Tony林's Profile

下午兩點諗住去食下午茶飯餐，但未試過正式午餐就試下，雖然貴過下午茶餐十零蚊，但起碼份量多啲食得飽，因今日比較早食早餐，所以到兩點已經肚餓。加上午餐有例湯送，都想飲下佢例湯出品如何?入到去一如既往冷氣足，有免費 WIFI 連結使用。兩邊有大電視但只播 VIU.TV。我叫 2 號午餐蘿蔔火腩飯、凍奶茶。午餐原價 HK$50元，凍飲另加 HK3元。凍奶茶一分鐘已經到，再約五分鏗飯上枱，但仍未見例湯就問聲阿姐，陳姐話依家去拎俾我。可能當時全場得阿姐一個較忙，其他下午班又未返，部份員工又去送外賣 !?午餐上㭘非常有驚喜，因平時元朗搵食都好難，搵到賣相咁好火腩飯，火腩整齊靚瘦肉多啱我，皮好薄都好香。雖然碟頭飯但飯與餸同碟分開擺，呢樣擺法我極之欣賞，因為白飯唔會被茨汁覆蓋，我係唔多食茨汁習慣，因始終唔太健康多油多鹽又多糖。碟飯我俾85分，唯一不足就係上枱時唔夠熱，可能現場冷氣太足所致 !? 例湯湯渣量足，有一舊豬骨連肉有得食好滿足，可能煲例湯煲太耐蒸發太多水份，像落較鹹但味係濃夠火喉，當然都飲到一定有加味精啦，但都滿意有誠意。凍奶茶平時飲開都知佢一般合格，主要茶唔夠濃、奶亦唔多夠唔夠香滑，冰稍嫌多快溶就更淡，大氣天時確係唔係好夠喉。現場侍應一向服務殷勤，平時送外賣哥哥仔唔好睇佢 MK 款，但招呼反應及態度非常好。呢間餐廳仲有一樣值得讚，就係每次都會俾一杯清水俾你，但唔係每個侍應都俾餐紙巾俾你，但你可行去櫃枱自取唔會鬧你，同埋佢餐紙巾係厚身兼軟。呢間餐廳唔好睇佢開喺工廈，附近大興邨最多熟客去幫襯，加上附近都多私人屋苑，夜晚行過都見座無虛席好生意。做飲食價格相宜、堂食乾淨企理、樓面服務到位就可以，唔需要你大酒店式服務，已經好有意慾做回頭客。…Read More

知道呢間麵店開咗一段時間，因返公司忙到晚上，剛返到元朗九點，在康樂路輕鐵站落車，貪近第一次幫襯試下。入內好多位選擇，我選普通四人枱。因我近年比較少食肉，希望多菜少肉較健康，所以近年多數食水餃，而今次第一之幫襯，嘗試叫水餃河粉加腩汁，另跟送一杯冷熱飲我就叫熱奶茶。呢個餐 HK$32 元超抵食，不到五分鐘已一拼上枱。水餃算大粒爽口好食，河粉係幼身但有些少鞋口唔夠滑。湯底出奇鮮甜好飲，但係味精果種鮮甜，所以都唔敢飲太多，試兩羹就算。碗面跟湯羹蔥花，可自行選擇是否投放在麵內。熱奶茶有少少澀，可能淡奶唔夠 ? 但飲落似凍奶茶翻熱 ?侍應落單係用電腦再出單去水吧，但要注意水吧成日收唔到單漏單，如果等得較耐要追問侍應。有香港支付寶、及香港微支付，但冇八達通大家要注意。2月22日晚上同樣時間再去幫襯，今次食都一樣，河粉比第一次食改善滑咗。另轉試凍奶茶。出奇今次凍奶茶比第一次熱好飲，冇澀味感覺淡奶較足夠。總括講呢個價錢性價比超高，堂食地方都算寬敞，而且尚算乾淨企理。除留意電腦落單有時會漏單外，侍應阿姐超冇記性，見有人客漏客前後催咗三次，三次同一阿姐都有上前了解，但至第三次先逆得發生乜事，阿姐掛住跟同事講新同事壞話，彈新女同事記性差，但我覺得話人果個仲差，好誇張 !…Read More

