kikoaaaa's Profile

叁不館可以話係香港最有特色嘅火鍋店之一，佢呢度所有嘅裝修都充滿懷舊嘅氣氛。仲播住香港嘅懷舊金曲，啱晒黎打卡，同埋一班好朋友想當年～〈今晚卜卜蜆鍋〉$198呢個咁趣緻嘅名啱晒呢度嘅風格。打邊爐之前先飲啖湯，十分清甜嘅蜆味，有芽菜、芹菜煮，唔鍾意浸味嘅要避免啦～主角卜卜蜆粒粒都夠哂肥美，份量都好多，點少少豉油食個鮮味仲更出！〈頂級安格斯牛頸脊〉$268例牌一份例牌有12至14塊，油脂分布平均，肉質夠林，係一份十分新鮮嘅牛，不過略嫌唔夠牛味。〈新鮮肥鵝腸〉$96店員特別推薦嘅鵝腸，肥就唔係好夠啦，應該叫半肥瘦鵝腸。但新鮮度就十分足，煮一煮啱啱熟就好爽脆，處理得好好唔會有腸味，鍾意食鵝腸嘅千祈唔好錯過！〈手打五寶丸〉$98有哂豬肉、鯪魚、牛肉、墨魚同蝦丸。全部都好爽滑彈牙，重料打到起晒膠。除咗豬肉丸同墨魚丸稍微普通。〈炸響鈴〉雖然佢係即炸，但係油溫唔係好夠，導致唔夠香脆，口感同包裝嘅差唔多。———————————————————————總括而言，呢到嘅食物都高質、新鮮，但係就偏貴，抵唔抵食就見仁見智啦。…Read More

誤打誤撞試咗間咁出名嘅打卡店～今日嚟咗天后店〈芭樂優格蓋茶〉$39春日限定嘅芭樂！天氣熱真係好啱飲果茶，清涼解渴。小店特調嘅優格yogurt奶蓋比起傳統芝士奶蓋健康、清甜，同果茶真係好夾。芭樂加桂花烏龍嘅味道好清新，仲飲得出啖啖都係芭樂打出嚟嘅果汁，唔係香精哦～———————————————————————呢間店除咗果茶之外仲有優格果昔，見到整嗰時都好用心咁一層一層疊出紋路，下次一定要試吓！另外飲品唔會太甜，我平時飲開微糖，呢杯冇調整糖份都覺得啱啱好。…Read More

呢間超隱世嘅串燒店真係要住附近嘅街坊先知。一到夜晚就開始熱鬧，價錢唔太貴，啱晒一班好友一邊吹水一邊食串燒！〈日式炸蠔〉$30/4呢到除左串燒仲有好多日式食物、炸物、天婦羅等等。炸蠔油溫控制得好好，外皮好脆唔油膩，一口咬落去包住好多汁，十分推薦！〈和風墨魚咀〉$18〈雞肉串〉$15〈薩摩雞心串〉$15〈豬頸肉〉$20墨魚咀略嫌燒得唔夠，好多汁但唔夠味同唔夠爽。雞肉同豬頸肉都燒得啱啱好熟，仲有肉汁，好香燒烤味。雞心處理得好好，唔會好重內臟味，仲燒到有少少爽口。串燒汁都係偏甜嘅日式串燒汁，個人黎講就甜左少少啦。〈雞皮〉$12每次食串燒必叫雞皮！呢個雞皮燒得好脆，好似食零食咁，唔會油膩。〈牛香脷〉$28〈羊肉串〉$20〈安格斯肥牛串〉$40牛脷燒到焦焦地咁，味道夠重，可能要中意牛脷嘅人先接受到。羊肉好騷，羊肉愛好者表示喜歡！肥牛串係薄肥牛，掛左好多醬，太乾同較甜，唔推薦。〈蒜香孜然豬仔骨〉$40/2推薦！豬仔骨燒得啱啱好，外皮乾身但係入面肉汁爆出黎。同埋攞住舊骨咬好爽！〈醬爆魷魚鬚〉$28海鮮一樣做得出色。雖然個魷魚鬚無醬爆嘅感覺，但燒到焦焦地陣燒烤味好香，爽口。〈爽口虎蝦〉$38有手掌咁長嘅虎蝦，十分新鮮，熟度剛好，一啲都唔乾！〈翠肉瓜〉$12〈汁燒秋葵〉$14〈鮮菇〉$14到蔬菜真係不得不讚賞呢度嘅火候控制得好好，所有食物都唔會燒過龍。翠玉瓜同秋葵保留到汁水。只係鮮菇唔係好夠味。兩個人叫咗15樣嘢都已經好飽，如果唔係一定會食佢嘅燒香蕉同燒菠蘿！不過因為夜晚比較多人，叫咗嘅食物一次過燒一次過上，食唔切令到其他食物擺凍咗，可以分開兩次嗌。…Read More

早兩日好想食蠔，之後就搵到呢間唔算太貴嘅西餐廳，之前喺附近返工經過都見過呢間，就一於去試吓。葵涌附近都係工業區，lunch set 唔算太貴，都見到好多人lunch time嚟食。————————-———————-——————〈法國聖馬天尼 No.3〉Set$40/2 單叫$39/1雖然比較細隻但好新鮮，海水味唔重，偏鮮甜，有礦物味，$20一隻黎講質素好好值得一試！〈美國黃寶石 No.2〉$51/1呢隻比法國蠔就大少少，都好新鮮，肉質肥美，比法國蠔更清甜。但除左大隻少少，質素都同法國蠔差唔多，價錢就法國嗰隻抵好多。————————-———————-——————Set嘅沙律係胡麻醬沙律，正正常常，但係個人唔鍾意麻醬因為比較小朋友口味，如果用油醋就更好啦。意式香草麵包配上法國牛油都好出味，尤其係牛油真係同普通牛油有分別，比較香醇。餐湯係洋蔥湯，傳統法國洋蔥湯係會炒到啲洋蔥特別深色然後落湯水，呢個洋蔥湯就比較似啦。————————-———————-——————〈烤美國豬扒配燒烤汁菠蘿莎莎〉$128因為期待個菠蘿莎莎所以揀咗呢一個，不過有少少失望因為個菠蘿莎莎只係罐頭菠蘿，冇咩特別亦都提升唔到塊豬扒。我哋揀咗薯菜，做得幾出色，薯仔熟度啱啱好，保留少少爽嘅咬口。其他蔬菜都烤得剛好，好juicy。豬扒反而有少少遜色，熟咗少少導致無咩肉汁，有少少乾，不過真係好厚身好大塊。〈南瓜蟹子蟹肉意大利飯〉意大利飯煮得偏較身似係港式口味，甚至乎熟咗少少。Topping除咗蟹子仲加咗啲xo醬，但係比較少只係可以提升到嗰一啖嘅風味。雖然佢成個都係南瓜醬煮但可惜食唔到南瓜嗰種甜味。蟹肉同菇唔會太少。————————-———————-——————整體而言呢個價位算係做得唔錯，尤其是蠔真係新鮮，但係主菜可以再改善，係一間值得一試嘅西餐廳！…Read More