sukiyan0331's Profile

29/9係我同老公嘅結婚紀念日，老公嗜好海鮮，原本想同老公去西貢食海鮮，但根據過往經驗，西貢地點偏遠，加上西貢嘅海鮮餐廳價格頗貴，大部份侍應態度差，無理由用錢買難受，正當我苦惱之際，突然醒起觀塘~御膳，地點近、價錢合理、服務態度良好……綜合這些優點，即刻打電話預訂。今日係正日(29/9)，同老公來到觀塘~御膳，首先裝修典雅乾淨，給予舒服既感覺。餐廳員工有禮招待，因為訂位時巳一早決定食花龍蝦餐(兩位用，全單＄1000，免加一)，所以餐廳員工詢問我們是否現在上菜，我們急不及待地回答 ： 是啊！麻辣手撕雞無骨又啖啖肉，配合爽脆青瓜絲，香辣好味，絕對係開胃前菜既好選擇。大蜆什菌豆腐湯每喝一口湯，都嘗到大蜆既鮮甜，而且超多什菌同豆腐，口感超豐富。金銀蒜蒸龍躉腩改為薑葱炒龍躉腩龍躉腩外脆内滑，肉質好彈牙，用薑葱炒好惹味。花龍蝦有3種煮法選擇 ： 芝士、香煎同上湯，我哋鍾意清清地，所以揀上湯。從賣相已睇到色香味俱全，嘩嘩嘩……花龍蝦肉質潔白細嫩，味道鮮美，份量十足，令人回味無窮。白胡椒爆炒南非鮑魚鮑魚夠稔身，鮮美Q彈，混着白胡椒，口味濃烈。蒜蓉粉絲蒸蟶子皇大大隻蟶子，蒸得剛好彈牙，粉絲入味軟身有汁，加上炒過既蒜蓉，好味道到不得了。潮州鹵水鵝(例牌)改為香芒沙律大蝦球4隻(這個只需加幾十蚊，超抵食)這個沙律好清新，味道酸甜，蝦肉甜美，非常新鮮，好適合這炎熱天氣。蟹油銀牙炒麵炒麵有光澤，用蟹油炒，特別香噴噴，食得津津有味。是日甜品~雲呢拿布丁口感綿密，香滑清甜，為這餐劃上完美句號。綜合來說，無論環境、服務態度、食物味道，都做得非常有水準，是一間值得再去既私房菜餐廳。…Read More

對於Bar & Restaurant 既印象不太好，因之前曾兩、三次去過太子區既Bar & Restaurant，飲品還不錯，但食物質素一般，始終未能留下深刻印象…………今日和即將結婚既閠蜜見面傾計飯聚，我們相約於銅鑼灣，在她的帶領下，到了Ember，她話前排未來老公帶她來，不但有美酒佳餚，仲有live band，環境又靚，好適合情侣、三五知己聚會，見她這麽推介，我就和她在這裡用餐。Ember既裝潢非常時髦，牆壁上既特色設計配合暗黑既燈光，讓整個空間顯得有格調既感覺。北海道鮮帶子扁意粉煙肉·勝瓜·雲耳半乾車厘茄·香辣蒜片汁($168)新鮮又肥美既北海道帶子煎到金黃色，未食都已經流晒口水 ; 香辣蒜片汁煮得不太濃杰，反而令扁意粉完全吸收，好惹味，連蒜片、煙肉、勝瓜、雲耳及車厘茄一起食，豐富滿分。烤西班牙黑毛豬扒荷蘭豆·手指薯·菠蘿莎莎($258)肉質帶橡果甘香、軟稔，滋味持久，令人一試難忘 ; 配料也出色，尤其菠蘿莎莎，微酸既甜菠蘿，少辣既紅辣椒，平衡烤肉既鮮味。Mango Tannin($66)×2這個由芒果漿、烏龍茶及粒粒西米結合已成既飲品，酸甜適中，口感清爽，好適合下班後細味或與老友相聚享用。這裡食物好味，侍應既服務態度又好，令人好滿意。…Read More

