I_AM_MI's Profile

沙田石門至從有京瑞克廣場，漸漸熱鬧起來，京瑞廣場一、二期開咗大量新小店及餐廳，繼之前親子茶樓，今日去試 點饌Dim Sum Deluxe，可愛點心小店，超級吸引。我哋一早11點正凖時等佢開門攞位，店舖其實唔大，枱都只可以放大概10張，而我哋一行10人三個家庭，已經佔咗整間小店一半，好彩一早到，因見佢哋電話不停響要訂位亦有人等位，相信想試新嘢大有人在。服務態度唔錯，門面有兩個人，廚房亦都有兩個，點菜落單程序簡單快捷，上菜時間亦都非常神速，整體感覺好順暢，一直亦有人加水及清理枱面食完碗碟。食物方面就非常有驚喜，點心外形有趣，同圖片一模一樣，份量亦唔細件，一向唔好食嘅哥哥見到得意點心都食不停，超興奮，原來可愛食物賣相真係會增加食慾。我哋每樣叫少少試下，價錢相對地比一般茶樓貴亦算合理，不過點心唔係款款咁有睇頭，好似小朋友最愛叉燒包、馬拉糕、燒賣就係一般普通造型，不過價錢亦無特別平，感覺就有d唔抵食。我哋亦有叫飯，不過其實唔需要，小朋友食點心都飽，飯份量亦唔少，不過飯同點心同價，咁食飯又會飽肚d，不過就無乜特別新奇，一般蒸飯類。…Read More

想推薦一下琴日去嘅餐廳，真係非常有heart，除咗個名『有情有意』配合今次聚會之外，亦係一間聾健共融嘅餐廳，服務我哋嘅係聾人或弱聽人士，真心覺得佢哋服務非常到位，溝通絕對可以應付自如。依d真係社區好需要嘅愛心小店，比多d機會有需要嘅人，食物水準超出水凖，出色意大利餐，而且份量充足，小食亦相當出眾，食物相我就無影，一向好少相機食先，想知味道如何就去撐下佢哋呀！而餐紙上亦有教一d簡單手語，比客人點餐溝通用，仲有可以舉起小牌示意需要，而我哋人多，用手機打上我哋需要dinner set嘅英文代號，比佢睇就落到單，無出錯而食物亦好快到。而切完蛋糕，佢哋仲好有心邀請我哋去餐廳另一面影相，有好靚佈置，如果係員工創作黑版，粉筆畫咗2018 Happy New Year字句，影相出嚟效果好靚，員工亦非常有心機介紹餐廳牆上特式，原來十個仲可以包房，有自己私人空間，一個開生日好地方！地點方便近紅磡站，位於置富都會內，有BB椅，食物亦適合小朋友，真心推薦。…Read More

哥哥朋友仔生日，去咗荔枝角一親子餐廳慶祝，剛剛開業時去過，已經是年半前嘅事，印象中食物好有驚喜，而小朋友有個舒服環境玩，大人可以好好享受用餐，唔記得當時有無介紹過，不過各下大報章雜誌亦有，相信大家唔會陌生。重踏舊地，我哋小朋友大咗好多，一入去已經急不及待入遊戲室玩，入去前工作人員有量體溫，亦有要求消毒雙手，小朋友玩亦好留意佢哋安全，大人的確可以放心食。而食物方面，係無調味食材自己用平版燒，可以自己去加調味料，任自己喜好去煮，食材一份份準備好，有海鮮、肉類及蔬菜等，可能上次去過，今次跟上次一樣，少了點驚喜，但一樣是味美。3歲以上有兒童餐，十分豐富，食材跟大人餐差不多，而且非常大份，一定填飽肚，用餐前會教做壽司卷，幾有趣，小朋友都好享受製造過程，用壽司卷食飯總比一匙匙快，好主意。服務方面都十分貼心，各方面亦安排妥善，亦用心講解，用餐時出現了些小插曲，亦一一恊助解決，感覺是以客為上，用心經營。環境就比印象中細咗，今次已經唔係全院滿座，但走動時亦要避免阻擋其他人，而且坐長枱，走動有d唔方便，好彩兒童室有cctv，可以由螢光幕見到小朋友，都好放心。…Read More

