Jut's Profile

較早前同朋友一行五人去尖沙咀食飯，朋友仔推介呢間唔錯就去左食。當日下午先打去book位，好彩都仲有位。我地當晚比原定時間早左半個鐘到，上到去見到全場滿座，店員示意叫我地夠鐘先再上去。順帶一題，餐廳係3樓，上去最好都係行樓梯，因為架𨋢令我有d不安。我地5個人嗌左好多野食，有雞軟骨，燒牛扒，壽司，牛舌，明太子玉子燒，帆立貝，炸雞，仲有炒麵。個人認為食物而言，全部都唔錯既，而個炒麵係比較出色既，油而不膩xd 牛舌都唔錯，熟度岩岩好，食落好有口感。帆立貝都幾抵食，一串有成三粒，仲張大大粒，每人食一串實在係太多，味度方面就不過不失咁。燒牛扒個人認為就一般，冇咩特別。而飲品方面，個人認為一般，唔建議飲cocktail。但因為野食唔錯，有機會我都會再去^^…Read More

食完晚餐當然要食返d飯後甜品啦哈哈，天氣開始熱，食日式冰都係一個唔錯既選擇。冰食落肚溶左就會變水，食完都覺得冇咁飽(好似係)。去到果陣已經九點幾，岩岩好仲有最後一張枱，四個人坐迫少少都ok。我地叫左兩款冰食，分別係甜酒味同草莓蜜柑味。草莓蜜柑味其實係一個以草莓味為冰底既冰，頂部放半個蜜柑。個冰係冇蜜柑味既，草莓冰味道就不過不失，甜得黎都有果肉香味既。而另外既甜酒味，個人認為幾好味，好似飲緊酒咁，但同時又俾到人透心涼既感覺，食落既感覺好得意。冰入面有d咖啡味既蛋糕碎，同個冰一齊食好夾，令個冰食落更加豐富。其實今次唔係我第一次食，之前都食過好幾次。我中意食呢度既冰係因為食到底每一啖都有味，唔會好似食緊普通冰咁。所以如果要食冰，我都幾推介呢間。…Read More

Lunchtime時間同同事出去食飯，同事推介左樂香園，又名蛇竇，聽講好多打工仔會落黎蛇王。公司行過去大約要10分鐘，行到過去已經好多人等緊，同事話好快排到，所以就排左隊。等左10-15分鐘左右，就入得去。坐底就要即刻叫，如果唔係就會耐左。我叫左滑蛋蝦仁飯，因為同事話蝦仁通常好快賣哂，所以我見仲有就即刻叫左。樂香園出名既其實仲有滑蛋叉燒飯，而我見到大部份人都係叫叉燒。等左一陣，我個飯好快就到左。由於我唔食蔥既關係，所以我碟飯係走左蔥的。眼見個蛋真係好滑，淋上豉油後就可以食。果然係名不虛傳，食落都係好滑好好味，蛋滑蝦又滑，配埋豉油真係好好味😋下次再去，要試埋滑蛋叉燒飯！…Read More

行過見到門口咁吸引，價錢又唔算貴，就買左杯試下，我揀左杯熱既珍珠鮮奶烏龍。因為無咩人既關係，好快就有得飲。好鍾意隻杯既design，顏色好鮮艷好靚。我叫果杯野飲係少甜既，飲落甜度我覺得係岩岩好，唔會太甜又唔會太淡，奶味唔重，但茶味就岩岩好，鳥龍味都幾出，而入面既珍珠好煙韌，唔太甜，好岩我呢d唔鍾意似甜野既人。成杯整體飲落唔錯，味道夾，唔會得個賣相吸引👍🏻係ifc買到3x蚊杯野飲其實相當抵飲。😜…Read More

