Jayson L's Profile

呢間懷舊既咖啡餅店就係上堂地方既樓下，上課前就路過買左個旦撻試下，應是出爐不久，還是暖暖的~ 小小一個既旦撻$6，外表十分吸引，酥皮一層層清晰可見，中間旦槳金黃有光澤;味道方面，酥皮鬆化，有牛油香，正!!但中間既蛋就相對失色一點，雖然尚算滑溜，但就蛋香一般，主要只食到甜味~總括是屬一般~ 下次或者試下其他西餅，飯類~呢類冰室茶餐廳真係少下一間，少下又一間!!!!!…Read More

住係深水埗或者係黃金電腦商場附近返工既人，應該無人唔識呢間上海萬家村小廚既抵食下午茶餐吧~有幾抵?! 2個生煎，加大碗面 & 飲品(豆漿 or 熱飲，凍飲加$2)，只係$24，如果要炒類則$28起，面基本可自由搭配，選一味餸，排骨，回鍋肉，燻魚，水餃，牛肉等等 / 拉面，担担面，上海面，担担拉面任你揀!! 呢個年代，$24一碗面都已經唔過份啦，淨一個上海炒粗都收你最少$40啦， 所以佢真係平到無晒朋友架啦~今日下午無食lunch就係等到兩點黎呢度食 tea，整完隻手錶行過去，去到約兩點半，今日竟然唔洗等位，平時下午茶時間通常都要攞飛等架，可能同落雨有關吧!!今日落order竟然等左十分鐘，因樓面只有一個新來不懂落單既姐姐，收銀有一個忙緊，我無所謂唔趕時間，但有兩個做銀行既人則好心急了，之後是收銀個個姐姐黎落單!!今日食回鍋肉担担拉面，先黎左生煎包，其實佢既生煎包每次都係好好食，因為流量快，所以都係新鮮熱辣辣既，豬肉嫰滑有肉香，包質感軟熟，底部煎得香脆，點會唔好食先得架~其實食佢6,7個，絕不成問題，巧巧食的，有時會油少少，但今日就無!!等多陣碗面就黎左了，担担面湯底偏向傑身，有陣陣花生香味，咸度适中，很不錯的;而面本身也軟硬适中，口感佳，真係一口接一口雪雪聲放入口裏，正;回鍋肉則分碟上，份量不算多，但以湯面黎講，已經是不少了~此回鍋肉很冶味，夠鍋氣，椰菜爽脆，薄薄既五花腩肥瘦度剛好，汁液濃郁，正是上海菜既濃油赤醬，岩晒我既口味!!!食完面都忍唔住飲多幾啖湯至罷休~凍檸茶好遲先送上，一般甘啦!!其實呢個下午茶係我食過最抵食之一既餐，平價之餘仲要質素keep到係好，味道正中，份量足，真係難得，唔怪得下午茶同晚市都經常要排隊;甘當然，成日話，喂，甘平，唔好要求甘多啦，講明先，我無要求呀，我收貨有餘了，因為自己食開，知道晒個駕部，對街坊熟客黎講係無問題，但對於街外生客來說呢，我就覺得有啲野有改善空間既，以今次為例，其實只7成滿，而大部分人都在進食，只有兩枱客人要落單，但也要等十分鐘，或者有人放假 or 行開左吧，但當時水吧驟眼看好似有員工閒着~之後黎既客就無等甘耐!!但我還是覺得人手安排好一點或員工補位好一點，甘就唔洗客人等太耐，我亦都唔介意佢加價一兩蚊，老闆可以俾多少少員工令佢地有點微笑，哈~…Read More

