sammilopy's Profile

一早黎到，人唔多都算坐得舒服紅燒牛肉麵份量太少，麵質普通，牛肉同牛筋都煮得好淋，但無肉味茉香珍珠奶茶無茶味，好在珍珠份量算多服務態度麻麻，無笑容講野無尾音，飲杯上枱後係掉技飲管上枱，咩料？仲要收加一咁價錢真係唔會再幫襯…Read More

搬黎新浦崗後，經常會去mikiki 買日用品同埋食飯，今晚黎麻布茶房，回憶下以前讀書時拍拖的感覺。麻布茶房當時黎到香港，以我所知好似係先開第一間分店在銅鑼灣名店坊，最喜愛就係佢的烏龍麵同埋聖代。不過當時仲係學生，錢唔多，唔可以成日去食，因為佢一個聖代都要50-60 蚊，好貴呢。今次黎到，餐牌唔同左，多左好多選擇，仲出埋套餐，走親民價錢。就甜品黎講，價錢同 10幾年以前一樣，但現在沒有將貨就價，賣相同味道都一樣咁正。我點左茶房風拉麵加個抺茶聖代，總共只係$98 。跟一小舊蒸蛋，入面有枝豆粒粒，味道不錯。拉麵的豉油湯底味道不算太濃太鹹，拉麵亦很彈牙，兩大塊叉燒都沒有肥肉，啱晒我口味，出面的叉燒都係太肥，通常我只咬兩口就掉了，很浪費，今次呢碗麵我成碗食晒呀。男友點左個熊本霜降西冷加茶房風蜜豆沙，總共 $145。西冷帶少少生，肉質唔韌無筋，點上佢的秘製燒汁同食，非常惹味 。一份辛味炸雞亦 $48。一客3 隻勁大隻，雞皮炸得香脆，所有肥膏都迫晒出黎，沒有感到一點油膩。最後，就到我最期待的甜品出場啦，係以前的味道，賣相、味道、價錢都係同以前一樣架。大大份，好抵食，蜜豆沙的紅豆煮到起沙，但有咬口，而且好甜，正。我個聖代上的生果都好新鮮香甜。極力推介佢的甜品比大家，呢個價錢真係抵食。…Read More

揀左個比較鮮甜的蕃茄魚頭鍋，另配重慶辣湯，不得了，越滾越麻，食得勁辣的朋友大呼過癮，連湯都飲埋，佢話個湯底好正，唔係一味死辣，個條麻的感覺，條脷都無晒知覺。 餐廳經理細心同我地講解湯底方面如何下單。食物未到，先送你一人一碗雪耳糖水潤一潤喉。酸味味又開胃的洛神花茶，價值 HK$ 58 渣， 兩個人飲每人都分到 兩杯架。所有食物都可以點一分或半分，啱晒細食的女仔，可以試多幾款唔同種類的食物。 唔怪得咁多女仔黎呢度打邊爐，眼見當晚好多枱都係全女班，枱枱都有靚女。值得一贊，好細心，每人一條即棄圍裙，而我亦即場測試左佢的功用。唔覺意一野炸左條滑嘟嘟的苕粉落碗，啲汁彈到周圍都係，好在有條圍裙擋一擋，而且仲要唔過底，唔係件衫唔駛要了 。功夫土豆片（HK$33一份），將薯仔切成薄片，如果鍾意較有咬口的口感，放落鍋中碌我分鐘左右就可以食得，吸收左麻辣的湯汁，食起黎份外刺激。掛住食，可惜忘記了影相。曉宇苕粉（HK$51一份）煮熟後變成透明，吸收了麻辣湯汁，又麻辣、又彈牙、又煙韌。一碟兩個搶住食。曉宇嫩牛肉 （HK$81一份），嫩的程度同滑牛無異，牛肉味重而且無筋，所以特別滑。重慶炸酥肉 （HK$60一份），呢個係我的最愛，炸豬肉條，再加多辣粉調味，好香口惹味呢，而且份量十足。重慶耗兒魚 （HK$79一份），一份4 條，只有一條大魚骨，啱晒我地兩個唔識食魚的人，只需輕輕用筷子夾起就可以食得。  …Read More