剛剛和老公結束日本之旅，回到香港只不過幾日時間，已經非常懷念當地既抹茶美食，好想好想好想繼續食……擁有有質素既抹茶飲品同食品、又有美味既主食，即時想起HeSheEat。闊別一年無來位於旺角白布街既HeSheEat，唔知味道能否保持高質？未食之前，先睇睇環境，依舊咁靚。墨魚汁魷魚扁意粉($108)雖然食到個咀同棚牙黑蚊蚊，但味道真的不錯，是值得的，彈牙既魷魚配合帶點微辣香口既扁意粉，再擠出少少檸檬汁，味道更清新。綠茶心太軟($62)x2外表鬆脆，內裡有暖笠笠既抹茶流心，那濃濃既抹茶香味，令人難忘，加上豆腐雪糕及開心果碎，口感絕對滿分。Dinner Set主食:扒虎蝦芝士汁鮮蛋意大利麵($108)這個鮮蛋意大利麵，口感似伊麵，比意大利粉掛上更多香濃芝士汁，加上爽彈既虎蝦，超好味。奶昔或沙冰+$25(每份套餐可追加最多兩款附加食品或飲品) : 抹茶奶昔x2在這炎熱既夏天，喝上這冰冷絲滑既抹茶奶昔，實在令人太興奮。原來自己既擔心係多餘，HeSheEat既食物不但止美味，尤其係甜品做得非常出色，令我尋回日本既味道。…Read More

在朋友帶領下，今日來到觀塘成業工業大廈，一間名字非常特別既餐廳~高興。來到這餐廳，心情真係會特別高興，首先地方夠大，位多，無侷促感 ; 裝修好有懷舊feel, 好多物件都令你好新奇，係打卡、影靚相放社交平台既好地方，加上有流行曲一直播放著，啱晒情侣、三五知己或一大班朋友聚會。Menu上既食物款式多，除了有主食、意粉、risotto，還有咖喱飯同烏冬鍋，飲品種類也多，有梳打特飲、有機梳打、沙冰、咖啡、冰茶、朱古力，小食、沙律、全日早餐、甜品，仲有高興pancake，咁多美食俾你揀，高興到不多了。柚子大蝦沙律($62)這個沙律色彩繽紛，每一口都包含酸、咸、甜幾種滋味，再加上彈牙大蝦，吃起來，份外滋味。意式蕃茄帶子意大利粉($72)天氣悶熱，食惹味開胃蕃茄既菜式最好，配合爽甜帶子，味道冇得輸。蕃茄蝦乾大蝦意大利粉($72)辣辣地，嗜辣朋友啱晒，蝦乾及大蝦令意粉充滿海鮮味道，好惹味，yummy。巧克力奶泡雪糕($52)有細細粒巧古力脆脆，又有順滑巧古力奶泡，加上巧克力雪糕，完全進入巧克力奇妙世界，好滿足。抹茶拿鐵($32)幾香滑，唔會過甜，抹茶味道足夠。…Read More

今日我同老公無意中在長沙灣發現一間新開既拉麵店~匠一麵屋，我兩口子都好耐無食拉麵，一於以拉麵作為今晚既晚餐。幸好來時時間尚早，還有座位。觀望這裏裝潢，簡潔明亮，有幾幅日本poster掛於牆上，沒有太多花巧擺設，配合播放既日本流行曲，感覺挺舒服自在。拉麵店一般都會有冰水、紙巾、醬料等提供，這裡也有。拉麵餐單紙既選擇有醬油雞骨湯及豚骨濃湯，可根據個人口味，加減配料 ; 小食有餃子及唐揚炸雞，最特別係有叉燒炒飯及叉燒丼。列脆口餃子四隻($22)肉餡鮮嫩，那脆脆香香嘅口感，令人一口接一口，yummy。特製他他醬唐揚炸雞($28)外皮鹹酥香脆，鮮嫩雞肉充滿醬汁既香氣，加上特製他他醬，口感豐富。醬油雞骨湯叉燒拉麵($93)湯頭有雞湯嘅清香，也有醬油既醇香，喝多幾口也不覺膩 ; 麵條富有彈性，好易入口 ; 叉燒肉厚度適中，有肉汁甜味 ; 糖心旦煮得不錯，好味。豚骨濃湯炙燒叉燒拉麵($98)叉燒肥度適中，炙燒香味很不錯 ; 這個湯很濃厚，配合軟滑既白麵條，味覺滿足。CC Lemon($14)及烏龍茶($14)雖然拉麵店開業不久，但客人絡繹不絕，而且我兩口子離開時，還見到門口有不少客人等待中，果然係口碑不錯。…Read More