呢日女友放工同佢一齊食lunch，天氣實在熱得過份，於是便想搵個冷氣強勁，坐得舒服，人不會太多既地方食!!烈日當空，但連行去西九龍中心既五分鐘路程都覺得遠，所以就黎呢間開店幾年但只食過一次既餐廳食，因為印象呢度係坐得幾舒服的!!!一入到去，6成滿，冷氣夠勁，坐4人枱，真係無黎錯~佢下午約有10款set lunch，價錢約$50~$70，有埋餐湯，甜品同餐飲~凍飲加$2!!星期六日，公眾假期先要加一!!由於人唔太多，所以我地坐左15mins.抖下先落單都唔會覺得唔好意思，研究了一會就決定食意粉，叫左三文魚蘑菇意粉 & Carbonara，雜菜湯蘑菇湯各一，凍檸茶熱檸水!!首先餐湯，雜菜湯看落好足料，但味道是偏淡的，像是賣到唔夠賣然後加水再煮既感覺;而蘑菇湯則有驚喜，不算很濃郁，但有挺香蘑菇味，也不會很鹹，對比雜菜湯是好多了~三文魚蘑菇意粉 & Carbonara，其實兩個外觀都係差唔多既，份量都唔少!!!首先三文魚蘑菇意粉，煙三文魚既味道令整碟意粉都有一點點煙燻味，挺特別的;另外除蘑菇外還用了新鮮冬菇，食到菇菌香，而汁也收得剛好，不過整體對於喜歡濃味既我來說是偏淡一點!!!另外的Carbonara其實同三文魚那個差不多，只是醬汁不同，三文魚換了煙肉，味道相對比較濃郁，但不會很咸，未至於十分好，但這樣的價錢已算不錯了!!!甜品，是一小粒泡乎，內裏是朱古力mousse，一般般，不難食甘啦!!而凍檸茶，挺好，檸檬新鮮，甜度适中，解渴!!!呢餐飯食得滿足，價錢便宜，坐得舒服，食物不錯，服務合格，食前慢慢傾偈，食後又不用趕住走繼續涼冷氣，如不是有事要做真會多坐一會呢!!有時我會在想，怎樣食一頓飯先算叫做滿意呢，對於我來說，高級餐廳很少去，但在那些場合，一定得到滿足感嗎?!!食物品質當然重要，但太高級既地方，極度好既服務，我其實更不自在，哈~~~當然每個人準則都不同，但很普通的，簡單的，也可以很滿足~…Read More

係又一城睇戲，由於未夠鐘開場，所以過旁邊既habitu食個下午茶先!!!分別選擇左egg benedict，意粉同咖啡!!! 首先到既係egg benedict，我地要左The Tsar's Choice @with smoked salmon and dill,served with a spoonful of caviar，上桌時已覺很吸引，煙三文魚很新鮮，軟滑帶點油脂，如果不新增鮮便沒有這種質感，魚味濃郁，十分好吃;黑魚子份量雖少但它的咸香鮮味足以提升整體味道，當然多點會更好啦;主角雞蛋煮既時間剛好，蛋黃流心，味道很不錯的，有蛋香，只是蛋白煮時可能控制不夠好而令其外觀有點不完整;羅馬生菜也新鮮爽脆;Holland sauce 調味沒有太濃，不會搶去其他材料味道;底下的muffin其實都是一般食開的muffin，比較軟身，不會太乾和硬，與以上新鮮食材同吃，當然好食;而配菜則有沙律菜和炒薯粒，也都好吃!!總括這道菜，鹹鮮香脆軟習於一身，正!!!Spaghetti Carbonara，意粉中至愛就是carbonara了，這個carbonara合晒我既心意，因為味道夠晒濃!!! 開頭以為份量少，但只因卷埋左，整返開就多一點，算適中啦，不至於多;蛋黃汁香濃，比較傑身，但汁液剛好沾到每條意粉上，令到每一口都充滿滿足感;另外蘑菇，煙肉和香草也令此意粉之味道更加丰富;意粉本身質感不算al dente，但我自己其實是喜歡較al dente軟一點的，故這個我覺得不錯的;而最頂加了點Parmesan cheese更是錦上添花，相信這也是令意粉味道更濃郁的一個重要原素~喜歡carbonara既朋友不要錯過這個噢!!!Rose Latte，呢杯咖啡可說是這裏招牌飲品之一，其實真的不錯，奶泡打得綿滑細緻，咖啡味中有着淡淡玖瑰花香，互相襯托着，像是誰也沒有搶去誰的風頭一樣，加上精美既拉花，和杯上一點乾玖瑰花瓣點綴下，這杯latte就像明星一樣!!其實有時候在連鎖店喝咖啡是講緣份的，遇到好既咖啡師，便是有緣，相反，也就是無緣了~…Read More

