搵食媽's Profile

用foodpanda訂餐外賣自取，為求方便快捷，可預時間去取餐不用等，結果 遇上無知垃圾員工卻白白浪費了一小時！話說11點許經foodpanda訂餐顯示預計11:45可取，於是我便於11:40到餐廳等候，餐廳帶鄉音呀姐睇都未睇就話無咁快嫁，有時落單都要等成個鐘先有嫁 （心諗： 只係問了一句外賣有未，要成個鐘先有得拎？ 咩餐廳咁巴閉呀）於是便在旁等候，結果一等 等到12點，眼見外賣不停出都未有，亦已過原定取餐時間11:45， 於是便再問 foodpanda 外賣有得拎未，對方竟然回覆 外賣單出曬，無我張單， 又老吹說訂單取消了，話唔關佢餐廳事，叫我自行聯絡foodpanda 退款。由於手機從無顯示取消訂單，當再追問時 對方堅稱取消了，於是只好離開餐廳 聯絡客服，另外去第二度再買午餐！ 當買緊另一家餐廳外賣時，客服回覆訂單從無取消，並且已經有得取餐，當刻心裏粗口真係橫飛，只好拎完另一間餐廳的外賣再折返去拎個份 原本堅稱話取消左又突然出現番既外賣，但已經係12:30既事，而呢份外賣亦已一早整好擺起度！請問鄉音呀姐訓醒未？員工質素都好緊要，唔識唔緊要，唔好老點啦！…Read More

最近宣傳得頗熱的雞翼山, 款式不算多, 但口味獨特。當天來到黃埔晚飯, 飯後特意前來拜會一下龍與鳳。當晚8 / 9 點左右來到, 店前企了幾位等侯食雞的客人, 以賣雞翼黎講, 咁夜都有人等都算幾好生意了。由於剛剛才吃飽晚飯, 所以今次只點算了咸檸7雞翼4件, 打算外賣回家淺嚐, 由於雞中翼已售罄, 一場黎到, 雞搥都照殺啦。 等左15分鐘左右, 就有得拎喇, 不過無奈的事就此發生, 佢就咁俾左個堂食紙兜我地拎走, 其實我唔係想唔環保, 不過呢刻真係食唔落, 所以有禮地跟店員說我們柯打是外賣的, 請問有無盒可給我們, 對方竟然黑面好唔like咁話無曬外賣盒, 俾一張牛油紙我地蓋住就算, 由於我地回家路程都頗遠, 如果就咁拎住一個兜回去真係有D難度, 加上落柯打時是你們店員問我們堂食還是外賣, 但無曬外賣盒都唔關客人事吧。 剛剛開業, 生意好當然好事來的, 不過你生意好, 雞翼賣曬, 盒又用曬都唔洗黑面吧?  話雖如此, 雞搥的味道係OK既, 回到家才吃當然沒現場即吃那般香口, 但雞搥夠入味, 聞落去唔算香, 但吃下去帶有少少甜味, 幾特別, 下次黎開黃埔會試埋其餘味道, 仲會早少少黎, 態度應該會好D。  …Read More

沖著麻辣燙而來， 掛著失望而回！ 第2次光顧，第一次是因網上大作宣傳，又近工作附近而去試，坐店的外面 （店內得2個位，一個人煮，晚上真係唔知點招呼客人來任食），後來搬到附近一個大些少的舖位，近香車街街市，環境一般，不過店舖搬大了，價錢貴了，但食物質量卻奇差。中午時分，店內人不多，點了一碗麵食， 午飯時間光等的時間已過了半小時， 終於等到麵來到， 心諗：就這樣？ 找找我點了的餸先， 羅白， 2.5薄片， 年藕， 2薄片， 個汁金菇多到呢，驚食唔曬，真係無吹水，有圖有真相， 最近啲物價真係咁貴咩？ 呢度每個餸最平要$5， 如果$5得2薄片，成條羅白咪賣成5舊？重要係：唔好食！ 成碗4十幾蚊的麵食 伏一次算了。…Read More