星期日多數留在家中休息，難得公司安排我星期一放假，所以今個星期日老公陪我到尖沙咀行吓街，食吓野，輕鬆一下。尖沙咀行街實在無乜特別，來來去去都是海港城、新港、i-square，但係食個方面，就好驚喜了，老公帶我到亞士厘道27号捷利商業大廈八樓既Amitie Kitchen。原來老公一早已訂位，所以我兩口子很快就可坐下，周圍望一望，這裡地方算大，還有VIP房，燈光屬昏暗，聲音靜靜的，感覺幾舒服，只是過了15分鐘，這差不多坐滿，建議大家要預早電話訂坐。研究了一輪餐牌，決定要一個晚市套餐及一個日本松葉蟹膏系列嘅意粉。是日餐湯 : 南瓜忌廉湯南瓜味道相當濃厚，非常creamy，好好味餐包有三款咁多，有軟熟法式麵包、有充滿牛油香既牛角酥、有香脆餅塊，仲有牛油及藍莓醬，製作認真，完全滿足味蕾。前菜 : 香煎西班牙墨魚仔伴辣肉腸味道酸酸甜甜，好醒胃。晚市套餐 : 芝士BBQ醬燒美國豬仔骨(三支骨及)($198)豬仔骨極軟熟、肉汁豐富，非常惹味，令人食指大動。蟹肉意大利麵伴松葉蟹膏忌廉汁($148)超滿蟹味，意粉已吸收濃香美味醬汁，加上足料既蟹肉及蟹膏，每啖都順滑可口。凍抹茶牛奶咖啡(跟餐加$20)入口順滑，同時有咖啡及抹茶香味，雙重享受。抹茶紅豆冰($38)紅豆軟綿，抹茶味濃郁，甜度適中，作為抹茶控既我超鍾意。看見這有個甜品凍櫃，入面有好多款旦糕，我好想食，但老公話好飽，唯有下次同班姊妹再來，擦餐勁。…Read More

一直都知道有很多美食店位於佐敦區，我這個為食兵今日就發掘了一間精品咖啡廳~Studio Caffeine。它的環境很捧，給人有一種輕鬆、優閒、自在既空間感，觀望周圍既客人，有些愉快地交談中，有些慢慢地用著手提電腦工作中，有些玩著手機，大家都放下忙碌的腳步，享受著這慢活及洗滌心靈既moment。咖啡是這里嘅主角，當然要品嚐一下，而我同老公都係抹茶控，所以點了兩杯抹茶鮮奶咖啡($52)，除了有抹茶香氣，咖啡非常細緻，味道醇香，跟連鎖式咖啡店比較，水準更高，難怪咖啡廳門口處擺放咖啡師既多項獎狀。除了咖啡味道出色之外，食物也弄得不錯。All day breakfast(超級)$115話明超級，份量真係super，食材非常豐富，有煙肉、紐倫堡腸、煙熏黑椒牛肉、炒蛋、煙三文魚、黑松露薯蓉、大蘑菇、紅黃車厘茄、新鮮水果、沙律菜、秘制焗豆、法式奶油麵包(加$15升級至牛角酥)，牛角酥層次分明、啖啖牛油香之餘，更加非常鬆脆 ，另一驚喜係黑松露薯蓉，口感非常滑溜，加上黑鬆露，味道更誘惑 。這份勁量早餐，食得出有落心機，CP值很高。泰式冬陰功配海蝦扁意粉($95)海蝦肉質彈牙爽滑，扁意粉已全吸收冬陰功，入口清酸香辣，好醒胃，好味到停不了口。這裡還有多款甜點、蛋糕及鬆餅，不過我兩口子實在太飽，唯有留待下次品嚐。 …Read More

