估股吓's Profile

假期開始了，同兩個女出去旺角，行到雅蘭附近個女話肚餓，search下見到有間幾潮嘅餐廳，好適合年青人就入吃去。買嘢食係以自助形式，廚房係開放式一目了然，座位亦係隨意選擇，樓底極高，有成三層，非常舒適而且空間感好大。今日叫咗佩佩豬意粉，鮭魚女王意粉，飲品就係鮮奶朱古力，桔梗奶昔。佩佩豬意粉即係肉醬意粉，蕃茄鮮味芳香，好重肉碎味，鍾意食肉醬意粉嘅一定鍾意佢嘅蕃茄醬夠rich，鮭魚女王意粉係煙燻三文魚配白汁，煙燻三文魚肉質唔會散開，意粉軟硬度亦非常適中。兩杯飲品都唔錯，鮮奶朱古力鮮奶味較重，而桔梗奶昔就係香蕉加雲呢拿大出嚟嘅奶昔，質感好厚身。…Read More

日日都落雨，今日終於好天氣， 接完老婆收工四處遊車河， 一路向北， 上咗3號幹線， 見到路牌就去咗深井， 唔使諗一定係食燒鵝。 呢度都有幾間嘅燒鵝店 ， 我見陳記好似喺九龍區都有一啲分店， 就試下呢間啦。呢度有戶外嘅座位, 亦有冷氣嘅室內鋪，先是一個燒鵝例牌， 原來都有分庄同下庄， 下庄價錢貴少少,就代表係脾位， 我哋叫咗下莊， 例牌都好大碟,而且熱辣辣仲有個燒鵝汁香噴噴, 咬落去皮脆肉滑。 我最鍾意呢度嘅職員同師傅, 個個都係上咗年紀， 好有細個上酒樓嘅童年回憶。 呢個小窗睇到廚房火光熊熊 ，師傅喺入面功架十足咁樣煮嘢， 鑊氣十足 ，好有feel。 你睇下我個黃金蝦， 隻隻都爽口彈牙， 每一隻蝦沾滿曬鹹蛋黃。叫咗一人一隻蒸扇貝， 扇貝肉好新鮮而且超多蒜蓉同粉絲， 呢啲先係主菜。最後嚟多一個啫啫通菜煲， 一個煲仔上非常燙口， 加咗少少辣椒同蝦干非常惹味。呢度啲小菜種類非常多， 而且價廉物美， 下次要call齊人，試多幾款餸菜。…Read More

又大一歲， 太太同我二人世界， 先重拾 拍拖嘅感覺， 行下海港城 ， 之後帶咗我去對面廣東道嘅商業大廈食法國餐。全層都係呢間法國餐廳，面積唔算大， 每張枱都配備乾花同蠟燭， 播住輕音樂，環境舒適。menu有兩款，8/9道菜, 配酒就貴啲， 但我哋呢啲架車人士，當然好守規則，淨係食野唔飲。頭盤先呢一杯好清嘅青蘋果泡蜜瓜凍湯，配上鹹香嘅脆火腿片， 食完火腿再聽清清味蕾， 廚師好細心。跟住送上一盤四款口味嘅麵包拼盤， 麵包有香草味、朱古力味、 麵包條同牛油味， 全部都鬆軟無比， 好味過貴價麵包舖啲麵包接住上一個用柚子凍做嘅冷盤， 嘩，呢份嘢未食已經好吸睛， 用一個裝住乾冰嘅碗送上， 試咗之後發覺入面有爽脆嘅 露筍， 蘿蔔同海藻， 菜式設計新穎。跟住食咗一個帶子， 上面用咗接骨木花味嘅汁， 同埋用紅藜麥魚籽做嘅配菜， 非常特別。呢度嘅服務認真好， 每一道菜上嘅時候店員都會介紹材料， 小弟都係第一次咁樣飲湯， 將火腿餃子放喺個碗入面， 在利用瓦茶壺加入味道濃沃嘅龍蝦湯。外脆內軟嘅鵝肝， 加入韭菜花為圈嘅溫泉鵪鶉蛋， 視覺及味覺都讚不絕口。跟住係一個黑色球狀嘅黑松露加水牛芝士意大利飯嘅波波， 切開後就見到拉斯加效果，口感個引。食咗幾度濃味嘅菜式， 再上一個芭樂雪芭， 配新鮮嘅紅石榴， 清清味蕾再食主菜。主菜方面我揀選咗牛面頰， 肉質非常之琳， 配上一個青色酸酸地有芥末味嘅汁， 去除油膩嘅感覺。甜品方面， 除咗有杏仁同橙味嘅小蛋糕外，仲加上一盤五粒朱古力， 全部菜式我都非常滿意, 為慶祝生日畫上一個句號。…Read More

