openriceboy's Profile

有朋友話我知灣仔有間茶軒，今日無帶飯所以諗住試試，上網睇左openrice上既餐牌做足功課，預先打左電話去餐廳叫定外賣，職員態度ok,佢話10分鐘就有得拎！去到餐廳已經有得拎啦！叫左個lunch set 肉躁雞絲飯，因為我唔飲凍野，所以加左錢要左熱既水蜜桃紅茶(少甜）。番到公司滿心期待試新野，點知一開蓋已經唔係咁好胃口…d肉躁超級超級多油，係超級超級多！有半隻滷蛋浸左喺d油度…雞絲係凍既，飯都唔熱，肉躁味道ok既…我只可以夾d肉粒食，因為真係太油…水蜜桃茶就一般，飲到應該係比正常少甜左。但食完飯之後，成個下午都好口渴…味精好重呀…好難頂…真係唔會再食呢間…PS 外賣盒加2蚊…Read More

咁岩黎開呢頭，是但搵左間西餐廳食lunch。去到時唔使等位可以直入攞位坐。Lunch set 包沙律、餐湯、主菜、飲品同甜品，聽落幾抵食。點左一個牛肋條石鍋飯同一個龍脷柳配意粉。食物好快送上，但份量都偏少。沙律正常，蕃茄湯唔算好熱，牛肉幾淋有牛味，尚算不錯。煎魚配上龍蝦汁，都幾好味。意粉加左蒜片，都幾惹味，不過真係得好少…甜品係一粒朱古力蛋糕，朱古力味香濃，夠鬆軟。最後食曬成個餐都唔係好夠飽….出去再食過！…Read More

之前食過幾次都ok,諗住再食唔會中伏，點知….中午時段門外依然有幾丁友排隊，不過好快就會排到。係排隊期間，店員已經幫我地落左單，所以一入餐廳基本上坐企兩分鐘已經有野食。兩個人分別叫左六個不同既餸，諗住share黎食。一食就知餐廳犯左大忌，就係食物完全唔熱….凍冰冰叫人點食…如果食物唔熱，味道幾好都無用！好彩叫左杯熱杯暖一暖胃…食物味道而言，薯仔牛肉的薯仔比較咸，薯波因為落左紅菜頭，會有d草青味。Anyway,唔推介……Read More

銅鑼灣晚上人山人海，我地今次揀左食呢間食餃子，可以唔使等位。呢間餐廳分店好多，之前都試過唔錯，今次再encore。呢度餃子款式好多，不過本人比較鍾情大眾口味，所以點左兩碗麵，揀左粟米同椰菜餃，另加7隻煎白菜餃。等左10分鐘，食物終於送上，佢既麵其實份量較少，而且係酸酸地，唔知係咩麵🤔講番餃子，粟米餃就好有咬口，非常足料。椰菜餃菜同肉既比例適中，一試回味。最抵讚係煎餃，因為佢係煎得岩岩口，有香口既脆皮，但一定唔會過燶，點埋醋黎食，係非常惹味！不過可惜餐廳飲品唔多岩飲，職員亦講到明無水提供，唯有食完出去買野飲……Read More

即興係銅鑼灣覓食，走左上去銅鑼灣廣場，一層有三間餐廳，睇左餐牌，揀左食西餐。可以即刻walk-in。個時六點零鐘，一個人都無，竟然咁少人。我地安排入座其中一張二人檯，雖然店內完全無客….我地揀左自由配搭menu,即係個主菜係可以揀一個sauce, 一個飯或意粉類，同一個配料。而主菜會跟一個餐湯、一個沙律同一杯飲品，另外仲可以加一蚊要個甜品。我地點左個黑松露忌廉意大利飯配雞肉，同一個蕃茄汁扁意粉配鴨胸肉。好可惜餐牌上既墨汁麵無得叫，餐廳應該一早同客人講，唔係叫到先話無….餐湯同沙律好快送上。餐湯係忌廉湯，好夠熱。沙律就略嫌太多醋，有點過酸，不過佢d爆爆珠幾得意。飲品係普通檸茶奶茶，好快都送上。第一款主菜出場。食物好夠熱，蕃茄汁唔錯，鴨胸肉都算多，算係唔錯。意大利飯個汁就飯有d分離既感覺，飯有d起粒，唔似平時食開咁，同埋入而勁多菇，食唔到幾多雞肉，而且食兩口已經好膩。我地見加$1可以要埋甜品，就諗住食埋啦。點知其實係一口蛋糕。我知道$1唔應該期望太多，但係咁點解要加$1呢。會唔會可以係個餐度包埋？仲有一樣，就係其實間餐廳勁多位，但佢偏偏安排一檯客人坐我地隔離。疫情期間，雖然有板但都應該諗下係咪可以將客人分開少少坐呢？…Read More

