Crystal Chow 16's Profile

疫情關係已經一年有多無得飛，好掛住歐洲，於是今日出開銅鑼灣就順便搵下有咩西餐食下。見到呢間有好多都啱食又符合要求的菜式，一開門6點我地就去咗啦! 咁早食飯有個好處，就係無乜人，可以聽住音樂傾下計飲杯野，都算有少少歐洲的感覺。我地叫咗Coffee Tonic 同埋 Pineapple ginger beer，Cheers! ，連同Green Salad一齊食做appetizer，十分開胃，特別鍾意salad上的黑醋，酸酸甜甜，好清新!之後我地再試咗buffalo wings，housemade的BBQ sauce好惹味，雞翼亦都燒得好juicy；另外又叫咗Arancini，入面其實係有parma ham的risotto，好特別! 炸咗之後連同mayo一齊食，好香濃，外脆內軟，有啲似食緊西班牙的croquette，推介!前菜份量都唔少，食完已經有啲飽。之後主菜就叫咗Grilled Striploin 同埋 Porcini Mezzelune。Striploin煎得香脆，切開有大量肉汁，肉味亦都好香濃，而且份量好多! 十分欣賞配菜，一啲都唔馬虎，每一份都seasoned得好好又新鮮，唔會係一早整定已經老哂的蔬菜!另外的黑松露意大利餃，話明要解鄉愁所以唔叫意粉反而叫mezzelune比較有特色的主菜。每一件的意大利餃都煮得剛好，外皮依然有咬口，唔會太厚；咬開就係充滿黑松露香氣的餡料，平均地分佈係每一啖，唔會過多或過少；外面的醬汁蘑菇，令到口感更加豐富；芝士再加上truffle oil，更加香滑!!今餐係好滿意的意大利加美式晚餐，一定會再嚟!…Read More

已經唔係第一次食The Grill Room, 今日行完街同男朋友又再嚟食, 一如既往的滿足! 口罩袋一早已經準備好放在座位，店員亦好有禮貌介紹餐牌及提供清水，落單後大概15分鐘已經有得食!前菜 -- 忌廉牛油蒜香雜菌一見到呢個前菜已經講明一定要叫，全部都係我最鍾意嘅元素 - 忌廉、牛油、蒜、雜菌，呢個組合基本上無得輸! 新鮮煮好送嚟的時候已經聞到飄嚟嘅牛油忌廉香氣，雜菌切好成bite size，加上蒜香，配上又暖又脆的麵包，單單前菜已經好滿足。份量亦好多，麵包亦可以吸收忌廉，所有精華唔好浪費。主菜-- ANGUS RIB EYE男朋友當然食steak, RIB EYE煎封得香脆，鎖住肉汁! 五成熟剛好，肉味香濃，而且仲有陣陣的炭香味。同場的黑松露薯蓉亦都十分出色，好creamy順滑!-- 香煎北海道帶子龍蝦汁意粉配三文魚子成餐飯令我最回味的就係呢碟意粉! 帶子新鮮，表面煎得香脆，內裡依然係剛好生熟的狀態，仍然食到應有的鮮甜味；龍蝦汁好香濃，每一啖意粉都掛滿龍蝦汁，意粉亦煮得剛好，再加上三文魚子令到鮮味更突出，滿分!…Read More

今日要出深水埗買露營用品，記得有一次經過呢間米亭已經好想試，難得座位舒適亦有唔同款式的餃子可以選擇。豆乳豚骨涉湯米線，湯底有啖啖的豆乳味，清香鮮甜，米線份量好多又有咬口。餃子方面我揀咗紅咖哩芝士豚肉餃，芝士味十分突出，而紅咖哩的底味就有泰式的感覺，食到檸檬葉的味道，好特別的味道，唔錯唔錯。而小食我就揀咗醬脆手撕雞，份量又係好多，其實係麻醬手撕雞上面再加咸黃蛋脆餅，卜卜脆的口感再加上無敵的麻醬，唔會出錯的組合，好味!仲有不同的涼菜和醬菜，涼拌雲耳好開胃，蝦醬好惹味，菜甫爽脆，再加埋豆漿，好香豆味而且又滑，成個套餐好completed。男朋友揀嘅就係香辣湯底，辣味夠湯頭香；而餃子就叫咗炸韮菜黑豚肉餃。炸的餃子又係另一種感覺，即叫即炸非常香脆，而且餡料爆汁，好香的韮菜味。小食就試咗秘製脆汁豬扒，可能係即製的關係最後先上枱，只要好食嘅真係等下都無所謂，肉厚香濃，再加上面頭的脆片，味道口感都十分討好，滿意!…Read More

