姚東師傅's Profile

師傅都好耐冇出手喇，平時通常都係出口(係咁食)，但今次呢單真係不吐不快。話說情人節呢啲大日，師傅當然係約左小黃人撐枱腳，仲特登叫小黃人早啲收工。咁呢啲日子，師傅當然不敢怠慢，一定要訂位啦，所以一早就上網訂定位，晚上八時正。大節當日師傅和小黃人比預定時間早左十分鐘到達，結果眼見好多人仍在等位，到八點仍未能入座，細問下才知返唔切枱，期間接待員亦都叫有提議師傅可以過隔離間餐廳坐，話食嘅野都係一樣，因為嗰邊有位唔使等，但係細望完兩間餐廳之後，師傅當然拒絕啦，始終個環境氣氛都爭咗一大截，於是乎唯有不斷喺度等等等。。。等等等。。。等寂寞到夜深。。。終於到咗八點二十五分左右先能正式入座，咁就等左差不多半個鐘，不過值得一讚就係個接待員非常之有禮貌，仍不斷喺度話唔好意思，師傅亦都知唔太關佢事，雖然係灰機左，不過都算啦。坐低開完茶，等咗一陣餐牌都未有，著實令人有點兒失望 ，細問下才俾個餐牌師傅望下，原來是日淨係得套餐選擇，主餐牌內的食物係不會預備，幸好師傅都係打算食套餐，於是就柯打左兩個鮑魚套餐。另外想講下就係餐廳係冇confirm booking，如果有的話就可以講埋是日只提供套餐，唔會有種打死狗講價嘅感覺。落完單後，有趣的事又發生左，就係侍應同師傅講唔好意思，今日啲乳豬買曬改叉燒得唔得？師傅想問其實仲有乜嘢選擇呢？老老實實大時大節明知今日booking爆得咁緊要，竟然預嘅份量都可以唔夠，只不過係第二輪啱啱入座就已經冇晒，比師傅仲遲入嗰啲相信都冇乜嘢可以食，有可能樣樣都話賣曬，呢個感覺真係令人好差，好失望，咁出名的一間餐廳竟然有咁嘅質素，渣！等等下終於可以有嘢食，其實個套餐嗰啲食物有啲乜嘢好出色，師傅又講唔出，有啲乜嘢比較差，又唔多覺喎，總言之就係不痛不癢嗰隻。如果叫師傅話佢邊樣嘢好食，師傅覺得龍蝦肉係唔錯，同埋個鮑魚花菇都扣得幾好食，唯獨呢兩樣，要彈一定係個炒飯，飯底太濕口感其差，應該唔係隔離飯炒啦，其他嘅嘢比較中規中矩，冇特別！呢間餐廳唯一好處就係唔會將啲餸菜好快咁樣放曬出黎，真係比時間你慢慢食，享受埋個view。師傅都差唔多食咗三個鐘，十一點前走啦，走之前當然要埋單。師傅行出去同個經理話要埋單，個經理佢話好，但係長期都唔印張單俾師父，唔知咩原因喎，跟住師傅第二次再問佢，佢話等緊部卡機，師傅話俾現金得唔得，佢話得跟住先至慢吞吞咁去印張單出嚟，老老實實食完嘢想畀錢埋單都咁難，一係就唔好收啦，你又唔係，真係阻鬼住曬 ，令師傅一肚氣。總括嚟講食物質素都係普普通通，呢個價位唔算出色，坊間應該仲有好多更好嘅選擇 ，至於服務質素真係非常之差，感覺唔到佢地好想做，亦感覺唔到佢地想做好佢，今時今日香港好多間都冇乜服務態度，嚟得呢度食當然知道價錢唔會係平，但係呢個價位呢個服務質素同呢個食物水準，真係似乎有啲貨不對版，淨係靠佢個朵嚟賣，似乎有啲誇張咗。是次平均消費差不多八舊，但真係笑唔出，又等又冇服務，差！是日除左係情人節外，亦係和小黃人嘅1000日紀念日，師傅諗住食餐好，可以留個美好回憶，可惜的是這個回憶不是師傅想要的，唯有向小黃人晒個冧，希望遲下食過餐好啲啦！…Read More