一行十幾人，有大有細去食串燒，真係唔理環境，只求好味，真係無令人先望，首先服務態度非常好，見我哋成班小朋友，個個咁細個，又嘈又麻煩，完全無黑面，仲好好招呼，真係食得好開心。因為要照顧小朋友，無時間比相機食先，相唔多，但絕對係好食，製作認真，味道好野味，燒得正正外脆內軟，好有心機，我自己最愛個蝦餅同扎肉，鷄翼同個肥牛金菇都好好食，鷄軟骨大大碟好抵食。叫咗好多嘢食，有2個炒飯加一個炒公仔麵，仲打埋包做宵夜都係每人百五，真係超抵食，仲有個炸燒賣都要encore！…Read More

上網見到介紹hungry table四人餐，$1288四個人唔過份，而且睇相好靚，於是兩個家庭由沙田走去銅鑼灣食，因為有四個小朋友，先叫咗個龍蝦包，依個好好味，真係要讚，仲有龍蝦通粉同飯，同一個味道，都係好香濃。到主菜出場，十分之期待，一盤海鮮倒上枱，加沙律再加沙律醋，完全同我想像中放得整整齊齊兩回事，都無所謂，原來煮法係海鮮大雜燴，全部海鮮一齊煮，食入口全部海鮮一個味道，有d浪費同可惜。配菜就有粟米、西蘭花、薯仔、車厘茄，薯仔太硬，西蘭花太淋，全部通通一個味道，依烚雜菜，一d都唔吸引，而且好多蒜蓉，有d蓋過所有食材味道。食完唔覺得有幾wow，只係成口蒜蓉，散叫其他食物可能會更好食。Hungry Lobster實在有點兒令人失望。埋單二千，真係可以食更好。上網見到依個：最終食依個，有點兒貨不對版。要搵先知有乜食唯一好好食：…Read More

睇到fb有page大贊，特登走去試，可能有期望，所以失望。餐廳主要當然係食物質素，所以唔理服務、環境、價錢等等，齋講食物，係有少少失望嘅。食咗鵪鶉蛋、一口牛、雞翼、羊架、茄子、元貝、雞泡魚、啤酒一支。最好應該係嗰支啤酒，夠凍。全部加埋$366，2個人，真心可以食更好。茄子可以用難食去形容，蒜蓉生到「那」喉，完全無調未，又乾，真係將我最愛燒物糟蹋。羊架不過不失，調味適中，五成熟剛剛好，要讚！又一失敗之作，乾到無朋友，煮得大熟所以好浪費，無鮮味，蒜蓉又係生生地，可惜！鷄軟骨唔夠脆，直頭唔脆呀！唔脆即係食脂肪，好難頂！雞翼ok，唔難食。雞泡魚乾送酒恩物，可借唔夠脆，可以再剪幼d， 易咬d。一口牛，好食，多汁，夠味！其實咁嘅一餐平時一定會比負評，不過見廚房係一班後生仔充滿理想，唔想打沉你哋。不過都要中肯，係唔好食，有大大大量改善空間。食物材料有、位置有、客人有⋯⋯唯一食物欠奉，咁係咪要出力d先。既然花咗咁多時間煮，再留意多一d少細節，蒜蓉真係唔可以生上，太影響味覺。加油，有機會未必再去直至一日再見到有人讚，一定會再試！繼續努力！PS 唔好用紙碟上，好唔環保，食一餐串燒用n咁多隻紙碟，真係好浪費！…Read More

行完花墟就去食個lunch，新世紀廣場4樓有spaghetti 360，外表同一般餐廳冇咩分別，但內裏乾坤，𥚃面有個兒童遊戲區，一個小corner放咗幾個廚房，雖然唔多玩具種類，已經好夠玩。服務亦相當好，照顧非常周到，有BB椅又有BB餐具，服務員好貼心，提示我BB椅同枱高度易夾到手，亦主動幫我影相留念，感覺好welcome，真係加哂分。食物亦好好，我11點度到，唔多人所以食物好快到，有意粉、飯仲有兒童午餐，又唔貴，妹妹自己食咗一大碗就知好食，可以同小朋友安安靜靜食個晏，仲有地方比佢哋玩，媽媽們聚腳首選！遊戲區附近嘅枱唔多，訂枱記住揀近遊戲區，而餐廳裏面無洗手間，亦無消毒洗手液，所以要自備。…Read More

