Neckless's Profile

同friend打機打到十點幾， 見有啲口痕，附近又有間松記，唔係唔食呀嘛？之前嚟親都係食薑汁撞奶， 今次決定試下新嘢！ 見到佢玻璃上面貼住 榴戀著你， 畀你食倒個字但又好似有啲夾硬嚟咁，不過唔緊要，撞啱我又鍾意食榴槤， 就揀咗佢嘅榴槤班戟加榴槤雪糕同埋榴槤奶凍！佢啲榴槤班戟既餡係真榴槤果肉嚟㗎喎，面頭個榴槤雪糕都好有榴槤香味。 個榴槤奶凍雖然個賣相麻麻地， 但係食落都算有少少驚喜， 佢個奶凍嘅奶味都幾重，面頭放左榴槤果肉， 果肉上面再放咗啲脆卜卜嘅類似可可米嘅嘢， 成個配搭口感都唔錯， 如果榴槤pancake同埋榴槤奶凍要我二揀一嘅話我會揀榴槤奶凍！ 因為平少少吖嘛！…Read More

元朗餐廳食得多，就係呢一間未食過， 難得一個唔係好食得辣既friend都話無所謂， 咁就一於試下佢啦！我哋三個人叫咗三個餸一個前菜， 有蒜泥白肉，口水雞，牙籤羊肉串仲有干煸肥腸， 全部都係開胃嘢，咁就梗係要叫返三碗白飯啦！呢幾個餸真係冇得輸， 唔好睇佢咁多辣椒，其實都唔係話十分辣， 我覺得一般食到少少辣嘅人都冇問題， 我哋嗌咗好似都唔夠五分鐘，啲餸就嚟齊，真係好快手， 味道我就唔多講喇， 因為講多都無謂， 唔試過係唔會知道有幾好食架。最後我哋仲加咗個炸饅頭收尾， 呢個炸饅頭真係不得了， 食完一個係會想即刻食第二個， 食完第二個係會覺得唔夠喉，想即刻嗌多份！成餐三個人加埋食咗445蚊， 除番開每人都係百五蚊左右，都幾抵食！會再去！…Read More

本來都諗住聖誕節喺屋企一丁友靜靜地過， 費事出去同人逼， 咁但係有人約到，又冇理由一個人過聖誕咁孤獨既。約左兩個friend諗住食六點前早割個價錢，我同其中一個friend四點幾就到咗，見倒已經排緊隊， 問返店員， 原來冇得禁飛要排隊， 但係唔知點解排排下又有得禁喎， 咁嗰啲排緊隊嘅就開始嘈， 安排都有少少混亂， 不過好彩唔係十分多人， 全部人都入到去。差唔多五點兩個字嘅時候個friend仲未到，個店員同我哋講如果再唔入坐就可能要六點半先有位， 咁我哋就唯有入咗去先啦， 但係呢度係入坐開始計90分鐘嘅， 咁個friend遲到就蝕咗少少時間畀佢囉。坐低冇耐個friend就到啦，好彩都唔使好多時間畀佢。我哋未嗌嘢佢就先嚟再一人一份頭盤，有雞有豬有牛。我哋三條友都算大食，所以一嚟就嗌咗好多嘢， 其中我覺得最值得推介嘅，就係佢嘅香蔥溫泉玉子飯， 一啖肉一啖飯， 最高享受！ 其次我哋叫得最多嘅就係牛肋肉！燒到後期我哋換過一次網， 換完之後又再繼續燒！我來過幾次幾時嘅雪糕都係唔同味嘅， 今次就係香芋味， 唔係特別好味但係都唔差。其實90分鐘真係唔多夠， 畀多半個鐘我哋，應該可以叫多三轉， 食完都只係六點半真係好早，成餐三個人加埋$884.4， 而家睇返啲相，我都即刻想去多次，完！…Read More

