Fransido's Profile

佢最出名就係煲仔飯，所以叫咗黃鱔飯。另外叫埋椒鹽鮮魷，同芥末蝦球。最令我驚喜嘅係蝦球，無諗過香口得嚟同個芥醬又幾夾，其實係多醬咗少少所以都幾攻鼻，但汁嘅嘢豐檢由人所以無咩大問題。其次就係鮮魷，佢大部分都係個身嚟，無魷魚鬚，所以好厚肉，個炸粉都好輕盈，有少少似天婦羅嗰種。煲仔飯就略失望。上咗枱我專登無打開個煲就沿煲邊落豉油，期待佢會結多啲焦但就無咩成果，佢係有少量嘅焦但就唔到黃金色嗰隻，所以會有啲硬但唔係脆。啲鱔都係偏量少。每一碟都俾菜底。食羊腩煲個生菜我都會煮下先食，哩個菜底我就好十五十六😂…Read More

叫咗招牌無骨鳳翼釀雞煲，菜同埋佢送咗個海鮮拼盤。雞煲最重要就係調味，佢好惹味，又唔辣的，對唔食辣嘅人嚟講剛剛好。洋蔥同配料都好入味。因為懶所以揀咗無骨，佢啲肉質會似雞粒，下次再叫會試番正常有骨嗰種雞煲。送嘅碟海鮮拼盤（船）好有誠意。服務正常，係要搵到處理到優惠嘅職員有少少難，但搵到之後就處理得好快。佢個咸檸七，講真就無咩特別嘅。同埋隻膠杯，好似漱口杯😂…Read More

喺太安樓哩啲偏市井嘅地方竟然有間定價偏貴嘅鐵板燒店。我決定當俾人呃咁試一試。我直奔主題—和牛粒。利申我都有睇過OpenRice 啲圖，啲相好似好full咁，係真係好full, 但就俾我想像中細盒。牛味好足，熱辣辣好香口，有焦香味，油可能迫哂出嚟唔會食到肥膏，亦都無筋，係十分好食。（放埋筷子for reference 個scale)個師傅睇落都好有風範，衣著得體，炒緊都好有功架。再望一望佢有張紙寫住係酒店嘅廚嚟。咁樣承惠$75，相當好味嘅和牛，得張枱仔立食，但師傅好似高級食肆行出嚟咁，抵唔抵就見人見志了。…Read More

每次我都只會食豚骨湯拉麵。佢係幼麵嚟，個湯底唔係嗰種creamy, 所以唔會好膩。紫菜脆身就基本啦。佢叉燒係另上，因為係見住佢燒，所以上到枱會有少少黃金，無浸湯食落會脆脆地。又係我鐘情嘅辣芽菜任食。餃子不過不失。哩個價錢無投訴，廚房位師父都好有禮，會叫我地小心熱。經過都會食下希望香港多啲哩種小店。…Read More

叫咗14oz牛扒，五成熟。嚟咗先知原來咁大塊因為佢係窄身厚切，所以個厚度都幾震撼，近乎係柱體。生熟剛剛好，肉味好正，但有少少筋，所以要以佢嘅形狀要順利切到係有啲難度。以前有個套餐有個雞串燒好正，可惜裝修完就無，希望會有得復刻啦。…Read More

啲老人家侍應真係十分親切。可能因為同行嘅長輩一齊睇起嚟手機用得唔純熟，所以侍應有主動話「想食咩叫我都得喎」。落單嘅時候都有耐心，會介紹下有咩好食。中午係包埋任食嘅有機本地沙律菜，仲有蕃茄仔同薯仔，仲有中湯，嘢飲方面有咖啡、羅漢果水、花茶同蘋果汁。沙律菜可能係因為常溫，所以唔會好似一般餐廳咁爽口，同埋少少偏苦。我就叫咗柱侯牛腩煎米粉，成個米粉整到好薄，有啲似薄批pizza, 中間放滿牛腩，因為有柱侯醬，所以會有外圍好乾脆，中間濕同先有味。煎米粉嘅精髓對我嚟講係「外脆內軟」，所以期望上有啲落差，但牛腩係好食嘅。整體感覺幾好，同埋真係好好坐，飲羅漢水都值番哂。…Read More

中午一般人流較多，我見當時平日無人排隊就決定試一試佢。由我落單到上菜都算快，我叫咗最普通嘅天丼，佢個餐有包前菜、湯同埋飯。我對哩類日本過江龍都有少少偏見，我覺得佢地係本店嘅低配版。事實上個炸物比我想像嘅好，個炸粉幾輕身，脆而不賦，個菇都幾Juicy，小柱魷魚幾彈牙，個雞係炸嘅但個黃係流心，所以香口得嚟又嘗心悅目，但蝦嘅鮮味就好似日本出色啲。個湯偏濃，不過不失。食物嚟講收哂貨。服務方面排隊比較混亂，店外無畫線排隊，侍應剩係叫你出去等，所以其實侍應知唔知邊個嚟先邊個嚟後，同埋木門有大塊掛簾，我等位等到懷疑自己有無被侍應遺忘。我數過先後四個人走但都無人叫我入去，侍應話「唔係我唔俾位你，但個位都係剛剛執好」，我估佢地都真係好忙包容下啦。…Read More