今日同媽咪去行花墟，順便食晚飯，記得附近有間唔錯的餐廳，買完花就去食啦。我地好早就去到，食個early dinner。店員好用心咁講解，自己睇完餐牌就出去落單，另外醬汁、餐具、水，都係自助形式。一坐低無幾耐先嚟兩款前菜：芝士流心蛋大啡菇 & 芝士奶油法式焗薯芝士味勁濃，加埋流心蛋的蛋黃，就算平時唔太鍾意食生蛋黃的我都覺得好夾；大啡菇好juicy，而且煮得剛好依然有咬口，整個組合好開胃。芝士奶油法式焗薯，一層一層的焗薯，中間夾住十分creamy的奶油，層次豐富亦係好香的芝士味美食嚟到主菜，媽咪鍾意食西冷，咁就叫咗呢度的招美國安格斯慢煮西冷，另加配菜蘑菇。一上碟媽咪呆咗，好大份。外面煎封得十分香脆，切開充滿肉汁而且肉味香濃，果然係慢煮的好處。而我就叫咗滿蜆肉蝴蝶意粉，我都呆咗啊! 成隻碟咁多的蜆，非常有鮮味，唔會得個殼做賣相；蝴蝶粉亦煮得剛好，加入十分有鮮味的醬汁，成件事十分到位，實在好滿足。最後，食西餐當然要食埋甜品。我地每人一杯咖啡，再叫埋朱古力布朗尼配雪糕。Brownie充滿香濃朱古力味，入面有果仁，而且嚟到的時候仲係微暖；雪糕揀咗海鹽味，一冷一熱，海鹽亦同甜味好夾，再飲啖咖啡，呢餐飯真係好完美。…Read More

各國菜式之中，個人真係最鍾意食中菜，知道今日會去荃灣，知道楚撚記開咗分店，同埋男朋友去食返餐久違的晚飯。我地5:30就去到，因為根據之前係土瓜灣分店的經驗，楚撚記係長期多人，早啲去就早啲食。荃灣分店係新開，與土瓜灣比較更加光猛，而且伙計的服務態度熱情得令我驚喜，由一入門口至到坐低，解釋十分清楚，亦都好貼心地提供搓手液俾食客使用。一早已經睇定餐牌，決定叫啲平時自己唔會係屋企整的菜式。京都骨餐牌寫明用腩排，好驚喜無豬肉的肉腥味，應該事前功夫處理得好好，啖啖肉，充滿肉汁而且肉質鬆軟；醬汁酸酸甜甜，第一道菜好開胃，而且份量好多，至少有6大件。香爆黑椒牛仔骨煲煲仔菜一定要熱上，食到最尾依然散發出香味。牛仔骨份量好多，唔會骨多肉少，黑椒味同牛肉真係好夾，無鬆肉粉嘅味，仍然係有肉味有咬口，係好標準合格的黑椒牛仔骨；最驚喜其實係洋蔥，煲仔仲係熱令到洋蔥處於加熱狀態，越食越入味!!芝士琵琶豆腐每次去楚撚記都一定會叫的，琵琶豆腐唔係間間整得好食，足料及有魚肉冬菇香味更加唔多，外面炸得香脆，配上另加的芝士汁，一脆一軟的口感太令人回味。芝士汁的誠意仲有睇得到的芝士粉，增加香味；另上的智慧鍾意撈幾多就幾多，亦都唔會令到香脆的表面淋咗，撈飯真係停唔到!香煎潮汕韭菜粿第一次叫，諗住當小食點知最後一碟嚟到，一食入口覺得情有可原! 香煎新鮮上碟，應該即叫即整，包完再香煎；咬開充滿汁料，大量的韭菜，彈牙的原隻蝦，好足料好香口，外皮Q彈，好有驚喜!! 傳統蛋黃蓮蓉 / 黑金流沙奶黃壽包   食中菜都要食甜品，見到流沙兩個字都忍唔到。食完飯先叫，等咗大概十分配，即叫即蒸。一人一個壽包，唔好以為細細個，皮薄餡多，傳統的蛋黃蓮蓉有成個蛋黃，黑金奶黃一咬開即爆沙，好滿足!!呢餐飯真係好肥仔但係捧住個肚走好滿足!!…Read More