兩個女對食嘢都麻麻地， 只要佢哋鍾意食嘅嘢我哋都會去食， 佢哋最鍾意就係食壽司， 漢堡包嗰啲， 對中餐叫餸食飯就冇乜興趣， 最近發現佢哋好鍾意食小籠包， 連去酒樓都要叫， 今晚心癮起 ，我哋就上網睇下邊度有小籠包好食， 原來喺isquare都有一間金牌小龍， 即管去試下。呢度除咗小籠包之外，都有好多小食， 今次是有個鹵大腸， 估唔到佢上枱嘅時候熱辣辣, 而且炆到好淋好入味。主角金牌小籠包， 一客有五隻， 一咬落去湯汁滿瀉，正。芥蘭炒牛肉， 好多牛肉， 但係芥蘭相對少, 味道唔錯。台式擔擔撈麵， 分量好多，個麵多到夠兩個人食， 麻醬多味道偏辣, 最特別係佢有冬菇片。本來仲想試下佢兩個甜品， 但係九點幾已經冇曬。駕車人士就要注意， 假日呢個停車場收費要60蚊，真係好唔抵， 我自己就泊去海運行過嚟。…Read More

我哋一家人都好鍾意陽光與海灘， 每次去親去旅行都一定會係去泰國， 今日講起泰國之旅，大家就好想食下泰菜回味下。食泰菜首選一定係九龍城， 揸車經過呢間orange elephant， 大大幅banner介紹一蚊菜式， 今日星期四喺一蚊飛天通菜， 就係呢一個宣傳技倆我就入咗去食嘢。先呢一個炸蝦餅， 即叫即炸，鮮蝦味十足而且好彈牙， 一碟有六件， 醬汁唔係普通嘅泰式醬汁， 酸酸甜甜咁，酸味較甜味多， 好好味。 如果星期五嚟，呢個都係一蚊菜。呢個飛天通菜一蚊雞咋， 辣椒都好多下， 但辣得好過癮， 越辣越好味。鍾意濃味嘢嘅我,叫咗一個海鮮咖哩農夫包, 欣賞比較剪我哋剪開個包， 個包好鬆軟好脆， 加上熱辣辣嘅醬汁， 呢個配搭一絕， 海鮮方面，裏面有魷魚，蝦，魚同青口， 整體不過不失。…Read More

今日去觀塘練波, 火辣辣真係好辛苦， 完成之後當然要食好西，试下去新商埸，the wave, 貪佢冷氣充足。1樓有間泰國嘢同M記，2樓全層就有間西餐廳， 太座話啱啱去完泰國不如食西餐啦， 於是我哋就上去望下。呢間叫登堂嘅餐廳， 非常之大， 一眼望埋去有各適其適嘅枱同大房， 佢嘅嘢食有扒，有pizza，意粉，飯…… 先嚟過頭盤無花果煎鵝肝， 新鮮嘅無花果酸酸甜甜，配上外脆內軟嘅鵝肝， 咬落去一陣鹅油， 邪惡首選。呢個焗羊扒即叫即做，羊肉嫩滑， 食落去軟淋淋，唔會好嚡， 等20分鐘好值得。北海道帶子飯，帶子大大粒珍寶size， 意大利飯一粒粒好爽口, 配上蛋黃，玉子豆腐同絲瓜， 食落去好creamy。另外，用咗38蚊無限添飲巨峰梳打，我諗好少餐廳而家會做refill， 啱曬極度口乾嘅我。 太太就叫左一杯好優雅嘅Ice Cube 飲落去甜甜地，有花香味，因為每粒冰入面都係有鮮花。整體嘅服務都唔錯， 員工做事都好爽手又有禮貌。…Read More

