Bon Appetit_Yan's Profile

星期六嘅灣仔一向較靜, 而喺呢個時勢, 就更顯冷清。 要挽救經濟, 我會選擇從小店入手, 呢間係我個list嘅其中之一, 原因好簡單:用心。今晚兩個人嚟, 先食春卷, 鬆脆唔油膩, 值得一提嘅係團隊對醬料好講究, 所用嘅魚露唔會死咸, 混入少許蒜蓉, 很提鮮。接住就係夠晒鑊氣嘅炒菜心, 老闆話加咗魚露炒, 再加埋蒜粒同炸蒜末, 好快就清晒。主食叫咗乳豬同埋肝醬雞卷, 前者外皮鬆脆, 冇肥膏啖啖肉, 同自家調配嘅青檸汁好夾, 鍾意濃味少少嘅就可以點葱蒜汁; 後者就更有驚喜, 雞肉好嫩, 食落好juicy而且滲出陣陣香茅味, 加上豬肝醬就更香, 但一啲都唔膩。呢兩度菜都配咗少少酸蘿蔔同菜絲balance下, 都好新鮮, 唔係求其搭上去。平時食越南菜都係湯河、檬粉同粉卷之類(呢度都有, 湯粉嘅湯頭一流, 檬粉係靚料), 嚟咗呢度先知有咁多選擇。老闆很友善, 會介紹菜式嘅用料同烹調方法, like!良心小店猶在, 想繼續有得食, 就要用實際行動支持。…Read More

午餐多以麵食為主, 車仔麵就能夠滿足我貪心嘅慾望。 對我嚟講, 好嘅車仔麵係:要有自家調製、能夠獨當一面嘅餸;入貨嘅麵食都唔可以馬虎, 嗰啲充滿醶水味嘅麵、淋到碎嘅河粉千祈唔好預我, 佢哋絕對會令碗麵大大減分;最後, 有埋好嘅湯底就無敵喇~蒙麵, 唔止具備上面三個條件, 而且仲有顆不斷求進嘅心: 自家創嘅「蒙麵」麵條, QQ又掛湯; 而前幾日嚟仲見到紙仔有新嘢-新鮮花蛤!海鮮控嘅我即刻點嚟試吓, 結果冇令我失望, 肉唔算好大粒但好鮮甜, 一粒沙都冇, 而且數量都唔少。 (但有一點, 我唔係好sure的, 就係呢啲真係花蛤定係蜆肉? 我嘗試喺網上搜尋有關教學, 不過睇住啲相再對比下實物之後都係分唔到, 哈哈~總之覺得好食就算了)另外, 我仲叫咗必點嘅鹵水豆腐(滑得嚟唔會淡茂茂)、五香牛筋(粗大得嚟夠稔又入味)同埋時菜(通菜洗得乾淨,碌得啱啱好)。 咁都未夠, 我都話咗我係貪心㗎啦, 再上一次嚟嘅時候見到隔離位食客叫嘅多春魚係即叫即煎, 今次就叫埋佢, 果然好想夠乾身!一間食店要維持質素唔易, 能夠有不斷創新嘅精神, 又肯配合時令而提供唔同選擇就更是難得。 我會keep住來的, 加油哦!…Read More

難得放假到中上環一帶走走，想搵個地方舒舒服服咁享受悠閒下午，未能將茹素成為習慣嘅我，終於初臨已save喺收藏名單好耐嘅豆苗居喇~呢度個舖比我想象中還要大呢，又充份透入日光，加上植物襯托，感覺好舒服，店主喺裝修佈置上都花左唔少心機呀！店員好殷勤，見我地睇住餐牌冇乜頭緒就主動向我地介紹。難得黎到，想試多d野，於是我地就要一個set lunch再加 a la carte items。是日餐湯係南瓜薑湯，睇見d顏色都知道有料啦，啖啖都係南瓜嘅自然甜味，薑味都重，啱晒要調理脾胃嘅我。之後就黎左a la carte叫嘅卷物，用椰菜花蓉代替飯，中間除左有爽脆嘅蔬菜，仲有炸茄子，食落好清爽，一d都唔油膩，卷上面仲鋪左軟滑嘅牛油果同埋惹味嘅醬汁，成個口感好豐富！構思呢度菜式嘅廚師好叻叻呀~跟住嘅係set lunch嘅冷麵，麵同配菜嘅西蘭花苗同杏鮑菇都用d甜甜嘅醬油炒過，麵夠爽，待涼後都唔會黐埋一齊，我都想喺屋企試下整呢。再黎係a la carte嘅gnocchi，小長方形嘅gnocchi唔係韌嗰種，睇佢啡啡灰灰嘅顏色，應該唔係用一般麵粉搓成吧，同個忌廉汁好夾，加上菇香四溢，會令你不知不覺食晒架！最後，要了set lunch包嘅餐茶同甜品，揀咗black tea同埋grey grey coconut cake，蛋糕少甜輕巧，飲杯black tea更加解膩，我 猶其鍾意個茶壺，有古雅嘅味道~Set lunch收$158+10%呢個價錢，喺呢個地段，有呢個環境、service、食材同味道係好抵。A la carte當然會貴d，但我覺得算公道，大家都深知香港嘅昂貴租金問題，想好嘅店家可以生存，做顧客嘅都要付出。…Read More

