sheeplikeeat的個人專頁

晚上去了駱克道市政大廈吃晚餐，其實已餓了很久，因為美食展內不可飲食，只能偷吃一兩粒試食的零食，在肚餓下吃東西特別開心。我們選了中記，因為它小菜選擇多，而這裡吃飯都價錢實惠。黃金蝦，鹹蛋黃味夠香又不太油，蝦較細隻但都有少少鮮味。比較少見到有田雞菜式，所以選又勝瓜炒田雞，田雞份量幾多，夠味。蠔仔粥是最差的一個菜式，湯底只是鹹，毫無誠意，完全不想吃下去。豉椒炒蜆，有鑊氣，蜆都算大隻，朋友話有少少沙，我就唔太覺。人均百五，幾抵食。…查看更多

這裡出名的是公司炒通粉，我選了公司炒烏冬，其實就是豉油炒，特點是多油多豉油，偏鹹少少，用料主要是香腸、午餐肉這些不健康的加工食物，加入少少芽菜、牛肉、三色豆，就成了，穫氣是有的，但用料和味道就沒特別，反正來多油多調味加上不健康食物，不會難食。而紅豆冰的紅豆也相信不是自己煮的，應該是即食紅豆，紅豆還紅豆，椰汁還椰汁。朋友食雞扒黑椒意粉，雞扒不滑，普普通通，意粉沒發漲，黑椒帶點辣。奶茶少奶，茶味蠻香。有波浪薯條，熱辣辣，幾有薯香。二人吃一百五十元，不過不失。…查看更多

係我錯啦…唔應該淨係識得食好到x麵家…勝x牛丸…永x車仔麵…🙈太遲認識鄭洪記😅，魚蛋雲吞麵$33咋，時光倒流價，魚蛋軟又彈又有魚香，聽說是學利魚蛋，雲吞就見到是店家自製，都多人買走，傳統雲吞原來是無蝦的，雖然唔大隻，但皮薄滑，肉餡新鮮唔會過鹹，有木耳的爽口，有三隻，整體多料，湯都唔係一般味精味…唯一唔好係坐外面要不斷食二手煙😅姐姐雖然一開始唔係好熱情(企左一陣無人理)，但後來坐底都好好禮貌好照顧周到，埋單仲叫我靚女，感覺親切，想再返黎食..🥰聽說炸魚皮最出名，下次要試試。…查看更多

屯市新開food court都未試過，諗住揀間試一試，花甲年華都聽左好耐，今晚外賣試下。因為第一次食，唔係好熟，問左店員幾個問題，我問清湯係咩湯，佢答豬骨湯，然後問辣湯係咩湯底，佢話都係豬骨湯，再問辣係咪麻辣，佢話係香辣唔係麻辣。由第二個問題開始佢已經開始唔耐煩，第三個問題佢已經唔想答，叫我自己睇，我心諗，如果有寫就唔駛問你啦。返到去，見到花甲非常細隻，未見過呢隻超迷你款，一試入口非常之辣，啲粉全部都好辣，再睇埋個湯，辣油至少有1cm浮面，超強勁大辣，我懷疑落錯單，但睇單的確寫微辣，我倒左一半湯溝水，仍然好辣，而且係我唔鍾意嘅麻辣，店員又答我唔係麻辣？講真，就算唔放湯食，我都辣到食唔到，我倒左九成幾份，只食左烤倉魚，對花甲年華非常失望！P.S. 食花甲粉推介去華都地下果間 好食好多！…查看更多

晨咁早去買早餐，8點幾去到，都無晒炒銀針粉，星洲炒米都剩返少少，我買完後無埋牛肉。姐姐話星期六唔開，真係好難食到佢。燒賣同牛肉都大大粒，同埋係手造嘅，燒賣用魚肉同豬肉製成，似淋左嘅鯪魚肉又有點豬油，同平時食到嘅燒賣好唔同。牛肉球配喼汁，咬開好JUICY，唔會太多肥膏，加返少少香茜就完美啦。炒米粉同星洲米粉雙併+$5，米粉有少少蘿蔔絲、火腿、菜一齊炒，星洲果邊有雞蛋，感覺少少油，但有啲油先可以條條分明，份量非常多，滿滿一盒夠食埋LUNCH。…查看更多

