chilinggggg's Profile

友人推介了一間高質日本居酒屋，仲有有多款新鮮同罕有既魚生，今次去開旺角附近就順道『拜會』一下！ 我地一早已經book好枱，因為店鋪的座位唔多，所以建議大家訂定枱會穩陣！當日去仲有一枱熟客仔食得很盡興，又有美酒伴隨，非常熱鬧！點菜時，店員已經親自過黎為我地介紹當日的新鮮運到的魚生款式同海鮮！見到牆上的黑板寫咗好多陌生的日本魚類名稱，甚至一些罕見的魚生都應有盡有。食物的種類簡直是目不瑕給！串燒…生蠔…天婦羅…鍋物…魚生…蟹… 真係要花點功夫才能下單決定！首先店員送上小碟前菜－好奇的我，吃起來發現有少許魚味，魚乾仔…加酸酸甜甜的醬汁。挺開胃！食完才細問，這款魚叫鮟康魚乾，又長知識了！帆立貝兩件 - @$56赤貝 - @$48先講刺身，呢度帆立貝口感黏黏的，鮮甜香口，又大大粒咁肥美！赤具質地爽脆，入口彈牙！三文魚籽軍艦 - @$44/2岩鹽灸燒左口魚 - @$45/2牛油果手卷 - @$36/6粒魚籽軍艦粒粒魚籽都漲卜卜，爆出黎都特別甜，可見相當新鮮！ 鹽燒左口魚就切得薄薄，燒出魚油的香味，有點爽口。牛油果手卷就普普通通，冇咩特別。牛舌 -@$68串燒雞腎 -@$28講到串燒真係造得非常出色！ 牛舌夠厚身，牛油香濃燒晒出黎！而串燒雞賢用的是新鮮雞，也爽口彈牙！醃料同醬料非常香口絕配！赤穗蠔 買四送一 @$48問一問友人，覺得好唔好食，佢話『鮮味、肥美、爽口、多汁、厚肉、嫩口』！ 再配搭醋香，突出生蠔鮮味！蟹粥就唔冇咩特別，冇蟹味，得蟹棒，跟我預期的不一樣。不過我看見隔離枱的女子吃得很滋味呢！…Read More

今晚等埋朋友一齊收工去食野，成９點先食，一入到都有位，唔洗等，正！夜收工原來都有著數，哈！座位非常舒服寬敞，我地兩個人，安排了四人座位。 見到每枱人人都有個爐仔燒燒燒，我地都跟住佢地嗌咗呢度最有名的吉列牛同埋咖喱鳥冬試吓。 吉列牛大大塊，仲有碗大白飯，份量剛好！吉列牛一來到已炸得外層脆卜卜，輕輕煎香，蘸少少海鹽食，吉列外層更鬆化，煎出牛油香，真係食得出牛的肉質挺嫩口！咖喱烏冬個賣相好得！頂層係白色既一堆cream，第二層就係超正嘅咖喱，係好日本咖喱， 又香又creamy，撈烏冬同咖喱很合襯，濃郁得黎，又不膩。食多碗都仲得，驚喜之作。…Read More

難得放假同媽咪出去銅鑼灣行街街，經過皇室堡見到樓下Gu果層開咗間新餐廳，就順道試一試喇！我地大概下晝兩點先入座，不太多人，不用等位。位置挺舒適，因為安排我地坐四人枱。午餐的份量很豐富，包沙律前菜、甜品、飲品一份。媽咪超級喜愛食喇沙，急不及待點了喇沙午餐set來試試，喇沙湯底有濃濃椰香咪，很正宗的，用了兩款麵底，分別有粗麵和幼麵，吃起來米線同豆卜都吸收晒湯的精華，湯底味道剛剛好，不會偏咸。至於肉骨菜，藥膳味挺濃，滋補養身，肉骨又入味、肉質炆得夠嫩，而家份量勁滿，十分抵食，就咁飲的話，味道會偏咸，建議撈飯一齊食，感覺會超贊！嗌多咗個小食，軟殼蟹紙米卷，內裡除咗軟殼蟹仲有三色椒同芒果，芒果很甜，食落去好fresh，蘸上酸酸醬汁，正好幫我地吃飽飽、消消滯。每次食馬拉野都會點拉茶，不過今次呢杯拉茶味道少少澀。反而右邊的Magic Soda有驚喜，好fresh又解渴，味道唔太甜！推薦！…Read More