最近吃得有點膩, 自然諗起素食喇。這天中午來到大自然素食, 第一次來這店進餐, 店內環境不錯, 坐得闊落舒適。午市有粉麵飯單人套餐, 亦有 2/4/6 位自選套餐。眼見旁邊的飯麵份量頗多, 我們四女兩男共點選了 1 客飯餐及 4 人自選套餐!單點飯餐我們選了欖菜肉鬆菜粒炒飯 ($44), 承送一客中湯。炒飯堆得高高的, 夠我們 6 人分吃, 飯粒炒得夠乾身又唔硬, 粒粒分明, 配上雜菜粒及欖菜, 好味! 而 4 人套餐 ($368)中, 前菜點選了台式涼拌牛蒡絲, 牛蒡絲上灑上黑芝麻, 驟眼看像一碟白飯魚。牛蒡絲甜甜的又爽口, 雖然是前菜, 但份量都不少, 而且味道很好! 湯類選了竹笙四季燴翅, 這素翅對我來說, 基本跟真翅的口感和味道一模一樣, 加上環保的原故, 已很久沒有再吃魚翅, 這個燴翅唔會”傑撻撻”, 咸淡適中, 食客可自行落點醋伴吃。而小菜方面可選四款:XO 醬茄子魚柳煲 – 上菜時鍋內仍是滾住”bolubolu”的氣泡, 鍋內除了茄子及仿魚柳外, 還有三色椒及蔥條, 賣相討好! 魚柳切得大小均一, 吃下去很逼真, 應該是豆製的吧? 由於此菜式以 XO 醬製作, 非常惹味, 送飯一流!香草金沙雙蔬 – 雙蔬包括南瓜及芋頭, 外層舖著滿滿的咸蛋王一拼炸, 很香口。尤其是金沙南瓜超級好吃, 外層咸香, 內裡甜甜的, 且軟棉棉, 讚! 至於芋頭相對較失色, 因芋頭炸得偏硬身, 且沒南瓜般的甜味, 如果整碟都係南瓜就 VERY GOOD!招牌咕嚕肉 – 呢碟又係嘩嘩曬, 賣相靚過平時食個 D 咕嚕肉, 口感味道亦很相似, 重要係無骨, 太正了吧! 咕嚕肉應該係由猴頭菇製成? 傻傻的我分不清, 總之就是非常好吃的是了!荷香紅棗雲耳蒸猴頭菇 – 此菜是跟一個大蒸籠上的, 跟平時的紅棗雲耳蒸雞很相似, 只是用猴頭菇取代, 可惜味道過甜, 不論是吃菇, 抑或的紅棗雲耳, 都帶有很甜的味道, 吃 2 口已很膩。總結: 大部份的菜式都弄得精緻出色, 如果光吃不說, 真會想不到這餐竟是全素宴! 而且, 每樣餸菜份量也很足夠, 大家都吃得大滿足!…Read More

自從荃灣的刀削麵店出左名之後都好耐無黎食過喇, 因為每次經過也大排長龍, 而且坐得非常擠迫。不過今天和同事說起此店, 就一於來碰碰運氣啦! 幸運地, 我們一行 4 人中午時間來到, 不用等位便可入座了。店來的環境一般, 兩邊排著四方桌。這裡最出名就係刀削麵喇, 麻辣至啱我地口味, 於是點了 4 碗麻辣”麥麥”刀削麵啦。每款麻辣刀削麵(跟一餸) 配豆漿或熱飲, 承惠 $48。每款餸同麵係分開上嘅, 所以有四款麻辣餸可以 SHARE 食:麻辣豬耳 - 四款之中, 辣度最少, 豬耳切條夠爽口, 蒜蓉味偏重麻辣牛肉 – 上碟後發現原來係五香牛展黎, 牛展切薄片鹵得夠入味, 配上辣油及蒜蓉很惹味, 不錯!麻辣牛腩 – 牛腩比較韌, 食 1-2 小塊已經有點 UN 心 UN 肺麻辣燻蹄 – 麻辣配燻蹄是很匹配的組合, 涼拌夠開胃, 辣辣地味道很夾, 好吃!每款餸的份量挺多的, 可是麻辣醬分佈不均, 有些很多, 但豬耳卻只有少量麻辣醬在面。麻辣味不算正宗, 沒有花椒粒, 亦沒有麻得感覺, 似辣椒油加蒜頭粒(因為切得頗大粒的，蒜蓉或蒜泥較好)淋在面上, 吃前要先拌勻啊。不過味道尚算不錯, 如果喜歡重口味同埋蒜頭人士最啱食!至於刀削麵係全人手削嘅麵條, 大大碗夠飽肚, 麵條煮得煙韌, 每條麵需耐心咀嚼, 而湯底夠清甜, 有點似台式牛肉麵的湯頭。總結: 一進店已嗅到有陣怪味, 不知是否廁所傳出, 令我有點大打折扣。不過麵食夠大碗, 份量很足, 如果非常肚餓時前來吃就啱喇!…Read More

