eating_crystal's Profile

食物味道ok，但份量細，性價比好低，由其咸食，超細份。叉燒滑蛋sour dough toast唔係唔好食，但就係叉燒(唔香)，炒蛋，同麵包。份量少，除左個配搭新穎少少之外，味道係無咩特別，都講唔上好味，但價錢唔平。台式all day breakfast呢個份量叫合理啲，但考慮埋價錢都係麻麻。味道正常，但十分普通，無咩好形容同評價。檸檬煎雞胸意粉檸檬超酸，黑椒味超重，再皮埋有辣椒，食落拿到個口好痛。雞胸都比較乾。Matcha latte用若竹沖，分3個level，我地叫左level 2同3，但同行三人都覺得兩個level無乜分別。好多粉粒係底要自己再壓同攪。店家話自己既matcha latte比較濃，但我哋都覺得普通正常，自己係屋企沖開既用粉種類同濃度都再高少少，如果稱自己係抹茶specialist黎講，係失望既。柚香金萱卷個蛋糕同cream好食既，但芝士奶蓋濃味又咸，一齊食就掩蓋晒啲茶香，淨係食到好咸唔知咩既味，建議走芝士。豆乳巴斯克芝士蛋糕有微微豆味，質地好杰身食落好滯，上面個豆乳cream唔錯，但個黃豆粉我本人覺得好難食要整開佢，朋友就話可以接受無乜問題。工作同煮嘢既人望落都唔少，但出餐好慢，所有野都要等好耐，飲品都係食完兩個咸食先黎到。12點用餐，抹茶卷蛋同抹茶tiramisu呢啲大熱甜品都無，一係就未準備好3點後先有，為佢哋而黎，好失望。食物正常，唔會話差但講不上好，只係呢個地段收呢個價黎講，應該要好食好多大份一啲既感覺。…Read More

約朋友出嚟食飯傾吓偈，見呢間餐廳啲食物同環境好似都好唔錯，就揀咗黎試吓。點知，坐位勁逼，同搭枱分別唔大。食物都普通，而且等待時間少少耐，味道都麻麻地。見呢間餐廳被tag適合慶生，我諗如果坐唔到特色位窗口位，係傾計聚會都唔適合。餐牌幾得意本身都有期望。凍朱古力好飲好濃熱焙茶朱古力，主要係焙茶味冇乜朱古力味凍蜆蜆肉煮得比較硬，覺得唔錯酸酸辣辣，但有粒得殼無蜆，都無跌左出黎，純粹少咗粒肉。份量其實都比較少，食完好似冇食過嘢咁。香茅雞翼加鹹蛋醬其實完全食唔到鹹蛋味，勁重香茅味，建議如果食雞翼就咁食原味香茅好，唔好加錢要其他味，因為根本食唔出，只有香茅味。但炸得好熱辣辣同Juicy，呢個值得讚。明太子蟹肉意粉明太子味不存在，好似蟹籽撈意粉咁，呢個好失望呢。焦糖奶茶布甸布甸有奶茶味唔錯，焦糖醬有啲甜同埋搶奶茶味，我覺得唔點焦糖好味啲，但朋友喜歡焦糖醬。黑朱古力麻糬曲奇發粉落好多個種曲奇，明既明。我哋都覺得個味道係朱既但質感麻麻地，麻薯都失左望，好淋唔煙韌。環境同食物質素都麻麻哋，但係職員幾友善有禮貌。…Read More

其實好耐之前已經知道有呢一間店想試，咁啱前幾日屋企人話好想食斑斕千層糕，我就醒起過幾日去觀塘，諗起呢間鋪即刻訂咗，都叫bookmark咗好耐，十分期待！不過喺網上訂購嘅時候，完成晒成個訂單都冇位俾人揀取貨日子，系統上呢一個問題令人有啲困惑，我係落咗單WhatsApp比付款證明嘅時候直接講想邊日拎。班蘭奶貝 $89@3超好食！係班蘭蛋糕夾椰子味cream，蛋糕超濕潤鬆軟同時好香班蘭味，椰子cream味都好突出，兩個味道都好出但又唔會搶，或者比對方蓋過，平衡得非常之好！必食！我媽媽平時乜都話唔食唔試，呢一個佢食咗半舊好正，然後仲問可唔可以食多一半，知幾好味啦😏 不過少貴，$30細細舊。班蘭千層糕 $89@9就好失望喇，因為係為左佢而來，但真係唔好食。聞落有少少班蘭味，食落無乜味，全家一致認同合埋眼食會係完全唔知食緊咩。我即買即食都唔煙韌，偏硬爽個種口感，返屋企叮完翻熱淋返少少，但都係絕對唔煙韌。都係貴，成$10一片，唔講味道黎講都較薄同細。店員都好有禮，確認訂單圼主動講搭𨋢條隊可能會好長，介紹有貨𨋢可以搭。取貨時都態度好好，介紹存放方式。會再幫襯買奶貝同蛋糕，但千層就希望會改善啦(或者係咁啱我個盒唔得啦。。)…Read More