唔係針對哩間食肆，係成個food court 嘅運作少量混亂。入口無購票機，場內散落嘅購票機我見到嘅有三定四架，另外仲有一個真人counter有兩個職員。啲檔攤部分可以直接買有部分要上述啲機或counter 買。啲擋攤嘅形狀唔規則，所以餐牌擺放嘅位置不一，要搵到有咩食係有啲難。最後counter原來有menu，連menu大細都不規則（笑）Counter 職員精彩了，托住下巴同我落單，我個視角隔住半個mon 佢好似個高僧咁對於我嘅點餐不置可否，環境嘈雜，唔知佢收到幾多成但最後又俾佢落啱哂order真係高手在民間。大食代會俾個call 機通知你可以拎嘢食，但哩度係無嘅。叫咗俺流熟成濃湯拉麵（$73）加原味餃子3隻（$18）。個麵就都相當咸，佢唔係濃豬骨味，係單純地咸，無咩層次，好似係快餐店嗰種港式拉麵，舊薄叉燒肥肉比較略多，原來咁就叫「俺流」。餃子係王將嚟，味道ok，都焦香，但佢個餃子汁就咁扔落個碗度，茶記都唔會咁。一餐$91蚊，好似交咗智商稅，去別天神貴少少有人送餐，唔使搵位，唔使買票，至少有杯水，又有辣芽菜食無咁嬲。…Read More

本來打算頹食街坊茶餐廳，無對食物有咩期待，所以食前無影相亦唔打算對哩間餐廳評頭品足，但佢咁嘅待客方式我覺得值得一提。一行三人，叫足三個小菜，加錢叫埋飲品，我覺得唔可以話豪客但一定唔可以話係所謂「乞兒客」。利申啲煲仔小菜熱辣辣，除咗較油膩同個龍躉煲大部分都係骨（未知是否知個別事件）就無咩投訴。個問題係出喺食完之後。一擺低筷，侍應以極短時間收碗碟，收埋張墊枱紙，當時我杯嘢都未飲完。佢收嘢嘅「同時」向在靠門位置嘅侍應大聲詢問「出面有無人等緊？」因為真係無人等緊所以出面個侍應就答佢無。當時間餐廳的確係full哂，但係咪需要咁樣喺個客面前講呢？同埋以人均超過$85嘅消費嚟講，就算個客食哂之後俾多10分鐘佢飲埋啲嘢/飲多杯水都唔過份啦。仲未完㗎。一嚟出面無人，一嚟條氣唔順，我咪慢慢飲埋我杯加咗錢嘅涷飲囉。過咗一陣真係有人嚟了，侍應喺門口大叫「卡位就嚟有佢地就走」。我望一望前方嗰一列卡位，我希望佢係暗指緊我啦，前面有啲未食完俾佢咁叫仲陰公豬。我當時坐嘅位係餐廳嘅中後段，聽得咁清楚一定係我聽力出色啦。我最後決定飲埋杯水就走啦，杯水好熱我估應該唔係我錯掛，我扔咗涷飲啲冰落熱水度想加速件事，但俾個侍應收埋我杯凍飲殘骸，咁冰都無了。我尊重水巴/東江水，咪慢慢飲埋杯熱水。出面等緊位位街坊唔好意思了，要怪⋯就怪杯水啦不可抗力嚟。…Read More

已經係第二次幫襯哩間餐廳。第一次係平日嘅夜晚，今次係Weekend嘅中午，平日夜晚唔多人，但原來Weekend都幾多人。第一次食嘅係烤雞菠蘿漢堡配焗薯。好足料，一淡係唔會咬得落口😂所以都係會拆件食，雞扒煎得好香口，個檸檬醋醬有種好Fresh嘅感覺。第二次食嘅係青醬雞肉長通粉，同虎蝦辣茄汁意粉。個雞肉幾嫩滑，個青醬濃度剛剛好，唔會食到飽飽滯滯。個虎蝦就差啲了，似係冰鮮蝦，唔會好彈牙，雖然未到難食但覺得欠缺誠意。我叫咗杯迷你鮮奶咖啡，好細杯好Cute呀(?)整體味道收貨，驚喜就無，咁嘅價錢你又唔會鬧佢。環境用厚重嘅木做主調，同朋友聚餐一流，水都係自取，有一個角度叫唔怕續杯尷尬，另一角度叫無咩服務。點餐用QR code, 收錢自己去cashier, 諗番其實嗰10%可能只係包咗上餐同餐具⋯…Read More