為配合萬聖節，餐廳特意準備了南瓜餐湯，一喝竟然是辣的😅而且味道也頗辣的，不是每個人都吃到。不過，南瓜蓉也很香濃呢！冬陰公蟹肉虎蝦意大利麵 冬陰公味道同意粉是喜出望外的配搭，成功將冬陰公的香料盡情發揮，充滿東南亞風味，微辣的冬陰公成功點綴整個意粉，變得非常惹味開胃，再加上大大隻又新鮮的虎蝦，咬落啖啖肉，甚至連意粉都伴雜著蟹肉的鮮味👏👏👏 慢煮乳豬配薯蓉在一般的西餐廳竟然有乳豬食！我地當然唔放過機會試下中西合壁的滋味，乳豬的外皮燒得脆卜卜，少少燶，有別其他餐廳既燒豬肥肉比例太多，但乳豬的脂肪比例很好，肥瘦適中，肉嫩咬口啱啱好，底下的薯泥都很很軟綿綿口感，仲有柑橘的沙律作配合，咸味與fresh 的搭配作中和。肉眼配香橙沙律最喜歡呢beanswork每道菜都有少量沙律，唔單止吃肉，仲會經常配搭蔬果，吃起來感覺較有營養，又不會食濟，幫助消化。肉眼煎得熟度啱啱好，食落唔會有渣，肉質鮮嫩，而且肉汁保持得出色。沙律的醬汁也是酸酸甜甜很開胃。朱古力超濃😍😍😍正呀，朱古力控必試。餐廳的佈置也很有特色，開放式廚房，裝修是工業風，也是文青打卡的好地方👍👍 另外，見到high tea有很多細緻甜品，下次也來試試吧！👍😍😍…Read More

因為工作太忙關係，太耐冇見老朋友，所以相約聚一聚舊，一行4人簡咗一間近佢哋公司嘅扒房。一進去，氣氛格調都幾好，門口坐咗幾枱外國人，座位很寛敞，食食下發現原來有露天位置仲大，坐出面仲好feel。推薦一下今晚點嘅最喜愛嘅菜式先！美國頂級安格斯肉眼外脆肉嫩嘅口感，6成熟啱啱好！欣賞廚師細心嘅烹調，外面一層煎到脆口，仲有晒網紋，燒到勁靚。肉眼配上少少脂肪，比例好，啖啖濃濃嘅牛香洋溢著口腔，呢塊扒真係夠頂級！生蠔係呢度呢嘅重點推介，呢多嘅生蠔專業又多款選擇，成份menu十幾款簡，真係可以試晒唔同國家嘅鮮蠔！今次waiter就推薦咗兩款比我哋，分別係USA Taylor pacific rock 同 France KYS marine。先講美國果隻，size 有成隻手掌咁大，超級肥美厚肉，味道鮮甜，少海水咸味，群邊爽口。 而France 果隻細隻小小，鮮甜之餘又有少少咸咸嘅海水味，肉質比美國的更爽脆。 食完隻蠔即刻幸福感上升啊~~~ 雜錦海鮮pizza 香濃芝士配海鮮加上薄底，食落唔會太膩，份量細細，一齊食又啱啱好。個千島醬同芝士夾得非常好味！香蒜帶子扁意粉蒜蓉炒意粉到好香，帶子又係煎到外面脆脆的，新鮮冇雪藏味。意粉方面炒得好乾身，唔太油，吃落也不錯。份量正常。要叫其他野食。 挪威三文魚柳煎得好好香嘅魚油，清新配菜減少油膩感覺。厚身啖啖肉，咸咸地調味料，再加點點清新檸檬汁中和！鮮果拿破倫首先，好少地方有得食拿破倫，我係拿破倫愛好者，呢個拿破倫做得好出色同好別緻，先係舖滿兩層嘅雜莓，酸酸甜甜幾消滯，３層酥皮又薄又脆口，要食得好有技巧，食落又唔可以散晒，兩啖就食晒，下次值得再Encore！特濃心太軟裡面嘅流心朱古力夠濃之餘，仲帶點酒味，搭配不錯！食到超滿足，會再來的…Read More

