Kalyee Amber的個人專頁

樂富終於再有一間拉麵舖，頭先試咗。可能新開張，感覺職員仲未好熟流程。樓面見餐廳有位就放人入去，完全無顧及廚房出餐能力，等食嘅客遠多過食緊麵嘅客。偏偏餐廳採取先付款後送餐模式運作，又令客人無法取消訂單只能繼續呆等，我碗麵22分落單，嚟到係46分，前後等咗24分鐘。舖位本身係半開放式，面積不大。隔離就係樓梯同扶手電梯，都係人流多嘅地方。偏偏舖頭不停播住日本歌，結果嘈上加嘈，唔播歌反而更好。講返食物本身，叉燒好食，溏心蛋入味，呢兩樣嘢係令我加分的。但由於點餐紙或者圖片顯示到生芽菜1倍至4倍嘅份量。我點咗4倍，結果要攞多隻碗夾開生芽菜先勉強夾到麵，而且食咗一半我就已經開始飽，下次應該會只叫1倍。我個人較喜歡食幼麵，因為掛湯能力比粗麵強，但佢哋用嘅係粗麵，好在麵質唔差。我諗再遲三兩個月等職員run熟啲間舖，再試其他。…查看更多

想食佢哋嘅熱狗好耐，但好多時都係晏晝，想搵個坐得低嘅地方。呢晚放工要去市中心買啲嘢，就買隻熱狗做晚餐。睇餐牌見到款式唔少，我嘅選擇困難症又發作。見澳式風情熱狗係Best Seller，芝士、菠蘿、煙肉都啱食，就叫咗呢個，另加$15轉套餐，點咗細薯條加罐裝Zero。睇到個廚房，所有柯打都係即叫即整嘅。薯條即炸，連條腸都係落咗單先開始煎，加上客人唔少，所以等得比較耐先有得攞。搭埋車返屋企，打開嗰陣個熱狗同薯條凍咗了，但正正咁更加見真章。熱狗包邊仍然脆，入面都仲係軟嘅，唔係焾咗嗰種，而係似日式麵包嗰種軟。睇海報話佢哋啲包唔係攞貨，而係自設工場整。薯條係脆得嚟唔硬嗰隻。雖然話薯條係攞貨，但攞邊隻貨、會唔會炸過頭唔夠身就有關了。呢個我覺得都幾好食，如果有其他特色醬應該更好食。有機會要再試吓。…查看更多

本來想去另一間烏冬店 ，但竟然無烏冬賣，唯有轉陣。初初開嗰陣好多人，年半後今日呢日經過見無乜人就試吓新嘢啦。叫咗個炭燒鳥丼配檸檬，加無糖可樂，$59。講白啲，就係檸檬汁炭燒雞絲飯。大部分日式蓋飯店通常配雞扒，炭燒雞絲嘅做法，稍一不慎就好易過哂火煮到雞絲都變哂柴。咁呢個雞絲就無過籠，都食得入口，只係味道略淡，連個燒汁都只係微鹹。打開見到飯份量唔多，搵匙羹一篤，好快就篤到碗底，三兩啖就食哂。之前網友反映話飯一餅餅，好在我嗰份就無。總結嚟講味道可以，但午餐嘅價錢只得下午茶餐嘅份量，樂富有非常多更好嘅選擇。…查看更多

又想念台灣嘅三文治味道，又買返兩件洪瑞土珍食吓。呢次買咗滿漢同原味起司。據食過幾次嘅經驗，即使響台灣，果醬味道大多一般；第二最好買返傳統台灣有得賣嘅口味。首先食滿漢三文治。呢個係招牌火腿同原味起司嘅合體，火腿、蛋皮跟足，有埋芝士，麵包鬆軟，不過醬就略嫌未夠多。原味起司係我嘅至愛。撈埋芝士鹹中帶甜，響台北第一次食就已深深愛上。前嗰排呢個三文治個醬落得好少，完全唔係嗰回事，而家佢哋多返啲醬開始似返嗰個味道了，不過我覺得可以再落多啲。兩件三文治食完，仍然意猶未盡。整體上都復刻到台灣嘅口味，明白唔係所有原料都可以跟足，至少香港嘅水同台灣嘅水已經唔同，就算有八成已經收貨。香港店雖然無台灣咁齊，但主打嘅口味都有了。不過我想香港跟埋台灣出麥包款，多過開發嗰啲味道奇怪嘅香港限定囉。…查看更多