係yahoo見到有團購，蠔皇飽魚自助餐，$199一位，睇相真係誇啦啦，我都知相係信唔過，但無諗到會甘差囉，總之就是有點失望!!海鮮類有熟蝦，海螺，蟹腳，青口，前兩種無食到，而蟹腳，青口都不算新鮮，梅梅地;也有壽司卷物，但我沒有食，因外觀已扣分了;沙律頭盤一般，有沙律菜，車厘茄，涼拌木耳，蓮藕，海藻，牛展等，係有個冷面加半熟旦几好;熱葷，主要有一雜錦鍋，料有青口，义燒，豬皮等，飽魚就唔覺有，另有羊架算不錯，是嫰沒嚡十十，不蘇，而西班牙海鮮飯，燒雞，時蔬等只算中奄規中矩，其他的已經無咩印象了;甜品，梳乎厘可以，有一點過甜，每次只用光波爐整約8個，好快俾人攞晒要再等十分鐘，cheese cake 甘common既野都無，bread pudding味道不錯，係質感怪怪，也有兩三款不太吸引既旦糕，其他只記得有啫喱糖，菠蘿，西瓜，都是沒什麼味既，所以真係dryer's最好食架啦，menu有既好多都係無，有既得三分一;係開頭既三文魚剌身算新鮮，之後食就麻麻!!!汽水任飲，但好淡!!仲有佢主題係蠔同飽魚麻，但就只有蠔少粉多既蠔餅，唔好食，無燒蠔，飽魚就只有飽魚雞粥，但裏面係無飽魚架，味道也是偏淡的!!!!!!!!!!我對食物不嬲要求不高，亦都無預佢質素會很好，可惜這真是水準之下的晚餐!!!加上山長水遠，相信短期內不會再來，除非它的質素有改善吧!!!…Read More

又係深水埗搵飯食，好耐無黎呢度食，由於去地鐵站會路過，就來食下吧!!!之前無食過佢地既飯餐，所以今次試下蒸魚餐，西洋菜餃面同齋腸!!!蒸魚飯餐包括梅菜蒸鯇魚，油菜，汽水or豆漿o魚湯，魚很新鮮，配合梅菜同豉油，很好下飯;飯好大碗，講真，呢個餐兩個女仔夠食有餘;蠔油生菜很脆綠，份量不少，不賴!!而魚湯是有魚味，沒有味精，但偏清淡，當然我寧要清淡不要味精!! P.S.原來碟魚唔記得影相!!腸粉，呢個麻麻，質感粗糙不滑溜，沒什米香，份量是很多，但不推介!!!西洋菜餃面，餃子很出色，十分飽滿，材料主要是西洋菜同少少豬肉，食一口，滿口西洋菜味道，正呀!!但上海面則很差，口感偏淋，無味，湯底說是魚湯，但感覺比之前那碗更淡，下次還是光食餃好了!!!走時於門口見到生餃子一打才$20，買回家當一餐飯食都好呀!!!揾日揾日 ~~~~~~~…Read More

位於鴨寮街既呢間面店不嬲區內都有點人氣，我是指本區好多街坊都係熟客仔!!呢日又來食個lunch先~由於過左食晏時間，人唔係甘多，梗好啦，無甘迫!! 分別叫左水餃伊面$20 + $3 ，鯪魚球面$25 & 蝦米腸$10~水餃有4隻，但奇怪地有一隻特別細隻，材料有雲耳，蝦同菜，蝦唔似鮮蝦，不彈牙，雲耳則令其增加了口感，整體其實沒什麼味道~而伊面則和一般食開既沒兩樣，有點未煮透!!!鯪魚球就細細粒，一般彈牙甘啦，食到少少果皮味，面則彈牙沒有梘水味，整體不算差!!!!蝦米腸份量算多，抵食，滑溜有米香，而大量蝦米仔增加了咸香，配合蔥花，麻醬，甜醬，十分好食!!!!下次要試下煲仔飯先!!!…Read More