終於有機會吃到麻辣火鍋喇! 因為家人不嗜辣的原故, 平時無麥機會吃到麻辣火鍋, 今次可以約到嗜辣嘅朋友一齊黎食麻辣火鍋, 真好! 今次呢間渝味曉宇主打麻辣火鍋, 是我早已 Bookmark左但一直未有機會試的火鍋店! 其中一個賣點係九宮格麻辣大紅鍋, 不過其實 9 格都是同一辣度, 好似無麥意思咁, 所以, 我地揀左個鴛鴦火鍋。外圍係麻辣湯(普通辣), 核心內圍就揀左大骨滋補湯!(任選湯底, 位位$38)。開始打邊爐之前, 每位會承送一碗雪耳紅棗糖水, 糖水唔算好甜, 好滋潤呀! 不過留待慢慢飲, 用黎一陣解辣! 桌上每人有條即棄口水肩. 俾你穿住唔洗驚彈污 JOE 件衫, 盡情地食! 前菜有泡椒雞腳 ($10), 一份 4 件, 食落唔辣, 味道偏酸, 一般啦! 至於火鍋自選配菜方面選擇就不少, 全部都可選全份或半份, 由於我們得 3 女子, 所以大部份都係揀左半份, 咁就可以試到多些唔同的款式啦! 火鍋及配料很快就上到, 所以即使限食 2 小時是足夠的! 我們總共點左 15 款配菜, 當中有幾款值得推介嘅:極品鵝腸 (全份, $85), 很新鮮的鵝腸, 輕輕放入鍋中焯一焯便食得, 爽口好味!優質肥牛 (半份, $100), 半份得 4 片 ONLY, 牛肉係新鮮同靚嘅, 不過個人覺得唔太適合配麻辣火鍋羅! 有點浪費咁, 反而配中間的大骨滋補湯會更夾! 可是我落左去麻辣湯度, 完!手打四寶丸 (全份, $118), 一份 4 款共 8 粒, 憑視覺同味覺來定, 應該是墨魚丸, 牛丸, 鯪魚球同埋蝦丸, 全部手打新鮮, 好彈牙呀! 配麻辣湯都唔算好辣的, 只要小心唔好食到花椒就得喇!鮮鱔魚 (全份, $88), 好肥美, 味道似水煮鱔魚, 肉質好滑又無骨, 正!功夫萵荀片 (全份, $38), 每一片都非常薄, 不過排得好靚, 放在麻辣湯中稍燙一會, 便食得, 爽口好味! 不過建議食先落, 唔好淥太耐, 否則會過淋唔好吃。特色迷你燕餃 (半份, $35), 呢款都幾特別, 包得超級細粒, 但半份都有十零粒嘅! 出奇地超入味, 個皮好滑, 大推呢個燕餃。仲有必點血旺(全份, $45), 藕片 (全份, $30), 鮮木耳 (全份, $30), 呢幾樣都係麻辣最佳配友。 淥耐D 都唔怕, 愈耐愈入味, 辣得過癮。娃娃菜 (全份, $28), 呢個就放係中間個大骨滋補湯度, 好鮮甜的湯底, 有個大豬骨在中間, 仲有馬碲粟米, 放娃娃菜落去吸曬 D 湯嘅精華, 好好味!唯獨有幾樣試一次就夠:韭菜豬肉水餃 (半份, $30), 只有 4 小粒, 味道唔算特別, 可以 SKIP!脆皖魚腩 (半份, $45), 怕骨就唔好點喇, 只能說點錯了。曉宇嫩牛肉 (半份, $40), 上桌後想了好一會才意會到這份是嫩牛肉, 好似用好多生粉"拿"嘅牛肉, 卻吃不到牛味總結: 呢個價格雖然唔平, 但晚市都滿座嫁, 一半係遊客。所有配料都非常新鮮, 上菜速度亦很快, 值得一試…Read More