今日早上有工作要早起身外勤，完成後返到元朗約十點，由元朗廣場特意步行至，嘗試品嚐一下東粵粉麵餐。入內客人唔多得三四枱，我早聞某飲食群組所述冷氣唔夠，就刻意坐入少少近水吧卡位，近水吧果排卡位冷氣極凍及大風。入口處其實都應該冷氣足夠，估計係職員要不時企在門口喊口號宣傳，所以玻璃門時常都係半打開，令到近出入口冷氣漏走所致，所以好多食客都反映冷氣不足原因 !坐低阿姐幾好禮貌，叫我慢慢諗，諗好就叫佢。每張枱都有個大餐牌，餐牌尚算幾清晰，我叫咗『牛腩河 + 凍奶茶 HK$32』，點餐後阿姐放低賬單，之後再補上一杯暖清水，呢杯清水對我嚟講好重要，係我俾第一印象分之一。堂食環境、及枱櫈我覺得好乾凈企理，調味料及筷子都感覺乾淨。但原來唔係每枱都有豉油，我問阿姐拎豉油，阿姐話唔係每枱都有豉油，拎完俾我即時話：『總之有乜需要隨時叫我哋』，服務態度 + 乾凈企理、及座位尚算寬敞程度，已經令我會再幫襯。牛腩河呢個價真係唔錯，牛腩夠淋唔肥啱我、份量亦唔少，但希望再薄切少少。河粉係幼身滑湯河，應該係俗稱沙河粉 !  湯底偏淡適合我口味，加蔥花更顯香味，我有試辣椒油唔太辣亦適合我，因我一向只食小辣。其實近年我已經極少食牛腩，不過見某群組好多食評，都係集中討論呢間牛腩出品，所以我今次先破例再食牛腩。凍奶茶上枱時賣相色水唔錯，但飲落茶味有啲澀，淡奶唔夠香濃，估計唔係用黑白淡奶、或就算係用黑白淡奶嘅話，都係落得較少!? 不過睇色水奶量都唔少，應該好大可能唔係用黑白淡奶了! 呢杯茶令我想起張光記果杯，都唔係我中意口味，希望店家改善一下。我唔需要好有水準，但希望茶唔好有澀味，及奶味唔夠濃厚，如果呢杯飲品另外收正價，咁我寧願飲清水。聽聞之前係用前一手食店餐單，今次睇番應該係用新餐單，但新餐單唔係訂製，簡體字冇店名似係淘返嚟用 !門面照片係雙鋪打通，室內空間寬敞，乾淨企理。…Read More