太子的一間小店，文青系簡約傢具，配上不同色彩誇張的燈罩，成為焦點。醬蟹肉，青瓜$38脆卜卜的外層，包著鮮香無比的沙律蟹肉絲，雖然細細粒不起眼，但味道好有驚喜！炸生蠔、青瓜、自家製泡菜蛋黃醬$78外層酥化、內裏多汁鮮甜，蠔香出眾，伴以柚子蛋黃醬，味道清新不膩。瑞可塔芝士釀迷你甜椒$48這個吸睛又可愛的釀甜椒，營養豐富又美味。加上芝士焗至香滑，很特別又有心思！ 龍蝦配苦白菜、椰菜花及龍蝦蕃茄汁$228龍蝦沒有煮過火，仍保留嫩滑口感，而且味道甚鮮甜，椰菜花很爽口，龍蝦蕃茄汁不能錯過，蘸麵包食十分滋味！油封鴨腿，防風草蓉，青金桔汁$178烤到卜卜脆嘅鴨腿外皮，鬆脆到好似食緊燒乳豬嘅外皮呀！切開外皮後，就係鮮嫩鬆化嘅鴨肉，香口的鴨油會湧滿整個口腔，鮮香無比。…查看更多

我係乳鴿痴，特別喜歡吃燒乳鴿，知道灣仔有間中菜乳鴿很出名，便來潮聖。先來選茶，香片越泡越濃，夜晚不敢喝太多，如果有多一壺水更好。紅燒乳鴿$78果然十分高質的燒乳鴿，上桌感覺剛燒好，新鮮熱辣，皮薄脆多汁，BB鴿體形剛好，肉的比例完美，太多和太少都不好，每口都是滋味享受。魚湯魚滑稻庭烏冬$78幾十元一個烏冬，賣相比我想像中好，魚湯味道較鹹，輕手少少較好，烏冬是幼身又滑溜的，魚滑是街市見到的鯪魚滑，件數有好多，很大方。座位坐得舒服，寧靜舒適，裝修新淨，洗手間也很乾淨。…查看更多

人生吃到的飯餐是有限的，有時吃了難吃的一餐，有浪費了一餐的感覺，但到pokeworld 絕對是賺了的。三文魚/ 蕎麥麵+半份沙律$62醬汁醃過的三文魚粒，味道不會太鹹，軟綿中滲出魚香，份量都好足夠。醬汁可選多於一款，我揀了和風沙律汁和柚子檸檬醋，柚子味較突出，酸酸地好fresh!沙律菜以外，還有free的青瓜、豆苗、洋蔥，令沙律更豐富，一天攝取多點款式蔬菜，有助健康。Free的還有紫菜、飯素、芝麻，令整個box更加香，尤其是芝麻。份量方面，我覺得我可以吃多一點，不過吃到剛好也是舒服的。唯一缺點是冷氣太強太大風，要快快吃完走，不能慢慢享受。…查看更多

一年多沒有來，感覺還是和上年一樣。這間店好得太過份了，小小的店，食物選擇很多，而且很便宜，店員又nice。在門口望望已有店員招呼我們，邊介紹今晚有花膠湯。我們點了想吃的油渣麵$33二人分享，因為我們不太餓。朋友想吃辣菜莆，我叫他拿小碗，店員立即聽見，邊說想要什麼叫就得啦，邊拿過來。辣菜莆辣度太高，我受不了，但通常都這麼辣吧。油渣麵湯底很好喝，不會太鹹，麵和油渣也很合口味。花膠湯30，湯濃郁得很，像家常湯，好正，花膠大大塊，不論是否真花膠，也誠意十足。抵飲得太過份。白菜豬手汁$12是隱藏menu，烚菜加上豬手汁，味道不再沉悶，令我們驚訝的是份量之多，通常在外吃到只有一半或更少吧，價錢卻只是$12，埋單時令我不敢相信。走的時候店員又友善講拜拜。整體感覺好好，香港平靚正小店，如果在家附近有這樣的店就好了。下次想試其他野食…查看更多

旺角夜晚想食粉麵，本來想食羊湯粉果間，但係佢唔想做我地生意咁，就轉戰呢間，見幾多好評，但估唔到中左伏。坐低不見有餐牌，問店員，她反應是疑問，問我們是否需要餐牌，但原來餐牌是直接以畫的方式點餐，那麼給我們又有何需要猶疑的地方呢?落單後，約15-20分鐘無任何飲品食物，疲累的我等到想睡了，阿姐兩次問我們是否叫火鍋，不是之後就無下文，終於第三次注意我們，才察覺我們太耐什麼都沒有。珊珊來遲的牛肉飯，令人失望，牛肉是靭的，加了三色豆，生蕃茄同青瓜，幾樣不相關的東西放在一起就是。匙和叉也是兩個不同款式，亂放在一起，貫切始終。自家製牛丸、自家製雲吞和魚蛋河，最遲先到，應該有半個鐘，一試湯底，無味，桌面無任何豉油醬料，魚蛋不過不失，一般來貨，雲吞皮甩左，裡面像肉餅加蝦，呢件野談不上是雲吞，牛丸係成餐最好食。最後食剩大量粉，餸就勉強食完，食完後口淡淡，浪費左人生一餐QUOTA，好唔開心。我地張單漏左羅漢果茶，要追兩次先有，聽到其他食客都有漏飲品單，然後因為某國人食客較多，衛生情況也不理想，見到有客人直接將食物殘渣吐地下。不希望再有人中伏。…查看更多