又係同妹妹去食拉麵嘅時間~ 今日會出去深水埗區，口袋中已經有幾間cafe同拉麵店想試，之前聽係附近工作的朋友介紹呢間拉麵店十分不錯，所以就嚟試下啦!我地大概5點幾左右到，算係early dinner嘅時間，未有好多人，座位亦算鬆動。坐低之後店員已經好殷勤地奉上兩杯水同解釋用QR code落單，第一感覺已經唔錯!睇睇拉麵款式，基本的湯底款式都有；除咗必備配料 - 叉燒，亦都有蟹肉、海老等等可以選擇。另外仲有不同款式的小食和配料可以追加，有選擇困難症嘅我地都猶豫咗好耐先揀到。落單完成後，先來小食 - 章魚小丸子。即叫即做，新鮮上碟，外皮香脆，饀料豐富，加上木魚、醬汁，經典的日式小食好快俾我地食哂。醬油拉麵 & 蟹肉拉麵之後主角來了! 妹妹叫咗醬油拉麵，而作為海鮮控的我就試下蟹肉拉麵。先說湯頭，十分厚實的味道，非常濃郁，加上麵條可以選擇口感 (我地都揀咗「硬」)，彈牙的拉麵加上濃厚的湯底，非常掛湯，十分滿足! 配料的叉燒經過火灸，肉香帶有少許炭香味，濃厚的湯底進一步提高油脂感，口感十分豐富!!而蟹肉拉麵的主角 - 蟹肉十分鮮甜，係真正的蟹肉，配上濃厚的湯底帶出少許甜味，是另一種的味道，對我嚟講十分討好!而且份量都不少!我地另外仲叫咗溏心蛋，單睇外貌以為無乜特別，咬開才有驚喜! 蛋身香甜，蛋黃濃郁，溏心的效果做得好好，剛好係食得到的溏心，又可以與拉麵融合的狀態，大家去食的話一定要加一隻溏心蛋!…Read More

一早約好妹妹今日去行街，突然間好想食甜品，而妹妹特別鍾意食pancake , waffles 之類的甜品，醒起多年前同朋友食過甜牙牙，所以就去食啦!由於我地去下午茶時間，可能比較少人呢啲時間特登去甜品店，所以無乜人即刻已經可以入座。打開menu實在眼花撩亂，太多選擇而且每一樣都好想試，店員完全無催促我地落單，而且仲好好咁先俾兩杯水我地慢慢諗，最後千辛萬苦終於揀咗Tiramisu窩夫 同埋 朱古力鬆餅。 因為新鮮製作，我地都等咗一陣，之後就聞到有陣香味飄緊嚟啦!!Tiramisu Waffle 窩夫鬆脆，做到外脆內軟的口感，味道唔算好甜，配以雲呢嗱雪糕，一冷一暖，口感味道即刻提升! 加上Tiramisu唔少得的就係手指餅同咖啡酒，沾滿酒香的餅乾唔會太腍，質量控制得剛好，再加上少許餅碎同朱古力醬，層感進一步提升，真係有食緊tiramisu的感覺。朱古力鬆餅呢一份鬆餅，有兩大塊，厚身鬆軟，而且蛋香十分突出。伴碟的有朱古力cream，朱古力味已經好香濃，但意想不到的係雪糕，十分香濃的朱古力味，很驚喜!! 再加上oreo、曲奇餅碎同棉花糖，又係口感和味道的交流，十分好食!!兩份的份量都好大，我同妹妹都食唔哂，真係用心製作又抵食的甜品!!…Read More