之前都知有呢間拉麵店既存在，但就係諗開係food court質素未必會好，而且價錢都差唔多係全場最貴既食物，雖然食拉麵黎講，$60以下已算平，但一直都無試!!今日去開西九龍中心，所以就黎試一試呢間主打雞湯既拉麵店!!我地去到時就睇下貼出來既menu有咩食啦，此時，老細竟然有禮貌地遞上一人一小杯雞湯給我們試喝，不算十分濃，但雞味十足，甘我地當然幫襯啦!!! 分別叫左蕃茄雞白湯拉麵，香黑辛雞白湯拉麵!! 老闆應該是日本人，識講中文，但未至流利，落單時可能同佢講數字好啲，佢menu每種拉麵都寫晒 no.!!間鋪得佢一個人，落完單佢就擰轉頭去煮麵，等左大約十分鐘，有得食了，還咐上一杯玄米茶!!蕃茄雞白湯拉麵$59看外表很對牌的，和出面$80，$90一碗的沒兩樣呢，三大片雞肉，半隻糖心蛋，有片大紫菜，加上蕃茄，芽菜，椰菜，大蒜絲和蔥花;先喝一口湯底，偏油，蕃茄味不算濃郁，我反而覺得它把雞湯既鮮味蓋過了;雞片是以雞肉札成卷型再厚切成片狀，應是用上雞不同部位和一點雞皮，口感有嫩有嚡，是帶點雞味，但我覺得偏乾身了點，調味也未見特別，一般而已!!糖心蛋則只是邊位的蛋黃過熟了點，但中心部份仍有蛋汁，整體入味有蛋香，不俗!!拉麵本身挺出色的，粗幼適中，很彈牙!!而大蒜絲，蔥花，和一些白芝麻也起了提味作用，令每口拉麵吃入口時香味更豐富!!而另外一些紅色切成絲的東西令外觀加分，但不知是什麼，也沒有味道!!香黑辛雞白湯拉麵$58其實此麵與上面的蕃茄雞白湯拉麵分別只在於蕃茄換上了約兩湯匙的黑蒜油，其餘是一樣的;取餐時，老闆叫要把黑油攪混才吃，蒜味不太重，是有增加香味，但與蕃茄拉麵一樣感覺就是把雞湯鮮味蓋過了，也令湯底變得更油!!綜合兩碗面，這個價錢是合格的，但我會建議只要清雞湯，因鮮味很不錯，而雞件則是一般，或許有機會可試义燒，豬軟骨等!!! 另外，雖然是food court，但用餐後需把碗拿回給店面，因為他用的是自家碗，不是一般店用既即棄膠或發泡膠餐具!!! 我當然會再來，全因是老闆的用心，從招呼客人，落單，煮面，洗碗也一人包辦，他彷彿就是默默一人在努力，要用心為客人煮出美食來!!我也衷心希望他能早日成功，沖出food court!!!，奸爸爹!!…Read More

呢間泰國餐廳好耐無食了，以前第一次係營盤街(而家都仲有做生意)食既時候真係一食愛上，難忘以往$48有十七隻生蝦刺身，超彈牙蝦餅，故間中也有幫襯，但開左分店感覺好似差左少少，很久沒來了。Anyway，女朋友突然話好想食泰國野，近近地就呢度啦。閒日七點到黎到，比以前少左甘多人既，只有兩枱客，我地兩個人都可坐6人既卡位，夠晒濶落。我好肚餓，所以叫左5樣野:冬蔭公湯M size$50，呢個湯真夠蔭公，味濃且偏辣，酸味很開胃，還有草菇和不少爽口彈牙既蝦，加上面頭芫茜令其味道更有層次，每人分到三碗仔，好飲!!青木瓜沙律$35，呢個每次都會叫，材料有木瓜絲，紅蘿蔔絲，生菜蕃茄，連皮既蒜頭同一點花生碎，基本上都新鮮清爽，一起食口感極佳，加上本身個汁和青檸汁，酸酸甜甜，令胃口再次提升!!我建議可用底下既生菜包住黎食，保證你話正!!!泰式炒金邊粉$45，配料主要有蝦，豆乾，芽菜和蛋絲，旁邊有少量花生碎，呢個夠好鑊氣，而金邊粉亦炒得乾身，又唔會油，是水準之作!!乾炒咖哩海鮮$55，呢個又係有蝦，仲有魷魚，豆角，紅椒，用黃咖哩炒，但咖哩味唔突出，亦都唔係乾炒，簡直濕過濕炒，雖然蝦同魷魚都鮮味爽口，但呢個只屬一般!!最後上桌既鹽燒鯽魚$65，等左好耐，前後都有45mins.，當然是即燒是好事;甘既價錢，條魚算好肥大條，肉質雪白算嫩滑鮮味，鹽燒既關係，本身已經夠味，隨碟也有小碟醬汁，但我點一些沙律既汁食更見滋味!!總括，這烏頭之性價比是高的!!!到我地食完既時候，人客多了，但也只是約6成滿，不像以前常常爆滿，可能係閒日吧，雖說人氣沒錯可能是弱了，但在現時物價高企既年代，此店的價錢公道，食物質素中上，服務不差，又唔收加一，而這次光顧也令我對其食物有回一點信心，所以我定會繼續支持!!!!!…Read More