看到媒體報道，見店家以關東煮做主打，標榜用自家高湯熬製，即刻約朋友試試。雖然成層得佢一間舖，但店面唔大，約20個位，所以訂定位就穩陣喇~一出門口，關東煮嘅香味就飄埋黎，店家安排我地坐吧枱，啱晒我，師傅好聚精會神咁準備食物呢~先黎前菜，我地試左高湯煎蛋卷同埋牛筋煮。蛋卷鬆軟、熱呼呼點會唔好食？加埋少少蘿蔔蓉感覺清新d，但我覺得店家唔好落醬油落去d蘿蔔蓉會好d，覺得唔夠味先落。牛筋煮用左甜味噌調味，牛筋夠晒稔，牛味幾濃，有少少肉嘅部份，都係一咬就開，同個醬汁好夾呀~關東煮嘅食材都幾多款式，我地試左大根、海帶、牛筋、芝麻麵筋、雜菜魚腐、竹輪卷同埋燒豆腐，我覺得除左魚腐麻麻地之外（個魚腐冇乜味，又唔係好似平時食嘅咁彈牙），其他都好好食，海帶好香，牛筋夠稔，麵筋有粒粒芝麻，竹輪卷幾彈牙，豆腐夠滑又有豆香。雖然主打係關東煮，高湯先係靈魂所在，我地就叫左用佢黎烹調嘅雞蛋煮雞肉，再加個白飯，就成為我同朋友最鍾意嘅親子丼喇 >3< 呢個選擇真係好正確，我到依家都仲回味緊呀！！雞蛋好香又有蛋汁，雞肉好嫩，加埋d蔥，仲有高湯提升味道，放喺粒粒晶瑩嘅日本米上面，真係令我好感動呀！！！呢度嘅菜式唔係話貴價野，但就食得出師傅嘅用心，見佢成晚一腳踢，又會不時測試下高湯嘅味道，每個飯都逐個新鮮煮，時間又掌握得好好，真係好認真，有家嘅味道！另外值得一提嘅係有個高湯炊飯，都好多人叫，望落好吸引，下次黎再試！同埋呢度d食具好靚，仲要每樣菜式都用唔同嘅款式載住，夠晒心思。呢度開到凌晨四點，堅係深夜食堂，想要日式comfort food的話係好好嘅選擇！…Read More

打工仔除左happy Friday，到左週末，都想搵個地方，舒舒服服咁食下好野，慰勞下自己。呢間餐廳我黎過幾次，用嘅食材好新鮮，好多都係有機嘅，而且烹調方法都係少油同埋唔會落太多調味，好啱我同媽咪，so far 半年間水準都幾穩定，值得encore呀。頭盤先黎個白酒煮紐西蘭大蜆，呢個係我地自從第一次黎試過後都必定會點嘅，因為好少有咁大隻嘅蜆，食起黎好甜，又幾creamy，啱晒我呢d海鮮控~主菜就食左鱈魚伴焗菜，鱈魚又香又滑，簡單用左少少黑胡椒調味已經好正，蔬菜方便都唔馬虎，食得出係新鮮貨，特別鍾意baby carrot ，冇腥味之餘仲好甜。同埋有咁多唔同顏色嘅蔬菜，除左有美感，營養方面都加分！另一主菜係當日嘅special，呢度嘅燒雞向來做得出色，夠晒香嫩。而今次呢度燒雞就更加巧手，將用黑松露煮嘅brown rice釀入隻春雞入面再燒，決定一試！皮好香脆，但一d都唔肥膩，雖然話係春雞，但份量都唔細，兩個人分都好夠。雞肉好滑，有埋香濃嘅黑松露飯就更加豐富，用上brown rice有咬口又健康，再點少少牛肝菌煮嘅汁，真係好夾呀！同樣地，呢度菜都有唔少新鮮蔬菜伴住（呢碟有菠菜tim），唔會一味食肉。唯一要注意嘅地方係燒雞係即叫即整，製作需時呀~香港西餐廳成行成市，但營養均衡又好味嘅就唔多。同埋灣仔喺週末與銅鑼灣比冇咁旺，可以食慢d，想約朋友食下飯傾下計的話，呢度係一個唔錯嘅選擇。…Read More