呢間野開咗好多年，想試好耐，因為佢好似芋泥專門店，我好鍾意食芋圓，而且覺得開得咁耐應該都唔差先生存到咁耐。終於有機會扚起心肝去買咗碗，點知超難食，都算係數一數二食過難食嘅芋圓。巨無霸芋圓自選配料個名就叫巨無霸芋圓，係大粒嘅，但係得兩粒，少到。。。後尾睇返OpenRice其他相，人哋有3-4粒，都係偏少，但兩粒真係太離譜，另外就係佢好似未煮熟咁，個心係粉同硬，痴線咖都唔知食緊乜自選配料: 仙草凍，小湯丸，粉粿，芋頭- 仙草凍好似罐頭涼粉，份量最多，但我而家係叫大芋圓唔係叫仙草凍呀大佬(佢menu另有仙草凍糖水)- 小湯圓係小丸子，幾款之中食落最正常- 粉粿食落還好，但螢光黃色賣相有啲嚇人- 芋頭好差，好似炆餸嗰啲咁炆到腍晒，千祈唔好幻想係鮮芋仙蜜芋頭個種，我就係以為係嗰種，超級失望湯底揀咗黑糖鮮奶，正正常常冇話太甜都ok…Read More

食物唔錯，價錢對得住份量，只係無誇張到要排成個鐘去食，唔洗排值得試！蚵仔三文魚飛魚籽滷肉飯配搭幾有趣，料都好多，不過我覺得佢哋味道比較各有各，無融合到，但都好味既。大蔥牛舌滷肉飯就係大蔥牛舌併滷肉飯，都好多餸，味道都好。芝士肉鬆蛋餅多餡，熱辣辣新鮮整起。芋泥鮮奶好香濃，芋頭係真芋味，好天然好滿足，唔太甜。黑芝麻麻薯好滑溜，但我覺得比較唔夠煙靭，唔係我喜歡嘅口感，但係朋友喜歡。黑芝麻粉好甜，好多糖。坐位好逼。…Read More

見到好多Foodie介紹，被吸引咗去試。門口有隻水豚好得意而家平日夜晚都滿座做到兩round，係犀利嘅。店內裝修都幾舒服，唔算太迫，但唔知點解都有少少嘈嘈，要講嘢大聲先聽到朋友講乜。抹茶latte，飲落去抹茶味都係高級嘅，不過唔夠濃。朋友叫咗莓莓奶昔，賣相好靚，不過我就冇試飲啦。是日餐湯係蘑菇湯，呢個係全晚最差，冇乜味，然後有啲好似栗子味，少少奇怪。另外，只係叫咗一碗湯，碗湯嚟到好大碗，問店員拎個碗仔諗住分一半俾朋友，店員應該聽唔清楚就拎咗隻碟嚟，我哋係想要碗，佢話冇，咁我哋就話碟就唔使啦，然後佢本身好好笑容突然黑面好串話咁其實你哋係想點啫。。。。 白酒青口500g，望落個份量其實就OK嘅，但因為啲青口殼好大但肉超細粒，食落就真係得好少，味道正常冇乜特別，有配一碟包。金文畢烤豬肉卷Pizza，喺IG上好多人食同介紹，都真係唔錯，餅皮煙靭，豬肉份量都OK，每塊都有一嚿芝士，上面都好多火箭菜，整體好食，不過同意粉相比就冇乜驚喜。海鮮水管麵，個汁係類似龍蝦汁都幾濃，意粉同海鮮一比一，份量係比較細，但味道真係高質有驚喜，只係個水管面硬咗少少，但整體嚟講好好味。餐牌上好多嘢都冇供應，佢之前最好睇吓佢網上book位系統個餐牌。食物總體而言都唔錯，本身諗住試食煎薯糰先揀呢間餐廳，但最後冇叫到。然後食到好飽冇叫甜品，但咁樣食已經人均4xx喇，好食嘅，但係大角咀嚟講有啲貴。職員整體都有禮貌友善，係問攞碗嗰度無啦啦黑面，但佢之後都正常。…Read More

次次經過都好多人，開咗一排熱潮都未過1741 影低餐牌行去隊尾條隊算係我經過好次黎講中等長度慢慢睇吓餐牌之後等一陣其實差唔多排到1754 俾錢落單 過程快1801 拎飲品 行個圈就拎得比想像中快杯嘢而家物價同旺角嚟講幾平$30有珍珠有奶茶有公仔打卡明星開但價格反映一切 就真係普通都冇得再普通不過而家經濟唔好平呢個因素應該會令佢繼續排長龍總論：有機會條隊再短啲會試下奶蓋如果有budget 珍珠奶茶本人建議隔離個間…Read More