星期二晚上搵嘢食，見食評幾好，同2個3歲以下小朋友快閃晚飯，一坐低我同伙記講要楊州炒飯，因為小朋友勁肚餓，打算叫個炒飯之後再睇食乜小菜。點菜要乜無乜，牛仔粒又無、牛仔骨又無、炒蜆又無、避風塘咸豬手又無⋯⋯最後勉強叫個石班魚塊加椒鹽豬扒，真係唔明7點未夠，乜都無，客人去食風？之後椒鹽豬扒到，個炒飯都未出現，問佢哋就話無落單，仲賴我地無落，我一坐低同個伙記講，佢好清楚話好，之後仲要我對質，個伙記知自己無落，一句對唔住都無，食咗餐十級勞氣嘅晚餐。食物非常一般，完全比之前食評誤導咗，一定無下次。…Read More

今晚第二次去，上次剛剛開，食咗個午餐，已經好意外，水準可以咁高，可惜午餐無pizza，所以今次刻意嚟試晚餐。其實河畔咁街坊地點，有間真係可以叫高級意大利餐廳，真係街坊有囗福，又唔貴服務又好，地點算方便，環境直頭正，乾淨闊落，起碼唔會太嘈太迫。食物水準當然係最重要，好食先有人去，上次可能新開，少人d，今晚已經full house，所以好嘅一定有人再去，遲d應該要book先有位！今晚食咗個青囗，pizza同乳豬，加兩個甜品。青囗一定要試，個汁濃度適中，鮮香美味，青囗大隻厚肉，正到呢！正綜意大利pizza，皮脆夠薄，料又唔會太多，好味。個乳豬，唔同中式做法，個皮薄又脆，肉軟到離骨，好食好食。甜品呢？正，有圖有真相，真係水準高過酒店級！希望佢地會繼續努力！我地就會繼續大飽口福！…Read More

天氣凍凍地, 最好打邊爐。係Shatin其實選擇不多,最後去依間,因為有位唔洗等。不過坐低左,就有少少後悔。因為價錢一啲都唔平,係大酒樓價錢,大排檔格局。老實一句,有得打邊爐又可以串燒,其實感覺好新鮮,所以都唔會因為價錢而影響心情。叫咗羊肉、菇、雞翼及金沙骨串燒，羊肉要左兩串,雞翼一串有三隻,金沙骨就淨係得壹件,十幾廿蚊,真係好金嘅金沙骨。至於火鍋，叫咗冬陰公湯底,味道一般,又唔係太濃,$88湯底有蕃茄、水、蝦等等，但做火鍋湯底就真係淡咗少少。火鍋料就叫咗一啲美國肥牛,仲有兩碟菜,加埋響鈴。肥牛大大件，不過得個幾塊，咁就百幾蚊,真係好鬼貴。兩個人,食咗四百幾蚊,真係好貴！…Read More

$30一個午餐，扺食夾大件！套餐有粥、雲吞麵、牛腩河等等選擇,仲有小食，炒麵、菜、炸兩等等配撘，真係唔錯！叫咗牛腩河配菜心，牛腩好入味喎，清湯又唔係大濃味精，河粉又唔太油，比想像中大碗。菜心啱啱好，完全冇過熟，爽口，蠔油放一邊，唔會梗硬迫你食蠔油菜！家樂高級版，幾清靜，而且好乾淨，服務亦好好。…Read More