講到食泰國野通常都會諗起九龍城，果度真係好多選擇，但始終交通唔方便，最近就喺灣仔搵到呢間唔錯嘅餐廳，同媽咪、友人黎食晚飯 😊先黎個小食香芒牛油果軟殼蟹卷，呢個配搭好穩陣，食落好清爽，軟殼蟹食落都唔覺熱氣，美中不足係個皮有d硬。媽媽最鍾意燒鱔，肉質爽彈好味道，但我覺得唔好放醬汁上去更好，就咁燒完令個皮脆口d，食嘅時候點醬汁就得。我地好魚，再叫左鹽焗烏頭，火候控制得好好，條魚好滑，魚身入面釀左d香茅，所以食到魚腩嘅部份都唔腥，仲有股清香添，再點少少加左青檸嘅酸辣醬汁，好提鮮！想搵樣飽肚d嘅作結，呢味燒春雞都幾得，雞肉好嫩又唔肥，配埋旁邊酸味味嘅沙律好夾，雞入面仲有香茅黃薑飯，吸左d雞汁好好味，如果乾身少少就更好！呢度差不多每度菜都配一隻醬，而我又覺得唔會食完好口渴，整體食物質素都唔錯，價錢合理，我會再黎~…Read More

好姊妹同我慶生，話說我bookmark左呢個地方好耐，今次終於可以試下喇！呢度環境夠晒寧靜舒適，而且都幾有情調，啱晒d情侶黎慶祝生日/紀念日 （雖然我唔係XD)。相信黎得呢度，都會必試招牌蟹餅。一般蟹餅都混入左麵粉，呢度就用料十足，食落啖啖蟹肉，味道仲好鮮甜，加埋d洋蔥香噴噴，好想一個人食晒佢 lol我地仲試左個鵝肝兩食嘅頭盤，一個係凍食，應該係用酒浸過，食落甘香醇厚，配埋醃過嘅洋蔥，放喺脆脆嘅麵包上面，so yum！ 而另一個就係煎鵝肝，配埋caramel pineapple，多左份果香，放喺甜甜地嘅麵包上面，係晚餐完美嘅序幕！主菜方面，我地點左Iberico Pork Chop，佢d食材真係唔錯，塊豬燒得啱啱好，食落充滿肉香，個汁加左荔枝去煮，配搭幾特別，唔會好甜，味道幾討好。旁邊嘅配菜都唔馬虎，特別係d蘆荀，好鮮嫩多汁。另外，我地仲點左Seafood Fettuccine，幾樣海鮮入面我最鍾意帶子，因為只係輕輕煎過，食落好軟熟又鮮甜；虎蝦大大隻，肉質爽彈，夠新鮮，都好正；個斑就淡口d，不過都幾滑，唔會好乾；寬條麵掛上用蝦煮成嘅汁，鮮味十足！最後，我地當然用左另一個胃去試甜品啦 XD 個自家製嘅Banoffee Pie 果然冇令人失望，香蕉味濃，d cream好香滑！我因為唔知個pie咁大件，仲叫多左個甜品...但味道都係咁令人難忘，原來用核桃整嘅雪糕係咁好味架~焦糖燉蛋用左好多雲喱拿籽去焗，夠晒香。呢餐真係大滿足，多謝好姊妹 ❤…Read More