本來想去附近俊賢坊食【大成麵館】魚餐，但因忘記星期日休息摸門釘，所以就轉去新駿皇試一下。我只幫襯過巴士總站剛開業時駿皇，幫襯咗一輪就冇再幫襯了 ! 之後搬咗去現址改名新駿皇，我就一直都未幫襯過，今日終於可第一次幫襯試下了 !今日兩個人去諗住食魚，見門口餐牌有個晚市蒸餸套餐$163元，可選一款蒸魚、再跟半隻蔥油雞、白飯、再送油菜+例湯+凍飲加$3元、及凍檸樂加$7元。坐低卡位先奉上兩杯暖水，水杯係不鏽鋼杯幾精緻幾靚。落咗 Order 叫晚市蒸餸套餐後，先上兩碗中式例湯，係南瓜胡椒湯，唔見有豬肉及豬骨，感覺係用胡椒重味去化替豬肉或豬骨?! 不過有部份人尤其老人家或小童，係唔受得胡椒辛辣味，希望加番啲急凍豬湯骨提升鮮味，唔好為降低成本用胡椒啦 ! 阿姐服務態度都唔錯，而且係用手機落 Order 都幾先進。揀咗豉汁蒸鯧魚，約 5 分鐘後先上蔥油雞半隻，雞算見肉好厚冇乜肥膏，但肉質較鞋冇乜鮮味，雞皮都幾厚。蔥油佢直接鋪面上，而且蔥油非常淡味，我要自己加幾滴豉油先有味，建議蔥油分開上更好。之後陸續上油菜，我揀咗牛腩汁菜芯，菜芯好大氣好翠綠鮮嫩，渌得剛剛好唔會過淋，呢個油菜值得一讚 ! 隔咗約5至8分鐘再上豉汁蒸鯧魚，鯧魚約女性手掌大細，肉質一般還可以，豆豉比較多但豉汁比較少，將碟內汁水用匙羹𢳂落魚身，都係感覺俾蒸氣倒汗水溝得太淡 !白飯口感及飯味還可以，不過碗白飯上枱，𢳂飯就𢳂到亂糟糟咁，希望又改善下用個飯勺壓下佢，賣相會好好多。凍檸樂係瘦身罐裝可樂上，俾一玻璃杯冰底自斟，呢樣跟餐係加 $7元。另外我叫凍奶茶，跟餐加 $3元，凍奶茶比較淡冇乜茶味，但就幾大杯份量幾多，掛住食飲品照片唔記得影啦 !  期間阿姐多次幫忙執枱，服務確係唔錯呢點要讚。卡位枱面側邊拉出拎餐具，遺憾係冇提供餐紙巾，如果有提供餐紙巾，服務我會俾多一粒星、去到五星 ! 埋單可以用八達通都方便，使用消費劵人士就更方便啦 ! …Read More

今晚本來約咗大哥深水埗晚飯，但大哥突然有工作要去屯門，所以取消深水埗晚飯。但舊鋪鄰居韓國 John，突然通知我佢約咗 Matthew 晚飯，知道我返咗鋪頭所以叫埋我，話一齊去去火鍋。八點半在我鋪頭會合，一齊行到黃金數碼廣場，連食店名稱都未知就上樓，入座經幾位侍應阿姐介紹，三個人都食粥底蒸氣火鍋， Matthew  話事選擇淮山粥底。先點叫咗日本魚生拼盤、有三文魚、北寄貝、八爪角、及鯖魚。另叫咗生蠔、龍蝦、帶子、扇貝、及鮮蝦。另任叫和牛粒、肥牛片、豬頸肉、蝦丸、鯪魚滑、蜆、馬拉糕、粟米、及勝瓜等等。海鮮每人都有限額，點完食完次後就唔可以任點。任點只有一般牛肉、豬肉、丸類、瓜類蔬菜及糕點，大家要注意 !海鮮拼盤有專人服務，會用計時器限定某類食物時間，服務不錯。但十點後可能有好多員工收工，所以之後服務就差一啲，漏咗一張餐選單幾樣食物。之後向經理反映，要重新填寫點菜單，但好快就上枱，可諒解 ! 現場環境乾凈企理唔錯，座位寬敞舒適，餐具都乾淨潔新，有預一個大碗放骨及海鮮殼等等 ! 洗手間都算大格數多，衛生亦都唔錯。飲品要另外計錢，所以我哋都冇額外叫其他飲品。最後每人食粥底一碗，味道一般。今餐韓國 John 請客埋單，一仟二百元內即每人頭計四百。我承諾下餐我請客，由我發辦去食小菜，十一點前離開各散回家。…Read More

