PolarPolarLam's Profile

如題。一入去個接待員一聽我哋話要寫紙，就大大力拎起啲紙掉畀我哋。跟手我哋寫完，佢仲拎住張紙睇咗勁耐，差啲讀埋出嚟，講嘢語氣仲要勁冇禮貌，嗰下真的感到私人被侵犯，非常不被尊重！雖然其他員工冇乜嘢，但呢個員工真係態度好差，好失望！另外啲嘢食又貴又得兩啖，真的要改善！…Read More

住喺呢度附近但第一次嚟食，又幾有驚喜喎！叫咗櫻花蝦炒飯同滷水墨魚飯，午市優惠墨魚飯仲有得平啲，四五十蚊就食到，櫻花蝦炒飯正價都只係65蚊，lunch 嚟講都過得去啦。櫻花蝦炒飯啲飯粒粒分明，每一粒都好有咬口，同埋真係好多蝦同葱， 所以每一啖都非常之香，簡單而好食咪就係呢啲囉。滷水墨魚飯都好食嘅，不過佢要點嗰個醋有少少酸，所以點少少就好啦，但啲墨魚好滑，亦都幾爽口，唔會太實太硬，街坊生意來講算係幾出色。唯一要批評嘅點係，店裏面嘅人都幾粗魯， 咁岩聽到佢哋講電話係咁爆粗，場面都幾尷尬。…Read More

香港越式法包好似唔算受歡迎，我諗係因為大家未試過真正好味嘅法包，因為就算喺越南都唔算易搵。呢間包店喺灣仔一條斜路上面，得幾個位坐，但冇乜人，自成一角都幾舒服。叫咗一個pork一個chicken，唔同款配料都唔會一樣，各有風味。個人比較推介pork，醬汁酸辣有致，配埋新鮮嘅紅蘿蔔同青瓜，好fresh好開胃，層次好豐富。另一個chicken都好味嘅，不過個配搭有啲似subway嘅肉丸款麵包，即係芝士，啖啖肉加蕃茄醬咁樣，都似pizza配搭。所以想食到越式包嘅fresh但又有另一層次嘅感受，記得唔好揀錯。…Read More

見到網上一直有好多人吹捧，所以嚟試下，畀過兩次機會佢，但感覺都只能夠說係不過不失。兩次都嗌左湯烏冬，如果喺日本食過好味嘅湯烏冬，就會知道就咁一個淨湯嘅烏冬已經係非常之簡單美味，但事實上係好難搵到嘅。佢個湯底冇乜特別，烏冬嘅質地係煙韌嘅，甚至乎係有啲硬度，需要落力咁樣咀嚼先食得到，但最失敗嘅地方係唔知佢淥得太過勁定係點，烏冬嘅表面唔夠爽滑，有少少粉粉地嘅感覺，而且第一次去食，個湯仲係唔夠熱嘅添，所以感覺都一般，除非真係好想食烏冬，同埋嚟開呢頭，如果唔係都唔會特登去食。…Read More

之前去過米走雞食，又貴又唔算真係好好食，一上到嚟見到係同一集團，已經覺得有少少中伏，不過既然到咗就試下佢啦。叫咗三個set dinner，豬，魚，羊。前菜係沙律，其實個底都係嗰啲菜，但上面加咗幾粒爆珠，唔係唔夾嘅，大家都酸酸甜甜，但真係有啲怪。有個餐湯，忌廉雞湯底，但落咗勁多椰子渣，都唔係好飲得慣。。主菜豬魚羊，個豬有少少老，但合格，魚同羊味道都唔差，但整體感覺有少少快餐咁heahea地，啲汁多到滿瀉，入得口嘅，不過不失咁啦。…Read More