難得同男朋友去銅鑼灣行街，一早已經搵定好地方食飯，做咗不少research再加上朋友力推，最後揀咗虎鐵鐵板燒。由於一早已經訂位，準時到達之後店員即刻帶我地坐低，安排嘅位置係可以清楚睇到師傅係鐵板爐準備每一道菜，好期待!! 之後店員亦到提供信封俾我地放置口罩，又介紹一下不同嘅套餐，最後我地揀咗虎鐵精選二人餐。沙律先來沙律開開胃，簡單又清新的蕃茄沙律，醬汁酸酸甜甜好開胃鴨肝蒸蛋開始進入熱食，先來鴨肝蒸蛋。一嚟到嘅時候，已經聞到好香嘅鴨肝香味，入口味道香濃；蒸蛋十分香滑，有蛋味而無太多額外的調味，第一道已經十分有驚喜。大虎蝦之後進入主角，首先係大虎蝦。由於menu一早已說明係虎蝦，所以我都知道會係啖啖肉的大蝦，但係嚟到之後依然被surprised真係好大隻!! 整隻蝦以鐵板烤焗方式整到十分金黃香脆，亦都好貼心地已經分開蝦頭蝦身；蝦肉鮮甜彈牙，非常厚身，而蝦頭配上蝦膏製成的醬汁，鮮味濃郁南非鮑魚鮑魚size也不少，燒得剛剛好，上碟前已切好一片片，每一片都可以沾滿伴碟的魚子和蟹肉醬汁，令到整到菜的口感和味道都提升不少日本A5和牛厚燒呢個又係令我十分期待，由於我的位置可以長期見到師傅烹調，當我見到佢開始整和牛的時候我都特別留意，希望上碟時候可以食到外脆內嫩的效果。果然不負所望，外層香脆，內層做到5成熟，油脂平均，肉質鮮嫩，再加上新鮮的時蔬，很滿意!三文魚子海膽杯炒飯一道十分photogenic的菜式，用高身玻璃杯上菜，炒飯的份量剛好控制在杯身，上面鋪滿三文魚子同海膽，接近滿瀉的份量真係啖啖都食到三文魚子同海膽的鮮甜最後仲有麵豉湯，正式完成充滿不同味道和口感的熱食，最後可以選擇甜品或者咖啡作結。整體而言，每一道菜都十分有驚喜而且食得出師傅對食材的認識和鐵板燒的技巧，下次一定會再嚟!…Read More