老三油渣麵❤️長沙灣青山道338號順利商業大廈地下A號舖元洲邨勒杜鵑盛放，今日來賞花後，在附近搵食。最喜歡食地道小店，找到了 老三油渣麵 ，簡單食個基本款油渣麵少辣，辣度剛剛好，湯底有鮮味，有好多粒炸油渣，好脆香，邪惡但味道誘人、又有冬菇、蘿蔔，蘿蔔夠淋甜、冬菇軟滑，無叫其他餸都不會覺得悶，麵條有彈性，最後差不多喝光湯底，少辣好惹味。可以一吃再吃的 油渣麵 ！服務方面，招呼都幾好，店員有禮貌，油渣麵即叫即做，新鮮！…查看更多

新年期間，有些餐廳無營業，而AEON就有開，於是就穩穩陣陣，來這裡午餐吧。第一次吃這間，假期屯市很多餐廳都會排隊，但在這裡卻還有不少位。到底食物質素如何呢？店內以自助形式點餐取餐燒金槍魚魚鮫$109記得之前食過燒吞拿魚鮫很好吃，但坊間很少見，大多只是燒三文魚鮫，這裡的金槍魚鮫由它的大小來磅秤價錢，今天要$109。耐心等待製作後，見到成品是很大一件的魚，很厚很多肉，肉質滑嫩，點上有點酸的醬味，味道好夾，如果當中有蘿蔔蓉就更好了，但也附上新鮮檸檬片，算是不錯，唯一是有部分位置有我不喜歡孜然粉味，扣一點分數。湯是三文魚麵豉湯，不錯。雜錦海鮮丼$79圖中是吃了少許，但本身都很少很碎，很細粒，有點可憐的感覺。…查看更多

新年連假來踩單車，到處都好多人，來到BRIAN CAFE，幸運地，它室外有位置，因為我們有單車，正好需要坐室外看車。這家也很文青feel，門外很適合拍照，缺點是西斜在背會很熱。香草蝦意粉$98我們在未食lunch下踩單車，到四點幾先食到野，所以真有點餓。此時，顯得意粉份量特別小，吃完了只有不餓的感覺。蝦隻有少少鮮味，意粉沒有煮過頭，尚算可以，價錢偏貴。凍朱古力$48凍薄荷朱古力$48兩杯飲品都少冰，結果是，朱古力沒有滿杯，哈。朱古力味道幾香濃，而薄荷那杯較特別，比較喜歡。all day breakfast $98有沙律菜、茄汁豆、炒蛋、煙三文魚、腸仔，炒蛋好滑，腸仔好像有少少芝士，其他不過不失，也一樣似是下午茶份量。好像見到旁邊有情侶兩個人吃三碟，這樣才是皇道吧。男女店主都很友善，會出來傾幾句和問好不好食。…查看更多

今日行完山，喺呢頭附近搵食，慈雲山印象中沒怎麼來過，這條食街好多燒烤佔，這是其中一間吧。一個人搞掂成間舖，又落單又招呼又傳菜又煮野，真的不容易，客人都係熟悉如朋友的街坊，來吹吹水飲飲酒，等食物等得耐也不介意。但我地行完山實在好攰，又住得遠，黎到已肚餓，食極都未去到飽，係等飽左，坐左兩個幾鐘仲未上完菜，然後最後欠炒雜菜，問先話無，我地乾等左一陣，差不多三小時終於走得，好似食法國菜咁。食物方面，拔絲雞翼加上糖漿去整，甜甜的幾好味，又滑。燒白鱔無腥不太有骨，都幾香口惹味。燒聖子蒜好重手有點蓋過鮮味。芝士啡菇不過不失三友炒意粉，招牌黎，但只係豉油炒意，料得火腿同少少蟹柳，再加太陽蛋有失望。…查看更多

旺角搵食，餐廳看似好多，但好多時搵好耐都搵唔到自己想食嘅嘢。今日就揀呢間素食店，名字好熟口面，原來在荃灣一街市食過一間差不多名的。Lunch 2餸飯只$29，絕對係時光倒流價，而且呢度係旺角，旺角呀，唔駛交租呀？好懷疑餐廳有冇得賺更過份嘅係，lunch有煲咁好飲嘅湯，無肉煲都咁甜，屋企湯嘅味道，仲要自助式引誘我飲多兩碗。真不好意思。黎到啱啱兩餸煮緊，要等一陣，餸煮好出左一個先再一個，有薯仔豆角同炒菜心，又係家常味道食得舒服，調味適度剛剛好。除左兩餸飯仲有炒野，貴少少，四五十，即叫即炒。同朋友都覺得呢間野做生意幾佛系。…查看更多