Edisonick's Profile

今晚同朋友食上海嘢慶祝生日，服務態度唔錯，我哋叫咗醉雞、燻魚、酸菜魚、小籠包、香醋排骨、高力豆沙。醉雞肉質幾嫩滑同埋酒味剛剛好，唔會嗆喉！👍🏻我平時比較少食魚，燻魚係我朋友揀，魚肉炸得幾香口，味道剛剛好唔會過咸，點埋啲汁，甜甜哋幾開胃。香醋排骨酸酸甜甜幾開胃，雖然話就話排骨，但唔會無乜肉，送飯一流。酸菜魚都幾大碟，幾香，魚肉嫩滑，味道唔會好辣，一般人都食到，不過如果再酸dd更好，同埋個底有啲粉仔喺度，我朋友以為係芽菜！😂小籠包用錫紙兜，好似蛋撻仔咁，直接用手攞嚟食都得，唔駛驚揸筷子唔叻會夾穿個小籠包漏汁，皮薄多汁，肉汁幾鮮味！😌高力豆沙比其他地方大個，味道正常同有空氣感，豆沙唔會過甜，不過1人食兩個就好飽。🤣最後食唔晒，我朋友打包，成餐飯我最滿意係佢調味適中，唔似其他上海菜館好重口味同埋好油膩，連我個掩尖frd都滿意。仲有竟然喺餐廳撞到吳唱K，佢見我同frd慶祝生日，主動同我frd講生日快樂，好Nice!😆…Read More

好耐無同朋友堂食啦，酸菜魚應該有1年無食過，今次約埋朋友一齊食，間食店啲座位距離唔算好近，中式裝修，最正係我哋食果陣無其他人(感覺安心啲)，最後點咗酸菜魚，雜錦香鍋，貢菜皮蛋，年藕餅。由於我哋驚太辣，所以全部都揀小辣。酸菜魚用鱸魚做，肉幾紮實，唔會一夾就散，而且由於小辣關係，所以只有好輕味嘅辣，唔食辣嘅人都應該食到，但嫌佢唔夠酸，反而個湯酸同辣啲，寬粉勁吸湯，好食雜錦香鍋都係小辣，辣度仲少過酸菜魚，但幾香口，個鍋有雞，午餐肉，魷魚，蝦，年藕，薯仔，椰菜花，總之乜都有啲，味道Ok。貢菜皮蛋，哩道菜幾的別，係用湖南雞蛋，而唔係用鴨蛋，食落有種咸香味，無黑色皮蛋果種咸水味，比較易入口，但會愈食愈咸，所以同貢菜一齊食會比較好，感覺清新啲。家鄉藕餅配甜酸醬，我本身勁鍾意食年藕，所以最鍾意哩道菜，藕餅比平時食果啲薄，而且味道剛剛好，唔會過咸，食落有年藕粒，不過如果煎得再脆啲就更好。整體食物質素唔錯，而且價錢唔貴，唔知係咪長沙灣區關係，價錢比我喺其他區食嘅便宜。…Read More

成日經過都想試，見佢成幢都係cafe，好似台灣咁，今次終於同朋友嚟食咗。入邊空間感好夠，而且好多打卡位，自助式叫餐，喺櫃枱買完餐，再自己去攞。炸軟殼蟹與檸檬香草酸奶軟殼蟹炸得好鬆脆，炸粉一啲都唔厚，正！魚柳亦都好嫩滑，薯片味道似咖哩味卡樂B，配蕃茄蓉，好過配茄汁～唔錯。龍蝦酪梨白酒奶油醬汁龍蝦幾新鮮同爽口，滑蛋入邊有元貝同魷魚，而且好juicy，沙律OK。當日昔昔細細杯，同朋友一人一杯仔，藍莓味，幾滑，唔會太甜，食到底層仲有雞蛋布丁果啲焦糖醬，幾有層次。梗桔奶昔面頭有啲脆脆同莓，奶昔係草莓味，OK。其實哩度環境唔錯，樓底又高，枱同枱距離唔會太近，真係可以hea足1日，不過唯一缺點係無wifi，電話無無限數據嘅就慘啦。😂…Read More

