serendipityj's Profile

灣仔工作，時間緊迫，附近大家樂同Delifrance都坐滿人，唯獨呢度唔爆，我重以為自己好彩啦，點知真係伏嘅。「廚師幫你諗好意粉」，今日係魷魚圈三文魚意粉，聲稱有蟹醬，睇落幾好食，包埋$40以內飲品。平心而論，我叫嘅Iced Americano正常味，可以接受。但係個意粉真係差到我忍唔住要上嚟寫。首先餸菜，好少，只有3-4個小小幼幼的魷魚圈，冇。味。嘅。三文魚少到我以為係整其他食物剩低嘅邊。兩三粒切半嘅車厘茄，完！蟹醬？吓？咩嚟架？正常撈意粉either紅汁或白汁都欠奉！就好似落咗啲乾蔥碎嘅冇味意粉溝生油，呢張相就係我迫自己食多幾啖之後影嘅。真係買大家樂外賣食冇咁嬲！起碼正常味，灣仔呢區消費貴，本來我想響Grand Hyatt食添，奈何時間緊迫。所以唔少人轉向瑞安中心比較平嘅餐廳，不過埋單都要$132，成本$20？煮得好食我真係唔介意畀你賺，又有位坐，但真心好。難。食！食物名都改得好作狀，咩唔_係韓牛，真係煩，impossible你就直接講，懶幽默咁。諗番起之前嚟過一次食炒蛋同包，都唔係好食果類，但起碼唔係難食。我真心覺得，唔好因為位處灣仔就以為自己屈晒機，嘢食賣到咁貴可以差成咁，不如索性只做外賣飲品，將d寶貴座位讓畀對面Delifrance，好差。…Read More

西環德記一向都有好多人排隊，應該幾好食，於是去試吓。都係幾典型嘅潮州菜式，潮州菜裏面當然唔少得蠔仔粥同胡椒豬肚湯，兩樣都整得幾好味，豬肚唔臭，胡椒唔會太辣，個湯亦唔係死鹹。滷水鵝都係好食嘅，份量唔多，都預咗佢會用炸豆腐墊底，不過啲炸豆腐都幾好食。個侍應提議我哋食嗰個炸蝦球同墨魚丸就伏咗，唔知點解加咗好多馬蹄粒，可能我真係唔係好熟悉潮州菜，感覺好怪，結果我哋食剩好多。全晚我覺得叫得最正確嘅係杯鹹檸七，當然因為啲食物比較鹹，所以想飲汽水，不過佢嘅鹹檸檬又整得幾好味。整體來講基本嘅招牌菜都做得幾好嘅。少少貴啦。…Read More

人心惶惶，大家都少了出街食飯，但結婚紀念日，真係想食好啲，而家出街，會諗起張愛玲嘅《傾城之戀》。去呢度係無心插柳，純粹見菜式都係我哋想食。喜之次魚係貴，但一年一次，食豪啲，認真肥美鮮味，魚骨變味噌湯，都唔錯。燒蛤蜆、蟹腳好味。蟹殻燒撈咗麵包糠，脆脆地。蕃薯雪糕好味，清清地，最後店員燒埋個蕃薯畀我哋食埋，哈哈。重叫咗個泡菜豬肉鍋，不過不失，主要海鮮好味。埋單二千幾，廚師發板價錢，但肯定飽d。侍應健談有禮，要讚！…Read More

想試廚師發辦好耐喇！但係又擔心會好貴好貴。近排經濟麻麻，唔係咩特別日子都唔想使錢。之但係最近工作辛苦，所以今晚決定豪吓。瀛嘅位置大隱隱於市，中達大廈個招牌好細，唔留心都未必睇到。不過入到去間餐廳就覺得別有洞天，分開兩個部份，大細圍嘅客人都照顧到。今晚食咗：1.黑魚子鵝肝蒸蛋（無得輸，好滑好鮮味）2.金沙黃金蝦（咸蛋黃配咩都好食架啦，但隻蝦又大食又新鮮應記一功）3.磯香紫菜湯煮活蚌（個湯吊味是重點）4.黑松露活鮑魚（好味到一個點）5.鵝肝多士（鵝肝大過塊多士，油香令人忘記膽固醇）6.櫻花蝦炒飯（用沙律醬當油係好橋）7.炒雜菜（清清腸胃）黑啤配日本菜都係第一次，但我更鍾意支甜甜大吟釀😻兩款酒都易入口，我唔算飲得，都無問題。師傅好風趣健談，如果慶祝生日佢會畀你埋爐炒飯畀壽星食，好玩，不過其實塊鐵板好熱好難控制，都係畀番師傅炒好味啲。…Read More