早一陣子師妹同師傅講話佢最近去咗一間好好食嘅串燒燒烤店，係咁話好抵食好好食，師傅見師妹讚不絕口，唯有問下間店舖個名，諗住搵一日去會下佢啦。終於師傅揀到一個日子可以帶埋小黃人一齊去，師傅訂定枱，準時去到餐廳。去到後發覺店舖都幾細 ，全場應該坐唔到多過15人，入到去仲要一個客都冇，師傅心裡都寒一寒，唔係又比師妹fake呀，既然都黎左，幾帶就幾帶，燒賣就燒賣!店員好快安排師傅坐低，於是就同小黃人一齊研究下有咩好食。睇緊張餐單時，店員已經放低咗兩支免費啤酒，之後又好快放咗一碟燒鱈魚絲，都係一個免費嘅小食，基本上未落單已經有嘢食。由於張枱著實太細，所以師傅同小王人商量咗一陣之後，決定先叫少少，寧願稍後再加單。於是第一輪就揀咗燒牛舌心，汁燒魷魚鬚同埋，燒日式玉子三樣嘢，全部小辣。落完單就飲下啤酒同埋試下嗰個燒鱈魚絲，啤酒係生力白啤支裝，本身師傅對生力呢個品牌都好普通，但既然免費就飲下。白啤入口比正常生力好飲好多，但味道有少少酸，始終唔太啱口味。至於燒鱈魚絲，師傅就覺得佢比較硬，反而燒唔得脆，呢下似乎就差少少。等咗一陣燒牛舌心就到，見佢牛舌心都燒得幾靚仔，於是即食，入口發覺都燒得幾香，牛舌爽口唔韌，又唔會燒得好油，第一個感覺都幾好，令往後嘅串燒有啲期待。說時遲那時快燒日式玉子亦都登場，師傅都係第一次見一串串嘅燒玉子，賣相都幾得意，入口覺得玉子都幾香口，熱辣辣又軟軟熟熟，唔錯。之後就係汁燒魷魚鬚，呢個亦係一絕，一咬落去魷魚鬚爽口彈牙，唔會燒到太乾身，加上個汁調得香香辣辣，非常惹味，師傅嘅必食推介。食咗三樣嘢之後，都覺得真係唔錯，亦都感恩師妹冇老點，於是再決定加單，一口氣揀咗燒雞心，燒雞腎，燒雞潤，維維招牌豬手同埋蒜蓉燒扇貝。 落完單繼續飲下酒談下心，慢慢食完全唔需要急，感覺都幾relax。不消一會燒雞心同燒雞腎陸續登場，兩樣其實都差唔多，燒得幾爽口唔會硬，正常冇大驚喜 。至於燒雞潤，師傅就幾鍾意，因為雞潤唔會燒到乾曬，入口軟熟，皮脆內香，口感一流，如果鍾意食雞潤，呢個絕對係另一個必食推介。維維招牌豬手亦都唔錯，一碟有三件，件件都燒得恰到好處，唔會過火，皮香肉腍，勁多骨膠原，果然係招牌菜，掂呀! 最後就講下 蒜蓉蒸扇貝，一份有兩隻，師傅同小黃人一人一隻，發覺佢燒得好香，蒜蓉非常之香，蒜蓉入口完全唔苦唔辣，熱辣辣非常惹味，而扇貝亦唔會燒到乾曬，值得一食。總括嚟講食物質素非常出色，價錢亦非常抵食，兩個人埋單唔使二百五十蚊，又送啤酒又送小食(記得經OR訂枱)，真係唔講得笑，唯一就係環境比較細，座位唔算坐得舒服，不過香港地豆屎咁細個舖位，都應唔平租，所以師傅係諒解。由於是次晚餐時間比較早，所以師傅大部分嘅時間都係包場，至少包咗九個字以上，呢個包場感覺都幾好爽。唯一可惜就係餐單上嘅選擇相對係比較少，如果可以再多啲選擇就好，是次值得一個笑臉，有機會都會想黎次!…Read More

監房尋晚搞聯歡，散場後師傅見有啲肚餓，於是乎返去自己個環頭，睇吓有乜好食。當時已經10點過後，大部份食店都準備或已經打烊，本來想食碗米線，結果全部關晒門，忽然靈機一觸，醒起呢間食店，其實師傅都想光顧一段時間，見佢仲開緊門，就一於去會一會佢。入到去食店都冇乜人，其實都正常嘅，當時時間大約係晚上十時一刻。入到去坐低後，即刻睇吓有乜食，攞張餐紙出嚟睇下先，嘩好似好多嘢食咁，師傅又鬼咁死餓，於是諗都唔諗就柯打左幼麵、豬皮、豬紅、豬腸、蘿蔔、牛肚，諗多陣再加多個午餐肉，要辣湯底同牛腩汁，再走蔥。等咗一陣，六餸車仔麵就擺咗喺師傅眼前，鬼咁肚餓嘅師傅當然即刻食，先飲吓個湯底，發覺湯底係辣，咁當然係辣啦，師傅柯打辣湯嘛，但點解會係麻辣？其實張餐紙上係有得揀麻辣同辣湯，師傅明明係揀辣，到底係佢比錯定師傅味覺出錯呢？即然係咁，唯有照食，湯底辣係幾辣，但麻辣唔香，偏咸少少，加上比較油膩，師傅就唔太鍾意。再睇到碗車份麵，嗰份午餐肉竟然係得半件仔，但係就收$9一份，似乎呢個份量有啲貴。先唔講個餐肉住，講下個蘿蔔先，蘿蔔切得幾大嚿，一碗有三舊，入口夠腍，可惜有渣，清湯蘿蔔，講真有渣呢下真係扣唔少分。再試吓豬皮，豬皮嘥屎有大有細，口感亦都有爽口又有腍口，非常參差好唔專業，放咗喺個碗度感覺係猶如雞肋一樣，可惜。豬紅細細舊，份量都算多，都有六至七舊到，呢個師傅冇乜投訴，正正常常收貨。再試牛肚，牛肚完全未炆腍，入口又硬又韌，絕對係失敗中嘅失敗。至於豬腸就切得幾大嚿，水準亦都係幾參差，完全唔腍，仲有少少渣，味道一般，唔得。最後就係半塊午餐肉，午餐肉係有煎過，都煎得幾香，但午餐肉始終都係午餐肉，九蚊塊得咁少就唔抵食，冇下次。到於幼麵水準都算正常，冇大驚喜。總括嚟講食物水準唔掂，淨係講嗰三豬都已經唔合格，地方環境還算可以，但係咁樣食六個餸一個面底，埋單$74，唔算抵食。喺呢一區雖然冇乜車仔麵嘅選擇，但寧願唔食都冇可能食咁曳嘅水準，六款餸有四款佢自己比三個手指公，莫非越多手指公越伏？笑面比唔到，喊晒口啦，師傅肯定唔會再黎。…Read More