天氣開始熱喇，由深水埗行去長沙灣，已汗流浹背，又口乾，本想去7仔買野飲，但突然諗起呢間無喊面既豆品店，就行過來食碗豆腐花止止渴。下午三點多，都几多人食，大部份人都係熟客，好知定，唔洗睇有咩食，未埋位已經落order"凍花,煎豆腐!!" ,"熱豆漿，凍豆花","煎豆腐，熱花" ，坐低，然後好快就送到面前!!!今日只食凍豆腐花，清涼順喉，冰凍滑溜，有豆香，黃糖任你加，一匙接一匙，食完!!!食完一碗，解渴!!!…Read More

咖啡班同學仔上堂時傾偈吹水話放學去食下晚飯聽聯誼一番，openrice左之後就決定黎三記食餐勁既便宜飯!!!係黃大仙地鐵站隔離小巴站搭37M小巴10mins.內到.好在訂左枱，一行7人，7點黎到已經8成滿，佢有两個鋪位，另外門前空地都擺晒枱，走既時候空地更都爆滿人，好生意到不得了!!!我地首先要左一煲老火湯，但唔記得係咩名堂，不過都好飲，無味精，湯渣都唔少，當多個餸，每人都有两碗!!!黃花魚好大條，肉質嫩滑，帶點油脂，很好食呢，沾點面豉醬，更能帶出一點鮮味，成條清晒，$8x，抵食!!鹵水三拼，分別要了豬耳，豬腳拼腩肉，墨魚，大腸拼生腸，其實每樣都好入味，大腸生腸腩肉就最為出色，好似$4x，算平了，份量都几多!!煎蠔餅，炸得金黃香脆，有不少蠔仔，飽滿而且吃得出蠔既鮮味，不用點豆瓣醬都好食，正呀!!!鹵水鵝件，呢個真係不得了，首先大件夾抵食，應該係半隻到，$90左右;而味道，哇噻，非常入味，肉質嫩滑，很juicy，雖然唔係鵝片，但依然有啖啖肉既感覺，皮當然唔放過，骨頭都啜埋;而底下既豆腐同花生，索左鹵水汁，一樣甘正斗!!個人覺得叫鵝件抵食過鵝片!!!!!荷葉蟹蒸糯米飯，呢個話每日有限，所以訂枱既時候已落定order，一到就叫可以上啦，但都係後期先黎，所以想食就要早啲叫，否則可能有排等!!我地要左大既，份量6，7個人食都夠，如果唔係非常大食，叫左呢個都唔洗叫白架啦!!一上桌已聞荷葉香味，蟹不算大隻，肉也不算很多，但蟹既鮮味卻能滲入米飯中，糯米飯比較乾身，但粒粒分明，很怕糯米飯係一pat野甘，飯裏頭還有冬菇，蝦乾，與甘香蟹糕混合，鮮味之餘也增加了整個飯既口感，最後剩下的，就只有...荷葉...同蟹殼在蒸籠裏相依為命而已..可憐!!!最後大家覺得要食返啲菜，所以就叫左碟蒜蓉炒豆苗，呢個$4x既豆苗估唔到甘大碟，出面一碟炒菜心都呢個價啦!!豆苗新鮮脆綠無渣，蒜蓉炒係最佳既選擇!!!!!!其實呢度既價錢比出面既真係平左少少，或者都係做街坊生意吧，每人唔洗一百蚊食飽飽，好抵食!!雖然要轉車上去，但相信一定再黎，不過我地食飽後慢慢行返落地鐵站都只係20mins.左右!!!總括來說，三記絕對平靚正，服務態度都几好，值得得推介!!…Read More

又一城既simply life細鋪搬大鋪后人氣繼續旺盛，是晚6:45pm到達，已經有十幾人既人龍，等左45mins.入得，等既時候有waitress派一小件cheese cake給排隊既客人，味道很下不錯的!!!我地order左黑松露薯仔薄餅，海鮮有機飯，其中一個轉餐，有埋飲品同餐湯!!!先送上餐前面包，兩個人食但送來5片，真是食包都飽了，面包外脆裏面鬆軟，很有面粉香，由於我地都喜歡食面包，所以全部食晒!!!餐湯是蕃茄濃湯，湯是較傑身，茄味濃郁，好飲，點面包也不錯!!!之後到海鮮飯，份量不少，主材料有大蝦，魷魚和蜆，都挺新鮮，蝦很爽口彈牙，米飯口感佳，軟硬適中，而且很入味，並且加入herbs & 車厘茄，令味道層次提升了，值得推介一下!!!Truffle potato pizza，薯仔切了薄片，再加上芝士和truffle碎，很簡單，但香氣十足，批底比較薄，也很香脆，雖然已飽，但還把它給吃完了!!!餐飲是冰果紅茶，看似普通很淡，但有驚喜唷，茶味特出，帶點果香酸甜，好好飲，食得飽喝一口也能消消滯!!!本想也試試甜品，但飽到不行，下次吧!!!又食飽一餐了，Life is so SIMPLE!!…Read More