見過好多人post相，想試咗好耐喇，今次嚟到中環一於拜訪一下！位置相當難搵，我諗平時正常人行一個新商場都唔會行到咁入，不過去到又真係見到有熟客專乘嚟幫襯，睇嚟都有返咁上下質素。買咗兩塊chocolate ，講真成四十蚊塊曲奇真係有啲唔捨得，不過買完又真係好開心，呢啲就係甜品嘅魔力！一塊即場食嘅有加熱，另塊拎走嘅就冇，個texture有少少似蛋糕質地，鬆鬆軟軟咁，甜度冇Mrs field嗰啲咁誇張，同埋有好多朱古力，好開心！不過個人就覺得唔熱嘅反而好過熱，因為啲邊位會硬身少少，食落就會同中間軟嘅位有個對比，亦較煙韌冇咁淋身。…Read More

一直都留意到佢social media 做得好好，所以好想試下，但無奈係要入到元朗咁遠，真係好難，不過啱啱放假終於有機會喇！試咗佢個燕麥低糖豆乳，28蚊一支有少少貴，但飲咗就知物有所值，正如你去過半島食嘢，就明點解一餐飯都覆收咁多錢，因為真係食得出用粒同整法都唔同，令成件事同一般上海嘢食店嘅豆漿好唔一樣。普通嗰啲通常好重甜味，質感較水，豆味飲得到但唔可以話出眾。但好豆呢支完全冇晒呢啲缺點，入口感覺較厚身，每啖都feel到好足料，而且豆味超濃超出，真係飲到豆嘅香味多過甜味好多，連底底嘅燕麥都好多，飲完真係會有飽足感，讚！唯一要彈嘅係個樽同啲燕麥好黐，返到屋企想洗樽拎去回收，但洗咗幾次都唔乾淨😂…Read More

喺香港要食到好食嘅刀削麵其實唔算容易，一來專係整刀削麵嘅食店好少，二來都真係冇乜邊間整得好食。以前住新界西嗰陣會鍾意食一間叫生記西山刀削麵，喺千色店附近，但自從搬嚟咗之後就冇乜再食，平時超市買嗰啲完全做唔到嗰種食入口好厚實嘅感覺，只能夠話吊下癮。不過發現咗呢間之後都幾開心，全部即整唔在講，配搭亦夠多選擇，份量亦夠大。煙韌度，厚實口感，同埋粗幼嘅感覺都好到位，湯底都match，但建議揀麻辣配料，大量蒜同有渣辣椒，幾香口，加好多分㗎！…Read More

入西貢一直都覺得好難搵到嘢食，因為好多café都好早閂門，剩返嘅通常係貴價西餐廳同泰國嘢，不過今次就發現咗呢間又平又好食嘢印度餐廳！佢唔算好多款可以揀，大致係幾款常見嘅咖哩、炒飯同kebab，另外亦有PIZZA，不過鍾意食羊嘅朋友就一定鍾意，因為好多嘢都可以揀配羊肉。叫咗個雞肉炒飯同一個咖哩配印度薄餅，入口有溫和而層次豐富嘅香料味，同埋雞肉好入味，非常香，亦都越食越開胃，而且咁樣兩個人食，都係total 150蚊左右，呢個價錢嚟講，味道真係有驚喜，下次去西貢不妨試下！…Read More

呢間牧羊少年喺單車館入面，玻璃窗夠晒大，喺度Hea夠晒舒服，有微微嘅陽光照住啲食物，心情好啲食嘢都開胃啲。佢之前有個好似係鴨胸炒意粉好好食，不過最近好食好似冇咗，唔知係咪轉咗MENU。卡邦尼長通粉幾Creamy，冇Beans果啲意粉咁膩，都OK；明太子意粉鮮味，唔錯；加錢就有得配藍莓乳酪沙冰，味道好，但啲冰有啲太多，搞到啲沙冰好似飲兩下就冇晒咁。整體嚟講食物都幾好食嘅，不過佢最正都係個位置，同埋坐得夠舒服，啲枱全部都大大張，唔會話好迫，所以Weekend嚟hea都幾好架。…Read More