近來越覺飲食業好難做，好幾間鍾意嘅餐廳都相計結業，所以遇到好嘅真係要多加支持。自從發現左呢個好地方，我同媽咪大約每個月都會幫襯一次。先黎個小魚干沙律，菜好新鮮，可惜個酸汁過鹹，建議調較下，同埋加d蕃茄或者豆腐，會更加吸引。跟住食時令嘅鮫鰈魚刺身，師傅仲推介左鮫鰈魚魚邊壽司。嘩，真係一試難忘呀，先講個刺身，爽得黎又好肥美，魚被輕輕燒過，食起黎更香。個魚邊更加不得了，有咬勁之餘，魚油甚豐！接住就食帆立貝刺身，特大嘅刺身原粒上，加d新鮮磨嘅wasabi，再點少少醬油，yummy yummy！超鮮甜呀！之後就黎熱食，先黎清酒蒸鮑魚，鮑魚食落好彈牙有鮮味，底下嘅肝臟食落好香冇腥味，我估係清酒發揮左佢嘅作用？最後就食馬頭鯛一夜干，之前食過一試難忘，今次encore就有少少失色，因為有d部份燒得燶左少少，好彩d肉仲係好嫩，同埋大部份嘅骨都脆卜卜！但味道鹹左d，輕手d就更好喇~多謝親切嘅老闆臨走又請我食野，個蕃茄好香甜，我下次會嗌黎食 =)…Read More

約朋友到尖沙咀聚舊，想食中菜，見呢度都幾多正評就試下，結論係：有人請先考慮再黎啦！先講環境，地方係闊落嘅，裝修夠新派，難怪吸引到相對年輕嘅食客；食具都講求玩味，係會令人想黎呃下like嘅。不過，喺得旺區有咁大間舖又搞下新意，就要預左佢嘅cost轉嫁到顧客身上...食物定價以份量黎講唔算抵食，份量偏細。鍾意湯水嘅我試左椰皇燉雞，呢樣係全晚最好味嘅，飲落清甜潤喉，d雞肉同瘦肉都唔算嚡，好快清晒。冷盤嘅醉雞夠酒香，可惜雞肉都幾硬同韌，而且份量偏少，例牌份量都要擺兩隻雞翼尖...（雖然我知係有捧場客嘅...）見到點心拼盤賣相幾靚就點黎試下，所謂柚子蝦餃，都只係個皮整色整水，食落都係普通蝦餃一隻，係食唔到柚子味嘅..蝦係大隻新鮮，但做法可以大膽d，其實柚子配蝦呢個配搭幾討好，日本菜都經常用柚子加入菜餚啦。墨汁黑松露蝦餃都幾香，算係唔錯。至於賽螃蟹餃，感覺上都係好似食左第二隻蝦餃咁，冇咩特別。甜點嘅黑糖鬆糕，係黃金糕黎嘅，唔算好甜，但食落嘅質感好膠、好奇怪..個香芋包嘅味道都好人造...整體黎講，要食點心嘅話，我唔會推介呢度。蔬菜方面點左金菇翠苗，金菇好香口，菜苗幾嫩，一脆一軟嘅配搭都幾得意，但我覺得兩種材料嘅比例可以再調較一下—— 菜嘅份量多d，炸金菇就少d，會冇咁油膩同熱氣。炸蠔餅係最令人失望嘅，炸粉偏硬，食落成口油，蠔嘅份量亦都唔多，呢味真係big no no。 以呢個食物嘅份量同質素要每人二百幾蚊，我覺得絕對有更好嘅選擇。…Read More

上月隨意遊走時發現呢間cafe，猶記得老闆（我估佢係）見我喺店外望緊餐牌，就好主動咁走出黎逐樣介紹，又用手機show埋食物嘅相俾我睇，我個人鍾意試新野，加上俾佢嘅誠意打動，就係咁入左去喇。上次試過mocha 同埋綠海灘上的軟殼蟹（即係炸軟殼蟹配菠菜汁扁意粉），兩樣都好令人滿意，於是就記低左呢個地方，等有機會就再黎過。遇上約左朋友聚舊，加上佢係咖啡迷，我諗呢度應該啱佢，而我呢，今次都試下新嘅飲品同主食，點左Iced CocoNUTS Latte 同埋西西里海鮮扁意粉。老闆介紹呢款咖啡係用椰奶代替，味道較清新，飲落我覺得一d都唔甜，啱晒我，如果咖啡味再濃d就更好。至於個意粉，用左茄醬、黑胡椒同蒜蓉煮嘅醬汁，好味好又唔漏，配埋魷魚同埋一隻煎大蝦，都幾大碟。隻蝦煎得好香，但魷魚似係急凍貨，冇乜味，有d美中不足。呢度嘅服務好好（感覺上越黎越少人做樓面，態度專業嘅亦買少見少），價錢喺呢區算係合理（灣仔嘅租金應該很可怕...），食物都用心製作，係值得支持嘅。…Read More