打邊爐最怕就係任食，因為任食，質素通常都跟住差。逐碟計雖然貴一百蚊左右，但勝在份量夠大，材料比較新鮮，唔會曳！我同朋友好鍾意去九龍城火鍋頭打邊爐，已經食咗第三次，每次食都好滿意。材料新鮮是必需，如果唔係都唔會再encore。加上，好多配料係呢度先有得食，例如手打梅菜豬肉丸呀~ 『堅』瀨尿牛丸~ 花膠湯底~ 墨魚油炸鬼~ 大大隻沙爆魚肚等等… 推介下我地成日encore嘅必食配料啦！韓國bb蚌，呢個賣相咁靚比足分啦！份量雖然話係bb但都幾大隻，次次嚟都開兩隻以上食，勁級爽脆，又夠鮮！唔洗蘸醬就咁生食都好好味！牛拼盤，$188呢個價有齊3樣牛嘅唔同部分(牛仔粒、牛胸肉、牛骨髓)，仲要份量都幾多！真係好抵食！牛仔粒真係大讚，肉質厚嫩，半熟食得！肉汁鎖住到，咬一啖牛肉汁出晒黎！牛骨髓，好似豆腐咁，又香又滑。至於牛胸肉，切到又透又薄，最少脂肪的胸肉，口感特別嫩滑。沙爆魚肚大大舊、食落爽爽爽、夠彈牙！招牌手打墨魚丸墨魚丸堅係有墨魚，點解平時出面食係冇墨魚味呢？淥熟食質感唔會太實，墨魚味好出。手打芝心蝦丸好彩食果下唔係爆晒芝士出黎，但芝士同蝦就係最夾，成粒裝滿晒芝士，漲卜卜的。 梅菜豬肉丸呢個真係最最最正，梅菜係精髓，咸咸地瀨尿牛丸咁又冇戲中的瀨尿牛丸咁多汁又可以打乒乓球，呢個肉體教實， 但非常彈牙，瀨尿蝦味果然好出！好特別，值得一試！仲有涼茶係自己煲的，而且非常足料喔~ …Read More

雖然今日先blue Monday，但無阻我要食好西的心情！ 朋友話灣仔有間食burger成日排晒長龍，咪去襯熱鬧囉！好彩星期一都唔係好多人，等左幾分鐘好快就有位啦！ 但我地一入座，好快門口又來到兩班人等位。呢度漢堡真係好多選擇，呢度既人好多都一人一個漢堡，利害！我地兩個女仔自己食唔晒一個，所以我地一齊share 一個double cheese 漢堡，咁就可以叫多款小食啦！Double cheese burger 新鮮熱辣辣！漢堡包外層脆脆的，有烤過芝士好濃味，兩塊芝士的香味都唔一樣內裡的牛肉好juicy 好厚，肉質幼嫩 仲有夾蕃茄同生菜，又唔會漏又幾fresh！想同朋友一齊share仲可以叫佢幫你切埋上超大個漢堡， 一啖一定咬唔晒😂😂😂，但值得一試！食完先發覺隔離有張poster，推緊和牛漢堡！好吸引呀~ 下次再黎食過！Buffalo wings 又一值得推介！雞翼外層炸得脆脆的，雞肉好嫩滑 。味道偏酸帶甜，外國的正宗味道也是偏酸的，挺開胃！😋😋😋…Read More

放工去誠品行下，經過Black as Chocolate 見到各款人氣朱古力蛋糕就心郁郁好想試下！啖啖朱古力真係好似魔鬼般難以抗拒既誘惑！如果怕食唔晒一大個蛋糕的話，3'5 mini size啱晒自私食又或者兩個人share食！棒子朱古力原來用比利時皇室朱古力整，所以味道帶點苦澀，既不太甜，一共有6層，分別有面上的薄脆，幼滑的棒子朱古力醬、同濕潤的朱古力蛋糕，食落層層都充滿驚喜！口感Double滋味呢！而經典朱古力由外到內都是濃濃的朱古力，濃郁而不膩！兩者相比，我個人還是比較愛棒子朱古力呢！果然值得一試！…Read More

好耐冇見班大學同學，好掛住佢地終於我地相約咗食燒肉放題相聚，美食當前，盡興不已！見openrice排行榜比較高，我地都想試下火山燒！特別之處係用火山石燒出的食物會比較保留原汁原味、不大油煙又健康點！重點講下最favorite的款式啦~ 第一位：牛柳粒，粒粒都可以燒到外脆內嫩，保留原汁牛味，咬起來肉汁流出… 非常出色，我們不停也encore ！第二位：牛舌，薄切咬落爽口， 牛味也很濃第三位：另加$96 櫻之貝真係超抵，一共有5款貝類，兩人份！最出色係鮑魚同螺，兩者都比較爽口彈牙！ 廚房超貼心地幫我地燒，好好控制火喉同醬汁味道！我喜歡海鮮是原汁原味才最鮮味好吃！第四位： 菇類，燒野食最愛就係燒菇類！因為燒到原有的菇香味也突出，勁多汁！第五位：蒜蓉包，太特別，好少有得燒麵包！仲可以自己燒到脆卜卜，金黃色！追加：煙肉車厘茄，煙肉燒到香脆，而車厘茄也香甜多汁，咬落無得彈！食得太飽，記得燒菠蘿消化一下！又係超甜又多汁！總括黎講，食過咁多燒肉，火山燒的特色是以火山石燒保留食物原汁風味，相比起別一般燒肉店只顧有醃肉味，實在是大有分別！主要肉類都比較新鮮，醬汁由自己控制，香濃而不膩，值得一試！…Read More