喺得商場入面嘅日本菜，多數價錢都有返咁上下貴，呢間都有少少貴，不過比較最頂級果啲其實都可以接受，下午LUNCHTIME價錢大約$150-200一個人，如果食牛肉飯之類嘅單叫平價飯，仲可以$100左右走人添。至於食物質素，其實都有返咁上下，以呢個價錢嚟緊算係食得過。食過佢嘅海鮮飯、壽司Set同埋安格斯牛扒定食。講咗海鮮飯先啦，面頭有多款海鮮，款款都幾新鮮，偶然會有一兩舊麻麻地，但整體嚟講都唔會令人失望，呢度嘅飯好好食，醋酸味夠突出，飯粒粒粒分明、咬落有勁，食落喺口度會feel到佢哋每一粒都圓碌碌。壽司Set係高質嘅，不過就有啲貴，要成$200幾蚊，但唔係多舊，舊舊都係精緻細細粒，所以講CP值嘅話呢個有啲扣分。至於安格斯牛都好食，牛肉夠淋身，肉味香濃，但就略嫌啲汁太多，所以有啲咸，不過偶然想食日式牛定食，呢個都係可以接受嘅選擇。…Read More

第一次試古早蛋糕，一直想像佢係咪同香港嘅紙包蛋糕一樣味，原來口感軟好多，好似話食緊蛋糕味嘅棉花糖咁，幾有趣！今次揀咗個芝士味，以為佢會有流心，但點知唔係，如果有會更好。蛋糕面層會有少少芝士咸香，令味道層次更豐富，而硬落去就非常鬆軟，兼且感覺濕潤唔會乾，芝士味都足夠，都幾惹味，同埋食多咗都唔會膩，唔覺唔覺就食咗好多件。不過75蚊就覺得有啲貴，雖然其他舖頭都差唔多價錢，但好似一下子就食晒咁，要隔返一排先捨得再買嚕。…Read More

呢排成日買外賣，所以都好鍾意四出搜尋平、靚、正嘅嘢食，牛涮銅係心水選擇之一。以前淨係可以入去打邊爐，雖然都係百幾二百蚊任食，但感覺就係要聚會、盡地一舖暴食先會入去，而家外賣時短鍋，幾十年就食到打邊爐喇，絕對係我呢啲細胃王嘅福音。最鍾意佢個椰子雞同埋和風牛肉。椰子雞入面每次都係雞髀嚟，絕無欺場；雞肉夠滑，湯底清甜，仲有一片蕃茄、幾款菇同好多菜添，感覺好健康，想減肥又想食邊爐野揀呢款就Perfect，食完都冇罪惡感。而和風牛肉湯底就好甜，令到牛肉味更加突出，會忍唔住飲多兩啖；至於配料就款款鍋都係一樣，所以都好夠菜食，夠晒均衡呀。…Read More

以前佢喺新港城入面嘅時候覺得意粉幾好食，但之後搬咗位就冇乜再食喇～最近又去試返，連set餐都幾唔錯啵，可以繼續支持下！因為疫情關係，所以今次都係叫外賣，叫咗個烤雞麻醬烏冬套餐，幾十蚊就包晒餐湯、麵包、牛油、main course、嘢飲。湯我揀咗紅湯，夠味飲完唔口渴，可接受；麵包同牛油都正常；烏冬值得讚，因為入面好多菜，感覺好健康，麻醬調得啱啱好，唔會過咸，而且烤雞都夠大份，啖啖肉，外賣拎走返到屋企都唔乾，整體嚟講作為平民西式飯堂都合格有餘，喺美食沙漠有呢啲質素算係好好架喇。作為馬鞍山人會再去支持！…Read More

以前讀書果時成日食，貪佢夠平CP值又高，同埋質素都OK，不過做野之後就好少再食喇，最多都係偶然買下紅豆沙，都幾多料，所以感覺良好。今次知道佢有得賣水煮，趁最近冇得出街食飯，所以買嚟吊下癮～冇記錯佢好似寫住話要叮7分鐘，但我最後叮咗差唔多10分鐘先得，所以可能要自己調校一下時間。叮後之後即刻傳嚟陣陣辣味，淨係睇個樣已經覺得好辣，入面嘅料都唔HEA架，牛肉都有好多片，而家幾淋身；另外配料都有好多，好似大豆芽菜、木耳等等。食落辣度都有返咁上下，香料味好重，不過都真係幾油幾熱氣，食晒之後條脷都有少少腫，不過幾十蚊又可以吊下癮，都可以接受。…Read More