好耐無嚟呢頭。今次經過見到有一間新開嘅越式外賣店，主打越式法包，亦有撈檬同小食。反正要買嘢返屋企食，決定試吓。見佢哋個輝煌招牌套餐，有招牌扎肉法包、迷你雜錦拚盤同罐裝飲品，見咩都有，就決定點呢個。首先食法包，一打開已經有驚喜。個包比我想像中大，切開非常足料。食嗰陣個包已經擺咗一段時間，由於個包係類似硬豬質地，所以無話焾哂。名為扎肉法包，內裡亦有豬肉，加埋醃蘿蔔同生菜，感覺好清新，唔會覺得漏。跟住食埋個小食拚盤。件春卷擺凍咗皮仍然好脆，最有驚喜。蔗蝦、豬肉串、扎肉都可以。雞翼都入味，但佢哋就水烚，如果煎一煎，個皮脆嘅話就更加完美。總結係好高水準越式外賣，有興趣下次試埋檬粉。…查看更多

心思思又想食日本拉麵，不如試吓新地方，就去咗呢間食。呢間裝修都特別，一入去有傳統麵檔嘅裝修。睇環境確係特別。啱啱開門，人唔多。侍應極力嚟推介食套餐，話呢個抵食。於是點咗份「不怕單一人前套餐」。點咗辛辣灸燒豚肉拉麵，沙律炸餃子，可樂。幾個麵都無蛋跟，另外點咗隻溏心蛋。（我每逢第一次幫襯日本拉麵舖，都會食溏心蛋，成個麵嚟到第一樣食嘅都係佢。一來唔想畀湯浸熟，二來隻蛋煮成點，大概就知道餐廳同個麵水準。）點餐紙無追加項目，唯有自己寫「加蛋」，落單嗰住中年女侍應覆單有講加蛋，但竟然都可以入漏單，要叫另一位侍應加返。味玉：尚算入味。蛋黃外圍已經開始熟，中間部分亦唔太流心了，明顯已經過咗籠，無及時拎上嚟浸冰水。辛辣灸燒豚肉拉麵：嚟到個賣相已知小小伏，得一塊叉燒三條筍少炒蔥花，就沒有其他了。（睇返我之前去嘅兩間拉麵舖碗麵嘅賣相，一對比就會明白。）本人唔係太鍾意食角煮同厚切，因為佢哋普遍都有個問題，就係瘦肉部分好韌好鞋。一如所料，呢間都無例外，嗰嚿豚肉嘅瘦肉部分果然好韌。湯頭飲咗一啖，得死鹹同死辣。麵質還可以，但掛咗汁之後亦變得好鹹。唯一好食嘅係竹筍，食到竹筍味，唔似大部分日本拉麵舖咁浸到無哂筍味。沙律炸餃子：呢個反而有驚喜。餃子係蔬菜餃，好多時日式炸餃子啲皮會硬到咬唔開，尤其兩個角嘅位。但呢個就好好食，尤其啱啱炸起，係脆卜卜嘅。似食茶樓嘅炸雲吞咁。總結嚟講，服務同食物水準尚待改善，我會食返一幻囉。…查看更多

之前經過睇廣告，見到出咗兩款韓式新米線，好奇之下，試咗其中一款。侍應姐姐服務親切，係樂富三間連鎖式米線舖入面，服務最好嘅一間，所以而家食米線多數嚟呢度。落單之前，要加錢嘅嘢佢哋會清楚講明，亦會確定客人叫嘅嘢。（有次我要求轉菜底，個姐姐再三講「轉菜底無米線㗎喎」。😂😂）點咗烤豬柳芝士泡菜撈米線。芝士同泡菜都係我喜愛嘅食材，加上撈米線呢個配搭又幾新鮮，所以決定試呢過。另外加金菇、五小辣，再叫杯熱檸蜜。嚟到賣相不錯，都幾足料。芝士醬撈埋米線呢個配搭以為好奇怪，食落又唔係，都幾夾吓，最難得嘅係就算食到尾都唔會覺得好漏。豬柳肉質夠鬆，唔會死實實，可惜鹹咗少少。尤其芝士本身已經係濃味嘅汁，加埋變得更鹹。呢度要扣返少少分。雖然味道不錯，但加個餸配嘢飲就六十幾蚊埋單。所以未必會再食啦。…查看更多