終於到了Happy Friday啦！打工一族當然把握時候收工約人食飯輕鬆下、減減壓，我的脾胃一早已經話想食少少意粉同甜品，於是我就搵到呢個以Handmade意粉出名的餐廳！ 同好友一齊去試下~Y pasta的餐廳佈置清新田園感覺，裝修好寬敞舒服，氣氛有別一般貴價浪漫的西式餐廳，讓人感覺輕鬆悠閒，有一份自在感老闆娘非常親切，親自走來為我們推介一下蘑菇湯好香濃，夠creamy，蘑菇蓉亦夠足料，淡淡蘑菇質感，沒有味精，不咸，將菇香味自然散發出黎，值得一試。食得出意粉烹調的功夫，飛水時做得很好，意粉口感夠爽口，軟硬適中，意粉同黑松露配合就非常好，意粉又夠入味，有橄欖油，但又不會太油！帶子經過香煎帶金黃色，美美的， 咬一口，肉質好嫩滑爽口。喜出望外的薄餅，餅底薄身焗得超香脆，食到卜卜聲，切片蘑菇配上少少芝士很出色，不會太漏！５寸份量兩個人食岩岩好！我們點了意大利薄餅做甜品，友人聽到有棉花糖已經雙眼發光了，果然無失望，金黃色半溶化的棉花糖夾著香蕉同雪糕，甜而不膩，薄餅的厚度又是最合適，薄薄脆脆的。友人自己一個已經刷了大半個薄餅!利害利害我個人最喜愛的是焦糖燉蛋，份量小小，但滿載著廚師的心機！用匙一穿破表面的脆脆焦糖，內裡是creamy的燉蛋，口感絕對是幼滑奶油與牛奶打出來，同平時食開的燉蛋口感差得遠，原來廚師已經試過用不同牌子的牛奶整，最後特制出最完美的口感同味道，呢一點就足以讓我不得不佩服！最後看到冰櫃裡每日新鮮製造的甜品都好想試，雖然已食太飽了，但還是忍不住要買些甜品給家人食呢！…Read More

朋友間慶祝生日，放題係走唔開嘅慶祝活動，而我哋今次就揀咗宮崎嘅燒肉放題！因為餐廳位置非常就腳，係旺角地鐵站行5分鐘都唔洗就到雅蘭中心宮崎喇！我哋一坐低，就即刻送上12星座燒肉，初頭食咗幾舊就估佢哋係咩味，點知原來餐牌有介紹到每款味道，有紅酒、黑蒜、香蔥、辛茄、胡麻、千島、芭蕉同山葵。一共8種醃料味道，都幾有特色！咁多款之中，我反而覺得個味係胡麻好出色，燒完之後好香口。因為一次份量太少，又點夠我哋食呢？所以我哋再encore多幾次！我真係超鍾意呢度嘅食物款式好多種類，有炸物、壽司、雞肉、豚肉、和牛、海鮮同菜喇！又有唔同口味醬汁簡，有味之餘又可能帶出肉類本身嘅味道！拿捏得不錯！食肉當然係我哋嘅重點！今次就推介放題必食Top 5：Top 1－黑椒薄切牛舌，口感煙韌，燒完有少少香脆，非常讚，我哋encore左兩次！Top 2－黑椒一口牛粒同辣味都好味，肉質都夠嫩滑，每粒肉都厚度都岩岩好，又唔韌！辣味簡直係我嘅最愛！Top 3－嗱！食牛硬係要肥瘦均勻，肉質口感先係最fit，半肥半瘦嘅肉紋，呢幾塊薄牛就盡情表現出嚟！Top 4－燒雞翼食我至愛！呢度連雞翼都有唔同味，絕對唔會hea！有蒜香、蜜糖、辛茄、黑椒、芥末、胡麻！其實我從來未見過一間燒肉咁多味揀，蜜糖味係最最最最好食！唔知係咪醃料就容易燒燶，所以提提大家要好好掌握時間，唔好掛住傾計，如果唔係一反轉就會燶晒喇！Top 5－因為我哋4個人，2人同行就有得簡個蝦、牛或豬，我哋見個名咁搞鬼，於是就試左個「憤怒牛仔肉」同「仙境純情豚」睇下有幾憤怒同純情啦！點知個名吹大咗，牛肉同豚肉都不及頭3位般出色！不過個擺設同個名都幾有趣嘅！仲有無限生菜提供，包住食就會無咁熱氣掛（應該係），不過啲生菜大大塊，又新鮮！當然唔少得野飲同雪糕做甜品，由頭食到尾，見到大家都食到捧住個肚，一班牛魔王都勁滿足！下次會再encore！…Read More