每次一諗唔到食乜就食常餐!其實之前都喺其他分店食過，但朗豪坊哩間就第一次食!叫咗叉燒湯意粉配炒蛋腸仔，牛油多士，同凍奶茶，落單果陣我問個waitress如果多士加煉奶要加幾錢，佢好霸氣答唔駛錢，我加比你! 首先講下個炒蛋，唔錯，幾滑，不過啲腸雖然係烚唔係煎，但都幾咸(條腸本身問題)，通常出邊常餐啲叉燒湯意粉啲叉燒都唔係太好食，但哩間唔錯，湯底濃，意粉煮得剛剛好，最怕太腍或太硬，仲有杯奶茶，無嗌少甜都唔會太甜，而且都算滑嘅，食完再叫多個蛋撻，熱辣辣，酥皮幾鬆化，蛋味濃，不過我最欣賞啲waitress有禮貌，由我落單到食完個餐，分別接觸到3個waitress，3個都服務好，又有禮貌，抵讚!…Read More

今日同個好朋友慶祝生日，所以食好啲，嚟哩度慶祝。入到去雖然地方唔大，但幾有氣氛。有樣嘢幾細心就係Menu分咗兩款，有星(有價錢)嘅係比男士睇，無星(無價錢)就俾女士睇，咁被請果個就唔會知道價錢。首先嚟咗碟芝士，無諗過芝士味道可以咁清新，一啲都唔膩!之後就有3款麵包可以揀，我要咗一款比較軟身嘅包同埋黑麵包，再配埋佢哋嘅蕃茄牛油，味道幾特別。跟住就食前菜，個樣睇落勁似蝦餃啲frd，入邊係蟹肉同打碎咗嘅帶子，配埋佢嘅提子啫喱同香橙汁，酸酸甜甜幾開胃。跟住就到白豆湯，平時我好少飲白湯，因為飲完覺得好滯，不過哩款白豆湯又幾好飲，好濃郁，質感係好似流沙包果啲流沙感覺，好多白豆蓉，再加埋金華火腿吊味，正!跟住就到意大利飯，有辣肉腸，青蘋果粒，配藏紅花泡沫，個飯有啲硬，如果腍啲會好食啲，有青蘋果粒，食落無咁膩。哩個飯仲配一杯Tarima紅酒。之前就到澳洲牛柳，個蛋係炸過而且流心蛋，牛柳牛味濃，而且煎得幾適中，唔韌易切，幾鍾意伴碟果舊蜂蜜桔子，食完可以辟咗啲油膩感，同埋配咗杯The Funk Wagon紅酒。最後就係食甜品，raspberry mousse同 chocolate，每一粒都唔同味。最後就揀咗壺茉莉花茶，消下滯。總括嚟講，第一次食法國菜，味道同印象都唔錯，Menu易明，睇個菜名就知道食緊啲乜，雖然每碟份量少少，但食完都幾包，如果係想同人慶祝，哩度係唔錯嘅選擇。…Read More

今日睇完物理治療，兩點半先食第一餐，之前喺度食過lunch，第一次喺度食下午茶，不過可惜無肉骨茶揀，最後就食咗香茅骨叻沙+素業春卷，飲檳城桔子酸梅特飲。香茅骨其實都幾多肉，我開頭好擔心得舊骨無肉食，但原來係香茅豬扒，有香茅味，幾鬆化，但啲肉又唔會鞋!叻湯湯底幾濃幾惹味，有魚片頭，豆卜，同埋油麵同米粉。原本跟餐加小食係魷魚春卷，不過menu改咗做素菜春卷，味道唔錯，甜甜哋。最後就係杯桔子酸梅特飲，有凍同熱選擇，而且無限refill，酸酸甜甜，幾醒胃。…Read More

今日喺九龍灣做嘢，出返去德福已經6點幾，所以就喺附近食埋晚飯先返屋企，平時敏華勁多人排隊，見未試過，就入去食!未入去食之前，以為又係果啲主打常餐嘅餐廳，點知招牌係煎蛋叉燒飯!咁當然係試招牌菜先啦!煎蛋叉燒飯，瘦叉少飯，好開心佢真係少碗俾我，平時其他茶餐廳明明叫少飯都係一樣俾咁多飯，搞到浪費食物，所以抵讚!雖然叉燒要瘦哦，但都係覺得唔夠瘦，有啲肥膏，但唔影響味道嘅，煎蛋亦煎得唔錯，蛋白邊係脆嘅，篤穿蛋黃撈埋啲豉油拌飯唔錯，仲叫咗杯凍奶茶，少甜剛剛好，茶味唔會太澀，如果多啲奶就更好，整體都ok!…Read More

