TG_foodie's Profile

星期六嘅尖沙咀人多車多，熱到唔想行，決定上海防道口嘅貓cafe抖下...周末收費$68/小時，比平日貴少少；3點左右上去人唔算多，但4點走嗰陣出面已經要等位，建議先book枱或者打電話問有冇walk in位先上去。今日啲主子有啲懶，好多都瞓緊，但始終貓多，總有幾隻可以玩😝鍾意呢度夠乾淨，店員不停黐走地下嘅塵同貓毛，店內兩邊有大玻璃，主子可以曬住太陽瞓覺，好舒服。客人涼住冷氣望落彌敦道，都好chill😛入場費包熱飲（咖啡機）同水；凍飲、三文治、蛋糕、曲奇就另外收費。今次試咗Latte、芒果梳打同松露朱古力蛋糕；雖然係預製，但味道唔差，蛋糕好軟身、朱古力味好濃，Latte同芒果梳打亦甜度適中，十幾蚊杯好抵飲。店內仲有好多board games可以玩，仲可即影即有機可用，$9/張，今次都影咗幾張😚有時行行吓街攰攰地，用$58/$68坐一個鐘，飲杯野、玩吓貓，喺尖沙咀嚟講係一個好抵玩嘅選擇。…Read More

兩個人食午餐，點咗和牛拉麵、豚肉生薑燒同三文魚刺身，食物質素ok, 但其中豚肉生薑燒就麻麻地，我以為主菜係生薑，豚肉只有肉碎，連一塊大少少嘅肉片都冇...整體覺得唔值呢個價錢...…Read More

喺大圍油站對面嘅甜品店，唔易搵，但好有驚喜……首推開心果碎碎麻糬波，麻糬好煙靭，開心果尖醬會死甜，有好香開心果味，重點係大大碟開心果脆脆，炒得好香，用麻糬波點醬、再黏上開心果脆脆，一啖食晒煙靭、香濃、香脆嘅口感，非常滿足！唯一要挑剔嘅係麻糬波太多，兩個人食都覺得好飽，如果一個人就好難試到，如果可以有半份、或者雙拼就更好，朋友其實好想試吓Oreo味，但都食唔到……另外試咗黑糖粉粿椰子、斑斕雪糕杯，黑糖粉粿似啫喱，配埋椰子同斑蘭雪糕，非常清新，啱晒夏天消暑！仲有焦糖脆脆布丁，平時布丁多數配焦糖醬，呢度加埋焦糖脆脆，小朋友一定鍾意。大圍有唔少甜品舖，呢間嘅Menu選擇唔算多，但都好有特色，例如有桃膠糖水、番薯糖水，其他舖未必有，值得一試。…Read More

過兩日情人節，但唔想同人迫，提早兩日去大圍一間小店食情人節套餐。餐單好豐富，燒物、刺身、壽司、料理樣樣有齊。兩款牛舌一個薄燒，連大蔥同蛋漿食可以混和油膩感；另一款牛舌心串燒，軟硬程度啱啱好，連埋露筍豚肉串同免治豬肉串，口感同味道都好豐富。炸雞份量好多，外脆內有肉汁，同他他醬好夾。重點係刺身同壽司呀！！！絕對係高級食材，全部都好新鮮，而且厚切，一啲都唔慳皮。首推海膽好鮮味，亦好大舊，食完好耐個口都有浸鮮味。我哋點多份日本生蠔，勁大勁creamy, 處理得非常仔細，加埋三文魚子更有口感。料理主食有肥牛烏冬，肥牛肥瘦均勻，湯底清而不膩，有飽足感。成餐唯一左口魚邊壽司略咸，可能醬汁重手咗啲...餐廳仲有二樓，我八卦上去望下，原來係超大一個廳，有埋電視音響，可以唱K, 好少有咁正嘅party venue, 如果有十個八個朋友食飯就最啱...（老細話食到天光都得）餐廳仲有好多日本酒，多款精緻靚酒杯配月桂冠，完美！☺️咁多嘢食只係$798，淨係刺身壽司都值回票價！…Read More

禾輋邨街市外的小店，舖仔細細，食物高質，而家價錢抵食。三文魚、油甘魚、吞拿魚、海膽都好新鮮，單件壽司同樓上壽司郎差唔多價，但大件好多。平日夜晚堂食唔多人，不過見佢都多外賣單...街坊可以多多支持😋…Read More