幾年前已經book咗呢間餐廳，嗰陣仲係觀塘碼頭嘅年代，後尾到北角開，都一直未有機會食，因為只開平日晏晝唔做星期六日真係去唔到。而家開喺觀塘，終於撞啱可以去到，早幾年一直睇食評吹到真係好正，對佢真係好大期望。喇沙我自己覺得係唔得，湯好稀，味道都一般，油面米粉就正常，賣相就完全唔吸引。海南雞飯，雞就冇乜海南雞味，偏向白切嗰種感覺，就有香料味唔錯嘅。大細腳豉油撈粗，叫做最惹味，豬腳雞雞腳都炆得腍同入味，撈粗啲汁比較稀，呢啲份量相對少。腐竹薏米冰，就係腐竹糖水，但係杯上，偏甜，但係都算好味，好足料。但係呢間嘢要好早就排隊，朋友1200排，好似都1230先有得入座。份量質素普通，個別食品性價比低。但個日雖然樓面好忙，但店員都好有禮貌，呢個值得讚。…Read More

蒸海鮮好食，蒜蓉粉絲蒸，調味剛好，蒜蓉多但粉絲就少啲。叫左蟶子中size既，元貝叫左珍寶，呢個價錢黎講個size都不錯。蒸飯話師傳調左味可以唔落豉油試吓先，但我就覺得無味，要撈蒸海鮮既蒜茸先好味。料比較少，飯就好多既。炸野ok，另外叫左奶黃流沙包就好流沙既但唔係幾好味。阿姐好熱情，好開心咁。星期日730pm直接有位入，餐廳9成滿，仲有少量位。不過都上菜快，寫住要等20分鐘既蒸點其實5分鐘都上到。坐位逼唔太好坐，食得快，啲枱都轉得快。…Read More

工廈拉麵，本身都無期望，仲覺得會伏，不過原本想食個間無位就去左睇睇，食完覺得比想像中好但同熱門拉麵店都真係有距離既。不過，呢間都係要排既，但隊就短啲，而且好似係唔知幾點(1230? 1245? 1300)前離座有折，到咁上下時間就會大批人離座。叫左期間限定蟹皇拌麵第一啖食有蟹皇味，但愈食愈無，少少雞白湯味，麵偏淋。不過不失無咩評語比到，真係好普通正常。不過呢個價錢呢個味道呢個環境同工廈黎講仲要自己執餐盤，收緊同地舖連鎖店差唔多價就覺得少貴。…Read More

見到美國過江，但openrice評價好似一般，都覺得要試試佢，點知就真係好一般，好似鬼佬煮中菜咁，唔係幾好食。雞絲涼麵撈完之後勁油，個辣味又唔香，得油味。計時份量還好，但又係冇味，肉質偏硬。麻辣牛肉麵算係味道比較好，碗湯都OK，牛肉都腍，但就係十分普通冇乜特別。炸雞好似食緊一pat炸粉咁，其實唔係好知食緊乜，仲好油。燒椒抄手算係成餐入邊食咗味道最後層次嘅一樣野，都係最好食既一樣。餐牌上有燒椒既都係推介，應該叫燒椒既野會比較好，不過我就未必會再食下次，有緣再試。…Read More

見唔太肚餓，諗住少少地食下串燒，點知都幾好味，樣樣都想食，食唔錯又encore，最後都食到好飽🤣 所有食物都好新鮮熱辣，唔係燒好擺係度你要先拎比你，夠溫度既野真係好食好多！星期日晚上7點先即興訂位8點，好彩都訂到。去到都全店full，所以我諗都係訂位穩陣啲。Sapporo買一送一，但見附近都少人叫。油炸鬼蝦膠芝士(類似咁既東西)炸串黎既應該，都係新鮮炸起，好脆，可以試下！牛舌比較落同細，但係芯黎既，好食，但調味有啲飄忽，叫咗兩轉，第二次嗰啲太鹹。蜜糖芝士年糕燒蠔呢個大推！$48兩隻，都唔細咖仲好飽滿，食落燒得啱啱好十分juicy，係新鮮蠔既感覺！調味少少辣好惹味。蟶子呢個就燒得熟左啲，粉絲都好少，仲要燒到乾咗，得兩三條乾粉仲黐住咗個殼食唔到。同埋嗰條味太鹹，落得太多菜譜定係唔知咩醬。鹽燒雞翼得啲皮有味，又燒得幾脆，都ok，但無皮個啖就無味。免治雞肉串豚肉卷秋葵個人認為幾好食，不過豚肉薄咗啲！另外叫咗豚肉卷荔枝，不過唔記得咗影，都係幾好味。大蔥雞肉卷啲雞都係表面啲醬有味，肉中間冇乜味。明太子忌廉撈烏冬冇明太子味，得忌廉味，忌廉好杰好heavy，一食就好濟，唔夠飽想快啲食飽先好叫。…Read More