朋友們知我鍾意食中菜，其中一個朋友提議去戲曲中心果度食，佢之前食過話唔錯。其實我係第一次聽到戲曲中心哩個名，我Google Map，佐敦站行去最近，行到隧道口我見到對面有一幢外形特別又新淨嘅建築物，唔駛問一定係戲曲中心，諗住落隧道過對面就到，點知我過完隧道出返嚟仍然喺原地...結果我行到去尖沙咀廣東道果邊由中港城行去...足足行咗15-20分鐘😑入到戲曲中心無乜人，之後就直接去滿樂中菜，入到去覺得環境幾闊落，枱與枱之間唔會太近，有返啲私隱，服務員安排我哋坐廂座，自成一角，傾計都唔駛就住就住。😆點菜我就無乜意見，交晒俾食過果個朋友點，首先就飲咗碗杏汁白肺湯，哩碗湯好有驚喜!我未見過咁濃嘅杏汁白肺湯!杏汁味濃，湯嘅質地比平時飲嘅湯杰身，仲有就係個豬肺洗得好乾淨，第一次食豬肺，質地有啲似花膠!🤣胡椒蝦好香，開頭見佢咁多胡椒仲擔心會好辣，但原來唔太辣，只係用嚟吊下味，所以幾香同惹味，蝦亦幾新鮮爽口!平時出邊食啲叉燒燒味多數都係一早整好咗，而且係凍，好少機會食到新鮮整同埋熱辣辣嘅叉燒，所以真係要加分，雖然舊叉燒肥瘦適中，食落唔油膩，其實幾好味，但我平時係食開瘦叉，所以如果再瘦dd會更好。招牌片皮鴨分咗兩個食法，就咁食鴨肉或者包住皮咁食，裝皮個籠會有蒸氣保暖，所以唔駛驚啲皮會凍咗同埋變硬，片皮鴨味道唔錯，不過如果麵粉皮再薄啲就Perfect!跟住仲叫咗一道四寶菜同金瓜炒米粉。最後食埋甜品桃膠桂花糕，幾清甜，白色果層食落有啲似杏仁味。食完見戲曲中心無乜人仲順便打埋卡㖭~🤣🤣🤣…Read More

同班frds去食生日飯，算你哋喇，2月最後1日都趕得切同我食生日飯，真係好豐富嘅一餐!三點前菜有淹蒜頭，淹魚仔同海蜇，比較特別係淹蒜頭，食落完全唔辣，而且唔會食完個口都唔會有陣蒜味。芒果蟹籽沙律青瓜絲幾爽口，芒果清甜，酸酸甜甜好開胃!明太子玉子燒我不嬲都好鍾意食玉子燒，哩度嘅玉子燒好滑帶點微甜味，同明太子一齊食，又多一個層次感。味醂魚乾幾好，好啱用嚟送酒五品刺身鋪上金箔，賣相好高貴，最啱相機先食!我本身比較少食魚刺生，通常都係食蝦同貝殼類刺身，但無諗過哩度啲魚刺身係完全唔腥，好新鮮!-帶子好鮮甜-拖羅入口即溶，好香魚油味-深海池魚，肉質好結實，爽口-金目鯛有火灸過，幾香口-三文魚腩好肥美極上和牛盛宴我第一次食和牛宴!見到碟和牛嘅賣相，真係眼前一亮!好仔細咁分咗9個唔同牛嘅部位，仲插住啲旗仔標明!喺我哋食之前，師父會介紹每個部位嘅特點，跟住佢安排嘅食用部份次序來食。-牛舌很爽，一啲都唔羶-牛頸脊肉質很嫩-牛腿上肉肉質比較軟-牛肩脂肪比例平均，肉同脂肪比較剛剛好。-牛小排應該係最多脂肪嘅一個部份，好濃郁嘅牛油味，建議包住生菜一齊食。-牛肉眼，牛臀肉味道亦唔錯。除咗好好味嘅和牛外，當然要食返啲蔬菜平衡下，茄子，翠肉瓜，蕃薯，燒嚟食又幾香口。炸蝦天婦羅有蝦，秋葵等等，炸得幾脆，但裡面唔會太乾身。免治雞肉棒都幾大條，就咁食已經好夠味，唔需要另外再點醬汁。牛油露荀炒野菌就同佢個名一樣，有牛油味嘅露荀同野菌。香芒椰汁糯米飯雖然已經食到好飽，但總有多一個胃係用嚟食甜口，芒果好清甜，甜度剛剛好，有時都幾怕啲太甜嘅芒果，糯米飯煮得幾黏，味道都唔錯。多謝啲朋友帶我嚟食咗一餐，今年覺得最好味嘅生日飯。…Read More

