Benni's Profile

家吓咩嘢都話要健康，連喫條蕉都要有機天然無添加無改造。正因大家都咁要健康，但係大熱天時又想食啲生冷野，最好就連食零食都high卡過人，仲可以影埋張相呃like，咁就 'velly' good啦。位於銅鑼灣嘅isee isee就俾大家一次過滿足哂咁多個願望。isee isee 買嘅係冰凍生果甜品，主打生果雪條，賣相極之吸引，一枝枝企哂响個雪櫃display，五彩繽紛，感覺清新健康。就係咁，我就俾呢個畫面吸咗入去。。。Fig & Honey 無花果。蜜糖(雪條) - 新鮮無花果近年人氣急升，佢嘅清新果香，獨特嘅甜美，切開顏色鮮明，淡黃嘅外皮，嫣紅嘅果肉，點點黃色嘅籽，放於雪條中央，感覺迷人。無花果淡淡且短暫嘅香甜，配上蜜糖，兩者互相配合，形成咗清雅嘅果園氣息，味道一瞬即逝，要你再三回味。Matcha Red Rice 抹茶。紅米(雪條) - 茶味比想像中濃，甜度輕，抹茶回甘。相反，紅米俾唔到深刻嘅印象，除咗表面果零碎嘅出現，感覺似有若無。俾錢時間, 番番黎現實，好味還好味，46蚊一條雪條，係堅貴嘅。真材實料，賣相吸引，可惜坐得唔自在，呢個價錢，好似坐低食件cake抵啲喎。…Read More

都有一段時間冇去東大街，今次再去又另一番景象，餐肆種類更多元化，中西日東南亞都有，不過最吸睛都算係呢間叫Seafood Stand，主打海鮮同漢堡，霓虹燈管跟時髦嘅工業風裝修，牆上大大塊嘅黑板介紹招牌菜式，顏色配搭豐富，目不暇給。餐牌製作精美，每種漢堡都圖文並茂，相片吸引。所有漢堡均單一發售，薯條需要side order。除咗漢堡之外，亦有海鮮拼盤，青口，可供選擇。蝦兵蟹將漢堡 $78 - 原隻酥炸軟殼蟹代替漢堡肉，開邊蝦仁，新鮮蔬菜蕃茄，配和風麻醬及蛋黃醬。原隻軟殼蟹的確俾到視覺上嘅衝擊，隻蟹亦唔油膩，不過，味覺上驚喜欠奉，層次簡單，口感唔實在。深海鱈魚漢堡 $58 - 配料醬汁基本上同蝦兵蟹將一樣，話就話係他他汁，但係食唔出同個蟹堡嘅汁有咩分別。炸魚柳個皮唔厚，menu寫係天婦羅嘅炸皮，雖然唔太係，但係味道做得唔錯，一啲都唔油膩，魚塊軟嫩又夠厚肉，比蝦兵蟹將充實得多。至尊和牛漢堡 $88 - 呢個就似番啲樣，塊漢堡扒油香肉甜，口感嫩滑多汁，配上軟綿嘅煎滑蛋，松露醬，味道總算有層次。漢堡扒唔算薄，性價比還可以。除咗漢堡，我哋叫咗個白酒煮青口同芝士煙肉薯條。青口嫩滑，唔腥，奈何為咗辟腥落咗大量白酒，加上白酒質素平平，腥味就冇啦，不過偏濃嘅酒味唔係個個頂得順。至於個薯條呢，腎衰竭首選，煙肉咸，芝士汁咸，我ok，但係連條薯條都咸到入心入肺就只此一家。薯條上面舖煙肉同芝士焗，做法唔難，所以味道要精。呢個薯條，又鹹又乾，只適合重口味嘅你。店舖嘅裝潢的確令人回首，可惜食物定價及材料配搭甚至份量，都要重新定位。始終都係食味同價錢行先，食物質素要跟裝飾品味接軌，方可發揮餐廳最大潛質。…Read More