噚日晏晝完全無idea想食乜，經過呢間舖見到有豬軟骨肉燥麵，都想食豬軟骨，就行咗入去。見到餐牌，午餐要$62，轉撈麵加$1，心諗都有啲貴喎，但嚟到嘅時候，就再無呢個感覺了。成個餐除咗主菜，仲跟一份蔬菜、一份小食，同埋一杯飲品。蜜汁豬軟骨，往時食嘅通常都係炆，第一次食到炸咗脆漿嘅豬軟骨。雖然個人比較鍾意食焾嘅豬軟骨，不過脆漿唔硬，加返唔少分。金銀蛋娃娃菜，份量比我想像中多，非常足料。鍋貼最初都擔心啲皮會硬到食唔到，食落又OK喎，最重要係唔燶。肉燥麵，不過不失啦。只要唔係太焾夾起無黐住一餅，我已經收貨。飲品要返熱檸檬桂花薏米特飲。我解讀為落咗薏米嘅熱檸水。好多餐廳啲薏米都係硬到食唔到。但呢度嘅薏米夠焾，無呢個問題。成個餐份量唔少，就算係男士都肯定會夠飽，我直情食到頂住。呢個價錢仲無加一，直頭係超值。特別一提，呢間舖頭待應好好招呼，好有禮貌。初初我揀咗一張入口門左手邊嘅枱，點知隔離位個大媽睇片，較到個電話超大聲。之後我要求轉枱，佢哋都好樂意幫忙。我會再去幫襯。…查看更多

堂食時間放寬，終於可以再去呢間喜愛嘅拉麵舖。首先佢哋裝修同其他好唔同，棄傳統日式設計走日本動漫風，成個場都甚至連告示都同漫畫表達。雖然佢哋播啲動漫歌，我呢個阿姨嚟講會覺得嘈咗少少，不過拉麵都係食一陣啫，唔會坐個幾兩個鐘咁嘛。我鍾意食啲帶蝦味嘅湯頭。今次照舊點咗一碗燒海蝦味豚骨拉麵。櫻花蝦味道入埋湯頭，味道更甜美。雖然日本拉麵啲湯頭卡路里好高，但我都唔理咁多，會飲埋湯。呢間麵條較一幻粗，但一啲都無影響掛汁。麵夠熱、叉燒大塊、肥瘦剛好。麵條有三個份量選擇，女仔200g都已經好夠食好夠飽，特別大食嘅男士可以叫夠300g。 麵本身會跟半隻蛋。多出嗰隻係之前已經去咗三次，憑單換嘅贈品。溏心蛋整成點，就已經大概知道拉麵舖嘅水準。佢哋啲溏心蛋幾好食，夠入味又唔太熟，所以我係會keep單。（除咗紫菜，跟麵嘅其他配料係可以轉，換咗贈品又唔想食太多蛋，我會轉走跟拉麵嗰半隻蛋，皮膚差嗰排，我就會將筍換走之類。）佢哋跟日本拉麵舖做法，日唞賣沾麵，夜晚先賣湯麵。沾麵又係好好食，有機會晏晝去幫襯再寫。…查看更多

屋企伙頭大將軍逢星期三、六都要停工，所以呢兩晚都要自己攪掂。但我樂於每星期有兩晚，可以唔限區域去找好東西吃。呢晚我就去咗買餃子食。其實呢間餃子外賣店唔近屋企，但我仍然搭車去買。事關呢間餃子店標榜新鮮包，就算買生餃返去煮，第二日煮味道都會大打折扣，唔及佢哋響舖頭煮好返屋企即食。 今年農曆年後佢哋轉咗餐牌，除咗有新餃子，對我最重要係佢哋湯底選擇多咗。之前佢哋只有豬骨湯底，而家我愛上咗配素湯底。因為素湯底會跟湯渣，有粟米、蘿蔔等，非常足料。食埋絕對夠飽了。 餃子全部大大隻，餡亦好足料，肥肉唔多。椰菜係爽脆嘅，食紫菜最怕啲紫菜洗唔乾淨有沙，但我食過咁多次都無發生過，我好放心買嚟食。對於芫荽愛好者嚟講，芫荽餃係不可不吃。芫荽係一樣好小器嘅香料，一隔夜味道會大減。呢個餃次次食親都有好濃嘅芫荽味，我非常滿意。 其實呢間舖嘅招牌菜係芝士粟米煎餃。不過我呢排要修身，只能遲啲先食了。…查看更多

好想食海南雞飯，決定去試呢間餐廳。佢哋開咗之後，有段日子每日午市都好多人等。開咗半年有多終於食到。堂食要加一，外賣做九折，當然又係揀買走啦。點咗海南雞飯同熱香茅鮮橙茶。收銀叫15分鐘返去攞。打開個袋，都用好靚嘅包裝住。先飲個例湯。例湯有兩大件冬瓜，飲到雞味同冬瓜味，飲得出有落料煲。可惜太鹹，飲咗三分一就放棄。到油飯。食海南雞飯最常遇到嘅問題係生米，好在佢哋無發生。但飯唔夠熱，只係微暖近乎室溫。雞就的確好食。我好怕食啲太肥嘅雞，雞皮成層厚厚嘅脂肪包住，搣都搣唔切。佢哋嘅雞肥瘦適中，生熟度控制得啱啱好，啖啖雞肉都好滑，亦食到雞味。最後係個熱嘅香茅鮮橙茶，純為好奇而點。飲唔到香茅味（或者係畀紅茶嘅味道冚哂），感覺同飲熱檸茶無咩分別，只不過塊檸檬用咗橙取代。偏偏我討厭飲檸茶，所以又係只飲咗幾啖。總結嚟講海南雞係好得，但其他嘢就有改善空間。…查看更多