今日同老公去觀塘apm行街街， 行完成個商場，時間已係晚上六點三十分，係時候醫肚，但觀塘apm食肆眾多， 有中西餐廳、泰菜館、拉麵店、pizza店等等，我兩口子正在苦惱之際，行經Made in HK Restaurant，見餐廳環境闊落及高格調之餘，當大部分餐廳用餐時間只有90分鐘，而這裡竟有120分鐘，這個實屬難能可貴，所以我倆也不作他想，就決定食呢間。服務殷勤嘅侍應安排我倆坐於窗口位置，這個正合老公心意，另外這裡也有室外座位，感覺寫意舒服，也是不錯嘅選擇。平時在茶餐廳既食物，這裡也有，但款式更多、更特別、更精緻，例如流心西多士、 焗鴛鴦炒飯、鐵板瑞士汁和牛意粉，所以menu上註明"港式味道、精緻製造"。鐵板晚餐實在好吸引，我倆要了一個龍蝦及肉眼扒餐($258)， 龍蝦肉質爽滑，汁多鮮甜，加上以芝士焗制，美味無窮 ; 肉眼扒選擇五成熟，大大塊之餘，肉腍味濃，加上酸忌廉焗薯，令人食指大動。是日餐湯~粟米火腿忌廉湯充滿牛油及忌廉嘅香氣，加上香甜既粟米及鹹鹹的火腿，一啖湯一啖餐包，超好味。餐飲~凍鮮奶咖啡(套餐升級優惠 加$8)面層覆滿細膩誘惑的鮮奶泡沫， 和醇香既咖啡調合，每一口都令人著迷，咖啡控一定愛上。另外散叫香蒜蟹肉意粉($98)蟹肉份量不小，蒜味香濃，意粉軟硬適中，真係色香味俱全。我係抹茶控，甜品係唔會放過既， 綠茶心太軟配意大利雪糕(綠茶口味)($68)這個綠茶心太軟好特別，內裡有紅豆蓉，襯埋香濃幼滑嘅綠茶雪糕， 一凍一熱，絕對係perfect match。溫馨提示 : 餐廳以walk in形式入座，時間大概去到七點，已座無虛席了，建議大家最好早些來到。…Read More

銅鑼灣有咩美食？其實除了中、西餐，拉麵之外，今日俾我同朋友揾到一間由早到晚都可品嚐到既籠太子點心專門店。點心店裝潢新穎，牆身用上兩個主色調-白色同某T字品牌既青藍色，帶來清新及優雅既感覺，而燈飾既設計更是特別，亮眼既白燈下有兩隻雀仔面對面站著，甚是可愛 ; 座位寬敞舒適，沒有侷促感。這裡提供即製點心，款式五花八門，實在係樣樣都想食。煎蝦膠釀茄子($22)蝦膠鮮味爽彈，茄子軟腍多汁，一軟一彈，加上自家制醬汁，口感豐富。原隻鮑魚燒賣($34兩隻)燒賣上有原隻鮑魚，鮑魚咬落有嚼勁 ; 份量大既燒賣，一人一粒，啱啱好。籠太子蝦餃皇($15兩隻)內餡飽滿，外皮彈牙。原隻鮮蝦腸($30)腸粉滑捋捋，蝦肉鮮甜又大隻， 沾上豉油，滋味無窮。家鄉咸水角($20)渾身金黃，脹卜卜 ; 外脆內糯，餡料豐富，超好味。黑椒金錢肚($29)黑椒汁濃郁，少少辣，金錢肚夠腍又入晒味，好惹味。瑤柱灌湯餃($30)湯頭鮮甜清香，灌湯餃入面有瑤柱、鮮蝦、冬菇、肉碎等餡料，一咬開，鮮香並至，蘸醋吃，美味不過。下次去銅鑼灣食飯，又多了這間美味點心專門店選擇喇。…Read More