細佬响英國番黎渡假，點都要俾呢條皇帝脷品評一下港產啤酒。我唔係第一次黎Tap and Ale Project，啤酒menu裡面嘅種類就唔多講，因為實在太多，不過都可以介紹下我地飲嘅呢兩隻:Young Master Celebration Ale: 呢隻porter味道濃郁, 層次豐富. 聞起來有肉桂, 豆蔻, 充滿聖誕嘅香氣. 入口順滑, 先來香料, 烘麥包, 果仁, 焦糖等層次, 最後回甘, 口感醇厚, 係非常有誠意嘅啤酒. Young Master Rye on Wood: 用蕎麥打造嘅啤酒, 麥味香濃, 呈暗橙色. 入口有焦糖跟麥麵團嘅口味, 酵母嘅微酸亦有帶出, 槐花味道甘苦而突出.眼見細佬一度飲一度點頭，就知水準有番咁上下，同英國嘅有得fight。今次主要係講佢哋嘅黃金薯條 - 呢壇嘢超惡毒，粗薯條外脆內軟呢啲咁行嘅嘢就唔再講啦，個黃金沙炒得好滑，冇油蛋分離，均勻包住每一條薯條，冇油淋淋, 唔過鹹又唔膩，送酒首選。第一次去嘅時候我問老闆，點解唔開响香島區要响旺角呢啲本土蒲點開業，有冇擔心客源唔夠。今次再黎，我哋好彩去到啱啱有位，坐落之後，人來人往，仲要排隊添，客人有本地有竹昇有洋人，氣氛熱鬧, 好明顯我係杞人憂天。…Read More

信德最近開咗堆新舖，有好幾間食肆，早前同事見到有興趣，今日約埋一齊去試。睇餐牌大致係湘川滬菜，價錢比同業貴些小，亦有做午市套餐，二人前$218三樣餸，跟白飯，湯同甜品。可能因為新開張冇耐，碗碟非常乾淨，服務亦很妥貼。我地一行四人叫咗個二人餐，加多兩碗麵同一個小菜:鎮江肴肉 - 口感比食開嘅冇咁啫喱，肉絲份量多啲，明膠較少。毛血旺 - 湯底麻辣有勁，香辣惹味，大腸跟栢葉都好入味，唯豬紅味道欠奉。可以叫個陽春麵撈呢個湯，一定正!小籠包(四隻)- 湯汁好足，而且不羶不膩，肉餡冇實的的，不錯嘅小籠包。擔擔麵 - 有辣味，香料味亦足，唔會俾花生芝麻味蓋過哂，湯滑而不稠，入口順喉，係香港少見嘅質素。嫩雞煨麵 - 呢個有驚喜，普遍餐廳麵質會好稔，麵跟湯混為一團黏糊糊咁，呢度嘅麵吸到湯汁嘅雞香之餘，仲唔會稔到爛，青菜配搭佳，係色香味俱全嘅煨麵，難得!新疆孜然炒羊肉 - 呢個拎到近枱已經聞到孜然嘅香味，羊肉軟嫩唔太羶(有羊應有嘅羶味)，惹味非常，餸飯一流。隨餐奉送:瑤柱粟米羹 - 味道平平，有少許瑤柱味。椰汁糕 - 一般啦，椰味都夠，如果加啲淡奶去造，味道會香啲濃啲，不過勝在唔太甜。臨走時個知客問我地啲嘢啱唔啱食，閒聊咗兩句，仲介紹我地下次黎食水煮魚，同埋俾我試佢嘅私伙辣醬 - 鬼椒醬，堅辣，辣到扒响度。其實呢啲基本嘅留客技倆都只係門面嘢，不過令個客印象深啲又開心啲，呢啲先係今時今日應有嘅服務態度。…Read More

新蒲崗呢啲地方真係好日都唔會去，唔係咁啱响嗰頭做嘢，都唔會誤打誤撞入咗新蒲崗廣場。傍晚時份，個商場只得小貓三兩。我餓到冇氣冇力，見到有間日式放題，$218加埋一都係$240，門口仲大大隻字寫住生蚝任食，仲唔衝入去咩。响衝入去之前，環顧四周，門口有個雪糕櫃，裡面係雀巢牛奶公司，隔籬張枱上面有類似紅豆沙嘅糖水，同埋自助沖菊蜜之類嘅熱飲。好似唔係好對路，不過新蒲崗對於我黎講仲山卡啦過羅湖(因為冇地鐵)，唔識路又唔想再搵食肆，唯有踫踫運氣，入咗去先算。室內陳設簡陋，入門口對正個廚房，則邊有個閒置咗嘅魚生櫃。牆身粉紅色，有啲似茶記裝潢。睇飲品，都係嗰幾味，汽水，綠茶，種類都算多。再睇則邊嘅係甜品同前菜，啲中華沙律，海蜇已經俾個雪櫃吹到面都乾埋，啲八爪魚仔就醬多過肉。甜品仲得意，啫喱，涼粉，水果沙律係意料之內，至於個味噌汁湯碗埋面竟然係雪耳糖水，呢吓真係估你唔到。唔緊要，呢啲都係次要，重要嘅魚生掂就得啦，仲有生蚝喎，實回本啦。埋番位，睇餐紙，咦! 好似少嘢揀啲喎，唔好理，剔咗啲魚生先，整多兩隻蚝 (每人第一次可以叫兩隻，之後要一隻一隻咁點)。魚生新鮮，爽口，因為夠凍，件件好整齊，不過就冇咩味，個帶子唔錯喎，三文魚都可以，咁隻蚝呢? 此店最大賣點，會係點呢? 好大隻，好厚肉，好爽口，不過都好腥，仲有啲甘苦，唔落cocktail sauce係唔得嘅。原先仲以為要逐隻叫咁麻煩，而家直頭唔會再叫。天婦羅都唔差，以港式標準黎講。汁燒可樂骨幾好喎。壽司質素都達標, 玉子壽司除外。個蝦兵蟹蓋其實唔錯，賣相吸引, 但係個餡好多美乃滋同漿粉，焗完之後感覺油油的。濃湯煮野菜什菇反而幾好，可能湯底係事先調配好，冇得輸掛。一口牛係好食嘅，上枱時仲香噴噴，味道好，不過有啲筋。就係咁，我就响一個唔熟悉嘅地方，食咗個唔知點講嘅港日放題。佢價錢唔算貴，旺角嗰啲大X喜，大喜X，都要成三舊水一位，不過人地多嘢揀啲，環境好啲，坐得舒服啲。講性價比，$240算係咁，有蚝任食喎，其實係抵嘅，唔計蚝嘅質素嘅話。難怪响星期二晚上，都人來人往，坐無虛席。…Read More