週末陪朋友去銅鑼灣揀婚紗之前先醫醫肚，就去左Hysan Place 嘅food court，呢度嘅選擇都好大路，係平日見慣嘅連鎖食肆，只得Noodle and Dog 唔係，所以吸引左我嘅注意。叫得Noodle and Dog，就係賣麵食同熱狗（查實都有飯賣 XD)，食物選擇都幾多，而且幾特別（例如係腐乳口味嘅熱狗、鮮蝦明太子麵），但呢排經常喺街外食飯，想食得健康d，於是揀左個素食嘅套餐。個餐有芝麻醬沙律、蕃茄湯麵、生果同埋飲品（要咗羅漢果水），賣$65，喺呢區黎講算係幾抵食。講返味道，沙律嘅蔬菜夠新鮮，亦唔會「水呢呢」，芝麻醬嘅份量亦落得啱啱好。個麵用個煲仔載住，有懶人喺屋企煮即食麵嘅風味，但入面嘅材料就健康得多：蕃茄湯好濃郁，麵條就比較腍滑，食落都幾夾；白菜仔係白烚嘅，但我反而覺得少d調味比較好；另外仲有洋蔥炒雜菇，用左黑胡椒炒好惹味，洋蔥好香甜，菇夠juicy，但我覺得調味落得重手左少少。生果都新鮮，唔係浸過糖水嘅貨色。我欣賞飲品嘅羅漢果水冇加糖，雖然淡d但健康好多。呢間嘅性價比都幾高，味道又唔錯，可以encore!…Read More

大約是兩年多前睇人地嘅食評發現左呢個樓上茶室，雖然話係茶室，但食物嘅選擇都唔少（香港租金咁貴，即使係樓上舖，如過只賣茶相信幾難維持），而最緊要嘅係，整體都好高質，加上環境清雅恬靜，絕對係約朋友小聚嘅好地方。已經有一段時間冇黎了，本來想試下帆立貝南瓜意大利飯，可惜當日唔供應，所以就要左白酒香蒜蜆意粉。好開心水準冇變，蜆係新鮮貨，排得好靚，意粉軟硬度剛好，夠爽身，有蒜片同少少辣椒煮好惹味，好快就KO晒。我嘅朋友要左蟹肉意大利飯，我試左一啖，飯係混入左蟹肉、蔬菜、忌廉同煮，都好好食呀！仲有叫左燒鰻魚飯，個汁係自家調較過，好似加左少少酒，鰻魚好香，我連飯試左一啖，都幾正呀~ （不過我只係細意品嚐，所以冇影到相）黎到呢度，我每次必食佢地嘅豆腐芝士餅，豆腐味超濃郁，又唔會好甜，加埋少少芝士嘅奶香，每一次都覺得好滿足！同埋用蛋白同糖整成嘅小蘑菇，令賣相好可愛呢！我地仲試左檸檬撻，有檸檬嘅清香之餘好醒胃；宇治抹茶卷蛋好大件，啖啖綠茶清香，中間嘅綠茶mousse 都好滑，伴埋紅豆一齊食，係唔錯嘅選擇。食左咁多野，當然要飲d茶啦，我個胃唔係咁好，就飲正氣d嘅普洱。呢度嘅普洱好清香呀，唔係出面嗰d深黑色冇味嘅，同朋友邊傾計邊細味，一樂也。…Read More