老公生日當然想搵一間環境、食物都不錯嘅餐廳，但老公第二日要返工，又想搵一間近屋企嘅餐廳，要符合呢兩個條件，實在需要喺openrice度搜索，結果揾到一間位於黃大仙現崇山既Olive Era。Olive Era 位於現崇山商場地下，距離黃大仙地鐵站只有幾分鐘路程，非常便利。餐廳有室內同室外，室外嘅環境帶有羅曼蒂克feeling，而室內嘅感覺就華麗一點，加上有梳化位置，坐得較為舒服，不過無論你坐室內定室外，眼見侍應們都會殷勤地招待客人，服務非常週到，他們不但為客人影相，又會同客人交談 ; 冷氣凍，會主動安排客人坐另一個位置，實在貼心。Menu選擇都幾豐富，最後由壽星老公選擇兩個dinner set。椰菜花忌廉湯好creamy，不但有足料既椰菜花，還有薯仔嘅香氣，非常滋味。龍蝦濃湯(套餐升級加$38)蝦味香濃，色澤又鮮豔，睇見都流口水。條狀形既餐包，邊位脆但内香軟，又方便食用，我好like。半殼帶子、大蝦長通粉配香蒜車厘茄汁($168)大蝦、帶子新鮮爽甜，最重要係香蒜車厘茄汁，會令人停不了口。德國蜜糖芥末烤鹹豬手($188)上桌是鹹豬手巳斬件，方便進食， 外皮很脆，肉不會太鹹，那甜甜嘅蜜糖芥末汁也做得不錯，而且有我喜愛嘅厚切薯條，值得向大家推介。凍檸檬茶及宇治抹茶奶昔($38)宇治抹茶奶昔賣相吸引，抹茶味香濃，奶份量也適中，甜度剛好。北海道紅豆芝士蛋糕($38)香滑細膩既芝士配多顆清香既北海道紅豆，甜而不膩，滋味無窮 ; 另外可安排餐廳寫字，例如生日快樂、週年紀念……等，老公見到有此安排，特別開心。這餐壽星老公很滿意，仲話下次坐室外浪漫一下。…Read More

每逢新年前，工作於服務性行業既我都會相當忙碌，做到頭昏腦脹，實在需要美食來慰藉身心，今日就同老公來到銅鑼灣Notte享受佳餚。Notte除了佳餚，環境真係一絕， 這裡是4個包廂組成，私隱度極高 ;裝潢似足法國小酒館，頗有情調， 加上大玻璃窗，飽覽維港夜景， 夠曬浪漫，拍拖一流。由於係食私房菜(意大利菜)，用餐時間大概要2小時多，客人可選擇4、5或6道菜式，價錢由每位$388至$988不等，任君選擇。麵包籃分別有兩款 : 乾果提子包，附有大量乾果及提子，味道甜甜的，包質鬆軟，反而全麥包就香脆，兩款味道都不錯。帕馬火腿蜜瓜.水牛芝士.蕃茄帕馬火腿配蜜瓜已經係絕配，再加上美味水牛芝士及新鮮蕃茄，作為前菜，清新非常。日本磯燒鮑魚配蘿蔔濃郁湯汁裹住鮑魚，肉質非常鮮嫩彈牙，配甜甜既蘿蔔，口感豐富。香煎北海道帶子配粟米蘑菇蓉.帕馬火腿北海道帶子又大又厚肉，爽滑鮮甜，仲要配埋有帕馬火腿同粟米蘑菇蓉，真係食到舐舐脷。西蘭花忌廉湯配香辣蝦賣相非常精緻，彈牙香辣蝦有兩大隻， 加上西蘭花湯好creamy，多重享受。野菇清湯湯頭充滿濃郁既野菇味，啖啖清香，啖啖好味。黑松露.蘑菇.芝士.闊條麵侍應生即場磨芝士，同客人富有互動 ; 意粉口感煙韌，富有彈性，加上黑松露既獨有香氣，實在好味。美國肉眼扒配紅酒汁粉嫩既紅肉好juicy，配紅酒汁，好正。慢煮豬里脊肉豬里脊肉保留鮮嫩多汁，食落口感一流。提拉米蘇味道集齊香、滑、甜、膩、柔中帶軟，不會一味死甜，可媲美酒店既製成品。我另外要daily surprise dessert，由於見到甜品個賣相實在太靚，掛住觀賞，完全忘記詢問這甜品既名稱，我只可以講真係太太太好味喇，朱古力味超濃郁，蛋糕質感超軟滑，餅底超香脆，美味程度滿分。整體而言，環境超靚、食物高質、服務不錯，我同老公一定會再來。…Read More