要搵一碗有水準嘅車仔麵，唔好以為响柴灣呢啲舊區就唔難搵，除咗家陣出哂名，我由細食到大嘅財記之外，有風味嘅舊式熟食市場都買少見少，難得源記都仲維持到相當水準，坐室內有冷氣，雖然少咗啲地道風味(地下濕滑，亂七八糟，冇冷氣果啲呢)，但係可以舒舒服服食碗車仔麵，都算唔錯。源記嘅車仔麵用料足，份量夠。每樣餸都最少有四舊，魷魚唔係泡到肉色半透明嗰啲，而係無浸製過嘅魷魚翼，一啲都唔韌。冬菇大大隻，不過可能太厚，唔夠入味。豬紅都唔錯，入味啲就仲好(皆因本人重口味)。辣椒醬就不過不失啦，有鹹有香都夠辣。加埋炸蒜同蔥仲有炸蝦米，香味十足。個炸魚皮都唔錯, 夠脆, 唔太薄, 味道剛好.平民住宅區有度好，食野唔貴，四餸一麵三十三蚊，港島區真係冇幾多間。至於味道，個湯就梗係唔夠老銅60幾蚊一碗果啲咁把炮啦，不過樣樣配料都有誠意，又係街坊生意，如果你咁啱黎開柴灣呢個山卡啦，不妨試下。…Read More

早前新開張又免費試食又八折優惠咗成個幾月嘅郡記，排隊排到出馬路，睇見都唔想試。宜家新張過後冇著數，人龍就冇啦，不過依然人來人往。一向鍾情於生麵嘅我，今日都一反常態，食牛腩就梗係配米粉或河粉啦，見咁耐冇食過河粉，就整碗牛什牛筋河歎吓。我對河粉認識唔多，知道除咗要爽滑外，都係爽滑，咁呢碗粉都煮得唔錯，冇打結成一團粉，冇糠味。湯底係牛肉清湯，味道剛好，唔覺味精，有淡淡鹵水味。牛筋炆得好冧，膠膠地又唔散，牛肺牛肚係清湯煮嘅，偏淡但一啲都唔腥臭。難得柴灣終於有碗似樣嘅潮式麵食，多謝!…Read More

粥粉麵可以算係香港嘅代表作，可惜因為本地人對廉價食物要求低，但求填飽肚子，只要夠平，質素都可以隻眼開隻眼閉。冇人要求就自然越做越差，好嘅有心嘅粥麵店買少見少，想食碗有哦水準嘅粥都唔係咁易。今日帶住宿醉，一早開完個會，戇居居咁走入朗豪坊，諗住食啲comfort food ，將自己帶番黎現實社會，就俾我撞入呢間池記。有唔少人同我講過佢點好點好，我心諗，中環羅富記，上環生記都好出名，我都食唔少，呢間懶係高級嘅粥麵店，又有幾勁先，定係好似咩皇粥店咁，得個貴字。坐低咗，睇Menu，有套餐，粥連餐飲同菜$72，都幾乸利。要咗碗皮蛋獸，加杯豆漿，要埋個柱侯蘿蔔。賣相唔錯架，份量足，都值$72呢個價嘅。蘿蔔夠色，入哂味，不過柱侯汁可以濃味啲。碗粥好綿滑，啲米開哂花，口感好，調味佳。皮蛋冇'壓'味，瘦肉好冧，鹹味適中。服務都算唔錯，個粥係有心之作，菜嘅選擇都ok，而且有俾心機落去，連叫碟芥蘭都係上湯浸住，俾幾粒杞子咁，呢啲咪識Do囉，俾到人誠意感，又靚。雖然係貴啲，不過今時今日，冇50蚊都唔駛指意有啖好食嘅時勢，呢碗粥令我好舒服，好滿足。…Read More