今日去了屯門曾咀拜祭先人，之後搭西鐵返元朗，在朗屏站落車，再步到到俊賢坊。本來我想去幸運來餐廳，但二哥推介呢間唔錯就試下。入到去兩邊係四人卡位，中間都係四人普通位，但兩種枱都好細張，坐四個人都感覺好逼夾。最後都係坐四人卡位，但真係相當逼夾。坐低冇一杯清水或清茶，呢樣我幾著重就唔係咁滿意。我哋叫嘢食都相當之有禮貌，唔該前、唔該後，但叫落柯打女侍應比較冷漠，而且顯得有少少唔耐煩。最後其中兩位家人叫下午茶餐，一位食菠蘿油 + 凍奶茶。另一位叫餐蛋麵 + 凍朱古力，凍飲每杯另加 $3元，總共 $68元。我同大哥因未食午飯，怕下午茶餐粉麵飯唔夠飽，所以就叫一般午餐。大哥叫梅菜抬扣肉飯 $55元，我就叫土魷蒸肉餅飯 $55元，另各叫共兩杯凍奶茶，凍飲每杯另加 $3元，其實比元朗一般茶餐廳、凍飲要另加 $2元都貴。講真心，我同大哥都覺得碟飯唔錯，但唔係叫非常好食只係合格，不過如果大飯量可能唔夠飽。但午飯 $55元都算稍貴，凍飲仲要另加 $3元，又係比元朗大部份茶記貴，不太值得囉 ! 午餐有例湯跟送，我同大哥都係中式例湯，湯上枱已明顯見好多凝結油脂浮面，已知道碗湯溫度唔夠熱。先飲一啖約只有攝氏三十幾度，我自己成日煮食烹飪，亦時常用紅外線溫度計，去量度食物溫度，所以以我經驗都幾肯定溫度度數 ! 嘩 ... 咁暖好心唔好俾客飲啦，真係有冇搞錯呀! 我試咗小啖都唔開胃唔想飲，即時放棄真係離哂譜，絕對無下次 ! 另外杯凍奶茶冇影到相，第一啖可能未攪勻，凍粒浮面溶化成水溝淡關係，第一啖飲落好淡 ! 之後用飲筒攪動幾下之後，就覺得還不錯叫做合格，如果要我比分都有70分。元朗大多數茶記食店奶茶都係唔掂，有70分都叫唔錯了 ! 不過因為碗例湯關係，可以俾我自己選擇，我一定唔會再考慮幫襯了，除非朋友指定要去，咁就冇辦法遷就下人 ! 希望店家改善一下，如果例湯唔熱不如話已送哂冇例湯，否則真係唔好上枱做壞招牌 ! 要一讚就係枱邊抽櫃桶內，餐具尚算乾淨企理，最好就係竟然有、紙質不錯餐紙巾提供，如果每位人客唔洗出聲，都奉上一杯清水或清茶就好了! …Read More

夜晚差不多九點，深水埗買完電子產品，知道呢間食店，開咗一段長時間，但次次路經都未幫襯過，今日剛過完黑色暴雨、及 3 號風球，見堂食人少少就嘗試幫襯。叫咗全日餐 D 餐其中、「雲耳椰菜鮮豬肉餃上海麵+凍檸茶」，凈食麵 $36元，加凍飲另加 $6元，共 $42 元。先上一杯凍檸茶，一見到茶底唔濁好清澈，檸檬五片新鮮冇梅，真係同大家樂差唔多水準！坊間好多不論冷熱檸茶，好多都好混濁好苦澀，好多係用沖熱奶茶茶膽溝，根本唔識沖好難飲。難得呢間專做水餃食店，竟然可以沖出一杯，我覺得值 85 分以上水準，難得啊！雲耳椰菜鮮豬肉餃上海麵，一樣有驚喜，水餃內餡料豬肉新鮮，雲耳及椰菜都好味，椰菜咬落爽脆，上海麵唔會過淋口感唔錯，落上海麵果種豆瓣醬，好食！我見廚房內每出一碗，都用倒數計時器計時，淥嘅時間啱啱好，出品確有心！阿姐尚且有禮，期間見好多人買外賣，證明熟客都唔少。現場唯一希望改善，係希望加部電視，及俾杯清茶或清水，應該會增加到堂食客。下次都會再幫襯，試下其他餃子及小食。店內堂食環境門外餐牌直幅…Read More