本人一直對樓上cafe嘅食物質素都不抱有期望，如果唔係有相熟朋友推介，我也不會貿然上樓上cafe進餐，但當我和老公今日來到Rimi Cafe，將不好嘅印象一一打破。Rimi Cafe 位於登打士廣場20樓， 地方相當闊落，有梳化區，有榻榻米房，餐廳還提供多種類型嘅boardgame及多本不同國家嘅旅遊書籍，務求令每位客人可以係一個好舒適嘅環境裏面，盡情享受、盡情玩樂、盡情傾談。看看menu，有小食，有main course(可加$19或$38轉set)，仲要有party set，最厲害係drink list，超多款。首先嚟嘅係餐湯同蒜蓉包，餐湯係南瓜湯，顏色亮麗飽滿，口味柔滑香甜，配合香脆可口既蒜蓉包，味道很棒。接住嚟嘅係意式鮮茄辣肉腸燴意大利粉($108)，辣肉腸帶有強烈嘅香辣味，當中嘅油份精華，配以清新嘅番茄，令這意粉嘅味道更有層次。鮮蝦蒜辣炒天使麵($125)，天使麵充滿香辣蒜香味，配上彈牙嘅蝦肉，真是好吃極了。最後係餐飲，百香果綠茶，百香自然嘅酸甜，與綠茶融合得恰到好處，清香冰涼好順口，想一飲再飲。綠茶牛奶(要補$8)， 綠茶同牛奶味調製得好平衡，不會互搶， 甜度剛好，令人回味無窮。題外話，這裏經常full booking，大家記得要電話訂座或網上訂座， 免得白行一趟。…Read More

今日趁放假去做facial，迎接除夕同元旦，以靚靚嘅姿態同老公、朋友見面。 做facial期間，美容院嘅老闆娘又介紹一間話係我杯茶嘅餐廳畀我~Cafe Paradise，橫掂做完facial都會同老公食晚飯，而且又喺美容院附近，一於就去呢間。當我同老公去到Cafe Paradise， 見到餐廳門外內嘅裝修、裝飾，真係超喜歡，絕對係我杯茶，好有聖誕氣氛，更愛那旋轉木馬嘅裝飾，好典雅，重拾起小時候於主題樂園遊玩時嘅回憶。打開餐牌時，也會看到旋轉木馬嘅蹤影，超靚，女士們見到實喜歡。享受環境嘅同時也享受以下嘅美食:蟹籽蟹棒忌廉意大利寬條麵($73)蟹籽多有咬口，蟹棒多而且鮮甜， 每條寬條麵都掛上忌廉汁，實在太太太美味了。辣辣芝麻雞翼($48)炸得外皮金黃酥脆，咬開內裏藏著雪白嫩滑嘅雞肉，香口非常。凍鮮奶咖啡($39)咖啡好濃郁，鮮奶香滑，不會太甜。焦糖鮮奶咖啡($35)拉花好漂亮，咖啡配上焦糖，口感更豐富，更有層次，啖啖回味。老公不但稱讚這裏食物好味道， 還讚賞這裏嘅侍應態度好nice，好helpful，真係要多謝美容院老闆娘嘅好介紹。…Read More