果日約咗朋友影相，一影就影到3點幾...餓到暈...朋友話想食泰國嘢，見哩間阿來唔太貴，所以就入去食。我哋一嚟就即刻嗌咗個椰青先，又餓又渴，椰青幾清甜，不過略嫌有啲貴，我記得平時啲餐廳好似賣廿幾蚊一個，定係我記錯呢?之後就叫咗馬拉盞炒四大天王，有秋葵、芥蘭、臭豆同豆角，正!一次過食4款蔬菜!而且啲菜幾新鮮!泰式鮮蝦炒金邊粉啲蝦幾新鮮，蝦肉結實，金邊粉味道帶點少甜少辣好開胃。由於乜都想試下，所以叫咗個小食拼盤，有蝦餅、蛋黃雞翼、豆卜同春卷，最好食係雞翼，咸蛋味很惹味，仲要係用單骨雞翼，方便入口!蝦餅同豆卜就是正常水準，而春卷就比較特別，裡面竟然有西芹，我就覺得ok, 我朋友就麻麻地。總括嚟講啲嘢食唔錯，價錢合理，而且啲服務員很友善。…Read More

今次已經係第3次嚟樂天經典食晚飯，之前叫樂天客棧，唔知點解要改名?我好鍾意食中菜，哩度啲菜式中式得嚟又有啲特別，而且環境舒適，枱與枱嘅距離唔會太迫，坐得好舒服。今餐食咗每次嚟都必食嘅冰鎮苦瓜，味道甘甘哋，再滴埋桂花蜜一齊食，有一種很清新嘅感覺，而且好似飲緊台灣嘅蜜蜂苦瓜汁。食中餐又點少得飲湯?今次飲嘅螺頭湯無上次咁濃，但味道仍然唔錯，同埋每次我一起身想畢湯嘅時候，侍應們都好主動過嚟幫我畢湯，抵讚!芥末蝦蝦今次第一次食，味道同預期一樣，就是芥末蜜糖醬炒蝦球，味道OK。扣肉包其實就是類似台灣的刈包，麵包軟綿綿的，扣肉甜甜哋咸咸哋，幾好味。四大天王(包括茄子、豆角、秋葵、荷蘭豆)我開頭以為係涼拌，點知原來係熱，醬汁濃咗dd，如果味道淡少少更好。酥炸豬肉蝦棗，一咬落去外層炸得好鬆化，豬肉同蝦肉打得好扎實，而且食落應該係有啲芋頭喺裡面，真係幾好味。每次嚟哩度食都唔會失望，保持到水準!…Read More

之前都嚟過好多次，食物味道唔錯，服務幾好，尤其係戴眼鏡果位女士。不過今日再去食就有不愉快嘅經驗...今日lunch如常叫醉雞配飯，雞要雞胸，但今次佢俾錯咗雞脾我，張我果碟雞胸俾咗隔離枱，而隔離枱其實只係走翼，跟住我叫個waiter幫我換，隔離枱見到我換，佢哋又話換，但果陣佢哋已經食咗幾舊雞，跟住我見個waiter攞走晒我哋兩碟雞，果陣心諗，佢哋會唔會俾隔離枱食剩果啲雞俾我呢...結果碟醉雞一上枱，我就覺得有啲唔對路，因為啲醉雞汁比平時食嘅多好多，感覺似係佢喺隔離枱果碟剩雞度再加多幾件雞上去，所以汁搭汁，搞到咁多汁...之後再睇埋啲雞，明顯唔係左右兩排雞件係唔似同一部份切出嚟....跟住我叫自己唔好多諗照食...食右邊果排雞好正常，同平時一樣，之後食左邊果啲雞肉，點解唔凍ge....溫度同右邊果啲雞差咁遠...我真係好懷疑佢俾咗隔離枱食剩嘅雞俾我...好失望...我幫襯咗咁多次...我明唔想浪費...但咁樣真係好唔衞生...…Read More