上環有間招牌顏色配搭特別，室內裝修別樹一格，牆身又紙皮石又文化石嘅食肆，唔講仲以為係裝修材料showroom，點知原來係食車仔麵嘅。老實講，望住咁花多眼亂嘅陳設，坐耐啲都有壓迫感，不過，風水同設計呢家咁高深嘅學問，我識條鐵咩。我個人好鍾意食車仔麵，佢絕對係代表香港嘅麵食，比起雲吞麵更具香港特色。食麵又點少得辣椒油，辣椒油亦係決定一間粉麵店好唔好嘅指標，佢哋嘅辣油夠辣夠香。呢度嘅餸式都係大路果幾款，款多少唔係問題，最緊要係樣樣好食。呢間比起'林子善'多咗經典嘅雞翼尖，夠稔離骨但未至於霉爛，可以'算'下，唔錯。豬紅好入味，正! 咖喱魷魚就不過不失啦。另一樣考店主功夫嘅係冬菇，冬菇呢家嘢真係唔慳得，唔靚嘅菇會有苦澀味又韌，落多多糖都救唔到。呢度嘅菇有水準，雖然菇未至於好堅，不過夠厚，亦好入味，唔會太甜，入口爽滑。最緊要個靈魂未講, 呢度嘅應該有溝甜醬, 甜甜地又夠辣.菜餃皮薄餡多，調味適當，唔肥膩。掙啲漏咗個湯未講，湯頭偏淺色，味道較'林子善'簡單，但依然夠味。似乎冇咩味精，唔口渴，唔太鹹。佢哋價錢與同區比較差唔多，味道雖然係'林子善'贏個馬鼻，但係都不失為一碗有水準嘅車仔麵。…Read More

日式丼飯响香港唔算流行，唔似拉麵館咁開到周圍都係，選擇唔多，不過好彩， 响銅鑼灣好幾年嘅Doraya水準依然高企，見佢日日都咁多人排隊，就知實冇衰啦。當日我倆去到門口已經係九點九，仍然有人排隊，等到十點三終於有得入。排咗半粒鐘，有啲餓，急不及待就order(排隊時已經睇咗餐牌，諗定食咩)。室內裝修簡約，牆身有啲舊，座位有啲迫，燈火微黃，侍應忙過不停，幾有地道feel。刺身丼定食由百幾至二百幾蚊，附有配菜，玉子燒，漬物，味噌汁。好食嘅刺身丼，最緊要就梗係新鮮嘅刺身同香滑嘅飯啦，用料好就自然要磅水，所以百幾二百蚊唔算貴。响外面睇餐牌就已經俾呢個大拖羅拼吞拿魚蓉丼吸引住，大大片大吞拿魚腩，油光閃閃立立令，另一邊滿滿嘅腩蓉，快快咁影完張相就扒一啖落口。魚脂香味濃厚，飯嘅份量唔會太多，適合'大餸'嘅港人。魚塊爽口，雖然偶爾有少許筋，但仍然俾人滿足嘅感覺。伴入山葵醬油帶出魚肉鮮味，係另一番嘅享受。(留意番，食壽司就唔應該將山葵醬油撈埋一碟，不過食刺身丼就ok冇問題)原本諗住試埋佢個三文魚腩親子丼，點知入到去有驚人發現 - 秋之味覺。秋天嘅秋刀魚特別肥美，油脂含量多，係其他時節食唔到嘅，唔係唔試吓化。原條秋刀魚起骨切成塊，伴入薑蔥調味，魚塊入口嫩滑，油脂香味在口中爆發，不腥不膩，一條細骨都冇，簡直係極品，呢啲咁正嘅秋刀魚真係可遇不可求。至於啲配菜就冇咩好講，不過個主角咁正，做佢嘅配菜真係好難發圍，我地都係專心欣賞丼飯就好啦。最後黎個炸雞, 呢度啲炸雞大塊到好似KFC 咁, 不過冇骨嘅. 雞件醃得好入味, 超多肉汁, 嫩滑冇雪味, 外皮酥脆, 係頂級嘅炸雞.…Read More