師傅同小黃人諗住去九龍城食泰國菜，眾所周知九龍城有好多泰國菜揀，所以都未揀掂，師傅本來諗住返啅上一次嗰間，點知見時間早加上網頁睇到呢一間食店，都好似唔錯，所以就同小黃人黎呢度開餐。坐低望下個電視，原來尾場都未開跑，當時原來都係5點半。呢間食店最得意嘅嘢就係自己寫紙仔落柯打，寫紙仔嘅意思係你睇到餐牌上有乜冧巴，就寫個冧巴喺張紙仔上，彷彿好似手機落單咁。師傅同小黃人商議完之後，最後決定要泰式生蝦，炸蝦餅，兩隻燒雞全翼，菠蘿炒飯同埋胡椒粉絲大蜆，再加一支大啤。食店地方唔算好大，但人手又好似幾充足，不過啲招呼都係一般。小插曲係坐低後同小黃人商議下食乜，跟住個夥記呢就問嗰兜熱水用完未?其實熱水係畀你浸下啲碗碗碟碟，坐低一陣都未得閒洗就問人用完未，於是師傅話畀佢知未，轉頭就已經開始洗，好似見你洗完咁，佢又好快過嚟問你洗完未用完未，當然今次用完喇，師父當然有得佢收啦，只不過唔明點解咁趕，莫非冇兜用？師傅喺等嘢食嘅過程當中，當然係飲下啤酒啦，啤酒都冇乜好講，最緊要夠凍，而呢支啤酒都算幾凍，收貨。等咗一陣最快登場嘅就係生蝦，生蝦一碟有六隻，都算幾鮮甜都爽口，而師傅最欣賞個生蝦汁，因為夠辣夠香，香香辣辣非常惹味。第二樣上枱估都估佢唔到，竟然係個菠蘿炒飯，菠蘿炒飯賣相普通，相比師傅食過嘅菠蘿炒飯要細，而入口炒飯淡而無味，完全係冇味道，好淡口，唯一係有啲啲蛋香，呢個炒飯都算失敗，成個炒飯就好似雞肋一樣，食之無味棄之可惜。食緊炒飯時，雞全翼同埋炸蝦餅都到咗喇，師傅就第一時間試下熱辣辣嘅蝦餅先，蝦餅炸得幾脆，一碟有三隻蝦餅，切開咗有六件，都可以呀。至於雞全翼就比較失色，燒得唔算香唔算脆，最重要係冇味道， 師傅都要唔知自己食緊乜? 小黃人仲話唔明師傅點解會喺呢度柯打燒雞全翼，其實佢都講得啱，不過諗深一層，師傅點解會柯打，咪又係因為愛。最後就係胡椒粉絲大蜆，點知攞出嚟發覺竟然係青口，細問之下先發現原來係師傅寫錯老冧，所以就嚟咗青口。師傅年紀大機器壞，手又殘腦又殘，雖然係咁，並唔係大晒，但對住青口又確實冇乜計，唯有硬著頭皮反映下，睇睇有冇得轉返個大蜆，咁結果當然係冇啦。負責人話佢哋跟單做所以冇辦法，師傅都明白同諒解，正所謂轉畀你係人情，唔轉畀你係道理，鬼叫自己理虧冇得怨人，但係其實間食店都可以做好少少，就係落單嗰陣時覆一覆張單，睇下啲客有冇叫錯嘢 ，咁就可以避免呢啲咁無奈嘅事情發生。既然係師傅自己寫錯，就好好醜醜都試下佢係咩料，一試發覺粉絲味道勁咸，完全食唔出有胡椒味， 至於青口就冇試，純講味道肯定唔合格。總括嚟講食物質素唔得，價錢都唔算平，兩條友埋單連加埋一都要540蚊，呢個價錢同區真係有更多好的，服務普通，所以師傅肯定唔會再嚟，是次體驗絕對要比喊面，肯定唔會再黎。其實九龍城區大把好味泰菜，師傅唔明白點解會咁多人幫襯，或者師傅柯打嘅嘢食唔啱。其實師傅都食唔少泰菜，但真係好少會咁差，師傅除左覺得好對唔住小黃人外，更加感受到咩叫貼錢買難受。…Read More