之前經過銅鑼灣麵尊好多人排唔到，男朋友話以前食過好好味好想食，我就未食過。個次去香港仔見有分店，安排左個行程我去試試有幾好食，佢就去encore心心念念既麵尊，可惜大家都失望了。12點半去到，我地以銅鑼灣standard去諗仲以為要排隊，點知入面係未滿仲有位既。大尊 麻辣醬豬皮蘿蔔我覺得係出色既，豬皮軟同膠質到啫喱咁，蘿蔔清甜無渣。不過魚蛋豬紅紅腸就劣劣地喇，覺得唔OK。個湯底我地一致認為麻辣醬好食啲。咖哩魷魚豬頸肉紫菜 咖哩醬咖哩味無乜但水魷質地都淋，唔錯。豬頸肉就好普通既滷水豬頸肉。紫菜都正常。呢碗就所有野都正常普通，平均啲。另外，個辣椒油幾好食，可以試下加少少。同埋姐姐幾好人，餐廳本身都係可以免費加湯，我哋叫左加一碗，點知佢主動幫手兩碗都加晒。加湯之後飲下發現都清甜既。結論，普通OK既街坊車仔麵店，唔明點解吹到好勁咁銅鑼灣又排長龍。…Read More

朋友外國返嚟想食韓國菜，咁啱揀咗呢間，見好多好評都諗住唔錯，上到去同等嘢食嘅時候仲見到有好多人喺門口排隊，有啲期望，點知大家都食到好失望，浪費咗佢一個返香港食好西嘅機會。芝士泡菜煎餅成餐得呢道菜正常，老實講呢碟都好食嘅，煎餅好脆，味道好，面頭好多芝士，但佢個醬汁就好鹹，點少少都已經好鹹，建議唔使點。豬手水冷麵可能唔夠冰嘅關係，冷麵唔算太冰凍，只係室溫偏凍少少，成碗麵冇乜味。豬手完全無味仲要超級硬，硬到完全咬唔開，想話用匙羹上拮開佢整細嚿啲再食都唔容易，食到黐晒牙。牛仔骨韓式年糕牛仔骨全部都係骨，唔係骨既就係脂肪，基本上都無乜正常既肉。今次個牛仔骨有少少味但唯一黐住骨個少少肉都係硬到咬唔開。年糕一啲都唔煙靭，幼身淋pat pat，汁味道普通唔好又杰到糊咁。訂位有折，兩個人食呢度既野，折後人均140左右。雖然好似幾平，但價格反映一切，食物味道差，環境好迫又嘈，限時90分鐘會趕人走。不過職員算有禮貌同helpful既。…Read More

去左食lunch，見多數人都係嗌雞扒蛋包飯同埋燴牛肉飯，咁我就揀咗雞扒蛋包飯。Lunch set有湯/沙律，湯個日忌廉湯唔錯，好夠夠熱，又唔係一pat粉開嗰啲忌廉湯，都有誠意，所以都對之後嗰份有啲期望。可惜個湯已經係接近最好既item。。。雞扒蛋包飯其實賣相唔錯，份量都多，但我食到一半先記得影相。有兩塊雞扒都幾大塊，煎得香脆熱辣辣，應該好多人叫keep住煮就好新鮮，旁邊半碟有沙律菜。可惜個蛋包飯就唔得了，啲蛋煎到薄到片紙咁，但好神奇咬落好乾好硬好似煮到勁熟咁，但係佢表面上又有啲生嘅蛋汁望落似Juicy。同埋成個飯，只有蛋下便有微微一pat汁，啲飯質素好差，冇飯味，食落好乾。朋友叫咗雞扒迪迪蛋熱香餅，當日冇熱香餅轉咗muffin，即係豬柳蛋漢堡嗰包。個包凍既勁硬，切開都好費氣力，雞扒就同我個飯一樣都係新鮮熱辣，個蛋好似唔錯係溏心我中意既生熟度，但就唔係平時網上睇開見到嘅流心流到瀑布咁嘅egg Benedict。份量偏細。另一個朋友叫咗辣味蟹肉意粉，佢話就係好普通嘅蕃茄蟹肉意粉，蟹肉好少撈撈下唔見晒。我特登加$24叫凍matcha latte，但唔係幾好飲，唔係飲開熟悉鍾意嘅小山園抹茶味道，苦澀唔香，飲到底都有好多茶粉未打開一粒粒係底。不建議。唔係難食，但真係唔好食，而且價錢都唔平，由其見到咁多好評但食落咁嘅質素，都幾失望下，唔會再回頭。…Read More