好耐無食陸陸雞煲，前排個frd約我食，去到以為自己去錯地方，因為同我之前食果間嘅裝修完全唔同，原來我之前食果間係旺角另一間分店，哩間裝修好好多，年青啲，又坐得舒服啲。諗住嗌雞煲，但適逢陸陸雞煲6週年，所以暫時只有6週年海鮮套餐選。個套餐包含好多款食物，有招牌雞煲，原隻龍蝦湯，海鮮拼盤，牛肩胛，手打丸，雲吞餃類，蔬菜籃，鮮炸響鈴等等，總之就好多嘢食。雞煲選了少辣，半隻雞保持水準，唔錯。之後就上龍蝦濃打邊爐，原隻龍蝦，湯底幾鮮甜，不過愈食愈咸，如果少咸更佳。海鮮拼盤都有幾多唔同款嘅海鮮，有鮑魚，蟶子，蠔，蚌，魚片等等，全部幾新鮮，最重要係無沙。牛肩胛牛味很濃，好味，但牛柳粒比較厚，所以要滾耐啲先熟。仲有蔬菜籃同響鈴，魚皮等等。仲飲咗杯青檸梳打，好大杯!由於個餐係$268一位，所以係按人頭收費，但我想講真係好抵食，雖然我哋兩個人食，但份量就多到似3至4人份量，枱枱都食唔晒要打包，所以一定要嗌嘢飲，唔係戰鬥力會唔夠KO d食物，自問係大胃王啲你一定要嚟，一定回足本，食完我第2朝起床都仲係好飽，好似未消化完。😂😂😂…Read More

平時喺旺角食飯，餐餐都喺女人街食，今次食lunch就同朋友去廣華街果邊食，都幾多選擇，最後去咗JC Room食。餐湯我平時一定會揀紅湯，但哩度無得揀，每日只有一款湯，今日係煙肉豆蓉湯，又幾好味，豆味同煙肉味都好濃，睇嚟我以後食西餐可以飲紅湯以外嘅湯。😂Main course就食澳洲特級肉眼扒配薯菜，7成熟，肉質幾嫩，唔韌，都幾有牛味，就算唔點黑椒汁都ok，薯條亦幾脆，同最緊要係夠熱!凍檸茶就正常，如果茶味再濃少少更好。…Read More

話說本人同我老死都係一個蝦神！無論生蝦熟蝦 係蝦我哋都歡喜!呢間仲要叫蝦棧 一定有d 料到先會有咁既店名! 一於黎一試!一入到去, 見到d 蝦仲係活生生咁既, 一叫佢就會即煮, 幾唔錯wor!夠晒新鮮!食蝦最緊要新鮮!哩度嘅蝦鍋有成10款, 真係揀咗我哋成10分鐘先揀到,唔好講笑哈哈 最後我哋揀咗奶油蝦鍋  哩款特別d,平時少d 食到,真係好期待呀!!每鍋300gms, 一上台香到呢!隻隻都手掌咁大，好鮮甜又多蝦膏！食蝦膏真係有說不出嘅感動呀啊!奶油味極重, 再加上大頭蝦啖啖肉, 真係回味無窮! 得9隻真係唔夠喉囉!佢D 汁好食到可以送飯食! 所以我哋叫咗一個魯肉飯,哈哈真係好正。仲叫咗蒜蓉高麗菜,雖然$78碟有啲貴,但真係好鍾意食台灣嘅高麗菜,而且香港唔係度度都有得食。最後仲叫咗醉雞卷,哩款菜真係有驚喜！酒味恰到好處,無骨,皮肉分離,而且無肥膏,雞肉好嫩滑 係我食過咁多醉雞最好食嘅一間！明明間舖主打蝦,但醉雞竟然咁好食！今日真係好滿足呀!!下次一定要再嚟試下其他口味蝦鍋！…Read More