清清哋水餃油麵加腩汁，凍奶茶 $36元。麵份量夠成年男人飽，水餃夠爽口，凍奶茶大杯夠味唔錯，純湯底比附近耍家嘢甜及清。自己中意食油麵，唔係間間都有油麵選擇。辣椒油幾惹味及香，混合豉油食一流。收銀四眼姐做咗好多年，好有禮貌值得一讚。兩樣加埋，仲平過勝利牛丸食一碗麵，仲可能一碗唔夠飽添！非繁忙時間好多位，唔使搭枱，間唔中都想起嚟食。😄…Read More

今日大年初四，我又未正式開市返工，諗下約邊個朋友食飯好，終於想起每年大年初一，都例牌請我去佢屋企食開年飯好友，佢每年整大量昂貴海味招呼我，真係請番佢食多幾餐，都報答唔到佢 ! 下午問佢要唔要返工，佢話唔須要，我就諗起長沙灣醉瓊樓，鹽焗雞係我覺得全港最好食，加上我朋友廚藝了得成日整雞，我就特登約佢晚上、19:30 大家直接去呢間食，但事前戴定頭盔先，講明堂食環境一般，千祈唔好介意 ! 到 19:30 前我朋友兩公婆先到達，幾分鐘後我由元朗，乘坐 68X 剛落車，我到達時鋪內都爆滿，但剛好有一張卡位客人埋單，朋友正等店員執清卡位，我就剛好準時 19:30 到達。先落單半隻鹽焗雞、其他由我老友發辦落單，計有雞油炒豆苗、豉汁蒸鱔、及梅菜扣肉。期間店員先送上一大窩例湯，係雞腳、豬肉及其他材料煲成，比平時下午套餐送嘅例湯濃郁、亦都偏鹹，所以大家都只係飲咗約一碗。期間我俾咗一封利是俾阿姐，大家開心之餘亦希望招呼好少少 ! 🔺 我本人係客家人，所以好中意食鹹雞或鹽焗雞，自己亦略懂廚藝，有自己用粗鹽炒熱，再用沙紙包裹雞殼，用熱燙粗鹽覆蓋雞殼焗熟，非常有鹽香味! 但香港所謂鹽焗雞，一般都係用鹽水浸熟而已，但呢間雖然我都知係用浸熟做法，但估計之前有做風乾程序，所以肉質鹹香得嚟、較乾身又不失幼滑 ! 可能我自己食嘢要求亦唔太挑剔，覺得暫時全香港食過叫最好食之一，所以時常都會特登前往幫襯，但一般都係叫碟頭飯食多! 🔺 梅菜扣肉我喺呢間都係第一次食，整體鹹甜適中，梅菜唔韌。扣肉有驚喜，因我唔太食肥膏，但上枱見係約9成瘦、約1成肥膏，新年放縱一次食肥少少無妨 ! 我朋友將剩餘所有連汁水，送咗兩碗白飯! 🔺 豉汁蒸鱔，豉汁又係剛剛好好惹味，鱔係白鱔，食落好新鮮好嫩滑，蒸嘅時間亦剛剛好，真係好正! 如果唔係有梅菜扣肉汁水，相信我都會用呢碟鱔嘅汁水送飯 ! 🔺 雞油豆苗，係我朋友落柯打，平時我叫只會蒜茸炒，因為我一向少食肥膩嘢，雞油呢類膽固醇高食物，我平時係盡量避免，但農曆新年一年一次大家開心，我都唔介意 ! 咁多樣餸之中呢樣稍為失色少少，因為豆苗較老，但因用雞油炒所以補充到油滑口感，成枱都係肉食冇一碟蔬菜，終於都係覺得爭咁樣嘢 ! …Read More