今日嚟試新嘢亞蘇爾， 澳門菜。呢間亞蘇爾應該係今個月先新開既， 之前行咗幾次yoho都冇見過， 咁見到有新嘢就梗係要試下啦！一入去嘅第一個感覺， 就係覺得佢個抽風系統好似唔係咁好， 有少少油煙味同埋有少少煙霧瀰漫嘅感覺。我哋兩個人嗌咗兩個餐， 一個係路氹香脆豬扒包配薯條沙律， 另一個係辣肉腸松露芝士豬扒包配薯條沙律， 冇跟餐飲，檯面有樽水，兩個杯，自己嚟。等食嘅同時周圍望望個環境， 出面有幾張枱不過冇人，我諗平時冇咁凍應該可以出去坐下。先嚟咗個路氹香脆豬扒包， 個賣相都唔錯， 不過個薯條好明顯係擺咗好耐， 已經唔熱唔脆之餘仲好實， 雖然個調味料唔錯但係口感扣曬分。不過始終主角都係個豬扒包， 豬扒包真係有驚喜， 豬扒厚得嚟又唔會好實，好多汁，真係第一次食豬扒覺得好味過食牛扒。大約五分鐘之後， 個辣肉腸松露芝士豬扒包先到， 竟然呢一碟嘅薯條又唔同喎， 熱辣辣新鮮炸起， 同之前嗰碟嘅薯條真係差天共地， 好味好多喎， 希望佢注意下下次唔好攞啲擺咗好耐嘅薯條出嚟俾客人食啦！呢個辣肉腸松露芝士汁真係不得了， 個感覺完全係將凱撒沙律上面嘅芝士加埋松露嘅味道濃縮咗做醬汁，然之後放咗喺塊豬扒上面， 佢的芝士味相當之濃郁， 有淡淡嘅松露味， 成件事配合起上嚟好似食緊漢堡包咁，好新奇， 塊豬扒唔使講啦，都係一樣咁好味！我就真係覺得好味到想連隻碟都食埋，一個餐嘅份量足夠食飽一個正常嘅男人， 如果細食少少嘅女仔都可能會食唔曬！呢一餐兩個人食咗161蚊包埋加一！…Read More

寶城嘅蛋撻真係一試難忘， 每一次經過寶城都會聞到新鮮出爐蛋撻嘅香味， 而家呢種香港傳統嘅餅舖都越嚟越少啦， 大集團連鎖鋪總有一間喺左近， 傳統小店都可以堅持到而家實在難得。今日食完晏經過， 本來都已經飽到捧住個肚㗎喇， 但係聞到都係忍唔住要買返個蛋撻。佢嘅牛油蛋撻嘅餅皮好鬆化，唔會太實又唔會太鬆散， 好香牛油味， 佢啲蛋漿味道又唔會太甜， 蛋味濃。平時買就會畀埋袋嘅， 不過今日諗住買完即刻食所以都係環保啲慳番個膠袋啦， 如果買夠四隻仲有埋盒添。…Read More

基本上每個禮拜六/日晏晝諗唔倒食咩， 就會出元朗食雲貴風， 唔係因為佢特別好食，只不過係佢唔係特別難食。今日都係按照我平時嘅慣例，叫咗個涼拌米線中辣配辣腩肉同埋豬腸加杯凍檸茶少甜少冰。呢度有個唔好處就係佢嘅辣度每次都有啲唔同， 第一次嚟食嘅時候叫中辣， 第二次嚟嘅時候都係叫咗中辣，但係竟然辣到我食到出曬汗， 所以唔係好食得辣嘅，我會建議叫小辣試下先， 唔夠辣先再加辣。撇除佢嘅辣度問題， 佢嘅米線同埋配料都唔錯嘅， 米線嘅軟硬度適中， 有少少彈牙， 配料我會推薦佢嘅辣腩肉， 如果唔食得辣嘅話，佢啲腩肉都有唔辣可以選擇， 不過個味道就會有少少唔同， 如果揀拌米線嘅話仲會有埋炸醬。一個麵兩個餸再加多杯凍飲都係43蚊。…Read More