兩個女考完試好似有放監嘅感覺，當然要出去食餐飯輕鬆吓，今次留意到呢間餐廳好啱兩個女，全間餐廳大部份裝修都以粉紅色為主，感覺有啲浪漫、時尚。店內全部侍應都係後生仔女，充滿咗年青氣息，服務好爽快。至於食物方面，今日叫咗黑松露薯條，薯條好重黑松露味，黑松露雜菌春雞燴意大利飯，好有黑松露味，雞肉好嫩滑 ，燒得啱啱好，意大利飯底加入黑松露再配芝士，味道堪稱一絕，煎三文魚扒意大利粉，意大利粉用蕃茄做底汁好開胃，三文魚扒煎到好香口，厚焗鬆餅士多啤梨乳酪配士多啤梨雪糕，鬆餅厚而不硬，再配上士多啤梨雪糕，簡直係味蕾嘅一大樂事，西瓜沙冰夠晒大杯，香濃西瓜味，不太甜唔錯。價錢亦都合理，整體嚟講非常滿意嘅一餐晚飯。店內裝修特色心心牆粉紅色主題黑松露薯條煎三文魚扒意大利粉黑松露雜菌春雞燴意大利飯厚焗鬆餅…Read More

今日去開金馬倫道嗰間琴行幫個女買琴書， 打開openrice睇下附近有咩好食， 見到呢間南瀛水產預先訂座有7折， 加上食評都唔錯就即管試下。先嚟過東瀛五點盛， 有油甘魚、吞拿魚、甜蝦、帶子同三文魚。 油甘魚都好大塊,入口即溶， 油香滿溢 。甜蝦就好大隻同鲜味，好新鲜， 帶子都好大粒同厚肉， 食落去仲有少少海水味。再嚟一個好矜貴嘅南瀛卷， 賣相超級靚， 呢個軟殼蟹壽司卷上面鋪咗一隻蝦， 一板海膽， 加刺身配上超級多嘅三文魚籽， 美觀得嚟又有啲飽肚， 而且樣樣都好鮮味， 心水推介。熱食方面揀咗吉列炸蠔同芝士流心玉子燒， 芝士炸蠔粉漿都唔太厚，合格， 芝士流心玉子燒，特別之處旁邊配上已醃製豉油蘿蔔， 口感特別。一個太座最鍾意嘅甲羅燒， 太太鍾意佢加咗鵪鶉蛋， 兼有專人幫你燒， 燒緊嘅時候已經聞到香噴噴， 分量都好充足，我食咗一啖就畀太太食埋我幾隻。太太見呢度服務咁好，即刻追加咗兩隻活鮑魚，鮑魚嘅肉爽口厚實， 唔需要加调昧料都食出佢嘅鮮味。…Read More

今日約咗人喺九龍灣交收， 順便問下喺附近做嘢嘅老友一齊飯聚， 行下行下見到呢間粥底海鮮火鍋， 兩條友咪走去試下囉。嘢都未叫阿姐就放低一支竹蔗茅根， 之後送咗一碟手拍青瓜同凍嘅雞腳， 仲要送多一碟焗嘅蒜蓉青口。 我真係冇諗到有咁多前菜， 之後仲要送上一盅燉湯， 十分足料係雞腳燉花膠，正。我叫咗一個龍蝦餐，裏面已經有不同嘅海鮮， 蟶子， 鮑魚 ，蚌貴妃 ，蚌蜆， 海蝦， 魚， 重送咗一碟肥牛同埋可以揀八款 火鍋料， 分量相當之多。海鮮盤嘅海鮮樣樣都好高質， 真係冇得彈，樣樣都係好新鮮彈牙， 只要係新鮮嘅唔駛特別多調味已經好好食。 呢個餐我反而想介紹呢嚿魚， 叫做多寶魚， 喺街市都好難買到， 佢係扁身好似一隻碟咁嘅， 食落去相當嫩滑 而且冇乜骨。手打丸我就推介墨魚丸， 隱約食到細細粒嘅墨魚，非常彈牙。食到尾個粥底會加入返南瓜，芋頭，同埋蔥 菜譜，有曬海鮮嘅精華， 十分正。…Read More