這家裝潢簡約, 招牌白底紅字的粉麵檔, 取名有口福美食店, 果然店如其名。食客有口福, 店內亦提供美食! 不過, 說實話, 要不是搵食爸在讀書時代常常光顧 (屈指一算, 十隻手指數唔曬), 並且極力推介, 我是絕不會刻意為碗粉而來。猶記得第一次是搵食爸推介而來, 第二次卻是因為回味該處的越南河而來。店內位置不大, 只有數張小圓桌, 卻坐無虛席, 前來吃的多數是附近的街坊或馬友(店內有電視, 且位於馬會旁邊, 遇上跑馬日這店會更興旺)。這店提供粉麵飯, 款式百搭。搵食爸必選特式越南河 ($35)而我選的是牛筋河, (+$7)配越南湯底 ($36)再加碟腐乳通菜 ($13) 及凍 ot($7)。特式越南河是”已設定”跟肥牛的, 每碗越南粉上必定附有生洋蔥絲, 辣椒碎, 炸蒜碎及一片新鮮檸檬, 而其他粉麵只需加 7 蚊, 就可以選越南湯底, 所以我選擇了牛筋河! 粉麵一到, 第一時間喝一口湯底, 是超好喝的, 非常濃郁的湯頭, 甜甜的, 帶有少少辣味, 會有一刻戀上的感覺 (買不起那個”一刻戀上”的樓宇, 可以平平地來這裡找同樣的感覺)。 每碗粉的份量足夠, 河粉滑溜, 越式湯底配河粉簡直無得輸! 吃前可先篤幾下檸檬片, 提升整個湯底的精華, 每吃一口河粉也要連湯一併吃, 更滋味! 肥牛燙得半生熟, 吃時不會鞋口, 牛筋炆得軟淋, 雖然是這樣, 但也搶不到湯底的風頭! 這家算是我目前吃過最好吃的越南河! 至於碟腐乳通菜也值得一提, 通菜上的腐乳應是自家調配的, 帶有少少甜味, 讚讚! 總結: 這裡地理位置麻麻, 位於石籬一處, 店內環境亦很峽窄, 坐得不舒服的! 怎會想到這家貌似普通粉麵檔內隱藏著煮越式粉麵高手!…Read More

難得假日可以訓到自然醒, 就揾個地方嘆個靚茶啦! 因為帶住揾食 B 出動, 所以要揾個坐得舒服又唔洗等位嘅茶樓, 靈機一觸就黎到明星海鮮舫喇! 由於位置比較格薛, 即使假日人流也不算很多。這座樓高 3 層, 外型像一艘巨型船隻的中式茶樓, 裝修典雅。這裡假日也有下午茶優惠 (2 點後入座), 我們到達時剛好過了 2 點, 不用等候便可安排入座, 感覺不錯!這裡的點心款式頗多, 價格亦不貴, 我們共點選了 9 款點心及粉麵等。這次咸甜點心各佔一半, 首先上的是陳皮紅豆沙 ($9.8), 雖然次序好像倒轉了, 不過不緊要, 先吃甜也不錯丫, 心情好一半先! 很喜歡紅豆沙煮得夠沙, 紅豆夠腍, 甜度適中, 亦帶有陳皮香, 不錯的呢!之後再上的也是甜點 - 炸紫薯地瓜丸 ($22.8), 這個紫薯波波超! 好! 吃! 一客 4 粒, 剛好我們夠分每人一粒, 新鮮炸起, 外形圓碌碌金黃色, 雖然是炸物, 但吃下去一點也不油膩, 甜而不漏! 咬開中間是紫薯夾心, 超讚! 這款將會是今後必點之一!同時, 燒肉瀨粉 ($20.8)也到了, 以這個價格來說很抵食, 一碗共有 7 塊燒肉, 瀨粉也滿滿一碗。燒肉略嫌乾身了一點, 配上芥末醬, 味道不過不失。下一道點心是我選的 - 藥膳豬手 ($17.8), 一打開點心籠已嗅到很濃厚的藥材味道, 先襯熱喝一啖湯頭, 非常清甜, 吃上來藥材的味道比起嗅覺上沒有那麼重, 感覺上無咁燥底 >V< 豬手共有 4 件, 每件的皮和肉都算多, 豬手底下應該是娃娃菜吧, 吸滿湯汁 , 這個點心超級推介!