2girlpillowtalk's Profile

氹仔舊城區試過唔少葡國菜，呢間係openrice都有幾高評價，可以試埋。餐廳環境舒服，幾啱傾偈休息下。🔸白酒炒蜆作為一個餐前小食份量充足，幾欣賞個汁，美味鮮甜，蜆肉唔梅又無沙，落埋檸檬汁就更加開胃😍。🔸薯絲馬介休之前食嘅都係mouth size馬介休球，將馬介休整撈埋薯絲炸起都係第一次試。擺盤感覺高級餐廳，食落香脆咸口，再點埋醬汁，第一次食覺得幾好食😋。🔸主廚特製蟹肉釀蟹蓋蟹蓋大隻，入面都釀左滿滿蟹肉。蟹肉加埋上去法包到食，真係食到停唔到口，仲配埋沙律，食完都唔會覺得膩👍🏻。嗌左3個小食味道正宗，價錢合理，下次再黎可以試下其他菜式。…Read More

喺官也街買完手信，行到有啲攰，就喺附近搵間有特色嘅餐廳醫下個肚。附近主打葡國菜嘅餐廳都幾多，但同時有齊西班牙同葡萄牙兩國菜式嘅，似乎就得呢間。見舖頭裝修好有心思，就入去試吓！🔸西班牙海鮮飯原隻鐵鍋上，熱氣騰騰，海鮮舖到滿滿——大蝦、青口、蜆、魷魚，顏色鮮艷，打卡一流。飯粒吸收晒海鮮同香料精華，軟硬適中，仲有少少飯焦添！建議唧啲檸檬汁同灑少少黑椒粉，即刻帶出更多層次，鮮味更加突出，真心推薦！🔸葡式烤乳豬乳豬外皮焗得金黃香脆，裡面嘅肉質保持嫩滑多汁，肥瘦適中。點埋個微酸嘅醬汁，完全唔覺膩，仲越食越開胃，口感同味道都好有驚喜！🔸馬介休球即叫即炸，熱辣辣上枱，外層酥脆，咬開係綿密嘅馬介休魚蓉，鹹香十足，仲帶微微香草味。一口一粒，唔使幾下就清咗成碟，好食到停唔到口！🔸木糠布甸本身對甜品冇咩期望，最怕得個甜字，但呢個木糠布甸真係有驚喜！甜度啱啱好，忌廉打得輕盈綿密，餅碎增添香脆口感，層次豐富。食完主菜再食呢個甜品，完全唔會滯，為呢餐畫上完美句號。兩個主菜加兩款小食同甜品，份量滿足，Menu上面仲有好多特色菜想試，已經同朋友約定，下次再嚟encore！…Read More

醒神紅色牆身同騎樓係呢間餐廳嘅標記，入到去見到白色牆身掛滿特色裝飾，樓梯嘅懷舊花磚好有味道，鍾意打卡嘅朋友實啱晒✨🔸葡式牛肉粒牛肉煮得夠晒嫩滑，仲好入味！建議一定要夾埋麵包一齊食，個包吸飽哂牛肉同葡汁嘅精華，真係特別好味。🔸白酒炒蜆每隻蜆都開晒口，洗得乾淨無沙。點埋個白酒牛油蒜蓉汁一齊食，味道即刻提升！想再清新啲的話，擠啲檸檬汁落去，真係一流。🔸葡式海鮮飯材料多過啲飯，面頭灑咗啲新鮮歐芹碎，賣相已經夠吸引。啖飯索滿海鮮嘅鮮味，再加埋咁多款海鮮，食完成個大滿足。本身想試埋個烤乳豬，點知食完已經飽唒，唯有留返下次再嚟試過！整體嚟講係間幾有特色嘅葡國菜，值得推介👍…Read More

同幾個friend再去澳門覓食，今次專程試咗氹仔舊城區呢間以藍白外牆聞名嘅「葡景軒」。餐廳環境幾舒服，服務幾周到，我哋4個人叫咗幾個菜試下，食完都幾滿意。🔹 白酒炒蜆白酒炒蜆賣相好吸引，粒粒都開哂口，蜆肉沒離殼而且飽滿，食落無沙，本身已經食得出牛油同酒味，如果想更加開胃，建議加埋檸檬汁，味道就更豐富😋🔹 咖喱軟殼蟹咖哩軟殼蟹份量充足，有3隻軟殼蟹配上蔬菜同白飯一豌，夠哂我地幾個人分黎食，軟殼蟹炸到脆口，咬開後裡面都有蟹肉，唔會得一層炸皮。咖哩本身帶D香辣，加落去軟殼蟹或者白飯都好好味🤤🔹 葡式烤乳豬乳豬皮燒得超脆，但肉質依然保持到嫩滑多汁，點埋醬汁食就更加有風味。最欣賞係調味恰到好處，唔會太鹹，食到豬肉本身嘅鮮味 😍整體而言，呢度嘅食物質素幾好，環境同服務都唔錯。如果係周末或者假期嚟，建議提早訂位，因為真係幾爆場。今次試咗幾款菜式都滿意，下次會想試埋佢哋嘅海鮮飯同其他招牌菜。…Read More