中環扶手電梯，荷里活道路口，呢度人來人往，咩種族嘅人都有，鄰近酒吧區，大部份都係識食嘅上班族，要配合番呢區嘅口味，少啲綽頭都好難做得長。Check-in Taipei 將台灣地道B級美食進化再包裝，加埋自家研發嘅菜式同cocktail，難怪長期全院滿座。全店大概可以座40人，想食記得訂位。白色牆身掛上純白色似有浮雕效果嘅畫，內容大多是台灣嘅地標。除咗牆上有嘢睇，聽講話呢度個Barman都好好睇，你哋又覺得點睇呢?做得新派台灣美食，飲品都唔可以老套。呢個mochi yaki, 茶杯裡面係用客家擂茶做底嘅cocktail，入口茶香帶微甘，收尾有花生香，酒味剛好，配上炙燒麻糬，有得飲又有得食。另外一個叫Ah Ping Tofu, 豆腐加入bailey's同紅豆，配上一小杯濃烈帶茶味嘅酒，似甜品多過cocktail。呢個Drunken Bubble Tea, 用伯爵紅茶Infused嘅伏特加, 百利甜酒, 做成嘅珍珠奶茶, 加埋枝點著咗囓玉桂條, 芳香撲鼻.小食先黎個炸五香蕃薯條(five spiced sweet potato fries)，甜甜地，有三種醬俾你點，茄汁，蒜蓉醬，松露蛋黃醬，適合摸住酒杯底，下酒一流。雜菌森林(mushroom forest)，菇菌濃香撲鼻，香煎野菌，酥炸蠔菇，撈埋隻溫泉蛋同松露cream，又香又滑。口水雞味道偏淡，雞脾肉卷成日式雞叉燒，切片淋上口水汁，香味唔夠。豬手(Crispy Knuckle Bites)味道普通似pulled pork, 麵包脆餅對豬手肉唔太配合, 亦未能特出豬肉嘅味道。鹽酥雞(Taiwanese Salty Crispy Chicken)酥脆可口，有肉汁，但味道可以再濃啲香啲，五香味再重啲仲正。呢個時候就梗係要啤啤佢啦，想試下佢台灣啤酒點知冇貨。肉燥飯(Seven Layered Raice)屬清爽型，汁料較稀。一層層飯，枝豆，肉燥，用玻璃杯盛著，顏色分明，賣相不俗。牛肉麵(House Special Taiwanese Beef Noodles)用刀屑麵做底，味道跟牛肉湯唔夾，掛唔到湯汁。湯底有藥材香，但口味都係淡，不過牛肉炆得好稔好入味。脆皮豬意大利飯(Pork Belly Risotto)，脆豬皮口感一般，米粒做到al dente，味道整體太creamy，唔可以食多。麻婆豆腐(Mo Po Tofu Noodles)點解配麵呢?! Anyway, 汁料麻味十足，辣味欠奉，麵條質感卻不錯。乒乓(Ping Pong)賣相似章魚燒，用紫薯做，香香甜甜，帶點椰香，中心有柏爾馬芝士餡, 好味。鹽酥雞窩夫(Chicken & Waffle)，聽落食落就係鹽酥雞放响窩夫上面咁簡單，不過加咗粒菠蘿同淋上楓樹糖漿，味道絕不簡單，甜酸鹹配合得恰當，口感多，佳作!最後呢個焦糖燉蛋，好滑好creamy，焦糖面顏色均勻，脆面絕不馬虎，不過可以重啲蛋味就好啦。總括黎講, Check-in Taipei嘅菜色外觀吸引, 極具創意, 味道則未算突出. …Read More