約朋友食飯，但食飯時間得一個鐘，就諗住去d唔使等既餐廳，點知果然，唔使等位既餐廳都一定有伏。我地去到餐廳立即就有位坐，環境係普通茶餐廳裝修。我地點左上海排骨同糖醋排骨，可配湯麵、擔擔麵、白飯、菜飯，飲品要再另外加錢。好奇怪，上海排骨上面加左薑蔥蓉，呢個係咩食法呢？ 而糖醋排骨好多水，同肥，跟平時食開既好唔同。 湯麵幾油下，就埋有d咸，都幾重口味，同埋份量好少。結果，成個下晝不停飲水，證明呢餐飯好重味精。再吃？不了！…Read More

之前都食過將軍澳中心同尖沙咀分店，知道呢間餐廳既水準不錯，今次再黎康城食晚餐，諗住回味一下。平日店內有好多吉位，我同門口黑色衫店員講話兩位，咁佢無出聲，就拎左兩個餐牌入左去餐廳，我以為佢帶位就照跟佢入去，點知行多兩步佢就好惡話要量體溫同掃安心出行呀。其實客人一時唔記得好正常，可以一開始就提醒一下，無必要粒聲唔出行行下先話客人…晚市有二人套餐，包兩份湯/沙律，兩個main course,同兩杯特飲。我地點左湯、食肉獸pizza同三文魚意粉。特飲我問左職員可唔可以轉其他奶茶檸水個d,佢話「得！加錢囉！」，呢d咩態度….個湯好快上檯，係磨菇湯，好熱好重菇味。之後個pizza同意粉都好快有。意粉夠creamy，pizza都好熱辣辣，有好多辣肉腸，非常juicy。但係我地未食完之際，個職員已經想收野，非常滋擾，到最後我地飲緊野既時候，連我地d餐具同碟都俾佢收埋曬，極之趕客。希望餐廳可以再培訓一下員工，如果唔係再好食都未必想黎食。…Read More

餐廳位於河畔，景色優美，但可能因為人流較少，餐廳內嘅客人都唔係好多，可以直接入餐廳就座。餐廳環境非常一般，衞生麻麻，地下都仲有好多垃圾未清理…我地叫左兩份常餐，都係普通茶記會出現既野。叫完餐3分鐘就有嘢食啦，真係好快！雪菜肉絲米有d淡，火腿正常，煎蛋唔記得叫熟蛋🤦🏻‍♀️，餐包一般唔熱的，檸茶個茶底都係偏淡。沙嗲牛肉米粉一般，火腿奄列都幾多油。進食期間有職員走埋黎收嘢，好似唔係幾好…同埋…隻蛋有蛋殼留低…餐廳最好嘅地方係：可以用八達通付款…其餘地方都有代改進！…Read More

餐廳外貌裝修簡約，門外餐牌又好似好多選擇咁，既然寫住試業中就一於入去試試佢。環境唔算迫，因為可能時間尚早未坐滿人。沒有午市套餐，只有散叫主食、小食同飲品，主打日式料理。我哋叫左一個溫泉蛋叉燒丼、一個日式雞扒丼，一杯丸子牛奶抹茶同一杯寒天柚子綠茶。牛奶抹茶不能少甜。飲品好快送上，牛奶抹奶果真頗甜，柚子綠茶正常。雞扒味道一般，飯面鋪了一層飯素，所以d飯幾好食，但唔太夠熱。溫泉蛋有點過生，叉燒半肥瘦，非常一般。飯量都幾多，所以都唔係好食得曬。總結，因為沒有套餐要散叫，價錢會偏貴。飲品叫左主食可以減8蚊，但都係偏貴。食物一般，如果經過都可以試下、但不是嗰種特登去食嘅餐廳。…Read More

The Lohas有幾間日本餐廳，今次要試試呢間。雖然佢既外賣餐牌放到好大，個樣都幾吸引，但以外賣黎講價錢都算貴，因為佢無set。今次用外賣app買，因為有promotion code先同到店買差唔多價錢。點左生薑燒豚肉飯，15分鐘後拎得。從相片可見，佢d豚肉燒到有d燶，但還可以接受。佢d肉都幾多，而且好juicy，飯熱辣辣，沾滿左濃濃既肉汁，味道不錯！整個飯份量都幾多，我自己都食唔曬。有機會都可以encore!…Read More