上星期去太古坊見工，之後搵地方醫肚，不論夏天冬天，湯麵不嬲都係我的至愛，見到有間蝦麵店開左喺呢邊，之前喺灣仔都有食過，印象中係幾好味的，唔駛諗咁多，一於幫襯佢。時間尚早，未到食飯時間，唔駛迫亦唔駛等位。近門口處有部機落單可用八達通比錢啱晒我呢啲無乜帶現金喺身的人。我和男友一人點了一碗辣蝦湯麵，首先梗係試啖湯先，好重蝦味，鮮甜香濃又惹味，我的是鮮蝦魷魚翼油麵，蝦係開邊去殻蝦，食得方便保持儀態，一啖半隻。魷魚翼係最爽脆的地方，兩樣餸份量都好多。男友的海鮮麵，份量又係好足，佢話鮮蝦彈牙，腐角吸收了大量的蝦湯。值得一提係女店員十分細心，問了兩次湯底會否太辣，可以免費為我地加清湯中和。…Read More

朋友好鍾意食呢間韓國野，話有卡位坐，環境舒服，食物又有質素。由於個晚要去睇戲，一早就打去訂個7 點鐘2 人位。餐廳開喺SOGO 後面街的樓上舖，地點非常方便。入到去裝修唔錯，有啲似明洞裡面的餐廳，好在我地早黎，真係有得坐卡位，有私人空間。梗係點返半份炸雞食先啦，呢度的炸雞係用成隻雞黎整，唔係只得雞槌，好在我鍾意食肉，朋友鍾意有⻣落地。大家都滿足。甜酸醬開胃，上面仲有炸蒜粒非常惹味。雞肉炸得外脆，裡面仲係多汁又嫩滑。唔好錯過有仲粟米同薯仔。份量啱晒女仔share 食。泡菜煎餅 食我食韓國野時乜叫的，呢間的份量十足，底層煎得香脆，味道剛剛好，點啲豉油同食，好正。上面仲有幾塊炸尤魚，好味。還點了兩杯飲品，我的是士多啤梨奶昔，果味香甜，朋友的是西柚味梳打，佢非常滿意。…Read More

四川菜的麻辣真係會令人食上癮，間唔中諗起都會想去食下。今晚約左朋友到銅鑼灣的川府宴試一試，因為朋友食過覺得唔錯。由於時間唔多，就算見到隔離枱好多人打邊爐香噴噴，我地都係叫小菜算了睇餐牌見到有冰菜沙律，之前又係同呢個朋友去上海食過一次冰菜，覺得好特別又美味，超市街市都好少發現，出面好多舖頭都無呢個菜，難得見到，梗係即刻點啦。冰菜菜面有好多水珠，就好似鑽石咁閃閃發亮，只需要簡單咁用麻醬調拌，非常清爽好吃雞絲粉皮呢味野係我食上海野必叫的，比起其他餐廳，佢呢度加了大量的雞絲，青瓜絲，同樣拌以麻醬同吃，又係簡單又好味的一款小食紅油抄手雲吞皮皮薄，份量十足， 咪睇佢好似比辣油浸住，但其實一啲都唔辣的泡椒安格斯牛柳牛柳肉味香濃，紫洋蔥吸收了牛肉的肉汁，亦沾了泡椒的辣味，十分刺激又惹味，令人忍唔住一口接一口…Read More

晚飯食完仲想食下甜品，相信係不少少女的心聲。已經有心水今晚係想食pancake 的，search 下openrice 見到呢間的評價唔錯，就走去試一試佢。好在我地早一步，坐低後見到出面突然多左3-4對情侶等枱，有排等啦，因為呢度的甜品全部即叫即整，部份款式仲要等30分鐘。我地叫左蓮蓉馬卡龍流心奶皇梳乎厘pancake 配豆腐雪糕 (HK$59) ，係兩塊成寸厚的pancake，同朋友一人一件，唔駛淨。好在唔駛切開黎分，因為一切開就見到啲奶皇流緊出黎，即刻大為緊張，味邊好似酒樓的奶皇包，仲好似有少少咸蛋黃粒粒在裡面，配清新的豆腐雪糕，中和了奶皇的濃味，我喜歡將雪糕點木槺碎碎黎食，一啖兩種口感，整體黎講非常好食。日本柚子㭑茶吉士pancake 拿破崙 (HK$49)拿破崙皮做得香脆，夾著厚厚的吉士pancake 又係蛋味香濃，絕對唔係溝大量pancake 粉整成，鬆軟但唔係食空氣。唔覺有柚子味道，但整體黎講又係好好味的。結論： 性價比極高，一定會再黎幫襯，亦會介紹比鍾意食甜品的朋友。但係坐位較窄，坐得唔舒服，而且女店員態度麻麻。…Read More