以前同朋友經常去大圍打邊爐，自從執咗之後就無再去過了，最近聽朋友話同一個位置開咗間超抵食嘅火煱夜題，見今晚涼涼地就同男朋友去試下。入座安排十分好，一開始就會介紹清楚放題嘅流程、任食項目等等，之後先來一盤熱水清洗食具，係依家咁注重衛生嘅前題下，呢個真係加分，保證食得安心先。呢度個放題好特別，由頭食到尾有八個items，就好似玩過關遊戲咁順住落，當中有啲items只可以食一次，其餘就任叫。1. 肥仔四小吃首先有小食，麻香黑雞腳、話梅鴛鴦苦瓜、避風塘魚柳、黑松露蝦多士，每碟都係少少份量先開胃，最鍾意係黑松露蝦多士，食到入面係真材實料有蝦肉，唔似出面買嘅冷藏貨。2. 航空六刺食一開始以為食火煱放題，刺身只係搭單，估唔到都係高質素，每一樣都好新鮮，特別係三文魚厚切肥美，帶子鮮甜，不過只可以叫一次不可以任食。3. 酸菜魚 / 水煮魚 / 火焰醬爆鑊仔雞任食items，但係第一次嚟嘅份量已經好大份，我地叫咗酸菜魚。魚肉嫩滑，湯底清甜，豆卜同菜完全入味，好開胃，加上湯底仲有水晶粉，絕對不馬虎，食完都已經有啲飽。之後我地仲試咗鑊仔雞，又係足料份量，醬汁惹味，雞件嫩滑，好有鑊氣!!4. 胡椒豬肚湯之後就到打邊爐嘅部份啦，好似已經食咗好多野先入正題。湯底香濃，好重嘅胡椒味但又不搶喉，仲有好多豬肚，夠哂足料!!5. 深海郵輪全晚最令我期待的就係呢個深海郵輪，因為我好鍾意食海鮮，鮑魚、海蝦、帶子、青口、大硯，全部都好新鮮，青口同鮑魚仲係新鮮識郁架!! (後尾去廁所見到有大魚缸養住啲海鮮，唔怪之得咁新鮮!!)6 / 7. 豬牛、火煱料任食打邊爐最緊要的肉食，男朋友岩哂，結果都無令我地失望，而且仲有新鮮炸嘅魚皮、響鈴，放落咁香濃嘅湯底真係好好味!呢一餐真係超滿意，仲要酒水任飲，埋單先係$275一位，好抵食!!!…Read More

自從疫情成日留係屋企之後，好耐無試過同男朋友好好出街食餐飯。今日心血來潮好想去拍下拖，於是揀咗LAB EAT好好約會食個晚餐。一直好喜歡呢間餐廳，每一次都好有驚喜，今晚都唔例外。晚餐之前先來兩杯cocktail，我叫咗 Litchi & Roses，係我好喜歡的gin based，滿滿的荔枝玫瑰香氣，係甜美的開始；而男朋友就揀咗Four Leaf Clover，whiskey based 加上薄荷同埋citrus，比較中性的味道，岩哂男朋友! 飲品嚟到時再加上煙霧汽球，真係視覺同味覺上都十分衝擊，飲品已經要打卡!!點好菜，先來一點麵包作前菜。麵包係熱架，呢點好重要，再加上油醋，同男朋友去歐洲的畫面返哂嚟，麵包就係應該咁樣食! 無幾耐，先到頭盤 澳洲龍蝦肉及牛油果他他配意大利黑魚子醬。淨係賣相已經好賞心悅目，色彩績紛，味道亦十分豐富。底層的龍蝦肉份量十足，鮮甜可口，加上牛油果一起做成他他，口感豐富又嫩滑，加黑魚子醬，是另一層的鮮味，再配搭甜的raspberry果乾及熱情果醬，材料豐富之餘味道卻又十分和諧，十分開胃，好欣賞大廚的創意配搭!之後再來生蠔，來自紐西蘭，入口鮮甜又creamy，海水味剛好，小試兩隻已經覺得好滿足!豐富的頭盤之後，就到精彩的主菜! 首先係 Cheese Wheel Carbonara，又係眼球衝撃的一道菜! 作為Carbonara愛好者，就係十分期待每一啖意粉都係掛滿濃濃的芝士。大廚將carbonara煮好後，倒入cheese wheel中，之後就會拎到我地面前用餘溫沾滿芝士再上碟，一路睇住整個過程一路聞到飄出嚟的芝士香。而且意粉十分al dente，剛剛好，有芝士香又有咸香，好高質的carbonara !之後就係鱸魚配慢煮西班牙八爪魚，魚質鮮甜，皮脆肉嫩，最令我驚喜的係慢煮八爪魚。起初以為咁大條八爪魚肉質會韌，結果是出奇地鮮嫩，啖啖肉再沾上橄欖油香，好滿足的海鮮dish。最後就係甜品，亦係我十分期待的，因為又係打卡item! 朱古力球，淋上熱情果醬後，打開入面係雲呢嗱雪糕，三種味道融合一起，連不太食甜品的男朋友都話係個perfect end。呢一餐飯真係食得好開心，由頭到尾都充滿驚喜；期間服務員主動幫我地換碟，而且經常幫我地加水，服務態度真係要大讚，應該無幾耐之後就會再嚟!!…Read More