今日lunch揀左呢間，上網睇見佢lunch set 都幾多選擇，但服務欠佳，今日要試一試佢既虛實。佢lunch set 既menu 印曬係鋪檯張紙度，好客易睇。選擇都幾多既，我order 左一個燒雞肉，佢無寫配d咩，但我諗起碼有個飯吧😂。同事叫左飯卷。 未上主菜，職員送上好多碟韓式小食，泡菜、芽菜、茄子、薯仔、米粉....不過我地想留肚食主菜，都無咩點食到呢幾碟。食物等侯時間唔算太耐，雞肉用鐵板上，熱辣辣，配左白飯同湯。湯較咸，唔夠熱，雞肉都ok,不過食完有d口渴。 同事對佢個飯卷無咩comment, 但見佢食唔曬。中途有個職員送上一碗碗啡色既液體，同事話係醋，之後我地就無要到。到左埋單，叫左好耐先有人幫忙收錢，搞到番工遲左幾分鐘，真係好慢...睇落去全場得兩個人做野，呢點真係有待改善。到最後我地走，入左𨋢既時候，有個職員伸手入黎俾餐廳coupon...有d奇怪...…Read More

疫情底下，已經好耐無去旅行，為左一解旅行引，今日揀左食好出名既馬來西亞餐廳，尋找馬拉風味。餐廳都算闊落，中午時間都有位坐直入。員工好好俾左張檯我地擺野。佢無餐叫，要散叫。我地點左湯咖哩米通粉、怡保雞絲河、檸檬薏米水、柑桔話梅水同埋一個咖央多士。點完唔夠一分鐘，已經有野飲，食物亦隨即送上。雞絲河幾好食，好多雞絲。米通粉煙煙韌韌，好得意。不過食物份量唔算大，大食人士未必夠飽。薏米水偏甜，柑桔水都幾酸下，非常刺激味蕾。咖央多士最尾上檯，佢個醬好食，但就幾凍下，多士烤得唔錯。整體餐廳食物質素不錯，而且有好多款式，下次可以再試。…Read More

用openrice apps order左外賣，15分鐘後取，準時去到發現已經包裝完成，拎得！Order左兩個便當，包裝都非常精美。隨餐附送麵豉湯，正常係味道，有海帶油揚。便當內既餃子炸過左龍，皮好硬。豚肉肥瘦一半一半，食到有酒味，茄汁麻麻，好可惜飯唔夠熱。糖心蛋幾好食，好流心。而炸南瓜餅係成個便當最好味既野，好想食多件。沙律有少少醋配搭，火腿一般。餐廳有不同便當，配以不同配菜，下次可再一試其他便當。…Read More

熊小館新開張無耐，顧名思義應該都係食裝修，sell熊仔擺設，但因為我買外賣，所以就比較著重食物質素。唔知係咪因為新開張，員工未熟習，企左係收銀等左一陣個職員先得閒幫我落單。點左假日餐，一個芝士菠菜龍利柳焗炒飯，一個蜜桃去骨雞腿焗炒飯，跟餐一杯熱檸茶一杯熱奶茶。等左15分鐘拎得。佢份量唔算多，兩個盒都唔滿，飲品又係得2/3杯。食食下先記得影相...d炒飯底一舊舊，完全唔乾身。同埋雞腿係勁少肉，雞皮就有一大堆....睇黎店鋪除左裝修外，都應該放多d心機落食物度...…Read More

新商場開幕，貪食仔特登走黎睇睇，順便食個飯。拎左飛行左一個圈就有位，坐二人卡位爽呀！星期日都有午市套餐。點左越式碟頭飯同墨魚餅撈檬，撈檬好快上檯，但個飯就等左勁爆耐，催左好多次先有。碟頭飯有太陽蛋、札肉同豬扒，豬扒幾香口入味，札肉都ok，但飯量太少，同埋等既時間實在太耐。檬粉既墨魚餅份量亦好少，得四個半塊，炸得有點over左，檬粉量亦好少。跟餐有杯飲品，食完成個餐唔算飽，而且見到樓面職員有點亂，可能因為新開既關係，唔夠熟練。總括而言，餐廳性價比唔高。…Read More