海都位於CGO附近，此大廈多政府職員幫襯，一到晚上人不算多，所以多挑這時候來。金沙鍋巴：直接使用咸蛋黄混入鍋巴作調味高溫油炸。好好味，雖然好熱氣🙈Fois gras芋角：鵝肝煎香配搭香芋酥皮，麵粉製成的鵝頭作點綴，cute and nice!水晶蝦餃：紫椰菜、馬蹄、甘筍和蝦粒作為餡料，清爽鮮甜，外貌算靚仔。海參豚肉：京蔥、乾蔥及香蔥配海參加上西班牙豬腩肉，fusion都幾襯吖。海星斑：肉質ok rich，幾鮮味。和式做法，日本大根同濃湯烹煮，咁又幾襯喎！牛面珠：肉好實淨，夠香，慢煮保留牛面頰鮮味，腍又濃。桃姿燉梨：陳皮加桃姿，原個津梨燉製，清甜有果香，我最愛這甜品。我素來對中菜一般般，玩fusion又幾得喎！可以再戰。 …Read More

黃霑寫過詞：東海嘉賓笑 海鮮眼眉調，最近一代才女林燕妮小姐大去，又想起二人種種，心血來潮，不如就去東海為公公同老爺慶祝父親節，好耐無去喇！揀樂聚珍饌宴係有少少自私心，我鍾意食海鮮⋯⋯有蟹鉗同龍蝦。話說我外公後生果陣係煮大鑊飯嘅，幾百人嘅湯同飯菜，佢出馬就無問題，即使八十高齡仍然好嘴刁，稍為無睇頭嘅菜牌我都唔會請佢去。今餐佢每味菜都有食，食嘅份量同我結婚果日有得揮，佢話嘅「唔錯」即係好好架喇。食物份量剛好，龍蝦伊麵無令我失望，個汁好味，伊麵索晒，唔似一般酒樓嘅麵好似白烚左放番落去，不過伊麵少咗d....（環保人士唔好意思）個翅好味，個湯唔係standard味。鮑魚同花膠個汁就standard,不過係新鮮嘅。壓軸果個壽包令我十分驚訝，未見過一個包塞一個流心鴨蛋黃，膽固醇爆標，但由於我鍾意食蛋黃，都係吞咗落肚 lol讚完都要彈吓，上菜速度同準確度都有待改善，可能太多客？見上菜姐姐忙到頭頂出煙。正日可能再忙d喎。…Read More

嗰日我約咗朋友一齊去食午餐，本身係想試佢哋啲咖啡嘅，於是當日特登留肚去食。點知去到俾個餐牌嚇咗一跳，咁大間鋪頭淨係買公仔麵同多士，仲要＄38一碗腸仔出前一丁，唔包野飲喎。咁都算啦，咖啡咪另外俾錢再買囉。同行友人嗌嘅咖啡味道其實係唔錯嘅，之但係我遲我朋友成20分鐘先到，再落單，佢哋夠膽死整成40分鐘先送上枱。嗰個多士餐，係兩塊薄切切嘅法包，擺啲餡上去再擺少少菜係旁邊。公仔麵，我煮得仲好食過佢啊！西班牙辣肉腸？咪又係兩條腸仔，送一粒仔西蘭花，收我＄38有冇無恥啲啊？我以為呢種咁嘅餐廳至少都會有意粉食掛？我哋全部人都問點解咁耐都未上枱，佢哋話唔夠人手喎。咁請問你學咩人做生意啊？…Read More

經過銅鑼灣，想飲咖啡以外嘅野，juice好貴但睇落健康，但老實講同旺角花園街飲嗰啲係冇分別架。講到juice呢條橋根本一啲都唔新鮮，組合又唔係多，個個都話用蘋果汁來做基底，好心個老細就去外國睇下人哋啲Business Model啦，各式各樣針對唔同健康同體質嘅飲品都有，佢呢間呢做果汁又做得唔夠專，做三文治又唔夠多，雜架攤咁。以後唔會再嚟，飲品又細杯又貴，音樂嘈到拆天，寧願再畀錢上Starbucks!呢度係飲野傾計嘅地方，唔係跳hip-hop 嘅舞場亦都唔係k場，咁細個角落開到個喇趴bing bing boom Boom咁真心討厭！…Read More

終於轉餐牌，真係好懶。紅酒牛肉飯，牛肉好overlooked,個汁唔好食，無酒味，只有怪甜味。Buffalo炸雞翼可以接受。無啦啦無咗wifi，侍應黑住面回應，感覺很差。…Read More