今日帶住兩個女去觀塘行街， 成日都係食商場裏面嘅嘢， 唔係日本嘢就係麥記， search下原來工業區好多美食， 今次見到呢間推廣自助餐， 而且都經濟實惠即管試下啦。喺apm隔離， 落咗電梯好快就已經到啦， 餐廳好文青feel, 掛滿壁畫， 入到嚟都感覺輕鬆， 場內播放年青人喜歡嘅歌曲， Alan Walker， Bruno Mars， 兩個女嚟到已經十分鐘意， 加上坐低後店員攞住抽獎箱,叫佢哋抽小禮物， 未食已經覺得好開心。講返食物,整體食物分咗三個區域, 沙律區， 有雜果沙律，藜麥蟹子菜沙律， 泰式木瓜沙律， 新鮮水果， 同埋啲凍肉冷盤， 整體質素都唔錯。 我想介紹返個周打魚湯， 少少酸非常開胃。另一個區域係熱盤， 全部都係肉同澱粉質， 佢嘅肉有燒排骨，豬手， 牛脷， 牛仔骨， 燒雞翼，魚餅，春捲， 仲有菠蘿炒飯同意粉， 各適其適任君選擇， 整體都不過不失。最後一個甜品同飲品區， 佢有三款冰茶類畀你揀,另外仲有熱嘅花茶， 甜品嘅選擇亦都十分之多， 除咗有臺式嘅芋圓， 芝士餅外仲有泰式甜品， 試咗個椰青糕都覺得好清新， 小朋友就最鍾意個棉花糖機。 呢餐未食完已經話下次想再嚟。…Read More

路經灣仔見到呢間吧 充滿時代咁嘅特色牆, 再望下個menu，啲嘢又唔係話過份貴， 一於同同事happy hour先。入到去呢間酒吧餐廳， 音響聲十足， 有一部大及一部細電視，如果睇波就一流， 再望下餐廳嘅角落有一啲樂器， 原來呢度逢星期三、五、六 有live band表演， 可惜今日星期二……miss咗。龍蝦湯，我真係好想飲， 呢個龍蝦湯帶少少洒味加 小小苦澀味, 味道濃沃，特別。 呢個香煎鵝肝我就十分推介， 鵝肝外脆內軟， 煎到金黃色，味道剛剛好， 加上d配菜都非常出色，焦糖蘋果帶甜， 味道好突出， 加上新鮮無花果同配上黑醋嘅沙律， 味蕾有多重嘅享受。黃色嘅mango tannin 係芒果蓉加西米嘅烏龍茶, 好清新。 白色嗰杯叫noble lady， 好似椰汁加紅豆啫喱， 啲啫喱都非常有口感， 有啲似蒟蒻加珍珠， 如果你鍾意飲台式飲品，呢杯一定啱你。主菜係烤德國咸豬手， 分量相當之多， 豬手烤到皮脆肉滑 ， 豬肉同筋都好嫩滑鬆軟，唔會柴皮。最正係店員會幫你切埋，加上脆卜卜熱辣辣嘅厚切薯條，如果唔係揸車應該配上生啤就非常之正。…Read More

今日經過元朗見到呢間外牆咁色彩繽紛嘅餐廳就行入去試吓，入到去裝修都幾特別，座位寬闊，兩個人坐卡位正！一入到店子便聞到四川麻辣味，口水都流埋。烤羊肉串上枱時烤熱騰騰，面頭更有少許焦脆，羊肉味香濃但不會過羶，串燒也充滿孜然味。羊肉串當中更有些肥肉，令串燒更香口。我們叫咗一條毛血旺麻辣味江團魚，見到推介話無咩骨，魚肉鮮味又嫩滑，都唔錯。上枱的時候烤魚基本已熟，只需待鍋滾起便可，由於叫咗小麻小辣，所以食起來十分惹味，配料份量多又好好味，完全符合晒我嘅要求，兩個人食到飽晒！韭菜燒出來很爽滑水嫩，孜然味好香，平均分配到每塊韭菜，帶出濃郁芳香。燒雞翼非常惹味，燒得洽到好處，外脆內juicy，絕對不馬虎，令人意猶未盡。串燒海蝦新鮮又彈牙，以孜然粉等調味料燒出來，味道可口又惹味，滋味無窮。芒果沙冰香甜冰凍，很適合解辣，非常好飲！ 百香果水果茶味道酸酸甜甜，茶內有新鮮果肉，分量十足！解辣一流！整體無論食物賣相及味道、員工服務各方面都一流，值得推介。…Read More