每次平日中午響觀塘路經，都見到間店唔少人幫襯，加上招牌大大隻寫住係米芝蓮推介之類，今次就決心試吓。見到生煎包有唔少味道選擇，不過又被個蔥油拌麵吸引。呢次先試套餐，其他有機會嘅話日後再食。返到公司，打開午餐，賣相係吸引的。先吃拌麵。感覺係食油麵，略焾，麵條開始黐埋，呢個正常，汁醬唔夠將個麵撩返開。撈嘅係乾蔥，同我期望少少落差。跟住食嘅係招牌生煎包。一咬開，有驚喜喎！好多時食生煎包啲肉係死實實，無汁。但呢間生煎包一咬啲汁爆哂出嚟，多到彈落枱，饀又夠鬆化，確係唔錯。攞咗一陣皮都無變硬，街邊小食檔嚟講呢個生煎包件水準以上。但我覺得價錢偏貴。拌麵$32，兩隻招牌生煎包加紙包飲品套餐價都要另加$25。加埋接近$60嘅話，有好多比佢更好嘅選擇。…查看更多

呢間餐廳印象中開咗一段時間，但都無去食過。今日一於試吓，見外賣有九折，就當然買走食啦。佢哋出菜都幾快，行開買嘢十分鐘後返去，已經有得攞。打開飯盒，炒飯舖滿紫菜，雞翼芝士冚住。炒飯入面有幾大塊泡菜。話係小辣，其實幾乎唔辣。鍾意食辣嘅人未必會滿足，但我就覺得只係用嚟吊味，叫做無白飯咁寡，所以OK。（真係完全唔食得辣嘅話，都可要求轉白飯。）雞翼有四隻，大大隻，個醬甜甜酸酸嘅，又別具一番風味。一個飯可以感受到兩個唔同嘅味道，甚有驚喜。午市送飲品，揀咗熱檸蜜紅棗茶。雖然都係用熱水沖嘅啫，但都足料都飲到味道仲有紅棗粒。唔會話為咗慳錢落細売，結果咩味都飲唔到。總括嚟講，呢個飯我都幾滿意，搵日會再去坐低食。…查看更多

日本拉麵係其中一樣鍾意食嘅嘢。以前返中環，有間拉麵舖非常好食，賣完就收舖，試過七點去到都拉閘。因為佢哋對品質嘅堅持，令我愛上吃日本拉麵。後來轉工加上佢哋水準大跌，就無再幫襯了。旺角有間拉麵舖都係我最愛，但我唔係成日去旺角，加上早前堂食限制，想放工過去食都難，希望盡快有機會去食。難得屯門都有間食得過嘅拉麵舖，最重要係響市中心，位置極方便。所以經常會嚟，大約兩星期就嚟一次。今次例牌叫咗個一人套餐。包括一碗麵、一碟小食（可選木耳／味筍／雞髀菇）、一罐可樂（加錢可轉其他飲品）。我覺得係抵嘅，碗麵本身已經要$88，變相加多$11就有埋小食同汽水。點咗辛辣味噌蝦湯拉麵、雞髀菇、無糖可樂。鍾意食葱，加$10要咗增量。雞髀菇不過係淥熟加木魚同豉油，好難會唔好食，份量唔多，但作為小食都夠了。麵本身跟半隻溏心蛋，無過熟，但醬油唔夠入味，少少美中不足。叉燒大小厚薄都可以。麵夠熱，呢個好重要。碗麵唔夠熱咩都係假。我鍾意佢哋個蝦味湯底，出面好多都係豚骨湯底，但呢個有蝦味吊住，最重要係食完唔會頸渴要狂飲水。我通常揀幼麵，因為湯汁會比粗麵掛到湯。無嚟一排，佢哋個幼麵麵底轉咗扁身，掛到嘅湯更多，更加入味。如果要再食飽啲，可以叫個白飯倒落湯底當泡飯食。今日唔太餓就無咁做啦。揀咗張近窗邊嘅位，有坐cafe嘅感覺。但呢個係平日非繁忙時間限定。…查看更多