知道呢間麵店開業近一年，但我都冇試過幫襯，尋日特登去試一下，主要係元朗好多新麵店，出品質量都強差人意，而且價格昂貴不成正比，所以試下呢間!抱住呢個諗法入去坐低幫襯，點知單併價格竟然係$26非常便宜，而加一杯凍奶茶$8，水餃算大粒及有木耳味，但係新鮮度及味道未算最出色，食落感覺雪咗一段時間，應該並唔係每日新鮮包 !? 河粉都算幼滑，湯底有驚喜幾鮮甜，腩汁都好幾夠味 !值得一讚杯凍奶茶幾夠茶味、淡奶亦夠多及順滑，10分我俾7分。水餃我覺得元朗最好食係嘉麗園，但因太昂貴我食唔起，我已冇食超過十年 ! 文洪記前身潮城以前水餃好好食，但轉咗文洪記後細粒咗，餡料亦冇咗以前果種味道，所以我覺得潮龍園水餃，還是值得一食，但又未至於好好，只係我暫時除咗嘉麗園之外，未搵到一間較似樣而已 !計湯底好過文洪記好多，個碗望落好似好細，但河粉份量其實都多，有加蔥花及熟蒜湯面，好香口 !店面好多枱凳，店員服務都好殷勤，但唔會主動俾一杯熱茶或清水，同埋收碗收杯太急，呢樣俾人有些少壓迫感 !  觀乎現場所見，好多食客點飯餐，見海報介紹咖喱牛腩照片賣相好靚，價格大約五十幾元，下次會親自試下再俾食評!…Read More

由前身許記幫襯到現在，雖然係比較喜歡食前許記，但因為幫襯開個環境，及有一位阿姐延續至今都在工作，所以幫襯生、不如幫襯熟。我一向都係鐘意食三餸油麵 + 少許咖喱汁，及飲開凍奶茶。但因為一向覺得咖喱汁，就算落少少都感覺較鹹，所以最近改要腩汁，之後用辣椒油溝豉油沾麵及餸食，感覺竟然有驚喜，冇咖喱汁咁鹹，辣椒油比想像中香，辣味適中非常醒胃!今次食【豬紅 + 鯪魚滑 + 魚皮餃 + 油麵 (腩汁)】，豬紅爽口小鹹味很回味，鯪魚滑亦鮮味份量都不小，及魚皮餃很有口感，食落好味道。油麵唔鬆散，唔似有啲麵店嘅油麵斷續及散。本身覺得清湯底一般，但加咗腩汁吊起咗鮮味。重要第一次試自稱自家製辣椒油，感覺辣度比咖喱汁更少更適合我，而且香味濃郁，比咖喱汁只得鹹辣更吸引更回味 ! 下次一定會再配辣椒油，相信會更令我會增加幫襯次數。一直幫襯都飲開凍奶茶，但始終唔合我口味，茶底味道好怪唔似我一向飲開嘅味道，所以近幾次轉飲咗凍檸茶，亦都有驚喜! 檸茶夠清澈唔苦澀、加上檸檬夠新鮮，比凍奶茶更合我口味!呢個麵餐 HK$43元，以現在元朗麵店嚟講屬一般中上價格，比我平時自己去【輝記香港仔魚旦】，食魚旦河 + 凍奶茶 HK$41元貴 HK$3元，所以我平時自己多數食輝記，遷就屋企人口味就食耍家嘢。現場冷氣比以往有改善，主要商場雙玻璃門，其中一度門已因故障長期關閉，只剩下一邊玻璃門出入，而且經常保持關閉狀況，冷氣走漏情況改善不少。加上耍家嘢店內天花，加裝咗不少約12"寸天花吊扇，亦即淘 X 上熱賣果種。現在酷熱月份堂食冷氣感覺適中，但不能說係強勁，太強勁又會覺得太凍!包括兩名老闆及各位在職阿姐，態度都好親切，成日同客人有講有笑，呢樣亦係我保持長期幫襯原因。…Read More