今日去左英皇駿景酒店入面有名的川中菜館—-駿景軒。一嚐米之蓮之味。可以叫小菜、亦可以打邊爐、調味料選擇很多呢個紅辣椒粉見到都覺得辣，但好想試杏汁白肺湯，杏仁味幼滑順口。飲完一定成個靚晒呢個黑松露野菌安格斯牛粒，牛肉軟淋無根，每料都充滿牛肉的香味，一定係靚牛無誤。野菌同紅椒都炒得惹味，值100分呀水煮魚每啖都充滿麻香，魚肉肉質彈牙，分量十足，內有芽菜和紅薯粉。後者吸收了麻辣湯汁份外好味，但可惜份量少左啲粒粒雲吞都爽口彈牙，因為用新鮮蝦包成，雲吞皮亦做得透薄。蝦醬唐生菜煲極度惹味，蝦醬味由廚房拎出黎香味由遠到近，上枱熱辣辣，非常好味食到最後仲有甜品送，有蕃薯糖水、豆腐花、紅豆沙、腐竹糖水。我的豆腐花滑嘟嘟有豆香、朋友的紅豆沙用料十足，煲到起沙，雖然係免費但一啲都唔求其。…Read More

上到 一樓，門口已經有個大魚缸，一陣我地食的海鮮就喺眼前。我地揀了 3 款海鮮，麵包蟹、青口同蜆。個汁就揀了佢地介紹的  Mr. Crab cajun sauce，少少辣，又惹味。先黎的係半打法國生蠔 ，蠔肉爽甜，肉質厚實，海水味較淡，唔會搶了生蠔的味道。生蠔新鮮，我地都無加檸檬汁，只吃佢的鮮味就夠了。食完生蠔後，蟹餅亦都熱辣辣上枱了，外脆內軟，切開見到一絲絲蟹肉，足料而沒有溝了大量的麵粉製成，鮮味十足，必食推介。餐湯我地order 了龍蝦湯和周打蜆湯。龍蝦味十分香濃，跟湯的麵包焗得香脆可口，用黎點湯食，十分美味。周打蜆湯亦都用料十足，蜆肉大而肉厚，口感creamy。又點了黑松露炸薯條，松露香味濃郁，但可惜薯條唔夠香脆。一大袋，脹卜卜的海鮮亦已上枱了，一打開就聞到醬汁的香味，除了我們所點的海鮮外，亦有粟米、薯仔和腸仔粒。青口和大蜆 都係新鮮無沙又厚肉，份量十足。兩個人食，平均都有3-4 隻落口。正呀。呢隻麵包蟹差唔多有 1000g， 咁重身，一定係啖啖肉的，肥厚的蟹鉗，食落啖啖肉，蟹身、蟹腳的肉質厚實，一食就知係新鮮。淨返咁惹味的汁料點算好，我地order 了一盤香草麵包，真係一滴汁都唔放過，麵包焗得香脆，再加上惹味醬汁，好味到唔停到口。呢餐豐富的海鮮餐，我地兩個女仔都食到飽飽。不得不讚 Mr. Crab 的waiter,  waitress 都係好細有又有禮貌，會清楚介紹當日有邊啲食物係最新鮮，又會主動添熱水和清理裝海鮮殻的盤，令你食得企理。  …Read More

朗晴坊與朗豪坊為鄰，今晚我去個間餐廳叫Dream Cafe，在五樓。叫左個2 人餐，$288 包兩個湯或沙律，主菜兩份 同餐飲兩杯，又幾抵食喎。是日餐湯係薯仔湯，內有薯仔碎粒，有咬口。黑松露龍蝦意大利飯賣相雖然普通，但一上枱已經閒到好香的黑松露香味，食落先知原來將將龍蝦切碎到手指般的大小，方便進食。 我覺得呢個燒鱈魚配秘製汁真係充滿驚喜，鱈魚煎得外脆內滑，厚肉份量又夠多而且充滿油香，伴碟的炸薯角絕對唔可以睇少，香口又鬆脆，再加上一少份沙律，中和了薯角的油膩。…Read More