朋友住開沙田，佢話比我知有最近有間新開韓國菜好出名，好多人食，於是我地受唔住誘惑，約定要食下！雖然係閒日，但一樣幾Full下，我地8點半去到，咁岩有位，而座位好舒適寬，感覺間餐廳好大間！先來碗紫菜湯同韓國小菜打頭陣，紫菜湯清甜、少少鹹味，而泡菜不太酸，頗辣的！朋友點咗韓國菠蘿冰飲，見到個賣相好正，成大個菠蘿，有埋新鮮菠蘿果肉，菠蘿冰簡直透心涼呀！而我自己就試咗水蜜桃水果冰茶，好好味，我超鍾意飲，有好多生果果肉，口感好Fresh，蜜桃茶味道香香甜甜。我地一坐低已經望到好多待應即場烹調，炒到好香好吸引！我地都跟住嗌咗漢拿山豚肉炒飯試下，韓國待應企係我地面前表現咁，即場逐樣配料落，一邊加辣醬炒，最後都加埋雞蛋，賣相好靚，啱晒我相機食先啦！味道都不錯，炒飯都炒乾身、粒粒分明，仲有有少少飯焦，待應仲好貼心分咗3份比我地！自從睇完來自星星的你，就成日都跟住話食炸雞！因為朋友食唔到辣野，所以我地叫左韓式大蔥蜜糖炸雞，雞肉肉質好嫩滑，炸得又脆，食落清甜的，不油膩！份量就唔會太大舊，食多幾舊都唔怕！泡菜煎餅煎得好薄好香脆、好好焦、食落去仲有泡菜呢！其實我唔明點解要點豉油？食咁多次韓國菜，都好少食野係點豉油。紫菜包粉絲卷炸得香脆金黃，即使我地攤凍咗食落去依然脆口，建議唔好點豉油、試下點辣醬仲好味！3個女仔眨下眼就食咗咁多野，每人都係百幾蚊，都幾抵食！其實仲好多好菜式都未試晒。韓國菜真係好多款式，韓流真係好大誘惑，百試不厭！下次都會再黎試下其他野食既！…Read More

Happy Friday！今晚同朋友一齊食漢堡大餐盡興下，慰勞下自己，食好東西！啤啤佢！ 今次叫咗個Smoked cheddar cheese beef burger一齊share 食，牛肉都有１cm厚，好香口，肉質嫩口，多肉汁，一邊食，一邊滴，兩層都有芝士，香濃但又唔會太漏，啱晒我口味！漢堡包皮外脆，如以往一樣，水準一讚！至於T.B. Nachos，d粟米片超脆，仲有橄欖、辣椒都幾辣，Bacon好香，不過啲醬汁係中間，食晒中間，個底就冇晒醬變咗冇味嚕… Thank you Happy Friday…Read More

未食晚餐就去做運動，要食少少野補充能量先！路過係門口見到有２６蚊一個麵，見平平地所以入咗去試。茄蛋牛肉手攪麵，價錢嚟講，算平！賣相一般，番茄味唔濃，微酸，手攪麵口感粗糙，但份量挺多。牛肉無咩味道。只限填肚。…Read More

Lunch 去邊食都咁多人， 最後我地嚟食焗飯，有同事話仲未試過。又唔洗等位，幾好！我叫咗個咖喱牛腩焗飯，雖然份量睇落幾少，但食食下都好飽，不過男仔食一定唔夠飽，咖喱唔夠香，但牛腩幾林，個焗飯感覺好似唔夠熱。平時出面食焗通常會好燙口，但呢個唔會。 午餐$34蚊包熱野飲，價錢合理啦! …Read More