師傅諗咗好耐都唔知食乜嘢好，同小黃人商量完之後決定去深水埗逛一逛，加上師傅同小黃人都唔算好肚餓，於是諗住食得輕量啲，師傅靈機一觸，決定去搵下師兄。師傅其實前前後後同小黃人都嚟過兩三次，每次去搵師兄嘅時間，佢門外一定係大排長龍，通常見到咁嘅情況，師傅都會過門而不入。是次同小黃人再去會師兄，都係抱住搏一搏嘅心態。去到門口竟然見唔到條龍尾，原因係冇人排隊喎，師傅當然大喜，同小黃人即刻直入，入到去量完溫度，填完資料後，就有得坐低啦!坐低後侍應好快趣交代左是日有啲乜嘢係沽清，於是同小黃人商量咗一陣之後，師傅決定要碗豚豚圓圓米線，小黃人就要咗碗帶子牛郎米線，再加左兩份小食，一份係鮮炸腐皮墨魚蝦條，另一份係麻香瑞士汁牛柏葉，加多一杯有機豆漿。落完單好快趣就已經有得食，最先登場嘅就係杯有機豆漿，師傅即刻試一試，入口豆漿冰凍鮮甜，甜味唔會太濃，味道恰到好處，飲落真係覺得幾健康，飲完又舒服，正呀；之後再嚟就係麻香瑞士汁牛柏葉，到底乜嘢係麻香瑞士汁呢? 原來就係甜豉油汁，甜甜地再加少少麻辣嘅香味，入口甜中帶辣，但辣得唔會過分，就算唔太食辣嘅都應該食到，因為始終豉油香甜比麻辣味強，而牛柏葉做得非常爽口，配上個汁真的一絕，醒胃。說時遲那時快，鮮炸腐皮墨魚蝦條都登場，都未嚟得及試，就已經見到兩碗米線亦分別放咗喺師傅同小黃人面前，既然係咁當然係試咗碗米線先啦。師傅嗰碗豚豚圓圓米線，由於有啲食物沽清，所以淨係得返豬腩肉。先試下個湯底，茄湯香濃酸甜味適中，非常開胃，飲完一啖湯基本上都停唔到口，湯底非常之得，絕對係師傅暫時食過最出色嘅茄湯，讚呀。加上米線煮得恰到好處，唔會過腍亦都唔會太硬，入口煙煙韌韌，超級好味，真係欲罷不能。如果鍾意食辣嘅不妨試下佢放喺枱個支麻辣汁，麻辣配茄湯估唔到出奇地吸引，香香甜甜酸酸辣辣味，味道好豐富，衝擊著師傅嘅味蕾。師傅滴左兩滴之後，忍唔住要加多幾滴落去，超正。至於豬腩肉唔係一般得個肥嘅豬腩肉，切得厚薄適中，賣相吸引，入口發覺豬腩肉超爽口，雖然見到有肥膏，但擺入口絕對唔油膩，口感一流。至於小黃人食嘅帶子牛郎米線，師傅亦都有幸試到隻帶子同埋牛脷，先講牛脷，牛脷屬於厚切，入口鬆軟加上非常之香，真係超級好食，至於帶子亦都幾大隻，帶子煮得唔太老，入口爽口，超得。 最後就係個炸腐皮墨魚蝦條，呢個相對地冇咁大驚喜，但墨魚蝦條炸得唔太油，墨魚本身亦都夠香，配上泰式辣醬，酸酸甜甜，亦算不俗。總括嚟講食物質素非常之出色，價錢亦都相宜，兩個人食咗五樣嘢埋單唔使兩舊，絕對抵食。服務態度友善，加上係良心食店有，所以都冇乜辦法唔多人排隊，師傅初遇師兄雖然係遲咗少少，但亦未至於相逢恨晚，期待好快可以再嚟試師兄其他嘅食物，師兄要繼續保持食物嘅水準，勿忘初心。師兄同香港人都要加油，好人一生平安!最後師傅知道師兄都會玩下打油詩，所以師傅獻醜!蕃茄師兄頂瓜瓜茄湯小食冇樣差師傳食到笑哈哈兄弟姊妹齊撐他…Read More

師傅都有好一段時間，冇話食完後拿拿聲要出個食評，因為真係都幾忙，但是次呢單嘢，真係不吐不快呀。早幾日約咗詩人食飯，師傅知道詩人比較鍾意食串燒，於是就喺尖沙咀揀一間，眼見呢間評論都不太差 ，於是就去馬啦!話左比詩人黎呢間食店，詩人話知道上開飯網到訂枱可以有88折，於是就順手訂埋。兩個人準時去到呢間餐廳門口，發覺小貓三四隻，感覺有少少不對辦，但見係星期一加上疫症期間，所以都可能係合理，於是決定照食，量完體溫就被安排入座。坐低同詩人睇睇有咩好食，發覺串燒嘅款式都比較少，左睇右睇商量左一陣，於是一口氣就柯打咗幾樣嘢食，分別係串燒牛舌，雞心，清酒煮大蜆，燒飯團，燒帶子，免治雞肉，燒雞翼同燒牛肋肉，本來仲有燒蠔，問左侍應一客有幾多隻，佢話3隻，就柯打一客，點知轉頭就話一客一隻，於是就取消啦，最後加多一份壽喜燒。 嘢食落完單後，詩人話想飲啖酒，師傅當然奉陪到底，於是揀咗一支有氣柚子酒，落曬單後就等食。說時遲那時快，侍應好快就攞咗支酒出嚟，好認真地喺面前開，呢個做法當然非常妥當，同時端上兩個杯，子杯裏放著冰塊，就倒落我哋嘅杯度，師傅同詩人哼咗杯之後，再飲下杯酒，不過味道普普通通，冇乜大驚喜，但之後嘅事就發生，原先個餐牌 明明寫住呢支750ml賣兩舊幾做緊特價，點知嚟到見到支酒原來得500ml，師傅即刻去反映係佢哋當中出現咗問題，成間舖兩個樓面一個男一個女，男嘅態度都十分友善，表現得有唔好意思嘅感覺，而女嘅就不斷話，係個餐牌寫錯。師傅心諗你冇嘢呀，你個餐牌寫錯唔係我嘅問題，係你地嘅問題。 最後佢哋都問師傅需唔需要退咗呢支酒，講真唔係飲唔起，係唔公度啫，但為免影響同詩人食飯嘅雅興，所以就算啦，個餐牌寫到咁離譜，真係感覺有少少鬼。反眏完之後就準備食嘢，先試個雞心，燒得幾香幾爽口，味道都唔錯。再睇下佢個清酒煮蜆，呢個蜆都值得一讚，因為清酒煮蜆湯底鮮甜，值得一讚係蜆肉嘅肉身比較大隻，加上冇乜沙，入口舒服，掂。牛脷都算幾大塊，肉身夠厚入口爽口。燒飯團就普普通通，不吃也罷。牛肋肉正常嘅牛肉，冇驚喜。至於免治雞肉又係普普通通，雞肉裏面有少少雞軟骨，唔夠腍，入口比較un牙，但配上個蛋豉油汁，又真係幾好味，勉強可以啦。燒帶子一串三粒，真係細細粒容易食，普通。最後燒雞翼不過不失，冇乜驚起唔會難食。最後個壽喜燒，可以算係敗筆中嘅敗筆，師傅食壽喜燒唔算得上專家，但詩人算是甚有研究，壽喜燒牛肉太韌，入口個湯底就好鬼甜，完全唔似壽喜燒，淨係得個甜字，最吸引師傅嘅就係個磚豆腐，豆腐夠香夠滑，不過整體都係不合格㗎。食完曬嘢再坐咗一陣，傾下偈之後就埋單，奇怪嘅事情即將發生。師傅賣單循例都望下張單，有時都唔記得啲價錢絕對唔出奇，比完曬錢之後詩人發現 個清酒煮蜆貴咗，明明係68蚊，佢就收咗88蚊，咁當然要即刻同伙計講返啦，點知嗰個女伙計個態度都非常不友善，感覺好似師父喺度搞事咁，老老實實餐牌你寫住68，而家收88仲好似師傅唔啱，你冇x嘢呀，跟住佢走埋你計，又話68蚊就冇八八折，68蚊就要加一成條數計到九唔搭八，一張新嘅單都唔出，轉個頭就話退返兩蚊畀師傅，問師傅o唔ok 講真啦，都唔係嗰幾蚊嘅問題，係你間鋪頭嘅信譽同誠信問題，一單又一單完全誤導觀眾，為咗一個幾毫喺度呃人，似乎講唔通囉，仲要發脾氣，掟晒筆咁。呢單嘢真係不吐不快呀，就算你啲嘢食幾好，有啲咁嘅伙計喺度幫你倒米，都係聽執笠啦。乜都唔使講㗎喇，笑面一定畀唔到，我喊梗服務態度差到一個點，嘢食唔係平架，埋單兩條友食咗接近九舊水，仲話折咗，你冇x嘢呀，每人450蚊仲要唔係好飽，又要受氣，所以肯定冇下次，順道祝呢間嘢早執早著。…Read More