爸爸好鍾意食燒鵝，難得今晚有時間同佢食飯，我就提議不如去食燒鵝，其實之前都食過一次，就係覺得好味所以今晚又再去!!晚飯時間六點鐘左右去到，都已經有唔少人。坐低之後，即刻叫姐姐留一份下庄先，再睇睇餐牌，我再叫多個燒味飯，另外爸爸想試下脆麵，於是兩個人就叫咗三份首先主角出場，一係唔食要食就食下庄啦，一大隻燒鵝脾，爸爸食得好開心。入口香濃，肉質又嫰又厚，重要係燒鵝皮燒到又脆又香，啖啖肉汁，高分! 而我的燒味飯亦都係高質出品，叉燒肥瘦適中，肉質鬆軟，最重要係味道十分討好；而油雞亦都好嫩滑，肉味香濃，配埋薑蓉，成碟飯食哂!!之後就到蝦球脆脆麵，最令我欣賞的係脆麵同蝦球係分開上，咁樣脆麵就唔會因為蝦球而變腍，食到最好都依然係咁脆! 蝦球十分彈牙，大隻有啖啖嘅鮮味，加上有蛋花濃湯一齊食，兩個人真係清哂三碟! 爸爸仲話，下次再食!…Read More

妹妹是拉麵愛好者，口袋一直有好幾間拉麵店想試，今日剛巧同佢出嚟尖沙咀行街，所以就去武士拉麵食晚餐。見到大家的評價都好好，我地都想試好耐架啦，好期待。門面不大，係一張長枱對住師傅製作，好似去咗東京街頭的小店一樣。一坐底，有自助式嘅綠茶，餐牌當然係主打拉麵，另外仲有一啲小食。只計拉麵都有成十款咁多，我地揀咗好耐，因為真係款款都好想試而且每款湯底都好特別! 經過一輪爭扎之後，我同妹妹分別揀咗「豐臣將軍拉麵」同埋「織田將軍拉麵」。豐臣將軍拉麵 - 四國香蔥油拉麵我係蔥蒜控，見到香蔥油湯底就已經心心眼，嚟到亦都無令我失望，有大量的蔥香芝麻香。先試一啖湯底，湯底清甜，有陣陣的豬骨香，加上麵質控制做得好好，掛湯之餘又不會過稔；叉燒亦十分出色，肥瘦適中，入口嫩滑。織田將軍拉麵 - 鹽味豬骨湯拉麵妹妹喜歡比較傳統的味道，簡單如豬骨湯就已經令佢好滿足。看似簡單但其實食得出師傅花了不少心機在湯底上，濃香而不油膩，加上叉燒的香氣，妹妹都話好食!如果希望口味多啲層次，師傅亦自家製了魚介味油，可以提升味道。一邊食一邊聽到師傅同其他客人自家製的過程，大概是要自己將魚仔燒好再封乾打成粉，咁用心製作的小店真係大加分!!本來一開始我是想食北海道牛乳湯底，一問之下才知道是季節限定，不過不要緊，一定會再返嚟食!!…Read More

今日要去銅鑼灣見客，見有空檔就周圍行下，係門口被丼飯吸引，最近又心思思想食日本菜，一個人就入去試下。睇睇餐牌有好多不同款式的丼飯，真係咩都想試下，不過前兩日食完刺身所以今次就試下「慢煮安格斯牛小排丼」。首先，丼飯有沙律前菜同麵豉湯。沙律菜好新鮮，配埋酸醋汁十分開胃；而前菜係鴨胸肉，都係淋上少少酸甜醬，再飲埋麵豉湯，係好standard又開胃嘅前奏，十分期待主角出場。等多一陣，牛小排丼就上碟，賣相十分吸引。牛小排做到外脆內嫩，好香濃的牛香，食落仲有啖啖肉汁，再加上溏心蛋的蛋香、牛肉的肉汁、珍珠米，仲有花心思的小配料脆蒜、香蔥，每一啖都十分滋味，而且味道豐富。特別要一讚店舖選用日本珍珠米，飽滿嘅飯粒同蛋汁肉汁完全融合，即刻加分!! 下星期又要嚟銅鑼灣，一定會再試下其他丼飯!!…Read More