接著的是 - 原籠馬拉糕 ($15.8), 第一下感覺是真的跟其他地方很不同, 人地一籠一件, 呢度一籠整整 6 大件, 新鮮蒸出來, 咬落鬆軟, 超抵食!粉麵類我地就揀左 - 上湯龍蝦伊麵 ($138), 賣相不錯, 龍蝦都幾大隻嫁, 無偷工減料, 原隻俾你的! 龍蝦肉質厚實彈牙, 蝦鉗大大隻, 幫你爆開埋方便食, 伊麵軟硬度適中, 味道不錯!之後再上一個五星拼盤 (養顏紅棗糕; 叉燒包; 蟹子燒賣; 潮州粉果; 鮮蝦菜苗餃) ($18.8), 份量唔孤寒, 當中的紅棗糕唔太甜, 菜苗餃燒賣粉果大大件, 雖然未至於皮薄, 但內涵都唔錯, 廿蚊唔洗超值!三星燒賣 ($15.8), 因為淨知道三叔 (SAMSUNG), 好奇想知三星係咩冬冬, 所以就點左呢個喇! 原來係冬菇, 明門卷同鵪春蛋燒賣, 味道大同小異, 浮誇嘅評語就唔多講喇! 但係新鮮蒸出嘅, 又無單一款式燒賣咁單調, 可以一試!最後, 我地加單點多個甜品 - 冰室紅豆糕 ($22.8), 同紅豆沙黎個首尾呼應作結。一客 3 件, 白色上層應該是椰汁紅豆糕? 而下半截啡色的似係朱古力紅豆糕, 整體不算太甜, 幾好食嘅! 總結, 第一次來這麼光顧下午茶, 以假日來說是非常抵吃! 食品款式繁多, 點心製作出色, 將會列為假日蒲點之一! 不過後來才發現, 重覆多收了一客點心錢, 雖然銀碼不大, 希望只係無心之失!…Read More

呢晚黎到尖沙咀, 心血來潮想食米線, 就黎左星林居喇。提到旅客來港必吃之選的米線, 除左十億個間外, 呢間係旅遊名單中都有一席, 皆因選址便利, 處於遊客區 – 尖沙咀。隔左一段時間沒光顧, 是次再來, 夾在左右兩旁的都是韓國旅客, 不過看他們吃了3 數啖便埋單走人, 好似唔多啱佢地口味咁喎! 好喇, 我地都自己揀番碗小鍋米線醫肚先。我個碗係雙豬 (豬紅+豬大腸)米線 ($44 小中辣), 而搵食爸個碗係懶肉羅白米線($41 小小辣), 加多罐可樂 ($7)約 10 分鐘左右, 雙豬米線到喇, 芽菜墊底的米線少得可憐, 湯底酸辣度適中,豬紅無特別, 跟一般無異, 豬大腸唔算肥, 應該有 4 小塊吧?! 至於懶肉羅白米線, 薄切豬腩肉片, 好難唔入味, 幸好羅白尚算清甜無渣, 搵食爸 3 分鐘 KO 成碗了。總括來說, 味道方面跟其他雲南風味的米線無異, 但分量少得可憐。當中小插曲, 食到中段的時候, 聽到旁邊有一枱的女食客向侍應追問漏餸一事, 卻俾該侍應粗聲回應。其實, 客人前來光顧, 基本禮貌是需要的, 俾漏左餸咪補番俾人羅, 咁惡又何必呢? …Read More

當無辣不歡遇上唔嗜辣的另一半, 最佳方法是培養對方吃辣的興趣。嗜辣的我周不時會搜羅一下辣味美食, 而麻辣王是我其中一間口痕必選。這間座落於佐敦白加士街的小店, 唔起眼唔難揾, 行出地鐵站步行數分鐘便到達, 由於店面很小, 每天只有 1 至 2 位呀姐看店。企街即食嘅, 我會揀佢個麻辣魚蛋 ($12@5 粒), 店舖的右邊放著紅噹噹的一鍋魚蛋, 於是點了一串試試它的龍與鳳, 魚粒大大粒, 夠爽牙! 每一粒都充滿花椒的麻香味, 又唔會一味死辣, 加上辣度不算高, 好吃! 然後再行去左邊看看有咩食, 抬頭一看餐牌, 麻辣/泡椒小食劃一$26 一份, 我本身很喜歡泡椒的味道和那種漸辣感, 易入口, 令人不自覺愈吃愈多, 嘴唇愈吃愈紅。