師傅真係估唔到小黃人會鍾意食臭臭鍋，咁啱講起，加上師傅竟然從未食過，而時間又啱又唔使排隊，於是入去會一會佢。坐底睇下個餐牌有乜食，發現都有成九個唔同鍋可供選擇，既然師傅大鄉理出城，當然係試下個招牌臭臭鍋配上中辣，而小黃人都係揀招牌臭臭鍋配小辣，照咁睇師傅應該冇揀錯。臭臭鍋一人一爐，就算疫症下師傅都覺得食得衛生。臭臭鍋有娃娃菜，白豚肉，臭豆腐，貢丸，米血糕，大腸，豬紅，沙白，鵪鶉蛋，蕃茄，炸菜絲，韮菜，金針菇，鳴門卷，炸枝竹同粉絲，講真都算幾多野食。由於師傅從未試過，心想應該好似打邊爐咁，點知原來真係一獲熟，一煲野放喺面前，邊滾邊食，咁真係快靚正，唔怪得之限時啦。講真食物又冇話邊樣特別出位，但個臭豆腐都幾臭，算係幾特別同吸引。總括黎講食物質素正常，服務都友善，環境都舒服，價錢合理，冇記錯每個鍋都係130蚊左右，扺食同會食得飽。師傅都好開心因為小黃人有好介紹，其待下次再黎，笑臉一定會比。…Read More

難得小黃人放假話約師傅晚餐，師傅當然十分開心啦，因為又可以見到小黃人了。於是離開監房打算坐叮叮去筲箕灣搵食，點知師傅傻下傻下早左落車，於是又去左西灣河。一早已有鎖定左呢間食店，點知去到勁多人，飛都冇得攞，於是就四圍行下，可惜小黃人又冇乜心水，最後兜兜轉轉再行返去呢間食店，當時時間係晚上八點半，食客開始走，所以就有位。原來食店九點半打烊，所以叫做勉強食到!唔知係咪餓得太久，小黃人竟然話冇胃口，但師傅就勁肚餓，於是就揀左麻醬擔擔濃湯配台式拉麵配中辣，醍醐台式肉燥飯，鹽酥花枝丸，薑湯四色手工芋圓同埋百香果紅茶。等左一陣所有食物一齊登場，師傅先試下個麻醬擔擔濃湯配台式拉麵，呢個擔擔麵不得了，麻醬香濃，中辣惹味搶口，淨係個湯底都已不俗，再試埋個麵，入口彈牙，口感一流，非常掂，必食推介。鹽酥花枝丸炸得唔油，花枝丸夠香夠彈牙，真係欲罷不能，好正!相比之下醍醐台式肉燥飯就稍嫌失色，由於肉燥比較乾身，口感所以較鞋，師傅就不太喜歡。而薑湯四色手工芋圓師傅都冇試，但小黃人話個湯真係好夠薑下，嗜薑者必試，加上芋圓煙煙韌韌，應該不錯。最後百香果紅茶嘅茶都幾濃，相比平時飲綠茶又有另一番風味!總括而言食物質素有水準，地方比較逼，始終係小店，但勝在環境清潔乾淨，加上價錢相宜，埋單113，非常抵食。如果師傅仲有機會去港島東區，呢間食店絕對值得返啅，有機會必定再來。笑臉一定要比!…Read More