今日早咗收工，特登去觀塘買甜品食，咁啱朋友介紹呢間「古今二」又係觀塘，主打特式壽司，咁就去試下啦。我地晚市六點開始就入座，服務員好貼心奉上熱茶同介紹餐牌，由於係第一次嚟所以又問下有咩推介，最後我地叫咗「彩虹卷」、「富士山」、「煙花」，另外仲有日本溫室南瓜沙津、日式冷麵同埋秋葵蝦肉天婦羅。首先出場的係溫室南瓜沙律，完全深得我心，南瓜的甜味加上洋蔥的爽脆，入口順滑飽滿，推介!! 之後就送上特式壽司，三款放埋一齊好壯觀，而且原來自己叫咗咁多，畫面豐富之餘份量都十足。彩虹卷上面有三文魚、吞拿魚、牛油果，而入面就係蟹柳同青瓜，內裡爽脆外層新鮮；富士山 有蟹柳、鰻魚、牛油果、脆片，鰻魚同牛油果嘅組合十分和諧，加上每件都分到大量蟹柳絲，仲有脆片入口卜卜脆，味道出奇地夾；煙花有三文魚同吞拿魚蓉，新鮮味美再加上脆片，軟硬組合好特別! 食完之後就嚟個日式冷麵，好經典的配料，再加上清新的醬汁，麵條爽口彈牙，一路食一路話有少少係日本的感覺啊；最後仲有一個秋葵蝦肉天婦羅，見到呢個組合幾新奇所以試下，一試就知係心機野。蝦膠彈牙，入口有陣陣鮮味，再釀入秋葵，很難得係鮮嫩的秋葵 (無渣!)，炸脆之後再沾上天婦羅汁，好好味啊媽咪!!朋友果然無介紹錯，每一次上菜都係驚喜，一定會再返嚟食!!…Read More

自從南豐紗廠活化之後都未去過，咁啱今日有時間就同男朋友去行下，有好多小店同cafe，又有好多打卡位，都幾適合消磨一個下午。行到咁上下見到呢間餐廳，好特別主打健康食物，而且遠觀見到入面每一款食物賣相都好吸引，所以就入去試下啦。一坐低店員已經好貼心遞上餐牌，揭開每一頁都色彩豐富，有選擇困難症嘅真係揀咗好耐，最後男朋友叫咗 十二野菜烤三文魚飯 + 西柚梳打；而我就叫咗新加坡辣蟹炒烏冬 + OREO奶昔。一講再講，食物的賣相真係好吸引，特別係男朋友嘅  十二野菜烤三文魚飯 一打開真係嘩一聲，而且聞到好香嘅燒魚味，十二野菜十分精緻，完全與圖片相附。三文魚燒得好好，皮脆肉嫩，夾埋燒汁同珍珠米，加上有十二野菜平衡返三文魚的油脂，每一啖都好滋味。而西柚梳打都不馬虎，有果肉果香，十分清新，啱哂鍾意飲有汽飲品嘅朋友。而我嘅新加坡辣蟹炒烏冬亦都不相伯仲，一上碟已經聞到好香嘅蟹味，用類似天婦羅的方式處理蟹肉，香脆可口，而且份量都唔少喎；而烏冬就沾滿香辣蛋汁，開胃少辣，而且烏冬都處理得好好，每一條都好Q彈，又係啖啖滋味。最後我地一齊飲OREO沙冰當甜品，除咗有沙冰亦都有OREO餅乾，口感不錯，而且好大杯兩個人share剛好! 呢一餐超滿足，十分推薦嚟開南豐紗廠嘅朋友試下!!…Read More