別天神都算係我嘅comfort food。佢唔會話好驚喜地好食，但偶爾都會想食一食，當然都有同行人就會明但已經不能講嘅因素喺入面。首先佢個所謂套餐就好易會推動埋我食埋佢個餃子，所以作為貪心的小狗叫咗豚骨拉麵加餃子。個湯底唔會有種好厚重嘅感覺，食完都唔會成口油，叉燒係片狀同偏瘦，唔哂啲唔啱/唔可以食肥膏嘅人。餃子就係只煎一面，有一塊薄脆連住好幾隻餃嘅類型。哩種煎法都好常見，但我個人就唔鐘意嗰種好容易剝落還剝落成餃還餃，薄脆還薄脆嘅情況。最精彩嘅係佢個辣芽菜真係世一。配料無料萬歲！芽菜好惹味！夾埋啲麵食一流。原來而家仲有無料加麵條，我又餃又麵又叉燒真係食唔落了，聽到隔離台問可唔可以加半個麵，侍應答佢係唔得的😂哩啲機會，都係留番俾有能之士啦😂…Read More

叫咗個秋冬限定簡單嚟講其實係超高級兩/三餸飯，又或者係Muji Cafe。我就揀咗肉鬆飯、蘑菇沙律、慢煮叉燒同埋黑椒牛舌同一杯Flat white。當時個menu（sorry無影）係飯或麵包揀一個，沙律要揀一個，小菜就可以揀兩至三個。肉鬆飯就無咩特別。蘑菇沙律就到普通地好食。慢煮叉燒係招牌菜嚟，不過肉質就略乾有啲失望，可能因為佢係慢煮，所以唔會有普通叉燒嘅焦香味。黑椒口舌肉質軟熟，如果你追求嘅係彈牙嘅口感咁應該唔使試，比起黑椒味反而係偏甜。同行嘅友人都無話邊個餸特別好食杯咖啡就幾香，仲會附上幾粒葡萄乾，不論係咪做到提味作用，但表面功夫真係做到足。撇開想打卡、想搵個地方同朋友hea,、黃金地段食咩都貴等非食物相關嘅因素，哩間嘢嘅哩種兩餸飯就未必值得試。…Read More

我叫咗紅燒牛肉手工麵。啲牛肉都炆得幾軟，唔會太肥，個湯底有少量藥材味，對我嚟講叫剛剛好，個手工麵相當有驚喜，麵質煙靱有咬口。同行嘅人點咗藥膳花雕牛肉頁丸手工麵，幾乎無藥膳花雕味。可以用低於半價加購飲品，如果想飲杯珍奶嚟哩度都係個划算嘅選擇。成間餐廳其實種類偏少，細心睇會發現啲食材嚟嚟去去得幾樣，就睇你配飯定配麵，配麵再睇咩湯底咁。服務嚟講全QR code點餐，無特別嘅地方。鋪面較細，所以坐嚟講有啲窄，同埋侍應可以企嘅地方亦唔多，所以會總有一個侍應企喺你視線入面嘅感覺。…Read More

三個人叫咗美國頂級紐約牛扒拚加拿大龍蝦尾，燒美國帶子煙肉白汁燴飯（以上係餐）同燒加拿大帶骨黑毛豬扒。應該不論你叫咩都會得到兩個黑糖包，我最鐘意就係佢個黑糖包，熱熱地口感又好，唔會成陣風，食落好煙靭。牛扒就一如以往地好，啲牛味幾出色，五成熟鐵板上到嚟應該多過五成，中間仲有少少紅，但唔會有血。我估如果叫七成上到嚟好有可能會好熟。隻龍蝦都幾彈牙但有啲細隻。美中不足係佢個鐵板無標配薯仔。豬扒唔知點解個侍應問我要幾成熟，反正我答咗佢全熟，食落都鬆化，唔會好實。最唔好食就係燒美國帶子煙肉白汁燴飯。覺得太濃味了，應該係落足咗牛油，隻味飽飽滯滯咁，帶子口感幾好但無咩鮮味。當日人唔多，服務都不錯。下次仍會幫襯，但就專心食扒了。…Read More

補番農業新年嘅食評！估唔到佢年初二就開咗，仲要無特別收費，所以行過食一食佢。我叫咗雞肉竹笙米線，佢啲雞肉比起連鎖嗰兩間滑啲，最關鍵嘅湯底比起嗰兩間啲味會豐富啲，啲配料都會稍多一啲，個湯會比較接近南記。以前佢啲米線特別好食㗎，但而家已經無咗哩個優勢。不過招呼幾好亦勝在坐得舒服。…Read More