今日係新蒲崗做完野，係街上搵野食，又熱又餓，行過呢間，見佢新開，就入去試下。湯並唔係普通嘅紅湯白湯，而係好足料嘅忌廉蘑菇湯，有一粒粒細細地嘅蘑菇，同埋好滑好creamy，我平時好怕食完個嘴會有太重嘅蘑菇味，但呢度嘅湯雖然多蘑菇，但蘑菇味反而唔會太重！嗌咗蘑菇煙肉忌廉意粉，送上黎嘅時候仲冒緊煙，portion適中，很多時候係一啲食肆嗌嘅意粉份量並不夠飽，但呢個啱啱好，卡邦尼味同煙肉味都好重，好cheesy，但一啲都唔漏，蘑菇味反而不太重，balance得好好，最重要嘅係意粉好彈牙，而價錢只係$62，性價比極高！藜麥煙三文魚沙律都好足三文魚，我平時唔係好鍾意食生三文魚，但呢個煙三文魚嘅味道反而好啱我食，同埋好新鮮。沙律嘅汁係檸檬汁+果醋，食落反而唔係話太酸，而且啲沙律菜望落好新鮮，一啲都冇黃，又有青瓜同藜麥，咬落好爽口，仲好健康，又可以keep fit.薄荷朱古力整得好有心機，送上黎嘅時候仲見到啲泡消緊，飲落好creamy，朱古力味好出，我不嬲都驚太甜嘅嘢飲，但呢個反而一啲都唔膩，飲落好fresh蜜桃冰茶好啱唔鍾意飲甜嘢嘅人，亦係熱辣辣天氣下嘅消暑佳品！佢嘅茶味好出，加埋淡淡嘅桃味真係好解渴消暑。…Read More

呢排冇波睇， 成班麻甩佬好悶， 老友就吹雞出去食雞煲啤啤佢， 我呢啲住家男邊度食咁多窿路呀， 今次去帶咗我去旺角， 地點就腳 ，重要雞煲任食， 我心諗通常任食嗰啲都出事㗎喎， 但老友極力推介下唯有一試。地點真係好方便，出咗油麻地地鐵站行五分鐘就到，呢度係半自助雞煲， 雞煲任叫任食， 分咗兩款味道， 辣嗰款叫 惡魔雞煲， 聽到隔離枱都叫辣，就知道係好辣， 所以我哋只敢叫小辣， 果然真係辣到噴火。 雞肉都好嫩滑， 性價比高， 加咗湯底後諗住打邊爐， 隨即送上海鮮拼盤， 有鮑魚有蝦有貝殼類， 配料新鮮相當高質。 仲有嗰碟牛頸脊， 肉質鮮甜， 油脂分佈適中，不錯。其他任叫嘅配料都超過60款， 而且嘢飲任飲，我覺得相當超值。當中我極力想推薦呢一款飲品， 好似涼粉咁， 當食完辣野，飲返啲凍嘢真係透心涼。…Read More

老友生咗個蘇蝦剛剛滿月， 做長輩嘅點都要入嚟探下bb食下薑， 老友住嘅元朗爾巒， 我都係第一次嚟， 低密度住宅 ，環境優美非常優雅， 估唔到呢個小社區 ，對面仲有一個美食城。老友話難得我咁遠入嚟探佢地， 點都要食番餐豪豪地多謝我份厚禮。 朋友非常闊綽帶我食鐵板燒， 呢度門口可以泊車 ，雖然舖頭細細， 但可以近距離同廚師吹下水， 真係食得好招積。老友揀咗個特上活龍蝦鐵板燒， 見到都覺得好正。頭盤嘅呢個帆立貝， 係由北海道新鮮運到， 冇擺過入冰格冷藏， 所以非常新鮮， 師傅加咗三文魚子同新鮮嘅紫菜一齊煮， 十分鮮甜。簡簡單單嘅銀鱈魚，可以煎到個皮咁脆， 師傅嘅手製真係一流， 我夠膽講我未食過咁脆嘅魚皮。呢一隻日本響螺非常之鮮甜， 師傅特別提醒我唔洗加任何嘅醬料， 先試到佢嘅原汁原味。呢一個龍蝦係加左龍蝦膏同海膽一齊炒， 全部都係師傅自己嘅細心調配， 食落去真係有唔同嘅層次，用文字筆墨好難形容。呢一塊只係用砂糖牛油整嘅多士， 但係真係好好好好味， 只能夠講你用心去做一件事， 最簡單嘅食材都食出你嘅心思。A5 和牛厚切，我要求5成熟， 廚師嘅功力非常深厚， 完全符合到我嘅要求， 食落去牛味香濃， 亦都唔覺得肥膩。跟住上埋個炒飯同埋菜， 就等湯同甜品。 當你成晚食到好滿足，食到後面已經冇乜要求嘅時候， 廚師為你捧上一碗熱辣辣魚味濃沃嘅鯛魚湯， 真係好窩心。多謝老友帶我品嚐一餐咁美味嘅鐵板燒， 下次可以帶埋老婆嚟慶祝特別日子。…Read More