我呢個為食嘅人，為左食好野，會經常update自己個restaurant list，而身為香港人的確係幸福嘅，餐廳選擇同食物款式多，令我可以不斷試新野。不過，總有d特別好嘅，會令我想不斷返轉頭，自在漁場就係其中一間。上次黎嘅時後應該係試業階段，餐廳上嘅選擇唔多，今次黎就換左餐牌，多左菜式供應。叫得做漁場，當然有唔同嘅海鮮，刺身方面，今次就試下金目鯛。一客三片嘅金目鯛，用火輕輕燒過，放喺自己碟上面會見到魚油嘅烘位，證明同我一樣都係咁肥美嘅 XD 今次黎到見到燒海鮮多左選擇，貪心嘅我就黎個二人前。店家好好，雖然話係俾客人自己燒，但事先都會提示每樣野點燒，如果擔心自己論盡（好似我咁），佢地都好樂意幫手。二人盛好豐富，有蠔、帆立貝、蝦同埋蜆。因為海鮮一到，就將蠔放上爐喇，所以盛盒嘅相度見唔到。蠔夠飽滿又鮮甜，燒到半熟，再加埋蒜蓉牛油，好滋味呀！蝦好大隻，師傅幫我加d鹽燒到香噴噴；而帆立貝呢就喺差不多食得嘅時後加d醬油再燒下，師傅仲俾紫菜我地包住黎食，好有心呀！至於蜆呢，就唔使加調味喇，喜歡的話唧少少檸檬汁就得。其實d食材都好新鮮，有師傅幫我燒（得蜆係我自己黎 lol），點會唔好食喎！我個人就特別鍾意蠔同埋帆立貝喇。必須一提，呢度d師傅除左好有心機，仲好好客，見我呢個肥妹食得咁滋味，送左份小魚俾我，仲幫我燒埋，真係好幸福呀！d魚仔加鹽燒成魚乾之後好香，用黎送酒一流！至於燒魚，今次就試左喜之次，魚肉好香，魚頭嘅位置好脆，都係好適合送酒。不過以個人口味而言，我同媽咪都係鍾意上次食嘅馬頭鯛多d，係魚嘅品種問題，馬頭鯛油份多好多，肉亦較厚。最後，我地食個蟹海鮮拉麵作結。雖然呢度唔係拉麵專門店，但師傅一d都唔馬虎 ，蟹肉嘅份量都頗多，仲有隻蟹鉗、醬油帶子，日式魚蛋、海帶同粟米粒，個湯頭唔係死鹹嘅麵豉湯，清清地，食左咁多燒物，飲返啖湯好舒服呀！至於麵，雖然唔係自家製，但煮得夠爽口，都唔錯呀。除左食物質素高，店嘅裝修同佈置都好有特式，有以海洋、海產為題嘅油畫，仲有相關主題嘅海報，呢度真係名符其實嘅漁場！再一次多謝店家殷勤嘅招待，下次再見 =)…Read More

同朋友相聚，都想搵個好地方，既可以傾計，又可以食餐好嘅。呢度嘅選擇好多，今次兩個女仔黎，想試多d野，就放棄澱粉質，唔叫佢哋出名嘅烏冬喇。首先黎個帆立貝刺身，切得幾厚身，但唔算好鮮甜，有d失望。跟住黎嘅鰹魚沙律好大份，鋪滿左魚片，魚肉燒到半生熟，好鮮，拌住好多蔥、蒜、洋蔥、生菜同酸汁，醒胃又好味！細心嘅老闆俾個夾我地分黎食。夏天食感覺清爽，唔怕有口氣嘅話要試下 😄味噌燒蟹羔蟹肉滿滿一個，蟹羔好香，拌住絲絲鮮甜嘅蟹肉，用隻小匙羹分黎食，好快就食到乾乾淨淨。野菜炒魷魚，好似已經變左我每次黎必食嘅菜式，爽甜嘅炒椰菜同柔軟嘅魷魚真係好夾，對於我黎講，佢就好似廣東小炒嘅小炒王，夠晒惹味。我係個魚痴，見到燒魚一定會嗌，今次就試左燒赤魚，份量好大，店家已經切好，方便分黎食。魚肉好厚身，好實淨，擠d檸檬汁，點d蘿蔔蓉同酸汁，好香好好食呀！呢度嘅食物質素高，價格合理，希望keep住水準!P.S.呢度星期五好爆，記住訂位呀！…Read More

星期日去PMQ，想去嘅幾間餐廳都冇開，朋友話好耐冇食拉麵，就入咗呢度試下。叫咗大蝦湯麵，可以揀蝦湯或者豬骨湯，咁我當然揀前者啦。麵一黎到就飲啖湯先，有蝦嘅甜味，但比起一虎嘅海老虎湯麵淡好多，溫度亦唔夠熱。至於麵，要了硬嘅幼麵，煮得啱啱好，係我想要嘅，掛到湯汁！配料嘅大蝦有羔而且幾爽甜；厚切嘅豚肉好爽唔油膩，但唔知係咪師傅將佢用焗爐焗完就放喺麵上面，我覺得啲肉同碗湯麵有種分離感，唔夠match；糖心蛋中規中矩；蔥段有齊大細兩種，都幾少有，而且令個湯頭香d；貢菜鹹鹹爽爽同個湯都幾夾。我對湯頭嘅要求好高，所以呢碗麵味道只係合格，但價錢唔平，所以到此一遊就夠喇。…Read More