小黃人話要同師傅慶功，原因師傅之前考試勉強合格，又搵個藉口食一餐，賀一賀佢，師傅當然要搵啲好野食下，咁啱想食漢堡包，就揀左呢間食店。離開監房，就坐車落去。真係估唔到個地點就正正喺天星碼頭的一間舖仔，講真經過九千幾次，次次都係撘船，今次特登黎食，感覺有點特別。舖仔細細，在外幾張櫈仔，一張單邊枱，之後就去落柯打。師傅同小黃人都算係嗜牛之人，所以柯打左兩個牛肉漢堡，再配左個餐，有炸薯條同汽水，另加多一份炸魚手指，兩個人肯定夠飽。落完單，當然要等，因為即叫即整，不過又比想像中快，所以感覺都幾好。牛肉漢堡熱辣辣，包身鬆軟，牛肉又香又鬆有牛味，有追住食嘅感覺，而包內配上鮮蕃茄，蕃茄都多汁，值得一讚個漢堡係冇用任何醬汁，一塊蕃茄已經取替左啲醬汁，感覺健康啲，加上個包身嘥屎唔會大得太誇，師傅都可以一口由頂咬到個包嘅底部，又唔會食到呢咁hea，感覺超正!薯條屬於粗身，口感正有薯味，份量都多，不錯。而炸魚柳手指得香脆，肉身鬆香，係油少少，不過都接受到。總括黎講食物質素出色，環境就正正常常，店員服務友善，價錢接受到，98蚊一個餐，收貨。同小黃人邊食邊傾計，感覺寫意，呢間食店絕對值得推介，有機會一定會再黎，笑臉必定要比!4…Read More

師傅同小黃人飯後，由於都比較早，所以決定去食甜品。由於附近都比較多選擇，為免有錯，睇清睇楚先，最後揀左呢間食店。入到去唔多人，坐底就睇下有乜吸引，師傅就好想食雪糕，所以就揀左香蕉船，至於小黃人就揀左即撞木桶豆腐花熱食。老實講香蕉船賣相又冇乜特別，純粹想食雪糕，三隻唔同味滿足師傅嘅貪婪，所以都冇乜好講。反而即撞木桶豆腐花有驚喜，豆腐花又香又滑，黃糖自己隨意加，比想像中好，推介!總括黎講甜品都幾多選擇，環境舒服乾淨，價錢合理，最難得可以慢慢坐下，同小黃人傾下計，可能咁啱當日大雨，所以客人較少。師傅初嚐小方糖，感覺和印象都不錯，有機會都會再黎。…Read More

師傅約左小黃人食飯，為方便小黃人所以揀左喺呢個地區食，當時外面都幾大雨，但又冇話特別想食d乜，所以最後行左一陣就揀左呢間食店。入到去又冇乜人，但感覺好似就收工咁，其實當時只係晚上8點鬆少少，不過伙計照樣招呼入座，所以就入左去坐。坐底睇下有乜野食，見個晚餐都幾抵食，有前菜，有主菜，有飲品都係70蚊左右。於是師傅揀左辣肉腸墨西哥汁意粉同南瓜忌廉湯，而小黃人就揀左柚子汁雜菜沙律同慢煮紅酒牛尾意大利粉，再配上兩支果汁，另外再加左炸薯條配黑松露醬。落完單等一陣就有得食，前菜先上柚子汁雜菜沙律同南瓜忌廉湯，先講下個沙律，柚子汁幾清爽香甜，入口舒服，而南瓜忌廉湯就普普通通，未算吸引。再講炸薯條配黑松露醬，炸薯條堪稱失敗，薯條屬於粗身但完全冇味道，連基本嘅薯味都冇，就算點黑松露醬也不見突出，感覺比老麥的還要差，令人失望。再講下個辣肉腸墨西哥汁意粉，意粉爽口汁底唔算太辣，加啲辣椒仔就額外惹味，至於慢煮紅酒牛尾意大利粉師傅就試左個牛尾，都煮得幾腍幾入味，聽小黃人講都收貨，應該不俗。最後兩支果汁係樽裝，味道冇特別，但就感覺特別衞生。總括而言，食物質素屬中上，環境舒服，衞生乾淨價錢相宜，由於師傅並不喜咖啡，所以沒有試到，唔知咖啡水準得唔得呢? 呢間食店，有機會都會再黎嘅，始性價比都高。食完飯都係9點鬆少少，但店內已進行清潔，為免阻礙收工，師傅同小黃人都係撤退為妙。…Read More