平日夜晚去左銅鑼灣睇戲，睇戲前去左食上海姥姥。上海姥姥就係戲院隔離，超方便，好岩睇戲前後去食。我地兩個人食，叫左四樣野食，分別係乾煸四季豆，糟溜魚片，涼拌海蜇，同埋嫩雞煨麵。落完單無耐，個海蜇好快就到左(仲快過埋單)，由於我地揀左輕盈份量，個海蜇真係好輕盈(睇圖就會知)，海蜇味道比較淡D，但都OK既。食完海蜇，四季豆就到左，乾煸四季豆就不過不失。至於糟溜魚片，主角魚片整得超滑，但d雲耳好似烚完放入去咁，完全冇味，不過因為魚片夠滑所以整體都可以既。而嫩雞煨麵我個人覺得係幾好食，d湯好濃滑，麵既軟硬度岩岩好，食落口感唔錯，可惜d雞就鞋左少少，唔夠嫩口。整體黎講，上海姥姥既出品可以話係有保證既，幾正宗得黎價錢又唔貴。不過清潔方便就要做好少少，因為我地張枱有個位有少少痴笠。…Read More

夜晚係上環附近上完堂，突然好想食意粉，所以揾左間西餐食。差唔多‪八點半‬先去到，入到餐廳人唔多，等店員為我地安排座位。因為好想食意粉既關係，我一坐底就直接揭開左menu入面意粉果頁，一睇發現自己款款都想食哈哈，最後揀左芝士菠菜菠菜麵，另外再叫左個牛肝菌意大行飯同芝士煎蟹餅。先黎既係牛肝菌意大利飯，呢個我同男朋友都一致認同係三樣入面最好食，食起好濃郁，但又唔會太膩，上面仲有d青口，好新鮮。而芝士菠菜菠菜麵，顧名思義係用菠菜麵，再加芝士菠菜汁，呢款其實都好味，有菠菜味，不過味道就偏淡少少，好適合唔重口味既人，連我重口味都覺得幾好味。最後係芝士煎蟹餅，呢樣係我地一致認為最差既，佢雖然有蟹肉，但蟹咪完全唔出，淨係食到蛋味，好似食蛋餅咁。個人認為意粉同飯仍然值得一試😝…Read More

星期日下午去左赤柱既聖誕市集，真係好多人。行左一陣就諗住搵地方坐下，所以上左赤柱廣場搵下有冇coffee shop可以坐陣。入到赤柱廣場見到廣告牌指上4樓有waffle食，所以就沿著指示上左去。上到去發現間舖好細間，而門口又好多人，而大部份都係遊客，不過好在佢出面都有好多露天座位。買完野食，就搵位坐底左。食物方面，其實除左waffle，仲有雪糕pancake，我揀左玉桂蘋果新地窩夫。其實味道唔錯既，不過略嫌蘋果太乾，但配左雪糕就感覺良好左。我諗個waffle應該係預先整定，唔係好夠熱，如果可以熱d會更好。飲品方面，都有好多選擇，仲竟然有黑糖珍珠鮮奶，完全估佢唔到。我揀左latte而朋友就揀左黑糖珍珠鮮奶。始終唔係coffee shop，所以我都無expect太多。latte係有少少淡，而黑糖珍珠鮮奶就太甜，但味道當然唔可以同而家買到周圍既專賣店比較啦。雖然食物同飲品都係一般，但環境唔錯，室外既環境好舒服，感覺好空曠。坐係度飲杯野食個waffle，都係唔錯既選擇。…Read More

夜晚同朋友係銅鑼灣睇完戲想食少少野，朋友就提議食築地，話九點後半價好抵食。築地位於金百利樓上，非常易搵。上到去，由於客人唔多，所以我地隨便搵個位坐低左。九點後會有兩張叫野食既紙，一張係九點後半價，一張係九點後八五折。前姐主要係壽司，而後者主要係串燒同小食。因為唔係好肚餓，我地兩個人淨係點左十幾件壽司同兩串燒牛舌。壽司好快就送到，全部都好新鮮，好好食，特別係劍魚腩同三文魚！d軍艦都做得好好食。而串燒牛舌都好好味，岩岩燒起夠哂熱，又唔會燒得太耐。最後埋單先每人60蚊，真係好抵食！絕對係性價比高。…Read More