喺太安樓下面行咗個圈，茶飲店真係多到花多眼亂，今次專登試咗「大諾亞飲品」嘅奶蓋茉莉綠茶。舖頭位置就腳，店員態度友善，落單好快，好順利就拎到飲品。一打開杯蓋，見到奶蓋同茶湯融合得比較快，質地偏向輕柔，同預期中企得比較穩嘅綿密奶蓋有少少唔同。飲落去感覺奶蓋嘅味道較為清淡，如果奶香可以再濃厚少少，同底下嘅茉莉綠茶形成更豐富嘅層次，整體感覺應該會更加好。值得一讚係個茉莉綠茶茶底，真係好香，花香同茶味平衡得唔錯，甜度亦調得啱啱好，飲落好順喉，完全唔會膩。如果鍾意飲清雅路線嘅茶飲，呢個茶底真係值得一試。今次杯奶蓋口感同風味可以再豐富啲，但個茶底確實令人滿意。相信佢哋其他非奶蓋系列應該都會有唔錯嘅表現，下次有機會都想試吓水果茶或者純茶系列，期待會有更多驚喜。…Read More

喺黃大仙睇完中秋彩燈，順便去咗牛奶冰室食晚飯。叫咗鹵水雞翼撈即食麵配流心蛋蒜蓉包，雞翼口感比較結實，流心蛋個蛋黃效果做得幾好，不過蛋香味可以再濃啲。蒜蓉包有少少韌，如果烘嘅時間調整吓會易入口啲。蝦仁炒滑蛋飯份量幾足料，滑蛋同蝦仁舖滿成碟，夠兩三個人分享。上枱嗰陣熱辣辣，蝦仁食落爽口，不過整體味道偏淡咗少少，如果再香口啲會更加好。跟餐熱飲大大杯，夠晒分量。整體來講，呢間餐廳適合想簡簡單單食飽肚，如果對味道有要求就可能要揀過其他嘢食。…Read More

山本屋山本屋係lcx入邊一間食烏冬嘅舖頭，裝修似日式小店，價錢大約100幾蚊一份，有湯烏冬同平烏冬揀。叫左咖哩吉烈豬扒烏冬（要加10），同鰹魚湯底牛肉鳥冬。我地被安排坐海景位，望住維港景食野，特別心曠神怡，落完單後職員仲送左包紙巾。烏冬用瓦煲上，上碟嘅時候都仲滾緊，熱辣辣，烏冬入面有一隻半熟蛋，蔥，腐皮。吉烈豬扒沒咩肉味，唔係肥瘦均勻，炸粉沒同肉分離。咖哩係日式甜咖哩，味道唔濃郁，鳥冬唔知係咪滾得耐左，沒咩彈性，大力夾都會斷，鳥冬形狀凹凸不平唔似平時超市買到個d急凍烏冬咁，整條形狀好一致，想食有d咬口烏冬嘅朋友就可能滿足唔到你地啦。牛肉湯烏冬嘅牛肉有3-4塊唔肥嘅牛肉，食落唔韌，鰹魚湯底混埋左d牛肉汁都幾好味。食物質素都係普通，加埋一270幾蚊，有aeon jcb卡有8折，但坐得舒適，又有維港景加左唔少分。…Read More

上海上海 （灣仔）上海上海係一間新開嘅上海舖頭，但中午飯時間都已經多人到要等位。入坐後，qr code落單，點午市套餐左上海排骨擔擔麵配豆漿，小龍包同炸銀絲蘿蔔卷。野食大概10分鐘就送哂黎，小龍包皮薄但夾落去唔易穿，而且每個小龍包之間都有空間，唔會痴爛哂d皮，保得住湯汁，湯汁唔係太熱，唔會燙咀。配上酸醋，解膩又開胃。銀絲蘿蔔卷做到外脆內軟，新鮮炸好，咬開入面個餡都仲係熱到出煙。入面成個蘿蔔蓉仍保留住蘿蔔味道。上海排骨擔擔麵個麵份量偏少，但擔擔麵湯底都好夠味道，花生醬配上少少花生碎芝麻，仲有少少辣味，味道豐富。豬扒新鮮炸好，賣相吸引，食落唔會干柴鞋口，帶有甜味，配上蔥油，味道不俗，亦都大塊，足夠送麵。熱豆漿已經落左糖，唔會太甜，亦有豆味，沒開稀感覺。埋單大約130蚊左右，係一間性價比幾高嘅餐廳。…Read More