近月經過發現新開兩餸飯店，再望望門口餐牌的價格更令人有驚喜，HK$32元兩餸飯跟：冷熱飲 或 例湯，如果額外飲例湯、或額外加一碗白飯均 HK$8元，冷熱飲品額外 HK$13元，仲有豆漿可選擇添 !上星期途經時由櫥窗外向內望，見各樣餸菜均企理，有肉有瓜菜，亦有各式炸物。而且最重要係茨汁唔重，望落唔油膩。今時今日香港地食個午飯，一般都要 HK4X 元起，就算元朗區食個兩餸飯加飲品或例湯，都已經超過 $4X元了! 何況 HK32元有凍飲???今日下午二點特登去深水埗，為左就係要嘗試一下，我叫左【冬瓜 + 梅菜肉餅飯 + 凍奶茶 HK32】，堂食非常多客及擠逼，我好難先搵到一個二人枱，有一個客人正在用餐中，我禮貌問一下冇人就坐低。以 HK32元呢個超值價，真係冇咩要求，但味道都真係唔錯，白飯亦足夠一個成年男士胃口。最驚喜係杯凍奶茶竟然比好多茶餐廳好飲，冰唔會太多、茶味足夠及奶都夠香滑，我個人會俾 70分。冬瓜份量算多及新鮮，滿意! 梅菜肉餅可能放太多生粉，好似一件硬身糕點堅韌，可能要用刀叉品嚐，但味道其實都可以的 ! 店內枱凳及地面都好乾淨企理，各員工都好有禮貌。發現近水吧櫃枱外有廁紙供客人使用，清茶亦有提供但要自斟。筷子及匙羮都非常乾淨，希望以後能保持到。今日例湯係南瓜湯，如果加 HK$5元我會考慮，但 HK$8 就要考慮了! 不過南瓜湯都係我至愛，下次都試下例湯先! …Read More

星期日去完街早左返元朗，本身自己一向習慣晚上9點先進餐，但今日大半日出左去市區，突感提早肚餓，所以特登想過嚟試下呢間，開業不到一年嘅粉麵店!約下午7點前到達門口，見好多自由行坐入面，大大細細水貨擺滿座位，基本上兩個人就坐左四個位，想搭枱坐埋去都難! 惟在企門口等左約十分鐘，等有關自由行埋單離開，我先再入去坐低。● 坐低約十分鐘，前食客留低食具在枱面完全無人理會，已催促一次及要求落單。之後我隔空離一段距離，大聲向阿姐落單及要求先執拾枱面，阿姐按收銀處電腦落單，並將單拎俾我後又行開，但都冇幫我執拾枱面。之後再等約十分鐘，隔離比我遲內進及落單男食客，碗麵已經出餐但阿姐都遲遲未拎俾佢，該男顧客等得唔耐煩，要求自己去出餐口拎碗麵，但阿姐又話唔好等佢拎，最後隔離枱望住自己碗麵，但就暫時冇得食，慘!另外有一樣嘢奇怪! 對面枱有個女士及年青人係認識，但個女士自己帶盒燒味(疑似燒鴨)，進入食店公然放在枱面進食，期間只叫左一碟油菜，兩人只各叫左一杯飲品! 堂食本身都唔夠人手招呼客人，又要好繁複咁走去收銀機落單，一個阿姐又要電腦落單、又要收銀、又要執枱、又要出餐捧餐、及又要顧及外賣，根本都做唔切! 而且感覺阿姐都係唔多熟手，星期日繁忙日子，點解堂食得一個人手???● 呢位女士帶同外來燒味進內進食，阻礙其他食客進餐空間。 稍後，阿姐行埋我枱，問我有冇落單? 我都唔想答佢默言不語! 之後到我碗麵出餐，阿姐竟落錯枱號，拎錯左去隔離枱，但隔離枱又話冇叫過! 之後佢知道係我叫，就夾硬用我碗麵、推開擺滿我枱前之前食客碗碟，當堂嚇我一跳，我即刻起身話唔食啦就走! 用我碗麵去推開前食客碗碟，非常唔衛生，令我非常接受唔到，完全食唔落! 之前系社交網絡飲食群組，見到好多元朗街坊，稱讚到呢間新麵店好食到不得了! 所以我已經想去試好耐，今次放假去完街早返元朗，特登去試一下，點知連食都冇機會，以後亦都唔會有機會了! …Read More