早前成日見到facebook有人推介呢間既pancake，而我自己真係好鍾意食pancake，睇相見到塊pancake咁厚，就捉左男朋友入去陪我食。去到咁岩有最後一張兩人枱唔洗等位，但坐底前就要買左野食先。本身食完飯諗住叫一個share唔洗咁飽，我只想食原味(Mandarin Honey)，不過佢有最低消費，要叫多樣先得，所以我地記叫多左個朱古力(Dark Chocolate)。坐底大概等左15分鐘就有得食，先黎既係原味，原味有跟一小壺蜂蜜。再黎既就係朱古力味。原味食落都尚算鬆軟，有蛋味，但真係好普通，似蛋糕多過pancake。而朱古力味食落就比原味好食少少，因為係黑朱古力，食落都幾濃朱古力味，而pancake上面既士多啤梨同個pancake都幾夾，只可惜pancake既口感都係麻麻地，唔係我想像中既咁鬆軟同香。總結係，我應該唔會再試，因為真係幾普通下，而男朋友就都話唔會再去。…Read More

在中環上班的我，平常吃過午餐後一般都會散散步，讓身體消化一下。這天在ifc裏閒逛時就看到了這家咖啡店門外有很多人排隊，所以就走到店外看看。走到咖啡店門前，已聞到很香的咖啡味。看到店名的%就想起了同事也曾推介過這家店，所以我也排隊買了一杯。看到menu上有兩種latte，一款是應該是普通的latte，而另一款是spanish latte。雖然不知道有甚麼分別，但我還是點了後者。點完付款後，我便在店內隨便看看，這間店還有賣一些咖啡豆及保溫杯之類的。看了一會，便聽到了叫號可以拿咖啡。咖啡有拉花的，可惜因為外帶關係，蓋上了杯蓋便看不到。但其實店裏也沒有座位。Spanish Latte的咖啡味不錯，奶也很香滑，溫度也很適中不燙口，難怪那麼多人光顧。或許可能是附近除了大型連鎖店外，沒有其他選擇吧。後記：事後跟朋友說起，她說這家原來是來自日本的咖啡店，在日本的售價比香港便宜。…Read More

星期六同屋企人出街食個lunch, 本來想食對面間日本野，好可惜竟然冇開門😭唯有試下呢間，開左咁耐今次都係第一次食。我叫左個set lunch係西京燒比目魚定食，餐有跟面豉湯送，仲叫多左串牛舌，而屋企人就叫左個豬扒拉麵同天婦羅拉麵。🍤牛舌唔錯，燒得岩岩好，可惜唔記得左影相。但我個定食就一般...比較港式，個比目魚賣相唔太吸引，仲要中間有一點冇左塊皮😅反而右下角隻炸子幾好味🤣個皮炸得脆脆地又幾香。…Read More

難得星期日放假，當然出下街約下friend啦。去西環碼頭欣賞日落同打卡前，同朋友想搵地方出黎hea下先，就咁岩搵到呢間coffee shop☕️睇相見到有室外座位就覺得好有feel,就決定去呢間。我地大約下午三四點去到，但係門口竟然見到full哂，即刻sad左一下。但入到去發現原來樓上仲有一層😝即刻叫左兩杯咖啡同甜品。上到去樓上都好舒服，因為座位唔多，感覺上好舒服同好闊落，好中意個環境，適合過一個悠閒既星期日。我地揀左梳化位坐，十分闊落。坐左一陣，店員就為我地送上左咖啡同甜品。我要左一杯latte,而我朋友要左一杯Flat White,再加上我地叫左一set四件既迷你撻。咖啡雖然一般，但迷你撻真的不錯，甜度剛好。店內環境舒適而且十分近香港大學站，得閒黎飲杯咖啡真心唔錯。…Read More