之前經過璟瓏樓一次，知道呢間酒樓比海景包圍，景觀好正。今日就同屋企人一齊去飲茶。我地14:30左右到，酒樓大概兩成枱坐滿。因為窗口位都俾人坐晒，所以職員安排咗我哋坐其他位。我哋坐低咗2分鐘，就見到窗口位有人埋單，所以要求想轉過去。職員好愕然，支支吾吾，然後問完同事就安排左。我地叫左幾籠點心。望住個海景食嘢真係幾舒服。金湯金魚餃 $88賣相非常吸引和精緻。食落普通。個皮好厚，入面係蝦餃餡，個金湯係南瓜汁。呢款點心係熱賣推薦之一，嚟到都值得試吓。鮮人蔘湯蝦餃$28 見佢有個優惠價就叫黎試下。其實個餃都係一粒蝦餃，無咩特別。但個湯有驚喜，真係有人心嘅甘甜👍🏻性價比唔錯，推薦～ 紫薯天鵝酥$68黑天鵝外表已經好靚。個酥都做得好出色，入口唔油膩，而且係層層分明，非常鬆化。入面嘅紫薯係天然嘅紫薯甜味，冇加糖嘅死甜。呢個係非常推薦。（但係個天鵝頭應該係食唔到😂好硬，咬唔開）芹香蘿蔔絲酥 $68個酥都係做得非常之出色，層層分明，非常鬆化。擺盤都係好精緻。金絲鰻魚燒賣$88就係普通燒賣上面加咗一舊鰻魚，不過不失～A4和牛生煎包 $78其實就係普通生煎包。食唔出係和牛😂最特別係成個煎pan再加埋啲洋蔥上。香芒金露 $58係一個比較杰同無西柚嘅楊枝甘露，味道都唔錯～ 相思鮮奶凍（雙皮奶）$58雙皮奶上面係一啲類似爆珠嘅粒粒。呢啲粒粒入面都包住咗一粒紅豆，幾特別。雙皮奶有啲甜，但入口都係幾滑。講多少少服務質素，因為呢間酒樓都唔算平，本身預佢會有少少嘅服務質素。呢度雖然唔多客人，但職員嘅人手好少，要叫人過黎其實都唔太容易。而且，侍應每次上菜後，唔係同你講菜名，而叫你：「趁熱食」。我個人感覺有啲啲煩，內心OS:「我咪已經食緊囉。」🙂成餐飯都無咩服務質素可言。最後兩個人食咗$704。總括黎講，環境、擺盤係不錯。但食物質素和服務同呢個價錢就有啲距離。問心嗰句，個景幾靚，但試一次就可以，應該未必會再食多次～…Read More
