金目鯛，將金目鯛刺身卷成玫瑰花型，賣相精緻吸引，撒上金箔粒，顯得份外矜貴。活赤貝拼白象拔蚌，口感鮮甜爽脆。白籽拼安康魚肝，白籽正值當造，口感嫩滑，配上秘製的醬汁，鮮味十足。我們好滿意呢餐Omakase ，聽師傅講食材都是每日空運到港，最新鮮最靚的，而且師傅好友善，每次上菜都會告訴我們，與出面的Omakase 好不同，決定下次再獎勵自己多一次！…Read More

我就最鐘意飲湯，不過有時都想懶吓，買現成的湯包，加熱10分鐘就飲得，好方便。上個月在滋味靚湯訂了幾個湯包，都幾多款健康養生湯選擇，6點前訂竪日就送到。花膠瑤柱螺片鮑魚紅棗雞湯，用料好矜貴足料，清甜滋潤，口感濃郁，對養顏有功效。何首烏川芎女貞子鮑魚嚮螺雞湯，湯色清澈，帶一點點中藥材味道，有滋陰護髮好處。胡椒白果腐竹金華火腿煲豬肚，香濃的胡椒腐竹，微辣可口，滋補養胃，飲完暖粒粒~而且湯包放在冰格可保存一個月，方便隨時加熱飲用，三餸一湯輕鬆做得到。…Read More

睇完個介紹河內街頭小食的美食節目，即刻想去搵搵附近的河內美食，「河內越式料理」是其中之一，環境雖然未及節目裏邊的地道，但外賣返去，食物上都做得唔錯。生牛肉湯河粉，湯底好清甜，牛肉的份量都幾多，河粉幼身軟滑，配料加青檸、辣椒粒增加味道的層次。越式咖喱牛腩飯，牛腩的份量相當，炆得軟腍易入口，且咖哩香辣濃郁，咖哩汁掛著每件牛腩，配白飯食好好味。越式炸蝦餅，外層好鬆化，蝦餅夠彈牙，配酸辣醬汁食特別醒胃。越式豬頸肉，燒烤後的豬頸肉外層焦脆，肉質爽脆，口感好香，食到停不了口。杞子龍眼茶和檸檬蜜糖薑茶，滋潤暖粒粒。…Read More

雖然是外賣，但等外賣的時候被餐廳的塗鴉牆所吸引，畫得真係幾靚，好啱打卡。落單無耐，食物都做得很快，職員打包好給我。韓式酸甜炸雞，炸雞是即叫即炸的，雞件去了骨口感啖啖肉，而且不會太乾，仍有肉汁，配上酸甜辣醬、芝麻粒，很惹味。泡菜豬腩肉炒飯，煎香後的五花腩肉和脂肪比例平均，口感甘香可口，配上酸辣泡菜和炒飯一齊食，100分。軟滑豆腐海鮮湯，用了辣醬去煮這個海鮮湯，有少少辣但可接受，加埋軟滑的豆腐，配白飯飲濕潤一下喉嚨都幾好。之外，外賣亦附送芽菜和酸白蘿蔔小食，十分爽脆。…Read More

早排天氣凍，特意去買了拉麵外賣回家，旺角新分店還有外賣自取8折優惠，十分抵！特選拉麵，有叉燒1.5倍、炙叉燒、紫菜筍和味付雞蛋，湯底揀咗豚骨濃湯，雖然是外賣，但拉麵和叉燒是分開的，不用擔心拉麵會浸淋，炙燒過的叉燒有微微焦香，口感軟滑，麵條的軟硬度也剛剛好，而且湯底好濃郁。肉愛食者拉麵，有多種叉燒包括好大塊的叉燒3倍、厚肉的角切叉燒，滿足愛肉的朋友，同樣有筍和味付雞蛋，雞蛋有些流心，醬腌好好味。另外追加了兩條巨型蟹棒，啖啖肉，超正！炸雞四件及炸章魚，炸雞色澤金黃，外脆內軟，仍然保留肉汁；至於炸章魚則有些嚼口，唧少少檸檬汁可以減低油膩感。點了柚子梳打和桃梳打各一支，柚子酸酸甜甜，Er一下好爽啊！食完拉麵，我地成個人暖番好多。…Read More

走上尖沙咀諾士佛台，有唔少酒吧餐廳，朋友帶路，先發覺原來呢度有間不錯的日本菜，餐廳深木色的家具、別緻的日式庭園、加上微微昏暗的燈光，感覺上非常有氣氛。我們從餐牌上揀了幾款食物，先來醬油玉子，糖心雞蛋口感滑嘟嘟，配醬油蔥花增加蛋香。蓮藕配南瓜沙律，軟綿綿的南瓜肉，口感香甜，配上脆卜卜的蓮藕片，甚為滿意。炸雞飯，炸雞金黃香脆，外脆內軟，有肉汁不太乾，配上酸甜醬汁，食飯特別開胃。另外定食配有南瓜小食和豆腐海帶麵豉湯。雜錦刺身飯，有牡丹蝦、三文魚、池魚帶子、海膽、三文魚籽，顏色相當豐富，刺身鮮甜肥美，灑上日本香蔥，不用醬汁都好夠味。…Read More

每次經過積福街都會望見門口這一排排紅色大燈籠，認真吸睛，一直都想搵機會試吓。之前舅母生日，就搵機會試吓呢間中菜館。勾魂叉燒，聽到個名已經覺得厲害，職員先用秘製15年的陳皮醬汁塗抹於叉燒表面，再用火炙燒表面，讓外層焦脆之餘，亦好讓醬汁滲入叉燒裏面，食嘅時候可以將脆米撒於叉燒表面，口感脆卜卜，入口軟腍多汁，而且豐富嘅蜜糖香，確是令人回味。薑米蒜香籠仔蒸蟹飯，用上原隻膏蟹，加入薑米蒜蓉，用蒸籠去蒸，米飯吸收了蟹的鮮味，以及薑米蒜香，飯粒分明，忍唔住一口接一口，而且蟹肉都好新鮮，超多膏。辣豆豉尖椒炒松阪肉，用豆豉、尖辣椒去炒松阪肉，好香豆豉醬汁味，又帶些辣椒香辣，越食越起勁，且松阪肉口感亦十分軟滑。香濃腐乳炒蝦球伴西蘭花，用腐乳去炒蝦球都係第一次食，味道幾特別，香濃的腐乳味，蝦球大隻兼彈牙。紅豆椰汁糕，紅豆和椰汁糕層次分明，紅豆軟腍，椰汁香濃，口感爽滑亦不會太甜。桃膠紅棗蓮子糖水，用了桃膠、紅棗、蓮子去煲，呢個糖水最啱呢種乾燥天氣食，夠晒滋潤又養顏啊。…Read More

天氣又凍返啊，在桂花小幸食咗冬季新出的蟲草花杞子豬肚雞湯飯，雞腿肉和豬肚絲軟滑腍身，啖湯好香濃，配飯食暖粒粒好好味。仲有紅燒牛肉麵，湯底清甜，有齊牛腩、腱心牛肉、牛丸，炆得入哂味，入口軟腍，不會痴牙，麵條的口感亦好彈牙。配番杯Creamy的奶蓋烏龍茶，茶味香濃，剛好平衡一下油膩的感覺。心思思想食甜品，於是又嗌左一個黑糖紅豆綠豆仙草，黑糖冰口感清爽，紅豆和綠豆都煮得好腍，又不會太甜，連仙草一齊食清甜且滑嘟嘟。…Read More