寶勒巷新開左間火鍋店，今晚去試試。見到menu, 應該主打海鮮，但我唔食海鮮，好彩有澳洲和牛。舖面走大班人聚餐格局，枱好大、座位闊落，兩邊牆有大壁畫，感覺舒服企理。先食雞煲，可以揀辣度；我哋揀咗中辣，雞厚肉、唔乾，配料都好入味。之後上湯底，我哋揀咗雞白湯；個湯超級好飲！絕對唔係啱啱滾起嗰隻，係煲咗好多個鐘，勁濃味嘅雞湯；老闆都叫我哋飲兩碗先，唔好嘥咗個湯。食物叫咗兩款澳洲和牛，牛上腦比較有咬感，肉質嫩滑；另一款牛腹心肉味較濃，可以唔點醬食。本來想試埋雪芭，但冇貨...佢哋暫時只做晚巿，有英超直播，一班男人嚟睇波打邊爐飲酒應該好正😊…Read More

weekday lunch hour嚟食，超級少人🥲menu每個名都好fun, 舖頭裝修色彩繽紛，充滿玩味。食物方面，牛扒做到7成熟，肉質有咬感，但偏瘦，如果鍾意油脂就未必啱；跟沙律、蝦片、細碗烏冬，份量啱啱好；不過男仔應該唔夠食。牛油果沙冰好好飲，解渴消暑必飲👍🏼整體坐得舒服，可以傾偈，會再嚟🤗…Read More

呢間餐廳係中式裝修，但食日式串燒、燒物同西餐😅 pizza都有😅午餐蒜香吞拿魚意粉，份量足，煮法有少少中式，有紅椒絲喺面，味道係正常的。另外試咗吉列炸蠔，好脆、炸粉唔多，好食👍🏼最後食燒雞皮，脆過薯片，調味又香，超級好味👍🏼👍🏼👍🏼下次會再試其他串燒…Read More

平日lunch, 餐廳好少人，可以隨意影相打卡。set lunch 係3 courses, 前菜可以揀生蠔，好大隻、好厚肉，亦，好鮮味；main course 揀咗牛面頰同帶子，正常水準，又唔算好驚艷；甜品絕對係重點，可以揀trolley, 即係任食，而且都好精緻好味，都有十隻款選擇，食甜品都抵。…Read More

雖然係連鎖店，但西貢呢間好有街坊小店feel... 店內只有兩個職員哥哥，會同小朋友吹水，俾小朋友睇整pizza, 好溫馨呢！pizza即叫即整，熱辣辣，不過料唔太黐餅底...chicken wing係單骨，一份10隻，好脆、辣度適中，可以點黑松露醬，超級好食，食多一盒都得...最後點埋signature doughnut, 又係即叫即炸，有流心爆醬效果，面頭嘅糖霜勁邪惡，但又好好食，食完好滿足。…Read More

top blade嘅牛扒真係好高水準，百幾蚊8安士好抵食，仲有舊燒蒜頭都好好味...午餐扒叫7成熟，煎出嚟絕對教材級，冇血、有紅肉，出面冇乜餐廳煎到呢個效果。味道方面，牛略帶臊味，配鹽同rosemary好香，脂肪唔多，啖啖肉... 好好味！…Read More

睇戲前食少少野...雪糕朱古力：雪糕係3.6，好香好滑，朱古力就正正常常，唔會太甜...另外點左牛油果蛋沙律牛角包，擺盤超級靚，味道亦好，作為牛油果控好滿足。餐廳以bakery、輕食、甜品為主，枱比較細，枱與枱之間比較窄，會聽晒側邊啲人講嘢... 想傾偈就唔太適合。…Read More

沙田人對陳根記絕對有情意結。佢搬到石門後，我今日先第一次食。頭抽豉油雞好入味、雞好滑，我覺得keep到以前喺禾輋嘅水準。避風塘雞翼，啲雞翼略嫌乾身、細隻，但蒜底好正，打包返屋企繼續用。價錢係貴嘅，冇計啦人哋出咗名嘛...不過點到唔係以前冬菇亭嘅感覺，香港應該保育大排檔...…Read More

餐廳位置好隱蔽，要開住google map先搵到…舖頭地方唔大，但佈置好舒服，有家庭式餐廳嘅溫暖feel☺️食物方面，今晚食安格斯牛扒餐同三重芝士澳洲和牛漢堡。安格斯牛扒煎得啱啱好，紅肉但唔帶血，脂肪好香；配沙律、溫泉蛋、湯同飯；湯係忌廉雜錦海鮮湯，啲料多到可以做一個餸，飲湯都可以飽。漢堡好厚，好新鮮，一路食一路有香濃肉汁流出😋牛整體高質，而且選擇好多，牛丼、牛肉烏冬、卡巴都有。牛好食之餘，飲品都唔錯。我哋叫咗花生醬奶茶、花生醬latte, 花生醬味啱啱好，唔會搶咗奶茶同latte本身嘅味；而且飲品好大杯，杯latte大碗過碗湯同飯😂老細話佢哋調咖啡個份量一定要沖咁大杯，好抵飲呀！今次仲有好多野試唔到，下次一定再幫襯👍🏼…Read More

沙田中價日本嘢…正常味道，如果有多少少低價選擇會更好…例如壽司盛最平要$200幾，如果有$200以下會更好…今餐叫咗壽司盛、和牛炒飯、玉子壽司、3種串燒、三文魚薄切、吞拿魚蓉脆脆，埋單$900幾，唔知貴喺邊🥲…Read More