一向都好鍾意去名家食韓燒,因為環境乾淨而且味道好。尖沙咀呢間有埋景勁正,不過當然要book位,可惜我就唔記得咗book位,所以一早踩想去，希望有位比我，好彩有。叫咗兩個燒嘅，一份牛肉、一份雞肉。跟住要一個炒粉絲,同埋辣牛肉湯。其實兩個人食都好夠，加埋佢地啲錢菜,簡直飽到上心口。前菜其實都好夠份量,而且味道好好,泡菜又夠辣,所以食前菜都可以係一種享受。加上我好早到,佢俾咗個窗口位我,可以對住個靚景,享受美食,簡直一流！佢哋嘅燒牛肉其實真係好好食,一啲都唔油膩,而且厚度適中,燒起上嚟岩岩好,調味又夠,所以一定要食。雞就冇牛咁好食,不過亦唔係唔好食,只不過牛比雞好食啲。雞好入味,而且份量都好大分,簡直係抵食。仲有炒粉絲,送到仲熱辣辣,味道適中,大大份,粉絲爽口,正!辣牛肉湯係本人最愛,無論去到邊一間韓燒,都一定會叫。辣牛肉湯雖然係話辣,但其實唔會好辣,料夠多,有牛肉、洋蔥、大蒜等等,加上白飯,真係飽啊!服務一向都好滿意嘅,有人會主動加水,而且清理碟都好快手,基本上都十分滿意，一定會再來!…Read More

經過見到地方光猛，而且好似係新開，就決定入嚟試吓上海嘢食。叫咗一籠小籠包、水餃麵加麻婆豆腐菜飯套餐，仲有要左一杯熱豆漿。野食好快到，先係小籠包，熱辣辣好味道，皮唔算太薄丶肉汁亦唔算太多，不過夠簡單好食。跟住係水餃麵，嘩，好好食，而且麵條幼細，入口都幾爽口，而且湯底夠清淡，配搭住水餃，真係絕配！仲有個麻婆豆腐菜飯套餐，麻婆豆腐夠辣，而且味道太濃，菜飯好大碗，不過都食得晒，兩樣都一百分！最正係杯豆漿，竟然可以買到一杯無加糖熱豆漿，味道好新鮮，簡直係少見！服務亦都快手快腳，個個都好有禮貌，食完野都會清枱，又唔趕客，一定會再返來！…Read More

差到冇朋友！如果唔係另一間去開泰國餐廳關門，一定唔會考慮依間！一向服務差，而且又唔係特別好食，為免勞氣，決定叫外賣。不過外賣都等咗半個鐘多，原來佢哋唔記得咗，一直喺廚房冇人送出嚟，到手已經唔係好熱！叫咗一般泰式餸，有串燒、海鮮沙律、炒西蘭花、炒河。完全冇難度，不過原來都可以咁難食。串燒一d都唔香唔熱，凍冰冰，點知仲唔熟！<img id="10" class="importImage" src="/var/mobile/Applications/4E9B0190-7DDA-4A23-8D1A-8114AB70F69E/Documents/photo200.png?t=9303" style="line-height: 1.6;">海鮮沙律得個辣字，海鮮有d梅，粉絲又唔爽！炒西蘭花唯一可以叫入得口。炒河味道怪怪，肉質有d似內臟，完全唔好食，點可以咁難食？以後唔會再去！…Read More

散餐叫咗個淨炒粉絲，同燒牛肉，下午茶時段都半滿，有兩個時應，又唔可以叫忙，不過男嗰個態度十分一般，要杯水都要問，仲好寸嘴咁話一陣先。落單後，等咗成15分鐘先有嘢食，炒粉絲先到，熱嘅，都算即叫即炒，不過好甜，而且配菜奇怪，印象中，炒粉絲應該有蛋絲、葱、洋蔥、紅蘿蔔等，不過我眼前有碟似炒時瓜多d，一d都唔係正宗韓式炒粉絲。同燒牛肉，更加奇怪，係變咗肥牛炒時瓜，又係同一配菜，不過加咗韓式辣醬，洋蔥都冇，完全未食過咁嘅燒牛肉，想點呢？環境感覺好嘈，大播K Pop MTV懶韓風咁，其實只不過係茶記豪少少，加d裝修，食物唔掂，其餘心思都係白費！食後感覺：食物唔係唔好食，不過絕對唔係好食。服務唔係唔好，不過絕對唔係好。錢唔係唔值得比，不過絕對唔會再比。…Read More