知道男友訂左枱今日中午去食海鮮，我地專登留肚，早餐只係食左個蘋果就算了。hehe...12 點前就黎到了，由於餐廳未開門，waiter  叫我地在門口先坐一坐，等佢再清潔下坐位先，睇下門口貼住的雜誌訪問，心目中都知道有咩想食了。好快被安排坐位了，正，近窗邊。餐牌簡潔易明，你要先決定海鮮係想熱食呀還是凍食。我地兩個揀左熱食，要5種海鮮 （HK$548），味道就跟左廚師推介的檸檬牛油汁味，清新一點。再另加半打生蠔同蟹餅。生蠔先黎，每款兩隻（每隻HK$52），順時針方向，第一款是來自Irish  的 A.M. imperial, 另兩款都係來自法國的 La Fleur Pour Carina 和 Gillardeau。我最喜歡是第一款，味道較清甜，肉質厚實，海水味較淡的。男友就喜歡第二款，肉質較清爽，有海水味但不過蓋過生蠔原有的味道。生蠔新鮮，我地都無加檸檬汁同洋蔥醋汁，只吃佢的鮮咪就夠了。12：30 左右，開始多人了，一家大細又有，男男又有，女女又有，十幾人的朋友聚會又有。食海鮮要落手落腳先好味，怕啲汁整污糟件衫？唔怕，到呢度比埋即棄圍裙你用，見到隔離枱的小朋友著起圍裙時，好開心，細路仔都係鍾意啲新鮮得意野。 食完生蠔後，蟹餅亦都熱辣辣上枱了，呢款路易斯安那特色蟹餅  （HK$ 95) ，內有洋蔥碎和大量新鮮的蟹肉，伴以麵包糠搓成蟹餅，先煎後焗，外脆內軟。一啖咬落去，啖啖都係一絲絲蟹肉，足料而沒有溝了大量的麵粉成形。鮮味十足，必食推介。一大袋，脹卜卜的海鮮盤都上枱了。一打開，檸檬和牛油的香味就撲鼻而來，除了海鮮外，亦有粟米、薯仔和腸仔粒。初頭以為同新加坡的一樣將所有海鮮倒在枱面上，一班人食真係好開心架。原來呢度係將袋海鮮開袋放在鐵盤上，咁樣仲好，因為可以保存食物的溫度。 海鮮有青口有扇貝有蜆同翡翠螺，極大隻！！！以上4款都鮮甜無沙，每款 4-6 件。。。yummy長腳蟹 （半邊），每條蟹腳都有我手指咁粗。拆殻後，成條蟹柳拉出黎，一啖都未食得晒呀。咁香的汁料點算好，餐廳比左一盤的香草麵包比我地用黎點汁食，亦可選擇蒜蓉包。真係一滴汁都唔放過呀。最後兩人share 一杯熱咖啡，為呢餐豐富的海鮮餐畫上完美的句號 。不得不讚。呢度啲Staff 好細心，會自動自覺幫你倒左裝殻的盅，refill water 同埋比個啲新的餐巾同濕紙巾你用，令你食得企理。  …Read More

Boxing day 來到又一城行街街，已有心理準備會好多人，離遠望到大大個牌寫住 muji cafe ，在香港開店多時，一直已經好想去試下但又未有機會，今日喺時侯了。攞左飛仔後，望下店內的裝修，貫徹無印的作風----簡約 （掛住傾計同食，完全忘記左影下個環境）。坐位空間感都充夠，可能樓底夠高，就算坐滿人都唔會感到焗束，適合情侶傾計。等左唔夠 5 分鐘己經有位，知道自己坐邊後需要再行去出面排隊落order ，模式有啲似以前學校canteen。 由於選擇實在太多，有熱和冷盤，午餐都未食就已經到tea time，所以我揀左個 4 餸set （HK$ 108），啱晒我眼闊肚窄，心多多想試多幾樣野食的我。先介紹12 點方向係芝麻醬拌菠菜冬菇 ---芝麻醬係一樣非常惹味 但又極度邪惡的醬汁，但佢沒有加上太多芝麻醬，只是剛剛好而已 ，菠菜清甜冬菇亦算香滑 。3 點是甜椒醬炸雞---外層只是輕輕炸過，保留肉汁，所以沒有厚厚的炸粉包圍，每一啖都係雞肉，酸酸甜甜，所以佢即使是全雞胸肉，亦唔會太滯。6點是牛蒡豆腐沙律---將牛蒡刨成幼絲，夠晒爽口，再加上大量的 baby spinish  同埋碎豆腐 。9點是新薯炒豚肉---我最喜歡呢個，豚肉餣得入味，薯仔同青紅椒都算清甜。另加十穀米 同餐湯，餐湯內又有大量的什菇，味道較清的麵豉湯，但都好味的。 翻查MUJI  CAFE  網站，原來十穀米係以富山越光米混合大麥、紅米、玄米、糯米、芝麻等十種穀物組合而成。可以補充維他命、礦物質、纖維，口感豐富又有益。 鍾意佢所有食物唔會有過多的調味，令到味道保持清新可口。男朋友揀的係light meal ，蛋批套餐（HK$88）配冷盤兩款，呢個餐可揀餐飲例如： 咖啡、橙汁、蘋果汁、紅茶這或烏龍茶。主打的蛋批，內有煙肉同洋蔥，熱辣辣，亦算香口，如果鍾意濃味食物，就未必會鍾意了。烤雜菌伴風乾蕃茄，試左呢度幾款食物都有大量的菇類，佢地的菇真係特別好味，又香又滑。相比下另一款冷盤的乳酪醬汁伴青蘋果沙律就有少少普通了。甜品係另外叫的，我地一人一樣揀左梳乎厘奄列 （HK$ 78）同無花果吉士布甸 （HK$40）。除了面層的新鮮無花果外，入面仲有一層無花果醬，賣相有少少似士多啤梨醬，吉士醬幼滑充滿蛋香，不過整體黎講，份量就較少了，唔係咁值呢個價錢。梳乎厘奄列最後先黎到，我對呢個甜品充滿期待，賣相我比佢滿分，跟左個cream 、糖醬、同朱古力醬。不過個奄列只係微暖，外層似 cream brulee 的焦糖咁脆脆地，好正。整體黎講都幾好味。  我仲拎埋個menu 返屋企，睇定下次再黎要食啲乜 ：P   …Read More