師傅一支公做完所有嘢，透支到一個點，加上又係放飯時間，就諗下可以食啲乜嘢。一支公決定由油麻地行去深水埗，為的就是要光顧呢一間食店。呢條基隆街好多良心食店，但唔知點解一路行師傅都搵唔到呢間食店。沿著基隆街係咁行係咁行，最後要行到去 近西九龍中心個位先至見到呢一間食店，爭少少師傅以為要食水門雞飯呀。入到去食店，人都唔算多，可能都比較夜，接近九點左右，於是求其有個位師傅就坐低。攞起嗰張牌點餐紙，攞埋一支筆，就諗下食乜嘢好。一如以往師傅揀左豬紅，豬腸，豬皮，再揀咗牛筋，咖哩魷魚，墨魚卷同埋鹵水牛舌，而麵底就揀左油麵，加埋沙爹汁同腩汁，就將張單交咗畀侍應。點知侍應話畀師傅知今日豬皮沽清，當下都有少少失望，雖知喺師傅眼中車仔麵三寶同五大訴求一樣，係缺一不可架嘛。但冇豬皮點算好，唯有揀另一個餸，師傅就揀左咖哩魚蛋。其實呢間食店魚蛋都有兩款，有陳皮魚蛋同咖哩魚蛋，師傅就姑且先試下佢呢個咖哩魚蛋係咩料。老老實實落完單，等候嘅時間都唔算快，不過正所謂，好嘅嘢係要等耐少少，加上呢度文宣咁靚，圖畫咁正，周圍影下相留下念，都不失為一個消磨時間嘅方法。再過多一陣，師傅碗車仔麵就擺咗喺面前。謝主隆恩後，即刻開餐。先試下佢個湯底，湯底都幾香幾濃，味道又唔算好誇張，加上冇乜味精，配上少少咖哩汁都幾惹味，師傅一口氣都飲咗五六啖。之後再試下個豬紅，豬紅一粒粒，細細磚，咁夾落去唔會鬆散，但係就蚊得唔係好入味，唔算好出色，普通。再試下牛筋，牛筋反而幾得，第一牛筋都幾大件，第二炆得好腍，第三口感一流，入口黏黏的，勁正，絕對係師傅嘅必食推介。再試下個咖哩魷，咖哩本身幾香，魷魚就都算爽口，咬口都算唔錯，接受到。至於魚蛋就普通少少，魚蛋嘅咖哩味都唔算好出好，但入口都爽口彈下，收貨嘅。豬腸亦都炆得非常之腍，但就係瘦身少少，咬口唔夠，整體嚟講都算接受到 。再黎就係墨魚卷，墨魚卷本身比較硬，而且唔夠香，冇墨魚味，整體黎講算曳，下次唔會柯打。但另一驚喜之作就係滷水牛舌，牛舌味道就唔算滷得好入味，但係牛舌個咬口就贏晒，牛舌厚厚的，夠香夠腍，口感就非常一流，加上份量都幾多，喺車仔麵嚟講有牛舌都係幾特別，係師傅另一必食推介。油麵就正正常常，冇特別。總括嚟講食物質素不俗，價錢都合理，食咗七個餸一個麵，飽到傻咁濟，埋單都好七十幾，抵食到飛起。老老實實呢條街真係好多良心食店，有機會師傅都會再黎，或者再試下其他良心食店都得。…Read More

師傅琴日心情麻麻地，成日都冇乜點食過嘢，直到離開學堂都未肚餓，但感覺上係要食啲嘢，於是乎就近近哋嚟呢一間食店啦。呢間食店亦都係一間良心食店，師傅一定會支持，其實之前已經嚟過一次，不過太忙冇有時間寫到食評，趁住今日仲有少少時間，就寫個新鮮熱辣記憶猶新嘅食評。由於去到時間都比較夜，所以唔使等位直接入去，師傅記得上一次黎嘅時候，都要喺出面排隊，都要等三四個先入到去。今次就比較快因為夜嘅關係，入到去一坐低侍應已經好快就遞咗一張餐紙上嚟。師傅見當中有好啲食物沽清，但都不影響師傅，於是乎睇睇張紙，望左一陣，即刻畫嘢食，一如以往師傅先揀咗豬紅，豬皮，豬腸，再揀咗紫菜，牛筋同埋咖哩牛柏葉，今次我要左米粉，而湯底加上腩汁同咖哩汁後，咁就交咗張紙畀侍應。說時遲那時快， 一碗熱辣辣嘅車仔麵就放咗喺師傅面前，師傅先試下佢個湯底，發覺湯低香香甜甜，味道又甜，師傅都一口氣飲咗四五啖，好正，見佢旁邊仲有咖哩醬，不過份量唔算多，但咖哩好鬼香，好惹味，再將咖哩醬撈勻喺個湯底，咖哩香味出曬嚟，真係不得了。之後師傅就試下佢個豬皮，豬皮都幾大塊，入口算幾爽口，雖然唔算話係好爽，但係都算爽口得嚟，而唔會覺得係腍嘅口感，加上佢幾大塊，有咬口，師傅必食推介。豬紅就一粒粒正正方方，唔大唔細，都算炆得入味，有啲味嘅但唔算話好入味，整體嚟講都算好，又唔會一夾就散，可以。至於個牛筋就不得了，牛筋非常非常之大件，入口夠黏夠咬口，炆得好腍，完全冇得頂，另一必食推介。再講紫菜，其實在真係冇乜好講，真係想食嘅啫，貪佢紫菜撈埋落啲湯度，有個香味浸出黎，所以係合格。另外就係要講下咖哩牛百葉，牛百葉灼得好爽，爽中帶香辣，另一個必食推介。最後就係豬腸，豬腸都算幾肥身，加上炆得幾腍，但係未算係師傅最鍾意嗰隻，可能佢唔夠香，所以合格啦。至於米粉就冇乜特別，但係勝在底好夠大，份量好多，師傅食六個餸一個粉麵，正常嚟講係啱啱好嘅，唔知係因為琴日冇乜胃口，定係真係分量好多，好勉強先可以食完一碗六餸，有料!總括黎講食物質素不錯，雖然佢張柯打紙有啲似新記嗰款，但係佢冇新記咁多，價錢同新記差唔多，但係師父覺得呢一間好食好多，環境都舒服乾淨，至少唔會見到有烏蠅飛下飛下，價錢合理十蚊一個餸，全部嘢都係十蚊，六餸一麵加埋70蚊接受到啦。今時今日除左要好食，仲要食埋良心架，所以呢一間食店真係不俗，以車仔麵黎講，呢間食店師傅肯定會再黎，笑臉比梗。…Read More