雖然今日係冬至嘅日子，但我已於一星期前同家人食飯了，所以今日又可以同老公撐枱腳。老公要去太子買野，係附近有我同閨蜜曾去過既Home Sweet Home餐廳，好想回味一下，於是帶老公前往。諗住今日係大時大節，應該無咁多人食西餐，原來這個想法是錯誤的，當我來到Home Sweet Home門口，看到餐廳內巳差不多爆滿，幸好我兩口子來早一步才有位，否則要好似其他後來的客人，要等候到7:30後才可入座，所以大家最好預先訂位呀。講番餐廳環境先，內外都咁靚，門外既燈飾像晚上既星星，閃吓閃吓 ，加上聖誕樹及聖誕掛飾，充滿節日氣氛 ; 餐廳內燈光昏暗，牆壁嘅兩邊掛上了大型酒架，佈滿 聖誕裝飾，播放著悦耳嘅英文歌，營造出高貴、有氣派、令人開心嘅氣氛。由於之前吃過嘅dinner set，覺得好味，所以也不多想，直接要了兩個dinner set。前菜 : 墨魚籽青瓜海膽、 金箔北海道刺身帶子、龍蝦濃湯海膽味道甘甜，質感細膩，配合墨魚籽，好清爽。帶子肉厚味甜，極富彈性。龍蝦湯質感濃稠，味道鮮濃。主菜 : 大蝦拿破崙意粉($188)大蝦有5隻多，意粉軟硬度剛好，醬汁酸甜開胃又美味。主菜 : 扒澳洲M5和牛肉眼.燒汁.燒薯.時菜($408)肉味濃郁，加上雪花般嘅油花，幼嫩中帶有少許咬口。餐飲 : 桂花水果蜜有淡淡嘅水果同桂花香氣，低熱量，無負擔，加上用玻璃壺同玻璃杯盛載，並用燃點著嘅蠟燭保暖著，暖身又暖心之餘，外觀超靚。餐飲 : 鮮奶咖啡口感香醇又香滑，老公好like。題外話，餐廳服務員好有禮貌，好helpful，無論幾忙，都會幫客人斟水。…Read More

因為老公有潔癖又好怕燒烤嘅食物，所以我倆每年只能和朋友BBQ一次，每當12月份來臨，我都滿心歡喜，因係燒烤旺月，又可以約一大班朋友開開心心去燒烤。今年朋友介紹去白石燒烤，朋友話環境正、地方乾淨，包我老公冇投訴。我哋一行九人分別駕車浩浩蕩蕩出發，大概六時到達，由於朋友早前已電話訂座，我哋喺入口隔離嘅收銀處付款後，有禮嘅職員帶領入座， 我哋被安排坐喺看到海景嘅位置，真係超正。環境靚、場地大之餘，看看周圍嘅枱櫈、地下，都比一般燒烤場乾淨，而且枱與枱之間有相當距離，唔會迫夾。我哋揀選了要十人海鮮套餐(星期一至五$1588，星期六、日及公眾假期$1788)， 食物包括彈牙海中蝦、蒜蓉半殼帶子、元朗米埔烏頭王、蜜汁叉燒、雞扒、豬扒、雞中翼、三寶丸、鮑汁芝味芝士腸、雞肉腸、豚肉腸、迷你日本甜薯同香甜粟米 ; 飲品包括水十支及汽水十罐，任君選擇，另外包括燒烤網、鉗一套、十人餐具包一份、燒烤叉十支、蜜糖一支、炭兩包，非常齊全，抵讚！每一款嘅美食都係獨立包裝，非常衛生，而且味道調較得好好，燒烤場還提供一本教學册，教大家燒烤方法、秘訣及注意事項。有幾款美食要特別推介俾大家 : 彈牙海中蝦體型大，肉質鮮甜，爽口彈牙， 而且用燒嘅方法，特別香。蒜蓉半殼帶子BBQ燒帶子，不是什麼特別事情，但這間燒烤場所提供嘅帶子，除了有蒜蓉外，還有粉絲，根據佢嘅教學方法燒烤，真係零舍好味、鮮甜。元朗米埔烏頭魚跟住教學册嘅方法用鹽燒，不用錫紙包，燒出來嘅魚肉爽口彈牙D，一點兒也不腥，大家食到舐舐脷。(掛住食，唔記得影相添)雞扒口味有四款咁多，香茅、黑椒、泰式、咖哩，啖啖肉，夠厚身，每款都嫩滑美味。迷你日本甜薯好少會有bbq場提供迷你版蕃薯，味道香甜，食得方便之餘，唔會因為食蕃薯食到滯。這裏還提供多項嘅遊戲設施，例如有扭蛋機、夾公仔機、飛鏢機等， 適合不同年齡人士，帶給客人無窮嘅歡樂。最令我喜出望外嘅係廁所，不止乾淨，格數又多，但不會逼夾。我哋一大班人喺白石燒烤場度過了一個非常開心嘅晚上，大家還約定下次要再來，而老公也很滿意這既各項設施及乾淨度，話一年來兩、三次也不成問題，實在太好了。…Read More