今日聖誕節正日，因有工作要到香港工業中心，所以下午約二時多些到附近午飯，環顧四周大部份食店都因假期休息，只看到【奇華小廚】有營業。先在門外看到一塊大型直立式餐牌，寫了【單併燒味飯 $30元 / 凍飲另加 $8】，咁就入去坐低，期間兩個名姐女侍應，都呆企毫無任何招呼舉動，我揮手叫其中一位阿姐，【單併叉燒飯 + 凍奶茶】，阿姐落單後寫低一張單，但只係潦草字冇任何價錢! 期間清水或清茶都冇杯，呢樣我真係唔太接受!約 5 分鐘後一碟單併叉燒飯、及一杯凍奶茶擺到枱，先講叉燒非常一般，主要唔太入味，而且覺得肉有點鞋。另凍奶茶冰多茶淡非常一般! 之後雜去到收銀處埋單，要 $52元當堂嚇我一跳，呢個價我寧願去【太興】食，起碼叉燒好食，及奶茶好飲先! 同埋工廠區咁貴價錢，招呼又差清水都冇杯，真係劏到我一頸血! 呢個價我去其他食店，已經食到好豐富午餐，同埋有例湯凍奶茶好飲過佢先! 永不幫襯!!!…Read More

約差不多十年前屯門新墟成日幫襯，之後搬咗屯門近青菱徑(紅橋酒樓附近)，近年竟又搬近我居住元朗區，正！😊 本身我食開一間午餐會好專一，現在市區上班，同一間店都食咗五年到依家。十年前屯門新墟附近工作，差不多每日都去幫襯，當時都幫襯咗約三年。 事頭婆外表凶悍、實則非常講得笑，事無大小，包括佢屋企嘢，都拎嚟分享講笑！新年去仲封利是俾我添，好親切！ 😘 講返佢食物質素，味道微辣好開胃，尤其我中意有菜有肉，「回味館」就算午餐及散叫，大部份都有伴菜，個人覺得較健康，又醒胃，而且份量又夠飽，有湯有飲品，午餐凍飲價格 $42 又實惠，大家值得一試。 又講返元朗呢間，睇「食在元朗」，已發覺有間「回味館」新開，但個人唔敢肯定，究竟係咪自己認識果間呢？但睇返會員post嘅食物照片，食物風格令我更肯定！終於上年去搵下試下，最初都唔清楚實際座標，都喺附近兜咗一輪，最後先搵到。 自己及同朋友去食好多次，大前提目的都係想重遇事頭婆，期望大家吹下水回味下。但每次都只見事頭婆，喺水吧內沖茶水，而且每次都係繁忙時間，所以好多次都不便行近水吧打擾佢！ 加上認識了差不多十年、識飲識食資深女網友，原來都係成日幫襯，感謝佢最近成日報料我知，最近事頭婆常由洞穴(水吧)走出舖面，就好似凶悍哥斯拉咁出現，所以尋日去一趟再碰運氣。終於得償所願，而且解開咗舖面個女仔侍應，究竟係咪佢細媳婦之迷，答案…不是！ 😂 昨日食醬爆炒牛肉，又係一貫脆肉瓜伴炒，好健康好爽口，辣辣口味令我原來胃口麻麻，尋日都清哂! 碗例湯正到不得之了! 皆因我好中意食苦瓜，煲湯都非常中意，鹹酸菜黃豆豬骨苦爪湯，真係我至愛之一! 奈何我自己屋企人無一個喜歡苦瓜，否則我都會時間煲! 茶水方面 ok 啦，希望事頭婆知我咁講，唔好詐型，哈哈! 😂食物 keep 住十年前水準，相信以後一有時間或休息，都會晏晝或晚上九點前去捧場。  仲有好多，值得「回味」嘅話題及問題，希望下次及將來，同事頭婆、及佢細囝再吹水一番。 😂…Read More