情人節那天，我地想遠離一下市區，回味之前留在澳洲一年既外國生活，所以就到赤柱一遊，但講真，呢度既感覺已經唔同了，真的太多人了，市區人，赤柱居民，連旅行團都有不少!!盡管如此，我們都是挺享受這個赤柱遊的!!!走累了，我地就黎左位於赤柱廣場既the cupping room休息下，因為仲會食其他野，所以只係點左杯latte & banana waffle，佢地既咖啡只有一個size，杯latte相等於平時出面飲既S size，拉花漂亮，奶打得綿滑無氣泡，光看已知不賴，喝一口，啡奶mix得很好，有點堅果香，淡淡既回甘，不覺得有果酸味，啱我，如啡味可濃一點就更好，雖說latte是奶之比例較重，我也明白，但比起我到一般到cafe都是喝latte既小小經驗，是真的淡了點，但整體來說，這杯出自2012 HK Barista冠軍級人馬既latte是上品啊!!!Waffle是即製的，但$38只有一小塊(但看之前食評是有兩塊的，可能改了)，上面約有半隻香蕉，whipped cream同朱古力醬，waffle外脆內軟，但蛋香一般，當然，與兩位好朋友朱古力&香蕉一齊食，邊有唔好食既可能呢!!只是感覺偏貴了點，如果有兩塊會開心啲甘囉，哈!!!有 barista champion，當然有 specialty coffee啦，$60起!!!而店也有供應一些輕食如sandwiches,toasts,brownies & cookies，進內左邊有賣咖啡產品，咖啡豆，另一邊則賣朱古力豆，真係大人細路都甘啱呀!!!呢度環境挺舒適的，色調為黑白灰，一座slow drip iced coffee maker十分搶眼，裝飾簡單不失型格，確實是一個逛累了坐下休息既好地方!!!下次來赤柱，定必再光臨~…Read More

之前去維園花展前黎左呢度食個lunch先，佢係正扶手電梯，一上就見到!!睇睇，都係食set，70零蚊有拉麵，餃子同野飲，其實都算抵食呀!!义燒拉麵份量唔算多，有一塊义燒，肥瘦適中，軟淋無渣;有一啲芽菜，椰菜，紅蘿蔔絲，爽脆;湯底沒有很濃郁，不算很豬骨湯，但味道是可以的!!而餃子皮薄，底部煎得香脆微焦，餡料主要係椰菜同豬肉，點了附碟的汁，很是美味的!!另外要了杯玄米茶，也不錯的!!Food court 麻，味道合格有餘了，價錢也算便宜，有機會再來!!!…Read More

是晚女友補完習，係石硤尾搵食，成日食萬發，不如就試下強記吧，我阿媽話都唔錯，其實每次經過都係甘多人，但呢晚唔洗等位，本來執緊張枱俾我地，但有對情侶自己行入去就甘底左，噢，好彩另一邊都有位，仲要舒服啲，真好。叫左3個餸，椒鹽九肚魚，豆腐班腩煲，炒雜菇加一個白飯!!!椒鹽九肚魚，炸得外脆內軟，但其實無什麼突出既味道，係小小香口甘，一般!!豆腐班腩煲，豆腐軟滑，班腩普通正常，但仲有火腩同冬菇，令呢個煲加了分，整體算是中上之作!!炒雜菇，主要有秀真菇，雞脾菇同冬菇，個汁非常之冶味，很濃既醬油味，啱晒我既胃口，底下既菜心爽脆，真好平衡下菇既咸味!!!食完真係好飽，呢度既份量是挺多的，其實女友食好少，通常食剩既都係我k.o.的，好彩只叫一碗飯!!!多謝上天又給了我一餐温飽~…Read More