豬手, 雞翼, 雞翼尖, 雞腳, 雞腳頭等等都試過, 每次必安哥的一定係雞翼尖同埋雞腳頭, 因為面積比起豬腳同雞翼等細件, 泡椒味覆蓋更全面! 店員姐姐會用密實袋連同泡椒裝起, 回到家也不會漏半點汁出來!雞翼尖 / 雞腳頭 ($26@每份): 沒有仔細數過, 每款約十多件左右。兩款都醃得很入味, 一開始吃頭幾只的時候不算很辣, 但吃到後段會變左孖潤腸嘴。原本唔吃辣的搵食爸也會忍不住口吃埋一份。每隔一段時間都會心掛掛, 專登搭車出去買黎食!總括: 味道不錯, 喜愛辣小食的朋友可以一試, 會食上癮嫁! 但近年加價幅度頗大, 如果份量相應增加一點會更好呢! …Read More

黎到大角咀, 今次揀左老掌櫃東北菜館, 目的係想食下辣野, 刺激味蕾! 當天是 HAPPY FRIDAY, 7 點鐘去到已見門外排著十數人, 店內座無虛席。幸好朋友早已訂枱, 所以不用等位便可即時安排入座! 店內的空間不大, 大家都坐得比較 CLOSE, 想靜靜地邊吃邊聊天就難 D 喇! 不過要填飽你個肚就一定無問題! 餐牌上的食品款式繁多, 我們 4 位女子一時興起共點了 9 道菜式, 好像有點誇張!首先上的是北京填鴨 ($158 半隻), 想食呢道菜必須要在訂枱時說明, 鴨肉嫩滑而不油膩, 每一片鴨都有薄薄的皮連肉, 配上蔥絲, 青瓜條, 再沾上填鴨醬, 將暖暖的餅皮包裹一併吃, 讚! 每道北京填鴨可選一鴨兩食, 鴨身另加$50 可多一道茄子/洋蔥炒鴨! 我們選了茄子炒鴨, 鴨肉炒得肉嫩且惹味, 配白飯一絕!之後上酸辣湯 ($52), 由於桌上位置不多, 我們立即分到碗子裡, 剛好分到 4 碗滿滿的。入口酸辣適中, 很開胃, 不消一會便喝光 (因為要快點清空碗子, 才能吃其他菜式)水煮牛肉 ($98), 色澤紅噹噹很大的一窩,窩面上舖滿乾辣椒及蒜蓉, 牛肉份量很多, 肉質夠嫩且容易咬開, 略嫌味道偏咸, 辣味不重。窩底配有粉皮, 少少麻辣味,吃下去卻沒有牛肉般咸, 喧賓奪主的粉皮, 勝!下一道是青瓜粉皮 ($48), 故名思義是青瓜加粉皮, 配上已拌好的麻醬, 仿似吃緊雞絲粉皮, 但配搭起青瓜取代雞絲, 味道更清新, 不錯!另一道涼拌前菜是麻辣海蜇頭 ($64), 除了海蜇頭外, 還有青瓜跟雲耳, 灑上芝麻在面。麻辣道不重, 即使不吃辣人士也能吃得到。由於兩道前菜均有青瓜在內, 加上涼拌而味又不濃, 兩者分別在於辣與不辣, 個人認為二擇其一便可!左右兩枱都有點選口水雞 ($68), 見賣相不錯, 我們也點了一客試試看! 雞件排得很工整且大大碟, 份量比起其他食店的多一半, 雞件底下舖上青瓜絲, 醬汁的辣味香, 雞件啖啖肉而不鞋, 非常惹味! 推介! 蔬菜方面, 我們選了清炒萵荀 ($68), 基本上每次看到餐廳上有這道菜式都會必點, 爽口無渣, 好吃!最後, 甜品選了拔絲蘋果 ($68), 由於要襯熱快手倒進凍水中過冷河, 所以相都來不及影了! 一客約有 6-7 件, 外層脆皮的麥芽中和了蘋果的酸, 用作飯後甜品, 解膩一流, 好吃!總括: 每道菜式都上菜快而準確, 份量很多, 適合三五知己來刷餐飽！…Read More