呢間嘢真係錯漏百出，新開三日就俾人一個唔好嘅印象，點攪?!我哋由餐牌開始講起，我唔係'正字特警'，不過大家睇睇個餐牌先。用白紙黑字手寫唔係問題，但係唔識字係應該查字典嘅。一錯!跟著係個店名，Mary's Restaurant, 再睇個餐牌，Mary's fusion喎，茶餐廳頹飯菜色，點先?! 二錯!好啦，印象唔好，但係都要食過先知好壞。是日午餐D，吉烈龍脷配飯或長通粉送餐湯意大利雜菜湯，承惠$62蚊。等外賣時下午1:30，全店滿坐12人，裝修用橙色膠板封牆，錯字餐牌寫滿牆上，空間狹窄，堂食唔會舒服得去邊。三錯!拎走咗野食，番到公司一開，點解係煙三文魚意粉，好我去換，反正响隔離。四錯!番到去，雖然得我一個叫外賣，但係唔知做咩，師傅做咗兩份，一份D餐，一份E餐(煙三文魚意粉)，唔打緊，佢咁快換到俾我，唔怪你。點知番到去一開，我明明講咗要飯，攪咩變咗長通粉。五錯!算!我唔想再行再等，我照食。茄汁長通粉個汁係罐頭碎蕃茄加罐頭蕃茄濃湯加糖稀釋製成，得個甜字，有啲蒜味嘅都。件魚夠大件，不過肯肯定唔係龍脷柳，佢餐牌寫sole 但係口感似越南鯰魚或者river cobbler，味道質感似用鹼水製過，所以條魚唔霉，但係就咩味都冇。個伴菜有椰菜，甘荀，長豆，白灼都要落鹽架大佬，無黎聞味。六七八錯!好啦到個湯啦，冇野嘅，味道正常，偏稀，唔夠料，落好多茄膏調味個庭，不過已經好過個長通粉好多。咁多野錯，又唔好食，又貴，呢個質素根本係茶餐廳頹飯級數，市場同類型嘅都只不過係35-40蚊max，60蚊以上嘅餐廳食物質素唔會係咁囉，錯哂!…Read More

香港老飯店，小弟對它認識不多，卻莫名其妙對此食店有種期待。可能老飯店這稱呼有點古祖，感覺上菜式會忠於原著，味道配搭有多少功架。適逢小弟牛一，新店位於公司附近，而且香港老飯店此品牌一向大受好評，再加上認真的滬菜在香港越來越稀有，決定趁早一試。室內設計保留港式茶樓飯店格局，裝潢沒有雕龍畫鳳，也沒有俗氣庭園，環境舒適。點了一壺鐵觀音，花生酸薑等小吃隨即而來。酸薑似自家製，味道偏甜，薑辣適中順喉，爽口開胃。前菜三碟 - 烤麩， 核桃燻蛋，腐皮素鵝。烤麩做得好軟綿，夠入味，五香撲鼻。燻蛋味道足，煙燻味香濃，蛋黃呈夕陽色，有蛋甜。素鵝有好重的煙燻味，有點過頭，但依然出色。脆鱔 - 雖然賣相平庸，但鱔條炸得非常鬆化，香醋汁增進食慾，酸甜味中和，焦糖不黏牙，上佳的脆鱔。小籠飽 - 除皮薄餡靚外，湯汁爆滿，表皮軟嫩，肉多而不羶，唯味道偏甜。這邊的小籠包雖然未算最好，但肯定知名連鎖店的都要跟它比下去。必食之選。麻婆豆腐 - 有鹹有香有滑，惹味非常，味道完整，辣味尚可，唯麻味不足，扣了不少分數。炸銀絲卷 - 好久沒見過真正一絲絲，軟綿綿，有麵粉香的銀絲卷了。搭上麻婆豆腐一起食，超棒。宮保雞丁 - 忠於原著，用花生而非腰果，奈何個人偏好腰果，而花生令整碟菜口感較粗糙。味道豐富，麻辣甜鹹香樣樣齊，但個人比較喜歡麻味重一點。紅燒獅子頭 - 獅子頭用沙鍋炆煮，上桌時還是沸騰的，獅子頭肉質鬆化，配上紅燒汁份外惹味。春卷 - 當晚座上客有外地人，要求點春卷。春卷裡裹住綿綿的蘿蔔絲，味道偏淡。火方雲吞雞 - 這個壓軸不得不題，一個雅緻的燉盅端上來，看似上級燉品的感覺。湯用了三塊鐵拳般大的金腿，一隻鮮雞燉製。豬肉雲吞皮滑得在口中溜，然後化開，拇指大的餡料，沒半點羶味，入口順喉。雲吞裡刻意沒放鮮蝦，以保留清燉雞湯之原味，金腿散發濃郁旨味，入口醇厚，鹹香温和，加入豆苗點綴，令湯的味道更多元化而不會喧賓奪主。湯料切忌浪費，若然鷄肉咽不下，也要將金腿打包，用來炒菜甚至再煮湯，味道依然不俗。是次晚膳可算是我近年吃過，最好的滬菜，比起許多老字號，香港老飯店從味道配搭，菜式種類，以至餐具，服務都下過不少功夫，誠意十足。…Read More