師傅難得可以早啲離開監房，於是乎約友人女神食個飯，之後順便去飲杯嘢。師傅睇下有乜好食，左諗右諗又要就返個地段，就返啲時間，於是決定嚟呢一間食店試一試喎。又係一間良心到不得了嘅良心食店，所以同女神夾好時間之後，師傅就直接黎呢度坐定定 ，等埋女神一齊嗌嘢食。等候期間，又連儂牆，又優惠，真心感動。終於見到女神，點知女神黎到就話唔係好肚餓，冇乜胃口，真心唔知係咪見到師傅個死人樣，所以冇乜胃口。不過師父都慣，被嫌棄已非首天，於是唔理咁多，不過嗰日師傅好好胃口，但兩個人又不能柯打太多食物，所以商量咗一陣，決定柯打一個花膠湯米，清酒煮蜆，同埋嗌咗佢一個老火例湯。雖然唔係柯打左好多嘢食，但招呼一樣好好，好快就有得食。先登場係個老火湯，當然要同女神分左佢黎慢慢飲，碗湯女神話唔夠熱，不過對師傅黎講就啱啱好，如果太熱嘅話師傅就飲唔到喇。碗湯係椰子煲雞，椰子非常香甜，冇味精，入口非常舒服，味道超正，唔知係咪師傅太耐冇飲呢啲所謂住家湯，所以覺得好好飲，飲得得非常吃皮。之後就試下佢個花膠湯米粉，花膠湯米一碗唔算大，如果師傅一個人嘅份量嚟講可能又太少，首先講佢嘅米粉，係屬於新竹米粉，又幼又腍，米粉啱曬師傅口味，加上湯底清甜，而且花膠係兩大塊，花膠扒咁上下，入口勁腍勁黏，呢個口感師傅覺得勁正，五十幾蚊碗，想點先?最後清酒煮蜆亦都唔錯，清酒非常香甜，而佢個蜆身亦都好大隻，加上飛晒沙，好甜又好食，得!總括黎講食物質素都非常有水準，環境就唔算好大，地方都算乾淨，服務就非常殷勤，加上係良心食店，所以師傅一定支持，埋單兩個人百六蚊左右，合理價錢，今時今日咁嘅服務，咁嘅水平仲要有良心，所以師傅肯定會再嚟。…Read More

師傅早期都仲係寫緊食車仔麵嘅食評，但由於最近比較忙，所以就停左未寫住，其實師傅手頭上仲有幾個車仔麵食評未寫，遲少少先再寫返。早幾日師傅忽然間想去附近搵啲良心食店，但由於時間都幾夜下，本來諗住去牛屋食，諗住去嗌下順便有個折，點知去到佢閂門唔招呼師傅，師傅唯有再去遠啲嘅地方，喺網絡上搵到呢一間食店，滿心歡喜去到，以為係食越南菜，誰知入到去係食韓國菜，既然都來到咁點都要試下佢。由於都比較夜，所以入到去冇乜客喺度，師傅坐低睇下有咩好食，發現餐牌上有好多個套餐，都係畀一個人食嘅。左睇右睇食咩好呢，最後師傅決定柯打個牛肉飯套餐，而佢個套餐係跟一個泡菜湯，由於師傅唔係好想飲泡菜湯，於是問下可唔可以轉換做辣海鮮湯，細問之下原來加十蚊就可以轉，咁師傅當然會轉，於是乎就柯打左一個牛肉套餐配辣海鮮湯。等咗都一段時間，可能比較夜同埋即叫即整，所以等得比較耐，但係一嚟到嘅時候，個賣相令師傅非常之興奮，因為一個套餐裏面有七款唔同嘅前菜 ，要知道食韓國菜好多時都係鍾意食佢哋個前菜，前菜有韓式泡菜，芽菜，莧菜，蓮藕木耳，南瓜同埋青豆。至於個主菜牛肉都幾多，白飯上有一隻煎蛋 ，非常吸引，旁邊就係一碗辣嘅海鮮湯，正所謂相機先食，機食完之後就到師傅食。先試下個湯，湯第一啖飲落口非常香，味道微辣，飲多幾啖發覺幾惹味，師傅鍾意，至於湯裡面嘅海鮮亦都多，有青口，有啲蜆，有啲蝦，有啲魷魚，當然仲有豆腐啦，整個湯嘅感覺好得，師傳好滿意。之後再試下佢啲前菜，基本上每個前菜師傅都好鍾意，泡菜唔算話超出色，但仍然係一個可以接受嘅泡菜，味道唔會太誇張，唔會太酸亦都唔會太辣。至於主菜牛肉就差少少，因為可能煮得比較耐，乾身同韌銀少少，但整體配上泡菜，前菜一齊撈飯，簡直一絕，師傅一條友食到舐舐咀。總括嚟講食物質素非常之好，環境大韓風嘅感覺，又播住韓式電視，又貼晒韓國poster，鍾意食韓式風味嘅真係唔好錯過，而價錢亦都唔算好貴，138蚊一個set加多個湯改咗個湯都係加多十蚊，埋單148再加一，收貨啦! 食到飽飽師傅爭啲都行唔郁，難得黎左間良心大韓風，師傅大力推介，今時今日師傅仲諗緊幾時去返啅。…Read More