日頭行過只見玻璃櫃一條蛋糕外，乜都無得賣，職員坐響入面，懷疑鋤dee⋯⋯第一感覺係，舖位一定係買咗嘅！夜晚同朋友食完便飯去食碗糖水，坐爆喎。我地叫左蓮子杏仁茶、芝麻糊、桑寄生蓮子蛋茶。朋友嘀嘀咕咕說銅鑼灣糖水都平過呢度，食吓睇吓點解。我三碗都試過，就係滑，蓮子無熟到爛，芝麻糊唔似開粉。埋單$96，問攞單，收銀伯伯：「豆泥生意點會有單！」裝修新淨員工淨係夜晚先忙，可能係豆泥，但呢d叫唔憂做囉。豆泥，好彩我重識呢個term,哈哈。…Read More

中大畢業生有邊個未食過陳根記呢？不過以往績嚟計，多數人都係鍾意去火炭嘅泰源同津津。今晚同屋企人嚟食陳根記，有點驚喜，水準拍得住火炭喎。人好多真係好難搵位呀！豉椒炒蜆：屋企人話大隻過廟街果啲，味道正路，無死蜆。鹵水拼盤：最好味係鴨、大腸同牛片。豉油王炒麵：鑊氣令我忍唔住夾多咗兩箸⋯⋯金銀蛋時菜/炸雲吞/炸豆腐：正路無驚喜蠔仔粥/芫荽豆腐魚湯：鮮。乳鴿：juicy加埋啤酒埋單$600 幾真係重想點。陳根記扳回一城！…Read More

點解嚟？純粹係最近睇緊香港掌故嘅書，慕名而來，但有點失望。水仙茶係成餐茶入面味道最好嘅，搭枱果兩公婆用茶盅，真係好有品味，侍應好識做成日過嚟斟茶，執野都好快手。食物就好一般。粥好稀好普通，蝦餃棉花雞好多味精，最出名嘅雞球大包都係MSG味。環境好窄，雖然點心車係特色，但一架車得果一兩款點心，阿姐即場整嘅只有炒麵、薄撐同煎糕，選擇真係好少。另外衛生情況同裝修認真麻麻。推bb車同輪椅嘅最好唔好去，好窄，放響heater 上面嘅水煲放地下嘅，係有特色，但亦好易淥到。雖然話歷史悠久，但下次我都係想去乾淨啲嘅茶樓。…Read More

法國菜來說，價錢與質素均不錯。生蠔$100 半打，新鮮但好細隻，可接受。appetizer 鯷魚甜洋蔥薄餅，原來咁鹹嘅鯷魚配甜洋蔥係幾好食咖喎！個escargots不得了，好食！配法包一流，牛油好味。牛扒同豬面就好普通。薯條新鮮，個mayonnaise 好。甜品raspberry sorbet配蛋白餅，頗清甜解膩。燈光昏暗，叫了rosé飲，傾偈唔錯，影相侍應幫手開燈，頗為周到。作為法國餐廳，signature菜式唔多夠，無confit de canard,無bœuf bourguignon,或以caviar/foie gras為賣點的菜式，很美式，即係有d悶囉。…Read More

是第二次來了，一貫沒餐牌，與老細Larry溝通好，他先燒了粟米和茄子填填肚，再來一個shabu shabu,我們還怕不夠，他說食完先啦，好飽咖！不是一般想你多叫的老細。牛肉豬肉都新鮮，湯底多料，有菇類、豬骨、豆腐、很多菜❤️Larry突然問想不想播我手機的歌，原來他買了新的喇叭，哈！於是我們一起聽陳百強。貓貓詠兒鑽出來了，Larry教我抱起她拍照。我來的部分原因是想見到她，另外就是這裡像深夜食堂的落單方式。Larry很健談，分享了開店多年如何守業、如何創造菜式的故事，還說最大的成本，應放在食材上，不是裝修上。約600 元並不算便宜，但整段經驗很愉快。下次會再去。…Read More

黃昏大雨衝進去，想把午餐連晚餐一起吃下，見餐牌中幾乎最貴的 $268 芝士焗龍蝦伴薯條，便立即叫了。等了好一陣子，應該即叫即做，龍蝦鋪滿芝士，味道不錯，可惜不夠熱，肉也不是很多。薯條就好吃了，是粗身那種，脆脆的熱辣辣，平時經常吃不完薯條的我很快便清掉。下次會試牛扒配薯條。…Read More