一所著名嘅北京飯店，曾榮獲香港米芝蓮一星，究竟有咩過人之處呢?老實講，食過之後覺得言過其實，價錢貴唔在講，性價比未算太差，食材係貴嘢黎嘅，每樣菜都好過同業少少，穩打穩紮，但係食唔出有咩咁勁。可能我對佢期望過高，到頭來有啲失望。不過點都好，我都要介紹番幾個餸嘅。煙燻桂魚 - 呢個係成晚最有特色，最值得褒獎嘅一道菜。魚片實淨唔散，煙燻味香而唔鹹，呢個配搭我都係第一次食，冇諗過燻製中式魚會有呢個效果，唔食其他嘢都一定要食呢個!醉雞，鹽水鴨 - 兩者都做得比同業高一線，肉質鮮嫩，但味道偏淡。醉雞酒香可以再濃啲，鹽水鴨除肉質軟嫩外無甚可評。鶴湖蟹影 - 呢個超有名的，攞哂獎，賣相勁。碟底藍色個啲啫喱係唔食得嘅，隻鶴都係唔食得嘅，食得嘅係成個cupcake咁個件，同埋隻可樂色嘅蟹。呢件名菜主要分三部份，底部係芋頭片捲成筒炸，頂個球就係超多蟹肉蟹黃mix，中間有片鍋巴。蟹肉mix個味做得好適中，濃郁嘅蟹味之餘，冇點醋都唔溜，鍋巴鬆脆，跟蟹肉一齊食，口感味覺一氣衝擊，將鍾意食蟹嘅人帶到高潮。咁可樂色嘅蟹係咩呢，原來係薑茶啫喱俾你驅寒，不過我就覺得唔夠薑囉。薺菜炒年糕 - 呢個算係我食咁多次炒年糕中最好食嘅一碟，薺菜有獨特香味，年糕做得好滑，帶點煙韌，冇臭膠味，味道雖然淡，但係一啲都唔寡。北京烤鴨兩食 -烤鴨基本要求嘅皮脆肉嫩都不及坊間好幾間北京菜館，我亦明白烤鴨唔一定係片皮，連鴨肉一齊食都好正，不過厚切成咁嘅烤鴨就唔係咁常見。鴨味唔差，但係厚得滯又唔夠嫩，又冇咩肉汁，薄餅一般，配料又俾唔多，口感乾，大為失望。至於個炒鴨菘係好食，但係好平凡。松子魚 - 冇用五柳做汁，五柳唔係雜豆，應該係酸瓜絲，酸蘿蔔絲之類。個汁酸到盲佬開眼做，醋嘅味仲係嗆喉，酸到食唔到魚味。唯一見功架係刀法，but that's all。其實仲有好幾個餸，冇咩好講，只好輕輕帶過:孜然羊架 - 唔算羶，孜然味強勁，味道好，肉香酥。鹵蛋 - 有藥材味，唔算好香好入味，面頭嘅瑤柱酥亦彌補唔到蛋嘅不足。冬菇豆腐煲 - 不過不失，家常菜我冇咩要求。我承認我有就住叫餸，所以食唔到咩嘢名菜，不過都要成350+ 一位，以米芝蓮一星餐廳計，呢個價錢係合理，貨色就。。。比一般好少少咁啦。…Read More