【肥媽屋】– 故名思義有個肥媽坐陣, 每天負責密密地煮麵, 忙個不停。每位前來的食客, 都會自動波到檔前落單, 餸款由$3 - $14 蚊不等, 最低消費$15。嗌完要咩麵同俾錢之後, 就自己揾個位坐定定係度等食!呢度多數人揀撈麵, 跟大隊包無衰。今次我揀左 3 個餸, 咖喱魚蛋豬紅魷魚撈粗( $21) 加支細可樂($6)。今時今日三十蚊唔洗就醫飽你個肚 WO, 邊度揾?呢度無冷氣, 無卡位, 無挨 PAN 椅, 卻偏偏有種懷舊的風味, 吸引一群忠實食客支持。等了數分鐘, 哥哥仔就拎碗麵過黎, 正確 D 講, 係一個兜! 即係廿幾年前仲有街邊小販時代, 企住食豬腸粉個 D兜。每碗麵有會醒多條靚菜俾你, 靚相就唔錯喇, 好似幾好食咁! 我個碗係咖哩汁, 咖哩味唔濃亦唔辣, 如果辣番 D 仲好! 咖哩魚蛋($4)有 4 粒, 唔細粒嫁, $1 粒魚蛋唔細粒嫁, 無咩要求, 但每次會必叫! 豬紅($3) 雖然係懷舊嘅價錢, 但一 D 都唔孤寒, 有成 4-5 舊嫁! 魷魚 ($10) 相對地貴 D, 但係淥得夠爽口彈牙, 魷魚剪開一條條, 好方便食! 加多$6 有支冰凍 GE 細可樂, 夏日炎炎最佳拍擋!總括: 食完個 3 餸麵, 對於女士來說係夠嘅, 未至於好飽。男士就可以叫加麵底, 都只不過$4 起。此車仔檔開放時間由上午 11 點至下午 5 點正, 假日不開檔。所以星期 6 的下午時間是最旺場, 即使位於舊街市之上, 也會排著一條人龍。如果想前來一睹肥媽風采, 記得注意時間啊！…Read More

呢間以“相機食先”為題的白宮咖啡室, 今天就黎朝聖一下先, 位置方面比較格攝, 兩邊街道以車房居多, 平日附近人流唔算特別多。但午市時間都吸引不少辦公族人士前來進餐。咖啡室樓高 2 層, 下層的座位不多, 只有十零個座位, 牆身以白色磚塊疊拼而成, 加上簡約裝飾, 算貼主題。午餐有意粉, 牛扒, ALL DAY BREAKFAST 等, 而吸睛之處應該是餐牌上唔同 pattern的咖啡吧! 每份午餐奉送飲品 (水果味紅/綠茶式伯爵奶茶), 而即磨咖啡卻需加$10, 附加 10 蚊來說並不算便宜, 但又很期待自己的飲料是什麼圖案。我點了一份海膽三文魚籽明太子意粉 ($65) 配熱 Mocha (+$10); 朋友點了一份白汁蘑菇煙三文魚意粉 ($60) 配熱 Mocha (+$10)飲品先上, 果然不令人失望, 賣相好得, 起碼加呢 10 蚊都係俾得值嘅! 就算相機食完, 自已都唔捨得咁快喝掉, 因為好靚呀。雖然兩杯都係熱 Mocha, 但唔同pattern 嫁, 姆明同埋 PC dog。味道方面, 不過不失, 同平時飲的味道差不多, 易入口, 叫呢杯咖啡主要都係因為 – 靚!等左約十零分鐘, 上意粉喇 - 海膽三文魚籽明太子意粉, 賣相又係靚嘅! 果然係要相機食先! 看得出意粉是用心製作, 起碼海膽同三文魚籽我係揾到的, 唔似有一些食店, 食物名稱同賣相是兩回事。意粉軟硬度適中, 很 creamy, 明太子狂的我略嫌少了些, 如多些明太子就好啦。很喜歡意粉面上灑上木魚碎, 增加口感, 由於此意粉奶油味很重, 配上海膽一起吃, 頭幾口是好吃的, 吃到中後段已很膩。女生來說, 未必吃得清整碟意粉。朋友點的白汁蘑菇煙三文魚意粉, 三文魚砌成一朵花般, 底下的意粉其實跟我點的那一款差不多, 只是沒有明太子而已, 味道亦淡口一些。同樣是非常 creamy, 所以很快便吃膩了。總括: 一邊吃著, 一邊留意著侍應出餐的菜式, 每款都弄得很精緻用心。如兩位女生前來吃的話, 建議可選一款牛扒加一碟意粉分吃, 這樣便不會那麼容易吃膩呢! 會再安哥…Read More