觀塘的餐廳好多時都在工廈樓上，呢個係觀塘的特色，今日同同事去鴻圖道90號樓上5 樓的Give Me Five 食午飯，貪佢有免費沙律吧任食。Set Lunch 價錢唔算貴，最平就咁食沙律＄68就有交易，仲包一杯餐飲，沙律吧、餐湯同任飲紅、白餐酒，呢個價錢仲免加一，邊度搵呀。沙律菜新鮮爽脆，仲有青瓜、粟米、蕃茄... ... 甜品抺茶蛋糕的抺茶味香濃，燉蛋加了雲呢拿，令到整體味道提升。蒜蓉法包烤得香脆惹味，我比100 分，encore 左一次，總共食左3 大塊。白酒任飲，自問酒量麻麻，下午仲要返去開會，都係唔好亂飲，一陣講錯野就大大鑊了。兩個食肉獸都點左肉眼扒，7 成熟都難得唔鞋口，尙算幼嫩，而且啖啖肉香，伴碟的炸薯角炸得香脆，蔬菜粒剛好中和了肉類和炸薯的肥膩坐落發現原來Give Me Five 設備充足，有得掉標，又可以打桌球，係放工後Happy Hour 的好地方。Mocha 上面印了Give Me Five 圖案，好有心思，味道不太甜，咖啡味香濃，唔錯唔錯。有人同自己Share 梗係叫多個甜品食下啦，呢個脆皮韓式抺茶雪糕泡芙，賣相一流，味道亦有水準，泡芙的外皮鬆脆，  有清甜的水果粒伴碟 。見到隔離枱的玉桂蘋果Pizza 都好吸引，下次要再黎試下。…Read More

間唔中都鍾意去花墟行下，未必會幫襯，但係見到五顏六色的花，心情都會愉快好多。今日原本想黎買花，lavender 就買唔到了，但比我搵到呢間賣有機食材的店舖。門面似外國舖頭，見到仲有果汁賣，即刻入去睇下。當我望住個黑板諗緊要杯乜野飲品好時，店員就介紹我飲 「綠汁」。即係羽衣甘藍＋哈蜜瓜＋蘋果汁，打正牌話係即打！無添加糖水！好味又有益都只係 35蚊一杯。入口甜甜地，係哈蜜瓜的甜，我就非常鍾意飲了，如果落少啲冰，無咁凍仲好。…Read More

一直恨食hotel icon 的buffet，聽講好難訂枱的要預早幾星期訂先有得食。早左3 星期book , 一星期前心急倒數，終於有得食啦。準時黎到後都係要排隊等一陣先可以被安排入助，明嘅明嘅。由於食tea buffet 只得兩小時，海鮮類例如蟹腳，一開始時係要排隊攞的，個度都排左我地差不多10分鐘。蟹腳攞得快，refill 都好快，所以可以唔駛排住先，先食其他野，慢慢再返轉頭攞。熱食類都好吸引，有個牛扒包，肉質鮮嫩。咖咉多士都烘得香脆好味。其實兩個鐘真係食得好趕，相都無時間影，臨尾15分鐘先走去甜品區攞左呢盤野，賣相真係好吸引呀。最鍾意係紅色同黃色呢兩樣，士多啤梨味同芒果味奶凍，面頭舖左大量鮮果，超級好味。埋單，連加一兩人 ＄722，每位即係$361。…Read More