位於上環西營盤交界，一所絕不顯眼，門面看似住所入口，鮮為人知的食肆。地理條件差，六點後上班族離開後，渺無人煙。由上環或是西營盤地鐵站都要步行五至十分鐘才到達，卻能夠持續開業超過兩年，必然有它可取之處。究竟此所隱世餐廳有何秘技，於種種環境因素下，依然有熟客捧場呢？洋食屋在香港穩站多年，大多走平民路線。有水準，有特色，有誠意的洋食屋真的不多，HAL'S 算是當中較為特出。Queen Hollywood選擇並不多，主打日式意大利菜，對於味道賣相選料之要求可說是跟HAL'S有過之而無不及。推開厚重的棕色大門，看到窄長的餐廳，米黃色的牆身，燈光柔和，平凡中帶點溫暖。餐廳當晚全院滿座，大概十多位客人，各人默默地拆解眼前的美食拼圖，偶爾傳出輕聲感歎，細語傾談人間美味。餐廳從開業以來，菜式都是單點，直至最近改成由主廚發辦，原因在於餐廳客源主要為熟客，選擇皆為餐廳招牌菜，食材貨量難以控制，加上主廚發辦會選用時令食材，菜式變化多，亦較創新。酒水方面，清酒主要為獺祭出品，有品質保證，而獺祭發泡濁酒更於酒入樽後作第二次發酵，口感似香檳，味道帶果香，微甜，有發酵味，入口爽快，作為餐飲相當不錯。邊喝酒，邊窺探廚房中主廚忙前忙後，看上去還很年青，沒想到已是餐廳主廚。這裡的第一段Amuse-bouche有兩道菜. Amuse-bouche 於法國高級料理中用作給廚師大顯身手，將手藝與對食材之知識，呈現于一小碟餸式上。與starter 不同於份量較少，味道較特出，工藝較高，喚醒食客的味蕾，這裡的水牛芝士正正表現出以上種種。大大片水牛芝士，入口即溶，奶香在口中爆發，軟滑食感填滿口腔，感覺連呼口氣都有牧場氣息。芝士泡沫帶微酸，粟米苗清香微辛，正好令奶香停留於口中而不至膩。第二道是日本直送時令蔬菜。蘑菇香氣撲鼻，紫蘇苗帶辛辣，秋葵青翠黏滑，鯷魚醬混入蒜泥，分開每種吃時未見特色，反而將各樣一起入口，有出人意表的融合，味道混為一體，口感層次多，比分開吃更具效果。第一段的兩個菜式都給食客對新鮮食材一番體會，味道來得簡單而真實。熱過身後就是三道前菜。先來一隻凍蚝，顏色配搭單一，但賣相吸引。一隻又大又滿的北海道牡蠣，上面舖著一層晶瑩金黃色的啫喱，啫喱上點綴了一小撮魚子醬。從來沒想過蚝會用如此相貌出場，未拍照已經急不及待去品嚐，結果未能給大家一看究竟，實在可惜。上層啫喱是用蚝汁做成，有微微的煙燻味，啫喱於口中融化後留著似鰹魚高湯的味道，跟蚝很搭。蚝的熟成度簡直完美，配搭下層清爽的蘋果茴香慕絲，味道清甜。熟蚝經冷凍後，口感味道與生蚝截然不同，腥味被清香的慕絲中和，蚝肉質感似法國鵝肝，入口幼滑，加上蚝汁啫喱增添海水味，整體食感就似海洋氣息的法國千層凍。接下來是鰆魚配白松茸，鰆魚先慢煮浸熟，再煎香，上面灑上玄米茶泡沫裝飾。魚肉嫩滑，鹹度恰當，突出魚味。松茸香，泥土味重，充滿園野氣息。柚子跟魚一如既往是絕配，紫蘇苗則增添味道層次。舞茸跟南瓜都是日本產，味道濃郁。唯菇菌類燒烤時間過久，味道帶苦澀，影響整體味道。碟中各種元素都做得不錯，可惜缺乏連貫性。個人對非食用或味道不佳之點綴甚為不悅，以紅葉作裝飾則有只求美感，不切實際之慊。吃過兩道較清雅的前菜，隨著來一道香甜的煙鴨胸。鴨胸乃自家燻製，端上來時濃郁的木香撲鼻而來。數種醬汁點滴在碟上，百合莖零星散落，構圖古怪。鴨胸除強勁的煙燻木香外，在口中散發出陣陣花香，絕不過鹹，蘸上漬梅造的黃色醬汁，十分開胃。再蘸過伯爵茶泡，茶香將煙燻味提升，充分表現出鴨的甜美，香味於口中擴散，好食到停不了。至於無花果醬則味道偏重，掩蓋了鴨本身的甜味。主菜先來200克炭火烤安格斯牛排，牛排表面擦上血橙香料，用海鹽調味，配上少量陳醋汁，火箭菜苗。血橙味不太突出，有微微的香料味。正因調味簡單，而廚師對燒牛排的火喉控制得無與倫比，炭焦香味恰到好處，使每一口牛排都鮮嫩多汁，肉味濃厚，偶爾搭上陳醋酸甜的刺激，好久沒有吃過這般完美的燒牛排。接近尾聲，真的不捨得它完結。壓軸出場，蜆肉烏魚子意大利麵，上菜時散發出茴香的香味。意大利蜆比麵還多，味道清甜不腥，意大利麵黏上烏魚籽，令鮮味倍增，清酒汁為餸式增添層次。麵條有嚼勁，汁料完全不用一滴忌廉，卻能做出香濃圓滑之口感，令人一吃再吃，是實力派的意粉。一頓完滿的晚餐又豈能缺少了甜點呢! 抹茶Tiramisu口感幼滑，茶味甘甜，蛋糕軟綿，賣相簡單卻令人有衝動大快朵頤。整體味道融合得很，一點都不覺膩。完事後，跟服務員閒談發現主廚是山口人，喜歡意大利菜，妻子經常在晚市時幫忙，恩愛非常。食材每日由原產地直送，保證新鮮。 正因為來貨量有限，當晚無緣與我最想試的海膽松茸意粉踫面，可算是美中不足，但亦因塞翁失馬，有幸嚐了如此美味的牛排。 這所特色小店在香港寥寥無幾，能在這貪新忘舊的香港立足實在不易，理應多多支持，加上主廚製作認真，保証給你一個驚喜的晚上，令你再三回味。…Read More