今年同揾食爸慶祝第一個父親節, 揀左佢最愛嘅海鮮為主題的餐廳。之前睇飲食節目介紹過, 已經好心動想一試, 咁就心動不如行動啦! 聽說呢度經常人山人海, 為左唔洗等又有得食原故, 我地訂左星期6的中午時分, 果真不用等位呢! (其實是外面下著大雨, 原本想縮沙下次再試, 但由於早幾天已訂了枱, 就豁出去啦。)注意! 黎到呢度唔好諗住顧儀態, 如果初次約會, 或跟心儀的異性黎進餐, 真係唔多適合, 除非你想表演淨用刀叉脫殼啦! 一坐低, 2話不說叫個必點嘅SHAKE SHAKE 海鮮包, 有8款海鮮任選3 ($398), 5 ($498), 8 ($698)款, 我地4個人就揀左5款個個海鮮包, 本身心目中已選定了5款的海鮮,點知是日無蝦, 無蜆, 結果我地OUT左青口, 就有餘下5款海鮮: 小龍蝦, 8爪魚仔, 扇貝, 翡翠螺同埋長腳蟹。3款Sauce中就點選了風味龍蝦油。等候美食期間, 可先穿上放在桌上印有龍蝦LOGO的(口水肩), 約十零分鐘便有野食了。侍應很主動幫我們拍照, 還詢問需否點配一客蒜蓉包配吃, 然後輕搖數下海鮮包便打開裝滿海鮮的藍膠袋, 一打開個網袋, 熱氣湧出, 香味撲鼻, 開動嚕。每款海鮮約有4-5件左右, 還附有粟米, 肉腸及薯仔配菜, 份量OK。必選一定是長腳蟹, 鮮甜肉厚, 配上特製SAUCE, YUMMY! 8爪魚仔的SIZE也不細, 彈牙好吃。再推介的是翡翠螺, 一D都唔硬又無沙, 廚師還很貼心在每夥的外殼上叩穿了一小洞, 食客很容易便可以挑出螺肉, 讚! 扇貝及小龍蝦味道也不差, 醬汁是靈魂, 只要海鮮是新鮮的, 也不會點樣差呢!另外, 我地仲點左船長炸海鮮摩天輪 ($288), 呢個又係呃LIKE之選, 大大座摩天輪奉上, 食前拍照是常識吧! 一座摩天輪上載有6款炸物 (爆谷蝦, 炸廣島蠔, 蟹肉薯丸, 炸魷魚圈, 炸魚手指, 薯條同沙律), 鐘意食香口熱氣野嘅人士啱曬, 而我正係呢類人, 所以好LIKE! 全部炸物新鮮炸起, 附有茄汁,沙律醬等3款醬料可供沾吃, 個人認為最出色係蟹肉薯丸, 真係食到蟹肉, 而唔係淨成口薯, 廣島蠔外層炸得鬆脆, 內裡個蠔脹BOOK BOOK, 好吃! 其他炸物味道都好吃, 但要襯熱食!最後還點算了一個扒海鮮意大利飯 ($168), 賣相一流, 但味道就見人見智。飯面上有一隻大虎蝦, 大大隻肉爽彈牙, 3隻大青口, 我地放左落海鮮包沾醬吃, 味道更佳, 配2件魷魚圈, 沒特別。但飯身偏硬, 好濃的香草味, 但這種味吃落去, 我個人覺得有點似檸檬洗潔精味, 不太喜歡。總括來說, 來這裡必點招牌菜式- 海鮮包, 有得睇又有得食。值得一讚的是侍應會主動REFILL 水, 及清理裝滿海鮮殼的盤子, 加上當日下大雨, 抵達後店員主動安排收起濕搭搭的傘, 臨走時店員係記得哪一把遮屬於哪位客人, 夠細心。環境乾淨整潔, 坐得舒適, 唯一美中不足的是沒有附上手套, 如果有就更完美啦!…Read More