忠記粥品（啟業邨）忠記係老字號粥品舖頭，價廉物美，粥品腸粉都做係佢地拿手野。啟業店更加係一眾街坊們嘅食堂。一份早餐30蚊，份量多到足夠兩個人share來食，今次嗌左艇仔粥配炒麵，落單1分鐘就上左，艇仔粥粥底米粒半化狀態，唔會好水，口感綿滑，而且材料豐富，肉碎，豬皮，八爪魚碎，魚肉碎，再配少量花生同蔥，基本上啖啖都有餸配，食到唔同材料落口感更加豐富。炒面雖然沒咩特別但份量十分多。食完非常飽肚滿足，性價比好高。…Read More

和平飯店（啟德零售館店）和平飯店主打食上海野，片皮鴨亦都係主力推銷，舖頭櫃檯就有師父係度表演片鴨，每一刀片落去都見到鴨汁流出黎，相當juicy。嗌左半隻，一共16塊皮，配有烤鴨醬同配料，鴨出擺盤幾靚，但配料偏少，外加一份要30蚊，唔係好抵。皮唔係太脆，肉嫩但鴨味唔夠出，皮熱辣辣煙韌，包埋肉同配料，口感豐富滿足。松子甜酸魚炸得酥脆香口，配合埋甜酸醬非常醒胃，賣相亦都好好睇，而且松子，彩椒，果肉都非常多，魚身嘅肉嫩，皮則脆口，做得幾出色。醉雞唔係好入味，花雕酒淡淡然，適合d唔中意太多酒味嘅人士，雞肉嫰滿，皮肉比例合理，舊雞唔會得塊好肥嘅雞皮。小棠菜砌得好細碎，用筷子都好難夾，要用個匙羹。份量都唔少。瑤柱蛋白炒飯就唔係好見瑤柱，少少味精，份量大碟。職員服務都勤快，而且有主動推介套餐同埋拿手菜式，上烤鴨亦會遞上濕紙巾。埋單都係700幾蚊，性價比高。…Read More

中環余道生行大廈地庫火腿炒蛋包,薯餅加熱檸水. QR code落單，堂食送餐，食客都好多，但十分鐘內出到餐，方便快捷。火腿炒蛋包，火腿有陣煙燻味，係成個包主要味道來源，其次就係沙律醬味，炒蛋份量都幾多而且嫰滑，包都係暖，薯餅新鮮炸好熱辣辣脆口，食完飲埋檸水解膩，啱啱好夠飽。…Read More

之前去過佢海濱匯嘅分店，覺得食物味道唔錯，今次再嚟試吓呢間分店。呢度地點方便好多，唔使行咁遠。我係用一個app訂位，有半價優惠，所以都幾抵食，叫咗個Pizza同意粉，仲有小食蒜蓉包。pizza熱辣辣，芝士都幾足料，不過整體淡味咗啲。長通粉如果可以多啲汁就更加好。蒜蓉包幾有驚喜，好香，麵包質感軟熟，下次嚟都會再叫。環境唔錯，有落地玻璃望到街景，位置闊落，坐得舒舒服服，係朋友傾偈嘅好地方，有半價都幾值得食。…Read More

腸粉皇灣仔區知名小食店，腸粉10蚊4條，我加多幾粒燒賣要多6蚊。客人絡繹不絕，大家都嗌腸粉，無他真係好滑，配合埋甜醬麻醬芝麻豉油，真係食下一條食下一條，好快食哂。放左工有d肚餓，嗌一份啱啱好。…Read More

一橋拉麵位於中環威靈頓街同石板街交界嘅拉面店。價錢親民，有拌麵（沒湯）同湯拉麵揀，要用qr code落單，落單時已經要用電子支付俾埋錢，水都係自助，但要收加一。價錢係中環黎講算便宜，嗌左兩款拉麵，豬骨湯同海老名，5分鐘內已經出到餐，相當快。每個讓配兩塊叉燒（大盛有3塊），一隻流心蛋，荀片，紫菜。麵條係幼麵，豬骨湯味道較淡，海老湯味道較濃且有好少好少嘅辣，食材同湯底味道正常，食完都感到口渴要飲多d水，中環呢個價錢算ok了。…Read More

今日終於得閒去觀塘大喜屋食返個久違嘅放題！好耐冇嚟，原來已經轉咗半自助模式，感覺有啲新鮮又唔太習慣——部分食物可以自己拎，部分就要用手機落單，不過流程都算順暢，唔使排長龍等出餐，慳返唔少時間作為放題靈魂，刺身質素算係合格以上。三文魚肥美厚切。今次最大驚喜絕對係芝麻雞翼，外皮炸得金黃香脆，一個人食咗幾隻都唔膩。另外蟹粥都好食，粥底綿密，蟹肉份量足。環境乾淨，食物種類多，雖然無以前全部用紙仔落單咁方便，但都保留到水準，適合大班朋友聚會，會為咗芝麻雞翼同蟹粥再encore～…Read More